رواية اقتحمت جنتي الفصل الحادي عشر 11 بقلم أسماء عادل

اذا شعرت بالعجز امام رفضك شيئ…. فاستسلم له لربما يكن فى استسلامك قوه و استمتع بلحظه استسلامك فقد لا تواتيك الجرأه مره اخرى لذلك الاستسلام

خرجت جنه من مكتب سليم تشعر بمشاعر جديده تماما عليها لا تعلم ماهيتها و لكنها مشاعر تشعرها انها على قيد الحياه عكس ما سبق من حياتها

الآن تعجز عن التنفس قليلا و لكنها مستمتعه بذلك الاحساس المؤلم اما فى الماضى عندما كانت تتنفس بطريقه طبيعيه كان جسدها فقط ما يتنفس اما روحها كانت ميته خاويه لا حياه فيها

اتجهت رأسا لمقر عمل والدها و دلفت مكتبه وسط دهشته من زيارتها المفاجأه فهلل بتعجب
# جنه يا بنتى…..خير ايه اللى جابك؟

امتعض وجهها بضيق مصطنع و هتفت معاتبه
# اخص عليك يا بابى….دى مقابله برده؟

اجابها بتوضيح
# ابدا يا حبيبتى بس مش من عوايدك تجيلى الشغل، انتى كويسه طيب كله تمام؟

حركت راسها بصمت و سعاده ظاهره فنظر لها محسن بتفحص لملامحها و ابتسم بابويه مريحا ظهره على مقعده الجلدى يردد بمكر
# و يا ترى جايه ليه؟

جلست امامه و اخذت تفرك باصابعها قليلا حتى تشجعت بالنهايه و رددت الكلمات دفعه واحده
# بابى…انا عزمت سليم انهارده على العشا عشان عايز يتعرف عليك قبل ما يسافر

ابتسم بفرحه و سألها باهتمام
# مسافر فين؟

بتوضيح هتفت
# مصر….ما انا قلت لحضرتك انه عنده شغل هناك

اماء براسه و لكنه لم يستطع اخفاء تقوس حاجبيه و انعقادهما فتوترت جنه من ملامحه و هتفت بتخوف
# فى ايه يا بابى؟

اخذ نفسا عميقا و زفره ببطئ موضحا
# ياسر و يحيى بيلومونى على اللى حصل و ياسر مصر ان الشاب ده السبب و انك فسختى خطوبتك معاه عشانه و دلوقتى احنا بنأكد لهم الكلام باللى بيحصل

انتفضت مدافعه عن نفسها تهتف بضيق
# يا بابى و الله الكلام ده مش مظبوط و…..

قاطعها مؤكدا
# انا عارف انه مش مظبوط، بس اى حد من بره الموضوع حيشوفه كده، ده غير اللى حصل لياسر من الشاب ده برده مأثر عليه جامد

بلا وعى و بملامح متعجبه رددت
# ايه هو اللى حصله مش فاهمه؟ مكانوش بوكسين اخدهم من سليم يا بابى و ده بعد ما البيه مد ايده عليا

لمعت عين محسن بضيق و غضب مستعر و خرج الشرر من عينيه بغضب جم و هتف صارخا بحده
# مين ده اللى مد ايده عليكى؟ معقول ياسر عمل كده؟ ليه مقولتيليش؟

اجابته محاوله تهدئه ثورته
# محبتش اضايقك خصوصا ان اونكل يحيى صاحبك و شريكك فخفت اتسبب فى زعل بينكم

صرخ بها موبخا
# تقومى تخبى عليا انه مد ايده عليكى….ده نهاره مش حيعدى انهارده، و لسه ليه عين يتكلم الحيوان ده؟ ده على كده قليل اللى عمله فيه الشاب ده