رواية اسيرة الغريم الفصل الثاني 2 بقلم ولاء رفعت علي

#الفصل_الثاني
#أسيرة_الغريم
#ولاء_رفعت

–أنا حامل.
وعلى نقيض هواجسها التي أظلمت مُخيلتها، حيث توجست أن يثور ويستشيط غضباً، ويُمطرها بوابل من الألفاظ النابية كما اعتاد سلفاً، بادرها برد تنضح منه البرودة، وجواب لا مبالاة فيه، إذ قال بنبرة متبلدة:
—وأنا أعملك إيه؟، المفروض إنتي عارفة اللي هتعمليه.

عقدت ما بين حاجبيها في ذهول، وقد أدركت مآرب قوله المسموم، فاستكانت بجواره على الأريكة، وصوتها يتهدج بالخوف والرجاء:
—المرة دي مش هينفع أجهض، الدكتور آخر مرة حذرني لو أجهضت يا هتحرم أكون أم، يا إما هيبقى فيه خطر على حياتي.

ألقى بظهره إلى الخلف، مستنداً إلى الأريكة بأريحية فجة، وكأن الأمر لا يعنيه من قريب أو بعيد، ثم أردف باستخفاف:
—دكتور حمار شكله خرف.. تعالي هوديكي عند واحد أحسن منه، وهتقومي منها زي الحصان.

انتفضتْ واقفة أمامه في كبرياء جريح، ورمقته بنظرات يمتزج فيها الضيق بالتحدي، وهتفت بصلابة:
—وأنا مش هسقط اللي في بطني يا مؤمن، وإيه رأيك بقى؟، هتكتب عليا عند مأذون والنهاردة كمان.

انطلقت منه ضحكة متهكمة، كانت في حقيقتِها قناع زائف يواري خلفه شيطان مارد، لو أطلق عنانه لانتزع روحها من جسدِها قبل أن يُجهض جنينها.
انقطع ضحكه فجأة، وخاطبها بهدوء يسبق العاصفة:
—عشم إبليس في الجنة!، أنا كان اتفاقي معاكي من الأول إننا ننبسط مش أكتر من كده، وأظن من وقت ما عرفنا بعض بسطتك وكيفتك على الآخر.
ثم غمز لها بوقاحة أشعلت فتيل الغضب في عروقها، فغلت دماؤها، وأطلقت لسانها بصيحة هادرة:
—أنت وسخ.

فرد عليها بدم بارد ونظرة تنضح تهكم ومكر:
—مش أوسخ منك يا حياتي.
رمقته بنظرة كأنها لظى من الجحيم، ثم باغتته بتهديد صلب لا يعرف الهزل:
—طب بص بقى يا حيلتها.. إجهاض مش هجهض، ولو مكتبتش عليا رسمي خلال يومين هروح للسنيورة بنت عمتك وأقولها ابن خالك مجوزني عرفي قبل ما يكتب عليكي وهفضحك عند أهلك، وده كله كوم وإيصالات الأمانة يا عينيا اللي ماضيها بخط إيدك دي كوم تاني.

دنت مِنه أكثر، وعيناها تلمعان بوعيد جعل الرعب يدب في أوصاله، ثم أردفت بفحيح مسموع:
—هقدمها للحكومة وهم يتصرفوا معاك.

ضيق عينيهِ، وصارت الأفكار في رأسهِ كإعصار عاتٍ؛ فهو ليس بأحمق بحيث يدفعها لتنفيذ ما توعدت به.
أمسك يدها برفق مصطنع، وجذبها لتجلس حياله، غلف صوته بنبرة تفيض حنان ودفء ليروض ثورتها:
—اهدي كده يا حبيبتي، الأمور بتتحل بالعقل والتفاهم.. أنا النهاردة حنة أختي وبكرة فرحها، يعني مش هبقى فاضي غير بعد يومين، والمفروض أكون في البيت دلوقتي عشان أشوفهم لو عايزين مني حاجة، وأنا أوعدك بعد يومين بالظبط هنفذلك اللي أنتي عايزاه.

وسرعان ما استسلمت لسحر كلماته وهدأت ثورتها؛ فأنامله كانت تعبث بيدِها، وتمسدها بتؤدة بثت القشعريرة في أوصالها.
ازدادت رجفتها حين امتدت يده الأخرى لتداعب ظهرها بحميمية خادعة، واقترب بأنفاسه اللاهثة من ثغرها، هامساً بكلمات أذابت لُبها وفؤادها:
—كده تضيعي عليا الماتش تاني!، بس فداكي ألف ماتش يا هنون.
ثم اقتنص شفتيها في قُبلة، ليبدآ معاً رحلة غارقة في اللذة؛ لذة محرمة امتزج فيها طعم الخطيئة بمرارة الخيانة.