رواية ملاكي الصامت الفصل الثالث 3 بقلم صباح عبدالله فتحي
لتصفح الموقع بدون إعلانات (أضغط هنا)
في شقة مازن. مازن رجع من بره شايل أكياس كتير وتحرك ناحية المطبخ، وأول ما دخل وقف مصدوم لما شاف صبا واقفة بتحضر الأكل وجهزت أكتر من صنف. وهي لابسة لبس بيتي خفيف وحاطة توكة على شعرها. مازن بلع ريقه بصعوبة وبعدين قال.
مازن
صبا، إنتي تعبتي نفسك ليه؟ أنا جبت أكل جاهز.
صبا بصت له بخضة وهي بتقول.
صبا
مازن، إنت دخلت إمتى؟
مازن ضحك على خوفها وقرب علشان يحط الأكل على الرخام وهو بيقول.
مازن
مالك، خوفتي ليه كده؟ أنا لسه داخل.
صبا
ماخدتش بالي، بس إنت جبت أكل جاهز ليه؟ أنا جهزت كل حاجة.
صبا كانت بتتكلم بعفوية ومش واخدة بالها من نظرات مازن اللي سرح في جمالها وعيونه كلها رغبة. صبا لاحظت نظرته فاتكسفت وتحركت علشان تطلع وهي بتقول.
صبا
هدخل أغير هدومي…
اتفاجئت بمازن بيمنعها من الحركة وقرب منها جامد وهو بيقول بهدوء.
مازن
وتغيري هدومك ليه؟ هو أنا غريب؟
صبا اتكسفت جامد وحاولت تبعد عنه، بس مازن قربها منه أكتر وهو بيقول.
مازن
إنتي حلوة أوي يا صبا، بجد بحاول أمنع نفسي عنك، بس بجد مبقتش قادر أمنع نفسي أكتر من كده.
صبا بكسوف
مازن، إنت بتقول إيه..
مازن فجأة قرب منها جامد وباسها، وبعدين شالها من على الكرسي ودخل بيها غرفته. وهي فضلت ساكتة وماقدرتش تمنعه أو تقاومه.
________
وبعد شوية في غرفة مازن.
صبا قاعدة على السرير لابسة فستان قصير وبتبتسم بكسوف وسعادة.. مازن خرج من الحمام لابس قميص أبيض على بنطلون وبيقفل أزرار القميص. مازن بص لصبا ولاحظ الفرحة اللي على وشها، حس بالندم والحزن إنه قرب منها.
مازن بتردد
صبا…
صبا بكسوف
نعم.
مازن قاعد على طرف السرير وهو متلخبط.
مازن
مش عاوزك تفكري إن اللي حصل ده حب أو في حاجة من ناحيتي اتجاهك. هو كل الحكاية، مستحيل نكون هنعيش مع بعض متجوزين من غير ما يحصل بينا حاجة، فاهماني.
صبا بصت له بصدمة وفضلت ساكتة ودموعها نزلت بصمت. وبعد شوية قامت بصعوبة وقعدت على الكرسي بتاعها وتحركت ناحية الحمام.
صبا
هدخل أغير هدومي، زمان الناس على وصول..
صبا دخلت الحمام، ومازن فضل قاعد باين عليه الزعل والندم. حط إيديه الاتنين على راسه وهو بيقول بحزن.
مازن
هو إيه اللي أنا هببته ده، ماكنش ينفع أقرب منها، ماكنش ده اللي مخطط له…
_________
بعد شوية
مازن خارج من الشقة وهو بيكلم رياض في التليفون.
مازن
طيب يا فندم، أنا كمان خمس دقايق هكون قدام الكافيتريا اللي اتفقنا نتقابل فيها.
في نفس الوقت كان رياض طالع من شقته وهو بيرد عليه.
رياض
تمام، وأنا كمان لسه طالع حالاً.
مازن وقف متفاجئ أول ما شاف رياض طالع من الشقة، ومنه طالعة وراه.. قفل التليفون وقرب منهم وهو بيقول باستغراب.
مازن
أستاذ رياض؟
رياض بص له باستغراب وهو بيقول.
رياض
مازن، إنت بتعمل إيه هنا؟
مازن شاور ناحية شقته وهو بيقول.
مازن
أنا ساكن في الشقة اللي قصادكم دي.
منه بفرحة
بجد؟ صدفة روعة! إحنا كمان ساكنين جديد في الشقة دي.
مازن ابتسم بمجاملة.
مازن
طيب والله صدفة روعة، اتفضلوا.
رياض بص لمازن باستغراب.
رياض
هي الآنسة اللي عايشة في الشقة دي تبقى هي الأستاذة صبا أختك؟
مازن بتعجب
ايوا هي بس هو إنت شوفتها فين؟
رياض حكى لمازن اللي حصل بينه هو وصبا لما الباب قفل. مازن حس بالغيرة أنها تكلمت مع راجل غيره بس ما بينش، فابتسم له وهو بيقول.
مازن
بجد مش عارف أشكر حضرتك إزاي، وبجد سعيد جداً إننا مش بس شركاء في الشغل وطلعنا جيران كمان.
رياض مد إيده وسلم على مازن وهو بيقول.
رياض
وعسى يكون خير، ويا عالم الأيام الجاية يكون ربنا كاتب لنا فيها إيه، ومين عارف ممكن على قريب نبقى قرايب كمان…
مازن بص له بصدمة لما شك إنه ممكن يكون في حاجة من ناحيته اتجاه صبا، وفضل ساكت وهو بيكور إيديه جامد. وبعدين الكل اتحرك ودخلوا شقة مازن.
________
في شقة مازن… في المطبخ
مازن واقف ماسك أطباق في إيديه، باصص لصبا بغضب. وصبا مشغولة بتفريغ الأكل. مازن قال بغضب لكن صوته هادي.
مازن
ما قولتيش يعني إنك اتعرفتي على حد؟ مش كنتي تقولي بدل ما أعرف بالصدفة كده وشكلي يبقى وحش كده.
صبا بصت له باستغراب.
صبا
حد مين ده؟ مش فاهمة.
مازن بغيظ
مش فاهمة برضو؟ ولا عاوزة تستغفليني وأنا زي الأهبل مفكرك طفلة بريئة.
صبا بحزن
مازن، أنا بجد مش فاهمة، بجد قصدك إيه؟
وقبل ما مازن يقول حاجة، دخلت منه عليهم فجأة، وقربت من مازن ومسكت دراعه وهي بتقول بابتسامة.
منه
أنا مبسوطة أوي إني اتعرفت عليكي يا صبا، مازن طول الوقت كان بيحكي عنك. إنتي محظوظة إن عندك أخ زي مازن بجد.
صبا بصت لإيدها اللي مسكة بيها دراع مازن، وبعدين بصت لمازن بحزن. مازن اتلخبط من نظرات صبا.وسحب دراعه بهدوء من إيد منه وهو بيقول.
مازن
أستاذة منه، حضرتك محتاجة حاجة أجبهالك؟
منه بابتسامة
هو أنا لازم أكون محتاجة حاجة علشان أجي أشوفك؟
مازن اتلخبط وبص بتوتر ناحية صبا.. صبا دموعها نزلت وحاولت تتجاهل الموضوع واتحركت علشان تطلع وتسيبهم على راحتهم.
صبا
عن إذنكم، هرص الأكل على السفرة.
صبا سابتهم وخرجت، ومازن فضل واقف باصص ناحيتها بحزن. منه بصت له باستغراب وهي بتقول.
منه
هي أختك مالها؟ حاسة إنها زعلت من حاجة؟
مازن
مالهاش، ما تشغليش بالك.
سكت فجأة واتلخبط لما افتكر رياض وإن صبا خرجت. طلع وراها بسرعة، خايف رياض يستغل الفرصة ويقرب من صبا.
___
صبا طلعت من المطبخ بسرعة وهي بتحاول تمسك دموعها وتتحكم في مشاعرها، وبدأت ترص الأطباق على السفرة.. مازن طلع وراها بسرعة، بصلها بحزن وفضل ساكت. لما منه طلعت وراهم وقربت من صبا وهي بتقول بابتسامة.
منه
تحبي أساعدك في حاجة؟
صبا بصت لها وهي بتحاول ما تبينش إنها مضايقة.
صبا
لا يا حبيبتي، شكراً، ما تتعبيش نفسك، كل حاجة جهزت.
منه بكسوف
أنا آسفة لو كنت ضايقتك بحاجة من غير قصدي. هو أنا والله متهورة وطايشة شوية في تصرفاتي، بس والله كل الحكاية إني حابة نقرب من بعض طالما هنشتغل سوا، بس حاسة إنك مش قابلة ده، عكس مازن، رغم ما تعرفنا على بعض امبارح، بس حاسة إني أعرفه من زمان..
منه كانت بتتكلم وهي باصة ناحية مازن بابتسامة. مازن اتوتر لما صبا بصت له وسكتت.
مازن بتوتر
أنا هروح أعرف رياض إن الغدا جاهز، عن إذنكم.
وبعد شوية كان الأربعة قاعدين على سفرة الغداء. رياض بص لصبا بإعجاب واضح وهو بيقول.
رياض
بجد أنا منبهر بيكي يا صبا، مش بس كاتبة شاطرة، لا وشيف محترف كمان، الأكل تحفة.
مازن كان ماسك المعلقة، وأول ما سمع كلام رياض المعلقة وقعت منه من غير إرادة. الكل بص لمازن باستغراب. مازن وطي يجيب المعلقة وهو بيقول.
مازن
آسف، وقعت من غير قصدي.
صبا تجاهلت مازن، ابتسمت من تحت النقاب.
صبا
بالهنا والشفا على قلب حضرتك، شكراً جداً على المجاملة.
منه بابتسامة
لا بجد يا صبا، طبخك يجنن، ده أنا لحد دلوقتي ما عرفش البيض بيتسلق إزاي. حابة لو مافيش إزعاج أتعلم الطبخ منك.
منه بصت ناحية مازن وابتسمت بكسوف وهي بتقول.
منه
وزي ما بيقولوا الطريق الوحيد لقلب الرجل هي معدته.
صبا حست بالغيرة، فضغطت جامد على المعلقة اللي في إيدها.. مازن بص لصبا ولاحظ حالتها بس فضل ساكت. ورياض بص لصبا بابتسامة وهو ماسك كوباية العصير.
رياض
على كده صبا محظوظة، هتدخل قلب جوزها على طول.
مازن رد تلقائي من غير ما يحس.
مازن
ما هي في قلبي، ما تقلقش.
صبا بصت له بصدمة. ومنه ورياض بصوا لمازن باستغراب. وبعدين منه ضحكت وهي بتقول.
منه
ما هي في قلبك حاجة، وأكيد في قلب جوزها حاجة تانية يا مازن. مسيرها هتتجوز برضو، وصبا ما شاء الله ألف واحد يتمناها.
مازن حس بالغيرة والضيق من فكرة إن صبا ممكن تكون لغيره. مسك إيدها جامد من غير وعي وهو بيقول.
مازن
وأنا مستحيل أسيبها لغيري…
الكل بص له باستغراب، حتى صبا اللي كانت بتحاول تفهمه.. رياض بص لإيد مازن اللي ماسك بيها إيد صبا بشك وفضل ساكت.
منه بضحك
والله اللي يسمعك يقول إنها مراتك مش أختك.
مازن وصبا بصوا لبعض بقلق وسكتوا، ورياض كان متابعهم بشك وهو بيكلم نفسه.
رياض بتفكير
تصرفاتهم غريبة، مستحيل يكونوا إخوات… أنا لازم أفهم إيه الحكاية..
اشترك للحصول على أحدث التدوينات المرسلة إلى بريدك الإلكتروني.
ليس لديك حساب؟ إنشاء حساب
التعليقات (0)
لا توجد تعليقات بعد. كن أول من يعلّق!