رواية جريمة العشق الفصل الثالث 3 بقلم محمود الأمين
لقراءة الرواية كاملة بدون إعلانات (اضغط هنا)
لقيت الدكتور عزت الدمنهوري مستنيني، بس شكله متوتر مش ده الدكتور عزت اللي انا اعرفه.. سلمت عليه وطلب مني يشوف التحاليل اللي معايا.. ولكني قولتله
_ اكيد يا دكتور انت مش طالبني عشان تشوف التحاليل، ما انا قولت لحضرتك اني هبعتهالك واتساب، بس حضرتك اصريت اني اجي لحد هنا.. وانا عاوز افهم السبب؟!
=في البداية وريني التحاليل هعرضها على الدكتور المسؤول عن المعمل ده، انا اعرفوا كويس معرفه شخصية، وبعدين هقولك انا كنت عاوزك في ايه؟
…
وفعلا اخد التحاليل، واتصل بالدكتور منصور بسيوني وقاله
_ بعد اذنك يا دكتور منصور هبعتلك تحاليل دلوقتي المفروض انها طالعه من المعمل بتاعك وعاوزك تعرف اذا كانت التحاليل دي مظبوطه ولا مزورة
فرد عليه الدكتور وقال
= ازاي طالعه من معملي ومزورة انا مش فاهم؟!
_ انا قصدي ان ممكن يكون في شخص زور التحاليل دي وحطها في الحافظه بتاعه المعمل بتاعك، وعشان كده انا عاوز اعرف اذا كانت صادره من المعمل بتاعك ولا لا؟
انا بعتهالك واتساب يا ريت ترد عليا في اقرب وقت
…
وبعد ما قفل مع الدكتور منصور بسيوني اتلفت ناحيتي وقال
_ شوف يا عمر انت عارف اني بقدرك جداً، ولكن في الاخر انا دكتور وصعب اطلع اسرار المرضى وعشان كده لما حصل الموضوع اللي هحكيلك عليه دلوقتي، مبلغتكش وقتها، ولكن دلوقتي الموضوع اختلف، في جريمة قتل، ويمكن كلامي ده يكون السبب في براءه حد والقبض على المجرم
= انت كده بتزود فضولي يا دكتور عزت، ارجوك تتكلم انا عاوز افهم في ايه؟!
_ من فتره مش كبيرة، كنت قاعد في العياده هنا وبستقبل الحالات ولاحظت ان مدام نهى جايه تكشف عندي وكانت حامل، وعشان الناس دي كانت من طرفك انا كنت فاكرها كويس رغم مرور السنين هي وجوزها الاستاذ عمران.. حتى لما سالتها عليه ابتسمت ابتسامه بسيطه وقالت كويس.. ولما كشفت عليها كانت حامل في الشهر التالت ولكن وقتها افتكرت اني كنت مبلغ الاستاذ عمران انه مش بيخلف وان الموضوع معقد جداً، ولكن بعد الكشف خرجت وراها من الاوضه ووقتها شوفت راجل معاها غير الاستاذ عمران، محبتش اتدخل وجايز هي كانت مش عاوزه تحكي انها اتطلقت من عمران واتجوزت الشخص ده مثلا.. لحد ما حصلت الجريمة وانت كلمتني وفكرتني بالموضوع
= انت عارف معنى كلامك ده ايه يا دكتور عزت، معناها الحاجة اللي انا رافض اصدقها.. ان عمران هو اللي قتل مراته
ما هي كده كانت بتخونه.. لا حول ولا قوه الا بالله.. عمران كان بيحبها وبيثق فيها، بس برضو اكيد في حاجه غلط اكيد مش هو اللي قتلها
_ عمر انا مقدر ان ده صاحبك، بس انت ظابط شرطه ومينفعش تحكم بمشاعرك ولا باحساسك.. في حاجه اسمها قانون
….
وهو بيتكلم معايا وصلت رساله على الواتساب عنده، والرساله كانت من الدكتور منصور بسيوني واللي كان بياكد على ان التحاليل دي مش مظبوطة وانها مش خارجه من المعمل بتاعه، وبعد ما اتكلم معاه شوية.. لقيت الدكتور عزت بيقولى
_ للاسف يا عمر التحاليل دي مزورة، وصاحبك قدر يخدعك فعلاً وانت صدقت وان الاوان بقى انك تسلم الموضوع النيابة، وتطلع نفسك من القصة دي خالص.. النيابة هي جهه التحقيق وهي اللي تقول مين ظالم ومين مظلوم؟.. انت كده عملت اللي عليك
….
خرجت من عند الدكتور عزت الدمنهوري، وكلمت وكيل النيابة وحكيتله كل حاجة دارت فتكلم وقال
_ اظن بعد المواجهة بالحقايق اللي معانا هيعترف بالجريمه وهيقول ايه اللي حصل؟
= اتمنى ان يعترف عشان يخفف عن نفسه، اتمنى ميكنش فيه حاجة مستخبية تلبسه حبل المشنقة
*****
_ في الحقيقه انا مستغربك يا استاذ عمران، يعني انت عارف ان التحاليل بتاعتك مزورة، ورغم كده اصريت انك بتخلف وانك اتعالجت، وفي الحقيقه انك متعالجتش.. ده غير ان احنا اكتشفنا علاقه ما بين مراتك وما بين ساهر.. عشان لما قولتلك ان مراتك كانت بتخونك، زعلت وقولت ان انا بتهمك في شرفك
= وانا لسه انا مقتلتهاش، والله العظيم ما قتلتها.. انا زورت التحاليل عشان اهلي واهلها والضغوطات اللي كانت علينا.. عشان يسكتوا ويبطلوا يتكلموا في موضوع الخلفة ده
_ كل الادله اللي قدامي بتقول انك انت اللي عملت كده، ومش فاضل غير البصمات اللي لو طلعت بصماتك هتلبس القضية للاسف
…
كنت مستني تقرير البصمات اللي كان اتأخر اوي على ما وصل، ولكن الصدمه، ان البصمات اللي كانت في مسرح الجريمة غير مطابقه لبصمات عمران سليم.. عشان كده استدعينا اخو المجني عليها كريم ولما وصل النيابة كان باين عليه عدم الاتزان
_قتلت اختك ليه يا كريم؟
= قتلت مين يا باشا عدم المؤاخذه، يعني هي تحرمني من الفلوس وهي عايشه ولما تموت الاقي نفسي لابس موضوع قتلها؟!
_ اظبط نفسك يالا واتكلم كويس، تنكر انك هددت اختك بالقتل عشان رفضت تديك فلوس؟!
=مكنتش في حالتي يباشا، جسمي كله كان واجعني وكنت محتاج..
_ كمل، كنت محتاج فلوس من اختك عشان تروح تشم بيها، انت كده كده حتى لو طلعت من قضيه قتل اختك انا ناوي احللك وهلبسك قضيه تعاطي.. بس لما نخلص من القضيه دي الاول
…
وبعد ما خلصت تحقيق معاه واخدنا بصماته، طلعت البصمات اللي في الشقه مش بصماته هو كمان.. وبكده مش فاضل غير واحد ساهر الكومي اللي حملت منه مدام نهى واللي اكيد رفض يعترف بالطفل ده، ولكن وقتها صدمته ان عمران مش بيخلف وفي نفس الوقت هي مش هتجهد الطفل لانها خايفه على نفسها
وده اللي خلاه يقتلها لما دخل نفسه في حوار كبير
وبعد اربع ايام عرفت ان ساهر فاق، وروحتله عشان احقق معاه، واول ما دخلت عليه الاوضة اتعدل مكانه.. فطلبت منه ياخد راحته وبدأت اتكلم معاه
_ايه حاولت تنتحر عشان حاسس بعذاب الضمير مش كده؟!
= ادويه الاكتئاب كانت مخليه عندي لا مبالاه مش طبيعية، انا مكنش قصدي اقتلها، بس هي ممكن هي غلطت فيا غلط كبير وقالت اني بتهرب من مسؤوليه الطفل اللي في بطنها، كانت عاوزاني اساعدها تطلق من عمران وبعد كده انا وهي نتجوز
وقتها بطنها هتكون كبرت، ساعتها كنا هنقول للناس ايه؟.. دخلت عليها قبل الدخله، كنت بفكر معاها بالعقل ولكن هي اتعصبت عليا وبدأت تزقني وتقول عليا اني انسان جبان اتخليت عنها، وانها ندمانة انها عرفتني.. محسيتش بنفسي غير وانا بضربها
زودت في الاهانه وقالت اني كنت شحات وهي قابله بيا، هانت كرامتي بكلام كتير.. محسيتش بنفسي غير وانا بخبطها في لوحه الكهربا.. واول ما الكهربا مسكت فيها، كنت واقف مصدوم وانا بتفرج عليها وهي بتموت ومش عارف انقذها.. وفضلت ازود في ادويه الاكتئاب اللي كنت بسببها بعيش في لا مبالاه وتبلد مش طبيعي.. لكن اول ما بطلته ادركت انا عملت ايه وعشان كده قررت انتحر
اتحولت القضية للمحكمة.. وسمعت القاضي بيقول
بعد الاطلاع على الاوراق وسماع النيابة والدفاع واقوال الشهود حكمت المحكمه وباجماع الاراء على المتهم ساهر عبد الرحيم الكومي باحاله اوراقه الى فضيله المفتي.. رفعت الجلسة
وخلصت القضية.. ولكن الاستاذ عمران كان محتاج علاج نفسي بعد اللي مر بيه بس كفاية انه طلع براءه بجريمة معملهاش وربنا يعينه على اللي حصله.
…
اشترك للحصول على أحدث التدوينات المرسلة إلى بريدك الإلكتروني.
ليس لديك حساب؟ إنشاء حساب
التعليقات (0)
لا توجد تعليقات بعد. كن أول من يعلّق!