رواية خلف الابواب المغلقه الفصل الثالث 3 بقلم مشاعر مبعثرة

رواية خلف الابواب المغلقه الفصل الثالث 3 بقلم مشاعر مبعثرة

 

 

البارت الثالث

 

#خلف_الابواب_المغلقه_3
بقلمي : مشاعر_مبعثره
لحظتا جاني الصوت داك
: انتي امكن ما تخسري نفسك بسبب الجوع بس اكيد ح تخسري ولدك الجنبك دا بسبب الكبرياء .
كان ابو ليان عاينت له وما قادرة اعاند اكتر من كدا بعد شفت اولادي نايمين باطمئان لاول مره من جينا البلد دي شبعانين وفي جو بارد ما مكتم ولا في حشر بنهش في لحمهم ما قدرت بالجد احرمهم من الشي دا، وحتى الراجل دا بعد العملو عشانا ما بقدر اكون عدائيه معاه اكتر، حتى لو على حساب كبريائي والا ح افقد انسانيتي قلت له بصوت مبحوح شكرا!!
قال لي : انا ما عملت حاجه تستحق الشكر ولو سمحتي اكلي عشان ولدك دا ح يصحى جعان.
سكت
قال لي : عمرو كم؟؟
: كمل سنه.
: سنه؟؟؟ حجمو دا حجم ٦ شهور فاقد كتير والمفروض ياخد وجبات.
ضحكت باستهتار وقلت له حانبقى نشتري له وجبات خاصه.
: انا ما قصدي الاساءة، ممكن تاكلي ونحن بنتكلم؟؟
قرب التربيزه مني وهو كاسر عينو.
قلت له المراتب بتاعتكم والمروحه ياريت تاخدوهم معاكم نحن…….
قاطعني بكلمة ماشي
بقيت اتكلم معاه بكبرياء ويدي كل مره بتقرب من الصحن لمن لقيت اني اكلت واكلت كتير كمان هو ما كان مركز معاي كتير وعينو في تلفونو.
بعد خلصت الاكل قلت له يلا اخدهم
عاين لي بدهشه وقال لي : شنو
: اسي كنت بقول لك في شنو؟😒
ما كان مركز مع كلامي طبعا وبحاول يتدارك الوضع قال لي
: ااال الصينيه؟؟ جدا😁
وقام عاوز يرفعا من قدامي بعدتا وقلت له صينية شنو اسي ما قلت لك تاخد الحاجات الجبتا دي وانا لمن اشتغل برجع لك قروش الاكل والعلاجات الاشتريتا لي واللبن الجبتو لمه……….
قاطعني
ممكن تاخدي نفس وانتي بتتكلمي؟ اول حاجه انا ما ح أخد قروش منك ، وبالنسبه للمروحه دي نحن ما قاعدين نشغلا في البيت خايف عليها من الركنه والمراتب زاتا قاعده زيادة ساي في البيت.
: بس انا ما عاوزه حاجه من زول.
هاني كان صاحي قال لي عليك الله ياامي خلي لينا المراتب والمروحه انا تعبت من النوم في الحبل والسخانه والباعوضه كل يوم بتقرصنا شوفي جسمي كلو بقى فيه علامات من كترة الهرش.
نهرتو : انت اسكت يا ولد
ابو ليان قال لي
: ي اخت الباعوض كتير الايام دي افرضي واحد من الاولاد جاتو ملاريا ونقلا للباقين فكري بس في الحايحصل، انتي حاتقدري على جري مستشفيات وعلاج وكلام قدر دا؟ وما تنسي انك شايله طفل في يدك، لو سمحتي ختي مصلحة اولادك قبل العناد انا ماشي لانو عندي شغل ولو سمحتي اتصلي بي لو حصل شي انا جار و اخو بس ما فاعل خير.
خت ورقه في التربيزه وقال لي دا رقم تلفوني ضحكت بانكسار وقلت له انا ما عندي تلفون اصلا💔
قال لي : خلاص نادي ليان بالحيطه بس يلا فتكم بعافيه.
باس راس هاني وطلع.
انا استغربت من الحركه دي بعد طلع لحقتو وما عارفه اناديه بياتو اسم كلمة اخ دي ما جات في بالي قعدت اقول له يا جارنا
اتلفت علي وهو مبتسم قال لي : نعم يا جارتي!
قلت له : بالنسبه للحركه الانت عملتا اسي دي………
كنت بشبك اصابعي في بعض وما قادره اوضح كلامي قال لي اي حركه؟؟
قلت له بقولو تقبيل راس اليتيم برقق القلب وانت قبل شويه…….
: عشان قبلت راس ولدك؟؟؟
: ولدي ما يتيم انا……
: انا ما عملت كدا للسبب الذكرتيه، دي حاجه اتعودت عليها من زمان بقبل راس اولادي كل م افوتهم.
: شكرا لك للمرة التانيه وبتمنى انو زوجتك ما تنزعج مننا لانو……
: انا زوجتي متوفيه.
: ربنا يرحما ان شاء الله
: اللهم امين عاوزه حاجه؟
هزيت راسي في ردة فعل تلقائية وسريعه وقلت له : لا ربنا يجزيك كل خير يا جارنا.
ابتسم ومشى
قمت نضفت البيت لقيتو جايب لينا حاجات كتيره وحتى عده وفحم وكبربت لانو غرفتنا ما فيها غير سريرين وتربيزه وحله وصحن، كم كبابة شاي وبراد صغير ملاعق ، حاجات بسيطه كدا اشتريتا بكل القروش العندي زائد الايجار الخرافي كنت بفكر في كل الحاجات دي وانا بطبخ.
الباب دقا هاني عاوز يقوم يفتح قلت له خليك مية مره نبهتك ما تفتح الباب.
مشيت فتحت لقيتا ليان شايله حفاظة مويه وتقيله عليها مسكتا منها.
قلت لها دا شنو يا بنتي؟
: دا تلج.
طأطأت راسي وما قدرت ارفض قلت لها يديك العافيه ان شاء الله اقيفي افضيه واديك الحفاظه.
قالت لي : بابا قال لك ختيه فيها عشان ما يسيح.
: لالا ما بسيح عندي جردل جزاك الله خير يا بنتي ادخلي ما تقيفي في الباب.
دخلت طوالي، انا كنت عامله كاسترد ختيت لها في صحن قلت لها ما جمد ختوه في الثلاجه بعدين اكلي انتي واخوانك.
: شكرا يا خالتو.
شالتو من يدي وانا خليت هاني يقدما بالصحن عشان شايله الحفاظه.
اها بعد الغداء اسمع لك صوت بنادي
: يا جارتنا يا جارتنا
مشيت لقيتو ابو ليان بالحيطه قربت اضحك.
مشيت سلمت عليه كان خاتي الحفاظه في الحيطه قلت له دا شنو؟
: انتي الدا شنو الحفاظه دي خليها معاك .
: بس انتو……
: اسمعي يا جارتي ما تشوفي كلمة دكتور دي انا ما زول ثري وواو🤩 ذي م انتي فاكره، وضعي الاجتماعي عادي جدا، انسان زيك بيتي بسيط ومصدر دخلي واحد حتى عندي نواقص في البيت يعني ما قاعد اتصدق عليك من الفائض، بالعكس دا حق الجيرة بديك وعاوز منك كمان.
قعدت اعاين له باستغراب، قال لي والكاسترد كان لذيذ شديد خلصوه البنات براهم لو فضل ممكن تديني منو حتة صغيره؟ 😁
: طبعا طبعا هدا في.
قمت ماشه من شدة ما مستعجله اتكعبلت وقربت اقع، بحب اقدم المساعده للناس ويدي تكون العلياء.
قال لي يا ساتر يا ساتر اعملي حسابك يا جارتي، مشيت جبت له قالب قلت ما بارد اعفي لي
: لالا كدا ممتاز هو قال لك انا عندي اسنان للبارد؟؟
: بالجد شكرا لك ياابو ليان.
: خلاص خلينا يا جاري؟
قعدت اعاين له قال لي ممكن تجاوبي بالابتسامه برضو تبسمك في وجه اخيك صدقه وشك دائما حيران يا مهموم ولا صاري🙊
كيف يعني؟
: ولا شي بس حاولي ابتسمي في وش الناس خاصة اولادك وكدا تكوني اتصدقتي بدل احساس العجز المتلبسك دا
: انت دكتور نفسي ولا عادي؟
: عادي يا جارتي😅 يلا تصبحي على خير.
: وانت من اهلو…………يتبع♥️

 

 

• لقراءة باقي فصول الرواية أضغط على (رواية خلف الأبواب المغلقة)