رواية خلف الابواب المغلقه الفصل الأول 1 بقلم مشاعر مبعثرة

رواية خلف الابواب المغلقه الفصل الأول 1 بقلم مشاعر مبعثرة

 

 

البارت الأول

 

#خلف_الابواب_المغلقه_1
بقلمي : مشاعر_مبعثره
سامع الصوت دا ي بابا ؟؟
: شكلو طفل ببكي الصوت كأنو جاي من بيت الجيران
: ايوا انا كل يوم بسمعو وما بخليني انوم
:امكن عندهم طفل مريض
: لالا م اظن لاني قاعده اسمع صوت امهم بتنهرهم لمن يسكتو
( في بيت الجيران )
اسكت يا ولد هسس اياك تصرخ ونوم الدنيا ليل
: جعان ي امي ما بقدر انوم كدا
: اسي م اكلت مع اخوانك؟؟
: عيشه واحده من الصباح😢
: احمد ربنا عليها غيرك بقعدو بالليالي لا اكل ولا شراب يبل الريق يلا اتحصن ونوم
: بس انا جعان شديد والله لي كم يوم ما شبعت في اكل
: ما ضروري تبلغ مرحلة الشبع الاكلتو دا بكفيك عشان تفضل
عايش فكر في الناس الاتشردو في الحدود وبياكلو من ورق الشجر والبجوعو لمن يموتو.
: بس جيرانا بياكلو من كل شي سمح شفت ابوهم شايل بطيخه كبيره واكياس مليانه حاجات ما قادر يرفعا الا بنتو جات شالت معاه كانت شايله ساندوتش شاورما في يدها اشتهيتو شديد ي امي💔 ونفسي دخلت فيه من قبيل م قادره انسى شكلو

 

: وانا ي امي شميت ريحة الاكل حلوة جايه من بيتهم قربت امشي اشحدهم
اياك تفكري في كلام ذي دا وتاني م اسمعكم تتكلمو عن حاجات الناس😡 م اي حاجه تشوفا تدخل نفسك فيها فاهم ولالا وانتي لو بالغلط شحدتي لك زول اكل بموتك ضرب نومو سريع ما تصحو لي الولد دا ما صدقت نام هو زاتو ما سكت من قبيل.
بالطريقه دي انهيت النقاش مع اولادي الاتنين وطفيت النور ورقدت عشان اقدر ابكي براحتي بطني كانت بتطلع صوت
ولدي قال لي دا صوت بطنك يا امي؟
: لالا ما هو : طيب انتي ما جعانه؟
: لالا ما جعانه : بس انتي من امس م اكلتي ي امي
: مش انتو اكلتو؟ يلا انا شبعت بشوفتكم بتاكلو
: بس…..
: ما تقول بس تاني يا ولدي ونوم الله يرضى عليك الصباح انا بفتش شغل
قبل اغمض عيوني الباب دق
الاولاد خافو طبعا نحن مافي زول قاعد يجينا وكمان في الزمن دا؟؟ انا زاتي خفت شلت عصايتي وطلعت وقفت ورا الباب
منو الفي الباب؟؟
: انا جارتكم
: جارتنا منو
: جارتكم بالحيطه انتي ما بتعرفيني اسمي ليان
فجاءة اتزكرت اني قاعده اسمع الاسم دا في بيت الجيران قمت فتحت الباب براحه لقيتا بنوته صغيره في عمر ١٣ ، ١٤ سنه كدا كانت مبتسمه وشايله في يدهاصحن فيه بطيخ أحمر وحرش 🍉انا لمن شفتو ضعفت وبلعت ريقي بس مسكت نفسي وقلت لها اهلا بك.
انا بنت جيرانكم ما حصل اتلاقينا وحبيت اتعرف عليكم اسمي ليان
: اتشرفنا وانا سمر
اولادي كانو في باب الغرفه وبعاينو على الصحن هي لمن انتبهت لهم قالت لي دي بطيخه جابا لينا بابا قطعناها كتيره وقلنا نديكم منها بدل تبوظ مع قطيع الكهرباء دا.
عاينت للاولاد وقالت لهم تعالو شيلو، انا حمرت لهم وقلت لها لالا شكرا اولادي ما بحبو البطيخ ختيها في التلاجه الرطوبه بتحفظا لكم للصباح.
ولدي قال لي بس نحن ما بنكره البطيخ
: نحن جعانين ي امي خلينا ناكل
حمرت لهم تاني لمن سكتو والبنت انحرجت عاوزه تتكلم قلت لها شكرا لك يا بنتي بس نحن ما محتاجين حاجه وقولي ل أهلك شكرا
: يعني ما حاتشيلو مني البطيخه؟ 😞
عاينت لها بطريقه خلتا تفهم انو مستحيل اقبل بحاجه مع انو صوت بطني كان فاضحني هي ما عرفت تعمل شنو طوالي رجعت مسكورة وهي شايلا صحنا في يدا.
اليوم داك انا عصبت على اولادي وشاكلتهم شكل لمن بكو بدموعهم.
في بيت الجيران ليان كانت بتبكي في حضن ابوها قال لها ولا يهمك ي بنتي انتي عملتي العليك.
اولاد الجيران ببكو عشان جعانين يا بابا ولمن شافو البطيخه في يدي عيونهم كانت حاتطلع بس امهم منعتهم ياخدو حاجه مني😭 حتى هي جعانه سمعت صوت بطنا
: ما تقسي على نفسك كدا ربنا خلقنا مختلفين وهم ظروفهم كدا
المهم حنسا مشت رقدت اما هو الاكل غلبو لمن فكر انو في اطفال صغار في البيت المجاور له نايمين جعانين قرب يمشي لهم في الليل داك بس خاف من كلام الناس وخصوصا انو جارتو مرا عايشه براها الليل داك كلو ما نام لمن اصبح الصباح مشى الصلاة وغشى الفرن اشترى عيش كتير وعمل شاي لبن كباه في سيرمس وعبى الاكياس من التلاجه بعداك جاء دق باب بيتنا.
كانت الشمس بدت تطلع وانا كنت في المصلايه بدعي ربنا يفرجا علي وولدي الصغير في حضني يبكي لمن صوتو رايح، ختيتو جنب اخوانو وقمت فتحت الباب واستغربت لمن شفت الراجل دا وهو محمل بالحاجات الماقادر يشيلا عاينت له باستنكار قال لي صباح الخير
: صباح النور
: انا والد ليان البنت الجاتكم امس بليل
: ايوااا اهلين

 

: اسمعيني يا بنت الناس انا اخوك في الله وربنا وصى على الجار الحاجه دي ما عيب وانتي ي اختي شكلك نفسك عفيفه وما بتقبلي الصدقه بس عاوزك تعتبري الحاجات دي هديه مننا واعتبرينا اهلك لمن تحتاجي حاجه اندهي على ليان دي بالحيطه ونحن لو احتجنا حاجه بننادي عليك.
انا غضبت شديد من كلامو دا م اتعودت امد يدي لزول وطول عمري عايشه بشرف وكبرياء مافي زول ولا ظرف كسرني قلت له شكرا نحن ما محتاجين حاجه منك
: انتي ما فهمتي كلامي
: لا كلامك واضح انا ما زوله جاهلة، انا خريجة جامعه وموظفه لو م الظروف ما كان نزحت لبلدكم دي ولا قعدت في بيت ايجار.
هو حس بالاستفزاز قال لي كتر خيرك والله ذدتي بلدنا الماعاجباك دي علم ونور بس دا ما موضوعنا، الحرب دي ما فرقت بين غني وفقير كل الناس عاشو نفس الظرف انا عاوزك تفكري في اولادك ديل هم ما مجبورين يتحملو الانتي بتتحمليه بسبب عنادك
: انت جايني في بيتي وبتهيني اطلع برا يلا
: ي اخت…….
قاطعتو ما تقول اخت
اولادي كالعاده كانو بتفرجو لمن طردت الراجل وقفلت الباب ولدي الصغير كان بصرخ شديد مشيت له اسمو مهيلم والكبير هاني وبنتي شادن جيت نازحه من الخرطوم بسبب الحرب.
طبعا في اثناء جدالي مع الراجل دا وقعت منو عيشه في الارض! وهاني ولدي شافا، خلاني بعد دخلت جوا جرا عشان ياخدا من شدة جوعو وبدا ياكل فيها بترابا بس الباب تاني دق بقوة، فتحو وهو شايل العيشه في يدو
الطارق كان نفس الشخص ولمن شاف المنظر دا قلبو وجعو شال العيشه من يد هاني وقال له :
يا ولدي دي فيها تراب…يتبع♥

 

• لقراءة باقي فصول الرواية أضغط على (رواية خلف الأبواب المغلقة)