روايات

رواية نمر والهنوف – لا غلاك اكبر ذنوبي ولا قلبي نبي الفصل الثالث عشر 13 بقلم اديم الراشد

رواية نمر والهنوف – لا غلاك اكبر ذنوبي ولا قلبي نبي الفصل الثالث عشر 13 بقلم اديم الراشد

 

البارت الثالث عشر

 

عند الهنوف
كانت تتذكر تفاصيييل بسيطه من اللي صار واكثر شي خايفه منه انه فعلاً يكون دخل معها و وروشها!؟ مدت يدها بشويش لشعرها وغمضت بضيق لكن لفت لنمر اللي دخل :الهنوف فيك شي!؟؟تحسين بشي!؟ يوجعك شي؟؟
الهنوف : لا
نمر قرب يناظر جرحها ورجلها وجلس : بسيطه ان شاء الله
ماردت الهنوف وهي تحسس جبينها وتجمدت على نمر اللي قرب وهو يبوس جبينها بشويش ومسح على حواجبها بخفه : لا تخافين شوية حراره وخفت
بلعت الهنوف ريقها وهو تقول بتوتر : تكفى مابي اجلس بهاه ! خلنا ننهج يم البيت
نمر . بنروح بنروح بس ننتظر هالمغذي يخلص عشان ما تنتكسين
سكتت الهنوف ودخلت رهف بشويش: الهنوف حبيبي انتي بخيير!
الهنوف : بخير يارهف
نمر: وين راكان!؟
رهف: برا
طلع نمر وجلست رهف جنب الهنوف ببتسامه: بسم لله عليك وش صار لك تركتك العصر وانتي مافيك الا العافيه
الهنوف : طحت من الدرج وشكلي ارتفعت حرارتي من الوجع
رهف : بسيطه بسيطه خوفتينا عليك والله
الهنوف : ليه وش صار!؟
رهف تربعت ببتسامه: وش ماصار جاء نمر يركض مثل المجنون واخذني وانا ما اشوف طريقي من الخوف وما لحقت حتى اشوف وش فيك الا طار للمستشفى وجينا معه
الهنوف : الله يهديه
ورجعت رهف تبتسم بخبث: الحق ماعمري شفت نمر كذا الا اليوم وزود عليه اني صدمني اول ماقال انه ماقدر ينزل حرارتك وراح هو يروشك مسكين بيكحلها واعماها
تفشلت الهنوف وهي تحط يدها على وجهها : حسبي الله
وضحكت رهف: عادي يا بنت زوجك ترا
كانت الهنوف طول الوقت متفشله ورهف تحكي لها وش حال نمر
وعند نمر اللي طلع لراكان : راكان ماقصرت خلاص خذ رهف وروحوا للبيت ماله داعي تنتظرون
راكان : لا ابد ابد جالسين لين تطلعون
نمر : تجلس وش تسوي!؟ وبعدين كله نص ساعه ونلحقكم خذ السياره بس ورح
راكان : خلاص اجل بنروح ورهف تسوي شي لزوجتك تاكله عشان ما تتعب
نمر: زين اجل
رجع نمر ينادي رهف ودخل على كلمة رهف : وترا تعتبرين انتي الوحيده الفايزه بإهتمام نمر
الهنوف تنهدت بإبتسامه : تعلميني في ابو قلبٍ حنين !
ضحكت رهف بحب : والله صدقتي
كانت الهنوف تحس بحنية نمر مهما عصب ومهما تأذت منه لكن تنسى هالشي مجرد ما يرتفع صوته ويصرخ
اما نمر تفتحت الدنيا بعيييييونه وخفق قلبه بفرح وهو يسمع هالمدح من الهنوف له عجز يدخل وهو وده يسمع اي شي ثاني لكن انتبه ان الناس تناظره وقرر يدخل وهو على وجهه ابتسامه مايقدر يخفيها
تقدم وحط يده على كتف رهف : رهف راكان ينتظرك برا عشان ترجعون
رهف : طيب
طلعت رهف وجلس نمر قدام الهنوف بنفس الابتسامه بس ساكت
والهنوف مستغربه هالابتسامه العذبه!؟ ونزل نمر عيونه وهو يمسح على صدره بحب يبي يركد قلبه اللي بيطلع من صدره
سرحت الهنوف تناظره وشلون مبتسم وساكت كان شكله يفرق فعلاً
وانتهت النص ساعه ونمر للحين بنفس الشعور والهنوف نفس الاستغراب ومحد منهم تكلم ووقف نمر يساعدها ورجعوا للبيت وقبل تدخل الهنوف الغرفه وقفها نمر وهو يجلسها: خليتس هنا شوين
قال كلامه ودخل ما انتبه انه صار يقلدها بنفس كلامها ولهجتها لكن الهنوف انتبهت وضحكت بتعجب وهي توقف وطلت تشوفه وش يسوي
كان نمر يبعد اللحاف المبلول من المويه ويرتب لحاف دافي وخصوصا انهم دخلوا بأول ايام الشتاء والتفت وهو يقطب حواجبه : وشوله قمتي!؟ رجلك يا بنت الناس لا توجعينها
الهنوف تقدمت بشويش: ما توجعني
حاوطها نمر بذراعه وهو يسندها وطلع على الباب وكانت رهف اللي معها اكل : جبتها للهنوف
نمر : ادخلي ادخلي
دخلت رهف وهي تنزلها قدام الهنوف : خذي عشان تستصحين
الهنوف قبل تعترض ناظرت نمر المتكتف وعرفت انه بيجبرها واختصرت المشوار وهي تقول: يعطيتس العافيه
رهف : يعافيك
طلعت رهف وجلس نمر اللي يحسب لقمات الهنوف ويجبرها تاكل وابعد الصينيه ورجع بعد مابدل ملابسه وهو ينسدح بجنبها وقبل اي تصرف سحبها لحضنه بشويش وجمدت الهنوف اللي وضح على ملامحها توترها لكن تطمنت اول ما مد نمر يده يضحك على كتفها : مابي حرارتك ترتفع وانا ما حسيت فيك خليك كذا احسن
هزت راسها الهنوف بهدوء واول مابدت تحس بالبرد بدت تنكمش وتدخل لصدر نمر اكثر وماكان هذا مضايق نمر بالعكس رغم كرهه لوجود اي احد جنبه
سحب اللحاف يغطي الهنوف وهو يهمز يدينها عشان ماتحس بتعب الحراره
ونامت الهنوف على هالحال اما نمر كان طول ليله يقارن بينهم ويناظر بالفروق واول شي لفت انتباهه اصابعها الضايعه بين اصابعه شبك يدها بيده وهو يبوسها بحب
ومع هالمشاعر غفى
……………..••…………
ومن بكره الصباح
صحت الهنوف وهو مثل مانامت بين يدين نمر صحت رفعت راسها تناظره وبسرعه نزلته اول ماشافته صاحي
اما نمر كان يحاول يشبع عينه بشوفتها قبل تصحى ويصحى العناد معها تحركت بسرعه ورجعها نمر: وين بتطيرين !؟ صبحي على الدنيا يا حايل!
ناظرته بضحك بعد ماشافت الساعه: حايل صبحت من زمااان وانا نييمه
ضحك نمر : ماني معترف بصبحها اجل لين تصحين
ابعدت الهنوف بتوقف بس جلست بوجع من رجلها
نمر: قلت لك اركدي وانتبهي لرجلك
الهنوف وقفت بشويش : ماعليه انا طيبه
وقف نمر : امشي بشويش
الهنوف تقدمت تمشي: لا لا مافيني الا العافيه
نمر : حمدلله
راحت للمرايه تناظر جبينها ولفت: وهذا بيجلس هاللون!؟
نمر : يومين ثلاثه
ميلت الهنوف فمها بزهق : ياقردي بس
ابتسم نمر ودخل يبدل والهنوف تتأمل الجرح للحين وبعدها بدلت وطلعت وهي تسمع نمر يكلم
نمر اللي رفع جواله على عتاب دحيم له انه ماعاد يجيهم وسكر الخط والتفت للهنوف : اجهزي بنروح عند جدي
الهنوف : هالحزه!؟
نمر : مافيه حل !!دحيم زعلان علي
الهنوف : وليه!؟
مر نمر من جنبها وهو يضرب خشمها بخفه: يبدو انه بعض الناس اشغلوني عنه
رفعت الهنوف حواجبها وتخصرت: يا مساكين يا بعض الناس مظلوم في كل شي
لبس نمر ثوبه وطلع : والله ما شفتهم مظلومين للحين بالعكس متلبسين بالجريمه كامله
ناظرته الهنوف بعتب : تموت اذا ما حطيتني اظلم الناس
رفع نمر يدينه باستسلام : ابد والله انا الظالم وانتي ملاك هاالارض
ضحكت الهنوف : ايه خلك تسذا ، المهم نفطر هنا!؟؟
نمر: لا ينتظرون هناك ، خذي لك كم لبسه احتمال ننام
الهنوف : ايه تكفى نبي ننام نغير جو
نمر: تم
راحت تجهز وطلع نمر وهو يسمع صوت الباب وفتح باستغراب وكان ابو حمدان: يبه!؟
ابو حمدان: ايه وانا ابوك وينك اتصل بك من ساعه ما ترد
نمر: ماشفت الجوال والله
ابو حمدان: وش فيكم يقولون الهنوف تعببانه
نمر: بسيطه بسيطه طاحت من الدرج وهي بخير
ابو حمدان: وينها!؟
طلعت الهنوف ببتسامه وهي تمشي بشويش وقربت تبوس راسه ويده: هلا يا عمي انا بخير حمدلله
ابو حمدان: حمدلله على السلامه ، يوجعك شي
الهنوف: لا والله
ابو حمدان: وين رايحين طيب!؟ نمر: بيت جدي
ابعد ابو حمدان بهدوء: زين اجل فمان الله
نمر: تبي شي!؟ ابو حمدان: سلامتك
طلعوا متجهين بيت ابو ادهم
………………••…………
في بيت ابو ادهم
كان طارق يسلم عليم ويوادعهم قبل يسافر ومع هالمناحه اللي صارت كان حمد يهدي الوضع بالقوه لين تفادو الوضع
طارق التفت يدور دحييم بيسلم عليه بس شافه جالس عند البوابه : دحييييم ماتبي تسلم علي!
دحيم: بعدين نمر بيجي نمر بيجي
ابتسم حمد: وش دراك!؟
دحيم رفع الجوال : قلت له يجي
ضحكت بدريه : يا ذا النمر اللي اشغلك
ام طارق بهمس : لا تلومينه بعد نمر ساحب على الدنيا من يوم تزوج
ام حمد: خليييييه يعيش اللي ماعاشه
ام طارق : ما قلت شي الله يهنيه
ومن الغبار اللي وصل قبل نمر عرفوا انه وصل
ونزل مبتسم بعد ماقال للهنوف : ارفقي على نفسك بشويش انزلي
استقبله دحيم يحضنه وحمد يصفق: ماشاء الله هذا نمر من وين طالعه الشمس
ابعد نمر دحيم بعد ماسلم عليه وضحك: والله لو مادق علي خلف جدي ما كان شفتني اليوم
طارق : افاااا يعني كنت بسافر ولا شفتك
اتجهه له نمر يسلم عليه: والله !! مادريت انك بتسافر
طارق : اشوى شفتك
التفت نمر لحمد يسلم عليه وبعدها قال: جدي وينه!
حمد: سلم وطلع مع ابو مسعود يقولون قهوتهم عند واحد من الشايب بالحاره اللي جنبنا
نمر بعد ما سلم على امه وخالاته : ماشاء الله ، اجل ادخل انت وياه ولا اطلع
طارق: ليه !؟
نمر : بندخل محارمنا
حمد : يييييمه منك!؟ ويدخلون بناكلهم
نمر: : اييه
نمر كان يبي الهنوف تمشي على راحتها ما تستعجل نفسها عشان العيال وتوجعها رجلها
بدريه ضحكت وراحت للهنوف ونمر يطلع العيال ودخلتها لكن دبست بمكانها اول ماشافت حالة الهنوف
وجلست الهنوف بشويش وهي تبتسم بحرج
بدريه: الهنوف حبيبتي وش فيك!؟
ضحكت الهنوف : كنت انظف وطحت وتعورت
بدريه : بسم الله عليك
ام طارق ماقدرت تتكلم وهي تبصم بالعشره انه بسبب نمر
اما ام حمد اللي دخلت ببتسامه وانخطف وجهها وهي تناظرها
بدريه: حمدلله على سلامتك عدت على خير وانتبهي مره ثانيه
الهنوف : ابشري
نزلت جود بعد امها وشهقت لكن تمالكت نفسها وسلمت بسرعه وطلعت وهي تسحب بدريه: من مسوي فيها كذا!؟
بدريه: تقول طاحت
جود : لا والله اكييد نمر
بدريه: انهبلتي!؟ ليه نمر يسوي كذا
جود : الله اكبر عليك وتسألين بعد!؟ ماتعرفين نمر ! ولا اعلمك فيك
بدريه بغضب: وش اللي ماتعرفه !؟ نمر ما يضرب كذا! وخصوصاً الهنوف
تكتفت جود : بدريه تحبين نمر ما عليه بس عطيني شخص واحد وقولي ما ضربه نمر!؟ حتى على اتفه الامور وهالغول مايعيش االا بالضرب وشاف انه مطول ماسوى مصايب وشكله اشتاق لريحة الدم
سكتتها بدريه بغضب: اص اص لا تسمعك البنت وتسوين مشكله وبعدين نمر مايضرب الا اللي يغلط
وفوق ذا ترا عقل وتاب لا تجننونه من جديد واطلعي منها
جود لبست عبايتها : والله بكيفك بس ترا اذا هو مسويها وجايبها بعد بقوة وجهه معناته مافيه طب واذا انتي تجزمين انه مايسويها لا تستغربين بيجلس شهرين بالكثير وبعدها بيرجع لبلاويه القديمه
طلعت جود لطارق وتحركوا وبدريه من الخوف متجمده
اما ام طارق وام حمد كانوا بالمطبخ وهم مترددين محد يدري ان الكلام كله وصل للهنوف اللي اتسعت عيونها بذهول وهي تحس جود تعرف كل شي عن نمر وخصوصا من كلامها واضح انها ماسمته غول عبث
واختفى صوتها من الخوف وهي ماتدري وش البلاوي اللي تقولها جود
دخلت بدريه تحاول تبتسم وتسولف بس شرود الهنوف اشغلها زود
وكانت تراقب ام حمد وام طارق بتوتر
…………….••…………!
اما في المجلس
كان حمد يراقب نمر ودحيم اللي يسولفون سوالف حلوه وبريئه والتفت نمر اللي اليوم فيه ابتسامه حلوه من اثر الكلام اللي سمعه امس : وش فيك تراقب !
حمد ضحك: ابد تخيلت اني اشوف فارس على قولك ( يقصد ولد نمر؟)
وضحك نمر : وش ذا الخيال يارجل
حمد ضحك : الله يبشرنا بولدك بس خاطري بس اشوفه
نمر اللي وده انه صدق يصير عنده بس خايف انه مايقدر يكون له اب ومثل ما سوى ابوه يسوي هو بولده ابتسم بتوتر: ان شاء الله
حمد : كأنك ضقت !
نمر: ابداً
لفوا على دخول ابو ادهم اللي يرحب في نمر اللي وقف يسلم عليه بحب
وجلس نمر يسولف مع جده وخذاه الوقت يسولف لكن التفت على صوت حمد يعطيه الجوال باستغراب : هذال يتصل فيك !!
نمر اخذه بهدوء وطلع بعيد :هلاااا هذال
هذال: هلا فيك يا رجل وينك! اتصل بك مامن رد
نمر : انشغلت هاليومين امر!
هذال: وش وقعك ! عساك بنعمه!
نمر: حمدلله انت وشلونك
هذال ببتسامه: بأحسن حال
نمر ابتسم: كيف امورك!
هذال بدا ينقل لنمر الخبر ببتسامه وابتسم نمر يبارك له وبعدها قال نمر: وانا عند وعدي البيت علي
هذال: ماقصرت والله
نمر : عطني اسم الرجال واتفاهم معه
هذال: ابشر ، ما ودك تنهج يم حايل
نمر: بجي ان شاء الله
هذال: اجل ما طول عليك يابعد حيي
نمر: الله معك
سكر نمر والتفت وشاف حمد يناظره بشك : وش هالصداقه !؟ من متى وهذال صديقك!؟
نمر ببرود : كتب الله وصار
حمد: نمرررر لا تستهبل ! وشلون يصير وانت اللي تكرهه!! وزود عليه مهدده وحالتكم حاله ، ولاا وهو اللي كان يحب الهنو.. سكته نمر بغضب: لا تنطقها يا حمد !
حمد : وان نطقتها!؟ نمر وش تخطط عليه!؟ وش عندك عشان تقرب هذال!؟
نمر : ماخططت على شي مشكله وانحلت وصفت خواطرنا
حمد: ما اعرفك انا!؟ صفى خاطرك على هذال اللي مشيت به ست ساعات من حايل لرياض والسلاح براسه!؟ تلعب على من يا نمر
التفت نمر بضيق : حمد لا تصير انت معهم! وش فيها اذا صافيته!؟
حمد انهبل : نمممر نمر انت خبز يديني واعرفك اكثر من نفسي مستعد احلف انك ما تصافييييت معه من الله في الله
رفع نمر يده يهدي الوضع : حمد اركد اركد شوي اتفاهم معك بعدين، الحين ماهو وقته
حمد: متى!؟
نمر : اصبر شوي
سكتوا على جيت بدريه: تعالوا تقهووا
حمد اللي بان الضيق بوجهه : انا عندي شغل
طلع حمد ونمر يناظره بضيق ودخل نمر بهدوء
وبعد العصر …
وبما ان مافيه احد دخلوا كلهم للقهوه وابو ادهم اللي اول ماشاف الهنوف انذهل من اللي فيها والتفت لنمر اللي قال اول مافهمه : تحمد للهنوف بالسلامه ياجدي طاحت امس وهي تنظف وتعورت
التفت لها ابو ادهم: ماعليك شر يا الهنوف يابنتي
الهنوف : مايجيك الشر ياجدي
ابو ادهم: بعدين انتبهي وانا جدك
الهنوف : ابشر
جلس نمر قريب الهنوف بس ماهو بجنبها وبدت بدريه تسولف ويرد عليها نمر ويسولف مع الهنوف اللي تسولف عادي وبدت بدريه ترتاح لانه لو مسوي للهنوف شي اقل شي بتكون زعلانه
وقفت الهنوف بشويش ولف نمر: وين!؟
الهنوف بحرج: قريب
طلعت وراحت للحمام واول ما طلعت لفت ام طارق بزعل : نمر ماهقيت انك وصلت لهدرجه!؟ ما خفت ربك يوم سويت بالبنت كذا !؟ وش سوت هالمسيكينه حتى قومتها وجلستها بتحاسبها عليها!
التفت نمر بحده : ما خفت الله !! لييه وش مسوي وانا مادريت !؟
ام طارق:نمر ! ابوها ما زوجك اياها عشان تعاملها كذا ! واعرف انك لازم تحترمها وهمجيتك اللي كنت تعيش فيها لازم تبدل
ضحك نمر : اوووه شكلي مزعلك بالحيييل يمه!؟ لكن ودي اسألك من سبب هالهمجيه!؟ لكن ماعليه مابي جوابك لاني اعرفه زين ! و بما انك مهتمه حيييل بزواجي ! اعرفي اني ماني بحاجه لنصايح وخصوصاً بمسألة معاملتي لناس ولاني بكل فخر اكثر انسان بالع الموووس وساكت واحاول اتعامل من ناس كثييير بزييين وهو المفروووض اني ما اعتبرهم بحياتي اصلا
ام حمد : ادحر الشيطان يانمر
نمر : والله ياخالتي انا داحر الشيطان لكن الظاهر في ناس غصب يدخلون الشيطان براسي
ابو ادهم : نمر مهما كان امك اللي تكلمك
نمر وقف بضيق : وانا وش مكتف يديني الا انها امي
طلع من المجلس بنفس الغضب وما دخلت الهنوف اللي وقفت تسمع بذهول وهي مصدومه من علاقته بأمه ورجعت تسمع بدريه اللي تقول : ناديه اتركي نمر بحاله خافي الله انتي فيه واتركيه ! يعيش بالطريقه اللي تريحه
ابو ادهم: ناديه! نمر مالك شغل فيه ومثل ماتركتيه وهو ابو سنيتن تتركينه الحين وانتي اخر وحده تتكلمين عن حياته ولو تهمك حياته ما رميتيه علي وركضتي ورا زواجك ولا تدرين عن هوا داره
وقفت ام طارق بذهول : هذا جزاي ابي له الخير
ام حمد: انتي تخربين حياته ما تبين له الخير ووش فيها اذا طاحت البنت !؟ ماهو معقول كل شي تعلقونه بظهره
ام طارق : ماعليه ماعليه قولوا اللي تقولونه وقوو شوكته علي لكن اللي تبيه يبه انا مالي شغل فيه وبكره اذا سوا مصيبه جديده في بنت الناس انا مالي دخل
اخذت عبايتها وطلعت
والهنوف ابعدت بذهول وهي حاطه يدها على فمها تكتم صوت شهقتها ( وويلي !؟؟ وش هالحياة اللي طحت به !! وش هالرجال اللي اللي من راسه لرجوله اسرار !؟ وش هالأم!؟) لكن ماقدرت تتجاهل نمر ابد وهي تفكر فيه ! وش شعوره لو صدق امه تاركته من هو صغير لا شعورياً رجعت وهي تاخذ عبايتها وطلعت تدور نمر وشافت دحيم ونادته بهمس : دحيم!! وينه نمر
دحيم نزل راسه بخجل : راح البركه
الهنوف : تودينن له
ابتسم دحيم وهو يمد لها يده : ايه
استحت الهنوف تمسك يده وقالت: اسبقن بمشي وراك
تقدم دحيم وهو يردد كلامها وهي تمشي وراه لكن ماعاد تشوفه بعد ماشافت نمر اللي رمى ثوبه وطب في البركه
اما نمر ما قدرت يتمالك غضبه واتجهه للبركه يغسل وجهه مره وثنتين بس مافاد ورمى نفسه بالبركه عشان يبرد قلبه من هالحريق اللي فيه نزل تحت المويييه شوي يبي يسكر اذنه عن كل شي وينظفها من كل كلام يسم بدنه بس طلع اول ماسمع صوت يصرخ يناديه : نمررر
طاح قلب الهنوف اول ما طب وطوول ما طلع وخافت انه صار له شي تجاهلت رجلها وركضت تصرخ تناديه ودحيم جنبها وعارف ان نمر مايطب بالمويه الا معصب ويطول شوي وهو يقول بخوف من صراخها: معصب معصب معصب
بس مافهمته الهنوف لكن شهقت اول ما طلع نمر يناظرها بذهول واتجهه لها وطلع وهو مبلول : وش فيك وش فيييك
تداركت الهنوف نفسها وهي تلهث بخوف : وش فيك انت!؟ وش نوحك طبيت بهالماء !؟ ولا طلعت
نمر التفت لدحيم الخايف من الصراخ : دحيم روح لبدريه
ركض دحيم التفت نمر على الهنوف: مافيني شي ! وشوله تصارخين انتي! خوفتي دحيم
لفت الهنوف تناظر دحيم : مدري مدري ، خفت صار بك شيٍّ
اللي ماقدر الماء يسويه سوته هالكلمه من الهنوف وطيرت غضب نمر وطيرت كل كلمه ازعجته وابتسم : ما صار لي شي ، سمي بالله
الهنوف اللي كانت ماسكه يدينه بدون ماتحس : بسم الله الرحمن الرحيم
سحبها نمر تجلس على طرف واخذ ثوبه يبي يلبسه بس وقفت الهنوف : لا لا اجدعوه لا تلبس خلن اجيب لك ملابس جديدات وتلبسهن وتجدع هاللي عليك لا يوجعك هالمهب( هوا بارد )
صد نمر يخفي ابتسامته اللي استهلكها كثير : لا خليك انا اللبس واجي لا تروحين من هنا
راح نمر والهنوف تراقب البركه اللي كانت نوعاً ما غمييقه وممكن يغرق بها احد حطت يدها على قلبها بخوف وهي تقول ( استودعتك الله لا يصير بك شيٍّ يوجعن بك )
ما طول نمر ورجع مبدل ملابسه وجاء رافع ثوبه :ليه جيتي!؟
الهنوف تورطت : ا ا ما ودي اجلس باللجه داخل ( ازعاج) وقلت اطلع امشي وقالي دحيم انك بهاه وجينا
نمر : اييه ، اجل تعالي تعالي
وقفت الهنوف وهي تمشي بشويش جنب نمر اللي اذا مروا ممر مويه يشيل الهنوف وينزلها بالجهه المقابله ويكملون
ووقفت الهنوف تناظر بتعجب : لمن هالحير ( مزرعه صغيره بالطرف)
فتح نمر باب خشبي صغير : الظاهر تسألين عن ذا المكان!؟
ضحكت الهنوف : انت للحين ما فهمت كلامي!
نمر : والله قوليه مره وحده وافهمه ! اما كل يومين كلمه ماينفع
ابتسمت الهنوف وهي تمرر اصبعها قدام نمر: هالمكان كله او المزرعه الصغيره لمن!؟
نمر ابتسم: ايه هاذي لي عطاني اياها جدي وسكرتها وتركتها لاغراضي الخاصه او اني اجيها لها من فتره لفتره
الهنوف : بس مزروعه
نمر : ايه
ماكانت كبيره بس كانت حييه وفي طرفها غرفه ودخل نمر : لا تدخلين اخاف يطلع شي ولا شي من الاغراض
الهنوف وقفت عند الشباك وهي تطل وتسأل ونمر يجاوب من بين الاغراض واغلبها اغراض كشته وصيد
وابتسمت الهنوف بخبث: نمر ياملي
رفع راسه نمر وتقدم وهو يوقف على طرف الشباك : سمي ياملي
الهنوف ابتسمت: دام البرد جاء خاطري بكشته تبرد القلب
ضحك نمر : وش عرفك انها روتين سنوي لازم بالبرد اكشت حتى لو لحالي لكن هالسنه بكشت معك
ابتسمت الهنوف : عساه سنينك طوييله يارب
مد نمر يده وهو يشد على يدها : عساها عامره بحسك
ابتسمت الهنوف وهي تبعد وطلع نمر وهو يقلب اغراضه بطرف وراح ورجع وهو معاه كل اغراض الشاهي
الهنوف : وش بتسوي!؟
نمر جلس وهو يشغل الدافور : ابد امس ما تهنينا بشاهينا ودامنا جالسين والجو حلو بسوي شاهي
جلست الهنوف وهي تضحك: الحق اني ما كنت احب الشاهي لين عرفتك !
نمر : مجبوره والله تحبينه لاني اعتبره همزة وصل بيني وبين كل شي احبه
تجرأت الهنوف وقالت ببتسامه: وانا من الاشياء اللي تحبه!؟
ضحك نمر وهو يمد لها الفنجال ببتسامه : لا
تفشلت الهنوف من رده ومدت يدها بتاخذ الفنجال وهي متفشله بس سحبه نمر وهو يقرب بنفس الابتسامه اللي من امس مافارقته رغم الضغوط : انتي كل الاشياء عمرك ما تكونين جزء من شي انتي دايم الاساس
ضحكت الهنوف اول ما تجدد داخلها أمل وقبل تاخذ الشاهي او تسوي اي شي تجمدت من جرأة نمر اللي ابعد الشاهي وكل شي يعيق بينهم وهو يبوسها بحنيه ويحضنها ابعد نمر مجبور وهو مايقدر يتحكم بنفسه معها
ورجع لمكانه ياخذ نفس وهو يمسح شعره بهدوء والهنوف اللي جمدت ولا عاد باقي الا صوت المويه والعصافير
وانتهى الشاهي ومحد له صوت لكن قطع الصمت نمر اللي وقف : يلا نرجع
وقفت الهنوف بشويش مع نمر وطلعوا وراحوا ل ابو ادهم الجالس بهدوء وبعدها قال : نمر وانا جدك
نمر: سم
ابو ادهم: شف بدريه تبي اغراض من البقاله وانا مالي حيل اروح
وقف نمر بسرعه : ماعليك ماعليك انا اروح
راح للمطبخ : بدريه ! وش بغيتي !
بدريه اخذت الورقه: هاذي وعاد دحيم بيروح معك لكن لا تخليه يكثر بالا غراض
نمر : لا لا خليه ياخذ اللي يبيه
بدريه: بس بس بعضها حرام ما تنأكل
نمر: خليييه
قبل يطلع نمر مسكته بدريه : نمر اسمع
لف نمر : وش فيك !؟مضايقك احد!؟ تبين شي!
بدريه ابتسمت بضيق: لا بس بقولك ماعليك من الكلام اللي قالته امك اللي مايعرفك زين بيظلمك و
رفع نمر يده : ماعليه يابدريه ماعليه المهم انتبهي للهنوف
وطلع وهو يحب هالبدريه لللي بكل مافيها من قوه تحاول تراضيه
اخذ دحيم وطلع واتجهه لسرور اللي وقف بهدوء اول ماشاف نمر اللي حط قدامه الورقه وجلس ودخل دحيم كالعاده يركض
وبدا سرور يجمع الاغراض بصمت وهذا شي غريب عليه وناظره نمر بشك: خير!؟ على راسك الطير اليوم!؟
ما عطى سرور ردة فعل قويه بس قال : حيل الله اقوى
شك نمر ودق الطاوله عشان يناظره سرور : خييير وش صاير!؟؟
سرور: ما صاير شي!
سحب نمر الكيس : اجلس اجلس
جلس سرور وتكتف نمر: عسى بس ما انت زعلان !؟
سرور: وانا من انا عشان ازعل منك وليه اصلا ازعل
نمر : دام هذا كلامك!؟ وشوله قالب خلقتك!
سرور نزل راسه : مافيني شي
نمر : سرور تعرفني صح !؟ ترا والله مالي بال طويل ابد اخلص انطق
سرور التفت يناظر ابو مسعود وصد بضيق
وناظره نمر وهو مستغرب هجود سرور ويعرف ابو مسعود شايب عايب وقوي ودايماً يسلف الناس ومأذي الناس : هالشايب مسوي لك شي!؟ يطلبك شي!؟
سرور هز راسه : ايه يطلبني فلوس
نمر: اييييه!
سرور : وقالي لازم اسددها في اسبوع ولا ..
نمر : انطططق! وش يبي ! بيسجنك!!
سرور: ليته
نمر بشك : اجل وش!
سرور : قال تعتبر الدين لللي عندك مهر وحده من خواتك وتزوجني وحده والمشكله خواتي كلهم صغار عليه ومدري واسوي فيه يا بيسجني ويجلسون محد يصرف عليهم ولا بيتزوج وحده منهم ويذبحها بالحيا
وقف نمر بغضب: لييييه الدنيا على كيييفه هاللي مايستحي
سرور وقف يمسك نمر : الله يرحم والدينك اسكت فكنا منه
دف نمر يده بغضب : كم يطلبك !؟
سرور: مبلغ كبييير
نمر: كممم !
سرور: 100 ألف
ماكان نمر يملك هالمبلغ ولا حتى نصه بس مثل عادته قال : خلصنا خلاص مبلغ هالردي بيوصله وخواتك انت تنتبه لهم وعمرك لا تخلي احد يمشيك بمزاجه تسمع ومهما كان ظرفك ووضعك انت اللي تحط القوانين ما احد غيرك وغير هذا ! ليييه ساكت ليه ماقلت لي من البدايه
سرور انصدم ان نمر بيساعده وانصدم اكثر اول ما شاف قهر نمر عليه: مادريت
نمر: لازم تدري يا سرور لازم تدري
تركه نمر وهو ياخذ جواله بعيد ووقف ينتظر الرد
سلطان: هلااا يا شريك
نمر: هلا فيك يا سلطان وش اخبارك
سلطان: حمدلله وانت
نمر: بخير ، وينك!
سلطان: فالبيت أجمع اغراضي بروح لحايل يومين ،امرني!
ابتسم نمر لطاري حايل : مايأمر عليك ظالم بس انا والله قاصدك بشي و..
قاطعه سلطان قبل يبرر :ابد تم وتبشر قبل تقوله
نمر: اللله يسعدك يا سلطان لكن حلفتك بالله اذا ماعندك او ماهي متوفره معك لا تجبر نفسك على شي ابد
سلطان: لا والله يانمر انت لو تطلب عيوني تبشر امرني بس
نمر بتردد قاله انه يبي منه سلف وبسرعه رد سلطان برحابة صدر : ابشر لكن عطني نص ساعه وبجيك
نمر: الله يفرج عليك
سكر سلطان وهو كله ثقه بنمر وهو بهالايام اللي عرف فيها امانة نمر مستعد يعطيه عيونه ورجع نمر لسرور : خلك هنا شوي وبجيك واذا جاك هالشايب تعلمن تسمع
استغرب سرور اللهجه الجديده بلسان نمر بس ما عطى الموضوع اهتمام ولا نمر انتبه ان حتى لسانه تغير مع الهنوف وتجدد
رجع دحيم ولاغراض للبيت ورجع للديره وهو يمشي بغضب وعيونه تدور ابو مسعود وقف على مدخل الديره وهو ينتظر سلطان اللي جاء بعد فتره وعطى نمر شيك وراح ورجع نمر لسرور بغضب : سروور تعال
طلع سرور يناظر نمر: وش بتسوي ! تكفى لا تدخلني بمصيبه
نمر سحبه بغضب: المصيبه انك جالس ولا ذبحت ابو مسعود للحين امش امششش ولا بتنتظره ياخذ خواتك غصب عليييك
تحرك سرور مع نمر اللي اول ما مر من عند القهوه وقف وشاف ابو مسعود ودخل وهو معصب
ابو محمد : خييير وش عندك يا برق الشر!؟؟ وش الشر اللي انت جاي به بعد
نمر : كلامي ماهو معك ولا تخليني التفت لك
مر من بين الطاولات وسرور معه واول ما وقف عند ابو مسعود رفع يده لكن مسكه سرور بترجي: لا تورط نفسك يانمر تكفى
ابعد نمر يده بغضب وهو يرمي الشيك بوجهه ابو مسعود وهو يهدده بصوت يسمعونه كل الديره : دينك اللي عند سرور هذا هو ! واقسم بالله اللي رفع سبع ونزل سبع لو ادري او اشم ريحة انك تساوم الناس على اعراضها لاذبحك وابيدك من هالحياه وانا حذرتك وقدر اعذر من انذر ومايحتاج اعرف عن نفسي
ابو مسعود اللي اخذ الشيك وهو يبي الفكه من نمر وشره وطلع نمر بعد ماقال : هالكلام للكل ولا تحسبوني غافل عنكم ياديرة الفلس
ومن بعد هالكلام اعلن نمر للكل ان سرور دخل تحت حمايته وياويله اللي يقرب منه وطار سرور بالسماء وهو على كثر ما يلعن خيره نمر بس برد قلبه الحين ورجع برضا لبيته
اما نمر طلع من عندهم وهو مستقعد لهالديره لكن ماهم همه الحين همه الاكبر ( حمد)
دخل المزرعه لكن حصل قبله ابو طارق وصد وهو يستغفر ودخل مع دحيم اللي يبتسم له واول مادخل الصاله سمع شهقه فجعتهم وقبل تركض الهنوف ناداها نمر :بشويشش رجلك يابنت الناس
الهنوف ماقدرت ترد وهي تشوف دحيم موجود وفهم عليها نمر ولف: دحيم جب لي مويه
ركض دحيم ولف نمر : لا تخافين ترا ما عليك اثم اذا ما تغطيتي عنه
ولف بهدوء وهو يجلس : ماعليه شرهه مرفوع عنه القلم
استغربت الهنوف وجلست : كيف!؟ وهو يفهم ويتكلم وذكي !
نمر: اييه لكن ماعليه عتب سألنا الشيخ من قبل وقال يجوز
الهنوف سكتت بحزن لكن لفت لنمر : هو متعلق بك ولا انا اتوهم!؟
رفع نمر يده يمسح على صدره : والله انا اللي متعلق فيه
حطت الهنوف طرحتها على شعرها اول ما رجع دحيم وهي متفشله ودحيم مستحي اما نمر كان وضعه عادي
في بيت ابو حمدان وبعد العشاء
بدا البيت يفضى ويبقون فيه سكانه بس وباستثناء ابو ادهم اللي نام
كانوا خلف البيت في الجلسه البسيطه اللي يضيئها لمبه وحده بس وعلى الفرشه المفروشه كان نمر منسدح وجالس قدامه دحيم اللي يسمع لنمر الحروف اللي قدر يحفظها
والهنوف وبدريه جالسين بطرف يسولفون بهمس والهواء البارد يهب
لكن لفوا على دحيم اللي جاب كراسه واصر ان نمر يكتب معه وهنا بدت تضيق ملامح نمر اللي رافض بشده وابعده : خلاص يادحيييم لا تغثني
رجع دحيم بضيق وضاق نمر اللي زعله بس وقفت الهنوف اللي بدت تعود على دحيم : انا اكتب معك
وجلست جنب نمر اللي كان ضايق انه بيتفشل قدامها وهو لايكتب ولا يقرا
ناظرها دحيم بضيق وصد ومادخلت بدريه وهي تدري ليه نمر رافض وقددام الهنوف بذات
لكن ماقدر نمر يتحمل زعل دحيم وهو يحاول يصد عن الهنوف : تعال تعال
قرب دحيم وبدا نمر يكتب معه يحاول يتفادى وضعه ودحيم مصر انه يقرا له اللي ينكتب
وابعدت الهنوف اول ما حست شي غريب في نمر وهو مايرفع صوته ويده ما تكتب بثقه ! استغربت هالوضع على نمر
وهي تحاول تشوف وش يكتب لكن انصدمت من خطه ومن كتابته وحتى وهو يكتب عنده اغلاط كثييييره
لكن ماصدقت توقعته يمشي الوضع لدحيم بس
وطلعت مع بدريه وتنفس نمر براحه وجلست الهنوف مع بدريه اللي تغسل
الهنوف : بدريه أسالتس شيٍّ !
لفت بدريه بضيق: ادري وش بتسألين
الهنوف استغربت: وشو!
بدريه: بتقولين ليه نمر ما يعرف يكتب زين ولا يقرا زين وليه يعصب من هالطاري صح!؟
الهنوف ماكان هذا سؤالها بس انتبهت وقالت: ايه
بدريه قربت بهمس : مدري اذا نمر قالك ولا لا بس نمر ماكانت دراسته كويسه بسبب الظروف ولا كمل دراسته وحتى وهو يدرس كان بس يروح ويجي ما دخل حصه وحده او حتى درس واحد يعني تقدرين تقولين دراسته ضعيفه جداً
اتسعت عيون الهنوف بذهول وهي كل يوم تكتشف سالفه اقوى من الثانيه عن نمر و واضح انها بدت تنهل عليها البلاوي اللي تقولها جود
وماردت ورجعت لنمر اللي اول ماحس فيها سكر الدفتر : خلاص يلا تأخر الوقت
اخذه دحيم وطلع وجلست الهنوف وهي تحس بقلق نمر ومدت يدها للدفتر بتاخذه واخذه نمر يرميه وراه: خليه وش تبين فيه!
الهنوف : بشوف وش كتبتوا !
نمر : خرابيط
نطت الهنوف بمكر واخذته واختلفت ملامح نمر بغضب: الهنوووف
حطته ورا ظهرها وهي مبتسمه : وش نوووحك ، براعي ( اناظر ) له شوين واعطيك
وقالت بضحك: يمكن كاتب اسمي وجنبه قلب
ناظرها نمر بضحك : والله!؟
فتحتها الهنوف وهي تناظر الخط وهي مصدومه بس مابينت ولفت بضحك: حسافه ما كتبت اسمي
نمر : ما يحتاج اكتب اسمك بالدفاتر يالهنوف
كان وده يكمل ويقول ( اسمك بقلبي ) لكن سكت
وقربت الهنوف : نمر صح انا علمتك بسر وانت حفظت السر
تكتف نمر: اييه !
الهنوف اللي بدت تتجرأ على نمر ومدت يده ليده تمسكها بارتباك وهي تبي تحسسه انها تقدر تحفظ اسراره ويقدر يفضفض لها : وانا بعد احفظ السر
فهم نمر رسالتها له ومن يوم جلست وهو يدري انها ماجت الا تعرف بسالفة دراسته وسكت يناظرها شوي وهو عقله يمنعه لانه بطبيعته كتوووم لكن قلبه يجبره يسلم كل قيوده للهنوف
ولف يناظر شاف الدنيا هدوء وعرف ان دحيم بدريه راحوا ينامون ووقف يمد يده لها : تعالي
راحت معه الهنوف ابتسمت اول ما شافت السرير المعلق بين النخل
لكن شهقت اول ماحست احد رفعها لكن عرفت هالحركه كثييير مع نمر اللي ما يعرف يتعامل بالكلام كلها افعال
نزلها على السرير ببتسامه وانسدح معها ولفت الهنوف بخوف : لا يطيح بنا
نمر: لا ما عليك تحمل اثقل من كذا
الهنوف : ماشاء الله عليك وشلون سويته
نمر : فضاوه
كان السرير يتحرك بشويش والهواء يلعب بأوراق النخل وفجأه قال نمر : ماكان زواج امي وابوي ناجح ابد ولا توفقوا بزواجهم وكبرت المشاكل يوم ورا يوم ألين ما وصل الموضوع لطلاق لكن كان حمل امي فيني كبر رادع واضطروا يتحملون ليييين ولدت امي من هنا وطلق ابوي من هنا وسنتين وانا يوم عند امي وساعه عند ابوي وبعدها قررت امي انها تلتفت لحياتها ولاتضيع شبابها وتتزوج وابوي بعد وتزوجوا ونفس الموضوع رجع يوم هنا ويوم هنا لين صار معاد احد يتحمله وكل واحد صار عنده مسؤوليات ومحد فاضي يتحمل غلط الثاني اللي كل واحد يرميه على الثاني واخذني جدي وعشت بهالديره ليييين كتب الله وانتهت حياتي بطيحتي …
نمر كان مسترسل بيحكي قصته كلها وبما ان الوضع يساعد وكان يقصد بطيحته سالفه السجن بس سكت على الهنوف اللي لفت عليه : طيحتك من الضلع!؟ سكت شوي يناظرها وهي تجاوزت اتعس فصل في حياته وعجز ينطق ويخسر هاللحظه والهنوف وابتسم : ايه لكن الحق انها ما انتهت بالعكس بدت من جديد على يد الهنوف
ابتسمت الهنوف وهي ترفع يدينها بضحك: تدري اني جلست ايام وانا اوجس ( احس ) ملمس شعرك بيديني يوم رفعت راسك
ضحك نمر بذهول : لا لا!
الهنوف : والله بس ماعلينا كمل
سحب نمر نفسه للاسفل شوي وهو يحط يدينها على شعره : بنكمل نرجع لك احساس هاذيك الايام
ضحكت الهنوف وهي تمسح على شعرر نمر اللي رجع يكمل : بما اني عشت بهالديره ماكانت دراستي تمام وانا اصلا ما كنت فاضي لدراسه لان كل تفكيري مع اهل هالديره اللي لو تمر ساعه ما يحملوني فيها مشكله ما يرتاحون وكل يوم وانا المتهم وكل يوم وانا ينقطع صوتي وانا احاول اثبت انه مب انا ويوم انجح وسنه افشل بعد ما وصلت المتوسطه ما نويت اكمل وتركت الدراسه وانا اصلا .. وتردد بس قال: ضعيف بالدراسه
حست الهنوف بتردده وحاولت تجلس وهي تبتسم : عادي ترا ما احدٍ طلع من بطن امه متعلم وحنا فاضين واعلمك اللي ما تعرفوه وتعلمن اللي ما اعرفوه
اعتدل نمر ببتسامه : وبتصبرين علي!؟؟
الهنوف بنفس الابتسامه : انت بعد صبرت علي
نمر: بس انا ماني مثلك!
الهنوف رفعت حواجبها بتفكير : يمكن انت احسن شوي
ضحك نمر : مافيك حيله
الهنوف: وانا صادقه والله وعند وعدي وجربني
نمر اللي لقاها فرصه من الله انه يحسن من وضعه : اجل اذا رجعنا البيت نتفاهم
الهنوف : زيين
اخذ نمر نفس وهو يحمد الله ان مهما تعقدت الاوضاع يحاول انه يتجاهل المشاكل ويكمل حياته
الهنوف : انت تجلس بهاه بلحالك !؟
نمر : ايه وانام بعد
الهنوف : ياقوة قلبك انا لو ما انت معي ماجلست
نمر ضحك : اصلا لو بيدي عشت هنا عمري كله
الهنوف : والله انا ماعندي هالجرأه
حس نمر انها خايفه من المكان وابتسم: اجل يلا ندخل
رجعوا للبيت بهدوء واول ما وصلوا غرفة نمر لفت الهنوف تناظر نمر وهي تشوف السرير صغير نوعا ما عليهم لكن تدري انه ما يهمه وقبل تعترض على هالسرير تسكرت الانوار وغطت على انفاسه ريحة العود اللي يدل على قرب نمر اللي حضنها ..
……………..••…………
ومن بكره
دخل حمد بيت جده وهو من امس يفكر وش يبي نمر من هذال
شاف جده وبدريه جالسين : سلام
الكل : وعليكم السلام
حمد: هاه نمر فيه اليوم!
بدريه: ايه توه اخذ دحيم وراحوا للمزرعه
حمد: زين زين
راح له حمد واول ما دخل شاف نمر اللي مضبط له شاره ويرميها ودحيم يصفق له
حمد : دحيم ادخل لبدريه شوي
دحيم لف له يناظره وعرف ان حمد معصب وراح مستعجل
ونزل نمر اللي بيده بهدوء : وانا اقول وينه من اليوم !
حمد : هذاني جيت بعد ما افتر مخي ادور لك عذر
نمر: ومن قالك دور لي عذر!؟
حمد : انا وانت دخلنا بسالفة الهنوف مع بعض يا نمر والحين بتقولي وش سالفة هذال
نمر كان يدري لو يجلس يناقشه بيتهاوش معه ولاول مره تنازل وقرر يقوله : اجلس طيب
جلس حمد وهو متكتف ويهز رجله وهو كل همه مايكون نمر داخل مصيبه جديده
وقف نمر يستند على بندقيته اللي يتعلم عليها الصيد وبدا يشرح لحمد كل السالفه بس ما توقع ردة هالفعل من حمد اللي وقف بذهول : لااااا لااااا والله انهبلت ! انت صاحي انت وصل مرضك بهالهنوف لذا الدرجه ! من عطاك الحق تحرك حياة هذال على كيفك ! اولها تجبره وتهدده بسلاحك لين تنازل عن بنت عمه وعرض نفسه للوم من كل اللي حوله ولا كفاك اجبرته انه يتزوج الثانيه وزود عليها تجبره يحبها ويلعب عليها ويقنعها بحب كاذب !؟؟ ولا رضيت وطلعته من عند امه وابوه!؟ نمررر وش صار لك !؟ وين رميت ضميرك!؟
رفع نمر البندقيه بغضب: لا تكلمني وكأني مذنب ايه خربت حياته لكن حاولت احل اللي خربته وقد ما قدر احل مشاكله حليتها وانا ما ابعدت احد انا عطيته الاتجاه الصح وهو اللي مشى فيه
حمد : وهذا كله عشان ترضى بك الهنوف!؟ لكن اعرف لو الهنوف عرفت كل ذا صدقني اول شي تسويه تطلب الطلاق !؟ لانك باختصار اول شي بديته هددت ولد عمها بالسلاح ومن غير الكذب اللي رسمته رسم على ابوها وعمها
ولا وقفت بعثرت عايلتهم ورجعت ترتبها على مزاجك انت !؟
نمر : حمممممممد من اول يوم وانا اعيد واكرر لو هذال يستاهل الهنوف كان ذبحني اول ما فكرت اجبره والهنوف تدري ان هذال ما يستاهل لكن هذا مو موضوعنا كل الموضوع اني رجعت الامور مع هذال لاحسن حال وانت تدري ليه سويت اللي سويته من البدايه
حمد ضحك بضيق : مدري متى بتفهم يا نمر انك ما صلحت شي الا حياتك انت بس وحتى يوم قررت تصلحها بنيتها على قاعده هشه كلها اكاذيب اول ما تدري بها الهنوف بتطيح فوق راسك كلها ، لكن نصيحه يانمر لا تكمل على هالامر ارجع ورتب امورك بالطريقه الصح نمر مابي اشوفك كسيييير وانت بيدك تصلح كل شي
كان حمد يدري وش بيصير لو انكشف هذا كله للهنوف مايبي نمر يكمل كذا خايف عليه
لكن نمر انزعج من حمد ولف بيسكر الموضوع : اذا هالامر على قولك مزعجك اتركني مالك شغل فيني ولا تزيد وتعيد بهالسالفه ياحمد وخلني ابني واهدم بكيفي سكت نمر وهو يسمع اعتراضات حمد وصد بيسكته بس مايدري كيف فلتت يده مايدري كيف ضغط على زناد البندقيه وثارت لكن وين والتفت على صرخه حمد اللي طاح فوراً
ورماها نمر برعب وصرخ: حمممممممممد
وقبل يوصل لحمد انتبه انه فيه صوت صراخ يشارك صوته واتسعت عيونه بصدمه اول ماشاف الهنوف اللي اول ما صحت ونزلت شافت دحيم وسألته عن نمر بتبشره بخبر سلطانه واول ما وصلت سمعته يسرد كل شي لحمد وضاقت بها الارض ما توقعت نمر يسوي هذا كله وللحين ما عرفت كل التفاصيل
ما اهتم نمر لوجود الهنوف وهو كل همه حمد اللي طايح بدمه ركض يرفعه ويناديه مايدري وين صابته ورفع راسه على صراخ بدريه وجده للي ركضوا وماكانوا هم بس كانت خالته ام حمد فيه وركضت برعب: يمممممه حممد يا ولدي حممد
ماعرف نمر كيف يتصرف كانت يدينه ترجف وصرخ في بدريه : دقي على الاسعاف دقي على الاسعااااف
ركضت بدريه تدق ونمر يناظر يدينه والارض وحمد كانت كلها دم وجلس بيرفع حمد بس ناظرته ام حمد ببكي: ذبحت ولدي ياااانمرر ذبحت حمد
بهالكلمه انعصر قلب نمر الخايف وهو يحاول يبرر : والله مادريت والله ماقصدت
وعلى صوت الصراخ والرصاص والاسعاف الديره كلها اجتمعت عند الباب ونمر اول مره يبان خوفه وهو لو يرمش بالغلط بكى
ركض للاسعاف وهو يبلغهم باللي صار وهو مب قادر يقرب وهو يسمع بكى خالته وبدريه وجده اللي يخبط صدر نمر بقهر : هذا اخر شرك يا نمر هذاااا اخره
نمر ماعاد قدر يرد وهو يركض ورا المسعفيين اللي اخذوا حمد بسرعه وام حمد تركض وراهم لكن قبل يركب الاسعاف دفته ام حمد بصراخ وهي منهاره : ابعععد عنه ابعد الله لا يسامحك
اول ما ارتطم نمر بالنخله وراه وحس بضربتها من دون ما يحس انهارت عيونه وانهلت دموعه المصدومه مايبي يضر حمد وللله مايبي يضره ألا حمد الا حمد
كانت ام حمد منهاره وهي ماهي مصدقه ان نمر يسوي بحمد هالشي ولا تشوف له اي مبرر وكانت بلحظة انهيار وخوف ركبت معه وراحوا ونمر للحين بمكانه
ضاقت انفاس نمر اللي ركض لسياره وهو يمسح دموعه قبل احد يشوفه واول ما طلع صد بضيق اول ماشاف اهل الديره اللي همساتهم واضحه
ركب السياره وطار
اما عند الهنوف اللي جلست تبكي بقهر وخوف وصدمه وهي تشوف دم حمد على الارض وتسمع بكى ابو ادهم اللي يهز راسه بقهر ويردد ( وين اوديك يا نمر وين اوديييك من شرك وين اوديك من الناس )
بدريه كانت تبكي وهي تمسح على كتف ابوها وهي تدعي ان الله يسلم هالموضوع
…………….••…………
فالمستشفى
دخلوا حمد على طول العمليات ونمر اللي دخل يركض واول ماشاف خالته واقفه لحالها انبهل وركض: خالتي خالتي وينه حمد وييينه
ام حمد رفعت راسها تبكي : اخذوه اخذوه مدري وينه
التفت نمر بخوف وهو يدور بعيونه على احد يسأله وهو فعلاً يرجف وركض لاستقبال وهو يسألهم وقالوا له بالعمليات ورجع يسحب نفسه لين وصل عند خالته للي جالسه بإنهيار وجلس عند رجولها : خالتي والله ما قصدت والله ما دريت انتي تدرين اذبح نفسي ولا اضر حمد تدرين اني مستحيل أذيه تدرين انه يسوى عيوني تكفين ياخاله لا تلوميني وكأني متعمد والله ما نويتها والله
ام حمد ببكى : اااااه يا نمر اااااه لو يصير بحمد شي ببكي عيالي الاثنين يا نمر ( وقصدها ينتهي نمر بعد من حياتها وهي تعتبره ولدها)
عرف نمر لو يصير لحمد شي بيخسر خسارته الكبيره واحتمال يموت لو صار لحمد شي
نزل راسه على رجولها وهو يبكي بقهر من حظه ومن حياته اللي ما تخلي له احد ابد
وبكت ام حمد اللي خايفه وهي ماتدري تلوم نمر ولا من تلوم واخر شي تفكر به ان نمر يكون سبب في ضرر حمد
وجاء ابو حمد يركض اللي اول ماشافهم يبكون طاح قلبه وركض يسحب نمر وهو يهزه بصراخ: وش صاااار لولدي وش سووويت به
نمر رفع راسه بضيق: مدري مدري اخذوه للعمليات
ابعده ابو حمد : وش سويييت بعد علمني وش سويت
ارتفعت الاصوات وركضوا الحراس يفرقون ونمر مستسلم والشرطه اول ماعرفت ان حمد متعرض لطلق ناري جت وعرفوا من صراخهم ان نمر هو المتسبب واخذ نمر اللي اول مره يقاوم وهو خايف يصير بحمد شي
كان نمر خايف يصير بحمد شي وهو ماهو عنده وهو حتى مايدري وين صابته الرصاصه اخذوه بالقوه وام حمد تبكي لكن مابيدها حيله ونمر يترجاهم اقل شي يدري عن حمد لكن ما فاد وتسكرت على يدينه الكلبشات وهي ماعمرها خوفته كثر هاليوم واختنق اول ماشاف الزنزانه اللي دخلوه فيها لين يعرفون حالة حمد
وماقدر نمر يوقف وطاح يبكي بخوف من الجاي
…………….••…………
في بيت ابو ادهم
وصل ابو طارق وام طارق بخوف اول ماسمعوا السالفه واهل الديره اللي نشروا السالفه ( نمر قتل حمد )
دخلت ام طارق وهي تبكي: بدريه بدريه وش يقولون يا بدريه وش يقولون
بدريه وقفت وهي تبكي : نمرر نمر اطلق النار على حمد وراحوا وماندي وش صار معهم
ام طارق بصراخ : لييييه ليييه!
بدريه : مدري والله مدري
ابو ادهم طلع وهو يمشي على عكازه ببكى : وينه وينه عبد الاله وينه ابيه يوديني المستشفى
ركضت بدريه: يبع تكفى حالتك ما تحمل وقفتك بالمستشفى
ابعدها ابو ادهم : وخري وخري
طلع لابوو طارق اللي كارهه نمر وركض يمسكه وهو يترجاه يوديه المستشفى واخذه ابو طارق وراحوا وام طارق معهم
ورجعت بدريه تبكي وهي تضم دحيم الخايف لكن توها تنتبه ( وين الهنوف !) ابعدت دحيم وراحت تدور للهنوف اللي صوت بكاها مسموع بكل البيت ركضت وهي تفتح الباب : الهنوف
رفعت راسها الهنوف ببكي وقربت بدريه تحضنها: بسم الله عليك لا تبكين ان شاء الله مايصير شي
الهنوف ما كانت ترد وهي ماتدري وش تبكي عليه اصلا كل شي يبكي كل شي تفكر فيه تنهار منه
بدريه كانت تحاول تهدأ وتذكرت انها شافت الهنوف هناك واضح انها شافت وش صار : الهنوف تعرفين وش صار!؟ تعرفين ليه نمر سوا كذا
ناظرتها الهنوف بخوف وبكى وهزت راسها : لا
بدريه خافت من انهيار الهنوف وخافت فيه شي بس الهنوف ماتقدر تقوله
:…………….••…………
وصل ابو ادهم للمستشفى
واول مادرى ان نمر في قسم الشرطه طاح عليهم واخذه ابو طارق للطوارئ وبعد ساعات مرعبه
طلع الدكتور وركض له ابو حمد : بشرني تكفى بشرني
الدكتور: حمدلله بسيطه الرصاصه كانت بالكتف بس الحمدلله عدت على خير
ام حمد ببكى : حمدلله ياربي حمدلله
الدكتور: وان شاء لله ساعه ويصحى معنا ولا تخافون الامر بسيط
ابو حمد : حمدلله حمدلله مشكور ماقصرت
الدكتور: العفو
لفت ام حمد ببكى : ابو حمد تكفى طلع نمر اكيد انه مايقصد ودام حمد بخير طلعه
ابو حمد :لا توصين يا ام حمد نمر بحسبه ولدي لكن ما اقدر اطلعه لين يصحى حمد وهو يتنازل
سكتت ام حمد وهي تمسح دموعها: الله يلعن ابليس الله يلعنه
_______________________.
في القسم
كان نمر يحووووم مثل المقروص مايدري وين يروح وش يسوي وكل دقيقه يسأل ( ما وصلكم خبر عن حمد )
والرد : لا
جلس نمر اول ما حس ان رجوله ماتشيل ثقل همه وهو يتذكر اللي صار وكل اللي صار كارثه
…………….••…………
وبعد ساعه بغرفة حمد
كانوا ينتظرونه يصحى وتحرك اخيراً حمد اللي يسمعهم ينادونه ويسمون عليه لكن عيونه تدور نمر ورجع يغمض بقوه وفتحها وما شافه ولف لابوه بهمس: وينه!؟
ابو حمد :نمر!؟
حمد : اييه
ابو حمد : اخذوه الشرطه عرفوا انه المتسبب واخذوه
فز حمد بس رجع بألم : ليييييه ليييه ! من سمح لهم ياخذونه
ابو حمد : ماقدرت امنعهم
ام حمد :لا تخاف يمه
حمد بإنزعاج : كلمهم يبه كلمهم يطلعونه نمر لا يجلس ولا ثانيه بالسجن
ابو حمد : ابشر بس قلي ليييه نمر سوا كذا!
حمد : مايقصد كنا نجرب البندقيه ماقصد
ام حمد : الله يلعن ابليس
ابو حمد : خلاص خلاص اكلم الشرطه ويجون
سكت حمد وهو مستحيييييل يشتكي على نمر مهما صار
ويدري ان نمر يموت ولا يضره
واول ما وصلت الشرطه قالهم حمد ان نمرر مو متعمد وانها بالغلط ولازم يطلعونه
……………..••…………
وفي السجن
كان نمر على طاولة التحقيق ويعيد ويكرر : رميت حمد بالغلط
الضابط : والسلاح اللي معك !مرخص
نمر: ايه مرخص وهو سلاح صيد اصلاً وكنا نجرب السلاح ودخل حمد بالغلط
الضابط قبل يكمل دخل احد العكسر : المتصاوب صحى يا طويل العمر وارسل تنازله وإفادته
فز نمر بفرح : حمد بخييير!؟؟
الضابط اشر له : اجلس اجلس نشوف الحين
جلس نمر وهو يترقب الاخبار عن حمد وبدو يقرأون إفادة حمد اللي تقريباً مثل إفادته نمر اللي ابتسم بخنقه وماصدق قالوا له افراج الا اخذ اغراضه وركض للمستشفى ودخل وهو شبهه يركض ويسأل عن غرفة حمد واول ما وصل دخل حتى مادق الباب وشماغه بيده وثوبه للحين عليه دم حمد
وقف يناظر حمد اللي واضح عليه التعب وفزوا ام حمد وابوه وابو ادهم والكل عند حمد لكن ما اهتم نمر اللي رمى شماغه واسرع يناديه : حمد انت بخييير حمد
على الرغم من ألم حمد اللي يحس به فز : طلعت يا نمر
تقدم نمر يبوس راس حمد وكتفه المتصاوب : انا اسف يا حمد والله ما قصدت والله مدري وشلون فلتت مني
عساها بضلوعي ولا فيك يا حمد
اعتدل حمد يحاول يبتسم : بسيطه يا نمر بسيطه اكلنا اكبر منها وعدت وجعلني فدا لك
نمر اللي مازال قريب من حمد وهو يكافح دموعه: يوجعك شي
حمد: لا لا ما يوجعني شي
رفع راسه نمر اول ما حس الانظار عليه وراح لابو حمد يبوس راسه : يا عم انت ادرى وش مكانة حمد بصدري وتدري اني مستحيل اضره و..
ابو حمد قاطعه: لا يا نمر انا اللي اعتذر منك في لحظة غضب وانهيار فقدت نفسي لكن انا اسف
نمر : لا والله معك حق معكم حق كلكم
راح يبوس راس خالته ويعتذر منها وجده وتجاهل الباقين اللي كلامهم واضح بعيونهم
رجع لحمد وهو يتطمن عليه وكان حمد يحاول يوصل لنمر ( انه هو الغلطان المفروض ما يستفزه مهما كان السبب )
واول ما اعلنوا نهاية الزياره قرر نمر يجلس عند حمد بس رفضوا المستشفى لان حمد ما يحتاج مرافق
وطلع نمر يسحب نفسه سحب وهو كارهه نفسه اللي في كل مره تدمر كل شي حوله
التفت لجده وهو ياخذه من ابو طارق وركبوا بهدوء وابو ادهم يناظر نمر بحيرة مايدري وش يسوي به وبحظه النحس
وتحرك نمر للمزرعه وهو يحاول قد مايقدر يتجاهل اهل الديره وكلامهم والتفت على جده لللي قال : نمر ما ابيك تزعل مني وانا جدك لكن انا مجبور ابعدك عن هالديره وعن الرياض كلها يانمر خايف عليك من كلام الناس وانت ما تصبر خذ زوجتك يانمر واطلع من هالديره ولا تجي لها مره ثانيه خلك عند ابوك اريح
غمض نمر وهو يدري ان في يوم من الايام بيسمع هالحكي مارد ودخل الديره بهدوء وهو يصد عن كل واحد لانه فعلاً ما يبي دم ثاني برقبته وصل للمزرعه ونزل وهو يسكر كل الابواب مايبي يسمع صوت احد مايبي يسمع اي اتهام ثاني كفااااايه المصيبه اللي تحتريه
قابلته بدريه تركض: نمر كيفه حمد !؟
نمر بضيق؛ بخير بخير مافيه الا العافيه
مر من جنبها بضيق وتركها لجده اللي يقولها التفاصيل وطلع يدور الهنوف وهاذي اول مره يخاف نمر من احد كثر هالمره تردد بس فتح الباب وشافها واقفه على الشباك بخوف ولفت وهي تناظره لكن ماهي النظره المعتاده للهنوف وفهمها نمر اللي دخل وسكر الباب وعجز حتى يناديها بأسمها
والهنوف ماعاد عيونها تشوف الا مجرم ! ولا تسمع اذنها الا الرصاص
وطال الصمت ولا قالت الهنوف الا: ودني بيت ابوي
وياليتها ما قالته لانها هدت كل شي انبنى بصدر نمر اللي نشف ريقه واختفى صوته وعجز ينطق اي كلمه او تبرير غير جمله وحده بس وهالجمله زادت الطين بله: اجمعي كل الاغراض من دون صوت !! بنطلع
وطلع من الغرفه والهنوف واقفه بإنكسار ماهي مستوعبه ابد كانت مجمعه اغراضها اصلا وتركت اغراض نمر وطلعت بأغراضها وشافته جالس بالسياره بصمت وانوار المزرعه كلها مطفيه وصوت ابو ادهم يشرح القصه لاهل الديره ويبرر لنمر موقفه قدامهم وهو يحاول مايحتك نمر فيهم ابد عشان ما يكبر الموضوع جمدت وهي تسمع ابو ادهم يقول : حمد بخييير والطلقه صابته بالغلط
لكن رجعها صوت نمر اللي يصرخ: خلصيني
فزت ولفت بخوف وركبت وهي تشوف نمر بينفجر بينفجروتحرك بكل سرعته وهو بس يبي يطلع من هالديره وماصدق طلع ومشى مشى وهو مايبي يرجع لاي مكان وقف بمكان فاضي ونزل هو بلحاله وهو يدور جنب السياره بصمت ما هو قادر يتحرك من مكانه مايدري وشلون يتصرف مايدري كيف بيوضح الامور وهو فعلاً صار برق شر على كل مكان يتواجد فيه
رجع يركب بهدوء والتفت للهنوف بهدوء: وش تبين ببيت ابوك!؟
لفت الهنوف ببكى: وتسأل ياللي ما تخاف الله
كانت الهنوف مقهوره من نمر واللي سواه بهذال وابوها وعمها ورغم انها ماتعرف كل التفاصيل بس اكيد ما زعل حمد الا من شي قوي والادهى والامر ان سالفة هذال فيها سلاح
ضرب نمر المرتبه جنبها وهو يصرخ : اقصري لسانك احسن لك يالهنوف اقصري لسانك
الهنوف خايفه بس ماقدرت تسكت : اقصر لساني ليش!؟؟ واسكت ليه باللي انت عملتوه بهذال وقلت لك يا نمر لا تكذب وكذبت ما تركت شي ما سويتوه وتبيني اسكت
نمر : لا تكلميييين بشي ما تدرين عنه ! ولا تدرين عن مبرراته
الهنوف : مامن مبرر الا انك اناني وتبي كل شيٍّ لك وانا اللي صدقت وعلمتك بأخص اسراري وانت تلعب بحياته بين اصابعك
انهبل نمر وهو يصرخ : ما لعبت بحياة احد انا ماسويت اللي سويته الا عشانك
الهنوف بصراخ: وانا ما ابييييك
من دون ما يحس نمر سحبها وهو يهزها بصراخ: المهم اني ابيييك انا وغيره مو مهم تسمعيييييين مايهمني لا هذال ولا حايل كلها
الهنوف : وخر عني وخر عني انت حتى مارحمت ولد خالتك واخوك بترحمن انا لا والله ما ترحمن
في لحظه غضب ضربها نمر كف وتمنى لو انكسرت يده ما ضربها وانقطع صوت الهنوف بعد صوت الكف
سحب نمر يدينه من كتفها وجمد وهو يتلفت لها كل شوي يبي يعتذر بس مب قادر تقطع قلبه على صوت بكاها ولا في يده حل الا يتحرك
ووصل للبيت والتفت : انزلي
الهنوف : ماني نازله
نمر : الهنوووف انزلي
رفضت الهنوف لكن بعد صراخ نمر نزلت قبل لايذبحها
وطلعت تركض لغرفتها ببكي وجلس نمر وهو حاط يدينه على راسه لكن فز اول ما تذكر ان الهنوف بتتصل في ابوها ركض وهو يسحب الجوال من يدها : وش تسوين !؟ الهنوف : لا تحسب ان مالي سند يا نمر
حط نمر يده على وجهه بضيق وهو يدري الصراخ والضرب ما يحل شي تقدم وهو يمسك يدها وسحبتها اخذ نفس يقول : اجلسي يالهنوف واسمعيني انتي فاهمه غلط
الهنوف : وش افهم!؟ من اي كذبه تبي تبدأ
نمر : اجلللسي واسمعيني واعرفي زين روحه لبيت ابوك ما انتي رايحه لين تسمعيني
وفهمت هالسيره الهنوف وعرفت ان نمر مستحيل يخليها لين تسمع وجلست وهي تبكي : حيل الله اقوى يا نمرر حيل الله اقوى مني ومنك .
مسح نمر وجهه وهو مايدري من وين يبدا لكن مجبور يعترف بكل شي : اسمعيني يالهنوف واعرفي ما نويت الضرر لهذال ابد وكل مافي الامر اني من يوم شفتك حبيتك وحلفت ما يكون لي زوجه الا انتي ورحت لحايل وانا مالي خبر باللي صاير ابد واول ما طلبتك من ابوك قالي كلمتين ( بنتي محيره لولد عمها يتزوجها هو او يزوجها اللي يشوفه مناسب ) وشفت مادام عندي فرصه اروح واكلم هذال لكن هذال رفض ورفضه بسيط ومهزوز ومن الكلمتين الاولى عرفت انه ما يستاهلك وانتي بفسك تعرفين هالشي ، عطيته فرصه وثنتين وثلاث ابيه بس يثبت انه رجال وكفو ويقدر يحمي الهنوف وانا مستعد اتنازل بس ماكان هذال يسوي شي غير انه ينقل لي اخبار بيتكم وعجزت اخليه ياخذك وهو ما يستاهلك وابوك وعمك انا ما كذبت عليهم هم سألوا وجاهم الجواب عني وسلطانه انتي حكيتي بها وعجز ضميري يرتاح وانا المتسبب وساعدت هذال عشاني ابي اساعده مب عشان احد … كمل نمر يشرح لها وشلون ساعد هذال بس هالشي ماغير في صدمة الهنوف شي الا انها وقفت وهي تقول : ودني بيت ابوي يا نمر
ماكان نمر متأمل انه يسمع شي كبير وكان متوقعه رفع راسه وهو ماله حيله الا انه يحتال على الهنوف : واذا رحتي لبيت ابوك وش بتستفيدين وش اصلا بتقولين !!؟ ناظرته الهنوف باستغراب وكمل نمر: بتروحين وتقولين ! نمر اجبر هذال!؟ محد مصدقك وبتقولين هذال يحبني لكن خضع من اول كلمتين وعطاني نمر ! ولا بتقولين نمر اجبر هذال يمثل الحب على سلطانه !؟ وش بتقولين يالهنوف بالضبط ! واذا قدرتي وقلتي وش بتكون ردة فعلهم!؟ سلطانه تتطلق وينخرب بيتها !؟ عمك يذبح هذال!؟ وامك وش بيصير فيها وابوك تهقين بيصدق في نمر!؟ ما هقيت يالهنوف
ناظرته الهنوف بذهول : عمري ما هقيت ان هذا وجهك الثاني
ابتسم نمر بضييق: صدقيني يالهنوف ما عرفتي وجهي الثاني ابد وصدقيني انك انتي الوحيده اللي خسرت معها اشياء كثير وما ندمت عليها ، لا تخربين اللي بنيناه يالهنوف ولو فكرتي بتعرفين اني معي حق في كل شي سويته
ناظرته الهنوف بضيق ماتدري شلون تحكم عليه وهي فاهمه والله فاهمه حبه لها لكن ماهي مستوعبه جنونه
ابعدت وجلست وهي مازالت بصدمتها اما نمر اللي تضايق من وضعه ودخل يبي يتروش يبعد كل شي سيء عنه

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى