رواية ملاكي الصامت الفصل الرابع 4 بقلم صباح عبدالله فتحي
لتصفح الموقع بدون إعلانات (أضغط هنا)
بالليل في غرفة مازن. مازن واقف قدام المرايا ماسك المشط بس مش بيحركه وسرحان في أفكاره. بيسترجع أحداث اليوم ونظرات رياض لصبا اللي مش قادر يتجاهلها. تنهد بزهق وهو بيكلم نفسه.
مازن بزهق
هو أنا مالي النهارده؟ معقولة في يوم واحد حالي يتشقلب بالشكل ده. ثم أنا زعلان ومحروق دمي ليه كده؟ ما هو طبيعي لما نتفصل هتشوف حياتها وده من حقها.
سكت فجأة وبص في المرايا بتركيز وهو بيقول.
مازن
أنا ليه مش قادر أتقبل فكرة إن صبا ممكن تروح لغيري؟ ليه مش قابل راجل غيري يتعامل معاها أو حتى يبص لها؟
تنهد بزهق وهو بيقول بغضب.
مازن
طيب ما ده طبيعي طول ما هي مراتي واسمها مرتبط باسمي.
سكت شوية وبعدين كمل بتفكير أعمق.
مازن
طيب لما نتفصل، هي ممكن تتجوز غيري وتكمل عادي…
سكت شوية وبدأ يتخيل صبا مع رياض وسعداء مع بعض.. قعد على طرف السرير وهو حاطط إيده على راسه.
مازن بزهق
أنا مالي حاسس إني هتجنن من فكرة إنها ممكن تكون لغيري. معقولة أكون بحبها؟
اتسعت عيونه بصدمة وهو بيقول بذهول.
مازن
هو إيه الهبل اللي أنا بقوله ده؟ هو مافيش غير صبا وأحبها؟
_______
في نفس الوقت… في غرفة صبا
صبا قاعدة على السرير لابسة بيجامة وحاطة اللاب على رجليها. بتبص للاب من غير ما تعمل حاجة، باين على ملامحها الحيرة وهي بتكلم نفسها.
صبا
مش قادرة أفهم تصرفات مازن، بقت غريبة، ومش قادرة أفهمه هو نفسه. ومبقتش عارفة أحدد هو عاوزني ولا مش عاوزني؟
بصت ناحية الكرسي بتاعها بحزن وهي بتقول.
صبا بحزن
حتى لو مشاعره اتحركت ناحيتي، هو مستحيل يقبل معاقة تكون مراته. هو واضح معايا من البداية، بلاش أوهم نفسي وأطمع في حاجة مش من حقي، وأحط نفسي في المكان الغلط علشان أنا اللي هتعب في الآخر.
تنهدت بعمق وفتحت اللاب وحاولت تشغل نفسها في أي حاجة علشان ما تفكرش في مازن..
______ بعد أسبوعين
في شقة رياض
رياض قاعد على الكنبة ماسك كوب شاي وهو سرحان.. منه جات وهي بتقول.
منه
أنا جهزت، يلا بينا.
بس رياض فضل زي ما هو كأنه مش سامعها.. منه بصت له باستغراب وقربت منه، حطت إيديها على كتفه.
منه
رياض، إنت سامعني؟
رياض انتبه لها، بصلها باستغراب وهو بيقول.
رياض
خير، مالك يا منه؟ عاوزة حاجة؟
منه قعدت جنبه ومسكت إيده بحب.
منه
خير، مالك يا رياض؟ بقالك فترة وضعك مش عاجبني، في إيه؟ احكي لي، إحنا مالناش غير بعض.
رياض بص لها وسكت شوية وبعدين قال بهدوء.
رياض
بصراحة أنا ناوي أتجوز؟
منه بفرحة
طيب دي حاجة كويسة أوي، ربنا يسعدك، بس هي مين سعيدة الحظ دي؟
رياض
صبا.
منه بصدمة
صبا… صبا مين؟ أوعى يكون قصدك على أخت مازن؟
رياض بضيق
ومالها أخت مازن بس يا منه؟
منه بتوتر
مالهاش يا رياض، بس إنت شايف حالتها بنفسك، ما ظنش إنها ممكن توافق، أو على الأقل بالساهل.
رياض
بصراحة هو ده اللي شاغل بالي، بس معجب بيها أوي، والمشكلة مازن مش سايب لي فرصة أقرب منها، ومش قادر أفهم السبب؟
منه بهدوء
ما هو ده الطبيعي لشخصية زي شخصية مازن، بس… قرب كده اطلبها منه، وتقول لها على مشاعرك وإنك ناوي تدخل البيت من بابه، هتلاقيه هو اللي بيساعدك تقرب منها. مهما كان دي أخته وأكيد يتمنالها الخير.
رياض بتفكير
في رأيك ممكن يوافق؟
__________
في شقة مازن
مازن قاعد على السفرة.. وصبا طالعة من المطبخ حاطة أطباق على رجليها. باين عليها التعب والإرهاق.. قربت من السفرة ورصت الأطباق قدام مازن.. مازن بصلها باستغراب وهو بيقول.
مازن
خير، مالك يا صبا؟ إنتي كويسة؟
صبا بتعب
أيوه الحمد لله كويسة.
مازن
كويسة إزاي ووشك اللي زي الليمونة ده؟ لو حاسة إنك تعبانة قولي، هاخدك أكشف عليكي.
صبا
أنا الحمد لله كويسة والله، هو بس ممكن واخدة شوية برد. هاخد مسكن وإن شاء الله هكون كويسة، ما تشغلش بالك.
مازن بصلها بقلق وهو بيقول.
مازن
متأكدة إنك كويسة؟
صبا بابتسامة
أيوه الحمد لله… هدخل أجهز على ما تفطر علشان عاوزة أنزل معاك الاستوديو.
مازن
هتنزلي إزاي وإنتي في الحالة دي؟
صبا
شوية وهبقى كويسة والله.
صبا اتحركت ودخلت غرفتها، ومازن فضل قاعد باصص ناحيتها بقلق.
_____
في الاستوديو
دخل مازن وهو بيجر الكرسي اللي قاعدة عليه صبا.. قابلتهم منه ماسكة ملف، جريت على مازن وهي بتقول بقلق.
منه
مازن، الحمد لله إنك جيت، كنت لسه هكلمك.
مازن باستغراب
خير، حصل حاجة ولا إيه؟
منه بصت لصبا وبعدين بصت لمازن وهي بتقول بتوتر.
منه
ها… لا، مافيش حاجة، بس كنت عاوزاك في موضوع كده على انفراد لو ممكن.
صبا اتضايقت منها، بس ما حبتش تبين، بصت لمازن بحنق وهي بتقول.
صبا
طيب أنا هدخل اللوكيشن على ما تيجي، عن إذنكم.
صبا سابتهم ومشيت، وفضل مازن واقف باصص ناحيتها، وبعدين بص لمنه بزهق وهو بيقول بهدوء.
مازن
خير يا منه، موضوع إيه ده اللي عاوزاني فيه؟
منه بخجل
بصراحة كنت حابة أتكلم معاك في موضوع مهم، بس مش هينفع هنا، لو ممكن نقعد مع بعض شوية في الكافيتريا تحت.
مازن حك جبينه وهو بيقول.
مازن
بصراحة يا منه مش هينفع، إنتي شايفة معايا صبا وباين عليها تعبانة، مش هينفع أسيبها.
منه
ما تقلقش على صبا، رياض موجود في اللوكيشن معاها.
مازن بدهشة
نعم؟ رياض معاها في اللوكيشن؟ بيعمل إيه؟
مازن ما تحملش فكرة إن صبا تفضل مع رياض لوحدهم، وطلع جري على اللوكيشن حتى من غير ما يسمع رد منه. منه جريت وراه وهي بتقول باستغراب.
منه
مازن، استنى! هو حصل إيه؟
اشترك للحصول على أحدث التدوينات المرسلة إلى بريدك الإلكتروني.
ليس لديك حساب؟ إنشاء حساب
التعليقات (0)
لا توجد تعليقات بعد. كن أول من يعلّق!