رواية 120 كيلو الفصل الثامن 8 بقلم جمانة السعيدي

رواية 120 كيلو الفصل الثامن 8 بقلم جمانة السعيدي

 

البارت الثامن

 

اسبوعين بين المهر ويوم الزواج
لان عصام كان مجهز كلشي البيت ماثث وكامل حتى غرفة النوم جاهزه

عصام كان مستعجل على الزواج حيل كنا نحجي اني وياا طول الوقت ونتفق على كل تفاصيل الزواج
من يتصل ونبقى نحجي اني ويااا
حتى إذا اجو زباين للمحل يعوف التليفون مفتوح
يخلص شغل ويرجع نحجي اني ويااا

شكد حاول يعرف شنو نوع العلاقه بيني وبين خالتي
لان مبين هي ماتريدني وكارهتني وتفضل بتها عليه
خاصه وهو حجالي شلون خالتي اجته للمحل وحاولت
تقنعه يعوفني
وشلون هو بقى متمسك بيه
بس اني ابد ما حجيت شي مهما يكون تبقى خالتي
واني عشت بيتها عشر سنوات
بغض النظر كنت مرتاحه لو لا
بعدين مايصير اكشف كلشي عن حياتي كدامه اني بعدني
ماعشت ويااا
ايجوز نختلف بيوم من الايام
خاف يحس نفسه طلعني من الجحيم ويحسسني بلنقص
ويكعد يعيرني باااهلي
كنت دائما اذكر خالتي وعمي بلخير
بس بلحقيقه اني اذكر عمي اكثر وامدحه
لان هو يستاهل احجي عنه بلخير والطيب

خالتي طول هاي الفتره كل يوم عركه وياا عمي بسببي
تكله انت الي قويتها عليه
انت الي كبرت راسها وخليتها تطلع من طوعي وتكلب عليه ماغزر بيها الربه

عمي بين يوم ويوم يجي يكول اني وخالتج ما نحجي
واذا ججينا تعاركنا
اخذت فراشي ونمت بلصاله من وراها
ماتنحمل محملتني مسؤلية زواجج ودها كون تحركني
لان طلعتج من البيت

رهف….حملتك شي فوك طاقتك اني اسفه
بيتك صار جحيم بسببي

عمي…لا مو بسببج هي هيج سحر من يوم خذتها لليوم
تحب المشاكل تخلق الطلاب من جوه الكاع
تحب تفرض رائيها عليه وعلى كل الناس حتلو كان رائيها غلط
رهف….هسه كم يوم تقبل بلامر الواقع بس اتشوفنا ازوجنا وتسكت

عمي…انشاء الله الله يهديها ولله صايره ما تنقبل ابد
رهف….الله يساعدك
عمي. عوفينا منها انتي محتاجه شي
رهف…ما محتاجه غير سلامتك
عمي….الله يسلمج انتي وجه الخير كله من دخلتي بيتنا لليوم واني الله رزقني من خيره
بلاعدد ولا حساب بالعافيه على عصام راح يخليج بيته

رهف…انت نيتك صافيه والله منطيك على كد نيتك
عمي…الله يحفظج يابويه انتي ربيتي نفسج بنفسج
ونعم التربيه
احسن مني بنيه وحده وماعرف اربيها خربتها عليه سحر
الله ينتقم منها خربت بيت كامل بهاي عقليتها السخيفه

رهف….لاتشيل همي عمو لا تخاف عليه بعمري مراح انزل راسك ابد اني لو ماانت بحياتي جان ضعت

عمي…لا ولله انتي معدله من كاعج وما محتاجه احد يعلمج

رهف…رن تليفوني
عمي…هذا اكيد عصام اترخص منج واذا تحتاجيني شي
بس اتصلي عليه
رهف…انشاء الله

جمانه السعيدي

رهف…..طول النهار نحجي اني ويااا تقريبا عرفت عنه كلشي
شنو يحب شنو بكره
مانفصل التليفون اله وقت الاكل لووقت النوم
كل كم يوم يجي ساعه بليل نكعد اني ويااا
ويروح
يكول عيب هذا البيت بي بس نسوان زحمه كل شويه جاي
عليكم
لازم احترمج واحترم عائلتج

بيوم اشترا قاط العرس اخذني ويااا
اختارينا سوه ومن اني رحت اختار بدلة عرسي اجا وياي هو اختارها على ذوقه
مدري شعجب لكيت بدله على كدي وحلوه

بيوم العرس الصبح جابلي ريوك وكعدنا نتريك اني ويااا
بعدين اخذني للصالون
كلما اشوف الفرحه بعيونه يزيد حبي اله اكثر واكثر

كنت ادعي ربي يديم عليه هاي السعاده ومايحرمني من عصام ولا عمي
لان هما سبب سعادتي بعد رب العالمين

يوم عرسنا احلى يوم مر عليه من يوم اجيت الهادي الدنيا الهذا اليوم
كل تفاصيل هذا اليوم عندي مميزه وحلوه
الزفه تخبل عصام يسوق بلسياره واني كاعده بصفه
حسيت نفسي طايره ولا عبالك نمشي على الكاع

وصلنا البيتنا لكيت عمتي ام محمود واصله قبلي
وعمتي ام عصام محضرات الأكل
ومعطرات البيت
بس دخلنا عمتي ام عصام كامت تقرا علينا ايات

عصام…هااا حجيه تخافين علينا
ام عصام.. اي ولله اخاف عليكم
رهف…دنكت عليها وبستها من ايدها
ام عصام …الله يرضا عليج
رجعت بست عمتي ام محمود من ايدها وراسها لان لو ما
هي مكعدتني بيتها الله العلم شصار بيه

بعد العشى راحن عماتي ثنيينهن

عصام…واخيرا اجت اليوم الي كنت منتضره
تعرفين امي شكد صار تلح عليه حتى ازوج
وكل البنات ما عاجبني كل يوم مرشحتلي وحده شكل
كلهن بنات عوائل وخريجات بس مايعجبني مااعرف ليش
كلبي جان منتظرج
من غير البنات الي يجن
يشترن مني يوووو حرشه حرشه مو معقوله اكو بنات
فعلا بدون اخلاق ولا يعرفن ريحة المستحه شلونه

بس من شفتج عبالك وواحد وكالي هاي اي هي هاي
حسيت نفسي حبيتج من اول مره شفتج بيها
جمال وأخلاق وادب
فوك كل هذا الجمال الثكل والادب ومحترمه نفسج
غاليه مارخصتي نفسج
كلشي بيج عجبني
صدكي اكو يجن يعرضن عليه علاقه مقابل قطعة ملابس
مايجاوز سعرها ٢٥ الف
اني كلما اشوف هيج بنات اكول يمكن اني راح ابقى بدون زواح لان مجاي اشوف وحده زينه ومحترمه

رهف….ممنوع بعد تصير عينك منا لو منا فهمت لو لا
عصام….شنو مخبل عندي كمر ١٤ وعيني تروح هيج لو هيج خلاص اني قفلت ملفات البنات
لان اخذت حوريه من الجنه
رهف…الله يحفظك ويفرحك بكد مجاي ادخل الفرح الكلبي

جمانه السعيدي
عدت هاي اليله وكانها من الف ليله وليله

اربع ايام عصام مليقبل يطلع للشغل مكابلني وكاعد
وعمتي ام محمود تطبخ ودز اكل
وعمتي ام عصام ابد ماقصرت ويانه بلاكل والحلويات
شهر كامل واني ماداخله المطبخ
لو عماتي يدزلي اكل لو انجيب جاهز
سبحان مغير الاحوال جنت اكرب ليل نهار هسه كاعده لاشغل ولا عمل

رجع عصام الشغله يطلع بلعشره الصبح
ويرجع ب ١١ بليل مرات للساعه ١٢ يله يرحع
بس اني ويااا على اتصال متواصل من يطلع لمن يرجع
يكول خاف اضوجين وحدج

كلما تمر عليه لحظه من الفرح والسعاده
اكو هاي هيه رب العالمين عوضني أجمل عوض بلدنيا

خالتي وشكران بهذا الوقت صابهن جنون لان زواجي
كان حديث الاهل والأقارب
الكل يحجي بتفاصيل يوم عرسي
وبيتي حياتي ولهفة عاصم عليه واهتمامه الزايد بيه
طبعا هذا الشي ماجاي على هواهن
باعتبار عصام جان الهن واني اخذته منهن
هنا هيج كانن يفكرن
عصام الهن واني اخذته منهن

والي اله حق لازم يرجعه مادام عصام حقهن
لازم يرجعنه وهذا الخير كله هنا أولى بي مني

شلون يكدرن يخربن حياتي كعدن يفكرن شلون هاي الحياة لازم تخرب
اني مااخذ شي احسن منهن

اذا يردن يخربن حياتي لازم يعرفن كل تفاصيل هاي الحياة
لازم يكونن قريبات مني
حتى يكدرن يتحكمن بكلشي
اول خطه خلنها وقررن يبدن بيها لازم ترجع العلاقه بيني وبين خالتي
تتحسن العلاقه ويكدرن يدخلن بيتي
بعد شهر من زواجي هذا الشهر مر عليه عبالك يوم واحد
شكد جنت فرحانه طايره من الفرح
مااكدر اوصف اهتمام عصام بيه اهتمام فوك الوصف
وعمتي وبنات عمتي ابد ما عافني
يسئلن عني ويجن يزورني ويجيبلي اكل
اما عمتي ام عصام
مااكدر اوصف حنيتها عليها حتى زوجت حماي
انسانه مثقفه وراقيه بشكل

جمانه السعيدي
بعد شهر من زواجي اتصل عليه عمي
رهف.. هلو عمو شلونك
عمي.. الحمد لله انتي شلونج
رهف…بخير دام انت سالم وتذكرني
عمي.. انشاء الله دوووم اريد احجي وياج بموضوع
رهف.. اي كووول اسمعك
عمي…خالتج صار كم يوم بس تحجي بيج وتكول شكد متندمه لان جنت موزينه ويا رهف
جاي اشوف اختي بلحلم ضايجه مني
اني جنت بلاعقل وماافتهم ورهف طلعت احسن مني
اني ليش هيج سوت بيها
مسكينه شكد تحملت مني اااذيه

رهف… هاي خالتي هيج تكووول
عمي. اني مستغرب اكثر منج
رهف.. الله يهديها
عمي… تكول اريد اروح اعتذر منها واخذلها هديه
وتريدني اجي وياها
اني ما قبلت مااريدها تدخل بيتج خاف اضوجين
بس شو سالفتها جنها صدك
ووضعها كله متغير صايره حبابه وماتسوي مشاكل
وبس تحجي بيج طول الوكت

رهف.. ايجوز صدك حست بغلطها
عمي. تقبلين اجيبها تعتذر منج
رهف…عليمن تعتذر مهما يكون تبقى خالتي
خليها تجي اني ما شايله بكلبي عليها
عمي…انتي متاكده
رهف…اي متاكده خل تجي اهلا وسهلا
عمي.. مراح اخليها اطول ربع ساعه واخذها ونطلع
رهف…اي انت ابقى كاعد لا تطلع اله تأخذها وياك
عمي.. هاي هي اتفقنا على باجر بليل
رهف.. اي انتظركم
عمي تمام موعدنا باجر

من رجع عصام حجيتله كلشي صار بيني وبين عمي

عصام….عادي خل تجي اهلا وسهلا
رهف…خوما يضايقك وجود اهلي بلبيت
عصام…بلعكس اهلا وسهلا بيهم

ثاني يوم اندكت الباب رحت فتحتها
بس شافتني خالتي كامت تبجي حضنتني وكامت تبجي
بقيت مذهوله من تصرفها معقوله هاي خالتي
الي اخر مره كالت راح اخليج تتندمين وتبجين بدموع دم
بقت تبوس بيه وتبجي
خالتي.. اسفه اني اسفه سامحيني مااعرف شلون اعتذر منح
رهف…لا تعتذرين ماصار شي تفضلي تفضلي

دخلت جوه هي وعمي
عمي.. شلونج عموووو
رهف.. اهلا وسهلا
خالتي…يمه رهف فدوه سامحيني واني مستعده
اقدملج اعتذارات منا اليوم القيامه
اني شكد غلطت بحقج جنت غبيه ماافتهم
توني يله وعيت على نفسي فدوه العينج اعذريني
اني مثل امج
رهف.. خاله لا تعتذرين مصار شي
خالتي…شلون مصار شي اني اذيتج هواي
رهف.. اني سامحتج من كلب ولسان
خالتي….ولله انتي احسن مني الف مره اعقل مني
اني مدري شبيه تخبلت كمت اتصرف بلاعقل
الشيطان ركب عقلي
رهف…عوفي هذا الحجي نبدي من جديد
سولفلي شلونج منو يساعدك بلبيت

خالتي….منو يساعدني بعد ماجنت مدلله من انتي وياي
هسه حال الضيم حالي اكرب وحدي ليل نهار
وهاي شكران بس النوم كلشي ما محصله منها

رهف.. لا تعبين نفسج انتي ماتكدربن
خالتي. اوي فدوه الحلكج الله يسعدج دنيا واخره

رهف..عمي كاعد ومتفاجى من كلام خالتي
سبحان مغير الاحوال من حال إلى حال

 

• لقراءة باقي فصول الرواية اضغط على (رواية 120 كيلو)