رواية جيرانا الفصل السادس 6 بقلم حميدة عبدالحميد

رواية جيرانا الفصل السادس 6 بقلم حميدة عبدالحميد

 

 

البارت السادس

 

#جيرانا6
#حميده_عبدالحميد
بعد ما الباص اتحرك رفعت راسي ولاحظت للباص ماشي بدون سواق ومن هنا عرفت انو نحنا قاعدين وسط الجن والباص ماشي بينا لي عالمهم ٠٠
رجعت وقعدت تاني وحرفيا كل خوف العالم كان ف قلبي و أيوب برضو ظاهر عليهو خايف بس عامل فيها متماسك وميادة كانت عاديه جدا وثابته ونهائي م باين عليها خايفه أو كدا. ٠٠٠٠
الباص فضل ماشي في الفراغ مسافة ٢٠ دقيقه لحدي ما وقف ودخلنا مدينة كانت شبه عاديه و مُحاصرة بكمية من الجِبال وهي كانت في النص. والجبال كانت عاليه شديد وسكانها م باين عليهم من الجن أو كدا بالعكس مظهرهم كان بيوحي انو هم ناس عاديين بس الشي الخلاني استغرب ٠٠
انو رغم تدفق الكم الهائل منهم ماف حركة ضجة في المدينة والمفروض كان يكون في حركة سير ل خطواتهم أو انفاسهم أو أصواتهم حتى كلام ساي م بيتكلموا عاينت لي أيوب وكان مستغرب اكتر مني هنا البت المعانا الاسمها ميادة قالت لينا عارفه انو انتو مستغربين حاليا٠٠٠ ونحنا لسه م دخلنا البؤرة الكبيرة ل عالم الجن بل دي نقطه صغيرة شديد ل تجمعهم وحاليا هم مُختلطين مع البشر وزي م انتو عارفين
انو الجن بتعيش اكتر شي في الجبال والمناطق المهجورة والمنطقه النحنا فيها دي اول شي ملانة جبال وثانيا سُكانها كانو فاسدين شديد وما ظنيت في زول هنا قعد يصلي فعشان كدا اعملو حسابكم وما كل زول موجود هنا ممكن يكون من البشر وقبل تتم كلامها جا هوا بارد شديد ووقتي حسيت برجفه وجسمي كلو كشا ٠٠٠ ٠٠٠٠
أيوب قال لينا حسيتو بالشي الحسيت بيهو انا؟ هزيت راسي بسرعة وقلت ليو اي.
ميادة قالت لينا. غالبا ديل شفهم بيلعبوا المهم ح نواصل طريقنا ورفعت يدها قُصاد جبل كبير كان واقف على مسافة بعيدة شديد مننا وقالت ٠٠٠
الجبل دا ح يكون وجهتنا الأخيرة ومنها ح نوصل مكان هي عايزه مننا . قلت ليها وانتي عرفتي كيف وقصتك شنو بالضبط؟ ابتسمت ابتسامة باهتة وقالت ح تعرفي كل شي ل قدام بس انتي م تتسرعي ومشت قدامنا
أيوب قال لي م تشفقي وزي م قالت ليك ح تعرفي كل شي ضحكت وقلت ليو انتو بتهظرو اكيد؟ نحنا حاليا ماشين نسلم روحنا ؟ وانا ما عارفه البت دي جايبه البرود دا كلو من وين؟؟
م اشتغلو بي ٠٠
واتحركنا مشينا كم خطوة وهنا البت تاني وقفت وبدت تتفحص المكان بعيونها لحدي م قالت ح نبيت هنا وبكرة نتحرك قلت ليها السبب؟ قالت المنطقه حتكون خطرة شديد وحاليا الجن عندهم اجتماع رفعت راسي وبقيت اعاين مسافه في الجبل ٠٠ كان شبه مضوي قلت ليها وانتي بتعرفي الحاجات دي كلها من وين عاينت لي بنفس النظرات ومشت لحدي م وقفت تحت شجرة قعدت تحتها وغطت وشها بطرف طرحتها واحتمال كبير تكون نامت. ايوب قال لي شكلها هي قنعت من الدنيا خلاص عشان كدا عندها لا مبالاة المهم ارح نمشي ونقعد
اتحركنا عليها وانا قعدت على مسافه من ميادة وايوب قعد بالجهة التانيه.
موضوع انو انوم دا موضوع شبه مستحيل أو مستحيل لانو انا والنوم اتفارقنا فراق أبدى من يوم ظهرت الشيطانه دي في حياتنا . ونظري كلو كان في المنطقه دي
إبتدت حركة الناس تقل تدريجيا لحدي م اختفت كُليا والقمر طلع مكتمل وضو كان ساطع لدرجة ممكن تقرأ فيهو كتاب عديل حاولت اغمض عيوني بس م قدرت ٠٠٠ والجماعه ماشاءالله نايمين نوم عميق بجد عايزة اعرف جايبين البرود. دا كلو من وين ٠٠٠
عدت ساعة وساعتين وتلاته وانا على نفس حالتي وفي نفس قعدتي لحدي م الشمس بدت تشرق تدريجيا. كنت فاقدة ناس امي شديد وطول الوقت كنت بفكر فيهم وح يكون حصل ليهم شنو زي الوقت دا يارب ٠٠
لحظات بس وسمعت صوت أيوب وهو بيقول لي٠٠ معقوله م نمتي!! رفعت حاجبي ب استنكار وقلت ليو انوم كيف؟ ونحنا ف مكان زي دا ٠٠ميادة صحت على صوتنا وقالت ح نواصل يلا ارح قلت ليها عطشانه عايزة موية قالت لي حاليا م بنصحك تشربي من المويه الموجودة هنا أو تاكلي من اكلهم لكن لو مشينا قدام شويه ف بير ومويتها صحيه شويه قلت ليها تمام قمنا من الأرض وكل زول لبس شنطتو حقت الضهر. واتحركنا
من بعيد لمحت شجرة الزونيا الكانت في بيتنا الرحلنه فيهو وقفت وانا متعجبه أو شبه مصدومه. أيوب برضو وقف ولاحظ للشجرة وكان تركيزو كلو فيها.
ميادة شكلها فهمت علينا ٠٠ اتنهدت وقالت اي دي ياها نفس الشجرة الشفتوها في البيت الاجرتو وهي اصلا موجودة هنا ودا مكانها الأساسي والشفتوها هناك دي خيال ليها بس أو خِدعة من الشيطانه ديك عشان تستدرجكم و اول زول يمشي عليها ح يكون هو هدفها ٠٠٠ قلت ليها. بس حسب كلامها قالت انا ضربت ليها ولدها وكشحت فيهو المويه؟ ضحكت وقالت لي دي برضو خدعة منها وعلى العموم ح تعرفو كل شي لمن نوصل٠٠
أيوب قال ليها وانتي بتعرفي الحاجات دي كلها من وين ي ميادة؟
عاينت ليو ببردو وقالت ليو انا كلمتك وقلت ليكم مشكلتي مختلفه صح
وزحت من قدامنا وقالت ارح
وقفت في محلي بثبات وقلت ليها لأ م ماشه معاك شبر لحدي م تورينا انتي منو لانو انا بجد بقيت شاكة فيك ٠٠٠
يتبع ٠٠٠

 

• لقراءة باقي فصول الرواية أضغط على (رواية جيرانا)