رواية جثة سيئة السمعة الفصل الرابع 4 بقلم ياسر عودة
لقراءة الرواية كاملة بدون إعلانات (اضغط هنا)
دي كانت اقوال حلمي، ووقتها رئيس المباحث افرج عنه، بس طبعا كان لسه بيشك فيه لغايه لما توصل التحريات اللى طلبها رئيس المباحث، وكانت نتيجه التحريات دي ان الشرطه اتأكدت من سمعه سهير اللى كانت سيئه جدا، كل اهل المنطقه بيتكلموا عنها بطريقه صعبه، ومالقوش واحد بس شكر في سلوكها، الكل اجمع انها اسوء أم على الاطلاق.
وللاسف ماكنش في أي متعلقات مع سهير لما لقوا جثتها، ولما طلب رئيس المباحث بيان من شركه الاتصالات بأخر ارقام اتواصلت معاها المجني عليها، وقتها الشرطه مالقتش أي دليل في سجل المكالمات، كانت كلها اتصالات عديه جدا، واقتنع رئيس المباحث وقتها ان سهير كانت في علاقه جنسيه مع واحد من عشقها وهو اللى قتالها، واتصور ان عشيقها عرف انها على علاقه بشخص تاني ووقتها قتلها من باب الانتقام لخيانتها ليه، وحتي لما اتعرض ملف القضيه على النيابه، وكيل النيابه رجح نظريه رئيس المباحث، وفي النهايه وصلوا لـ طريق مسدود، وقبل ما يسجلوا الجريمه ضد مجهول لقيت رئيس المباحث طلبني علشان كان عاوزني في موضوع مهم، وطبعا روحتله ولما قعدت معاه قالي:
-ايه رأيك في الجريمه اللى عشتها معانا يوم بيوم، عاوز اعرف وجهه نظرك فيها؟
-الحقيقه واضحه وضوح الشمس يا فندم، وحده سيئه السمعه، ليها علاقات مشبوهه وعشاق كتير، لما كانت في علاقه من العلاقات دي اختلفت مع عاشقها لـ أي سبب من الاسباب، طبعا هي لا كانت مسافره ولا حاجه، واحتمال عشقها يكون زي ما حضرتك اتوقعت اكتشف ان ليها علاقات غير شرعيه كتير وقرر ينتقم ويتخلص منها، ودا اللى حصل قتلها واتخلص من جثتها في مشروع الصرف الصحي.
لقيت وقتها رئيس المباحث بيقولي:
-مع ان دا استنتاجي بس مش عارف ليه جوايا حاجه مش مريحاني، وعلشان كده انا طلبتك، عاوز منك تعمل حاجه يمكن تجيب نتيجه وتساعدنا اننا نلاقي اللى قتل المجني عليها.
-انا تحت امرك، شوف حضرتك عاوز ايه وانا هنفذه.
-عاوزك تنشر قصه سهير في كل مكان، مش بس في الجريده اللى انت بتكتب فيها، لا عاوزك تنشرها في كل الجرايد الاليكترونيه، وكمان على مواقع التواصل الاجتماعي، وكمان حط صورتها في المنشورات بتعتك، انا عاوز كل الناس تعرف حكايتها.
-عنيا يا فندم دي حاجه سهله بالنسبالي اوي، اعتبرها طلعت ترند خلاص، بس ممكن اعرف انت عاوز تعمل كده ليه؟
-لما انت تنشر صورتها وقصتها، وقتها يمكن حد يعرفها او شفها في مكان يبلغ ويقول أي معلومه، ويمكن وقتها نقدر نوصل للجاني اللى قتلها.
-فهمتك يا فندم، وهنفذ اللى حضرتك عاوزه طبعا، بس كان عندي سؤال لو ينفع تجاوبني عليه.
-اسأل انا سمعك؟
-انت ليه عاوز توصل للقاتل بالاصرار ده، حضرتك اتأكدت من قصتها والحقيقه انا شايف انها تستاهل اللى جرالها، ودي النهايه الطبيعيه ليها، ليه انت مصمم توصل للقاتل بالشكل ده؟
-علشان جوايا حاجه بتقولي الحقيقه ناقصه، مع ان الكل اجمع على سمعتها زي ما انت بتقول، وحتي امها اللى كنت عاوز استجوبها بس للاسف دخلت في غيبوبه ومافيش حد عارف هي هتفوق امتي، بس انا جوايا حاجه بتقولي لسه في حقيقه ناقصه، علشان كده بحاول بأي طريقه بشوفها، يمكن وقتها الحقيقه الكامله تظهر.
-تمام يا فندم، انا فهمت حضرتك، ومن النهارده البلد كلها هتلقيها بتتكلم عن سهير واللى حصل معاها.
وخرجت من مكتب رئيس المباحث علشان انفذ اللى طلبه مني، مع اني ماكنتش مقتنع نهائيا بكلامه، ومقطنع ان الحقيقه كلها ظهرت، وبالنسبه للقاتل اكيد هياخد جزاءه حتى لو الشرطه ماوصلتش ليه، ومن يومها وابتديت انشر قصه سهير، وفعلا زي ما وعدت رئيس المباحث خلال 72 ساعه بس كل الناس كانت بتتكلم عنها، وبعدها حصل اللى عمري ما كنت اتخيله، لما لقيت واحد بيتواصل معايا عن طريق صفحه الفيس ولقيته بعتلي رساله كاتبلي فيها:
-حسبي الله ونعم الوكيل فيك، انت سوءت سمعه وحده بين ايادي ربنا، اوعي تفتكر انك هتفلت باللى عملته، حق الست الشريفه دي ربنا هيجبهلها منك ان شاء الله.
الرساله دي مش بس خوفتني، الحقيقه هي خلعت قلبي من مكانه، وطبعا اتواصلت مع الشخص اللى بعت الرساله، وكان من الاسكندريه، وطلبت منه اني اقابله وهو وافق، وعلشان كده انا سافرت للاسكندريه علشان اقبله هناك، وقابلته فعلا وكان اسمه صابر، وسنه حوالي 55 سنه، ولما سألته عن علقته بـ سهير صدمني وقالي:
-سهير كانت مراتي على سنة الله الله ورسوله.
طبعا انا اتصدمت لما قالي كده، وسألته:
-يعني ايه كانت مراتك، وليه مافيش حد من اهلها كان يعرف ده؟
وقتها الاستاذ صابر ابتدي يحكي اغرب حكايه ممكن اسمعها وقال:
-سهير الله يرحمها انا قابلتها في عياده دكتور كانت شغاله فيها، دا طبعا قبل ما اتنقل للاسكندريه، واول لما شوفتها عجبتني، لقيتها مخلصه في شغلها، اصلها كانت شغاله ممرضه، ومع ترددي على عياده الدكتور ده كنت بقابلها كتير وبنتكلم مع بعض، حكتلها عن عيالي اللى علمتهم احسن تعليم وفي منهم اللى مهندس بترول واللى شغال محاسب ومسافر بره البلد، حتي بنتي الوحيده اتجوزت جوازه كويسه اوي وسفرت مع جوزها للسعوديه، وكلهم سابوني لوحدي بعد ما امهم ماتت.
كنت بحكي لـ سهير وهي بتبتسم وبتقولي:
-معلش يا عم صابر، ربنا مش هينساك.
ومع الوقت حسيت ان كلمها مظبوط، ربنا مش هينساني وبدليل انه بعتلي سهير، وابتديت افكر اني اتجوزها، اصلها في مره قالتلي انها مطلقه، وفعلا فاتحتها في الموضوع وقولتلها:
-عارف ان فرق السن كبير، بس انا عاوز اقولك انك هتبقي مراتي وبنتي، وربنا يقوميني واسعدك، لو وافقتي تتجوزيني هعيشك احسن عيشه.
وقتها سهير حكتلي كل حاجه عنها، وقالتل:
-انا كنت متجوزه من ابن عمي، كنت بحبه وهو بيحبني، وخلفت منه احلى هديه من ربنا بنتي حبيبه، وكانت العوض ليا من بعد موت ابويا، وحلمي جوزي من بعد موت ابويا اتغير، قفل الورشه بتعته من كتر الديون، اصله ادمن المخدرات، وصرف عليها كل فلوسه، وكل مره اطلبه يبطلها يضربني ضرب موت، وبعد ما يفوق يعتذرلي.
المفروض أي وحده زي لما ابوها يوت اخوتها الرجاله يبقوا في مقام ابوها، بس انا اخواتي ماطلعوش كده، كانوا طمعنين في ورثي، بابا لما مات ساب عماره 10 ادوار دا غير بيت العيله اللى احنا قاعدين فيه، واخواتي مابيدونيش أي فلوس من ايراد العماره مع انه حقي الشرعي، ولما طالبتهم بيه قالوا ان اللى بيطلع من العماره يدوب على قد مصاريفها، وطبعا هما بيكدبوا لان ايجار العماره كتير اوي، ورغم كده استحملت وطلبت منهم يطلقوني من حلمي، بس رفضوا وكانوا متفقين معاه عليا، كانوا خايفين لو اتطلقت منه واتجوزت حد تاني يقفلهم ويطالب بحقي، بس حلمي على قد ايديهم، وبيدوله المخدرات اللى محتاجها، دوول كانوا بيشتروها مخصوص علشانه.
بس انا مسكتش وطلعت اتعلمت التمريض واشتغلت في العياده دي، ووكلت محامي ورفعلى قضيه خلع واتطلقت من حلمي، كانت صدمه ليه وـ اخواتي كمان، وضربوني وبهدلوني بس انا مافرقش معايا، وحكموا عليا اني عمري ما اخد بنتي من حضن امي، علشان يضمنوا انهم يمسكوني من ايدي اللى بتوجعني، وحكموا عليا اني مافكرش في الجواز ابدا، اما حلمي فـ مقدرش انه ينسي اني خلعته، ومن وقتها كل اللى بيعمله انه بيسوء سمعتي وقال عني كلام مافيش حد يقوله على ام بنته، ومش بس كده دا نشرلي صور وانا بلبس النوم لما كنت مراته وفي شقته على اساس انها صوري من بعد ما اتطلقت، ووزعها على كل اهالي المنطقه، ولما قولت لـ اخواتي طلبوا مني ارجعله، وفهمت بعدها ان هما كانوا متفقين معاه على كل حاجه.
ــــــــــــــــــــــــــــــــــــــــــ
ولما قالتلي سهير على كل ظروفها انا فضلت عارض عليها الجواز، وقولتلها اني هصرف عليها وعلى بنتها، ولقتها وفقت بس بشروط، اول شرط اننا نتجوز رسمي بس من غير ما نعلن ده، وكمان ان انا انقل لابعد مكان وهي هتجيلي كل فتره، ووافقت على كلامها، وكانت بتجيلي تقعد معايا اسبوع او اسبوعين في الاسكندريه اللى نقلت ليها، وكانت مفهمه اهلها انها بتروح تشتغل في مكان بعيد وبتقبض مبلغ كبير اوي، واخواتها ماهتموش مدام مابقتش تطالبهم بورثها، لغايه لما بطلت تجيلي، وكنت خايف اتص بيها علشان مافيش حد من اهلها يسمعها وهي بتكلمني، ولما غابت لفتره طويله حسيت انها زهقت مني وعلشان كده بطلت تجيلي او حتى تتصل عليا، وفضلت على الحال ده لغايه لما شوفت صورتها اللى انت منزلها والكلام اللى كتبه عنها.
ــــــــــــــــــــــــــــــــــــــــــــــــــ
وبعد ما خلص الاستاذ صابر كلامه انا خدته وسافرنا على طول، كنت لازم اقدمه لـ رئيس المباحث، وحكاله كل اللى يعرفه، وقتها تم القبض على اخوات سهير وكمان على طليقها، وفي البدايه انكروا كل الكلام اللى قاله الاستاذ صابر، بس رئيس المباحث ماصدقهمش، وفي النهايه اعترفوا اسوء اعتراف ممكن تسمعه، انهم اتفقوا الاخين مع ابن عمهم انهم يقتلوا سهير، والسبب لانهم عرفوا انها متجوزه، واللى عرف كده حلمي طلقها لما راقبها في مره من المرات، ولما عرف الحقيقه راح ليهم وقالهم ان اختهم اتجوزت وقالهم انها اكيد هتعمل معاهم زي ما عملت معاه، هترفع عليهم قضيه وتاخد حقها، خصوصا انها اتجوزت وبقى معاها فلوس لانها اتجوزت واحد مرتاح مديا، وهما اقتنعوا بكلامه وانتظروها لما ترجع من السفر، وفعلا لما رجعت مالقتش امها او بنتها، وماكنتش تعرف ان اخوتها سفروهم عند قرايبهم من ناحيه الام بحجه انها تغير جو وخدت معاها الطفله، واستفردوا بـ سهير لوحدها وكان حلمي هو اللى طعنها اكتر من مره، وبعدها اخواتها سعدوه انهم يتخلصوا من جثتها ورموها في مشروع الصرف الصحي.
ــــــــــــــــــــــــــــــــــــــــــــــــــ
رغم ان القضيه خلصت بس انتم مش متخيلين المعاناه الصعبه اللى عايشها بسبب الكلام الصعب اللى كتبته عن وحده كانت محترم زي سهير، والحقيقه ان مش عارف ازاي اقدر اكفر عن اللى عملته، للاسف انا ماكنتش شايف الحقيقه واتسرعت وكتبت كلام من غير ما اتأكد منه، وحقيقي الندم بياكل فيا كل يوم ومش عارف اعمل ايه.
تمت..
اشترك للحصول على أحدث التدوينات المرسلة إلى بريدك الإلكتروني.
ليس لديك حساب؟ إنشاء حساب
التعليقات (0)
لا توجد تعليقات بعد. كن أول من يعلّق!