رواية جثة الوريث الفصل الرابع 4 بقلم محمود الأمين
لقراءة الرواية كاملة بدون إعلانات (اضغط هنا)
= هكذب لو قولت مزعلتش، بس انا بدير شغل والدي من زمان واكيد عملت فلوس كويسة تقدر تعيشني انا ومراتي وابني، وكريم كان مسافر بره ولسه راجع من 3 شهور، وبرضو العيشة معاه كويسة، فحتى لو حرمنا من الميراث هنقدر نعيش، مش هنموت من الجوع يعني
….
كلام مصطنع ميدخلش على عيل صغير، ما بالكم ده بيكلم وكيل نيابة ياما حقق في قضايا وحلها.. المهم انه كمل كلامه وقال
= احنا خرجنا برا سياق الموضوع وانا اسف، المهم ان بعد شوية سمعت صوت عزيزة الخدامه بتصرخ، فخرجت من الاوضه بتاعتي وجريت على مصدر الصوت والبيت كله اتجمع على الصرخة دي، ووقتها شوفنا المنظر ده كده، وبلغنا الشرطة
_ طيب اعذرني يا استاذ عمر في الكلام اللي هقوله ده، انت والدك توفى وانا مش شايفك متاثر ولا زعلان؟!.. اخوك كريم متاثر شويه يعني اما انت فبتتكلم بمنتهى الثبات
= انا فاهم قصد حضرتك، والدي الله يرحمه المتوفي قدامك على الكرسي ده هو اللي رباني على كده، اني لما ازعل على حد مش هيرجع، وان دموعي عليه عذاب لي.. وانا اكيد مش عايز اعذب والدى بعد ما مات
….
خلصت كلام مع الاستاذ عمر وبصراحه عمري ما قابلت بني ادم متصنع زيه، انا واثق انه ليه علاقه باللي بيحصل
بعد ما خلصت كلامي معاه، دخلت على المطبخ ولقيت عزيزة قاعده قعدت قدامها وقولتلها
_ انتي قاعده في البيت ده تكتشفي الجرايم بس يا عزيزة؟
= اعمل ايه يا باشا، منا اللي بتحرك في البيت معظم الوقت اللي عاوز قهوه واللي عاوز شاي واللي عاوز اكل
_ يعني افهم من كلامك ان انتي اللي بتعملي الاكل يا عزيزة؟
= مش دايما.. ساعات انا، وساعات اي واحده من الستات اللي في البيت.. بس حضرتك بتسال السؤال ده ليه؟
_بسأل السؤال ده.. عشان بعد ما ظهر تقرير الطب الشرعي الخاص بجثه سيف اكتشفنا ان سيف ممتش بسبب خنق بمخده او انه اتكتم نفسه بمخده يعني زي ما حضرتك قولتي في التحقيقات، سيف اتقتل بسم اسمه سم الزرنيخ.. والسم ده بيتحط في الاكل والمفروض انه تاثيره ضعيف لو النسبة اللي في الاكل كانت بسيطة ، ولكن النسبة اللي في الاكل كانت عاليه وده اللي تسبب في وفاه سيف على طول بعد ما اكل.. وحضرتك بتقولي انك شوفتي الست فوزيه وهي بتكتم نفسه بالمخده… فكده زي الشاطره تعرفيني مين اللي طلب منك تقولي الشهاده دي قدامي؟
=انا قولت اللي شوفته بعيني والله، ده اللي حصل فعلاً.. انا كنت معدية قدام اوضة سيف، وشوفت الست فوزية وهي بتكتم نفسه
_ طيب انا همشي معاكي للاخر.. مين اللي عمل الاكل في اليوم ده؟!
=انا.. بس والله العظيم ما حطيت حاجه في الاكل
_اممم.. لا انتي كده هتشرفي معايا عزيزه لحد ما تعترفي وتقولي اللي عندك
…
كنت لسه مخلص كلام معاها وسمعت رئيس المباحث بينده عليا، وده عشان اسمع كلام دكتور الطب الشرعي اللي قال نفس الكلام اللي انا قولته، وان السلاح المستخدم في الجريمة حبل خشن او سلك حاد
وبعد ما خلصوا شغلهم رجعت على مكتبي واتحجزت عزيزه الخدامة لحين انتهاء التحقيقات.. وبعد ما خلصنا تحرياتنا استدعيت الاستاذ عمر والاستاذ كريم وزوجاتهم للتحقيق معاهم
وقررت دخول عمر وكريم مع بعض عشان الكلام اللي هقوله لده هو هو اللي هقوله لده.. وبدأت الكلام معاهم
_ انا هتكلم وهقول اللي عندي وعاوزكم تفكروا في الكلام، قبل ما كل واحد فيكم ينكر ويقول محصلش.. والدكم الحاج سليم الصياد قرر يحرمكم من الميراث وكتب كل حاجه باسم حفيده سيف، وقال في حاله ان جراله حاجة الثروه كلها تروح لدور الرعايه والايتام الكلام ده هيكون رسمي بعد عوده المحامي من السفريه اللي هو فيها، وعشان كده قتلتوا سيف ابن اخوكم قبل ما المحامي يرجع، وبعدها خلصتوا على والدكم
رد عليا عمر وهو بيقول
= الكلام اللي بتقوله حضرتك ده محصلش، احنا مستحيل نعمل كده وبعدين انا مكنتش عاوز اتكلم، بس طالما الموضوع هيوصل لاتهامنا بالقتل، فانا هقول اللي عندي والد الاستاذ سامي المحامي يبقى الاستاذ وجدي وكان ليه نسبه في الشركة، والاستاذ سامي لما جه لبابا قبل وفاته وعرف بالوصيه بتاعته اتخانق معاه وصوته كان عالى
وسمعناه بيقول لبابا ان ابوه كان ليه نسبه في الشركه دي قبل ما يموت، وان بابا لازم يكتبله حاجه، ولما بابا رفض هدده
_ طيب وحضرتك مقولتش ليه الكلام ده لما كنت عندكم في البيت بنحقق في الموضوع؟!
= عشان كنت مستبعد الاستاذ سامي من انه ممكن يكون عمل كدا، وبعدين حضرتك بتقول ازاي ان احنا اللي قتلنا سيف، مع عزيزه قالت لحضرتك ان والدتي هي اللي عملت كده، وانا بلغت حضرتك ان والدتي عندها زهايمر وتصرفاتها مش طبيعيه الفتره اللي فاتت
_ عشان تقرير الطب الشرعي بيقول ان سيف مات بسبب سم الزرنيخ اللي كان بيتحط لي في الاكل، مش بسبب الكذبه اللي كذبتها علينا عزيزه
….
وفي الوقت ده جبت عزيزه اللي كانت مصممه على اقوالها قدامهم، ولكن بعد شوية طلبت مني ان تتكلم معايا على انفراد، واضح انها عارفه حاجه وكانت خايفه تتكلم
فطلبت من الاستاذ عمر والاستاذ كريم ينتظروا بره.. واتكلمت عزيزه وقالت
_ انا اعرف سر مش عارفه هيفيد في القضيه دي ولا لا.. بس انا هقول لحضرتك
= سر ايه ده يا عزيزه؟
_ الاستاذ سمير والد سيف مات مقتول
…
وقبل ما تكمل كلامها دخل العسكري وقال ان في واحد عاوز يقابلني ضروري.. ورغم اني كنت عاوز اسمع عزيزه واللي عندها ولكن طلبت منه يدخل الشخص ده.. ودخل وعرفني بنفسه ان اسمه الدكتور شريف وان هو الدكتور اللي كان بيعالج مدام فوزية من الزهايمر وقال على سر هيقلب القضيه كلها
_ الست فوزيه كانت بتيجي عند العياده وكنت بتابع معاها العلاج ولكن في الفتره اللي فاتت لاحظت حاجه غريبه على الست فوزيه
= لاحظت ايه؟
..
واللي قالوا بعد ما عمل الفحوصات والتحاليل ليها كان صدمه بالنسبالي لانه قال…
اشترك للحصول على أحدث التدوينات المرسلة إلى بريدك الإلكتروني.
ليس لديك حساب؟ إنشاء حساب
التعليقات (0)
لا توجد تعليقات بعد. كن أول من يعلّق!