رواية نمر والهنوف – لا غلاك اكبر ذنوبي ولا قلبي نبي الفصل التاسع عشر 19 بقلم اديم الراشد

البارت التاسع عشر

وفي بيت ابو حمد
رغم ان حمد واحد بس ازعاجه عن الكل وفتح الباب : حياك الله يانمر بالله تجي تناصرني
ضحك نمر : يرحم والدينك شي فيه رفعت ضغط فكني
ضحك حمد: انا اللي بموت من الضغط
جت ام حمد : هلا يا نمر هلا يا امي سلامتك ياحبيبي وش فيك
نمر : الله يسلمك ياخاله رفع ضغطي ولدك
ابو حمد بضحك من الصاله: السموحه يانمر وعاذرينك لان هالخبل طلع قروني من الصبح
دخل نمر وهو يسلم عليه وجلس: ليييه وش مهبب بعد
حمد : لحظه قبل تهجمون علي في ذمتك يا نمر عمرك شفت ادمي معرس مايلبس بشت
نمر: في الملكه بتلبس بشت!؟؟
أم حمد : فهمه ياخي
حمد : وش يضر يعني لو لبست !
نمر: ما يضر لكن ماله داعي فالنهايه هي عاديه ولا تحتاجه اترك البشت بالزواج
ابو حمد : إحنا ما نمنعك بس احسن انك تخليه لزواج
حمد : ادخل بدون بشت!!!!
ام حمد : ايييه عادي ماعاد يمدي رهف تراجع
ضحك نمر: انا اضمنها لك
جلس حمد وهو معترض على رأيهم وام حمد وابو حمد ما صدقوا شافوا نمر عشان يقنع حمد ولا بذل نمر جهد كبير لان حمد يتنازل مايبي يرفع ضغط نمر
…………….••…………
والمغرب
الكل جهز والكل صار مستعد انه يحضر
وفي بيت ابو حمدان كانوا كل الرجال بالصاله ينتظرون ما عدا نمر اللي ما نزل للحين
وكانت ام حمدان وهدى جالسين بطرف وعين حمدان على هدى اللي صارت تخاف منه وتسكت ما تقول شي
وهمست ام حمدان: اااخ يالقهر اجل انا بنتي تاخذ هالمتخلف حمد انا اخر عمري اعطيه بنتي كذا
هدى: وش بتسوين النصيب
ام حمدان: هدددى لا تجننيني هذا مو نصيب هذا تخطيط الكلب نمر يبي ياخذ عيالي مني
هدى : والله مدري وش اقول
ام حمدان : ماعليييه انا اورريه
…………….••…………
في غرفة رهف
اللي كانت تناظر نفسها بالمرايه وهي راضيه لفت على اثير : هاه تأكدتي من المصوره
اثير : اييه كل شي تأكدت منه وهذا فستانك جهز بعد
اتجهت لها رهف وهي تحضنها: ياحبيبتي يا اثير تعبتك معي كثير
اثير: لا عمرري اذا ماتعبت عشانك اتعب عشان مييين !؟ لفوا على الباب اللي دق وقال راكان: ادخل
اثير: تعال
دخل راكان ببتسامة رضا : ماشاء الله تبارك الله جاهزه ياحلوه
رهف هزت راسها ببتسامه ودخل عدنان يصفقق يغني بضحك: يااااا ربييي يا اختي وش كثر مزيييونه
ضحكت اثير وهي تقول : دقيقه بصور
قربت تصور كل اللحظات الطقطقه
……………..••…………
وفي غرفة نمر
اللي بعد ما تجهز وتعطر جلس ينتظر الهنوف وهو يهمز راسه وتحرك اول ماسمع دق على الباب وفتحه وهو مقطب : هلا ريان هلا حاتم وش فيكم!؟
حاتم : بابا يقول ما خلصت
نمر: الحين بنزل
كان نمر يكلمهم وهم يناظرون وراه ببتسامه ولف نمر وهو جالس على ركبه ونص وابتسم ابتسامه وسيعه اول ماشاف الهنوف اللي كانت تأشر لهم وتضحك معهم رجع يوقف وهو يقول : خلاص قولوا جااي
طلعوا وهم يضحكون ولف نمر ببتسامه واتجهه للهنوف : هاه من ناويه تذبحين اليوم !
ناظرته الهنوف باستغراب وضحك: او بالاصح منهم ضحايا جمالك
ضحكت الهنوف : انا اتعب من وصفك والله
ابتسم نمر : حصني نفسك احسن عن العين
الهنوف : تحصنت بس باقي ما حصنتك
لف نمر : انا اتحصن خلينا نطلع بسرعه ابوي ينتظر
استغربت الهنوف وهو بالعاده يقولها تحصنه لكن اخذت اغراضها وطلعت وراه ونزلوا على اصواتهم يضحكون يغنون لرهف اللي جالسه جنب ابوها بحرج واتجهه لها نمر يسلم عليها بحب ووقف على طرف ما علق
ولف عليه عدنان: غريبه ماقلت شي
نمر : يقولون الصمت في حرم الجمال جمال
وناظره بحده: وبعدين ذكرني بجمالك اللي ماينسكت عليه
انرعب عدنان ولف بضحك ووقف ابو حمدان: يلا يلا
طلعوا كلهم وحلف راكان يركب رهف معه ويسوي لها موكب وراحوا للقاعه وهم على طرب واغاني وفرح
لكن في سيارة نمر
كانت الهنوف تقرأ الاذكار ومدت يدها لنمر اللي يشد على راسه بألم لكن اول ما قربت يدها ابعدها بغضب وهو يتدارك نفسه : الهنوف لا تزيدين الصداع الله يرحم والدينك
الهنوف :وش نوحك ؟ من وشو مصدع
نمر : مافيني شي اشرب شاهي الحين وارتاح
سكتت الهنوف وهي مستغربه وضعه واول ما وصلوا ونزلت الهنوف وراح نمر لقسم الرجال وشاف حمد وابوه يستقبلون الناس وهم مبتسمين ووقف جنبهم يتغصب الابتسامه ولكن نادى عدنان بوجع : اسمع تدبر لي شاهي من تحت الارض وتجيبه بسرعه
عدنان: ابشر موجود بس وش يوجعك
نمر: راسي
عدنان : خلاص ابشر
طلع عدنان اللي عازم شلته وتقدم خالد صاحبه : وش تسوي !؟
عدنان: نمر اخوي راسه يوجعه وابي اسوي له شاهي
خالد : ايييه هذاك نمر اللي دايم يهاوش
عدنان: ايه
خالد: اجل وخر خلني اضبط له شاهي ويفكنا شره انت ما تضبطه
عدنان: تسوي خير
ابتعد عدنان وهو يناظر الحفل ومبتسم ولا يشوف خالد وش يسوي ولف عليه خالد بعد ماخلص
خالد: خذه له وان شاء الله يصير حصان
ابتسم عدنان: مشهود لشاهيك ياخويلد
واخذ الشاهي وطلع يوديه لنمر للي اخذه وهو جالس جنب حمد اللي ماهو صوبه
وفعلاً شرب نمر الشاهي وصحصح وطار صداعه كله وبدا يستوعب الحفل كله
ولكن نكده الوحيد اهل الديره لكن ماكان مهتم كثيير وهو يشارك حمد رقصه ووناسته
……………..••…………
اما جهة الحريم
كانت اثير تحاول تحرك امها اللي كانت قالبه وجهها وكارهه كل التفاصيل وبما فيهم ام طارق اللي تخزها
اما ام حمد كانت تحاول تداري الموضوع والناس يناظرونها وهي ترقص وتهدي وتعب بلحالها اهل العروس ما منهم تفاعل الا اثير والهنوف اللي يحاولون يجاملون
وبدريه تحاول تحيي الحفل وقدروا
…………….••…………
واخيراً
وصلوا للفقره المنتظره وهو لقاء حمد ورهف
ودخل حمد مع نمر وابو حمدان واخوان رهف كلهم وهو يهمس : نمررر اخذ ابوك وارجعوا بالله
دفه نمر وهو يضحك : بعيييد عن شواربك يالاخو
ضحك حمد وهو يلف لراكان بهمس: اجل ظني فيك ما يخيب
راكان : انسسسى
تقدموا للغرفه على صوت زغاريط واغاني واعتدل حمد وهو يقول بهمس : الله يسامحك يا نمر لو مخليني اجيب بشت مب ازين الحين ضايع بينكم ماشاء الله كل واحد وش كبره
نمر بهمس: اتمنى انك تسكت وتدخل عشان ما تدخل عن طريق هبوط مظلي والسبب رفسه
تقدم حمد وهو مرتبك وفتحوا الباب ودخل ابو حمدان وهو يسلمون على رهف اللي كانت منحرجه وقف نمر بجنبها لعانه في حمد اللي يسحبه يوخر ونمر متصلب
لكن تدخل ابو حمدان : تعال تعال
طلع نمر غصب ووقف حمد ببتسامه جنب رهف وتقدم حمدان يسلم عليها ويبارك لها وبعدها طلعوهم غصب وهم لو يجلسون بيذبحون حمد من مزحهم وخصوصاً ان نمر كان فاصل بشكل غريب والكل مستغربه منه
ودخلوا ام حمد وام طارق وبدريه وجود يسلمون عليهم و حمد يغمز لبدريه عشان يطلعون
وضحكت بدريه وهي تهمس : ياويلي انت قبل عندك نص عقل لكن الحين طااار كله لكن ارفق بالمسكينه هاذي
حمد بهمس سمعته رهف: بدريه روحي يا شيخه انا اعرف كيف اترفق بحبيبتي
طلعت بدريه تضحك ورهف اللي انهبلت من كلامه هذا وهو في الملكه وش بيسوي بالزواج
ولف حمد مبتسم : ماشاء لله تبارك الله ، وش هالجمال يارهوف! ما اتفقنا كذا
صدت رهف وهي ماهي مستوعبه كلامه ابداً وواضح لها من البدايه انه جريء
لكن رحمها الله ودخلت المصوره وبدت تتكلم وتعطيهم وضعيات التصوير ولف حمد لها وهو كل شي تقوله له يسويه وهو مستانس
لكن انهارت رهف داخلياً اول ما همس بأذنها: انا وشلون أخبيك عن العالم!! .. وشلون بيصبر قلبي وهو يدري ان كل هالناس بيشوفون هالجمال اللي اشوفه
ابعد اول ما اختلفت الوضعيه واختلف معها اتزان رهف اللي لاشعورياً مسكت يده عشان ما تطيح وشد حمد عليها ببتسامه وهو منصاع لكل اللي تطلبه المصوره وهو بين كل نقله ونقله يغني عشان ما يوتر رهف ويسليها وهو يضحك ويردد
(انا حبيبي بسمته تخجل الضي ..يكسف سنا بدر الدجى من جبينه)
وهو يلبسها شبكتها ويغني ويضحك وكانت رهف تحاول تدارك إحراجها لكن اخر صبرها وهي تسمع حمد يضحك ويردد وغصب عليها ضحكت من طولت باله وجمال كلامه
وهالمره رجع حمد لها في اخر صوره وهو يهمس بضحك ( في ضحكته لحن الغرام الطروبِ) لكن انتبه ان المصوره صورة وطلعت وهي تضحك
وابعدت رهف بحرج واخذ حمد نفس : وبس والله لين هنا ويعلن قلبي استسلامه
جلست رهف وهي ماهي قادره تناظره لكن اول ما جلس دخلت ام حمد: حمد يلا وانا امك اخذت راحتك بالحيل
لف حمد بضحك: بدري يالغاليه
ام حمد: لا خلاص اطلع دامك ما تبي تنزف اطلع
عدل حمد شماغه بضحك: يمدي اغير رايي وانزف
بدريه طلت بضحك : نمر ترا ماسكينه من ساعه بتطلع ولا يطلعك
حمد : لا يا شيخ بطلع بكرامتي بس انتم روحوا شوي ولا سكروا اذانكم
صدت ام حمد بإحراج وطلعت : لك دقيقه
لا شعورياً لفت وهي ودها تجلده على الجرأه وضحك حمد : بما اني ممكن احس انك ودك تكفخيني انا اقترح نبدلها يعني فيه بدائل كثيره مثلاً .. وقف وهو يتجهه لها وهو يحضنها بحنية : احضنك واروح ! وفيه بعد… لا شعورياً قالت رهف : لا خلاص تكفي هاذي
انفجر حمد وهو يضحك : اجل دام كذا فمان الله
وطلع بعد ماودعها وامه واقفه بطرف عين: فضحتنا هاه !
اتجهه لها حمد وهو يبوس راسها ومسك يدها يلفها ويرقص معها ويغني :تراااه من بد العذارى لعوبي
سكرت فمه امه: اطلع اطلع الله يخلف علي
طلع وهو يضحك واتجهه للعيال واول ما راح لنمر وهو يضمه بلعانه : بالله وش ريحة العطر اللي معي
لف ذراعه نمر بضحك : ودك تطلق صح
ضحك حمد: امزح والله خلاص
سلطان اللي جاء : حميييد تكفى اثقل انا على بعد 20 متر اشوفك خفيف
حمد : نشوفك اذا تزوجت يا سلطان وخروا بروح اقول لعمي اقتراح
ضحك راكان: وش بتقترح !
حمد : جيت وجابك الله دام اخوها اللي اكبر منها ، مافيه مانع نلعب لعبه يعني تعتبرون هالملكه زواج وانا اخذ زوجتي واتيسر
ضحك راكان: وش مشربينه هذا!؟ ولد اعقل
نمر: لا تشره عليه فيه اختلاف في مخه شوي
حمد : بس والله يا عيال .. قبل ما يكمل سكته نمر بمسبحته وهو يضحك وسكت حمد اللي تحمس جداً
ركض عدنان: يلا يا عيال وين الرقص
جاء حمدان وهو يسحب نمر عشان يرقص معه
والكل اتجهه لساحة الرقص
…………….••…………
وعند رهف
كانت في عاالم ثاااني ما تشوف فيه احد الا حمد فزت على صوت اثير والهنوف: خيييير معقوله مسوي لها تخدير !
الهنوف بضحك: لا والله شكل اختكم خفيفه
اثير : وللله مدري
ابعدتهم رهف وهي تضحك: وخروا عني تكفون انا بموت
اثير: واضح
ضحكت الهنوف: وش نوحتس!؟
رهف : ياللللللله وش كثر احب
ضحكت اثير برعب: اماااا وصلتي لهالمرحله
الهنوف : جاب راسه ولد ابوه
اثير ضحكت: بعدين تقولين لنا وش كثر تحبين الحين الزفه والناس تنتظر
رهف : اي والله صح
وقفوا يرتبونها وانزفت وهي ضحكتها طول الزفففه برعاية غزل حمد
…………….••…………
واخيييراً انتهت هالليله الحلوه
وكل واحد رجع لبيته مثقل بالمشاعر الحلوه وعلى رأس القائمه حمد ورهف
اما الهنوف استانست اول ماشافت ان نمر رايق ومو بس رايييق الا طاير من الوناسه
ونمر اللي نص فرحه من فرح رهف وحمد وهو شايف حب حمد لرهف بس متوقعه حماس لانه مستحيل حمد يحب رهف قبل لكن مقتنع ان رهف تخلي الدنيا تحبها في يومين
لكن طارق اللي كان يحاول يسمع مدحه وحده من جود ما فيه فايده لكن مع ذلك تجاهل هالكلام كله وهو يطغي حبه لها على هالشي ويعلق هالتصرفات بس نفسية حمل
………..••…………
ومن بكره
صحى نمر وصحى معه هالصداع وصحت معه العصبيه لكن اليوم بشكل كبييير يفرق عن امس واليوم وطلع وهو يأشر للهنوف تسوي له شاهي وهو مالي خلق ينطق حتى وجلس عند الباب وهو يحتاج يتنفس هوا نظيف وشد على عيونه وسحب بكت الدخان لكن سحبته الهنوف بشويش منه: نمر تكفى لا تشربه وانت ما اكلت شي
سحبه نمر بغضب: لا اسمع صوت يالهنوف لا تخليني ازعلك
الهنوف : بس
وقف نمر : يوووووه خلاص اقول مابي اسمع صوت بتسكتين ولا اطلع من البيت كله واخليه لك
الهنوف هنا فقدت اعصابها: وش نوحك تصييح عليّه وش انا عاملتن بك تقولي هاللون !؟
نمر: لا ترفعيييين صوتك
الهنوف :ما رفعت صوتي هذا جزاتي بعلمك بمصلحتك لكن بكيفك
ضرب نمرالطاوله جنبها وهو تضرب عروقه بمخه من الألم : ولله والله لو اسمع صوتك ثاني مره لتشوفين شي مايسوونه حتى اليهود
ابعدت الهنوف وهي ما تبي تكبر السالفه ومعطيته عذر انه تعبان ولو بتكبره بيوصل الموضوع لمراحل صعبه ينحل فيها وضرب نمر الباب وسكره وهو يسكر كل شي يجي بوجهه لمبه او شباك لين اظلم المكان كله حوله وارتمى على السرير وهو يغطي راسه بالمخده مايتحمل يسمع صوت
…………….••…………
ومن هاليوم أعلن الصداع سيطرته على نمر اللي بدا به الامر بتسكير الانوار والشبابيك والاصوات وانتهى به لعزله تاااااامه وصار اغلب يومه في غرفته ومسكر الباب ما يتحمل اي كلمه وبدا ينحف بشكل ملحوووظ وعيونه بدت تذبل وكل ما يروح المستشفى يرجع بدون فايده وعلى هالحال انتهى شهر على نمر
والهنوف صارت تحارب فعلاً تحارب عشان ما تكبر المشاكل بينهم وهي تحاول تتحمل تعب نمر وهو ماكان مأذيها ابد لكن ما يتحمل اي شي
وبهالشهر كان حمد يرتب لزواجه للي قد مايقدر يعجل عجله لانه يبي يجتمع برهف لكن منكد عليه نمر وحاله
وبهالشهر راكان ملك وانتهى وينتظر بعد شهرين زواجه
لكن بهالشهر كان طارق الوحيد المرتاح وهو يشوف جود بدت ترجع لطبيعتها وطيبتها
…………….••…………
اما بالطرف الثاني ( البغيض)
تزوج احمد بتول وهو مستعجل بيرجع لانه لو جلس بيخرب زواج رهف ولكن مايقدر لانه يدري بيدفنونه اخوانها
وطلع لكندا وترك وراه اهله
وكانت ريناد بتموت وتعرف اي خبر عن نمر وعن رهف بس ماعرفت الا ان زواج رهف قريب وونمر في حاله تعب فضيعه
وهذا اللي خلاها تبعد لان نمر اذا فعلاً تعبان زي ما سمعت لو تغلط غلطه بسيطه بيذبحها نهائي
…………….••…………
واليووم
زواج حمد ورهف
وفي بيت ابو حمد بعد ما خلص حمد اغراضه رفع جواله يتصل بنمر لكن كالعاده مارد نمر ونزل حمد بضيق وقابله ابوه: هاه يا عريس وش مضيق خاطرك
حمد: ولا شي بس مدري عن نمر وينه
هز راسه ابو حمد : بيجي اكيييد انت بس اجهز
حمد ابتسم: جاهز بس انتظرهم يجون عشان نروح الحلاق
ابو حمد لف على صوت الباب وكان طارق اللي دخل وهو يصفق: وييييينه بطل الليله وييينه عريسنا
ضحك حمد : موجود موجود
طارق: يلا يلا بنطلع ما معنا وقت
حمد: والعيال وين!؟
طارق :بيجون الحلاق هناك يلا قبل دحيم يفصل علينا
حمد : يلا
طلعوا وابو حمد طلع للقاعه يرتب اموره هناك
……………..••…………
وفي بيت ابو حمدان
كان البييت كله فاضي من الحريم ماعدا ام حمدان اللي كانت تكلم بهمس : اييييه ايييه الله يعطيك العافيه بس ما قلتي لي كم يبي له
….: عطيه شهر وبيصير مجنون ويرمونه بالمصحه النفسيه
ام حمدان: اي تكفييين ابيه ينهبل ابييييه ينغسل
…: لا تخافين عندي ودامه بدا يسكر على نفسه وولا يطلع اجل قريب ويصير مجنون
ام حمدان: انا بسكر وفلوسك بتوصلك
سكرت ام حمدان وهي كل شي تبيه ان نمر يتجنن وينهبل وبكذا كلٍ بيعافه ويتركه واخرته لمستشفى المجانين
……………..••…………
وفي غرفة نمر
كان لحاله ووقف وهو يطفي زقارته ويناظر بشكله بالمرايه كان جداً تعبببان سحب المسكن وهو ياخذه ولبس ثوبه وشماغه وهو يعصبها على راسه عشان يشد الالم واخذ اغراضه ونزل متجهه للحلاق
ووصل وهو يشوف الحلاق مقلوب رقص وطقطقه وكان ينزعج من الصوت بس صابر عشان حمد وهو يبتسم لحمد اللي وقف يحضنه وهو في عز اندماج الحلاق
حمد بهمسس: كيفك اليوم !
نمر: بخييير ماعليك بخييير
سلطان قرب: نمر كيف الصداع!
نمر: حمدلله راح
كان نمر يجامل وجلس وهو يستسلم للحلاق ومن ضمن الموجودين خالد وعدنان وراكان وحمدان
ودخل خالد : طلبت لكم الشاهي عشان تروقون
عدنان: جاء بوقته
اخذ عدنان الكوب وهو يعطيه نمر اللي اخذه ماهو مركز والكل صار يشرب هالشاهي
واخذ خالد السماعه وهو يرفع الصوت للاخير وحزتها ولا واحد كان بمكانه بما فيهم نمر اللي كان يرقص والكل انبسط ان نمر فك من عزلته شوي وعطوه عذر هالفرحه زواج اخته ومن حمد صديقه
………………••…………
وفي الصالون
الكل يجهز ورهف اللي صار حمد متررررربع بقلبها وهي تفكر وش بيقول الليله من كلام وش الحب اللي بيعبر عنه
والهنوف كانت تفكر كيف تصرف مع نمر وكيف بيكملون على هالمنوال
اخذت جوالها وهي تتصل ورد عليها نمر بصوت مليان ضحك من شهر ما سمعته بهالضحك : هلا هلا بحايل واهلها
ابتسمت الهنوف باستغراب : هلا يا بعد حيي ، وينك عندك لجه( ازعاج)؟
نمر: اييه في الحلاق مع الشباب
الهنوف: حمدلله رحت لهم! هقيتك نييّم للحين !
نمر ببتسامه وهو من زمان ما تكلم مع الهنوف كذا : لا صحيت ورحت
الهنوف : اهم شيٍّ يا ملي ما يوجعك راسك !؟
نمر: لا اخذت المسكن وهدا
الهنوف : حمدلله
نمر: يلا بسكر اذا وصلتو قولي لي
الهنوف : ابشر
سكرت وهي مبتسمه انها اخيراً سمعت صوت نمر رايق ويضحك ماهو تعبان ومعصب
وقربت اثير ببتسامه: خيير وش هالضحكه!؟
الهنوف : هاه ولا شي
اثير: كلمتي نمر!؟
الهنوف: اي والحمدلله بخير
اثير: طيب اسمعي وش سبب هالصداع اللي معه!؟
الهنوف : مدري بس اتوقع انه هالدخان
اثير : لا لا ما اتوقع اسمعي ليه ما تقولين له يروح لشيخ يمكن عين
الهنوف : لايسمعتس والله ليذبحتس ! ما يصدق هالخرابيط على قولته
اثير: ماعلينا خلينا نخلص
ورجعوا يجهزون
…………….••…………
في القاعه قبل يجون الحضور
كانوا الشباب كلهم جاهزين ودخل وطارق ونمر ودحيم عشان يسلمون على خالاتهم
وتقدم نمر يسلم على ام حمد وامه وبدريه ومدت بدريه يدها تمسح على كتفه: هاه كيف صداعك ان شاء الله احسن
نمر التفت لها: اووه الحمدلله احسن
بدريه: بسم لله عليك ان شاء الله ماعليك شر
سحب نمر يده بشويش منها : تسلمين المهم هذا دحيم عندك انا بروح
ام طارق : انتبهه لطريق
نمر: ابشري
طلع نمر ودخل طارق يدور جود اللي للحين ماشاف كشختها ودق الباب ودخل ولفت جود بخوف: فجعتني
تقدم طارق : بسم لله علييك وش فيك
جود : كنت ألبس
قرب طارق وهو يسكر لها السحاب بشويش وحضنها وهو يمرر يده على بطنها اللي برز شويه : ماشاء الله تبارك الله الله لا يضرك ياارب
ابتسمت جود : كيف شكلي!؟
طارق : وتسألين!!! صادقه انتي !؟ اذا ما كنتي اجمل وحده فالحفل انا ما افهم
ضحكت جود وهي تلف وتحضنه:ليت كل الناس عيونك
طارق : يعني اذا ماكانوا يشوفون كل هالجمال وش يشوفون!؟
جود : يا حبيبي والله
ابعد طارق : جيت بشوفك وبطلع اجهز معاد فيه وقت
جود: الله معك وانتبه لنفسك
طارق : على خشمي
طلع طارق وطلعت جود لامها تعدل لها فستانها ويشيكون على كل شي
……………..••…………
وفي غرفة نمر
بعد ما تأكد ان حمد جهز وخلاص رجع للبيت عشان يجهز ودخل وهو يدور على الهنوف اللي طلعت اول ما سمعت صوت الباب وهي تبي تتأكد اذا هو بخير لكن شافته قدامها على طول وابتسم : اوووه واخيراً شفت سيدة سادات الحسن
ضحكت الهنوف بفرحه وهي اول مره ما تدري كيف ترد عليه لكن سحبها نمر بخفه وهو يلفها وهي تضحك ورجع يحضنها وهو يهب عليه ريحة العطر اللي يحبه وهمس : ااااوووه يالهنوف
لفت الهنوف بحب: بسم لله عليك يا عيون الهنوف
نمر: عطيني شي يوفيك عشان اوصفك به
ضحكت الهنوف : مدري وش تشوف انت!؟
نمر بهمس : اشوف انك الرقة والعذوبة والآه من الأخر
ضحكت الهنوف وهي تبعد: انا اللي بقول اوووه من زمان عن الحتسي الحلو!! هقيت انك نسيته
ارتخت ملامح نمر بضيق : تدرين انه ماهو بيدي تدرين وش كثر الدنيا ضيقه علي هالايام
شدت الهنوف على يده : ادري وان شاء للله ايام وتعدي
نمر : وهذا هو اللي ابيه إن كان قلب الهنوف اللي أحبه وسعني ماهمّني ضيق الزمن واتساعه
حضنته الهنوف : والله انه يوسعك
اخذ نمر نفس وهو يبعد : يلا نبي نجهز عشان ألحق على حمد
الهنوف : يلا بجيب لك اغراضك
راحت الهنوف ورجعت وهي معها البشت ومعها حزام السلاح : نمر يا ملي اي واحد تبي !؟
نمر ناظر بحيره: وش تختارين انتي !؟
ضحكت الهنوف وهي تنزل الحزام ورفعت البشت وهي ترفع نفسها عشان توصل كتوف نمر وحطته عليه وهي مبتسمه: انا اشوف ان البشت يزهاك اكثر
نمر : اجل تم
اعتدل يضبط بشته وشماغه ولف على الهنوف : يلا !
الهنوف : يلا
طلعوا متجهييين للقاعه ونزل الهنوف وراح لحمد اللي كان يجهز بالفندق وشاف الشباب عنده
واول ماشاف حمد نمر نط بضحك: لا لا غش نزل البشت الحين يحسبونك انت المعرس
ضحك طارق : والله يانمر طلة عريس خالص
نمر اعتدل يضبط البشت: اسف والله يا حميّد بخرب عليك ادري بس البشت ماني منزله طلب خاص
عدنان: ياربي ترزقني انا بعد بالطلبات الخاصه
راكان: بيرزقك المهم يلا تأخرنا
الكل : يلا
طلعوا لسيارات وسحب راكان عدنان : وش تبي جايب هالخايس!
التفت عدنان لخالد ورجع يناظره: صاحبي ياخي مثلك يومك عازم اصحابك
راكان: هالخمه ما يصير من اصحابنا
عدنان تركه وراح وهو مايدري ليه يكرهونه بس خالد منتبه لكرههم
وزفوا حمد وهم يرقصون واللي بالشارع يرقصون معهم
…………….••…………
وفي قسم الحريم
كانوا مستعدين ودخلت ام حمدان واثير وهدى وكانت اثير الوحيده المبتسمه من بينهم كلهم وسلموا ودخلوا
ورهف فوق بجناح العروس وهي تصور مع المصوره تفاصيل يومها
وام حمد اللي ماسكه عبرتها بالقوه وهي ماهي مصدقه انها حضرت زواج حمد وبتزفه
وتداريها بدريه والهنوف
لكن الهنوف ملاحظه تغيير جود اللي ماعاد تجيب طاري لنمر ولا تتتكلم عنه وبدت ترجع لوضعها الطبيعي
وام طارق اللي تروح وتجي وتسأل الهنوف عن نمر اذا بخير او لا
……………..••…………
وفي قسم الرجال
وصل موكب العريس واستقبلوهم بالعود والتهاني
وحمد قلبه يرفرف كان يسلم من قلبه على كل واحد ووراه نمر اللي كل ما لف شاف واحد يتكلم فيه بالقوه كمل الصف وجلس
وجاء سرور : سلام
لف نمر: هلا سرور
سرور: وش اخبارك
نمر: بخير
سرور: متأكد!
لف نمر يناظره : ليه شاك!؟
ضحك سرور بفشله: لا بس سمعت انك تعبان
نمر: حمدلله طبت! من معلمك!؟
ضحك سرور: اوووه الديره كلها تدري
نمر اعتدل: ايييه وش يقولون اهل الديره!؟
سرور خاف بس من نظرة نمر قال: يعني تعرف كلام الناس
نمر: اييييه
سرور: ناس تقول معك ضغط وسكر وحالتك حاله وناس تقول لا سمح الله معك سرطان من التدخين لكن انا ماصدقت
ابعده نمر بغضب : قم قم خل هالزواج يعدي على خير قم
سرور: ابشر
نمر: وجع يوجع ابليس
صد وهو يمسح جبينه بغضب وقرب خالد : شاهي
نمر ناظره بغضب : وخر عني انت بعد
ابعد خالد وهو مستقعد لنمر لكن ماطول نمر على وضعه ووقف مع حمد يرقصون على العرضه
واخيراً الزفه
وكانت رهف واقفه بارتباك تنتظر دخول حمد وهي تسمع الرقص والاستقبال برا وتسمع اصواتهم كانت بيوقف قلبها
وانفتح الباب ودخلت امها وام حمد ومن بعدهم ابوها وابو حمد اللي تقدم بحب وهو يسلم عليها والكل جو والكل يسلمون ويباركون وعيونها تدور حمد ودها تشوفه من بعيييد تبي تشوفه كيف مقبل اخذت نفس وهي تشوفه جاي وهو ابتسامته وسيييعه كالعاده
وقرب وهو يوقف جنبها وبعد ما تصوروا صوره جماعيه بدا الكل يطلع بعد ما وصوا حمد على رهف وحمد يمشي وراهم لين سكر باب الغرفه والتفت وهو مبتسم ومن عند الباب قال بصوت شبه واطي : مبرووووووك علي رهوف ومبروك على رهووف حميّد
ابتسمت رهف وهي تهمس : لله يبارك فيك
قرب حمد وهو يناظرها بهدوء وطول وهو يناظرها ورهف ودها تشوف وش نهاية سكوته بس دخلت المصوره وهي تبتسم لحمد وهي تتذكره من ايام الملكه وشلون كان قمة فالرومانسيه
ولف حمد لرهف بهمس من باب المزح: اضحك لها ولا تغارين
ناظرته رهف بضحك وهي ترفع كتوفها بحيره وردت بهمس : وش تشوف انت
حمد بهمس: لا تسأليني وش اشوف لان عيوني تشوف وما تشوف الا بهاك
صدت رهف ببتسامه وصار وقت التصوير واخيراً انتهى والحين عاد وقت الزفه استعدوا وحمد يناظر امه اللي كانت عند الكوشه تستقبلهم وابتسم وهو يحس انها بتنهار وهو يهمس ( ياااا بعد الدنيا يا امي )
ابتسمت رهف ولفت تناظر كانت امها جالسه ببرود لكن ما طولت وهي تشوف مشاعر حمد لامه واضحه بعيونه وابتدت الزفه ونزلوا وفي نص المسيره كانت هناك ام حمد اللي اتجهه لها وهو يبوس راسها وحضنته وهي تبكي وحمد يهديها وماقدرت رهف ما تبكي معها واحتار حمد بينهم وتدخلت بدريه وجود وهم يهدون الوضع واخيراً هدو وحمد في يده اليسار رهف ويده اليمين امه اللي حاضنها بذراعه
واول ما وصلوا الكوشه ابعدت ام حمد وهي منحرجه انها خربت المسيره لكن كانت رهف تبتسم لها
ومن بعدها ابتدت الاهداءات والرقص وحمد يشاركهم
واخيراً صار وقت يطلعون الفندق ورهف بكت بكى الدنيا وحمد يحاول يسيطر مافيه فايده وطلع وترك الهنوف واثير يهدونها
الهنوف : وش بلاتس!؟ ماهو حمد اللي تحبينه وذبحتينا فيه وش نوحتس الحين
ضحكت اثير: ايه وش نوحتس !؟
رهف: مدري احس ماني قادره ابعد عن بيت اهلي
سكتهم دخول نمر اللي نادته الهنوف وابعدوا وتقدم نمر يجلس قدامها وسكتت بسرعه وابتسم وهو يشد على يدينها: افا تبكين !وانتي ضحكة النور وزود عليها عروس!؟ مايصير يارهوف !ولا تبكين ولا يضيق صدرك ابد ندق على حمد ويضف وجهه
رفعت راسها بصدمه وضحك نمر: وللله ما ظنتي تبينه يروح دام فزيتي كذا
تفشلت رهف وهي تنزل راسها وقال نمر بهمس : ترا والله حتى حنا ما نبيك تروحين بس ندري ما عطيناك الا اطيب الناس وعشان كذا تعوذي من ابليس واطلعي لعريسك تراه اشغلني
اثير ابتسمت: لا خلاص بتطلع
وقف نمر: يلا اجل
ساعدوها تلبس وطلع نمر لحمد اللي يهدي امه وابتسم نمر وهو بدا يحس بوخزات الصداع :خالتي بعد منهاره وش ذا ياحمد منكد على الناس في كل الحالتين
ضحك حمد: لو دريت اني ببكيهم جلست عزوبي
بدريه: ماعليك هاذي حركات امك دايم وهي ام دميعه
ابتسم نمر وهو يشوف رهف طالعه وسلمها لحمد وهو يعيد ويزيد ويوصيه وطلعوا
ولف نمر على الهنوف بهمس: نطلع حنا بعد!؟
الهنوف: بدري
نمر بدت تظلم عيونه: ماعاد بدري يا روحي
الهنوف : زين اجل
راحت تجهز وطلع نمر ينتظرها وهو خلاص ماعاد يتحمل نزل كل اغراضه وجات الهنوف اللي سكتت وهي تدري بدت مرحله العصبيه
واول ما وصلوا البيت كان فاضي وجلس وراحت الهنوف تبدل وهي تصلح له شي يهدي اعصابه وكان نمر هادي شوي والتفت وهو يشوفها للآن بالتسريحه والميك اب لكن جالسه قدامه وهي تراقب عيونه بخوف وفجأه نزل الكوب وهو يقربها بهمس : انا والله إن ربي نزلك علي مثل الرحمه
ابتسمت الهنوف لنمر اللي ساعه بس يخف الصداع ويرجع مافي احسن منه وفجأه يضرب الصداع وينهبل وكان هاليوم من نصيب الايام المريييحه لنمر الله كان معتمد ان الامآن الوحيد هو حضن الهنوف
……………..••…………
في الفندق
دخل حمد وهو يساعد رهف وجلست رهف وهي تحس الفستان مضايقها
وقال حمد: اذا ودك تبدلين لين يوصل العشاء
هزت رهف راسها ب(ايه) ووقفت وراحت تبدل وهي ما تدري وشلون بتصرف او هل تلحق تصرف او حمد يتصرف قبلها لكن مطمنها حنية حمد
اللي نزل بشته وطلب العشاء وهو يعدل شعره وجلس وبعد فتره جات رهف بعد مابدلت وهي ترجع شعرها ورا بإحراج وجلست قريب وقرب حمد اكثر يجلس جنبها وابتسم :ودي ما اتكلم بس لاعاد تبكين وتضيقين صدري
غمضت رهف بفشله وكمل حمد: ادري ان الوضع صعب بس فالنهايه تراك مع حبيبك يعني بعيوني وماعليك خوف
ابتسمت رهف بهدوء وابعد حمد على دق الباب وجاب العشاء وجلس وهو يحاول يسولف ويسلي رهف لين بدت تتقبل وترد عليه لكن كان حمد فاهم نظرة عيونها وقرب وهو يبتسم :اشوف عيونك تعبانه
رهف : لا
حمد : اجل نكمل السهره
كانت رهف بتموت من التعب والنوم عيونها تسكر لا إرادياً وانهبلت من كلامه بس ضحك: لا امزح امزح اشوفك ميييته نوم عشان كذا روحي نامي وارتاحي
وابعدت رهف بحرج وهي تمناه يقولها من اليوم وفعلاً راحت وهي انتهت من التعب دخلت بفراشها وهي ودها تنام لكن تنتظر حمد ينام وجاء حمد بعد فتره وهو مبدل ملابسه وجلس والتفت يناظرها كانت جداً فاتنه ولا قدر حمد يتدارك حبه العظيم وابتسم و…🌚
……………..••…………
ومن بكره
الفجر كان نمر جالس بالصاله وهو شاد على راسه اللي زااااد وصحت الهنوف مستغربه تدوره وهو من بعد الفجر مارجع اول ماشافت جلسته اللي تعودت عليها والظلام حتى الشمس اللي يحبها ماعاد يطيق يناظر نورها جلست جنبه بهدوء وهي تهمس: اسوي لك مساج
هز راسه نمر برضا وانسدح وحاولت الهنوف تخفف حدة الصداع بس ماقدرت ووقف نمر يبعد يدينها وهو ياخذ اغراضه
الهنوف : وين بتنهج!؟ لاتروح مكان تطيح محد درا بك
نمر: وخري عني قلت لك مليون مره لا تكلميني وانا كذا
الهنوف : بس ما يصير
غمض نمر بقوه وهو يصرخ : اقووووولك ابعدي ابعدي وخرها بغضب وطلع وهو مايدري وين يروح بس يبي يطلع
ووقف اول ماشاف عدنان واقف عند الباب ولف لنمر: جيت وجابك الله
نمر: وش فيك !؟؟؟
عدنان: جوالي مافيه رصيد ونسيت بوكي عند الشباب واحتاجه عشان بروح الاحوال وبتصل فيهم يجيبونه تعطيني جوالك
طلع نمر الجوال ورماه عليه وجلس وهو يحس انه اول ما شم الهواء هدا
وهو اللي يشوفه جالس من بعيد يقول انهبل وهو يسحب شعرها بقوه عشان يهدا صداع بس مافيه فايده ازارير ثوبه مفتوحه وعيونه حمرا ماقدر ينام وعروق وجهه بارزه ووجهه معرق
ورجع عدنان يعطيه الجوال وطلع وقبل يسكره نمر لاحظ ان الخط مفتوح ورفعه لاذنه لكن تصلب اول ما سمع الصوت والكلام
كان خالد وكان يقول ( خلله يجي واذا جاء ارم بطاقته في الشنطه اللي فيها البضاعه وخله ياخذ الشنطه قله تبيه يوصلها لاخوك اللي قريب من حيهم ولا يفتحها واذا طلع بلغ عليه )
انهبل نمر وهو يدري ان البضاعه اللي يقصدها مخدرات والمقصود بهالفخ عدنان
لا شعورياً ركض ورا عدنان وركب سيارته وراح لعدنان وهو يحاول يلحقه بس ضيعه في اخر لفه وجلس يدور وهو مو قادر يستوعب او يفكر من الصداع
…………….••…………
اما عدنان
كان طول هالفتره مايدري عن تدابير خالد الحاقد عليه وهو مصافي لهم ومثل الشاطر اخذ الشنطه وطلع وهو مستعجل وبعد ماطلع بلغ عليييه خالد
وهو في اللفه راجع سحب فرامل بصدمه : نمر
نزل نمر من سيارته شبه يركض وهو يرجف من الالم والاضطراب اللي يحسه عطااه مفتاح سيارته وهو يدفه : اطلع اطلع اخذ سيارتي واطلع
عدنان: ليه وش فيه
بدون شعور ضربه نمر كف وهو يصرخ عليه : اسمع الكلام ياغبيي
انصدم عدنان واخذ السياره وهو مايدري وش فيه وراح اما نمر ماكان يقدر يتصرف الا انه ياخذ السياره واللي فيها ويختفي كان يحوس مايدري وين يروح وهو رؤيته سيئه ماهو قادر يركز ويرجف وحالته صعبه لكن من سوء حظه وفجأه وبدون سابق انذار غطى المكان صوت الدوريات والمكرفونات والضابط اللي موجهه عليه السلاح ويقول : سلم نفسك
نمر كان يحاول ينقذ عدنان واسرع اكثر وهو يتلفت يدور الشنطه اخذها وهو يطلع الاثبات منها ورماها بالدرج وحاول يرمي الشنطه بس ماقدر لانهم حدوه ومسكوه ووقف نمر وهو دايخ وانفتحت كل الابواب الاسلحه حوله وسحبوه ويكتفونه وماكان نمر يقاوم لانه تقريباً ماهو حاس بنفسه ويشوفهم يركضون ويفتشون وهو ساكت ماقدر ينطق واخذوه ونمر يعيد نفس التجربه وهو يفكر وشلون يطلع عدنان من هالسالفه
ودخلوه القسم وغرفة التحقيق وهو كل شي ينعاد عليه والضابط يحوم حوله وهو يصرخ : اعترف احسن لك
بس ماجاوب نمر اللي شكله التعبان اكبر اثبات انه له علاقه بالمخدرات
…………….••…………
وقريب من مكان الحادث
كان عدنان يراقب بصدمه مايدري وش صار ولا يدري وش هاللي حصل لكن انذهل اول ماشاف خالد واصحابه طالعين من مكان بطرف وهو يتكلمون وعلى بالهم عدنان وانصدم عدنان اول ما بدا يوضح له الموضوع ولا عرف يتصرف الا انه يرجع البيت ويختفي وترك نمر اللي مرت عليه الساعات وهو ماهومستوعب وش يقولون ووش بيعترف بس قال الضابط: الظاهر انك ماتبت وتدور الموت بالشينه !؟ ماكفاك قتل وتبي تهرب مخدرات
هالمره رفع راسه نمر وقال: مالي شغل فيها
الضابط: وشلون مالك شغل! معك شنننطه مليانه انواع المخدرات!؟ وحاولت الهروب !؟ وعندك سوابق ! والشكل حدث ولا حرج والواضح انك من اصحابها
نمر: اقولك مالي شغل فيها عط… قبل يكمل كلامه حس ان فيه شي انفجر براسه وبردت اطرافه وطاح وركض الضابط ينادي الاسعاف واجتمعوا حوله والضابط يقول : اسعفوه وسووا له تحليل دم اختبروا دمه اذا فيه مخدرات
اخذوا نمر وهو مايحس بشي
…………….••…………
وعند الهنوف
اللي شافت عدنان يركض ودخل وماتدري وش فيه ولا وش وداه على سيارة نمر دقت مره وثنتين مارد نمر وخافت انه صار له شي ونزلت تدور عدنان اللي اول ماشافها ركض بيدخل وقالت: عدنان وينه نمر
صد عدنان بإرتباك: مدري عطاني سيارته واخذ سيارتي وراح
الهنوف: وين راح!؟ وهو تعبان !؟ ليه مارحت معه
عدنان: رفض وراح
دخل وسكر الباب ولفت الهنوف بتطلع بس وقفتها ام حمدان: انتي هيييي وخري عن عيالي انتي وزوجك هالداشر ووش يدري ولدي وين هو منقلع
الهنوف : انزحي عني ماني فاضيتن لتس
شدتها ام حمدان بكرهه: طالت وشمخت يالقرويه اسمعيني زين تنقلعين غرفتك لين يجي هالمجنون وتطسين معه
وخرتها الهنوف بكرهه وطلعت وهي ماهي متطمنه على نمر ابد
…………….••…………
وفي المستشفى
صحى نمر بعد ساعتين وبعد ما شبه انضبط الضغط عنده وهو يشوفهم يسحبون دم ودم ودم وتحاليل اشياء كثير
وبعد معاناة اربع ساعات طلعوه ورجعوه لسجن ورجع الضابط يحقق معه وكان نمر يحاول قد مايقدر مايجيب سيرة عدنان ابد
وقال لضابط انه يعرف خالد وان خالد طلب منه بعد ما سهروا مع بعض انه يودي الشنطه لاخوه واخذ نمر الشنطه وانه سمعهم يتكلمون وكان بيبلغ بس ما اسعفه الحظ وطبعاً محد صدقه ونقل لسجن فردي ألين يحققون مضبوط لكن طلب نمر انهم يتصلون على حمد يجي
…………….••…………
وفي الفندق
صحى حمد على جواله اللي من ساعه يدق ورفعه وهو مستغرب الرقم ورد لكن جمد اول ماسمع انهم يستدعونه لان نمر مقبوض عليه بقضية تهريب مخدرات
فز وهو ماهو مصدق وركض ياخذ اغراضه وطلع يركض وهو يستغفر
_______________________.
في قسم الشرطه
وصل حمد وهو مرعوب وكان يدري لو طلع هالاتهام صدق بينتهي نمر تماماً
دخل يدور ويسأل واتجهه لغرفة الظابط المسؤول ودخل وهو يناظر وجهه وهو يعرفه وش كثر اقشر : سلام عليكم
االضابط : وعليكم السلام ! من انت ؟
حمد: انا حمد ال محمد استدعيتوني عشان قضية نمر الفهد
الضابط : ايييييه انت حمد معروف ياحمد معروف بما انك مجاهد معه من قضاياه السابقه صراحه ياطوول بالك
اخذ حمد نفس: ممكن اعرف تفاصيل الاتهام الموجه لنمر!
الضابط: معليش بس هو ماهو اتهام موجه لنمر! هو جرم مشهود قبض على نمر وهو مبتلس بالقضيه كامله
حمد : ولنفترض انه كذا ابي اعرف التفاصيل او اقابل نمر
الضابط حط ورقة المحضر قدامه: مكتوب كل شي هنا
اخذها حمد يقرا وهو ماهو مستوعب ويدقق مو معقول هالمكتوب ابداً ومستحيل : لازم اقابل نمر
الضابط : على الرحب والسعه يمكن تقدر تطلع منه شي ينفع
حمد : انا متأكد انه بريء من هذا كله
الضابط : اتمنى مع ان مافيه شي يدل لكن تفضل
طلع حمد اللي حافظ الاقسام كلها ودخل للغرفه وهو ينتظر نمر اللي جابوه وهو مكلبش وفز حمد مذهول من شكل نمر واتجهه له : نمر وش فيك!؟ تعبان !؟ وش صار لك
جلس نمر بتعب وجلس قدامه حمد : فهمني وش صار!؟ وش هاللي يقولونه!؟ وش جابك لهالقضيه
اخذ نمر نفس : اسمعني يا حمد وافهمني خالد هو اللي مسوي كل هالشي
حمد : خالد صاحب عدنان ما غيره!؟
نمر : ايييه
والتفت نمر يناظر حوله وهمس : لكن ما تجيب طاري لعدنان ابد
حمد : وش دخل عدنان!؟؟ نمر فهمني زين
قرب نمر وهو يشرح له كل شي وابعد حمد بغضب: ماهو على كيفك تتحمل ذنب ماهو ذنبك
سحبه نمر يجلسه: لا تصارخ ياحمد وافهم انا كل شي اسويه عشان مايتورط عدنان
حمد: نمر لا تنح!؟ عدنان غلط وهو يتحمل اللي غلطه !؟ انت بنفسك عليك 99الف قضيه تدري لو اثبتت هالقضيه او ماعرفنا نطلعك منها وش بيصير فيك!؟ انت الحين تعتبر مروج مخدرات ومع البلاوي اللي عليك قبل بينقص راسك يا نمر بتموت
نمر: حمد ما رح يصير لي شي انت بس اقلب القضيه كلها على خالد
حمد : شلووون
نمر: مدري تصرف
حمد وقف وهو يلف بغضب ويناظر نمر اللي واضح انه منهد حيله بيموت من التعب : ناظرت شكلك انت ؟؟ شفت شلون بتموت من التعب وجاااي تبي تدافع عنه
نمر: لاني اكثر انسان ادري ان عدنان لايمكن يدخل هالمكان ولا يمكن يتحمل يكون بهالمكان! انت ماتدري وش يسوي السجن ماهو سهل يا حمد ومابي حياته تضيع فيه
حمد: ما هي ضايعه يانمر يدخل ويعترف على خالد وحتى لو انسجن شهور ويطلع
نمر : وحتى لو طلع بيطلع بأسم خريج سجون لا لا مستحيل
دخل الضابط وسكت نمر
الضابط: هاه يا حمد طلع معك شي ؟؟ ما اظن حتى لو طلع معك شي بيفيدك بعد هالتقرير
نزله قدامهم وهو يقول: صاحبك متورط ! لدرجة ان التحاليل كشفت وجود المخدرات بدمه
لفوا له كلهم ماهو مستوعبيييين مصدومين وبما فيهم نمر اللي قال: نعم!؟؟؟
الضابط : قلت لك انكارك مايفيد
نمر: انا ما انكرت انا قلت لك ان خالد هو اللي سواء هالفخ ومستحيل يكون هالتقرير صادق
الضابط: وبعد تتهمنا بالتزوير
نمر: ما اتهمت احد بالتزوير انا ارفض هالتقرير
حمد كان خايف كثيير وهو يناظر التقرير مايدري كيف يفسره ووقف : المفروض بدال ما تاخذ وتعطي هنا ياحضرة الظابط انك تلقي القبض على خالد قبل يهرب
تحرك الضابط بإنزعاج: خالد جالسين ندور عليه ولكن انصحكم انكم تحترمون ألفاظكم وألا اضيف على التهمه تعدي على الحكومه
صد حمد بضيق وكمل الضابط : عطنا عنوان الاستراحه اللي تجتمعون فيها
ماكان نمر يعرف الاستراحه وتورط لكن قال : كنا نجتمع بالحدايق من يومين قالنا خالد انه استأجر استراحه لكن ما عطانا العنوان
انهبل حمد يناظر نمر بذهول وهو قاعد يغرق نفسه اكثر
الضابط: يصير خير تفضل ياحمد
ونادى: يا عسسسسكر ي تعال اخذه
طلع حمد وهو مايدري كيف يتصرف بس اول شي لازم يسويه يعطيهم عنوان خالد
طلع برا وهو يدق على عدنان اللي مارد وقفل الجوال ودق على راكان اللي صحى من نومه مستغرب: حمد!؟ وش فيك عسى ما صاير شي
حمد بهدوء: اسمع تعال لي عند المحطه اللي قريب بيتكم
راكان بخوف: خييير رهف فيها شي!؟
حمد: لا لا بس تعال
وقف راكان مستغرب والتفت وهو يشوف عدنان جالس بصمت : وش فيك!!
عدنان: مافيني شي
راكان: وجهك اصفر وش صاير
عدنان: مواصل وبنام
مارد عليه راكان وطلع وهو مستغرب وخايف من اتصال حمد
…………….••…………
في سيارة حمد
كان مايدري كيف بيقول لراكان مايدري وش جاب هالمخدر لدم نمر مايدري كيف بيطلع نمر منها وكان يتذكر القضايا المشابهه ويقلب عقله وفز على دق الشباك وكان راكان: حممد وش فيك
حمد : تعال اركب
ركب راكان : تراك وقفت قلبي
حمد: اسمع تعرف عنوان خالد صديق عدنان او عنوان استراحتهم
راكان : اعرف استراحتهم ومره رحت اخذ عدنان من بيتهم ليييه وش فيه
حمد : زين عطنيي اياه بسرعه تكفى
عطاه راكان وطار حمد للقسم وراكان يسأل : وش فيه !؟ وش صار
حمد : بفهمك بس اصبر مامعنا وقت
نزل حمد بسرعه وهو يعطيهم العنوان وراح معهم وراكان معه مايدري وش السالفه
واول ماوصلوا الاستراحه ماكانوا فيه وطلعوا متجهين لبيت خالد وقالوا اهله من يومين ما جاء ورجع الضابط لحمد المعصب
الضابط: انا حطيت حراسه وبنشوف
طلع حمد وهو متكتف بضيق راكان: حمد وش مسوي خالد وش فيكم !؟
حمد بالقوه نطق وهو ماوده يخلف وعده مع نمر انه ما يقول لاحد ان عدنان متورط : نمر
راكان: وش فيه!؟
حمد : خالد هالزفت مسوي فخ لنمر ومسكوه بقضية ترويج مخدرات
راكان: نععععم ونمر وش عرفه خالد
حمد: مدري
راكان سكت بتفكير : وعدنان!؟؟ عدنان وش وضعه !
حمد: مدري عن عدنان
راكان تذكر وضع عدنان: حمد !!! مافيه احد يوصل نمر لخالد الا عدنان!؟ وعدنان وضعه ماهو طبيعي !
حمد : وشلون يعني
مارد راكان اللي رجع لسياره: اركب اركب
ركب حمد وهو يقول : فهمني وش تفكر فيه
راكان: بنروح لعدنان بيتكلم وش علاقة نمر بخالد
حمد : اترك الموضوع الحييين نمر لازم اكلمه الحين
راكان بغضب: وش تكلممه فيه !؟
حمد بهدوء : نمر محصلين في دمه نسبه من المخدر وهذا اللي مورطه اكثر
سكت راكان بفجعه وهو يتذكر حال نمر وحمد يفكر بنفس الموضوع
وتحرك حمد للقسم ودخل وهو يطلب يشوف نمر وراكان ماقدر يدخل ابد وهو ماهو مصدق ان نمر يكون مدمن ومروج لكن وقف اول ما شاف نمر اللي جاء وهو مكلبش ويناظره بصدمه ولا قدر راكان يقول شي ودخلوه الغرفه
…………….••…………
وفي الغرفه
وقف حمد يناظر نمر اللي اتجهه له بغضب: وش جاب راكان!؟
حمد: كنت ابي منه عنوان خالد لكن لاسف انحاش
غمض نمر بغضب وكمل حمد: نمر لا تغرق نفسك اكثر واعترف
نمر: تفهم انت ولا ما تفهم اقولك مستحيييل
حمد: طيب طيب فهمني وش جاب هالمخدر لدمك
نمر اللي انجن وهو يفكر من اليوم: مدري مدرررري انفرم عقلي وانا اتذكر ما اتذكر شي
مدت يده يشد على اعصاب راسه وهو حالته صعبه
حمد وقف وهو يدور ويفكر وجلس : نمر تذكر !؟ احد عطاك شي !؟ شربت شي!؟ في المستشفى شفت احد مشكوك فيه يعطيك ابره شي
نمر سكت وهو يتذكر: لا ما تذكر ما شفت شي ياحمد
سكت حمد وهو مغمض لكن فتح عيونه بقوه على صوت نمر: لحظه لحظه خالد خالد امس كان يعرض علي اكثر من مره يعطيني شاهي لكن رفضت وهاوشته
حمد: ايييه ايييه اكيد هو من غيره اكيد عطاك شي
سكتوا بتفكير لكن فز حمد : امس امس في الحلاق عطانا شاهي اكيد منه اكيييد
نمر وقف بتفكير: اييه حتى اني فقدت صداع راسي بعده
التفت له حمد بشك : معناته صداع راسك له علاقه فيه !
نمر: لا لا
حمد بشك: وش دراك مايكون عدنان بعد مدمن!؟ وش دراك مايكون هو سبب اللي انت فيه!؟
اخذ نمر نفس بتوتر: لا لا مستحيل
لف حمد : انا بتأكد من شي قبل وحزتها نشوف
مسكه نمر: وييييين رايح!؟
حمد: لا تخاف ماني جايب طاري عدنان
طلع حمد وهو يدور الضابط ووقف وهو يقوله اللي صار وان خالد امس كان هو مسوي الشاهي واكيد انه حط فيه شي ومتقصد وان حمد بيسوي بعد تحليل عشان يتأكدون ومب بس حمد حتى راكان بيسوي لانه كان معهم وبدوا ياخذون لهم التحاليل وهم ينتظرون
…………….••…………
وعند الهنوف
ما قدرت تهدا قلبها ماهو مرتاح والساعه تقريباً 2 الظهر ونمر مختفي ولا له حس حتى جواله مسكر اخذت جوالها وهي بالقوه ماسكه نفسها واتصلت على بدريه
ردت بدريه: هلا والله الهنوف
الهنوف بصوت متذبذب: هلا بدريه
بدريه: كيفك!؟وكيف نمر
الهنوف هنا انهارت وكانت متوقعه نمر عندهم : بدريه انا مدري وينوه نمر!؟
انفجعت بدريه من بكاها: بسم للله عليك وش فيك ؟ وينه نمر
الهنوف: مدري مدري طلع من الفجر مارجع مادري وينوه ادق عليه مغلق وهو تعبان اخاف صار لوه شيٍّ بدريه بخوف : اذكري الله ان شاء الله بخير اصبري اصبري يمكن راح لطارق بالمستشفى دامه تعبان
الهنوف: تكفين راعي لوه وينوه وردي لي تكفين
بدريه: ابشري
سكرت وهي ترتجف وجلست وهي خايفه ما تدري وش تسوي لكن وقفت على الشباك وهي تشوف راكان جاي وهو شبه مستعجل اخذت عبايتها ونزلت بسرعه مالها الا راكان ووقفت وهي تسمع ينادي ابوه
اما راكان اللي بعد ماسوى التحليل ماقدر يصبر لازم يقول لابوه لازم يتصرف ولازم عدنان يقر كل شي يعرفه عن خالد
طلع ابو حمدان من مكتبه: وش فيك!؟
راكان بتوتر : يبه ابيك بموضوع
ابو حمدان: تكلم ما عندنا احد
راكان التفت يناظر حوله ماكان فيه احد وماشاف الهنوف اللي تسمعهم من فوق وقال كل السالفه اللي فهمها من حمد لابوه اللي جلس بصدمه: وشوووو مروج مخدرات ومدمن
راكان جلس عند رجوله: يبه هذا كلامهم لكن نمر مايسويها
ابو حمدان: من قالك من يسويها!!؟؟ وانا اقول وش بلاه من شهر وهو حالته حاله
راكان: ييبببه الله يخليك لا تقول كذا اسمع لازم توقف مع نمر انا متأكد نمر مستحيل يسويها
قال ابوه بغضب: وشلوون مايسويها وهو خريج سجون ماتدري جلس مع مين وخالط مين عشان صار بهاللي صار به
غمض راكان وهو يحاول يفهم ابوه ان اكيد لعدنان يد بس رفض ابوه رفض تام ان عدنان يكون له علاقه بهالامور
اما الهنوف اللي شهقت برعب من الصدمه وهي كل اللي يطري لها وتتذكره هو حال نمر المنقلب والصداع وانعزاله وتدخينه المستمر وفوق ذا طلعاته الغير مبرره ( وهو بالحقيقه هروب نمر بعيد عشان ما يزعج الهنوف بوضعه)
رجعت على اتصال بدريه اللي تقول: ماهو عند طارق بس طارق بيدوره
انهارت الهنوف ببكى مفجع: لا يدوروه نمر بالسجن
شهقت بدريه : وشووو بالسجن!؟لييييه
قالت لها الهنوف اللي سمعته لانها ماهي مستوعبه تبي احد ينكر معها اللي صاير لكن بدريه اللي قفلت وهي مفجوعه واتصلت بطارق تقوله
لكن الهنوف فزت على باب الغرفه اللي انفتح وكانت ام حمدان اللي دخلت بصراخ بعد ماسمعت كلام ابو حمدان وراكان وشافتهم طلعوا وطلعت للهنوف وهي تصرخ: هاذي نهايتكم ياقليلين الادب والتربيه هذا نهاية خريج السجون انا في بيتي مدمن!؟ ومروج مخدرات انا يعيش بين عيالي مثلكم ياحثاله
الهنوف وقفت ببكى: اطلعي برا
ام حمدان: تطرديني من بيتي يابنت الشوارع تخسييين انتي اللي بتقشين قشك وقش المدمن وتذلفين برا
الهنوف : مانيب طالعه
سحبتها ام حمدان بكل قوتها وهي تدفها برا ورمت عليها اغراضها وقفلت الباب والهنوف مصدومه ماهي مستوعبه وهي تشوف كل اغراضها حولها هذا ونمر توه دخل السجن وصار فيها كذا ! وش بيصير لو فعلاً نمر دخل السجن رسمي واخذت جوالها وهي تتصل على بدريه
ولا هي نص ساعه الا وصلوا لبيت ابو حمدان وطلعت بدريه للهنوف تركض وفتحت الباب الهنوف وهي تبكي
بدريه: الهنوف تعوذي من ابليس تعوذي من ابليس ماعليك من هاللي ما تخاف الله تعالي تعالي معي
الهنوف اللي حضنتها ببكى وهي مجمعه اغراضها وطلعت بها بدريه اللي تبكي معها من الصدمه وام حمدان تناظر فيهم بكرهه من الشباك
وطارق اللي واقف بذهول ماهو مستوعب كان يسمع بكى الهنوف ولا يدري كيف يفهم السالفه رفع جواله يتصل بحمد اللي رد بهدوء: طارق
طارق : وش سالفة نمر!؟
قطب حمد حواجبه بإستغراب: وش عرفك
طارق بغضب: عرفت ولا ناوي تخبي موضوع اخوي عني
حمد: لا تنهبل انت بعد لكن الوضع مايسمح
طارق : انا بوصل الهنوف بيت جدي واجي انتم بأي قسم
حمد بخوف:ليه وش فيها الهنوف!؟
طارق : اعلمك اذا وصلت
قفل وهو يسرع ووصلوا بيت ابو ادهم اللي وقف وهو مانه فاهم شي ودخلوا يدارون السالفه واعتذروا ان نمر عنده شغل وبيسافر عشان كذا الهنوف هنا
ودخلت الهنوف مع بدريه اللي جلستها وهي ماهي مستوعبه وش صار
…………….••…………
وفي القسم
كانوا الكل هناك ابو حمدان وراكان وحمدان وطارق وحمد والكل متوتر
وكان حمد موصي ابوه ياخذ رهف ويوديها عند امه ويفهمها ان حمد واحد من اصحابه مسوي حادث ورهف ماهي متقبله الموضوع ومصدومه ماهي مستوعبه ورجع ابو حمد عندهم لسجن وهم ما احد مستوعب ومابين مصدقين ومكذبين
_______________________.
واخيراً طلعت تحاليل الشباب وفعلاً كانت فيها نسبة وهذا شي ينحسب في صف نمر اللي اثبت انه مايتعاطى وان هالنسبه بسبب شاهي خالد
ولكن كل القضيه تعلقت الحين على القبض على خالد ونمر معلق
وطلع الضابط يقولهم يطلعون انتظارهم مايسوي شي
وطلعوا كلهم ووقفوا ماهم مستوعبين والكل ينتظر من حمد تبرير ولا قال حمد شي الا اللي قاله نمر
ابو حمدان: وش درانا وينه هالزفت خالد
حمدان: استغفر الله واتوب أليه
حمد : بنطلع هالكلب من تحت الارض
طارق : حسبي للله ونعم الوكيل
ابو حمد: وعرفتوا سبب تعب نمر!؟ حمد رفع راسه يناظرهم والكل شاك وقال حمد بغضب: اول شي نمر تعبان بسبب الضغط ! وثاني شي نمر اكبر من شكوكم اللي تشكونها فيه ونمر بريء وانا بأثبت هالشي ولو كلفني حياتي
طلع بغضب من بينهم والكل رجع بيته وكان راكان رايح وهو كل همه عدنان بيفهم السالفه او ياخذ روحه
…………….••…………
وعند نمر
كان مايدري كيف بيطلع من هالموضوع ووراه الهنوف ووراه اشياء كثير كان يدري انه بيخسر لكن عنده امل انه بيحل هالموضوع بسرعه
وقف اول ماسمع صوت الباب ودخل الضابط وفز نمر مستغرب : محمد!؟
الضابط محمد اللي كان يعرف نمر وكان معه من قضيته الاولى ويعرفه حق المعرفه : نمر وش جابك هنا!؟
نمر وقف بضيق: الاقدار انت وش جابك
محمد : وصلني خبر انك هنا بقضيه وجيت بتأكد ماصدقت هالقضيه ابد !ابي افهمم منك التفاصيل
نمر قبل يتكلم قال محمد: اصبر اصبر واضح انك تعبان تعالي معي مكتبي ونتفاهم هناك
طلعه محمد ودخلوا المكتب وهو يفك الكلبش وطلب له اكل ومسكن لصداع وبعد ما اكل نمر وهدا صداع بدا يقول لمحمد القصه اللي قالها لضابط ويقنعه ان خالد هو السبب
محمد: ماعليك يانمر انا بشرف على هالقضيه وانا متاكد انك ماتسويها وخالد بطلعه من تحت الارض
نمر: وانا واثق
محمد : طيب وش فيك!! وش سبب هالصداع اللي صاير فيك
نمر: مدري من فتره ما لقيت له حل وللاسف انه صادف هالاحداث واتعبني اكثر
محمد : ماعليك ان شاء الله ماعليك شر وانا بأخصص لك ممرض يجي كل 4 ساعات يشوف ضغطك ويتأكد من صحتك
نمر: ما تقصر يا محمد
محمد : خلني ارجعك الحين واكمل البحث فالقضيه بس قلي محتاج شي
نمر بتردد: لا بس دام هالموضوع مطول ابيك بطلبك بطلب
محمد: ابشر
نمر : بشروك بالجنه بس ابيك لاهنت تطلعني من هنا
محمد : وشلون اطلعك!؟؟
نمر: اقصد تطلعني من السجن الفردي وتوديني لزنزانة ابو مقرن
محمد: اييه هذا اللي كنت افكر فيه بعد
وقف محمد وهو يرجع الكلبشات لنمر وطلع وهو ياخذه بنفسه لسجن العام لان قضيته موقفه حالياً لين يقبضون على خالد
ودخل محمد بنمر والمساجين يناظرون والكل مستغرب رجوع نمر ودخل محمد وهو يفتح الزنزانه ودخل نمر وفتح الكلبشه ولفوا على صوت ابو مقرن المصدوم: نمررر
التفت له نمر ببتسامه يأسه : ايه
اتجهه له ابو مقرن بخوف : وش جابك وش صار
رفع يده نمر وهو يحضنه وهو يبوس راسه: ابد عجزت توسعني دنياهم
التفت ابو مقرن لمحمد اللي يأشر له انه بيطلع وطلع وتركهم وابعد ابو مقرن: تعال تعال
راحوا يجلسون وابو مقرن ينادي : عطونا شاهي ياعيال
سلم نمر على المساجين اللي يعرفهم وجلس
وابعدوا والتفت ابو مقرن يحاول يلطف جوه: لايكون ذبحت هذال
ضحك نمر: لا ابشرك اخف شوي
ابو مقرن: قل وش فيك والواضح ان قضيتك ماهي طيبه من شكلك
نمر: لا شكلي قصته طويله
بدا نمر يقوله الحقيقه وابو مقرن يناظره بيأس : ما كفاك العذاب اللي عشته!؟؟ بتجدده من جديد بعد ما بدت دنياك تزين!
نمر نزل البياله بضيق :انا مكتفي عذاب وشبعااااان لكن مقدر اسلم عدنان مابيه تضيع دنياه هنا
ابو مقرن: وش مخليك متأكد ان عدنان مايكون شريك!؟ نمر: سمعت المكالمه عدنان متورط لا اقل ولا اكثر واتمنى انهم ماوصلوه للادمان
ابو مقرن: وهذا انت تقول كلهم جو الا عدنان
نمر: ولا بيجي عدنان خواف مستحيل يجي
ابو مقرن: الحل الحين وش بتسوي!؟ كيف بتطلع والهنوف وش بيصير
نمر وقف يشد على راسه بألم : الهنووف الهنوووف ان شاء الله مايصير شي وحمد بينتبه لها
ابو مقرن: ليتك ما ورطت نفسك يا ولدي
نمر: بيحلها الله ماعليك
ابو مقرن : تعال ارتاح دام ضغطك مرتفع وحالتك حاله اجلس
جلس نمر وهو الارض ماهي قادره تشيله

لقراءة باقي فصول الرواية أضغط على (رواية نمر والهنوف – لا غلاك اكبر ذنوبي ولا قلبي نبي)

البارت التاسع عشر

اترك تعليقاً إلغاء الرد