رواية نادين ونبيل الفصل الثاني 2 بقلم هبة سيد
رواية نادين ونبيل الفصل الثاني 2 بقلم هبة سيد
البارت الثاني
طلع من قدامي وفضلت قاعده جمب عصام كان نايم شكله كان هادي متعور تعويرات ف وشه اللي يشوفه يقول مستحيل يعمل كل المشاكل دي الجو هادي عصام فضل نايم لحد بعد العصر بدأ يفتح عينه كان بيبص حوليه بص عليا وابتسمت ابتسامه بسيطه وقولت بصوت واطي
_عصام انت كويس
_امم انا كويس
دخل حسام ف الوقت دا ماسك ادويه وكوباية عصير
_صباح الخير جبتلك شوية مسكنات واشرب العصير دا
اخد عصام الكوبايه منو وبدأ يشرب منها شويه كان باصص علينا باستغراب
_ايه الجو دا كلكم طيبين النهارده كدا ليه فيه حاجه ؟
بصيتله بتعجب مكنتش مستوعبه انا كمان هوا بجد مش فاكر اللي عمله ازاي
_لا ياسيدي مفيش حاجه بس انت تعبت مننا امبارح كدا وانا كلمت واحد صاحبي دكتور كدا قولت نروح نطمن عليك كشف بسيط كدا مش اكتر
قالها حسام وهوا مبتسم بيحاول يهديه وميحسسوش بقلق بس عشام كان ف نبرة صوته شوية شك
_دكتور؟ يعني مستشفي ولا ايه
قاطعته بهدوء عشان يطمن
_لا يا عصام مش مستشفي ولا حاجه احنا هنروح نطمن ونشوف دماغك اللي بتوجعك دايما دي
_انتي هتيجي معانا ؟
بصيتله بابتسامه وقولت بهمس
_اه هاجي معاك
_ماشي هروح للدكتور بس لو لقيت حاجه مش عجباني همشي
اتكلم حسام بهدوء
_زي ما تحب
خرجت برا الاوضه وبدأ عصام يغير هدومه عشان ننزل حسام كان بيتكلم مع أمه وبيقنعها انها متروحش وأنهم هيجو علطول وهيطمنها كل شويه طلع عصام ونزلنا ركبنا العربيه قعد عصام جمب حسام وقعدت انا من ورا الجو كان هادي طول الطريق محدش بيتكلم بس قطع الصمت دا صوت عصام وهوا بيقول
_هوا الدكتور دا بعيد ؟
_لا خالص ربع ساعه كدا
قالها حسام بهدوء وبعد فتره وصلنا تحت العياده نزلنا وكنت باصه للمبني بتوتر قاطعني عصام بصوته الهادي
_مالك متوتره ليه انا اللي هدخل للدكتور مش انتي
ابتسمت بسرعه عشان اخبي قلقي
_لا مش متوتره بس نفسي تبقي كويس
_نفسي انا كمان
سكت مره واحده لقيته باصص لناحيه معينه بصيت علي المكان اللي باصص عليه كانت لافته كبيره لعيادة مصحه اتكلم وهوا لسه باصص ناحية الافته
_استنو كدا .. هوا مش دي مصحه؟
بصيت علي حسام بسرعه عشان يتصرف
_لا ياسيدي مش دي نفس الشارع بس احنا رايحين العياده اللي فوق دي
بصله عصام بنظرة شك كأنه مش مقتنع بس كملنا وطلعنا فوق علي العياده قعدنا شويه برا واتكلم عصام
_هوا احنا قاعدين ليه مش بندخل علطول ليه
_مستنين دورنا يا عصام اهدي شويه
_يسلام يا خويا يعني مش هتحطوني في اوضه بيضه وتقفلو عليا الباب ؟
_ايه يا عم الكلام دا ..دا دكتور مش سجن
بصيتله بضحكه خفيفه رغم كدا حسيت بكسره انو قاعد بس قاعد مش مطمن وحاسس بالغدر ف اي لحظه مسك رقبته وبصلي بابتسامه
_وانتي بقا هتبقي معانا ولا هتسيبيني أواجه مصيري لوحدي
_انت حتي وانت تعبان لسانك طويل؟بس انا هفضل معاك مش هسيبك الدكتور هيسألك اسأله بسيطه وبس هنمشي بعد كدا
_ماشي بس لو بدأ يسألني اسئله عبيطه انا هسأله نفس السؤال
قال عصام بضحك عشان يفك الجو وميبقاش قلقان
_ماشي يعم براحتك
_لو خرجت من عنده متسجل رسمي اني عندي خلل هحملكم المسئوليه
قولت بضحكه سخيفه
_لا مش هيحصل كدا اهدي وخليك واثق
بصلي عصام وقال بجديه
_انا واثق فيكم انتو الاتنين بس مش واثق فيا
قال جملته وبعدها سكت كان باين عليه التعب دخلنا للدكتور قعد عصام قدامه وقعدنا احنا علي الكنبه
_ازيك يا عصام عامل ايه
_انا كويس ان شاء الله
طيب يا عصام انا هسألك كام سؤال وجاوب بدون تفكير جاوب اول حاجه تيجي ف بالك
_تمام اسأل براحتك
_بص ياعصام لو فيه شخص ف حياتك بتحبه وبتحس معاه بالأمان قرر يبعد عنك شويه .. تحس بإيه؟ انا عايزك تجاوبني مش اكتر
_هحس ان الدنيا وقفت مش بعرف اتنفس ببقا مش طبيعي كل حاجه بتفقد معناها
_طب ولما بتحس انو ممكن يبعد بتحاول تعمل ايه؟
_اي حاجه تخليه يفضل حتي لو غلط ممكن اتخانق معاه اترجاه واقوله ان حياتي هتبوظ من غيره
_طيب بتحب دايما تبقي حوليه يعني مثلا لو سافرت او هوا غاب بتبقي حاسس بإيه؟
_ببقي متوتر طول الوقت بخاف يكون نسي وجودي
_طب لو حاولت تاخد قرار لوحدك بتستني رأي حد ولا عادي ممكن تاخد قرار بنفسك
_لازم رأي حد مش بعرف اقرر لوحدي بحس اني ممكن اندم او اخسر كل حاجه لو غلطت
_ولما بتحس انك لوحدك من غير حد حوليك بتبقي حاسس بإيه
_حاسس اني تايهه مش ببقي عارف اعيش من غير احساس ان فيه حد جمبي
_طيب يا عصام اخر سؤال لو الشخص دا بعد فعلا هتقدر تكمل حياتك
_جربت قبل كدا بس كنت بنهار بحس اني بضيع
كنت بسمع كل كلمه وانا ساكته وباصه ف الارض بدأ الدكتور يكمل كلامه
_ماشي ياعصام تقدر تتفضل استناني برا هتكلم معاهم شويه
_ليه هما كمان عيانين
_استناني برا يا عصام هشوف الدكتور بس عشان العلاج
قالها حسام وفعلا خرج عصام قعدنا قدام الدكتور وانا بتمني ميقولش اللي ف بالي
_واضح إن عصام بيعاني من اضطراب نفسي
_يعني ايه يا دكتور
يعني ببساطة… عصام عنده خوف شديد من الوحدة، ومن فكرة إن الناس اللي بيحبهم يبعدوا عنه الخوف ده مش طبيعي، مش زي أي حد بيزعل لو اتساب هو بيحس إن حياته بتنهار فعلًا لو الشخص ده اختفى وده بيخليه يتعلّق بالشخص اللي بيحبه تعلق مرضي… كأنه مصدر أمانه الوحيد.
اتكلم حسام بقلق
_يعني الحالة دي ممكن تتعالج؟ ولا هو كده خلاص؟
الدكتور
_تتعلّج طبعًا يا حسام بس محتاجة وقت وصبر العلاج النفسي بيكون بالتدريج، علشان نعلمه يعتمد على نفسو ويفهم إن الأمان الحقيقي لازم ييجي من جواه هو، مش من الناس حواليه
قولت بصدمه
_ازاي يعني
_هو بيتعامل معاكي كـ أمان كدواءطول ما إنتِ حواليه مش هيقدر يتعلّم يعيش من غيرك وده معناه إن العلاج مش هيشتغل علشان يبدأ يتحسّن فعلاً، لازم يتعلم يعتمد على نفسه وده مش هيحصل غير لما يواجه الخوف ده من غير ما يلاقيك جنبه حسام حكالي انك اكتر حد كنتي جمبه انا عارف
قولت بصوت واطي وانا حابسه دموعي
_يعني لازم ابعد عنه ؟
_لفترة بس لحد ما يبدأ يتوازن وبعدها نقدر نعيد التواصل بشكل آمن الابتعاد مش عقاب ده جزء من العلاج بس ضروري تعمليه بهدوء من غير صدمة ومن غير كلام قاسي
حسام قال بتوتر
_هو لو عرف كده ممكن ينهار تاني ؟
_علشان كده لازم نخلّي القرار يبان طبيعي زي إنكِ مسافرة أو عندك ظروف وفي الوقت ده هنكمل العلاج معاه خطوة بخطوة
_وهوا هيتقبل دا ؟
_هيتعب اكيد بس اللي هيفرق معاه هوا انك تبعدي بالحب مش بالغصب
بيسود الصمت ف الاوضه ولا انا مصدقه اللي سمعته ولا حسام عارف هيتصرف ازاي معاه لوحده الدكتور كمل كلامه
_بص يا حسام العلاج هيكون علي مراحل حالته دي لازم يبقي فيها اقامه مؤقته ف المستشفي النفسي
فتحت عيني بصدمه
_في المستشفى؟ليه يا دكتور
_علشان أقدر أتابع حالته بشكل مستمر
هو محتاج فترة استقرار بعيد عن الضغوط
وفي نفس الوقت محتاج نتحكم في الأعراض خاصة الانهيارات والميول للرجوع لأي عاده قديمه
اتكلم حسام وهوا بيحاول يفهم
_يعني هيقعد قد إيه؟
_في المتوسط الحالة دي بتحتاج من ٣ لـ ٦ أسابيع داخل المستشفى وأحيانًا أكتر لو لسه ما استقرش نفسيًا في الفترة دي هنبدأ نستخدم علاج دوائي خفيف زي أدوية مضادة للقلق والاكتئاب بس أهم حاجة هي جلسات العلاج النفسي
_وهيكون لوحده هناك ؟
_لا هيكون في وسط حالات مشابهه وتحت المتابعه
بصيت لحسام وانا دموعي بدأت تنزل
_اهدي يا ليلي هيبقي كويس انتي بس سيبي باقي الطريق عليا
_طيب هوا امتي هيبدأ وازاي هقوله اني مش هشوفه تاني ازاي هيوافق انو يقعد ف المستشفي اصلا
_النهارده بالليل لو تقدروا .. هوا اكيد مش هيوافق بسهوله بس حاولو تجيبوها من ناحيه تانيه اهم حاجه يدخل المستشفي الباقي علينا
خرجنا انا وحسام كان قاعد مستنينا قام لما شافنا خرجنا
_ايه يا جماعه اتأخرتوا كدا ليه ؟الدكتور قال حاجه ولا بتتشاوروا تعملو بيا ايه؟
_مفيش يا عصام كنت بسأله تفاصيل في العلاج
_علاج؟ يعني انا رسمي بقيت مريض
_لا يبني متكبرش الموضوع قالي انك محتاج ترتاح بس مش اكتر
_ليلي
كنت ساكته واقفه بسمع وبس بفكر هعمل ايه للحظه حسيت اني انا اللي مقدرش ابعد مش هوا قاطع تفكيري صوته وهوا بينادي عليا
_ليلي مالك ؟ ساكته ليه حصل حاجه ؟
_لا .. لا يا عصام محصلش
_وريني وشك
مسك وشي ورفعه
_انتي بتعيطي ؟
_لا يا عصام انا كويسه بس عشان منمتش
_احكي يا ليلي حصل ايه ؟
حسام كان باصصلي خايف اتكلم وانا خايفه أضعف واقول اتكلم حسام وحاول يلطف الجو
_ايه يا عم عصام انت عشان تعبان هتشوف نفسك علينا تعال بس يلا عشان امك فلقتني مكالمات
مسكه حسام من إيده واخده واطلعنا من العياده ركبنا العربيه وانا قاعده ساكته مش بتكلم طول الطريق حسام فضل يبص عليا من المرايا ومش عارف هيقتع عصام يروح المستشفي ازاي لحد متكلم وقال
_اه صح يا عصام الدكتور قالي لازم تعمل تحاليل ف المستشفي نشوف ضغطك سكرك انيميتك كدا يعني
_انيميا ايه وتحاليل ايه يا عم هوا انا شكل واحد عنده انيميا دا انا بلعب كوره يعم وبقطعهم
حسام قال بضحك وهوا بيحاول يطلعه من اللي هوا فيه بهزار
_مهو عشان كدا ياسيدي نطمن مش يمكن الكوره دي اللي سبب البلاوي دي
اتكلمت عشان يثق اكتر واحسسه ان الموضوع عادي كنت بقولها بخنقه حسيت اني بغدر بيه
_ايوه يا عصام خليه يشوفك عشان نطمن بس مش اكتر
_منا مش بحب المستشفيات يا ليلي ريحتها بتخنقني وتحاليل ايه ف المستشفي دي هوا انا هحلل علي نفقة الدوله ولا ايه
_لا يا عصام لازم تروح عشان تبقي كويس المستشفي بس عشان الدكتور شغال فيها هوا هيعملك كل حاجه أهم حاجه تبقي كويس
قولتها وانا دموعي ف عيني عصام اخد باله بصلي بسرعه وبدأ يمسح دموعي بأيده
_مالك يا ليلي كل دا عشان التحاليل حاضر يستي هروح والله بس خليكي جمبي وهتيجي معايا اتفقنا
قال اخر كلمه بضحكه بسيطه وانا مسحت دموعي وابتسمتله كمل كلام وقال
_بس لو قالو اني عندي انيميا هقول اني صايم وهمشي علطول
يتبع…
- لقراءة باقي فصول الرواية أضغط على (رواية نادين ونبيل)