رواية ما تراه ليس كما يبدو الفصل الثاني 2 بقلم حبيبة منصور
لقراءة الرواية كاملة بدون إعلانات (اضغط هنا)
رواية ما تراه ليس كما يبدو الحلقة الثانية
( هدى) : الحق يا حج البت ماشيه وسايبه البيت ومش عايزه تقعد وعماله تصوت
« لاول مره مقدرش ادافع عن نفسي ، انا مش عايزه امشي
امشي اروح عند مين ، ولا امشي واسيب بابا ازاي
مقدرتش اتكلم ولا كلمه ، ولو فضلت قاعده هتعمل مشاكل كتير ل بابا ف الشغل بسبب التوكيل اللي عاملهولها
طب اروح اقعد مع مين !!
هرتاح فين غير هنا!
امشي واسيبه ازاي …
فوقت من التشتت ده على صوت كدبها
_ والله يا حج زي ما بقولك كده البت دخلت لمت الهدوم وخربت الدنيا لما قولتلها تقعد ،اصل يا حبة عيني هتروح فين ،البت ملهاش الا بيت أبوها ،اصلها مش ولد عشان يروح ف اي حته
« كمية حوارات فيها مش طبيعيه، انتي ازاي بني ادمه عادي كده زينا ، و ايه كمية التمثيل دي ،بس حقيقي مبدعه يعني أنا اهو صدقتك ، هو مش هيصدقك !!، بصيت ل بابا على امل يقول اي حاجه »
حسن : رايحه فين يا ست هانم ، عايزه تسيبي البيت وتمشي؟! ، ولامه هدومك كمان ؟!
« بصيتله وانا عيني كلها دموع ، عيني كانت كفيله انها تقول كل حاجه ، بس بابا مش هيفهمها ، نظراتي ليي قالت كل حاجه لساني مش قادر ينطقها، اقوله ايه ؟ ، اقوله أن هي الي لمت هدومي ف أعفن شنطه وبتطردني وانا مش عايزه امشي ؟؟ ، طب هو هيصدقني؟ »
حسن : ما تنطقي ساكته ليه
رديت عليه بصوت فيه كل الخنقه اللي في الدنيا
_هقول ايه يا بابا
حسن : ادخلي جوا يا حوريه بدل ما اتعصب عليكي وساعتها هتشوفي وش عمرك ما شوفتيه ، قال تسيبي البيت وتمشي قال ، ليه؟؟, ملكيش حاكم؟! ، محدش قادر عليكي
والناس اللي جايه بكره دي عشان تشوفك،اقولهم ايه
اقولهم بنتي انا مش قادر اربيها وسابتلي البيت ومشيت
مش هعيد كلامي تاني هتدخلي تنامي و بكره هتقابلي العريس ده ،هتقولي غصب يا بابا هقولك اه هو غضب و ده اللي عندي
« مش عارفه افرح انه صمم على وجودي ومسابنيش امشي
ولا أنه بيغصبني على حاجه مش عيزاها »
_ حاضر يا بابا اللي تشوفه
« مش مهم خالص يسمعني ولا لا عشان خلاص ده بقى العادي ، ايه يعني اقعد مع عريس ، طب بالعكس بقى لو بقى كويس هخليه ياخذني ف اسرع وقت من البيت ده »
هدى: طب ادخلي يلا بقى على الاوضه بدل الفضايح اللي عملتيهالنا دي
« دخلت الاوضه وانا جوايا نار بجد , طلعت صورة ماما من الشنطه وقعدت اتكلم معاها »
ماما حبيبتي ، انتي وحشتيني اوي ، زعلانه منك جدا انك سيبتيني لوحدي ، شايفه يا ماما بابا بيعمل معايا ايه
مش عارفه اعاتبك انك معرفتيش تختاريلي اب حنين يحتويني ولا اعاتبك انك مربتنيش اني ابقى قاسيه وقويه واقدر اعتمد على نفسي ، عارفه يا ماما انا حاسه ب ايه دلوقتي ، حاسه ان قلبي واجعني أوي ومقبوض ،دماغي هتنفجر وعيني وجعاني اوي يا ماما ، نفسي تاخديني ف حضنك اوي ، على فكره انا روحت النهارده طلبت لك سبح كتير اوي و هوزعها عشان انا بردو بحبك ، بكره لما العريس يمشي هاجي ازورك واحكيلك كل اللي حصل
« مقدرتش اتكلم من كتر العياط ف شيلت الصوره وخرجت اتوضى عشان اصلي لقيت الحيزبونه ف وشي ، ياادي النيله انتي مش بتنامي يا وليه انتي ؟! »
_ رايحه فين يا آخرة صبري
مردتش عليها ، ودخلت عشان اتوضى
هدى : شايفه البت قليلة الحيا مبتردش ازاي
والنبي دي جايلها عريس على خيبة ايه دي لا شكل ولا منظر
إسراء: شيليها من دماغك بقى يا ماما ، اهي هتتجوز وتغور بعيد
هدى: وهو انتي مفكره اني هخلي بكره يعدي عادي كده
نور: والله يا ماما عندك حق ، فعلا مش لازم يعدي عادي ، هو من امتى اصلا اليوم بيعدي عادي ، لازم انتي اللي يتنكد عليكي وتضايقي ف الآخر وبيحصل عكس اللي انتي عيزاه
روحي شوفي عمو بقى بدل ما يقلب عليكي انتي كمان
هدى: متقوليش عمو دي بدل ما يسمعك، قولي بابا عشان يفضل حاببكم كده
انا مش ناقصه نكد خالص
____________________________________
« دخلت هدى بطيبه مصطنعه »
_حسن يا حبيبي ، بالله عليك ما تضايق نفسك ، هي البت دي طول عمرها كده هتعمل ايه يعني ، يعلم ربنا اني بعاملها أحسن من ولادي ، بس انت زي ما بتشوفها كده شويه عامله خرسه ومبتردش ولو ردت بتشوف أسلوبها عامل ازاي ، انا اصلا استغربت أنك وافقت تخليها تروح الفرح
= قالتلي زميلتها ولازم تروح مرضتش ازعلها وهي كبيره كفايا مش صغيره
_ يا راجل انت عايز تشلني!! ، اديك شوفت البت رجعت الساعه كام طب الناس تقول ايه عليك وهما كلهم عارفين انك مسافر
و هي البت طالاما مش حابه تقعد في البيت متجبرهاش،خليها تقعد مع خالتها واهو تبقى عارف هي فين بدل ما تلاقيها طفشت مره واحده كده من نفسها
ولو على العريس هو كده كده مشافش البت زي ما بتقول يعني اول مره ، يبقى خلي نور هي اللي تطلع
= بقولك ايه الكلام خلص خلاص ، وهي هتقعد مع الواد غضب عنها ، ومش هخليها تسيب البيت هي مش سايبه عشان تروح وتسيب بيت أبوها ، وانا هعرف اربيها كويس
_ والله يا اخويا اللي يريحك يارب بس متعملش حاجه قدام الناس و تكسفنا
= نامي يا هدى عشان انا مش طايق الكلام مع حد
_ انا غلطانه ياخويا اني عامله عليك وعلى بنتك، مش عارفه ايه البيت اللي الناس فيه مش طايقينلي كلمه دول
= انا نازل اصلي الفجر عشان لو فضلت ضغطي هيعلى وهروح ابات في الشقه اللي جمب المصنع عشان هخلص شغل واجي قبل ما الناس تيجي
_______________________________________
_ قومي يا آخرة صبري
= في ايه يا مرات ابويا
_ قومي يا اختي شوفي الدنيا تضرب تقلب وانتي نايمه
« بصيت ف الساعه لقيتها ٦ الصبح ، طب انتي نمتي ولا انتي سهرانه ولا انتي مش لاقيه حاجه تعمليها ع الصبح »
= اقوم اعمل ايه الساعه ٦ انا مبقاليش ساعه نايمه
_ هتقومي تشوفي البيت يا دلعادي ، تنضفيه وتكنسيه من اوله لأخره وسيراميك المطبخ عايزاه يلمع ، عشان الضيوف اما تيجي متتكلمش علينا ، كفايا البلوه اللي هتخليهم يدعوا علينا طول حياتهم
يلا قومي هتقعدي متنحه كده كتير ، وحضري الفطار بعد ما تخلصي وصحيني
= مش قادره أقوم أنا نعسانه
_ والله و طلعلك لسان يا اختي وبتردي اهو ، وبعدين ايه مش قادره دي انا مش بخٓيْرك يا دلعادي ، كفايا اني مستحملاكي و مطردتكيش وقت ما اتجوزت ابوكي
___________
« قومت أعمل اللي قالت عليه، اصل ده إجباري وروتين يومي نكد الصباح بتاعها ده ، روقت البيت وكنسته من اوله لاخره ورجعت تاني مسحته ، وفرشت الحاجه تاني كويس
بعد كده دخلت ع المطبخ ، ده مش مطبخ ده إعصار
ابتديت أنضف الحاجه واحده واحده ، وغسلت المواعين
وعملت حلويات و أكل للناس اللي جايه
وحضرت فطار ، ٦ ساعات متواصلين وانا بعمل ، الضهر على آذان اهو واللي تنام عليهم حيطه مقاموش”
مرضتش اصحيها،خليها مخموده ، عقبال ما تنام النومه الابديه
دخلت نمت وصحيت الساعه ٦
كان فاضل ساعتين على ما ييجوا ،دخلت خدت دش واتوضيت وصليت المغرب ولبست دريس برجاندي وطرحه كبيره رصاصي لفيتها كويس بشكل ساتر
بصيت لنفسي ف المرايا وعيوني ماليها الحزن والوجع
وشي باهت،مطفي، مش عارفه حتى ابتسم لنفسي عشان اما اطلع للناس اعرف ابتسملهم
سامعه صوت دوشه براا ، شكله جه
________________________________________
حسن : اتفضلوا يا جماعه البيت بيتكم
« نور و إسراء واقفين يبصوا عليه من جوا »
نور: يلهويي يا اسراء الواد حلو مووتت ، شكله كاريزما كده وعسل
إسراء: اه ، ده بقى لو عرفتي تخليه يعجب بيكي انتي تبقي بنت امك صح
نور: متقلقيش بالدريس ده والميكب والشعر التحفه ده مستحيل معجبوش
« دخلت هدى عليهم »
هدى: ما تخلصي انتي وهي عايزه واحده منكم تطلع الاول بالعصير
إسراء: اكيد مش انا طبعا ، انا محجوزه ل ابن خالتي
هدى بتريقه: و ده مين اللي حجزك ان شاء الله
إسراء بلماضه: انا حجزت نفسي ومش هتجوز غيرو
هدى : بس يا بنت الهبله انتي اصلا مش ف دماغ الواد
تعالي انتي يا نور يا حبيبة قلب امك طلعي العصير لحد ما اروح أشوف آخرة صبري دي خلصت ولا لسه
______________________________
حسن: منور يا احمد يا ابني
احمد: الله يخليك يا عمي
حسن: منور يا حج , منوره يا حجه
_ الله يخليك يا حج
« دخلت نور عليهم بصينية العصير ، فستانها الضيق ،شعرها الطويل ، مشيتها الغريبه ،»
احمد بصلها باشمئزاز ورجع بص ل أهله
ازاي يجيبولوا عروسه زي دي ، هو اصلا مكنش موافق من الاول انه ييجي
حسن: حطي العصير هنا يا نور يا بنتي ، دي نور الوسطانيه
هناء ام احمد : زي القمر يا حبيبتي
حسن : روحي يلا يا نور نادي حوريه
____________________________
= خليكي مكشره ف وشه كده لحد ما يطفش
« بصتلها ببرود و دموع ف نفس الوقت وأنا مش قادره ارد على كلامها اللي بتسم بدني بيه كل شويه »
دخلت نور ببرود : كلمي يا سنيوره بابا عايزك
هدى: استني هطلع انا الاول وانتي هاتي تعالي ورايا
____________________
هدى : منورينا يا جماعه والله
هناء: ده نورك يا حبيبتي
دخلت حوريه ومعاها صينية عصير
حسن: تعالي يا حوريه يا بنتي سلمي عليهم
« احمد بصلها ب اعجاب و بيذكر الله ف سره »
هناء: اللهم بارك عليكي يا حوريه زي القمر يا حبيبتي
اسم على مسمى فعلا
هدى عماله تبصلهم بطرف عينيها وبقرف
عدلي ابو احمد : تسلم ايد اللي عمل الحلويات دي
« لسه هقوله الله يسلمك يا عمو لقيت مرات ابويا بتتكلم»
هدى: ده انا واقفه من صباحية ربنا عشان اعمل الحلو كله للغاليين
عدلي: الله يعزك يا حجه
هدى: بس متقلقوش طالاما هتاخدوها يبقى هعلمها الطبخ هي مش قد كده اه ف شغل البيت بس هتتعلم ولا ايه يا حوريه
هناء : يا اختي كله ييتعلم متقلقيش ، هي زي القمر و مؤدبه و ده اهم حاجه
هدى بهزار مصطنع: دي ربنا هاديها فعلا النهارده سبحان مغير الاحوال
« عملت نفسها بتضحك: ههه دي حبيبتي حوريه دي
إسراء: اه طبعا دي حبيبتنا كلنا
هدى: قومي يا حوريه يا حبيبتي اعملي قهوه ، عارفه بتتعمل ازاي ؟!
نور : اقوم أعملها انا؟ ، بعملها حلوه جدا
عدلي : لا يا جماعه عايزين نشربها من ايد حوريه
حوريه عينها ف الأرض من ساعة ما دخلت مترفعتش على اي حد ، عشان محدش ياخد باله من شكلها المرهق ، الحزين
_’______________
«قومت اعمل القهوه ، ما كنت صدقت كتمت العياط وهديت لازم يعيطوني تاني ؟! »
جابت القهوه و داخله بيها وعنيها ف الأرض
فجأه هدى مدت رجلها وشنكلتها خلتها وقعت القهوه على احمد
حوريه بتوتر: أ …أنا ….أنا اسفه جدا
هدى: اسفه ايه بس ده انتي بهدلتي الواد ، مش عارفه تمشي!!
احمد: حصل خير يا جماعه بعد اذنك وديني الحمام وهاتي اي حاجه امسح بيها القميص
دخلت بيه وورته مكان الحمام ولحد الان مشافتش شكله
غسل القميص ، ناولته المنديل ولسه هتمشي ندهه عليها
_ رايحه فين يا سندريلا!!
وقفت مصدومه، بصيتله : ايه ده هو انت!!!
يتبع….
اشترك للحصول على أحدث التدوينات المرسلة إلى بريدك الإلكتروني.
ليس لديك حساب؟ إنشاء حساب
التعليقات (0)
لا توجد تعليقات بعد. كن أول من يعلّق!