رواية ملاكي الصامت الفصل الثاني 2 بقلم صباح عبدالله فتحي
لتصفح الموقع بدون إعلانات (أضغط هنا)
في شقة مازن الساعة اتنين بالليل.. مازن رجع من بره، بص حواليه ما لاقاش صبا، قرب من غرفتها وفتح الباب بهدوء، لقاها نايمة بعمق. تنهد بهدوء وبص لها بحزن.
مازن
مش عارف ليه حاسس إنك هتتظلمي معايا يا صبا، رغم إني بحاول ما أوصلش معاكي للمرحلة دي. مش عارف الزمن مخبيلنا إيه، بس أتمنى ما أتسببش في أي جرح ليكي…
مازن واقف لثواني يتأملها وهي نايمة، وبعدين سابها وخرج بهدوء. وأول ما مازن طلع، صبا فتحت عيونها ودموعها نزلت بصمت وهي بتقول.
صبا
وأنا كمان يا مازن، أتمنى ما أوصلش معاك لمرحلة إني ما أقدرش أكمل من غيرك.
تاني يوم الصبح
مازن قاعد على السفرة هو وصبا بيفطروا. صبا اتحركت بالكرسي وهي بتقول.
صبا
هتشرب شاي ولا قهوة؟
مازن بهدوء
اقعدي يا صبا، هبقى أشرب في الشغل. في موضوع مهم عاوز أقولك عليه؟
صبا باستغراب
خير يا مازن، حصل حاجة ولا إيه؟
مازن
ما حصلش حاجة، بس المنتج اللي هينفذ المشروع بتاعنا حابب يتعرف عليكي…
صبا قاطعت مازن عن الكلام فجأة وهي بتقول باستغراب.
صبا
وهو عاوز يتعرف عليا ليه؟ مش فاهمة. لو في مشكلة ولا حاجة ممكن نتناقش فيها سوا وإنت وتتكلم معاهم.
مازن
هو عاوز يتناقش معاكي إنتي. المهم أنا عزمتهم على الغدا، وما تقلقيش هكون معاكي مش هسيبك.
صبا فركت في إيديها بتوتر واضح.. مازن بص لها ولاحظ خوفها، قرب منها ومسك إيديها بحنان وهو بيقول.
مازن
صبا مش عاوزك تقلقي من حاجة طول ما أنا معاكي، ثم إنتي لازم تتشجعي وتحاولي تتخلصي من الرهبة الاجتماعية اللي عندك دي، لأن اختلاطك بالناس مهم جداً في مجالك ده، وأنا مش حابب تضحية جوازي منك تروح على الفاضي.
صبا بصت له بصدمة وهي بتقول.
صبا
تضحية جوازي منك… إنت شايف جوازك مني تضحية؟
مازن ماكنش واخد باله من الكلام اللي قاله، بعد عنها خطوة وفضل ساكت متلخبط مش عارف يقول إيه. صبا مسحت دموعها اللي نزلت غصب عنها وهي بتقول بصوت مكسور.
صبا
بوعدك إن تضحيةك العظيمة دي مش هتروح على الفاضي يا أستاذ مازن. عن إذنك.
صبا سابته ودخلت غرفتها بسرعة وهي مش شايفة قدامها من كتر الدموع. ومازن وقف يلعن غبائه.
مازن بزهق
أوووف، أنا هفضل في الغم والنكد ده لحد إمتى..
مازن اتحرك وخرج من البيت من غير ما حتى يعتذر منها او يراضيها بكلمة.
_____
في شقة رياض ومنه..
رياض واقف في البلكونة باصص ناحية بلكونة غرفة صبا وهو بيفتكر لما شافها. تنهد بزهق وهو بيقول.
رياض
أوووف، هي مش عاوزة تطلع من دماغي ليه دي.
منه قربت منه وهي مسكة فنجانين قهوة، نولته فنجان، وقفت تشرب من التاني وهي بتبص له باستغراب.
منه
إنت بتكلم نفسك كده بتقول إيه علشان ما فهمتش؟
رياض
إنتي ما شاء الله عندك حاسة السمع فوق العشرة، لو نملة عدت من جنبك هتسمعي دبتها.
منه ضربته برفق على كتفه وهي بتقول.
منه
بطل رخامة واحكي لي مين اللي شاغلة بالك دي.
رياض بص مكان ما شاف صبا وابتسم من غير ما ياخد باله. منه ابتسمت وهي بتقول بهزار.
منه
لا لا، إنت كده حالتك صعبة أوي ولازم أفهم إيه الحكاية بالظبط.
رياض بص لها شوية وفضل ساكت، وفجأة الابتسامة اختفت لما افتكر مازن.
رياض
بقولك، هو إيه اللي حصل بعد ما سبتك مع اللي اسمه مازن ده؟ نظراته ليكي مش مريحاني.
منه ابتسمت بخجل لما افتكرت مازن.
منه
على فكرة محترم أوي واستفدت منه كتير.
رياض بشك
منه، إنتي مش صغيرة ومش عاوزة اللي يوقعك، وأتمنى إنك تاخدي بالك من نفسك، ومش أي حد يدخل قلبك، فاهماني.
منه باستغراب
يدخل قلبي إيه يا بني؟ إنت تفكيرك راح فين؟ كل الحكاية إني مستلطفاه مش أكتر ولا أقل، وهو شاطر جداً في شغله واستفدت منه، دي كل الحكاية.
رياض
ماشي يا ست منه، المهم هتيجي معايا ولا إيه؟
منه
قصدك على عزومة مازن يعني؟
رياض
أيوه.
منه
أكيد هروح معاك، حابة أستفاد من المناقشة بينكم، وبالمرة أتعرف على اللي اسمها صبا دي، أكيد فيها حاجة مميزة، لولا كده ما كانش عجبك شغلها.
رياض
هي ككاتبة ممتازة، بس كشخصية لسه الله أعلم..
رياض بص للساعة اللي لابسها وهو بيقول.
رياض
المهم أنا هنزل، عندي مشوار مهم، ساعة زمن وهكون رجعت، تكوني إنتي جهزتي تمام.
منه بابتسامة
تمام، خد بالك من نفسك.
رياض قرب منها وباس راسها بحب.
رياض
حبيبتي، خليها على ربنا. يلا، عاوزة حاجة مني أجبها لك وأنا جاي؟
منه بابتسامة
عاوزة سلامتك يا قلبي، ربنا معاك.
رياض ابتسم لها وسابها ومشي، ومنه وقفت تشرب في القهوة، وفجأة تليفونها رن باسم مازن. منه بصت للتليفون بابتسامة وبعدين ردت.
منه
ابن حلال، كنت لسه هكلمك.
__________
قدام شقة مازن
صبا طالعة بالكرسي بتاعها وعلى رجليها كيس زبالة، ولابسة نقابها وبتتكلم في التليفون. ومن غير ما تاخد بالها قفلت باب الشقة.
صبا في التليفون
مش عارفة حاجة يا بنتي، كل اللي أنا أعرفه إن علاقتي بمازن مجرد فترة زمانية وهتنتهي.
صبا حطت كيس الزبالة على الأرض وجات تدخل الشقة، اتفاجئت بالباب مقفول.
صبا بصدمة
يا لهوي على غبائي، قفلت الباب والمفتاح جوا، هدخل إزاي دلوقتي.
بصت للتليفون بحيرة وهي بتقول.
صبا
أكلم مازن؟ ممكن يكون معاه نسخة من المفاتيح، بس هو زمانه في الشغل دلوقتي.
صبا رنت على مازن، وكل ما ترن يديها الخط مشغول. دموعها نزلت وهي بتقول.
صبا
يارب أعمل إيه دلوقتي؟ الناس زمانها جاية وما عملتش حاجة لسه.
فجأة خرج رياض من الشقة اللي قصادهم. رياض بص لها باستغراب لما شافها بتعيط، قرب منها وهو بيقول.
رياض
خير يا آنسة، إنتي كويسة؟
صبا رجعت خطوة بالكرسي وبصت له بكسوف لما افتكرت لما شافته أول مرة. رياض تأمل جمال عيونها، اللي أول ما شافهم افتكرها لما شافها من غير النقاب.
صبا بكسوف
ما فيش حاجة، بس طلعت أرمي الزبالة، الباب قفل والمفتاح جوا.
رياض شاور ناحية الباب وهو بيقول باستغراب.
رياض
إنتي عايشة في الشقة دي؟
صبا باستغراب
أيوه، بس ليه؟ في حاجة؟
رياض بص لها وسكت شوية وهو بيفكر مع نفسه. صبا اتكسفت وفضلت تفرك في إيديها.
رياض
معقولة تكون هي نفسها؟ حتى لو هي، أنا مالي شاغل نفسي بيها ليه دي.
رياض تنهد بزهق وبعدين قال بهدوء.
رياض
طيب ممكن تتفضلي تقعدي مع منه أختي؟ إحنا لسه ساكنين جديد في الشقة اللي قصادك دي.
صبا بكسوف
شكراً لحضرتك، بس أنا محتاجة أفتح الباب ضروري، عازمين ناس مهمة ولسه مش جهزت حاجة، وجوز…
صبا سكتت فجأة لما ركزت في كلامها وبعدين قالت بحزن.
صبا
قصدي أخويا، مش موجود، والنسخة التانية من المفاتيح موجودة معاه.
رياض
طيب ممكن توسعي كده من بعد إذنك؟ هحاول أفتحهولك، ويارب يفتح.
صبا بصت له بكسوف وبعدين رجعت لورا بالكرسي بتاعها. ورياض قرب من الباب، حاول يفتحه بأكتر من طريقة، وبعد كام محاولة الباب اتفتح.
صبا بفرحة
الحمد لله يا رب العالمين، فتح بجد، شكراً أوي لحضرتك.
رياض رد عليها وهو بينفض هدومه، وبعدين بصلها وهو بيقول بتردد.
رياض
الشكر لله وحده، بس هو أنا ممكن أسألك سؤال؟
صبا باستغراب
أيوه أكيد، اتفضل.
رياض بإحراج
هو في بنت تانية غيرك ساكنة معاكي في الشقة دي؟
صبا اتوترت لما فهمت إنه بيسأل عنها هي.
صبا
لا، ما فيش غيري أنا وأخويا… عن إذنك.
صبا خلصت كلامها وسابته ودخلت الشقة بسرعة وقفلت الباب. ورياض فضل واقف مبتسم على توترها وهو بيقول.
رياض
أممم… يعني إنتي هي، يا لهوي شكلك خطفتي قلبي…
رياض كمل طريقه وهو باله مشغول بيها وبيفتكر كل تفاصيلها، خجلها وتوترها وعيونها اللي خطفت عقله قبل قلبه. بس يا ترى إعجاب رياض بصبا هيكون نهايته إيه؟ تابعوا وخلونا نشوف مع بعض..
اشترك للحصول على أحدث التدوينات المرسلة إلى بريدك الإلكتروني.
ليس لديك حساب؟ إنشاء حساب
التعليقات (0)
لا توجد تعليقات بعد. كن أول من يعلّق!