رواية جيرانا الفصل التاسع 9 بقلم حميدة عبدالحميد

رواية جيرانا الفصل التاسع 9 بقلم حميدة عبدالحميد

 

 

البارت التاسع

 

#جيرانا9
#حميده_عبدالحميد
أيوب قال ليها يعني كلام سندس صح؟ انتي ما من البشر قالت ليو اي٠٠ انا اسمي سوليث من عالم الجن العاشر وكاليث من عالم الجن التاسع بس انا ما ح أذيكم فعشان كدا امشو معاي من دون ما تسألو من شي. ٠٠٠ أيوب رجع خطوة ل ورا لحدي م بقي قصادي في نقطة وحدة عاين لي وقال سندس قلت ليو اها قال لي اجري ٠٠٠
بلعت ريقي وبديت ارجع وارجع وارجع لحدي م اتلفته قدامي وجريت جريه وحدة قبلت وراي ولقيت أيوب برضو جاري وكان حريص انو م يفوتني ٠٠٠ وانا من شدة الخوف كنت جاريه جرى مجنون ياخ اول مرة في حياتي اجري زي دا كنت طايرة طير عديل ٠٠٠٠ رجعت والتفته تاني وشفت ميادة واقفه في مكانها وما اتحركت خطوة ولا فكرت تلحقنا زاتو ٠٠كانت بتعاين لينا بنظرات كلها تأكيد وكانها بتقول لينا مهما جريتو مصيركم ح ترجعو لي رفعت صوتي وانا جاريه وقلت لي أيوب
مالها م لحقتنا ي أيوب شكلها ح تختفي وتظهر. لينا فجأة انا خايفه كتير٠٠
قال لي انتي بس اجري وم تفكري فيها وشكلها استسلمت خلاص
قلت ليو طيب زوت من سرعتي ويمكن قريب النص ساعة نحنا جارين لحدي م قوتي خلاص اتلاشت وبقيت م قادرة اجري اكتر من كدا بركت رجولي في الأرض ونفسي طالع ونازل من تعب الجري
أيوب وصلني وقال قومي ي بت م تقيفي رديت ليو بنفس متقطع ٠٠
ما قادرة اجري ي أيوب خلاص فترته انا. مافيني حيل تاني
قال لي تمام ح نرتاح شويه ونواصل وبقا يتلفت يمين وشمال لحدي م لمح شجرة كانت قايمة في طرف جبل صغير كدا قال لي تعالي نقعد هناك ونرتاح
استجمعت قوتي وقمت بتكاسل وقبل امشي عاينت وراي وكان ماف اي أتر لي ميادة
مشينا وقعدنا في الأرض أيوب قال لي ح نرجع بنفس الطريق الجينا بيهو اول واكيد ح نصادف الباص الجابنا هنا قلت ليو بس أهلنا!! قال لي انتي للان م فهمتي لعبتهم؟ همم م عندهم علاقه ب أهلنا هم عايزننا نحنا انا وانتي وهمم اختارونا من بين مليون الف شخص قلت ليو م فهمت؟ قال لي هم ما بيقدرو يحبسو أهلنا اكتر من كدا ولو صحي بيقدرو يسحبوهم ل عالمهم كان سحبونا انا وانتي من دون الجرجرة والكلام الكتير دا ٠٠٠ واحتمال كبير أهلنا يكونو قاعدين في البيت وهم عملو لينا سحر أو خدعة بصريه ٠٠٠
قلت ليو انت متأكد؟؟ قال لي م عارف بس دا تحليلي وان شاء الله يكون صح
غمض عيوني وم قدرت اسيطر على دموعي بقيت ابكي بشدة وفي نفس اللحظه بديت اتكلم وقلت
يعني خلاص دي نهايتي؟؟ حتي الموت م ح اموت موتة محترمة ولي يختارونا نحنا بذات؟. انا لسه عندي أهداف كتيرة م حققتها انا عايزة اتخرج من الجامعة وإشتغل واعرس واجيب أطفال يحبوني واحبهم انا م عايزة نهايتي تكون كعبة كدا ٠٠
ايوب ابتسم بقهر وقالي م تبكي ووعد مني ح اطلعك من هنا وح تحققي كل أحلامك
ملامح اليأس بانت في تفاصيل وشي قلت ليو كيف؟ انت براك شايف نحنا ف موقف صعب قدر شنو!! وما معروف ال ح يصادفنا في طريقنا شنو أو ح يحصل لينا شنو
اتقدم خطوه وبقا قصادي وقال
طيب انا اديك سبب عشان تعيشي عشانو وعشان تحاولي انو تتطلعي من المكان دا وم تستسلمي أو تيأسي
. قلت ليو م ظنيت حيكون في سبب يخليني أحاول اكتر من كدا وانا فقدت الأمل خلاص
قال لي طيب اسمعي كلامي
حتى انا عندي احلام كتيرة بس في حلم كبير ونفسي أحققو وهو بيشبه حلم من أحلامك برضو ٠٠٠
استغربت شديد وقلت ليو ويلي هو؟
قال لي انو اتزوج ويكون عندي أطفال واسرة حلوه اهتم بيها واحبها وادللها وتكون كل محور حياتي اتعب عشانههم وأعمل ليهم المستحيل
قلت ليو ربنا يحقق ليك حلمك
قال لي بس انا داب بديت احقق حلمي واذا انتي بتقبلي بي اكيد ح احاول بكل قوتي وا اول م نطلع من هنا نحقق حلمنا مع بعض
ابتسمت وقلت ليو بس م ظنيت نطلع
قال لي اتفاعلي بالخير ي بت الناس وأظن دا سبب كافي عشان يخلينا نحاول ابتسمت بعفويه وقلت ليو طيب قال لي يعني م عندك مشكلة فيني؟ قلت ليو م عارفه قال لي خلاص ح اعتبرك موافقه ٠٠٠
وقبل ارد ليهو فجأة الواطه ضلمت ، ارتعبت وبصوت مخلوع قلت لي ايوب بسم الله كيف الضلام دا جا فجأة كدا؟ قال لي م عارف بس شكلو في حاجه غطت السماء وقبل تضلم زيادة اقطعي قطعة طويلة من طرف طرحتك قلت ليو لي؟ قال لي سريع اسرعي ماف زمن ٠٠٠٠
رفعت طرف طرحتي ب ارتباك وطلعت منها سريحة كبيرة لفيتها واديتها ليو والجو كل مرة ماشي يضلم اكتر شال القطعه مني وربط الطرف الأول في يدو ومدا لي الطرف التاني وقال لي اربطي في يدك برضو قلت ليو لي قال لي الجو ضلم ونحنا م معانا كشافه أو حاجه نضوي بيها وانا م بقدر امسك يدك فعشان كدا دا انسب حل وعشان م تضيعي مني وم عارف ممكن يحصل لينا شنو في الضلام دا٠٠٠ ابتسمت وربطه الطرف التاني في يدي
قال لي يلا ارح نواصل طريقنا
اتحركنا وهو بقى ماشي قدامي وانا وراهو ٠٠٠
الرؤيا بنسبه لينا بدت تختفي خلاص والظلام بقا هالك لدرجة م بتشوف شي غير الخيوط البيضاء البتظهر في الظلام
أيوب سحب يدو وقال سندس؟
قلت ليو نعم قال لي عايز اطمن انو انتي موجودة جنبي قلت ليو اي قاعدة بس هسي ح نعمل شنو ؟
قال لي ح نقيف وننتظر لحدي م الشي دا يمشي قلت ليو تمام
قعدنا في الأرض وبقينا حارسين الضلام يختفي ٠
عدت ساعة كاملة يمكن ونحنا ع نفس الحال
هنا بديت اسمع الأصوات ديك تاني وزادت عليها أصوات تسنين سكاكين في صخور أو حاجه صلبة ٠٠ ضغط على اذني تاني لانو الأصوات دي بتخليني اعيش حاله نفسيه عجيبه
ولاحظت للقطعه بقت مرخيه سحبتها وجاتني للنهايه وشكلها اتفكت من يد أيوب
رفعت راسي بقلق ٠٠٠
أيوب؟ بسم الله أيوب فات وين؟
علييت صوتي وبقيت انادي
ايوب وين انت!!!
بس ماف اي رد منو٠٠
معقولة أيوب حصلت ليو حاجه؟
بقيت ابكي وانا بنادي لسه في أيوب بطريقه غير مباشره
أيوب أيوب أيوب وين انت لاحول ولا قوة الا بالله
أيوب عليك الله م تخليني هنا براي ٠٠
منظري كان بيحنن ويبكي الكافر عديل٠٠٠
وفجأة ظهرت عيون كبيرة لونها أحمر زي لون الدم
شهقت ب اخر نفس ومسكت اتجاه قلبي وبديت ارجع خطوة ل ورا وهي برضو بتجي خطوة لي قدام كل م ارجع هي بتزحف اتجاهي ٠٠٠
وبديت اسمعمع أصوات وهمهمات من بعيد لحدي م حسيت بي.مادة لزجة في اضاني ومصحوبه بصوت خافت وهو بيقول سُن٠٠٠٠٠ ويسكت تاني يقول سُن ٠٠٠٠ويسكت لحدي م قالها بطريقه مُتقطعه
سُـ نـ د سـ وتاني بقي يقولها بطريقه سريعه
سندس
سندس

 

سندس
سندس
قفلت اضنيني بيدني وبقيت اصرخ وفي نفس اللحظة غمضه عيوني بقوة وشلت الشهادة خلاص ٠٠٠
بس فجأة سمعت صوت أيوب
لكن حسيتها لعبة وابيت افتح عيوني
الصوت تاني اتكرر ي بت سندس افتحي عيونك انا أيوب
بديت افتحهم تدريجيا لحدي م فتحتهم كلهم وشفت أيوب واقف قدامي.
حسيت بفرحه عجيبه وبقيت أحمد الله ابتسم وقال خُفت افقدك تصدقي؟
قلت ليو مشيت وين؟ قال لي اثناء م انا قاعد قدامك في حاجه سحبتني بس اتغلبت عليها ب ايه الكرسي ٠٠ كنت بردد فيها كتير وتاني فكتني ٠٠ طبعا الواطه فتحت خلاص
شلت نفس ب اخر حيل عندي وقلت ليو انا برضو في حاجه ظهرت قدامي وكان في شي بيتكلم في اضاني قال لي نحنا لازم نطلع من المنطقة دي قلت ليو تمام
قمت من الأرض واتحركنا بس كنت م قادرة انسي الشي الحصل لي. دا ودخلت فيني خلعة م ظنيت ح تطلع مني تاني ٠٠
من بعيد لمحنا زي مرا عجوزة كدا قاعدة في الصقيعه ٠٠٠٠أيوب قال لي اقيفي وقفت وقلت ليو دي انسانه؟ قال لي شكلها بيوحي كدا لكن م ظنيت ٠٠ قلت ليو نغير الشارع قال لي لا ح نمشي ليها وحاسس انو ح نلقى حل من عندها قلت ليو بس قال لي ارح نجازف ونجرب حظنا قلت ليو تمام مشى قدامي وانا لحقتوا لحدي م وقفنا قدامها رفعت راسها بتكاسل وقالت اهلين أيوب وسندس ٠٠٠
يتبع ٠٠٠

• لقراءة باقي فصول الرواية أضغط على (رواية جيرانا)