رواية مغامرات عائلية الجزء الثاني الفصل الأول 1 بقلم همس كاتبة

رواية مغامرات عائلية الجزء الثاني الفصل الأول 1 بقلم همس كاتبة

 

 

البارت الأول

 

 

1
و بعد مرور سنة …
جلست على مقعد الرصيف تقبض على ورقة بين يديها … بدأت تبكي و تمسح دموعها بكم فستانها
: هو القمر بيعيط ليه ؟
نظرت بجانبها وجدت طفل سمين يمسك باقة ورد بيده
حبيبة : شكرا مش عايزة ورد
الطفل : انا مش جاي اعرض عليكي تشتري مني .. انا بكلمك عشان مش حابب اشوفك بتعيطي
حبيبة : ليه هو انت تعرفني ؟
الطفل : ابدا … بس صعبتي عليا .. انتي بنت حلوة اوي
حبيبة بابتسامة : شكرا
الطفل : صدق الي قال … الحلوة حظها مال و المعفنة بتدلع يمين و شمال .. و اديكي قاعدة قدامي حزينة من قلة حظك يا عيني عليكي
حبيبة : لا مش كدة خالص .. انا بس مخنوقة شوية
الطفل : هو انتي كمان زعلانة عشان صحابك بيتريقو على كرشك زي ما الاولاد بيعملو معايا ؟
ضحكت من بين دموعها و قالت : ده مش كرش يابني
الطفل : لا كرش .. بصي انتي حلوة اوي بس لازم تخسي شوية .. اصل انا بقالي يومين مش باكل عشان عايز اخس
حبيبة بشفقة : ليه يا حبيبي .. انت لسا صغير و شكلك حلو اوي .. ما تسمعش كلامهم دول مش فاهمين حاجة
الطفل بسرحان : انتي طلعتي طيبة اوي … اسمك ايه ؟
حبيبة : انا حبيبة
الطفل : حتى اسمك حلو .. انا بطيخة
حبيبة بضحك : اييه ؟! هما بيقولك بطيخة ؟
بطيخة : ايوة
حبيبة : طب اسمك الحقيقي ايه ؟
بطيخة : اقسم بالله بطيخة .. من يوما وعيت ع الدنيا و هما بيقوليلي كدة
حبيبة : هما مين الي بيقولولك كدة ؟ ازاي مامتك و باباك وافقو ؟
بطيخة : معنديش ماما و بابا .. اصل انا اتربيت عند المعلم بركة و هو دلوقتي الي مشغلنا
حبيبة بشفقة : طب ليه ما رحت لملجأ بدل ما تتبهدل بالشوارع
بطيخة : بكل الاحوال متبهدل متبهدل … سيبك من قصتي المأسوية دي و قوليلي ليه بتعيطي ؟
حبيبة : مفيش بس مدايقة شوية
بطيخة و هو ينظر للورقة : اااه .. دي بقا ورقة طلاقك و انتي بتعيطي عشان اطلقتي ؟
حبيبة بفزع : لا طبعا بعد الشر ايه الكلام ده
بطيخة : يبقى عشان صحابك بيتريقو على كرشك
حبيبة بضحكة : يا ابني و الله ده مش كرش .. اوك بطني كبيرة شوية عشان انا حامل
بطيخة بشهقة : حامل ؟؟؟ يبقى الراجل الي غلطتي معاه طلع ندل و ما اعترفش بالبيبي و اول ما قولتيله سابك و هرب مش كدة ؟
حبيبة بضحكة : ايه مسلسل الحقيقة و السراب ده .. على فكرة انا متجوزة و جوزي مبسوط اوي بالبيبي
بطيخة بتفكير : يبقى دي تحاليل و اكتشفتي ان …
حبيبة بمقاطعة : بس بس ما تكملش .. بعيط عشان سقطت بالامتحان .. ضروري تكسفني يعني ؟!
بطيخة : كل الي انتي عاملاه ده عشان حتة امتحان ؟! عادي يا حلوة تقدري تعوضيه و تنجحي
حبيبة ببكاء : ما دي تاني مرة اسقط بنفس الكورس .. انا تعبت اوي
بطيخة : بس انتي زي ما بتقولي انك متجوزة و هتيجبي نونو قريب و اديكي في الجامعة كمان … طبيعي مش هتقدري توفقي بين كل دول …ما انتيش سوبرهيرو يعني
حبيبة : عارفة .. بس الحق عليا من الاول كان لازم استنا لما اولد و بعدها ابقى اكمل دراسة
بطيخة : معلش .. على الاقل دلوقتي هترجعي لبيتك .. هتاخدي شور يريحك و هتاكلي اكل نضيف و لما تنامي هتنامي على سرير مريح … عندك حاجات كتير تستاهل انك تفرحي مش زيي بتطلع عيني على ما اجيب رغيف عيش يسد جوعي
حبيبة بتأثر : هو انت جعان ؟
بطيخة بخجل : اوي .. بس مش باكل عشان بخسس
حبيبة : ما تكدبش عليا .. انت معكش فلوس تشتري اكل مش كدة ؟
بطيخة : لا و الله معايا اتنين جنيه و هبيع الورد ده و بعدها هشتري عيش قبل ما المعلم بركة ياخد الفلوس مني
حبيبة بحماس : انا معايا شوكلاتة .. خد دي ليك
بطيخة : لا لا خليهم عشانك .. انتي حامل و لازم تتغذي كويس
حبيبة : هاكل حتة و انت حتة .. عيب تكسفني هو احنا مش بقينا صحاب ؟
بطيخة بابتسامة : ايوة
اخذ قطعة شوكلاته من يدها و رفعها امامه يتأملها بجوع
حبيبة بابتسامة : خد دول كمان
بطيخة : شكرا .. انا مش باخد من حد فلوس ببلاش
حبيبة : و مين قال انهم ببلاش ؟! دول تمن الورد الي معاك .. هشتريهم كلهم
بطيخة : بس الفلوس دي كتير اوي على كام وردة
حبيبة : و الله لو كسفتني هعيط اكتر
بطيخة و هو يأخذ النقود : مش بقدر اكسفك
وقفت امامهم سيارة اوس .. نزل منها و خلع نظارته الشمسية و قال : انتي مش هتبطلي الحركات دي يا حبيبة
حبيبة لبطيخة : ده جوزي .. هروح انا باي
بطيخة بنظرات حادة : استني هنا عايز اتكلم معاه كلمتين
اتجه لاوس و وقف امامه تماما
اوس باستغراب : مين ده يا حبيبة ؟
بطيخة : مش مهم انا مين .. ابقى خد بالك منها و ما تسيبهاش تنزل لوحدها .. بقالها من الصبح بتعيط و انت بتتسرمح بالعربية الغالية دي
اوس بذهول : بتعيط ؟!
اتجه لحبيبة بسرعة و سحبها له بقوة
اوس بلهفة : مالك يا حبيبتي ؟ تعبانة ؟ حاسة بحاجة ؟
حبيبة : لا .. بس مدايقة شوية ..هحكيلك في البيت امشي نروح
اوس : طيب .. يلا بينا
حبيبة : باي بطيخة
بطيخة : باي … خودي بالك من نفسك
تركته و لم تأخذ الورد … ركبت السيارة و انطلقو نحو البيت .. بينما الطفل ينظر لهم بسرحان
اوس بضحك : اسمه بطيخة ؟!
حبيبة بابتسامة : ايوة .. انت ليه نزلت بدري كدة ؟
اوس : كلمت البيت و قالولي انك لسا ما روحتيش فقلقت و نزلت ادور عليكي كالعادة
حبيبة بتوتر : اه اوك .. طب بعد ما توصلني ابقى ارجع للشغل
اوس : مالك يا حبيبتي ؟ ليه زعلانة ؟
حبيبة بخنقة : مش قادرة اتكلم
اوس : حبيبة احنا من امته بنخبي على بعض ؟ احكيلي ايه الي حصل من غير لف و دوران
حبيبة بضيق : مكسوفة اقول
اوس باستغراب: ليه ؟! انا جوزك يا بت هتتكسفي مني ؟!
حبيبة : هففف سقطت بالامتحان و هشيل المادة ارتحت كدة ؟!
اوس بابتسامة: عادي يحببتي مش اول مرة
حبيبة بغضب : اوس ما تتكلمش كدة عشان انا فعلا مدايقة
اوس : طيب انا اسف .. ملعون ابو المذاكرة الي هتزعل حبيبتي .. انتي بس اولدي و هتعوضي كل حاجة راحت بعدين
حبيبة : ما بعد ما اولد البيبي هياخد كل وقتي .. ما انت شايف فريدة اهي مش بتفضى تكلم حد من كتر ما تعبت مع آسر
اوس : طبيعي يا حبيبتي عشان لسا صغير
حبيبة : و الله ؟ و انا امته بقى هلحق اتخرج ؟
اوس : يا حبيبتي افهميني .. انتي لما تولدي كلنا هنكون جنبك و هنساعدك .. ع الاقل وقتها مش هتبقي شايلاه في بطنك
حبيبة بتوتر : خايفة اوي .. خايفة اني ما اقدرش اكون ام كويسة
اوس بابتسامة : صدقيني هتكوني احسن ام بالدنيا .. سلمي امرك لله يا حبيبتي و كفاية خوف … انا معاكي و مستحيل اسيبك
وضعت رأسها على كتفه و قالت بخفوت : دي اكتر حاجة مطمناني ..طول ما انت معايا مش بخاف من حاجة
*************
بعد وقت
دلف اوس و حبيبة لبيتهم و مجرد ان وصلو الليفينغ انصعقو من كمية الفوضى … كان يمتلئ بالاوراق من كل مكان و بالوسط تجلس حلا و تكتب على اللابتوب
حبيبة بصدمة : ايه المنظر ده يا حلا ؟؟؟
حلا : ايه ده انت جيتو ؟ توقعت تخرجو تتغدو مع بعض
حبيبة بنرفزة : ايه الي عاملاه في البيت ده ؟! ليه كل الاوراق متنتورة كدة ؟
حلا : معلش .. اصل والله انا متوترة شوية بعمل ابحاث كتير و بكرا هطلع اقول كلمة في الندوة الي نظمتها الجمعية .. يعني لازم استعد كويس
حبيبة : تقومي تبهدلي البيت كدة ؟ حطي باسكت عندك و روقي المكان بسرعة
امسك اوس احد الملفات و قرأ عنوانه
اوس بابتسامة : بحث بعنوان تأثير العنف على الصحة النفسية للمرأة …..الله .. الله عليكي يا فنانة .. و يا ترى كتبتي عن عنف بعض الستات تجاه خلق الله و لا دي ازدواجية معايير ؟
حلا : اوس ما تتريقش عشان مش فاضية اتخانق معاك
في هذه اللحظة سمعو صوت جرس الباب و اتجهت حلا لفتحه
اوس : اكيد فارس السمج
دلف فارس و قال بمرح : هيلوووو
اوس : ايه الي جابك ؟
فارس : و الله جاي اشوف مزتي و اوصلها للجمعية بتاعتها
اوس : و باباها عنده علم ؟
فارس : امم طبعا
اوس : اقسم بالله لو كنت بتكدب زي المرة الي فاتت لاكون مديك علقة موت
فارس : و حياة شنب ابويا ما بكدب ..بعدين دي مراتي و معايا عقد جواز يثبت الكلام ده
اوس : اتلم يالا .. خودها يلا و غورو من هنا
فارس بغمزة : ليه عايز يخلالك الجو و لا ايه ؟
اوس بحدة : انت ليه مصمم تتضرب يا اهطل ؟
فارس : خلاص خلاص .. امشي يا حلا
حلا : طيب ثانية وحدة بس هجيب باقي الاوراق … بقولك ايه يا حبيبة انا هروح ساعتين زمن و ارجع على طول
حبيبة : ماشي خودي بالك من نفسك
حلا : اوعي تتغدي دلوقتي ماما عملت اكل و هتبعتهولك مع دينا … لو جعانة اوي كلي حاجة خفيفة .. و ما تنسيش تاخدي الفيتامينات بتاعتك اوك ؟
حبيبة بابتسامة : اوك ما تقلقيش عليا
حلا : امشي يا فارس انا جاهزة
فارس : يلا بينا
خرجو سويا و نظر اوس الى حبيبة
اوس بحب : تعبانة ؟ اوديكي لاوضة النوم ؟
اقتربت منه و وضعت يدها على صدره تداعب زر قميصه … ثم طبعت قبلة لطيفة على شفتيه
حبيبة بدلع : ايوة تعالا نروح اوضتنا
اوس بخبث : اوبااااا … من عنيا يا حبيبة قلبي
حملها و صعد بها للطابق العلوي
**********************
دلفت خديجة اوضة بناتها باندفاع
لارا بفزع : في ايه يا ماما خضيتينا
خديجة بسعادة : بت يا غادة جدك كلم باباكي و اتفقو ان فرحك انتي و زياد بعد شهر
اغلقت غادة المصحف بهدوء و وضعته بجانبها
غادة بابتسامة : على بركة الله يماما
خديجة : اخيرا هيجي اليوم الي اشوفك بيه عروسة يا قلب امك
لارا بضيق : يعني خلاص هتسيبينا يا غادة ؟
غادة : مستحيل اسيبكم .. هفضل اجيلكم على طول يا حببتي
لارا : كلكم بتقولو كدة و بعدها بتنسو ان ليكم اخوات .. اهي كارما عايشة مع اختها بنفس البيت و يا دوبك بتشوفها بالصدفة
خديجة : معلش يا حبيبتي كل بنت و مصيرها الجواز .. بكرا انتي كمان هتتجوزي و تتلهي في بيتك و عيالك
لارا : انا مش عايزة اتجوز … مش هسيب البيت الي اتربيت بيه و الناس الي بحبهم عشان خاطر راجل
خديجة : طيب طيب ما تفرقعيش بوشي …اساسا انتي لسا قدامك مشوار طويل .. الهندسة مش سهلة يا لارا …لازم تركزي بمذاكرتك كويس اوي
غادة : ماما انا هلبس و اروح اشوف زياد .. قولي لبابا عشان اكيد هيسمعني شوية كلام يعكنن عليا
خديجة : قولتله يا حبيبتي ما تخافيش .. انتي فرحك قرب و لازم تتكلمي مع زياد و تتفقو على كل حاجة قبل ما نروح هناك
لارا : ضروري نروح الايام دي ؟
خديجة : جدك قال لازم نكون هناك بكرا الصبح
لارا بخنقة : هففف هنروح و نفضل نتخانق زي المجانين
خديجة : منا جاية انبهك انتي و اختك .. ده مش فرح اي حد و خلاص …ده فرح اختك يا لارا .. يعني اي مشكلة هتعملوها هتأثر علينا احنا فخدو بالكم كويس اوي و ما تتخانقوش مع حد
غادة : ما تقلقيش يماما .. ما اعتقدش يحصل حاجة زي المرة الي فاتت
اتجهت غادة لدولابها و اخرجت ملابسها
خديجة : هتقابليه فين ؟
غادة : هنروح نشرب حاجة في كافيه مش فاكرة اسمه
خديجة : ماشي يا حبيبتي بس حاولي ما تتأخريش … انا هوضبلك حاجتك الي هتروحي بيها
لارا : انا عايزة افهم حاجة وحدة بس .. طالما هي هنا و العريس هنا و حتى شقتهم هنا .. هنروح سوهاج نعمل ايييييه ؟
خديجة : بطلي دبش يا بت انتي انثى … سوهاج بلدهم و قرايبنا كلهم هناك
لارا : بس فرح اوس و حبيبة كان اخف علينا .. تعبنا اوي بفرح تميم و فريدة و هنفرهد بفرح دول برضو .. ليه ما نعمله هنا يوم واحد و خلاص
خديجة : و الله ؟! ده انا مستنية اليوم ده من يوما خلفتها عشان اعملها فرح كبير .. لما تبقي تتجوزي انتي نبقى نعملك فرح هنا … كفاياكي فتي يا لارا و اتلمي
غادة : انا جاهزة … عن اذنكم
لارا : هتروحي تقابلي خطيبك كدة ؟!
غادة : ليه في حاجة على هدومي ؟!
لارا : ايه الي عاملاه بنفسك ده ؟ ابوس ايدك حطي شوية ميكاب هتطفشي الراجل مش كفاية الجلابية دي ؟
غادة : اولا دي مش جلابية ده حجاب ماليزي .. ثانيا هو بيحبني زي ما انا و اكيد بعد الجواز مش هفضل متزوقة قدامه 24 ساعة .. و ثالثا و الاهم ان حرام احط ميكاب و انا خارجة
لارا : ده انتي اوفررررر اوي بجد
خديجة بحدة : لارا اتلمي .. ما ترديش عليها يا غادة .. شكلك حلو اوي و احسن حاجة عملتيها انك اتحجبتي … الي بيقرب من ربنا قلبه يرتاح يا بنتي
غادة بابتسامة : ربنا يخليكي ليا يماما .. عن اذنكم
خرجت من الاوضة
خديجة : اختك الي بتتريقي عليها دي من ساعة ما التزمت بقت انسانة تانية .. ليه مصرة انك تجرحيها حتى و هيا بتعمل الصح ؟ انتي المفروض تاخديها قدوة ليكي .. مش شايفة حياتها بقت احسن ازاي بعد ما ربنا هداها ؟ مش شايفة علاقتها بزياد قد ايه بقت احسن ؟
لارا بضيق : لو مهما عملت هتفضل غادة احسن مني بالنسبالك … منا كمان يماما عملت انجاز و جبتها الاولى بالثانوية العامة زي ما كنتي عايزة .. ايه الي لازم اعمله كمان عشان تمدحيني زيها ؟
خديجة : لارا انا فخورة بيكي زي ما انا فخورة باختك .. و اكيد مبسوطة بانك تفوقتي بالمدرسة .. بس الي يهمني اكتر هو سلوكك و تصرفاتك مع الناس الي بتحبك .. اختك دي بعد كام يوم هتسيبنا و تروح لبيت جوزها يعني بلاش تجرحيها و تزعليها بكلامك الي زي الدبش ده
لارا : هو انا قولت ايه ؟ منا بتكلم عشان مصلحتها .. عايزة زياد يفضل يحبها و شايفها اجمل بنت بالدنيا
خديجة : مهو بيحبها و شايفها كدة من غير لا ميكاب و لا لبس عريان .. ما تخافيش عليها و ركزي بنفسك يا حبيبتي
*********************
في فيلا اوس
دلف فارس و معه حلا و دينا
دينا : حلة المحشي دي تقيلة اوي .. خد يا فارس وديها المطبخ
حلا بنهم : امته هناكل هموت من الجوع
فارس : اطلعي يا دينا اندهي لحبيبة قبل ما البت دي تخلص ع الاكل كله
دينا باستغراب : حبيبة مش بتنام بالوقت ده .. غريبة ليه ملهاش حس في البيت
حلا : يمكن اوس معاها فوق
فارس بخبث : اممم يا ابن المحظوظة يا اوس يقدر يستفرد بمزته وقت ما هو عايز
حلا بحدة : فارس اتلم و روح رص الاطباق ع السفرة .. اطلعي يا دندن اندهيلهم
دينا : هو اوس هنا فعلا ؟
حلا : ايوة عربيته لسا برا
دينا : طب هطلع اشوفهم
صعدت دينا للطابق العلوي و طرقت باب اوضتهم
دينا بصوت عالي : يلا يا حبيبة الاكل جاهز .. اوس هاتها و انزلو
تململ اوس و فتح عيناه … نظر الى الساعة بذهول
اوس : يا انهار اسود .. انا اتأخرت اوي
استيقظت حبيبة و قالت بنعاس : فيه ايه ؟
اوس بهدوء : قومي يا حبيبتي عشان تاكلي و بعدها تبقي تكملي نوم
حبيبة بكسل : هو احنا نمنا ازاي ؟
اوس : يعني انتي مش فاكرة ؟ تحبي افكرك يا روحي ؟
نظرت الى نفسها و كمشت الغطاء بسرعة
حبيبة بخجل : بطل قلة ادب في ناس في البيت
اوس : بقولك ايه في بيت جدي كنت بسكتلك بمزاجي .. انا ما صدقت اتجوزنا عشان نفضل لوحدنا .. و انتي ما شاء الله لميتي العيلة كلها عندي تحت
حبيبة بضحكة : ما عشان مفضلش لوحدي .. افرض حصل معايا حاجة و انت بالشغل اعمل ايه وقتها ؟ و المسكينة حلا اتمرمطت معايا دي بقالها اسبوع عندي ما بتفارقنيش خالص
اوس : ما ده الي حارق دمي .. اختك دي مفترية و محسساني اني بتحرش بيكي .. و فوق كل ده فارس الرخم رايح جاي عندنا عشان خاطرها .. انا تعبت من الحوار ده
حبيبة : طب خلاص خلاص اهدى كدة يا حبيبي و تعالا ننزل
نظر لجسدها فقد كانت ترتدي ملابس للنوم جريئة جدا
اوس: هتنزلي كدة يا هانم ؟
حبيبة بخجل : منا هقوم اغير يا اوس في ايه ؟ انت ليه متنرفز كدة ؟
اوس : مفيش يا حببتي بس فوت اجتماعين ورا بعض و دي اول مرة بحياتي اعملها .. ده انا حتى ما بلغتهمش اني هتأخر
حبيبة : و فيها ايه ما انت المدير
اوس : حتى ولو .. برضو احترام المواعيد مهم جدا في البزنس يا روحي
بعد وقت … نزلو سويا للطابق السفلي
دينا : اخيرا نزلتو .. الطفسة دي كلت وش الحلة كله
حبيبة : هو انتي الي عملتي الاكل يا دينا ؟
دينا : لا مامتك .. انا بس ساعدتها شوية .. اتفضلو يلا
جلسو جميعا على طاولة الطعام
فارس بتلذذ : الله الله .. تسلم ايدها حماتي حياتي .. الاكل تحفة بجد
حبيبة بابتسامة : مفيش حد بيعرف يعمل اكل زي ماما
حلا : بس لو زودت جنبهم شوية محشي بصل كان هيبقى احلى .. نفسي فيه اوي
دينا : هبقى اقولها المرة الجاية … اوس جدو كلمك ؟
اوس : اممم .. قالي ان فرح زياد و غادة بعد شهر
دينا بسعادة : يبقى لازم نروح سوهاج بكرا .. اخيرا يا رب
حلا بخبث : للدرجادي واحشك يا بت ؟
رفعت دينا يدها لتظهر دبلتها و قالت : طبعا خطيبي و وحشني اوي
فارس : لا يا دينا مش لايق عليكي الدلع ده .. ارجعي دوري على مصا..ص د..ماء احسن
دينا : بطل رخامة يالا .. مفيش بعد الضبوطة بتاعي
اوس : حبيبة انا كلمت اهلك و هنروح كلنا مع بعض
حبيبة بقلق : ازاي هنروح و انا ممكن اولد باي لحظة ؟! ……………يتبع
( موعد النشر يوميا الساعة 10 مساءً )
مغامرات عائلية 2
همس كاتبة

 

 

• لقراءة باقي فصول الرواية أضغط على (رواية مغامرات عائلية)