رواية جيرانا الفصل العاشر 10 بقلم حميدة عبدالحميد

رواية جيرانا الفصل العاشر 10 بقلم حميدة عبدالحميد

 

 

البارت العاشر

 

من بعيد لمحنا زي مرا عجوزة كده قاعدة في الصقيعه٠٠٠ ايوب قال لي اقيفي ٠٠وقفت وقلت ليو دي انسانه؟ قال لي شكلها بيوحي كده لكن م ظنيت ٠٠قلت ليو نغير الشارع قال لي لا ح نمشي ليها وحاسس انو ح نلقى حل من عندها قلت ليو تمام مشي قدامي وانا لحقتوا لحدي م وقفنا قدامها رفعت راسها بتكاسل وقالت اهلين أيوب وسندس٠٠
طبعا الاتنين اتهجمنا وبقينا نتبادل في النظرات ٠٠
أيوب اتنهد وقال ليها بتعرفي اسمائنا من وين؟ ضحكت بخبث وقالت هنا اي زول بيعرفكم واسمائكم وشخصياتكم منتشرة في العالم التاسع والعاشر.
قلت ليها انتي منو؟ وهم عايزين مننا شنو وانتي إنسيه ولا جنية؟
طبعا هي كانت قاعدة في الأرض ولامه رجولها عليها و أول م سالتها طوالي قامت علي حيلها واتحولت لي بت شابه لونها ابيض زي بياض الورق ٠٠٠ وعيونها بقو واسعين ومالو للون الأزرق بس فاتح شويه شعرها نزل للارض وهندسة وشها بقت غريبه شديد حاجه كدا بين مربعة رمستطيله
بديت ارجع لي ورا وقلبي بدا يضرب بقوة من الخوف. أيوب قال لي اقيفي ي سندس م تخافي عاينت ليو وملاح الخوف كانت ظاهره على قلت ليو م اخاف!! أيوب لو انت جنيت كلمني قال لي خليني اتصرف وخليك واثقه مني ٠٠
اتحرك واتقدم لحدي م وقف قدامها كانت جامدة وواقفه من دون حركة
قال ليها حاسس انو انتي مختلفه عنهم ضحكت بنفس الخباثه وبعدها بدت تبكي ٠٠٠ ومن ثم اتنهدت وقالت “مورجانا السوداء” بتمنى انو سلطتها وغرورها ينتهو
قال ليها ممكن افهم انتي منو والحاصل ليك شنو؟ وحاسس انو ممكن انتي تساعدينا ونحنا نساعدك
استغربت طبعا ح نساعدها في شنو مثلا حقيقه أيوب بدا يجيب خارجيات ٠٠٠
هدأت شويه وقالت ايوا ممكن اساعدكم وممكن تساعدوني ب انو تنهو مورجانا وغرورها وسلطتها٠٠
وبعدها اتحولت لشكلها الأول ويلي هو في هيئة عجوز كبيرة في السن رجعت وقعدت في الأرض وقالت لينا اقعدو أيوب قعد ع طول وانا جيت وقعدته
بدت تتكلم بس المرة دي شفايفها كانو م بتحركو وظاهر انو الشخصيه الجواتها هي الكانت بتتكلم ٠٠ نطقت وقالت
انا أزارينا من عالم الجن الثامن ومن نوع “الجن العوام ” ونحنا ضُعاف شديد .مُقاونة ببقيه الجُنون ومورجانا السوداء من العفاريت و هي عفريته ماكرة وخبيثه وذكية وكل عوالم الجن تحت سيطرتها حتى زوجها العفريت الكبير ظلاليث هو ولا شي قدامها وبسببها انا خسرت كل أبناء عشيرتي من عالم الجن الثامن وفي عدواة كبيرة كانت شابه بيناتنا.
طبعا كل استغراب العالم كان فينا انا وايوب رجعت وواصلت في كلامها وكانت بتعاين لي بنظرات مُريبه وبعدها قالت٠٠٠
سندس انتي عندك موهبة عجيبه ويلي هي بتسمعي أصوات من مناطق بعيده ومورجانا السوداء عشان كدا اختارتك من بين الف مليون بت. وايوب عندو موهبة الذكاء وتحليل الالغاز وعن طريقهم بيقدر يحلل اي شي ويوصل لرأس الحقيقه ومورجانا السوداء عايزة تسحب منكم القدرات دي وتوهبها لي ولدها الكبير أزراخ ولي بتها الأميرة “دارفيرة” وبي كدا ح تقوى نفسها وسلطتها ونفوذها ح تمتد والشي دا بيحصل لمن ترميكم في وادي اسمو اللهيب الأسود.٠٠٠
قلبي خلاص بدأ يدق بسرعة وبعد م سمعت الكلام دا فقدت الأمل كُليا
أيوب كان هادئ شديد اتنهد وقال ليها بثبات واضح في ملامح عيونه
طيب كاليث وسوليث قصتهم شنو؟؟؟
قالت

 

كاليث غلطت مع مورجانا السوداء فهي حبست ليها طفلها وسوليث اخوها زيرافيل فشل في مهمة كان وكلتو بيها فهي حبستو وعشان تسامحهم عن اخطائهم هم اتكفلو بي مُهمة انو يسحبوكم ل عالم الجن وانتو حاليا متواجدين بين العالم التاسع والعاشر ٠٠٠ وانتو الآن في محض بؤرة كبيرة من جميع انواع الجن وبحذركم من العفاريت هي ماكرة وخبيثه
أيوب رجع وقال ليها تاني٠٠٠ طيب للان م عرفنا ح نساعدك كيف أو ح تساعدينا كيف؟
قالت
إذا أنت وهي بقيتو شخص واحد مورجانا السوداء ح تتضعف شديد وسمعتها ح تنزل قدام شعبها ومارح تقدر انو تسيطر عليكم قال ليها كيف م فهمت؟
عاينت لي يدي ومن ثم عاينت لي يد أيوب الكانت ضاغطه على كتلة تراب بكل قهر رفعت نظرها وقالت ٠٠٠
يعني اذا اتزوجتوا
وفي عالمنا اذا شخصين اتزوجوا ح يكونو شخص واحد وغير انو دي حاجه حلال ومورجانا السوداء الحاجات دي بتهزمها شديد وللان ماف زول قدر يعمل الحاجه دي
اتنهدته بخوف وقلت ليها يعني ف ناس غيرنا جو هنا؟ قالت لي اي وكلهم انتهو بطريقة مخيفه ولا يمكن تتخيليها زاتو، بلعت ريقي بتعب وقلت ليها يعني نهايتنا حتميه خلاص!! أيوب قال لي م سمعتي هي قالت شنو؟ يعني لو عرسنا كل مشاكلنا ح تنتهي ضحكت بقهر وقلت ليه أيوب انا مستحيل اعرس وأهلي مافيشين وح نعرس كيف بس! لا في ماذون ولا في شهود ولا تاني؟ سرح مسافه وقال صح كلامك٠٠ هنا الجِنيه المسلمة قالت في جبل على بُعد سبعين كيلومتر تقريبًا… مسيرة ثلاثة أيام” وهناك ح تشرق الشمس بين كل فتره وفتره وفي اللحظة دي ح تكونو بين عالم البشر وعالم الجن وتلفوناتكم ح تشتغل عادي بس م ح تقدرو تعبرو لانو البوابه الح تطلعكم من هنا مورجانا السوداء قفلتها بس ح تفتح في حالة وحدة ويلي هي اذا مورجانا ضعفت انتهت خلاص٠٠٠. وا اول م مورجانا تضعف انا ح استخدم ضربتي القاضيه وانتهى منها وما ح اقدر اعمل الخطوة دي الا ب مساعدتكم
وهنا قبل تتم كلامها بديت اسمع أصوات كرعين حصيين
كب٠٠٠ كب٠٠٠ كب.
ضغطه على إضنيني كالعادة بكل قوتي
قالت لي سمعتي شنو؟ حكيت ليها طوالي قامت وقالت حاليا كاليث جايه عليكم لازم تتصرفو وقبل تتم كلامها اختفت في شكل غُبار٠٠٠
أيوب قام وقال لي طبعا حسب كلامها انو انا ذكي وانتي لازم تعملي كل شي بقولو ليك ي سندس وهو في النهايه نحنا ح نتزوج صح يبقى دي فرصتنا اللازم نحارب عشانها ونحن حاليا ما لينا غير بعض وح نمشي المكان الوصفتو لينا وح نتصل ب أهلنا ونخليهم يعقدو لينا. بس م ح نقول ليهم نحنا وين ح نحاول نقنعهم بي أي طريقه ٠٠٠
قلت ليو بس قال لي ماف زمن ل بس ولا تاني سندس خليك واعيه ولو لي مرة انفعلت فيو وقلت ليو يعني انا غبيه ي أيوب!؟
دار حولين نفسو وقال ي الله صبرك قلت ليو م عايزة اعرسك زاتو وقعدت في الأرض بشدة ٠٠ قعد قدامي وقال طيب انا اسف حقك علي انتي الصح وانا الغلطان
قلت ليو تمام وما قبلت اعتذارك لسه لكن بس ح أوافق ويلا، ارح
قمنا من الأرض واتحركنا ٠٠٠
مسافة الطريق أيوب قال متأكد ح نواجه مشاكل كتيرة هنا ودا غير انو اكيد ميادة وفدوي ورانا وما معروف حيكون في ياتو مصايب تاني المهم حاليا عندنا بصيص امل عشان نحاول عشانو
ابتسمت وقلت ليو اخر بصيص فعشان كدا لازم نحاول بكل طاقتنا وقف وقال لي وعد مني ليك يا سندس انو ح اعمل اي شي عشان الشي دا ينجح وروحي فداك ومستحيل اتخلى عنك بس انتي خليك واثقه فيني وفي عقلي وبطلي عناد قلت ليو حاضر ٠٠
قطعنا نص المسافه وهنا الليل داب بدا يدخل. قعدنا جنب صخرة كبيرة وكل زول سند ضهرو فيها اتنهدته وقلت لي أيوب لو م متنا منهم ح نموت عطش وجوع انا خلاص ريقي نشف وحيلي مات تصدق سحب الشنطه من ضهرو وبدأ يفتح فيها كنت مركزة معاهو لحظات بس وطلع قاروة مويه وسندات طعميه وشكلهم بدا يتخرب خلاص لأنها طولت في شنطتو ٠٠ قلت ليو بالله عندك دا كلو وساكت ضحك وقال والله من الخوف والهلع نسيت انو انا لابس شنطة ظهر زاتو ولو م كلامك دا ما كان اتذكرتها
ع العموم هاك ليهم الاتنين قلت ليو لا شيل وحدة وأنا وحدة قال لي انا بستحمل عادي ممكن يومين اسبوع م فرقت قلت ليو لا بعد تحنيس مني حتى شال ليو وحدة وأنا شلت وحدة فتحت القارورة وشربت منها رُبع بس وقفلت٠٠٠
هنا لاحظت للواطه بدت تليل بطريقه غريبه خُفت شديد انو يكون نفس الشي حق قبيل داك أيوب لاحظ لي وقال م تخافي شكلو دا منتصف الليل دخل وحسب كلام ميادة هنا في تسارع في الازمنة علي م اعتقد المهم ح نرتاح لحدي م الصباح يجي ونتحرك قلت ليو تمام سندت راسي في حافه الصخرة وحاولت انوم بس م قدرت هو زاتو مستحيل انسان طبيعي يقدر ينوم في شي زي دا ٠٠٠ عدت دقيقه وساعة وساعتين وبديت اسمع أصوات مشي الحصين تاني قمت بهلع وعاينت لي أيوب قال لي بقلق مالك؟ قلت ليو الصوت بدا يظهر تاني شكلهم جاين علينا قال لي قومي ارح ارح رفع القطعه الكانت مربوطه في يدي وشال الطرف التاني وربطو في يدو وقال لي ح نمشي في الظلام كدا وقدر ما نحن ارتحنا حيكون ما من صالحنا
تحركنا وواصلنا مشي ومرات ندقش حجر ومرات نقع في حفرة ٠٠٠ ولحظات بس وجات عاصفة تُرابية شديدة ٠٠٠ لدرجة بقينا م قادرين نمشي ولا خطوة لي قدام
فجأة جسمي كلو كشا ٠٠٠ أيوب قال لي شكلو في حاجه جايه علينا قلت ليو اي شكلو كدا ح نعمل شنو هسي؟ قال لي م تخافي. وخليك قويه وانا معاك وماف حاجه ح تحصل ليك
من بعيد لمحت حاجه بتزحف في الأرض وصوتها زي صوت الزيت الحار لمن يحمرو فيهو حاجه
بديت احس بيها ماشه تحت رجولي طبعا خلاص اتجمدت في مكاني وبديت انادي في أيوب بكل رُعب وخوف
أ أ يووو. ووووو. ب.،

 

ف ٠ف ٠ فففي حاجه ماشه تحت رجولي
قال لي م تتحركي خليك ثابته بس
بقيت ارجف رجف من الخوف ٠٠٠
الشي بدا ينسحب من تحت رجولي ٠٠٠
لحدي م سمعت صوت انثوي بيقول سندس احسن تجو معاي
رجعت خطوة لورا وهنا ظهرت ميادة قدام وشي ٠٠٠ بس شكلها كان غريب شديد وشها كان ملطخ بالدم وأطراف يدينها ما متساوين ورغم الظلام كانت بتتشاف ب وضوح تام ٠٠٠ رجعت خطوة ل ورا وقلت ليها اختينا قالت لي ممر اورفاندا ح يقفل بعد ٢٤ ساعة ولو م عبرتو معاي الممر دا ح ننتهي كُلنا ٠٠٠
يتبع٠٠٠

 

• لقراءة باقي فصول الرواية أضغط على (رواية جيرانا)