رواية اسيرة الغريم الفصل العاشر 10 بقلم ولاء رفعت علي

#الفصل_الحادي عشر🌹
#أسيرة_الغريم
#ولاء_رفعت

اتسعت عيناها بصدمة امتزجت بالغضب، وتبدلت ملامحها في لحظة، حدقت فيه غير مصدقة جرأته على اقتحام غرفتها بهذه الطريقة، ثم سألته بحدة وهي تشير إلى الباب:
– إنت إيه اللي جابك هنا؟، اطلع بره بدل ما أفضحك قدام كل اللي في القصر.

لم يبدُ عليه أنه تأثر بتهديدها، بل ارتسمت على شفتيه ابتسامة مستفزة، تحمل من السخرية أكثر مما تحمل من المرح، ثم أجابها ببرود أربكها:
-كنتِ عملتيها من زمان.

اشتعل الغضب في عينيها، ورفعت ذقنها في تحد، محاولة إخفاء الاضطراب الذي أثاره وجوده المفاجئ في نفسها.

-لمّ نفسك يا هشام، بلاش أنا!، أنا اللي فاهماك كويس.

أطلق هشام ضحكة قصيرة، ثم أخذ يتأمل وجهها بنظرات ثقيلة، قبل أن يقول بنبرة ساخرة، تختبئ خلفها مرارة قديمة لم تندمل جراحها:
– وطالما فاهماني، ليه اخترتيه هو؟ ليه صفوان بالذات، وهو مش بيحبك ولا عمره هيحبك!، وأنا وإنتِ عارفين كويس إنه مجبور على جوازكم، وإنه مش عايزك.

تجمدت ملامحها للحظة، لكن هشام لم يمنحها فرصة للرد، بل واصل هجومه، وكأنه جاء إلى غرفتها محمّلًا بكلمات ظل يحبسها في صدره طويلًا، حتى لم يعد قادرًا على كتمانها:
-ولا نسيتي إنه طلقك بدل المرة تلاتة؟

شهقت بغضب، واشتعلت عيناها بنظرة حادة، صاحت فيه:
-لاء إنت اتجننت بقى؟!، بقولك إيه يا هشام، إنت واضح إنك شارب لك كاسين، وضارب معاهم سيجارة من إياهم، وجاي تطلعهم عليّا، اطلع من هنا بدل ما أقسم بالله…

لكنها لم تستطع إكمال تهديدها، ففي حركة مباغتة، مد كفه وكتم فمها، مانعًا إياها من استكمال حديثها، بينما انقلبت ملامحه من السخرية الباردة إلى قسوة صريحة، وانحنى نحوها قليلًا محدقًا في عينيها بنظرات مشتعلة.
يخبرها بصوت خفيض، لكنه مشحون بوعيد لا تخطئه الأذن:
– مش أنا اللي بتهدد يا دارين.

أبعد كفه عن فمها، دون أن يتراجع عن وقفته المتحدية، واستطرد بنبرة أكثر قسوة:
-وخليكي فاكرة كويس، عمري ما هنسى اللي عملتيه فيّا زمان، عمري ما هنسى اللي وصلتيهولي، ولا اللي عملتيه في قلبي.

تلاحقت أنفاسه، وراحت عيناه تلمعان ببريق مظلم، فيما كانت الكلمات تخرج من فمه كأنها شظايا نار يقذف بها في وجهها.

-وأنا لسه على وعدي ليكي… زي ما حرقتي قلبي هحرقلك قلبك، وقلب كل حد بتحبيه.

توقف لحظة، ثم ارتسمت على شفتيه ابتسامة باردة، قبل أن يضيف بنبرة تحمل شماتة واضحة:
– وجزء من وعدي اتحقق لوحده، من غير ما أبذل أي مجهود، كفاية إنك بقيتي مذلولة لصفوان، بتشحتي منه العطف والحب، ولا محاولاتك الرخيصة معاه كل شوية، لما تدخلي له جناحه وتبوسي إيده عشان يرجعك ليه بأي طريقة.