رواية 120 كيلو الفصل الخامس عشر 15 بقلم جمانة السعيدي
رواية 120 كيلو الفصل الخامس عشر 15 بقلم جمانة السعيدي
البارت الخامس عشر
#١٢٠-كيلو
#البارت الخامس عشر
#جمانه السعيدي
رهف…. اجرنا تكسي وصلنا ملاك البيت اهلها ورجعنا اني وعمي بيت عمتي
عمي…اذا ضبطت هاي السالفه الج هديه
رهف…هديتي الحقيقيه انت تكون سعيد
بكد ماجاي تهتم بيه وتخليني سعيد
اني مااعرف شنو من صبر عندك شلون بقيت هاي السنيين كلها متحمل خالتي واسلوبها الماينجرع
عمي….شسوي الجهال جانو زغار وخفت اضيع عائلتي
اتحملت الخاطرهم
رهف…انشاء الله تكون من قسمتك ونصيبك
عمي…الله يسمع منج
هاي الزواجه اذا صارت مثل الي يطلع من النار ويدخل بلجنه
رهف…..ههههههه انشاء الله خير
رهف…تحديدا من هذا اليوم بدت علاقة حب بين ملاك وعمي
قبل اني وملاك اغلب الوكت نحجي سوه
صرنا اكثر من صديقات
بس من اتعرفت على عمي صارت وحده ثانيه
كل الوقت السماعه بااذنها وتحجي وياااا
يعني كلام متواصل طول النهار بدول ممل
واي وحده تدخل الجم تشارلي روحي شغليلها الجهاز
لو انطيها ورقة التمارين
حتى شغلها بلجم كامت ما تشتغله
اني كمت اشتغل بمكانها
عمي الي كان يتصل عليه كل يوم ويجي يشوفني بين يوم ويوم
نساني يمكن وكع بلحب
اكثر من مره ملاك تعوفني وحدي بلجم ويااا البنات
وتطلع وياا عمي يرحون مكان يشربون جاي كهوه
صرت اني المسؤله عن الجم
وعم البنات اعرف كل التمارين واي وحده شنو التمرين الي يناسبها
بعد مرور شهر على هاي العلاقه عمي اتصل عليه
هاي الفتره الي فاتت تواصلنا اني ويا كلش قليل
شغلت تفكيره ملاك
رهف….همزين اذكرتني صدك لو كالو من لكه احبابه نسا اصحابه
عمي…هااا بدينا الغيره
رهف…طبعا اغار قابل عرفتكم على بعض حتى تنسوني
ثنيبنكم نسيتوني
عمي.. انتي منو يكدر ينساج غير انتي الكلب
رهف…لا عيني اني مو الكلب ملاك الكلب
عمي…اريد أتقدم الملاك
رهف….لولووووش شايف خير ومستاهلها على الخير والبركه
عمي…بس شلون بلمكان ااجر بيت لو مشتمل شنو رائيج
رهف…شكد بعد ويطلع المؤجر من بيتنا
عمي…بعد شهرين
رهف…شنو رائيك انشوف بيت للمرجر وندفعله إيجار شهرين مقدم حتى ينتقل ونرتب بيتنا وتزوج بي
بس اني وياكم على كلبكم من هسه اكولك
مو تريد ملاك تاخذك مني اني اليه حصه بيك
عمي….ههههه يمه الغيره يمه
رهف…يااا ولله مااعوفك الها وحدها اني اليه حصه بيك اكثر منها
عمي…حبيبتي انتي
رهف…زين أتقدم الها وخل أتم الخطبه وبعدين نحاول
نلكه بيت ونرتب امورنا
عمي…انتي تشوفين هيج
رهف…اي خل العلاقه تكون رسميه بينكم والبيت سهل
عمي…زين راح احدد موعد ويا اهلها
اني عندي قطعة ارض مشتريها من زمان بس محد يعرف بيها راح احاول انطيها المقاول يبنيها اليه بالقسط
جمانه السعيدي
رهف…ما يحتاج بيتي هو بيتك اني مو جنت كاعده بيتك عشر سنوات وتصرف عليه ولا يوم استثقلت مني
عمي…بس هذا زواج يعني عائله انتي جنتي نفر واحد واحنا اربعه
بعدين ملاك تستاهل يكون عدها بيت وحدها
رهف…يعني خالتي ماتعرف انت عندك قطعة ارض
عمي…ولا اي واحد يعرف انتي اول وحده تعرفين هذا الموضوع
رهف…تمام يمتى انشاء الله الخطبه
عمي…بس احجي ويااا ملاك واشوف اي موعد يناسبها
تحدد موعد خطبة عمي بعد اسبوع
هذا الاسبوع الجم كله صار براسي لان ملاك تحضر الحفل خطبتها من عمي
كلشي كان سري محد.يعرف عمي راح يخطب ويزوج
بس اني وبيت عمتي وأهل ملاك
مانريد خالتي تعرف خاف تسوي مشكله وياا اهل ملاك
لمن تكمل الشغله يله نعلن الخبر
وزني بوقتها وصل ٩٥ كيلو بلكوه لكيت فستان محتشم
البسه بهاي المناسبه وجبت حزام كورسيه حتى يطلع الفستان حلو عليه
الفستان كان زيتوني وشال كريمي فاتح اللون ضرب على عيوني مكياج هادء اكسسوارت نازكه
طلعت اجنن من شافتني ملاك
ملاك…ولج هاي شطالعه بشرفج لا تجين توكفين بصفي
ولج اضيع عين الحاره بارده
رهف….انتي ما تحسديني لان تحبيتي
كملنا من الصالون واتصلت ملاك على اخواها يجي ياخذنا
من الصالون للبيت
اني طبعا ماشايفه اي احد من اهلها لان نلتقي اني وياها بلجم لا هي جايتني بيت عمتي
ولا اني رايحه بيت اهلها علاقتنا داخل الجم وبس
بنات عمتي شايفاتها ويعرفنها
بس اني مااعرف اي احد من اهلها بس اكيد هيه حاجيه عني الهم
جمانه السعيدي
وصل اخوها بسيارته
ملاك…يله تعاي وصل علي
طلعنا اني وياها السياره جانت حيل قريبه باب الصالون
نزل منها ولد شاب تقريبا عمره ٢٥ سنه لابس قاط
زيتوني داكن
فتح الباب طلعت ملاك واني طلعت وراها
التفت عليه شافني بقه يباوع عليه
انتبهت ملاك
ملاك….نسيت اعرفك رهف العريس يصير عمها
علي….اهلا وسهلا
رهف…دار من الجهه الثانيه وفتحلي الباب
حسيته حيل مركز عليه عبالك يريد يحفظ ملامحي
من قربت اريد ادخل حجا بصوت ناصي
علي… تفضلي عيوني
رهف.. التفتت علي اجن عيوني بعيونه
علي….يمااااي تذبح
رهف…دخلت للسياره مستغربه من ردة فعله
شغل السياره
علي…شنو اسم الانسه ترا نسيت
ملاك…رهف
علي…اني ورهف مطقمين اليوم ثنيينه لابسين زيتوني
ملاك…اي ولله صدك اني ابد مااانتبهت
علي…هاي الخلقه الحلوه وين لكيتيها
ملاك…علي اسكت رهف تستحي ما متعوده عليك وعلى
سوالفك ترا علي نص كلامه تحشيش
هو الي مخلي للبيتنا طعم بسوالفه الحلوه
علي…. لا ولله احجي صدك مو شقى
مجاي اكدر اسكت اكلج ملاك عمها هيج حلو مثلها
ملاك…انت ليش تسئل خطيبي لو خطيبلك
علي….هسه اني شحجبت عيني رهف نسيت اعرفج بنفسي علي العمر ٢٥ سنه خريج اعلام
عندي محل تحف وثريات وانتيكات
رهف…اهلا وسهلا
وصلنا للبيت بيتهم كلش حلو وبمنطقه راقيه
استقبلونا اهلها دخلنا جوه واهلها كلهم اجو سلمو عليه
ابوها وامها وخواتها زوجت اخوها مؤمل
حسيتهم جاي يحتفلون بيه مو بملاك
ابو ملاك…احنا حبيناج من كلام ملاك عنج
رهف…اني هم حبيتكم شكرا لهذا الاستقبال الحلو
فرصه سعيده تعرفت عليكم
ام ملاك…احنا الاسعد الله يحفظج خاله شنو هذا الجمال
رهف…الله يسلمج خاله
انجمعو اهلهاكلهم ياخذون صور وياا ملاك قبل لا اصير هوسه ويجمعون المعازيم
حتى اني اخذت صوره جماعيه وياا اهلها
جمانه السعيدي
شويه واجت المعازيم واجا عمي وويا سيارتين زلم
كله زلم كبار وشيوخ
عقدولهم وهاي كانت اول فرحه اليه بعد كل المصايب الي مرت عليه
اكثر واحد جان فرحان طاير من الفرح عمي
وخاصه من شاف ملاك بلبدله طالعه اجنن
لازك بصفها ما يقبل يعوفها عبالك اول مره يزوج
مامصدك هاي الحلوه صارت اله
رهف…ابو ملاك صمم نبقى للعشى اني وعمي
عمتي ام محمود اخذت البنات ورجعت للبيت
رغم شكد اتوسلو بيها تبقى للعشى بس ما قبلت
بقا عمي وملاك يسولفون جوه واني رحت للمطبخ اساعدهم
خوما ابقى كاعده يم العرسان هما ماصدكو يزوجون
ام ملاك….لا ولله اكعدي واسكتي ملابسج تتوصخ
كاشخه وتشتغلين بلمطبخ
اصلا احنا طلبنا اكل كله جاهز بس نحضر كم حاجه بسيطه
رهف….لا اساعدكم حتلو بشي بسيط
من شافني علي بلمطبخ كل شويه جاي مطلع حجه
بس كون يدخل للمطبخ
اني اجاهلته عبالك ماموجود
اني اصلا استحي هما طبعهم مو مثل طبعنا
عائله متحرره كلشي عدهم عادي بس بحدود الاخلاق
يعني ام ملاك بيوم المهر لابسه فستان ومسويه شعرها بلصالون وطالعه عبالك شابه ابوها لابس قاط وشكله يخبل
راقين وعايشين حياة غير حياتنا
كعدنا نتعشى كلنا سوه كل العائله وعمي واني
اني ابد ما حجيت ولا كلمه اذا يسئلوني اجاوب على كد الكلام واسكت
خلصنا عشى بعدها بساعه
رهف.. هاا عمو نروح
عمي…اي نروح يله
رهف.. اتشكرنا من اهلها وطلعنا لكينا علي مشغل السياره وينتظرنا برا
علي…يله اوصلكم
عمي…لا مانريد انزاحمك
علي….شنو ازاحموني اريد اوصلكم حتى اعرف مكان البيت وين يمكن اعزم نفسي عدكم
عمي…مو تدلل من عيوني تطلبني عزيمه
بلبدايه وصلوني بيت عمتي وراحو
بس وصلت غيرت ملابسي وسولفنا اني والبنات شويه وتمددت اريد انام
اجتني رساله من ملاك
ملاك….الحلو نايم كاعد
رهف….شعجب عافج عمي اني كلت اليله للصبح ما ينامون
يخلصوها سوالف حب وغراميات
ملاك….هو عليوي يخليني اسولف واكف بلعومي
رهف…يااا عليوي
ملاك…هذا المتيم العاشق خبصني خبص بس يسئل عنج
ويسولف بيج
رهف…كليله ما تفيدك
ملاك….يااا غير كون يقتنع تخبل عليه يريد رقمج
رهف….ممنوع مااقبل اذا انطيتي رقمي ازعل عليج
اني مو مال حب وهاي السوالف
ملاك….زين انطي فرصه يتعرف عليج
رهف….ابد ممنوع اني ماعندي وقت الهاي السوالف
ابد مستحيل ادخل بعلاقه هسه
ملاك….شلون ياربي ولله كرع راسي
جمانه السعيدي
رهف…اسفه ولله ماافيده اذا تنطيي رقمي ازعل عليج
وبعد مااحجي وياج ابد
ملاك…بكيفج اني مراح اغصب عليج
ثاني يوم بلجم اجا علي بحجة يشوف ملاك
بس اني ابد مادرت بال ولا طلعت علي ولا شفته
يمكن هو خوش فرصه بس اني ما مستعده حاليا لا احب ولا ارتبط
اريد اكون نفسي اريد ارجع البيت اهلي
اريد اكمل دراستي اي علاقه ادخل بيها راح اتاخرني
واني اتاخرت هواي
من بعد ماراح علي اجا عمي اخذ ملاك وطلع
وبقيت وحدي بلجم
كدر عمي يلكه بيت ويقنع المؤجر يشيل من بيتنا
بس ماطلع اله دفعناله ٣ اشهر إيجار ليكدام
مع انو يطلبنا بس شهرين ايجار وبدا عمي يرتب البيت
صبغه كله من جديد
بعنا الأثاث القديم واشترينا اثاث جديد وحديث
اشترا عمي غرفة نوم تخبل
واحنا نرتب بلبيت علي جان حاضر ويانا
مو علمود المساعده بس حتى يشوفني ويحجي وياي
رهف….ممكن ما تحجي وياي
علي…ليش ضجتي مني
رهف….اي ضجت لان مجاي تحترم خصوصيتي
علي…بس وين المشكله اذا حجينا اني وياج
رهف…انت عندك مو مشكله بس اني عندي أكبر مشكله
علي.. انتي ليش هيج معقده
رهف…عندي أسبابي مااريد اذكرهن ممكن تحترم رائي
علي…اكيد ممكن
كملنا كل التفاصيل خلال شهر واحد من بعد الخطبه
علي جان متواجد بشكل يومي ويانا
بس ماكو بينا بس نظرات اي كلام ماكوووو
خالتي سمعت اني جاي اعدل بيت اهلي
بس متوقعه اريد اكعد بلبيت ابد ما تعرف عمي راح يزوج
بيتي
اكثر شي هليام مشغوله وياا شكران
يكولون كاعده بيت عصام كعده
بس بليل ترجع البيتها ما مصدكه بيت رهف الي جانت تحلم بي
صار من نصيب شكران
ازوج عمي صحيح الحفله حانت بسيطه
بس كلش حلوه اني فرحانه الفرحت عمي بعمري ما شايفته هلكد سعيد ومرتاح
جمانه السعيدي
اني اول اسبوع زواج الهم بقيت بيت عمتي
حتى ياخذون راحتهم كنت مسؤله مسوليه كامله عن الجم
لان مانكدر انسده
البنات دافعات اشتراك وملتزمات بكورسات رياضه
اني جنت اطلع الضهر افتح الجم
الساعه عشره بليل يجي عمي يرجعني للبيت
اليوم السابع جمعت غراضي وقررت ارجع اكعد وياا عمي وملاك بيت اهلي
تحديدا هذا لليوم بلذات خالتي يله عرفت عمي ازوج عليها
بس وصلت البيت ابوي تقريبا الساعه ١١ الصبح
دخلت للبيت سلمت على ملاك
اقل العشر دقايق
اتكسر الباب تكسير
عمي فتح الباب جان يشوف خالتي
ووجها اسود وعصبيه يطير من عيونها شرار
خالتي….الله لايرضا عليك صدك ازوجت عليه
انت تزوج عليه وووينها هاي بت الشوارع الي اخذتك
مني خل اشوفها
دخلت جنا اني وملاك واكفين كبالها
بقت تباوع على ملاك
ملاك لا بسه بدي خيوط وشورت للركبه وفاتحه الشعر
والمكياج يخبل والعطر تارس البيت
طالعه عبالك لعابه
مو بس عمي فرحان بيها هي هم فرحانه بي
خالتي لا بسه جبه سوده وشال شامرته شلون مجان
ووجها اسود من القهر
ما متوقعه عمي ياخذ هيج وحده
عبالها مزوج مره جبيره موحلوه عجوز وحده
كلشي الجان
بس شافت ملاك صاحت وين العروس
ملاك….اني العروس انتي منو
خالتي….يااا هاي العروس هلكد ما تفاجئت بيها
ماعرفت شلون تعبر عن غضبها
راسا صاحت مزوج وحده من الكاوليه
تقدمت تريد تلزمها من شعرها راسا عمي لزمها من ضهرها
سحبها للباب
عمي….روحي البيتج انتي شتريدين
اني وياج من زمان منفصلين انتي مو كلتي
اطلع من البيت خفت وراحه
جايه وراي شتريدين اطلعي من حياتي دمرتيني
خالتي….اني تزوج عليه هاي مجازات العشره
مافكرت بيه مافكرت بجهالك
تحجي ودموعها ينزلن منا ومنا
رهف…وكفت كبالها واني اشوفها تغلي غلي ضحكت نفس ضحكت الشماته الي ضحكتها عليه من اجيتها بعد ما طلكني عصام
خالتي…انتي السبب كله منج انتي ساس المصايب
انتي الي زوجتي جايبتله وحده من الكاوليه
عمي…من الكاوليه من الشارع انتي شعليج شنو دخلج بلموضوع اني مليت منج عفتلج البيت كله وشردت
اريد اعيشلي يومين بيش طالبتني
دفعها عمي طلعها برا وطبك الباب
بقت تعيط بلشارع وتفشر علينا وتكسر بلباب
بعدين تعبت وراحت
ملاك…يمه هاي مو مره هاي ثور هايج شلون جنت عايش وياها صدك جذب
رهف…كلت بكلبي يوم الشكران تطلك وترجع عليج
انشاء الله تطلع حوبتي بيها مثل ما طلعتي حوبتي بيج
انتظرونا……
- لقراءة باقي فصول الرواية اضغط على (رواية 120 كيلو)