رواية رواية خطأ مغفور الفصل ٤٥ بقلم دجلة ليث

🦅 43

           الكاتبة: دِجلة ليث .
                         بقلمي رواية: خطأ مغفور .

            "لا تنسون التصويت + التعليق بين الفقرات "
                
                               بِسْمِ اللَّـهِ الرَّحْمَـٰنِ الرَّحِيمِ
                                     _________________________

ترف

لحظات ورجعت حسيت روحي انشالت بحضنه يركض بيه ركض للمستشفى والادعيه واسماء الامة ما نزلت من حلكة وما مل ابد ما جان يمل وضل ينخي ويكول "دخيلك يابو فاضل انهبنا"
وصلنا للمستشفى وعرفت من صار يصيح بصوت عالي حتى يجون الدكاترة خلاني على السدية لازم بايدي عاصرها بايده ويمسح على راسي ما اتذكر شنوا يكول  اني بعد خلص من الالم غمضت عيوني وبس عصارة ملابسي بايدي الثانيه  من الوجع دخلوني يم دكتورة نسائيه فورا
حسيت بيها من شالت التيشيرت وتريد تفحصني فتحت عيوني الدموع متجمعه بيها درت وجهي عليه همستله بصوت ناصي يرجف كوة ينسمع

ترف: علي الدُر اطلع

عصر ايدي حيل حسيت عظامي راح تتكسر عيونه صارت دم صك على اسنانه وكال
علي الدُر: ما اطلع ترفة

-:علي أترجاك اطلع جاي اموت بس اطلع دخيلك علييي

رجفت شفايفه، وكل ملامحه انهارت بثانية وصاح بصوت ثكيل منهار
علي الدُر : لججج شلون اعوفججج واطلعع ترفة

الدكتورة: ابني اطلع بس أفصحها لا تخاف يمي بأمانتي هي

ما تحرك، ما رمش، بس ظل يباوع، ينتظر أي شي مني حتى ما اخلي يروح
علي الدُر: ترفـة

درت وجهي عنه دلاله ما اريد اسمعه هد ايدي مستسلم ل كلامي وطلع برة الدكتورة صفنت بوجهي من شافتني ابجي حيل  وكاتمة صوتي بايدي ما اريده يسمع

الدكتورة: حبيبتي شبيج لا تبجين بس شوية تحملي افحصج واشوف شبيج

ترف: متأذية بطني جاي اموت

-: اي ميخالف عمري اصبريي شوية هسة نشوف لا تخافين عيوني

خلت سائل بارد على بطني  بس اني من جوة جاي احترك نار تغلي بداخلي عصرت الجرجف والوب بمكاني من الالم و النزيف ما توقف
ضلت الدكتورة تفر بالجهاز على بطني لحد ما استقرت بمكان ابتسمت و اندارت عليه وكتبت بفرح مليان

الدكتورة: حبيبتي مبروك انتي حامل

فتحت عيوني، ظليت باوعة عليها بصدمة حسيت روحي كلها تجمدت الألم، الدموع، النزيف، كلشي وكف بثانية وحدة طبله راسي نملت من كلامها

ترف: شنوو؟!

كلمة وحدة، طلعت من حلكي بصعوبة لأن عقلي ما جاي يستوعب الي كالته شعور غريب بداخلي ومشاعر متناقضة