رواية جيرانا الفصل الخامس 5 بقلم حميدة عبدالحميد

رواية جيرانا الفصل الخامس 5 بقلم حميدة عبدالحميد

 

 

البارت الخامس

 

رفعت صوتها وقالت لي ناس امك حجزتهم خلاص وتاني ما ح تشوفيهم ٠٠٠
بحلقت عيوني وحاولت استوعب كلامها قلت ليها شنو؟ حجزتيهم وين!! ٠٠
قالت لي حجزتهم في عالم الجن وحاليا هم فاكرين نفسهم قاعدين في بيتي وانا اساسا م عندي بيت وبيتي هنا في شجرة الزونية واي زول رحل في البيت دا يتحمل الشي ال ح يحصل ليهو٠٠
اضاني عملت صنننننن وحسيت بتقل في راسي قلت ليها نحنا اذيناك في شنو؟ وانتي لي عايزة تضري اهلي طيب انا الرشيت المويه في ولدك طيب اقتليني والموضوع انتهى بس انتي خلي ناس امك في حالهم رجعت وضحكت بنفس الأصوات المُختلطه وقالت لي م بقدر اقتلك الا اذا سحبتك لعالمنا وعشان انتي محصنه ف انا للان م قادرة ليك بس لابدا يجي يوم واقدر ليك وانتي لو عايزة أهلك يرجعو ليك قدامك تلاته يوم بس لازم تمشي القرية (..1..) وح تلقى باص مكتوب فيهو 490 والباص دا رُكابو كلهم من الجن وانتي ح تركبي في الباص دا وهو ح يجيبك هناك وانا ح اكون حارساك واتأكدي انا ح بلحقك في اي مكان ممكن تمشي عليه ومستحيل اخليك في حالك ٠٠٠ وبالنسبه لي ابوكي هو حاليا راكب باص برضو والباص دا ماشي بيهو في متاحه وكل مرة ح يرجعو لي نفس النقطه يعني ماف طريقه توصلي لي ابوكي برضو

٠٠٠ وبدت ترجع لي ورا لحدي م انقبلت كديسة سودا سواد داكن اتسلقت فوق الشجرة لحدي م اختفت من نظري ٠٠٠
كنت واقفه مصدومة والحاجات البتحصل لي دي لو كان زول تاني في مكاني كان جّن زمان ٠٠٠ اتحركت بخطوات ثقيله وحسيت بعقلي ح يطلع من مكانو في اي لحظة رفعت التلفون عشان اتصل لي ميعاد بس اتفاجات بكل أرقام ناس بيتنا ممسوحه ٠٠ واتمسحت كيف ومتين م عارفه .، رجعت وكتبت رقم ميعاد تاني ولمن احاول اتصل يجيني 490 الحاجه دي حتجنني بجد ٠٠ جريت وفتحت باب الشارع وبقيت الف زي المجنونة لحدي م ظهر لي نفس الشاب داك وقف وبقا يضحك حمرت ليو وقلت ليو مجنون انت؟؟ ضحك زيادة وقال لي انا موش قلت ليك م تجي جنب البيت دا وانتي م سمعتي الكلام، بقيت ابكي وقلت ليو انت إنس ولا جن؟ دخل يدو في جيبوا وقال بكل هدؤ ٠٠٠
انا اسمي أيوب ورحلنا للمنطقه دي قبل تلاته يوم بالضبط ورحلنا في بيتكم دا زاتو كُنا أسرة حلوه شديد ابوي وامي واخواتي الاتنين وا اول يوم رحلنا فيهو جاتنا مرة ومعاها بناتها الاتنين وقالت اسمها فدوى وهم جيرانا بالجهة التانيه٠٠٠ ونسة مع ناس امي وانا نهائي م ارتحت ليها وشكيت في أمرها بس ناس امي م انتبهو للنقطه دي ٠٠ وبعد م طلعت قررت استكشف وراها واشوف قصتها شنو. وفعلا مشيت بيتهم ودا حسب وصفها لي ناس امي وصلت و كنت واقف جنب الباب والباب كان مطبول وظاهر عليهو مهجور ليو سنين استغربت وقلت في سري طيب هم جو من وين؟ لحدي ما جاني راجل عجوز راكب عجلة وشايل حزمة جرجير وقف وقال لي ي ولدي البيت دا مهجور واسيادو ماتو ليهم ٨ سنة، ارتعبت وخفت شديد، طوالي رجعت بيتنا ولمن وصلت لقيتهم قاعدين وقالو عايزين يتغدو مع ناس امي، ولاحظت لي نظراتهم لي كانت غريبه، استنيتهم لمن اتغدو وبعد م طلعو حكيت لي ناس امي بقتصهم بس ماف زول صدقني وطلعوني مجنون وعايز رقيه ومن داك بدت مُعناتي كنت بشوفها بالليل ومرات بسمع أصوات طبول وجنازير طالعه من جوا الشجرة ٠٠
لحدي ما جا اليوم الشوم وناس امي قررو يمشو ويشربو معاهم الجبنه ولمن رجعت البيت لقيت ابوي قاعد في الكرسي تحت شجرة الزونية سلمت عليه بس رفض يتكلم معاي. استغربت شديد وقلت ياربي ابوي مالو مشيت ووقفت قدامو واتفاجات بي وشو ممسوح تماما، وهنا بدت تطلع منو أصوات وقهقهات مختلطه كأنهم مجموعه وفي النهايه طلعت دي نفس المرة الاسمها فدوى وكانت منتحله شخصيه ابوي. بدت تتكلم معاي وقالت لي انو هي حجزت ناس امي في عالمهم وبشرط واحد ممكن تفكهم الا اذا انا مشيت لي عالمهم وادتني رقم باص وقالت لي اليوم الفلاني لازم امشي القرية (1) وح القي باص والباص دا رُكابو كلهم من الجن ح اركب معاهم وهو ح يوديني عالمهم ومن وقتها وانا حاسس نفسي م نصيح٠٠٠
سرحت مسافه وقصتو طلعت نفس قصتي وحرفيا في جُزء من النص مفقود ٠٠٠ قلت ليو وح تمشي؟ قال لي اكيد بس البيت دا إذا دخلو اي زول ح يواجه نفس المصير حقنا . والراجل العجوز داك برضو من الجن أو احتمال كبير تكون هي زاتها وهي أول خطوة انو تعمل للإنسان رعب نفسي ٠٠ وبعدين تضرب ضربتها القاضيه ٠٠٠

سكته وم عرفت اعمل شنو حرفيا حاسه نفسي عايشه في حلم أو خيال حاجه كدا م بتتصدق قلت ليو ورقم الباص كم؟ قال لي 490 قلت ليو نفس الرقم حقي ٠٠٠ طيب انا ح امشي معاك أو ممكن توصف لي القريه لانو انا م بعرفها قال لي تمام موعدنا بعد صلاة العصر وفي بت تانيه ح تمشي معانا برضو قلت ليو ويلي هي؟ قال لي اسمها ميادة ودي قصتها طويله وح تعرفيها فيما بعد المهم انتي جهزي نفسك واتحصني قدر م تقدري لانو م معروف يا طلعنا ي عشنا بلعت ريقي وقلت ليو تمام عاين لي ٠٠ واتحرك من قدامي وفات ٠٠
دخلت جوا البيت وصليت الظهر وطلعت شنطة ضهر صغيرة دخلت فيها كل مستنداتي والمفروض م اشيل معاي حاجات زي دي وخصوصا وانا ماشه نحو المجهول بس ماعارفه جايبه القوة والثبات دا كلو من وين. وناس امي لو صدقوني من البداية كان دي ما حالاتنا هسي بس الحمدلله قعدت لحدي م اذن العصر صليت وطلعت. وقفت في الشارع ٠٠ مسافه
ومن بعيد شفت بت وولد جاين على، واتضح دا أيوب وشكلها دي ميادة مدت يدها وسلمت على قالت لي ارح انا بعرف مكان القريه ٠٠ قلت ليها ح نمشي ب رجولنا؟ قال لي اي لكن ف نص الطريق ح نلقي وسيلة قلت ليها تمام اتحركنا ومشينا ٠٠٠
قطعنا نص المسافه ودخلنا ف منطقه شبه مهجورة أو نائية الليل نزل خلاص وأصوات الكلاب والضفادع اختلطت مع بعض٠٠٠و جا سرب بتاع خفاش طاير ب قدامنا ولمن وصل منتصف الطريق اختفى٠٠٠ قلب عمل ددددل وطوالي وقفت البت اتلفتت على وقالت لي م تخافي ح تظهر حاجات زي دي بس انتي خليك قويه قلت ليها تمام ٠٠
وفي نص الطريق

 

وقف لينا واحد سايق لوري انا والبت ركبنا قدام والولد ركب ورا. مشي بينا مسافه وهنا لاحظت لي حاجه غريبه السواق كان لابس طاقيه بس راسو ورقبتو كانو م واضحين أو حاجه شبه شفافه بديت ارجف وهنا البت شكلها انتبهت لي ضغط على يدي عشان تحسسني م اتكلم طوالي سكته بس من جوا كنت برجف رجف من الخوف اللورى وقف ونزلنا. مشينا مسافه وهنا داب قدرت اتنفس

البت قالت لي طبعا السايق دا م إنسان ونحنا حاليا في أكبر بؤرة ل تواجد الجن وانتي عارفه لي الجن بيوتهم بتكون وين؟
تكون في اماكن النجاسة والاماكن المهجورة والاماكن التي لا يذكر فيها اسم الله، والمكان النحنا فيو حاليا دا لامي جميع الصفات دي ف انتي خليك على طبيعتك قلت ليها تمام أيوب قال ليها فضل كم دقيقه قالت ليو وصلنا خلاص ورفعت يدها اتجاه منطقه ضاجه بالناس وأصوات العربات والمارة قالت لينا ارح مشينا لحدي م لقينا نفسنا واقفين قدام موقف بتاع باصات دخلنا جوا وكنا ماشين ورا البت لحدي م وقفت قدام باص كان عادي وبيشبه باصاتنا العاديه و قبل نركب قالت لينا اتحصنو قلت ليها انا من قبيل قعد اتحصن وايوب برضو قال ليها نفس الشي، ركبنا وقعدنا في كنبة خالص وبعد دقيقه الركاب بدو يركبو مظرهم عادي بس ماف حركة أصوات لي اقدامهم كل زول قعد في مكانو والباص اتحرك رفعت راسي ولا حظت لي الباص ماشي بدون سواق ومن هنا عرفت انو نحنا قاعدين بين الجن والباص ماشي بينا لي عالمهم ٠٠٠ ٠٠٠
أهلًا بكم في عالم
#سلسلة_أحلام_مُخيفة ٠٠٠
عالمٌ لا تكون فيه الأحلام مجرد خيال عابر،
ولا تكون فيه الكوابيس مجرد أوهام الليل…
هنا، كل حلم هو رسالة، وكل رؤية هي تحذير،
وبعض الأبواب التي تُفتح في النوم… و لا تُغلق في الواقع.
في هذا العالم، البيوت تخفي أسرارًا،
والجيران ليسوا كما يبدون،
والطُرق التي نسلكها قد تقودنا إلى أماكن لا يعود منها أحد كما كان.
🔥 انتظرونا في الجُزء الثاني من رواية #جيرانا
حيث تتكشف الحقائق،
وتبدأ الرحلة إلى عالم الجن،

ويظهر السر الحقيقي لشجرة الزونيا والباص 490،
ويُختبر الأبطال بين العودة أو الضياع إلى الأبد…
🕯️ الجزء الثاني سيكون بعد رمضان إن شاء الله٠٠٠
فاستعدوا لرعب أعمق، وأحداث أقوى، ونهايات لا تُنسى.٠٠٠

يتبع….

 

• لقراءة باقي فصول الرواية أضغط على (رواية جيرانا)