رواية غيث ونوسة – اسرار خلف الأبواب الفصل الحادي والعشرون 21 بقلم نوسة حمد

رواية غيث ونوسة – اسرار خلف الأبواب الفصل الحادي والعشرون 21 بقلم نوسة حمد

 

 

البارت الحادي والعشرون

 

#اسرار_خلف_الابواب21
#نوسه_حمد
بقيت محتاره في سلمي كيف بالسرعه دي تطلع شهاده من مصحه انو غيث جنا وهو الكلام دا م تما الاسبوع والرؤيه شبه اتضحت لي سلمي م كانت بتحب غيث شكلها حبتو عشان قروشو وكانت غاشاهو سبحان الله غيث كنت متزوجاهو سنين وحبيتو عشان نفسو م حصل عاينت لي قروشو ولا فضلتهن عليهو بالعكس لغايه م اتفارقنا كنت بحبو هو بس لا عارفه شغال شنو لا عارفه بصرف كم شكلهم الرجال ديل بحبو النسوان القادرات النسوان المسكينات بشوفو مسكنتهم ضعف وبستقلوهو م ندر البستمر وما بخون مرا مسكينه والشيطانات ديل اتلصقو فيهن لصيق بحبو الدراما غايتو الحمد لله وبقيت افكر اعمل شنو واهل غيث معقوله مَ يفقدوهو الزمن دا كلو اكيد في شي غلط وديل اهل اولادي وكنت بحترمهم وبشيلهم فوق راسي لمن يجونا في البيت بس لمن اتطلقت مافيهم زول رفع سماعه التلفون قال النشوف نسيبه دي اطلقت مالا ومعقوله م عرفو زواج غيث التاني غايتو في حاجات كتيره م مفهومه بقيت افتش ليهم في رقم لازم يلحقو ولدهم انا طلعت من عصمتو لقيت رقم اخوهَو اتصلت عليهو ردا علي قال لي منو معاي قلت ليهو نسيبه قال لي كيف اخبارك ان شاء الله بخير وغيث كيف وكريم كيف رده فعلو فهمت منها انهم م عارفين طلاقي وم عارفين عن غيث حاجه قلت ليهو محمد غيث طلقني ليهو سنتين قال لي شنو شنو غيث طلقك قلت ليهو اي والله واتزوج صحبتي سلمي قال لي سلمي البتجيك طوالي ديك قلت ليهو ياها قعد

 

اضحك قال لي دا م وقت هظار قلت ليهو متين انا اتصلت عليك وهظرتا معاك عمري م بهظر بالطريقه دي بس دي الحقيقه انتو غيث طولتو منو ولا شنو قال لي غيث مقاطعنا ليهو سنتين وامي لمن ماتت تهاتي بيهو قلت ليهو امك ماتت متين لا حول ولا قوة الا بالله العلي العظيم انا لله وانا اليه راجعون ربنا يرحمه ويغفر لها ويسكنها فسيح جناته يارب ودا كلام شنو قال لي نوسه والله جنس مآسي عشناها وغيث قطع علاقتو بينا وقال لينا لا تجوني لا بجيكم وما افتكرناهو طلقك اخبارو مقطوعه قلت ليهو انا والله لومتكم انكم م سالتو مني ولا من اولادي قال لي غير كريم عندك ولد قلت ليهو اي منه وكرم تؤام ولدتهم بعد اتطلقت من غيث قال لي سبب الطلاق شنو انتي زوله محترمه قلت ليهو قسمه وانقطعت قال لي اكيد في سبب قلت ليهو في سبب بس دا م وقتو عشان احكي انا بعد اطلقت من غيث ضوقني المره وبقيت متشرده بالولايات عشان هددني يشيل ولدي وانا ولدي صغير كان المهم رجعت وابوي بقا يحامي لي وهسي جيتكم بي كلام ورا اهلي وهم حزروني اني ما افتح خشمي مفتكره امك لسه بصحتها غيث زواجو من سلمي بطريقه غير شرعيه واذنب في حق نفسو وحقي وحق اولادي قال لي كيف زواجَو بطريقه غير شرعيه غيث جنا ولا شنو قلت ليهو للاسف غيث جنا وانا اتصلت عليكم عشان تلحقوهو قال لي جنا كيف فهميني ي بت الناس انا والله الفيني مكفيني َوعندي سكري م تخلعيني قلت ليهو محمد انا والله عشره غيث م بتهون علي وانا عارفه غيث كويس والان غيث في نظر اهلي سيئ لانو عمل حاجات تغضب ربنا قال لي كيف ي نوسه غيث زول بخاف ربنا بس الفتره الاخيره اتغير وعشان ي نوسه م تزعلي نحنا قلنا غيرتيهو انتي من ولدتي ليهَو الولد قلت ليهو عافيه ليكم في القلتو بس غيث م غيرتو انا غيرتو سلمي صحبتي قال لي طيب سلمي دي موش صحبتك وبتزكرها كانت متزوجه اتطلقت وعرستو ولا بعد طلقك اتطلقت وعرستو كدي فهميني دي قلت ليهو محمد والله سلمي لو كانت بت فتاه وغيث عرسا فيني م ازعل لحظه بس للاسف انا اكتشفت انو اتزوجها وهي في عصمه راجل تاني وكانو خادعني السنين دي كلها وانا م قدرت استحملت في الاول سكتت بس تاني غلبني وكلمت سوسن اختي وكشفناهم وكلمنا راجل سلمي وجا قبضناهم في شقتهم المأجرنها وبتلاقو فيها ومن اللحظه ديك غيث قال لي انا م حبيتك وانا بكرهك وطلقني وهي راجلا طلقا تاني عاشو مع بعض والناس عرفو انهم متزوجين قال لي شنو كلمه متزوجين دي هم اساسا لو عندهم قسيمه عديل وهي في عصمه راجل حرام شرعا انها تتزوج تاني القسيمه دي لشنو عايزين يحللو بيها الهم كانو فيهو ولا شنو انا الكلام دا م بدخل عقلي صراحه يا واحد من الاتنين يا انتي غيث طلقك وظلَمك ومتغاظه عليهو عايزه تتهميهو اتهامات باطله ودا وارد يا فعلا غيث اكون جنا وعمل الحاجات دي وانا شخصيا لو هو اذنب الذنب دا كان ربنا غفر ليهو انا ما بغفر ليهو قلت ليهو محمد انت مفتكرني انا متصله عشان اشكي ليك ولا اقول ليك اخوك عمل وفعل والله العملو اخوك شين م عندي زاتو عين احكيهو لزول والكلام دا انا لمن عرفتو ليهو اكتر من سنه م اتصلت ولا كلمتكم عشان كنت مفتكره انتو عارفين طلاقي وما سالتو مني انا هسي اتصلت عشان اقول ليك غيث ليهو اسبوع لافي بالشوارع مجنون وبرقد في الجامع قال لي شنو شنو قلت ليهو دي الحقيقه والله غيث جنا خلاص والسبب التاني الاتصلت فيهو غيث صاحبو متزوج صحبتي وعرفت الكلام دا بالصدفه المهم صحبتي دي اتصلت علي قالت انو سلمي شالت شهاده مرضيه وغيث عندو حقوق كتيره من الشركه الكان شغال فيها قبل يفقد الوعي مشت تستلمهن وصحبتي قالت لي انو دا حق اولادي اجي استلمن انا اولي بيهن من سلمي وانا حتي لو حق اولادي م عايزاهو اتصلت عليك عشان اقول ليك عليك الله يا محمد الحق غيث والله غيث قبل يجن م طبيعي انا عشت معاهو وبعرفو سلمي غيرتو وبقتو زول تاني وم اكتفت بي كده جننتو وجدعتو وما كنت مفتكره انو غيث مخاصمكم واهلي رافضين اني اطلع ليهو لانو غيث عمل حاجات كتيره م حلوه ونسا العشره ونبزني واتهمني في شرفي وقال التؤام م اولادو لدرجه انو قال عايز يرفع فيني قضيه اني نسبت ليهو اطفال غير شرعيين ليهو قال لي والله انا حاسي انك بتحكي لي في فيلم ولا مسلسل م قادر استوعب وخلاص سكريني بكون وصل السماء قلت ليهو اعفي لي بس انا كان لازم اتكلم واخليكم تشوفو ولدكم عشان امرق من حق ربنا وحقوقو شيلن واجري فيهن وعالج بيهن اخوك انا ابوي الله اديهو طوله العمر م مقصر مني ومن اولادي وودعتك الله قفلت الخط ورسلت ليهو في الواتساب رقم سفيان قلت ليهو اتصل في الرقم دا وقول ليهو انا اخو غيث وسلمي زوجتو دي قسيمه مكتوبه وباطله لانها اتزوجت في عصمه راجل اقلب عليها الطاوله ردا علي قال لي سلمي دي الا تطير تاني وجزاك الله الف خير انتي بت اصول صونتي العشره الما صانا اخوي ولا قدرها ونحنا بنعتزر ليك بالنيابه عنو وربنا يرجعو لي صوابو ويشفيهو ويرجع لي اولادو قلت ليهو لا غيث انا تاني م بلزمني الله يشفيهو عشان اولادو ما يعيشو مكسورين ويلقو السند وانا ربنا بجبر بخاطري ويعوضني والحمد لله انا شقيت طريقي كويس ورجعت للقرايه دعواتك قال لي ربنا يهدي النفوس ويوفقك انا بكره بتحرك اجي اسوق اخوي وبعد اجيبو البيت بسك موضوع الحقوق دا ودا حق اولادك قلت ليهو لا م محتاجه والله عالج بيهو غيث قال لي ان شاء الله كدي ح نتفاهم .
حسيت نفسي مرتاحه ابوي جا داخل قال لي انا سامعك ي بتي من قبيل قلت ليهو ابوي اعفي لي م قصدي اكسر كلامك بس حبيت اساعد غيث لاخر لحظه قال لي غيث خسر دنيتو لمن طلقك انتي ي بتي مسكينه وبريئه والله امك دي م زيك ولا اخواتك زيك م ندر تكون في بت بالطيبه الجواك وانا والله غيث تعبني شديد عشان كده منعتك تساعديهَو م صدقتا انو جنا عشان يخلي ليك اولادك وما يحرمك منهم بس كنتت غلطان ربنا يشفيهو ويعافيهو ويجبر بخاطرو وما تشيلي هم يابتي انا جنبك انا مبسوط انو عينك ملانه وما بتسعي لي انك تجري ورا القروش وصدقيني انتي الغنيانه العندو مال قارون م غنيان زيك الغناء بالقناعه عمرو م كان الغناء بالقروش وعشان اثبت ليك ي بتي انا من يوم جيتي وبقيت اصرف عليك اشهد الله رزقي بقا مضاعف وكنت بحتار الرزق دا بجيني من وين بس بعد عرفت نيتك عرفت انو دا رزقك َورزق اولادك وربنا يثبت قلبك ويسعدك قلت ليهو امين يابا وبالمناسبه دي يابا انا عايزه اشتغل قال لي شغل شنو ي بت انا والله الحمد لله اموري ماشه تمام وم محتاج قلت ليهو عارفه بس عايزين نوسع رزقنا قال لي لا لا خليك لي اولادك قلت ليهو ع فكرة ما بطلع من البيت شغلي في البيت وشرحتو ليهو قال لي طيب امك زاتا بتساعدك اشتغلي طوالي لو ف البييت ولمي القروش لي اولادك ف البنك انا والله طول م قاعدين معاي قرش م تصرفي فيهم قلت ليهو يابا نحنا لازم نساعد بعض بيتنا محتاج صيانه انت كل قروشك في اكلنا وشرابنا من زمان قال لي انا غير الستره م عايز شي قلت ليهو بس لازم نميز بيتنا قال لي الله كريم ولو عايزه اي شي قولي لي انا بجيب ليك حاجات شغلك دي قلت ليهو تمام كلمت امي وسوسن قالو لي نحنا بنساعدك سوسن قالت لي انا بعمل زي نمارق بسوق ليك بس خليها تعملني اتصلنا ليها قالت لينا بديكم صفحتي جاهزه سوقو بيها لانها م محتاجه ليها قلنا ليها لو في اي زمن احتجتي ليها ح نرجعا ليك قالت لينا تمام ووريتا اني كلمت اخو غيث قالت لي اي اتصل علي سفيان وسفيان كلم سلمي وزعلت وفاتت كده انتي ي نوسه صاح وعجبتيني قلت ليها والله ما عشان اولادي لي علاجَو قالت لي اخوهو دا فاهم شديد شكلو اتصل عشان يوقف سفيان من اي اجراء وقال انو لازم يشوف اخوهو اول قلت ليها الله يوفقو وخلاص كده انا مرتاحه حتي سيره غيث تاني م ح اجيبا في خشمي ادعي لي انو اتوفق في شغلي وانشهر هنا في منطقتنا تاني م عايزه

 

حاجه قالت لي ان شاء الله انتي طيبه ورزقك مضاعف كلام نمارق اداني دافع اني ابدا بزنس من غير خوف وفعلا بدينا وابوي جاب لي اي شي وخصصنا الديوان لي شغلي وسوسن اختي عملت اي شي قالتو ليها نمارق وما شاء الله من اول يوم جانا شغل ويد علي يد سلمناهو في يومو ابوي زاتو مرات بساعدنا وامورنا كانت ظابطه بس لمن اتزكر سحر بتوتر عديل لانها من اعداء النجاح ممكن تجي متعمده تخرب لي شغلي بس لازم اقيف ليها ومرت الايام وانشهرنا شديد والدنيا كانت قبايل عيد نحنا من اول يوم في رمضان لي نهايتو م خلصنا شغل جبت لي بت لي اولادي مسكتهم لي وانا وامي وسوسن بتشتغل سحر جات مره واحده وعايزه تعمل مشاكل وحوارات ابوي طردا وقال لي راجلا م تعتب البيت دا الا مطلقه وما قصرنا منها خبايزها وخبايز نسابتا وصلتا حدي عندها شكر م شكرتنا كاننا نحنا دا فرض علينا نهاي م بتتغير سحر الله اهديها غايتو الشغل ماشي معانا ميه الميه وشويه شويه بنعمل حاجه في البيت وحياتنا كانت فل وغيث اختفي من الحله عرفت انو اخوهو جا ساقو ونهاي م فكرت اسال منو عشان اخوهو يقول لسه عايزاهو وشبه شيلتو من قلبي ونمارق قالت لي اخو غيث جا وقدم للحقوق وح يسلموها ليهو هو وطبعا حكيت لي سفيان الحقيقة م مصدق انو الكلام دا حقيقه وعرف انو غيث زوجك وانصدم عديل قال لي والله لو من الاول وريتيني دا كلو م كان حصل كان اقنعت الزول دا يطلق سلمي ويرجع لي نوسه بس قدر الله وما شاء فعل الخير فيما اختاره الله واتأثر ليك شديد وقلبو مقطوع عليك وعلي اولادك قلت ليها الحمد لله طمني نحنا كويسين وابوي م مقصر مننا وخليهو برضو يقيف جنب غيث بكون محتاج ليهو وربنا يسعدكم مع بعض قالت لي امين يا نوسه ♥️
مرت الايام وجاتني سوسن اختي مخلوعه ومنططه عيونا اول مره اشوف سوسن اختي خايفه الشي الخوفا دا م هين قلت ليها مالك ي بت قالت لي نوسه سلمي قلت ليها ماتت ان شاء الله قالت لي دي م بتموت بس ح تخلص علينا واحد ورا التاني قلت ليها كيف فشنو مالا سلمي قالت لي ود اخت راجلي جانا بعد صلاه المغرب ووجاب لي الورق دا وم تفتحي ي نوسه قلت ليها ورق شنو قالت لي قال لي نحنا في ميدان الكوره الجنب المقابر جات فينا سلمي القالو معرسه غيث راجل

 

نسيبه اختك وانا اول مره اشوفها بس اولاد الحله قالو لي كده الزوله دي جات المقابر وكانت خايفه دفنت ليها شي هي كانت م شايفانا بس نحنا شايفنها اول م فاتت مشينا مكان حفرت ودفنت ولقيناها الزوله دي م مخليه ليها زول م كاتباهو وبالذات نوسه اختك واولادها وغيث واهلو وفتحت الورق فيهو كلام مبالغه انا مستحيل اخليك تقريهو ولازم نشوف شيخ يورينا نبطل العمل دا كيف ونعمل ليهو شنو عشان يفسد قلت ليها لازم الكلام دا يعرفو محمد اخو غيث ويتصرف مع الورق دا قالت لي لا لازم نتصرف فيهو نحنا الوضع م بستحمل ح تفقدي اولادك واحد ورا التاني لو العمل دا مشا فيك انا لمن شهقتا وقلبي وقف معقوله سلمي م اكتفت بالعملتو عايزه تدمر اولادي الماعندهم ذنب……….. يتبع

 

 

 

• لقراءة باقي فصول الرواية أضغط على (رواية أسرار خلف الأبواب)