رواية شمس ضلامي الفصل الثامن عشر 18 بقلم ليلي

رواية شمس ضلامي الفصل الثامن عشر 18 بقلم ليلي

 

البارت الثامن عشر

 

 

خرجت هازة لمونيكة كانجر فرجلي وكنراري بلمونيكة لي كانت مصورة ليا فهيئة بنت صغيرة حسبتها بنتي هبطت فدروج كنسكت فيها وكنراري بيها وعيني سايلين بالدموع حتا سمعت صوت ديال الضحك هزيت راسي كان هو ومرتو هازها وهي كاضحك ااااااخخخ فااش فكرنيي اااخخخ
انا:شششوووووت اتفيقولي بنتي شششت
مرتو(شافت فيه):مال هادي
هو:مزال مافهمتي راسك اااه ولا جيتي تدي وسخك هه احسن مادرتي
مرتو(كاتبعكك):لا احبيبة شباليك نديوها خدامة ترتب لينا دارنا الجديدة كييف عرفتي راني حاملة وحنا خايفين على ولدنا ياك احبيبة
3
هو:مممممم بصح اعمري طلابات هادي خدمتهم ايوا اش قلتي
كان همي مع بنتي لي كتبكي فيدي!! واخا كواتني هضرتهم مي سكت
انا:ششت بنتي بغات تنعس
هي:هادي هرب ليها مافيهاش
هو:ههههه متلا كتسناني نشفق عليها
هبطت خليتهم كيضحكو وقلبي كايتكوا..
وصلت لباب ورجعاتلي الداكرة لووور نهار اول مرة ندخل هنا فرحانة ملي هزني وحنا فرحانين بجوج ااااه اش درتي فيا اااخ
من تما خرجت كنضور فزناقي جارة معايا ديك لمونيكة لي كنشم فيها ريحتو وريحة دكرياتنا بجوج..
بقيت زنقة تلوحني لزنقة غادة كانجر فرجلي متكية علحيوط لدرجة كيشوفوني دراري صغار كيهربو كندوز كيدخلو ناس ويسدو بابهم معرفتش شنو دنبي؟
اشدرت؟ بغيتو!! تقت فيه! ماقتلتش لعكس قتلني انا..ورجعت مسطية!!!
*كنراري: كندوح بيها بيدي حركة كنديروها ملي كنهزو شي دري صغير باش ينعس

جريت رجلي حتالبحر حطيت مونيكتي برا ودخلت كل خطوة كتنزل دمعة من عيني دمعة جامدة لبحر هاج حسيت بيه بحالا حس بيا بقيت داخلة حتا حسيت بيه بدا كايجرني ضرت شفت ورايا كانو شي دراري كيلعبو بمونيكتي
قلبي تهز خرجت كنطير حيدتها ليهم وطحت للارض معنقاها كنقلب فيها خايفة عليها معرفتش معرفتش عقلي شنو كان فيه ديك الساعة.. نضت ضربت دوك دراري وطحت فلارض فاشلة..ضارو بيا كلهم كيرددو بصوت عالي
(وااالمسطية والحمقا والمسطية والحمقة)
تجننت تجننت هضرتهم ضراتني فراسي
انا(غوت على حر جهدي): انا ماشييي مسطية اناااا مااشيييي مسطييية شووووف شوووفنيي شحال زويينة انا بنت دارنااا انا كنبغيييييه لالالا انا نسيتو انا مكنعرفوووش هو تزوج لا هو تزوج مم ممر مرتووو حااملة غايوللد انا انا نسيييتوو انا قتلت ماما هو قتليا بنتيي لا لا ميمكنش انا مااشييي مسطية انا غييير بغيتو اناا بعقليييي قلبي لي داه انا بعقليي هو قتلي بنتي انا بنت دارنا لا لا انا قتلت ماما شوهت با انا مسخووطة انا بغيتو انا انا تقت فييييه لا لا ميمكنش فوتوووني عليكم انا بعقلي لا انا ماشي مسطية لا ميمكنش انا كنبغيه وهو لا انا ماشيي طلابة انا بعقليي انا طبييبة انا قريت فكندا انا بغيت ندير لخير هو لا هو عدبنيي هو قتلني وقتل بنتييي..

ماستوعبتش هضرتهم مقدرتش نتيق بلي وصلات بيا الحماق لا ميمكنش حيت بغيتو ولعب بيا رجعت حمقة ومسطية لا ميمكنش.

.ونا كنغوت الدراري هربو ولكن وليت كنشوف بللاصتهم هو ومرتو ولدو امينة امال فتيحة ماما بابا با براهيم كاع الناس لي شفت فحياتي هوما لي كيضورو بيا وكيغوتو ويقولو ليا مسطية صافي عقلي فديك اللحضة تبلوكا عقلي طاار معرفتش شحال دلوقت وناا كنغوت ونتركل تما..

شوية كانحس بشي حد كيحرك فيا بجهد ضرت كانو جوج دراري كبار وبنت
دري1:بشوية عليك اختي
البنت(عنقاتني):مالك اختي
انا: اشنو لي مالي اشنو مبقيت باغا والو غير بعدو مني بعدو هه قالت ليك مالي هه عرفتي مالي؟ بغيتو اختي عشقتو اختي ضحيت بكلشي علا ودو عرفتي اش دار قتلني وراه تزوج وبغاني خدامة فدارو ههه قتليا ولدي وقتل ليا حياتي ههه نزيدك؟ اه نزيد نزيد غتاصبني قدام صحابو وخلا صحابو يدوزو عليا…ههه براكة يقدر ياك
الدري2:لاااحول ولا قوة الا بلله
انا:هههه ودبا كيقولو عليا مسطية لا لا انا مامسطياش انا بعقليييي انا بعقلي القلب لي تكوا لقلب لي مات
البنت(شافت فالدراري لي معاها):شنو انديرو معاها دبا
دري1: معرفتش ولله هاد زامل لي دار فيها هاد لحالة خاصو يتعاقب
قفزت هه خايفة عليه!!:لالا فوتوه لا متقربوش ليه واخا قتلني مبغيتوش يتخبش ولو خبشة صغيرة
هربت كنغوت كلشي تجمع عليا مبقيتش عارفا نوصف ليكم احساسي ولكن صافي كلشي تجمع عليا…
دازت يام ويام كتيرة بالضبط تلت شهر ونا مليوحة فالزناقي لي بديتو فمدينتي كملتو هنا نعاس فلبحر كناكل الشياطة كنشرب لما مالح كنتغتاصب كنتعنف لفضيا وجسديا كانو الناس فلول كيشوفوني كيهربو ولكن من بعد ولفوني وقصتي داعت ولاو كايشفقو عليا وكاين حتا لي كايضحك عليا..
وليت كنمشي وكنهضر بوحدي هادشي لي كان كيباليهم هوما ولكن انا كنت كنهضر مع طيف ماما وولدي وهو نيت لي كانو ديما كيبانو ليا..عمري تفرقت على مونيكت بنتي مرة كاتباليا مونيكة ملي كنكون فوعيي ومرة خرا كنشوفها فصورة بنتي..

حتا وصل واحد النهار لي زاد غير لي حياتي..
كنت كنضور حدا لبحر جارة لمونيكة وساهية بعيد حالتي حالة حوايجي لي مقطعين عامرين وسخ ودم (ديال ليغيكل..ديال راسي يلا نزف..ديال الدق)..
دخلت فلما نغسل وجهي حطيت مونيكتي وهبطت كنغسل فوجهي حتا كنشوف لمونيكة داها لما بقيت تابعاها وكنبكي جبدتها بلكشايف خرجت معنقاها وكنمسح فدموعي بجهالة..هزيت عيني وهنا زاد قلبي تقسم زاد تكوا..كان هو ومرتو دايزين يدو فيديها كيضحكو بجوج شوية وقفو وهبط باسليها كرشها لي كانت منفوخة وقف باسليها راسها وجرها من يديها كيلعبو فلما ماردوش ليا لبال ولا عرفوني..نزلات دمعة حارة على خدي منقدرش نوصف ليكم باش حسيت منقدرش احساس صعيب بزاف ولله مقديتش نبقا نشوفيهم هكاك هزيت بنتي(لمونيكا) عنقتها بحالا مبغاهاش تشوف باها شنو كايدير خرجت من لما معنقة بنتي ومع كل خطوة كنضور ورايا وكنشوفيهم عايشين حياتهم..
مقديتش نصبر نزلو دموعي بكترة بغيت غير نهرب بغيت غانغبر من هاد الدنيا مبقيتش باغا نزيد نعيش بقيت كنجري تاخرجت من تما..بقيت كنجري ومعنقة بنتي والدموع مضببين ليا الشوفة محسيت براسي حتا تهزيت تالسما وتخبطت فلارض كنسمع الناس كيغوتو وهضرة كتيرة كاضور
واحد لمراة:بنتي ياك لباس
واحد لبنت:اااه اختي تلات بيك ليام شوف فين وصلتي
واحد الراجل:علاش كاتعرفيها ابنتي
لبنت:لا اعمي غير كنت تلاقيتها واحد لمرة هنا قصتها قصة تسطات بسباب واحد
انا(بزز باش كنهضر):انا انا مامسطياش..مامسامحاهش…مام..مامسحاهش دنيا و اخرة..عع..عطييوني بنتي..بب..بنتي

بقيت كنجبد يدي باش نشد بنتي حتا عطاتها ليا واحد لمرا ضورت عيني لجنب كان دايز شاد فيديها قطعو الشانطي كيضحكو
كانت هديك اخر هضرة نقولها و اخر صورة نشوفها قبل مانغيب..وكانت اخر مرة نشوفو فحياتي هي هديك..اااه اخر مرة شتو كان مع مرتو مع مرتوو وولدو
حليت عيني كنت فواحد لكلينيك دايرين ليا سيروم ومضورين على راسي فاصمة..بقيت كنحل عيني ونسدهم حيت الضو عماني حتا دخلات عندي واحد الممرضة بلباس السبيطار
هي:على سلامتك اختي
مجاوبتهاش
هي:لقاوك مضروبة بطموبيل فالشانطي و من زهرك شافك احد الاطباء ديالنا وجابك لهنا هو خلص كلشي..
مجاوبتهاش
هي(جلسات جنبي): من الورم لي عندك فراسك نقدر نفسر حالتك لي وصلتي ليها وعدم اجابتك ياك
مجاوبتهاش
هي:بنتيليا ماتصدمتيش كنتي عارفا ياك..ماعرفتش اختي اش وصلك لهنا بنت آية فالجمال معرفتش ولله الدنيا كاضور اه راه لمونيكة لي كانت معاك راها حداك وليشافيك اختي
مجاوبتهاش غير كنشوف فالسقف حتا بانت ليا راجعة
هي:حم ختي نسيت ماقلت ليك.. غايجيو دبا غاينقلوك لسبيطار اخر
ضحكاتني كنت عارفاه سبيطار لحماق ضحكت بالجنب وقلت ليها بصوت منخافض: وصلني لسبيطار لحماق ياه لهاد درجة الحب صعيب
نزلات دمعة من عينيها جات باستلي راسي ومشات..نضت انا لطواليط ودزت شت لمراية تخلعت وفنفس لوقت ضحكت على راسي كانت حالتي تشفي لعدو صفرة تحت عيني زرگ فمي مجروح وجهي فيه اتار ديال الضرب والدم شعري معلك طاير فالسما حوايجي مقطعين واش هادي هي انا؟ لا لا انا مت نهار بغيتو نهار عرفتو ومن بعد وليت كنموت فكل ليلة كنزيدها معاه ولحد دبا لي شادة ستيلو وكنكتب ليكم قصتي مزال كنموت هه مي متخافوش قريبة نموت بمرة..

رجعت هزيت مونيكتي وجلست كنضحك معاها وكنلعب معاها ملي كنحس بيها كتبكي كنعنقها وكنبدا نسكت فيها..شوية تحل لباب بانتليا ماما وهو لابسين لباس لبيض وداخلين عندي
هوما:يلاه غانديوك معانا دبا
تخلعت مبغيت نمشي فين بقيت كنغوت ومكنززة على بنتي خايفا عليها تاهيا:لا لااا مبغيييتش نمشي معاكم مبغيتش مااماا ديه وسيرو ديييه عند مرتو انا مبغييتش سيروو سيروو خليوني مع بنتيي سيروو سيرووو مبغيييتش
بقيت كنغوت حتا تسرفقت حليت عيني كانو اطبة ضايرين بيا عاد تأكدت بلي صافي انا تسطيت ااااه انا حمقة انا هبلت صافي وليت جسد دون عقل او قلب صافييي تسطيييييت انا صافي الحب سطاني ااه الحب خلاني فسبيطارات لحماق كنتلاوح..اه انا حمقة انا مسطية انا بغيتو وتسطيت انا تقت فيه وتسطيت انا ضحيت على ودو وتسطيت انا صبرت عليه ومعاه وتسطيت انا عشقتو وتسطيت واش كان هدا احسن جزاء نتجازا؟..
دگو ليا ابرة تكالميت بيها وخرجوني هزوني ركبوني فواحد طموبيل بحال لامبيلانص جلست شادة بنتي وساكتة عقلي واقف نقدر نقوليكم فديك لقطة بحالا معنديش لعقل يعني مكنفكر والو منعازلة كليااا على العالم الخارجي..دازت مدة وقفنا نزلوني رابطيني ههه خايفيني لانهرب ونا مبقالي اصلا فين نهرب لبلاصة لي بغيت نهرب منها دبا هي راسي ودكرياتي..
كانت فالاستقبال واحد لمرا تكون فالعشرينات زوينة وبشوشة محجبة دخلوني ومشيت معاها كنشوف فجنابي ناس كيغوتو ناس كايبكيو ناس كيضحكو بالجهد فصراحة محيط يزيد يسطيك كت مانتا مسطي..زدت معاها

هي(بابتسامة):اهلان ختي لباس
مجاوبتش
هي(هضرتها كلها كاتقولها وهي مبتاسمة ليا): شتي دبا تخليني داوية بوحدي مهم نعرفك على راسي..سميتي فاطمة 28 سنة عندي بنيتة ليخليها ليا ونتي؟
ااخ فاش فكراتني ااااخخ تانا كنت انكون بحالها طبيبة وعندي بنتي وعايشة مع دري لي بغيت وضحيت وصبرت معاه ولكن…
مجاوبتش
فاطمة:انا جيت جديدة لهاد السبيطار شفت ضوسي ديالك وبغيت نهتم بيك انا وانشاءلله اتخرجي من هنا بيخير وغاترجعي لحياتك كيكنتي لواليديك وصحاباتك اترجع تكملي حياتك مع الناس لي كاتبغي..
مكملاتش هضرتها ملي شافت دمعة ساحت من عيني..سكتات وزادت معايا تاوصلنا لواحد لبيت لي كملت فيه ماتبقا من حياتي
فاطمة: ههه عرفتي شنو انا لي ختاريت ليك هاد لبيت بعيد على الصداع حسيت بيك بلي نتي مااشي مسطية نتي بعقلك نتي غير مكوية فقلبك ياك انا حاسة بيك
جراتني دخلاتني لدوش مع بدات كاتعريني وقاست ليا شعري بديت كنغوت ونهرب منها خفت بزاف معرفتش كيفاش معرفتش ولكن خفت خفت تفكرت يامات الاغتصاب تفكرت الوعد لي عطيتو بلي تاحد مغايقيس ليا شعري من غيرو ههه ولكن قاسوني وقاااسووووني بزاف
بقيت هكاك وهي كاتحاول تفاهم معايا ولكن مقديتش مقديتش ولله شداتني هيستيرية دلخوف ملي شافتني هكاك بانتليا تاهيا خافت عليا جابت واحد لبرا دكاتها ليا طحت مغيبة..من بعد فقت لقيت راسي متكية فوق لبياص..وقفت كنشوف فراسي كنت نقية ولابسة لباس خاص بالمرضى شعري نقي ومسرح نازل مع ضهري قريب يوصل لارض سمعت صوت ضرت نشوف كان هو متكي فوق لبياص وكيشوفيا بشوفات كلهم حقد

هو:ياك خنتيني خليتيهم يقيسو ليك شعرك لا وخليتي ليهم لحمك..(سكت وكمل بطريقة مستفزة)ياك اشمس ضلامي..
غوت على جهدي خفت بزاف وليت عايشة فالرعب كلمة خنتيني بقات كاتردد فبالي نضت كنغوت تكمشت فقنت لبيت كنشوفيه متكي فوق لبياص كيضحك بالجهد وحداه مرتو متكية عليه بقيت مطرطقة عيني وكنغوت والدموع سايلا من عيني شلال تكمشت وجمعت ركابيا عندي كنترعد
انا :مخنتكش مخنتكش نتا لي خنتيني نتا لي مشيتي علاش جاي دبا علاش سير سير انا مامسامحاكش انا مت انا تعدبت نتا عدبتيني انا بغيتك ونتا قتلتيني..
بقيت فديك لحالة كندوي مع راسي حتا دخلات فاطمة كاتجري مخلوعة شافتني كنشوف فييه هو ومرتو حالة عيني على الجهد والدموع سايلين من عيني هي بانليها بلي مكنشوف والو حيت فالاصل مكاين والو ولكن اش ندير ههه رااانيييي مسطيااااا راه عقليييي طاااار..جات بغات تقربليا بعدت ورجعات جلسات فوق البياص لي صافي ولا كيباليا خاوي
هي(تنهدات وقالت):شوفي اختي ملي قريت ضوسي ديالك كان خاوي فيه فقط انك مدة ونتي فزنقة وكلشي عرفك مسطية بغيت نقولك نتي بعقلك اه نتي بعقلك عارفا قلبك لي مكوي مي غانفوتو هادشي نشاءلله خاصك غير الرغبة اه وب..بالنسبة لمرضك غاتبقاي تاخدي دوا لي غايخفف عليك حدة المرض وانشاءلله مؤسسة محمد الخامس للتضامن واقفا معانا وملي توافقي نقدرو نديرو ليك لعملية صافي
بقات كدوي شحال بوحدها ونا ساهية مكنجاوبش حتا عيات وخرجات شوية جات جابت ليا لماكلة ودوا..

حطات ليا لبلاطو قدامي وهزات دغمة بغات توكلني..ماتسوقتش ليها ايييه انا حمقة اه مسطية واخا كتقوليا هي بلي انا مامسطياش ولكن انا عارفا راسي مسطية وعقلي مشا ولكن مااشي مشللة باش يوكلني شي حد..(اه مسطية علاش لي عاش لي عشتو غايبقا بعقلو؟)
بتاسمات وقالت:احسن حاجة تعتامدي على راسك ونا هنا معاك حتا ترجعي كيف كنتي نشاءلله
كليت وشربت الدوا بالسكات وتكيت فوق لبياص جلسات حدايا كتشوفيا
هي:نقوليك واحد لحاجة
مجاوبتش
هي:نتي زوينة بزاف ما شاءلله هه عويناتك الزرق كيسطيو ورتيهم من باباك ولا ماماك
مجاوبتش
هي:مممم غاتكون ماماك شعرك كحل وقوي تاهوا ماماك ياك هه اصلا لبنت كاتطلع لمها ياك
مجاوبتش
هي(تنهدات):ولله ماعرفت اش وصلك لهنا ربي معاك اختي اه لقيت واحد المصحف فازك ومقطع فجيب ديالك راهوا فلمجر حداك
خرجات وخلاتني تم كانضور فراسي..شوية تسمعات صفارة مجهدة شديت فراسي ضرني بداك الصوت بقيت جالسة بلاصتي شوية كنسمع الصداع والهرج براا حتا تحل عليا لباب ودخلات عندي فاطمة
هي:هه حم سمحيلينا هاد الصوت كيعلن على وقيت لخروج كانخرجو فيه لمرضى يضربهم شوية دلبرد(جلسات حدايا)هاد السبيطار بيني وبينك غايسطيني انا شي نهار شوف غير هاد السفارة بحالا عايشة فشي فيلم د الرعب ولكن ماتخافيش كلشي غايكون بيخير هه وشتي انا نبدل سبيطار كامل على ود هاد الزين هه فصراحة نهار شتك حسبتك ختي الصغيرة ولله

(سكتات مدة وكملات) ااااه فخبارك كانت عندي ختي كانت نور عيني قبل خمس سنين شدات لباك ديالها بنقطة مزيانة تخاصمت مع دارنا غير باش نسيفطها تقرا برا خدمت وتسلفت تا سيفطها دوزات عامها لول ونجحات.. دارو صحاباتها شي حفلة ووو(هبطات راسها ونزلات دمعة من عينيها)..تغتاصبات فديك الحفلة من بعد هزوها لسبيطار لقاوها دخلات فحالة اكتئاب من تما داوها لمصحة الامراض النفسية دوزات فيها سيمانة متقبلاتش لعلاج وفواحد ليلة جبروها مقتولة من بعد البحت لقاو بلي مغتصبها هو لي قتلها..وهدا سباب لاش خدمت فهاد لخدمة
كنت كانضن الوحوش عندنا غير فالمغرب رغم انني كنت عايشة برا كانت كاتباليا عقليتهم متحضرة مي… فكل انسان كاين ذئب
تغرغرو عيني بالدموع..هزيت راسي فيها كانت كتمسح دموعها
هي:ماعلينا يلاه يلاه(رسمات ابتسامة امل على محياها)..يلاه على غير لمرضى انديك لواحد لبلاصة زوينة مافيهاش الصداع..(قالت بصوت منخافض)..حتا ختي كان عزيز عليها لكالم..
نوضاتني لبست فرجلي صابو بيض وجراتني خرجنا حتا وقفت كنشوف انعكاس صورتي فواحد شرجم كنت بكسوة واسعة فلبيض فوق بشرتي لي بيضة عليها اتار الضرب..كنت جلد عل العضم للحضة قلت مع راسي لو متلت فيلم رعب كان غايتشهر
خرجاتني لساحة لي فيها المرضى كان جو كايخلع وكايضر فالراس بنادم كلو لابس لبيض شي كايغوت شي كايضارب شي باغي يقتل راسو والاطباء شادينو.. فواحد لقنت بعيييد بان ليا هو لابس نفس لباسهم وكيضحك بهيستيرية وكايشير ليا بقيت ساهية يلاه بغيت نغوت جراتني فاطمة
هي:يلاه يلاه هادي ماشي بلاصتك

جراتني وضرنا لمورا سبيطار كانت جريدة تما فيها شجرة عالية مضللة مشينا جلسنا تما هي كاتهضر ونا ساكتة وساهية بعيد شوية عيطو ليها وناضت خلاتني جالسة تما بوحدي كنشوف فجنابي وكنسمع فودني همسات صوتو ضرت مخلوعة مالقيت والو بقيت كنشوف جنابي يلا ضرت عليمن كيجيني الصوت من ليسر ولعكس كدلك بقيت هكاك كانضور فراسي بسرعة مخلوعة حتا قفزت ملي تحطات شي يد على ركبتي يلاه بغيت نغوت سد ليا فمي..كان رجل كبير فلعمر كرشو سابقاه لابس لباس رسمي وملسق بادج فصدرو كان مدير المشفى
هو:ششششششت ماتخافيش ازين ششششت
بقيت كنبعد وكنحاول نحيد ليه يديه لكن دون جدوى..دفعني لارض بقوة ونزل بيديه من صدري حتا لكرشي..ضورت وجهي لجنب بانليا بلباسو الابيض مربع يديه وهاز حاجبو كايشوفيا مبتاسم..تجننت عضيت هداك يلاه بغيت نوض طيحني وجر ليا شورط لي لابسة ملتحت عاود هزيت عيني فيه كان باقي واقف وابتسامتو عاد كتزيد تعراض..ماحملتش راسي او نقولو عييت من الاغتصاب..ضورت عيني كانت واحد لحجرة مليوحة فلارض هزيتها عطيتها ليه لراس جا طايح تكمشت لور ساكتة بلا بكا..هزيت راسي كنشوفيه كان غادي راجع بلور وعينيه مفيكسيين فيا ضاهر عليهم لغضب..حتا قفزت
فاطمة:نارييييييي اش درتي اش درتي(بقات كتشوف ففمي كنضن شافت اتار يديه)لا متقوليهاش تانتييي
عنقاتني بقوة كنحس بدموعها كينزلو فوق راسي:ششششششسست هاد لحمار ليوم غايلقا جزاءو ليوم لكاميرات خدامين ماتخافيش براكة من الاغتصاب برااكة

نوضاتني داتني لواحد لبيرو عند واحد ختنا من لباسها عرفتها طبيبة
فاطمة:دااكشيي لي قلتيي ليا صحييح هاهوا حاول يتعدا عليها تاهيا
شافت فيا بشفقة:اش قلت لييك ااش ومتيقتيش كتقولي ليا مايمكنش مهم شوفي انا عرفتو غايمشي ليها كيما كيدير مع كل وحدة جات جديدة مهم سمحيليا تعمدت نعيط عليك باش نخليها بوحدها ومشيت نخدم لكاميرات حيت عرفتو ايكون طفاهم من بعد سيفطك ترجعي عندها مي تبارك لله عطاتو علاش كايقلب ودبا غانغبروه بمرة
حنيت راسي وخرجت.. من ديما كنت آلة بين يدين الناس يديرو بيا لي بغاو خرجت غادة وسط داك الهراج ولكن عقلي كان مركز مع صوت واحد فيهم لي هو صوت بنتي لي كتبكي مشيت كنجري كندخل من بيت وكنخرج من واحد اخر حتا وصلت دخلت لقيت ماما جالسة شاداها
ماما:ششششششت هاهيا نعسات شحال حلمت بهاد للحضة لي نربي فيها ولادك(لاحت بنتي بجعرة وناضت)ولكن نتيييي قتلتييينيييي قتلتييينييي قبل مانعيش هاد اللحضة قتلتيني
فاطمة(مخلوعة):بسسملله علييك مالك ماالك اشنو كتشوفي فلارض مالك؟!!! علاش هربتيي؟هضريي جاوبينيييي نسمعك جاوبيني مالك شنو بيك خوي قلبك عليا منااش دزتي اش عشتي ماالك
شفت فيها بكل برودة ااش غانعاود ليها اااش..ضورت راسي بانتليا لمونيكة محطوطة فوق لكوافوز مشيت هزيتها كنمشط ليها فشعرها وساهية فهادشي لي وصلت ليه هاد التسطية هاد لحماق هاد لعيشة..
فاطمة(تنهدات):سمعيني حتا لين اتبقاي هكا تالين ها؟الناس لي عدبوك ووصلوك هنا واش وقع ليهم بحالك؟ علاش بوحدك لي دايرا فيك هاد لحالة
ضورت راسي لبياص كان متكي فوقو كيلعادا هاز حجبانو وكيضحك قالي:ايوا جاوبيها

غمضت عيني وحليتهم باش منشوفوش جريت مونيكتي ومشيت تكمشت فلارض مجاوبتهاش
فاطمة:شوفي فيا عارفاك كتسمعيني عارفاك كاتحسي بهضرتي عارفاك قادرة ترجعي كيكنتي خاصك تخوي عليا قلبك دوي انا كنسمعك
معرفت اش نقوليها هه هي غالطة غالطة بزاااف معنديش شي حياة لي غانبغي نرجع ليها معندييش..شنو بغات تعرف شنو واش بغيت واحد عاام دلحب ولغرام جا خطبني وملي مقبلوهش دارنا هربت معاه وعيشني فالدل من بعد ضربني وغتاصبني وخلاني لصحابو دازو عليا ب 20 درهم!! واش نقوليها كرفسني الدري لي بغيت وملي رجعت عند واليديا نتسامح معاهم ونبدا من جديد لقيت راسي شوهتهم ماتت ماما بسبابي وبا هرب وهو ساخط عليا؟ واش نقوليها عاودت حنيت راسي ورجعت عندو فلخر لقيتو مزوج ومرتو حاملة؟؟؟ واش نقوليها بلي وليت كنتخيلو فكل بلاصة وفكل وقت وحتا لمونيكة لي شراليا وليت كنشوفها بنتي؟؟نقوليها بلي صافي تسطيت؟ بلي جمعاتني طموبيل قدامو هو ومرتو حتا وصلت لهنا لسبيطار لحماق لا ومن فوق هادشي كامل تعرضت لمحاولة اغتصاب حتا هنا
شفت فيها مدة وسكت
فاطمة(وقفات): انتيغدي نبقا معاك هنا فهاد لوقت خاصني نمشي وقتما بغيتي تهضري انا كنسمعك وبالنسبة لداك عيفة الرجال راه لكاميرات شدوه غانمشي نشوف اش غايديرو معاه عل اقل غايخرجوه من لخدمة وشي عام حبس

ههه لاش كتقوليا داكشي لاش فاش ايفيدني حتا لو كان نفس الشي ايطرا لهداك لي وصلني لهنا اش غاااايوقع اشنو من بعد واش غايرض ليا ضحكتي؟ غايرض ليا فرحتي؟ غايرض ليا واليديا وحياتي؟اش غايرض اااش..والووو
مشات وخلاتني جالسة تم ساهية مرفووووعة لعالم اخر..

 

• لقراءة باقي فصول الرواية اضغط على (رواية شمس ضلامي)