رواية سليم ومشاعر – وسيطرت المشاعر الفصل الحادي والعشرون 21 بقلم زهرة الربيع

رواية سليم ومشاعر – وسيطرت المشاعر الفصل الحادي والعشرون 21 بقلم زهرة الربيع

 

 

البارت الحادي والعشرون

 

عايزه قلبك ولا حبك …حرقتني يا سليم …حسستني اني ولا حاجه ….صغرتيني قدام نفسي قوي …انا عمري ما شوفت نفسي قليله كده
سليم نزلت دموعه لما قالت كده وقال بسرعه…انتي مش قليله ..بالعكس انتي كتيره قوي عليا …قوي ….واغلى حاجه في حياتي كلها ..حقك عليا لو حسيتي كده …انا اسف ….بصي اعتبريني ابنك …الابن بيغلط كل غلطه اكبر من اللي قبلها والام بتسامحه وتديه فرص تانيه…. بس انا مش طالب غير فرصه اخيره واحده بس مش هطلب غيرها…. انك تسامحيني المره دي وتحاولي تثقي فيا تاني وانا هحل كل حاجه صدقيني….قسما باللي خلقني ما فيه حاجه وجعتني قد وجع غيابك..ومش هقدر عليه تاني …مش قادر افكر فيه حتى
مشاعر اتنهدت بتعب مش قادره تنسى ومش قادره تتجاهل كلامه قعدت وقالت بحزن ….بص انا مقدره محولاتك بس انا مبقتش زي الاول ….بعد اللي سمعتو بقيت اشك في كل كلمه منك …وفي كل حاجه كانت بينا دماغي عمال تودي وتجيب … مش عارفه اشرح لك …..بس في حاجه كده بيننا باظت ..وساعات الانفصال بيبقى حل لمشاكل كتير
سليم قال بغضب مكبوت…..متخرجنيش عن شعوري …متجبيش سيرة الانفصال نهائي….ما فيش انفصال ولا نيله …كده كده طلاق مش هطلق احنا بنتفاهم في جزئيه تانيه في اننا نرجع زي الاول مع بعض …..انما سواء رجعنا او لا مش هتبعدي عني ….وده كلام مفيهوش نقاش
مشاعر احتدت عنيها بغضب من كلامه ووقفت وقالت…. كده …..طيب مادم عايز العند انا مفيش اعند مني… ورجوع مش هرجع لك …ومش مشكله خليني على ذمتك انا اصلا بعتبر نفسي مطلقه
ولسه هتمشي شدها بقوه وقرب منها باشتياق شديد في لحظه جميله اتمنى ما تنتهيش
عند ادهم اخذ تليفونه ومشي وكان في المكتب بتاعه وبيشتغل لما جا له اتصال من لبنى رد بسرعه وقال…مدام لبنى.. ازاي حضرتك
لبنى قالت بتوتر ….انا كويسه يا ابني..واسفه لو بعطلك بس في موضوع حسيت انه الافضل تعرفه
ادهم قال بسرعه…. لا ابدا مفيش اي عطله انت تتكلمي في اي وقت
لبنى قالت…. ربنا يخليك….. كنت عايزه اقول لك اني كلمت رحمه دلوقت وهي قاعده في المطعم اللي كنا قاعدين فيه اخر مره…. لقيتها بتعيط ومش عارفه السبب ورفضت اني اروح اجيبها قالت لي انها شويه وهتيجي وانا قلقانه عليها قوي فلو ممكن تروح تجيبها انا عارفه ان انت ما لكش دخل في كل المشاكل دي …بس انا…
ادهم قاطعها بسرعه وقال….. انتي عملت افضل حاجه… انا رايح لها فورا …و هطمنك عليها ما تقلقيش
وقفل معاها واخد حاجته بسرعه و راح على المطعم
اول ما اوصل لاقاها قاعده وبتعيط قرب منها وقال بابتسامه ….احم…كده برده ماما بقى لها يومين مستنياكي..دي مش مواعيد خالص يا انسه
رحمه اتسعت عينيها بدهشه ولثواني فرحت انها شافته بس اختفت فرحتها فورا لما افتكرت اللي حصل مع ميرا وقالت بغضب…. انت هتستهبل يا جدع انت…. هتفضل تطلع لي في كل حته…. لو سمحت امشي انا النهارده مش قادره اتكلم
ادهم اتجاهل كلامها ونادى للجرسون وطلب ليمون ليهم
رحمه بصت له الدهشه وقالت… هو انا مش بكلمك ….طيب تمام انا اللي همشي
و لسه هتقوم قال بسرعه …..رحمه اقعدي…. انتي مش طفله علشان كل ما تشوفيني تهربي…. انا جاي اقول لك على موضوع مهم كده وهمشي على طول
رحمه بصتلو باستغراب وقالت….. موضوع ايه
ادهم قال بابتسامه….جاي استشيرك في مساله عاطفيه تخص واحد صاحبي
رحمه بصتلو شويه وضحكت باستغراب وقالت….. تستشرني انا وفي مساله عاطفيه ……احب اقول لك انك جيت لاكتر حد غلط في الدنيا…شوفلك حد تاني لو سألت الجرسون ده هيفيدك اكتر مني
ادهم قال بسرعه ….متهزريش دي مساله حياه او موت …..ومحدش هيفيدني غيرك
رحمه نفخت بضيق وقالت….. اتفضل اسال وخلصني… انا مخنوقه النهارده
ادهم قال …..طيب هسال ..بس ممكن نسمع اللي خانقك الاول …..ممكن يكون اهم من سؤالي ..واهي تبقى خدمه قصاد خدمه لاني مش بحب ابقى مديون لحد.. ويمكن انا كمان افيدك
رحمه قالت بدموع …..محدش هيقدر يفيدني….. عشان انا مشكلتي مع كل الناس
ادهم ابتسم وقال …..كل الناس مزعلينك
رحمه قالت بدموع… الخوف بتاع الناس هو اللي مزعلني …ليه الناس كلهم جبناء وبيخافو ياخدو حقهم
ادهم قال ..والله ده بيبقى على حسب المشكله …يعني فيه مشاكل مبتتحلش دراع بيبقى الافضل التفاهم….وفيه ناس بتجبرك تاخدي حقك لانهم مبيجوش غير كده
رحمه قالت بسرعه…بالظبط…ده اللي بقوله فيه ناس لازم تقف عند حدها…في واحده صاحبتي طليقها ضربها وبهدلها واخر حاجه ..احم اعتدى عليها….وهي مش عايزه تشتكي عليه علشان خايفه منه ومن اهله
ادهم قال بغضب وذهول…. ازاي كده …ايه الحيوان ده …ايه ده استحاله يكون بشر
رحمه قالت بغضب…..هو فعلا مش بشر… هو راجل زيكم كده
ادهم قال بدهشه …هو لانه راجل يبقى مش بشر…طيب ما علينا خلينا في موضوع صاحبتك عشان نقدر نساعدها
رحمه قالت باستغراب … هو احنا نقدر نساعدها
ادهم قال بسرعه… اه طبعا انا اعرف محاميين تقال جدا يقدروا يجيبوا لها حقها ….ازاي يعمل فيها كده دي وساخه… ربنا قال….. ولا تنسوا الفضل بينكم ……فين الفضل في كده هي الناس دي ما تعرفش ربنا خالص ولا خايفه من حسابه
رحمه حست بارتياح شديد بالكلام معاه وحاسه انه فعلا غضبان جدا من اللي اتقال ومش شايفه امر طبيعي ابتسمت وقالت ….طيب ابقى شاكره جدا لو فعلا هتساعدها….انا هسالها اذا وافقت هكلمك …تمام
ادهم ابتسم وقال….. وانا هستنى اتصالك…رقمي مع مدام لبنى
رحمه وقفت وقالت…. تمام يا باشمهندس…. عن اذنك بقى
ادهم وقف وقال بسرعه….. ايه ده انت هتمشي…طب مش هتشربي الليمون
رحمه ضحكه وقالت….. لا معلش اشربه انت
ادهم حط فلوس على الترابيزه حق الليمون وزياده وقال ….انا كمان مش بحب الليمون….. يلا تعالي عشان اوصلك
بصتلو بدهشه وقالت…. لا انا كبرت وبعرف اروح لوحدي
ادهم قال باصرار….والله ابدا ….لازم اوصلك بعربيتك واروح شحططه في التاكسيات ما اقدرش اروح مرتاح في عربيتي ابدا …بكتئب
رحمه ضحكت وقالت…. اتفضل قدامي….. حسابي مش معاك حسابي مع اللي بعتتك
ادهم ضحك وقال…انا كنت معدي بالصدفه على فكره
رحمه قالت بسخريه….ايوه ايوه المطعم ده صدفه كتير انا عارفه
وطلعو في العربيه وكانوا طول الطريق بيتكلموا وادهم سعيد جدا بالوقت اللي بيقضيه معاها حتى لو قليل
وهي كمان كانت بترتاح للكلام معاه لان كلامه مريح ومش بيحسسها انو منتظر منها اي حاجه
وصلوا عند البيت ونزلوا ورحمه قالت بابتسامه…..هو احم ..انا متخيلتش اني ممكن اقول كده بس شكرا يا باشمهندس….. شكرا لانك سمعتيني..و شكرا على التوصيله
ادهم ابتسم وقال….ده انا اللي لازم اشكرك….على الدقايق المعدوده اللي بتديها لي من وقتك ….بس بتبقى احلى دقائق في ال 24 ساعه كلهم
رحمه ابتسمت وقالت….. بس من

 

 

رايي ما تتعودش على كده
ادهم ضحك بخفه وقال….. للاسف اتعودت خلاص
رحمه هزت كتفها بلا مبلاه مصطنعه وقالت …..والله براحتك
ومشيت خطوات بس رجعت وقالت باستغراب…صحيح نسينا صاحبك …ايه مشكلتو هو كمان
ادهم بصلها باستغراب وقال..صاحب مين ..انا معنديش صحاب
بقلم….زهرة الربيع
رحمه قالت بدهشه..صاحبك..اللي معاه مشكله عاطفيه وجيت تقولهالي
ادهم افتكر وقال…اه…ايوه افتكرتو …لا ماخلاص اتحلت الحمد لله ..ده قاعد بيرقص دلوقت من الفرحه
رحمه ضحكت جامد وهزت راسها بياس منو وقالت …امممم طيب الحمد لله انها اتحلت….تصبح على خير
ولسه هتمشي ادهم وقفها وقال.. رحمه …..انت جميله قوي …..وتستاهلي تعيشي حياه جميله زيك ….ما توقفيش عمرك على الفاضي مفيش اي حاجه تستاهل تضيعي عليها ساعه واحده من حياتك …لان الدقيقه اللي بتروح من عمرنا مش بتتعوض
رحمه ابتسمت وهزت راسها بالموافقه بتردد
وطلعت جري وقلبها بيدق بسرعه ومش عارفه ده خوف ولا فرحه احساس مش قادره تفسره
ادهم ابتسم بسعاده وقال….. يس يس يس …عملتها يا ابن النمس
وقلع ساعته كانت ساعه غاليه جدا و حطها في عربيتها وقال بابتسامه…. هستناكي بكره يا قمري
عند مشاعر سليم فاجأها لما قرب لها كده ولسه هتتكلم سبقها وقال بسرعه…رديتك … انت بتعتبري نفسك اطلقتي…وانا رديتك ليا
وغمزلها وقال ….وكل ما تحسي انك مطلقه قوليلي هردك وقتي
مشاعر بعدت عنه بكسوف شديد و اتنهدت بتعب وقالت…. مفيش فايده….. مش عارفه اعمل ايه بس
سليم مسك ايديها وقال بسرعه …..انا هقول لك تعملي ايه ….اسمعي لقلبك مره واحده ….هيقول لك اننا ما نقدرش نبعد عن بعض صدقيني انتي قلبك بيدق لحد دلوقتي علشان انا لسه بحاول ..وانا قولتلك مش طالب غير فرصه يا مشاعر.. دي اول غلطه ليا ..واول مره اطلب منك تسامحيني….ولو لسه شاكه فيا اطلبي اي حاجه وهنفذها دلوقتي حالا علشان بس اثبتلك اني بعشقك ومش عايز غيرك من الدنيا..اطلبي اي حاجه
مشاعر خدت نفس عميق وقالت….. تمام …انت بتحبني ومش عايز غيري ….وجاهز لاي طلب ليا
سليم قال بسرعه وسعاده ….جربيني
مشاعر بصتلو وقالت بحزم…..وانا وافقت ….روح افسخ خطوبتك من اللي اسمها غاده دي ….وقول لها هيه وابوها مراتي ما هربتش …..هي معايا …..وانا مش هتخلى عنها وخليه يضرب دماغه في الحيط … ها…تقدر تعمل كده
سليم اتسعت عنيه بصدمه ولسه هيرد قاطعته وقالت الاجابه محدده ….ويا اما تفسخ خطوبتك معاها او هتطلقني
وكملت بسخريه وقالت..اختار بكلمه واحده …لاني مصدعه وووو
الموضوع طلع معدي ومشاعر كمان مصدعه 😂😂😂بنتنا متتصالحش بكلمتين وطلباتها قويه 💪💪 تفتكرو ايه اللي هيحصل ..وسليم هيرد بايه …وكمان ياترى ميرا هتنفذ اللي قالت عليه وتجتمع بادهم ورحمه وش لوش وياترى رحمه هتروح لادهم تاني بعد ما تلاقي ساعته في عربيتها …

يتبع….

 

 

اختار… يا اما تفسخ خطوبتك منها يا اما تطلقني… من غير كلام كتير…. لاني مصدعه
سليم بص لها بدهشه وقال ….مصدعه
مشاعر قالت بلا مبالاه …..جدا
سليم ضحك بخفه وقعد على السرير وقال…. بس ده مش طلب ….انت قاصده تعجزيني … انتي عارفه انا عملت ايه لحد النهارده وخسرت قد ايه علشان اوصل لهنا..و خلاص قربت ارجع حقي منهم فاضل خطوه…خطوه واحده يا مشاعر…و انت بكل بساطه بتخيريني بين كل ده وبينك… مش حاسه انك بقيتي قاسيه عليا قوي
مشاعر قالت باصرار ……ده اللي عندي …..اعتبرني قاسيه..و اعتبرني ما عنديش احساس حتى…… بس لازم تفهم حاجه واحده بس….. انا كرامتي عندي بالدنيا ومفيش حاجه هتصون كرامتي وترجعك في نظري زي الاول وترجعني احس اني فعلا اغلى حاجه في حياتك غير انك تعمل كده ….واقل من كده مش هقبل ابدا
سليم اتنهد بياس وقال…… انا بحبك ….ومعنديش اغلى منك في حياتي ….بس نفس اللي بتدافعي عنه انا كمان بدافع عنه …انا كمان بحاول ارجع كرامتي وكرامة اهلي من اللي نصبو علينا وصغرونا واكلو حقنا ….ومش هحس ان ليا اي قيمه لا قدامك ولا قدام نفسي لو خسرت معركتي قصاده واخد مني حقي دراع و بالبساطه دي ….ده مبدا انا رفضته من الاول وحربي هكملها لاخر نفس
مشاعر قالت بغضب…. يبقى …
بس قاطعها وقال بسرعه……. وكمان مش هتخلى عنك ….انسي اني اطلقك…… انا هكمل في الحرب دي للنهايه …ولا هخسرك ولا هخسر شركتي اللي بنتها على كتافي ولو حازم قدر ياخد مني واحد فيكم هيبقى اخر يوم في عمري …لازم تعرفي ان المساله مش مسالة عند…المساله مسألة مبدأ ولو انهارده خسرنا بكره هيتداس علينا اكتر واكتر….ومش هقدر احمي اي حد فيكم وقتها وانتي اول واحده هتروح فيها ….اللي جاي مش سهل زي ما انتي متوقعه ….ولو انت مش عايزه تثقي فيا وتكملي معايا معركتي انا هكملها لوحدي يا مشاعر ..بس ابقي افتكري انك رفضتي تقفي جنبي وقت ما احتاجتلك..و شكرا على ثقتك الغاليه
قال كده ومشي ومشاعر قعدت على السرير بتعب ….كلامه فعلا اقنعها بس مش قادره تتخطى اللي حصل اتنهدت وقالت ……يا رب ساعدني و اقف جنبي وخليني اختار صح يا رب انا خلاص ما بقتش عارفه اصدق ايه واكدب ايه ما تسيبنيش لوحدي يا رب
عند سليم طلع بعربيته بتعب وعلى الطريق جاله اتصال غاده فتح السبيكر ورد وهو سايق وقال…. موناليزا قلبي …..عامله ايه يا بت
غاده قالت بضيق ….لا والله …بقى لي ساعتين بتصل عليك لو مش واخد بالك
سليم ضحك وقال…. واخد بالي بس كنت مقموص…بس برضو ما هونتيش عليا في الاخر ورديت
غاده قالت بدهشه …..نعم مقموص …..هو مين اللي يزعل يا بني ادم انت…ولا نسيت اللي حصل اخر مره لما جيت عندكم البيت …هو انا كل ما اجي عندك اتهزأ وامشي و بعد كده انت تعمل زعلان واكلمك صح
سليم قال…… اكيد مش صح …..كل الفكره ان كل ما تيجي عندنا تزعليني بسبب مشاعر…. وانا ذنبي ايه ليه بتاخديني بذنبها كل مره انا قلت لك قبل كده اني قبل ما نتجوز هطلقها ….عايزه ايه اثبات لحبي ليكي اكتر من كده
غاده قالت بسخريه….مش لما تلاقيها علشان تطلقها…. سمعت انها هربت تاني
سليم ابتسم بارتياح …لان طالما هيه قالت كده يبقى اكيد ابوها صدق انا مشاعر هربت قال…. واحده مجنونه وكل يوم والتاني تسيب البيت هعمل لها ايه…. بس الحق عليا قلبي الطيب هو اللي بيورطني…. لو كنت اخدت منها الولد وطردتها من اول يوم ما كانش حصل كل ده….. على العموم هتروح مني فين هلاقيها يعني هلاقيها
غاده قالت بابتسامه…… يعني انت بجد حابب اننا نتجوز ياسليم …. ارجوك ما تضحكش عليا لو انت مش حابب كده يا ريت تقول لي…. انا مش بحب اتامل على الفاضي وانت عارف انت ايه بالنسبالي بلاش توجعني لو سمحت
سليم حس بحزن شديد عليها …بس الطريق اللي مكمل فيه مستحيل يكمل من غير اذاها حاول يطلع صوته طبيعي وقال..احم …. انتي لسه عندك شك فيا …..على العموم بكره نتجوز وانا هعرف ازاي امحي كل شكوكك
غاده ابتسمت بسعاده وقالت….. انا بحبك قوي يا سليم
سليم اتنهد بجزن على براءتها وطيبتها وقال…..و انا كمان يا قلب سليم ….معلش انا مضطر اقفل دلوقتي لاني سايق…و هرجع اكلمك
قال كده وقفل بسرعه ووقف العربيه وفك الكرفته وقال بخنقه …تمام …..تمام بكره كل ده يعدي….و اكيد هتنسى محدش بيقف عند حد…..انت ماشي صح
واخذ نفس عميق ورجع ساق تاني بتعب شديد
في البيت ادهم رجع مبسوط جدا وجري على والدته حضنها بقوه وقال…… يا لهوي على الجمال…. انا بعشقك على فكره
امه قالت بدهشه وابتسامه…. والله ما في اجمل منك …ايه سر السعاده دي كلها ….عرفتو حاجه عن مشاعر
ادهم خد باله لطريقته واصطنع الحزن وقال بسرعه…. لا لسه ما اعرفش حاجه …..ولا حتى اعرف حاجه عن سليم
وبص يمينه وكان خالد واقف بيبص له بشك فقال بسرعه علشان يتوهوا….انا كنت مبسوط لان المشروع الجديد بتاعي تم على خير….انما سليم معرفش عنو حاجه بتصل عليه كتير مش بيرد عليا
في الوقت ده وصل سليم وقال بغضب….. نعم عايز ايه من زفت ….عندك خبر عن مراتي وابني اللي ضيعتهم
بقلم…زهرة الربيع
ادهم هز راسه بالرفض وسليم قال بغضب ……يبقى ما تجيبش اسمي على لسانك …..والافضل لما ادخل البيت مشوفكش في وشي…انا مش عارف ايه البجاحه والحقاره اللي انت فيها دي..ايه بتحسش يلا …بقولك مش طايق اشوفك ده لو حمار عمل عملتك كان اتكسف على دمه
ادهم بص له بدهشه من كمية الاهانات دي قدام ابوه وامه وقال بضيق ….سليم خلاص بقى….. قلت لك انه ما كانش قصدي
بس سليم قال بغضب اشد…… هو ايه اللي ما كانش قصدك….. هو انت دوست على رجلي … بسببك هربت تاني واخذت ابني معاها عايزني اسقف لك….. لما انت لسه عيل ومش قد انك تدير بيت… وغبي وما بتعرفش تعمل اي حاجه في دنيتك بتتصرف من نفسك ليه
ادهم غمض عينيه بخنقه شديده وبص لخالد لقاه مشي راح على المطبخ فاخد سليم من ايده بعيد عن اهله ومشي بيه على جنب
نادر قال باستغراب….هو فيه ايه ….حاسس فيه حاجه مش طبيعيه
هدى اتنهدت وقالت… لو فهمت حاجه ابقى قولي
عند ادهم اول ما بقوا لوحدهم مسك سليم من هدومه و قال بغضب ..فيه ايه… استحليت للشتيمه يلا …..انت اصلا عايز تشتم وواخدها حجه مش كده
سليم ضحك

 

 

وحاول يوطي صوته علشان ما يسمعهوش وقال …..في ايه ياض… انت زعلت ولا ايه بحبكها بحبكها عشان يصدق
ادهم قال بغضب ..عن امه ما صدق …..ايه السفاله دي لم نفسك شويه ….ده انا ابويا ما شتمنيش كده
سليم ضحك على عصبيته وقال بسرعه ….خلاص خلاص اهدى اهدى اعوذ بالله من الشيطان الرجيم ..استعيذ …ياض بقولك استعيذ هتكفر
ادهم سابو و اتنهد وقال …اعوذ بالله من الشيطان الرجيم
سليم قال ..ايوه كده…يا حلاوته طلع بيتعصب يا ناس
ادهم قال بضيق …سليم خلاص بقى….. بجد خف شويه انا ساكتلك من وقتها علشان اساعدك ..بس اكتر من كده هبهدلك
سليم قال ….تمام …خلاص ريح نفسك انا كده كده هظبط الموضوع ده …وهخلص منه
ادهم قال باستغراب…مش فاهم…قصدك خالد
سليم قال…..مين غيره
وراح لابوه وقال بجديه ….ممكن كلمه على جنب يا نادر بيه
ابوه اتفاجئ وشاور على نفسه وقال ….انا
سليم بص يمين وشمال وقال….. في نادر غيرك هنا
نادر وقف بسرعه وقال……لا..قصدي اه طبعا…. تعال بينا على المكتب
و راحوا على المكتب سوا
و هدى استغربت اكتر وبصت لادهم وقالت ..هو ايه الحكايه انهارده
ادهم هز كتفه باستغراب وقال…علمي علمك
اما سليم اول ما دخل المكتب بص لابوه وقال بجديه…انا عمري ما اتوقعت اني ممكن اطلب منك طلب في يوم ….بس انهارده انا محتاج لخدمه منك
نادر قال بحزن …انت تطلب عنيا يا ابني
سليم قال …خالد…..عايزه ياخد اجازه اسبوع او اتنين ضروري
نادر لسه هيتكلم سليم قاطعو وقال..قبل ما تفتكر اني بقطع عيشه علشان بكرهه والكلام ده ….مرتبه هيفضل ماشي زي ما هو…انا بس عايزه يبعد عن البيت لهدف في دماغي ومش عايزه يشك اني انا اللي عايز ابعده ..ممكن تعمل كده علشاني
نادر ابتسم وقال …واعمل اي حاجه مهما كانت علشانك …الصبح هصرفله مرتبه واديلو اجازه
سليم ابتسم وقال…تمام …شكرا
ولسه هيخرج نادر قال…لو حابب اساعدك في اي حاجه تاني ..انا موجود ديما
سليم اتنهد وهز راسو بالموافقه ومشي بسرعه
نادر ابتسم وهو حاسس ان ممكن يبقى فيه امل ويقبل يسامحو مع الوقت
في صباح يوم جديد رحمه طلعت من بيتها وساقت عربيتها بقلق وهيه بتتصل على ميرا اللي مكانتش بترد ابدا
و بعد محاولات عديده ردت وقالت بتعب ونوم…ايوه مين
رحمه قالت بسرعه اخيرا رديتي ….وقعتي قلبي
ميرا كانت مش حاسه بالدنيا من شدة السكر وقالت …مين…. انت او انتي مين
رحمه قالت بدهشه..انا مين ازاي…..انا رحمه يا ميرا…. فيه ايه
ميرا قالت بتوهان ..رحمه مين
هنا رحمه غمضت عنيها بزهق وقالت…..ميرا انتي سكرانه صح..تاني يا ميرا ….حرام عليكي يا بنتي حرام
ميرا فاقت اخيرا لكلامها و لسه هترد واحد جنبها قال بصوت عالي ..اششش …ميرو عايزين ننام افصلي
اول ما قال كده ميرا غطت التليفون بسرعه وقالت…اششش… الله يخربيتك اتخمد
بس رحمه سمعته واتسعت عنيها بصدمه وقالت…ثواني بس…انتي كنتي سهرانه مع شلتك زي العاده صح
ميرا بلعت ريقها وقالت…..انا هفهمك ..انا
بس قاطعتها رحمه وقالت بغضب شديد …تفهميني ايه ….يعني انا طول الليل منمتش وقلقانه عليكي وهموت من قهري وانتي بتسهري وتسكري… معقول
ميرا قالت بتوتر ..يارحمه متفميش غلط …انا كنت بس بفك عن نفسي لاني كنت مخنوقه وخايفه تحصلي حاجه في البيت لوحدي
رحمه قالت بغضب..فقولتي تحصلك وانتي سكرانه مش كده…الحق مش عليكي اصلا…. الحق على الهبله اللي سهرت طول الليل قصادك
ميرا اتوترت من طريقتها وقالت بدموع وتمثيل…عيزاني اعمل ايه يعني…اقعد لوحدي استناه يجي يخلص عليا وانا لوحدي ….حرام عليك يارحمه انا فيا اللي مكفيني…انا مبقتش طايقه الشقه
رحمه اتنهدت بحزن و قالت ..طيب طيب خلاص اهدي..انا مش هسيبك لوحدك تاني متعيطيش…واصلا هحللك الموضوع ده….الشاب اللي اسمه ادهم عرفاه ..قالي انو يعرف ناس وممكن يساعدنا و
ميرا قاطعتها بسرعه وقالت بخوف….اوعي…انا مش عايزه مساعده من حد ..لو سمحت يا رحمه متنسيش انا عمي من الفيوم ولو عرف باللي حصل مش هيسكت و هيجبرني اروح اعيش هناك عندهم …وانا بالعافيه قدرت اخليهم يسيبوني هنا بعد طلاقي
رحمه اتنهدت بيأس وقالت …طيب طيب يا ميرا اهدي …خلاص اللي تشوفيه
و قفلت معاها بضيق ولسه هتطلع على الشغل شافت ساعة ادهم…بصتلها باستغراب وقالت…ايه ده بتاعة مين دي
بس افتكرتها فورا لانها في المطعم كانت في ايده ابتسمت بخفه وقالت…وبعدين بقى
عند سليم كانو كلهم بيفطرو بهدوء وخالد واقف جنب السفره علشان لو احتاجو حاجه
هدى بصت لسليم و قالت….سليم هو انت عملت ايه في موضوع مشاعر ..بلغت الشرطه زي المره اللي فاتت
سليم قال بضيق..وهما الشرطه قدرو يعملو ايه يعني المره اللي فاتت ..اهو وجع دماغ وخلاص انا هلاقيها بطريقتي
وبص لادهم وقال بخنقه مصطنعه…الله يجازي اللي كان السبب
ادهم اتنهد وسكت وسليم بصلو تاني وقال …بجد مش مكسوف من نفسك
ادهم بص باستغراب حواليه مش عارف يقصد مين
سليم بصلو بغضب وقال..ايوه انت مين غيرك..مش مكسوف من نفسك وقاعد بتفطر بعد اللي حصل بسببك
ادهم نفخ بزهق وقال….يعني بلاش افطر يعني ولا ايه
سليم قال بغضب…لا افطر وخد راحتك …ابني ومراتي في الشارع وانت افطر عادي….. هاقولك ايه جبله مبتحسش
ادهم داس على شفتو بغيظ منو وقال بتحذير…لا ما انا متأكد انهم بخير علشان كده بفطر… مشاعر قويه وهتخلي بالها من نفسها وابنها..هيه اول مره تعملها يعني
سليم كان عايز يضحك لما فهم انو بيهددو انو هيتكلم لو مبطلش شتيمه اتنهد وقال….ادعي يكونو بخير ..لان لو حصلتلهم حاجه هنفخك سامع
ادهم مردش وسليم قال بغضب ..سامع
ادهم قال بعصبيه ..سامع سامع….لو حصلتلهم حاجه هتنفخني ..اصلا اتنفخت من دلوقت…حتى شوف من النفخه مش قادر اكل .. الحمد لله
وقام من على الاكل بغضب وهو بيتوعد له ولسه هيخرج جيه الحارس وقال…فيه واحده عايزه تقابلك يا ادهم بيه
ادهم ابتسم بسعاده شديده وقال بسرعه…..رحمه مش كده
الحارس قال بسرعه……ايوه هيه قالتلي اسمها كده
ادهم قال بسرعه ولهفه…..دخلها…. دخلها حالا..اوعى تمشي
وبص لواله ووالدته وقال..زي ما فهمتكم ..ها
هزو راسهم بالموافقه وابوه قال…متقلقش خالص
ادهم بص لسليم وقال……عدي يوم انهارده علشان خاطري
سليم مكانش فاهم حاجه وبيبصلو باستغراب ولسه هيسأل
دخلت رحمه وقالت…صباح الخير
ادهم اتقدم عليها وقال بسعاده..هو فيه خير اكتر من كده ….يا اهلا وسهلا اتفضلي
رحمه دخلت بتوتر وسلمت على والدته اللي حضنتها وقالت……اهلا ياحببتي… ده ايه الحلاوه دي ….لا فهمت المرادي
ادهم قال بسرعه……ماما… ايه ….سيبك من ماما خالص سلمي على بابا …..نادر بيه النمس
نادر سلم عليها و قال بمغازله….. نمس ايه بقى….. ده انت اللي طلعت اسد
بقلم…زهرة الربيع
رحمه سحبت ايدها بسرعه وقالت…هو عمو بيعاكس ولا انا فهمت غلط
ادهم لسه هيرد سليم ضحك وقال ..لا بيعاكس ايه… ده بس بيجدد شبابه
رحمه التفتتلو وقالت باستغراب……هو

 

 

احنا اتقابلنا قبل كده..صوتك مش غريب عليا
سليم ابتسم وقرب سلم عليها وفضل ماسك ايدها وقال……معرفش والله بس يمكن لاني اخو ادهم … تؤمه يعني صوتنا واحد ….وقلبنا واحد ….هو مين الجامد ؟
رحمه رجعت لورا وقالت بحده..اهو ده بقى بيعاكس مفيهاش كلام
ادهم قال بسرعه..لا والله ده هما طريقتهم كده
وبص لسليم وقال بغيظ …..بتعمل ايه الله يخربيتك
ورجع قال بسرعه…ده اصلا متجوز وعندو ولد
سليم ضحك وقال….معاه حق…..فيه حد متجوز بيعاكس برضو
رحمه قالت بحماس ……الله ولد صغير انا بموت في الاطفال فينو بقى ومراتو فينها
سليم ضحك وقال…رد بقى
ادهم بلع ريقه ولسه هيرد خالد قال بسخريه…طفشت
رحمه اتسعت عيونها بذهول وووو
ادهم جنى على نفسه وعلى علاقته اللي لسه مبداتش لما قال لرحمه تيجي بيته 😂… ياترى ايه اللي هيحصل

يتبع….

 

 

• لقراءة باقي فصول الرواية أضغط على (رواية وسيطرت المشاعر)