رواية على حافة الثأر الفصل السابع 7 بقلم زينب ماجد

رواية على حافة الثأر الفصل السابع 7 بقلم زينب ماجد

 

البارت السابع

 

 

رواية على حافة الثأر الحلقة السابعة
دنكت اريد اجره من فوك شوان وهو دفعني بيده وهو يكله : من ادوس عتبة بيت وتتعدى على مرة والعباس اخلي دمك بطوووولك افتهمتتتتت
– عباس كاااافي مو هيجججج
كمت اجر بأيده .. وهو كام من فوكه وام غيث تجر بيه ونور دخلت تسحبه
واني اشيل بشوان واكله : كافي عرفني بحالي انت متمل .. عوووفني
دفعني منه وهو يكلي جلبج هذا تهدينه علييييه
اليوم ادفنج انت وياه
عباس : دلزمها شوف شسوي بيك ، اذا انت زلمة وابن ابوك دكض شعره من راسها واشوفك النسوان شتجييييب
هد شوان يريد يتلاكفه واني اسحب بيه وام غيث تسحب بعباس .. انداريت وصرخت بعباس : كااااافي اطلع برااااااا
ودفعت شوان : كاااافي بيتي مو ساحة معركة تصفي حساباتك بيها .. ومو اني التطعن بشرفها افتهمتتتتتت ، واعلمك … اطلع براااا
اتقرب مني وهو يكلي : لا ما اسحكج برجلي اندمج على اليوم الصرتي بيه ما راح ارتاح .
– حيوان قذر متسوى حتى ارد عليك .. اطلع من بيتي فوراً
– اعلمج
– اطلع برااااا
كامت ام غيث تسحب بيه ..
طلع خفت يتمشكل ويا عباس .. شفت عباس بغرفة الحراسة، ونور واكفة تحجي وتمنعه يطلع .
تقربت منه : انت شلون تتهجم عليه وتضربه هشكل !؟
– هل يولي هالمخنث هذا الما كادر بس ع النسوان بسرك الزلم بنعال محد يشتري
– ما مسموحلك تحجي هشكل ، افتهمتتتت اعرف واجبك وبسسسس
– ولج انت جاية اتلوميني فوك ما اداااافع عنج
– مو اني الينكالي ولج احترم نفسك حيوووووان
– منو الحيوان ! اني
جيف ردت ادافع عنج اصير حيوان
– انت همجي وطريقة دفاعك همجية متعرف تحل شي بعقل كبل تدخل تتهجممممم هذا يصير خطيبي وديتهمني .. تجي تضربه اني شنو موقفييييي .. تتصرف من رااااسك وتحررررجني
– والله ما تستاهلين والقرأن
– لك انت شلون تحجي هشكل احترم نفسك اني لا اختك ولا وحدة تقربك .. اني مديرة عملك وغصبا ما عليك تستمع الاوامر وتلتزم بيها
– سهلة ست ، بعيني
– دا تهدد حضرتك ؟
ام غيث : خالة عصبي والولد مو قصدة كل باله يدافع عنج
كام يحط ايده على شفته ويباوع يتفقد اذا طالع دم ومحترك نار وميباوع بوجهي ويصيح : سهلة صوجي .. اني صوجي
ودفر الكومدي اللي كباله
فزيت من مكاني : هاي شبيك انت بعقلك ؟
– لا مو بعقلي ، والعباس مو بعقلي .. لو بعقلي ما اذب روحي هيج حتى ادافع عنج .. جان وكفت مثل المطي هنا اسمع صياحج واكول شعلي بيها اني شايق وحماية برا مو بالبيت بس لان مطي وابن ١٦ مطي احترك دمي وركضت بلا ما افكر واذب روحي واتعارك جني ثور هايج .. يا عقل ما عندي عقل ما عندددددي .
ابتعدت منه .. خفت منه وهو بهالعصبية
تركته وكلتلهم : كل واحد على شغله .. فوراً
انسحبن للمطبخ واني دخلت للبيت خابرت على بابا ..رد ، كتله : هسه تجي اني بعد ما اتحمل دقيقة ، اجوك بابا تجي كلش تعبت من شوااان
حجيتها وبجيت
حجه : شصاير بنتي .. فهميني ليش تبچين ؟
– اتخيل يجي لنص البيت يضربني ويتعدا عليه ويطعن بشرفي ويتهمني يكولي تنامين ويا الحارس وترجعين .. بابا اني يكولي هيج ..
– اتخبل هذا شبيه معقولة
– لو ما عباس يخلصني من اديه ويبعده جان الله يعلم بحالي .. جان منجن رسمي دا يريد يقتلني نظراته كلها حقد وكره .. مدا اكدر استوعب اللي ديسويه ابد .. بابا ارجوووك تعال .
– يا بنتي اني متوجه لاربيل بعمل .. ما اكدر اجي لكن هسه اخابره واحاسبه على كل شيء .
– بابا الموضوع مو مال تخابره دا اكولك شوان وصلت بيه يطعن بشرفي وانت تكولي تخابره اني مشيت مثل ما ردت ووافقت شيريد مني بعد .. مو قبلت بموعد الزواج شتريدون اكثر من هيج .
– راح اتصرف بنتي راح اتصرف .
من كد ما اتضايقت منه ، سديت الخط بوجهه..وصعدت ع الدرج اركض واني اتصل بامي ، ردت ، فتحت سبيكر وشمرت التليفون ع الميز واني اكولها : انت وين
– بالمصرف كولي ماما
– ماما صار موضوع ما اكدر اسكت عليه بعد
– اللي هو ؟
– شوان تعدا عليه وضربني وتهمني بشرفي ..
جانت دا تشتغل ومظفين يمها ، حجت : لحظة .. روح هسه .. اندارتلي : ضربج !؟ شلون ضربج وين انت هسه .. وين كاعدين ديضربج شمفكر نفسه هذا
بقيت اسولف وياها واحجي ومحترك كلبي واني ابدل .. لبست تراك شتوي اسود .. ورفعت شعري بكتر .. ولبست كاسكيتة وبوتين ابيض رياضي .. واخذت جنطة رياضية خليت بيها الاحتاجه وشلت شاحنتي وتليفوني .. وطلعت .
نزلت .. ام غيث و نور واكفات يم عباس ويحجن وياه ، من شافني ابتعدن وراحن لشغلهن .. اخذت نفس وكتله : وصلني لبيت امي .. واخذ السيارة وروح للبيت .. ونبقى على اتصال .
باوعلي عاقد حواجبه .. تنهد وكام ..
حجيت : اي احد يخابرك غيري ويطلبك لترد واذا رقم غريب ورديت وطلبوك خابرني .
شو هذا عوفني احجي وامشي مني وهو معقج وجهه .. ما اعرف منو الديشتغل عند منو .. يشمر عليه وكأنوا متفضل عليه .
تنهدت ومشيت وراه ..
هو جر الباب بسرعة وصعد كبلي وشغلها بسرعة فتحت الباب وحطيت الجنطة دااريد اصعد لان السيارة عالي .. لزمت وحطيت رجلي جان يدوس بالسيارة .. وخرت رجلي ومشت مني واني لازمتها، وكعت بالكاع بسرعة ..
وكف السيارة بساع ونزل : الله الله الله يمعودة شقصتج
– انت صدك تحجي ؟ اعمى متشوف
– هسه عبالي صعدتي والله
– مشفت الباب بعده ممقفل .. مسمعت اني وراك دا اصعد اعمى وهم اطرش
– هسه لا تغلطين كتلج ما ادري قابل متعمدج اني
– اكولك انت شو ماخذ راحتك بالكلام كانما دا تحجي ويا اختك الصغيرة
– ست هسه دصعدي مو والله روحي طالعة
– طالعة اترك محد مجابرك تشتغل افتهمت لو لا
– هسه دخوش بس اصعدي
خزرته ومشيت للسيارة واني انكث بملابسي .. صعدت هو وراي .. سد الباب .
رحنا للمصرف .. صفيت بالباب .. اخذت جنطتي ونزلت ، داس بالسيارة ومشى .. باوعت وراي !
هو اني كتله روح ؟
هذا شبيه مخبل ؟
هزيت ايدي ودخلت للمصرف .. عرفوني من الباب رحبوا بيه .. واخذتني الموظفة لغرفة المديرة .. دكت الباب .. وفتحته .. اني وراها .. كامتلي : اهلا ماماتي اهلا حبيبتي اتفضلي .. اتفضلي.
فتت .. جان اكو رجال كاعد مقابيلها لابس رسمي .. سلمت عليها وكالتله : اعرفك بنتي فيان مديرة ادارة بدائرة (…….) والدها دلشاد (….) الرجل بسرعة كام ومدلي ايده : اهلا اهلا اتشرفت بيج ست اهلا وسهلا.
صافحته : الي الشرف، اسفة مجان ابالي احد عندج .. اعتذر انتظر برا .
حجه : لا لا معقول اصلا جنت رايح لكن فرصة سعيدة نتعرف بحضرتج .
– اني اسعد .. شكرا
اشرتلي امي ع القنفة : اتفضلي ماما … اي وين وصلنا أستاذ
-وصلنا للست فيان مجنت اعرف عندج بنية مثل القمر ما شاءالله
ابتسمت ابتسامة مصطنعة ونزلت راسي بتأديب وهي تكوله : شفايدة كمر يا استاذ وحظها اسود من الليل
– لا ما معقول المثل الست فيان سعيد الحظ اليحظى بيها .. انسة لو ست
حجت : انسة فيان بعدها ممتزوجة
– معقولة
– لا ممعقولة، لأني مخطوبة
حجت امي : خطبتيش يا بنتي خطوبة وبالاكراه متتسمى خطبة .. وهاي هسه خابرتني قبل شوية تبجي ضاربها .. و ألله يا استاذ فد انسان خطيبها سفيه وطماع حتى شكل ماكو
وضحكت
انداريت عليها وخزرتها ..
وهو يكللها : وليش باقية لعد حرام تضيع شبابها
– بعد قسمتها
حجيت : اذا ماكو موضوع غير خصوصياتي ع الطاولة ، افضل اكوم ونحجي بوقت اخر .. اتشرفت بمعرفتك أستاذ .
كام : الي الشرف ست ابقى اني رايح .. اسف اذا شفتيني تعديت على خصوصياتج اعتذر .. مع السلامة .
طلع .. انداريت عليها : ماما صدك تحجين !؟
– متلتل اتلتل فلوس .. يكدر يشتري هالمصرف ومصارف العراق بفلوسه ..
– وشخصني بفلوسه امي .. عيب بحقي ومكاني تحجيلا اسراري
– دروحي باقية على هالاصلع الابكع شوان .. دشوفي اشون ترتيب شلون اخلاق شلون ثكل
– والله شفتج ما شفت الثكل .. بس هو صوجي اني اجيت عبالي تحلين موضوعي
– لتصيرين سفيهه وكومي دنطلع ..
كمت وياها واني احط جنطتي على جتفي .. حجت : نروح ناكل بمطعم .. المساعدة ماخذة اجازة ومالي خلك ارجع اطبخ
– ماما اني بشنو حايرة وانت بشنو
– لج يا بنتي دا اسألج ..
مشيت وياها لسيارتها وسيارة الحماية مالتها ورا كالتلي : اجيتي تكسي ؟
– لا السايق جان ويايا بس كتله يروح .
– مو مشكلة يلا اصعدي
صعدت مشت ليكدام بالسيارة .. شفت عباس طابكها ليكدام .. وكاعد منتظرني .. اخذت التليفون وخابرته .. رد : ها
– ها !!! عباس هذا مو اسلوب ابداً مو معقووول
– ست رحمة لوالديج سبيتج غلطت عليج هنتج كتلج ها جا شكلج
– لا قصرت لو متسويهن !
– نعم ست تفضلي يا مولاتي امري كولي خادم
– عجيب
– والله ما عجيب غيرج شنو اليرضيج رحمة لابو فاضل
تنهدت : ع العموم .. اخذ راحتك اني طلعت ويا ماما وشفتك طابك .. روح للبيت اني اخابرك لما احتاجك
– رحم الله والديج .
قفلته منها ودست بالسيارة ومشيت للبيت .. دخلت .. اختي كاعدة كدام الصوبة ، وامي نايم بفراشها وداحسة راسها بالمخدة ومكعورة روحها .. حجيت : السلام عليكم
– هلا خوية
-شبيها امي
-مدري شبيها من الصبح ليجاي لا تشتهي الزاد لا تكعد بس تتلوى من الالم
-وضاله هيج ؟ محمد ما مر مو كال راح اجي الصبح
– ما اجه
دنكت لراس امي بستها : ها يمه .. ام احميد .. شو باوعيلي
– ها اعبيس يمه مالي خلك
– اي دكومي خل اخذج
– لا ييمه توك جاي اتعيبان علياء كومي صبي لاخيج غداه خطية
– يا غده وانت تتلوين يا يمة رحمة لاهلج دكومي
– لا يمه اعرف بنفسي ما بيه شي .. بس ارتاحلي شوية
– نطمن يمه نطمن .. كومي
علياء: ابدل ؟
– وفروخج ؟
– اوصي ام حسن جارتنا يضلون عدها لحد ما ارجع
– ديلا لعد استعجلي .. كومي يمّه
صحت : علياء عباة امي وين
– بالبوفية يمه
فتحت بوفيتها طر بخشمي ريحة المسچ .. جريت عبايتها وكتلها : ها ام احميد كومي يلا .. كومي خاطر الكيلج رجل ينفكج بدل ما ضالة تتلوين ع الزواج بحجة متألمة
– فلشك يبو راس .. خايب يمه مالي خلك سوالفك هدني
– هسه دكومي يا يمه كومي .. يلا يلا عيني نفسج
لزمت ايدها بستها وتجيتها حتى تكوم
حجت وهي تدعيلي : روح ييمه من عسنى الله يفتحها بوجهك ويرزقك خيرة ماله وناسه بجاه امير المومنين
– يفتحها بوجهي من ازوجج وتعرسين وافتك منج كومي يلا ..
كامت تضحك متألمه .. حضنتها وبست راسها : ام اعبيس هاي .. روح الروح هاااي
– الله يحفظك ييمه .
عدلت شيلتها واني لبستها العباية .. وعليا لحكتنا وهي تتجى عليه وتمشي على كيفها .. وعلياء مشت توصي جارتنا على فروخها .. شافت السيارة اني وثغبت : ءءءءءء يمه لا لا يوليدي مو مالتنا السيارة تروح تندعم يصير بيها شي .. منين نجيب فلوسها من گملاتنا
– دصعدي اصعدي يمه .. هاي السيارة الخايفة تصعدين بيها ما تجي فلوس ساعة يلبسونها
– جا رخيصة هاي ؟
– لا سعرها عشر شدات وشوية
– شدادت يعني شكثر
تحجي وتريد تصعد عالية .. رفعتها وشلتها ضحكت : دهر الدهرك ييمه عيب منا الوادم شيكولون علي
– ابنها شايلها يا يمة .. جا شايل غريبة اني ولو عزبة ينخاف منج يم احميد
– فلك طرك كون
ضحكت وانداريت للسيارة شفت علياء جتي .. فتحتلها الباب وصعدت كدام الستيرن وهي تكلي : ما كتلي شكثر الشدات
– يمه يعني فوك الـ ١٠٠ مليون
– ادخيلك يا علي واني اشتريلي سيارة ب١٠٠ مليون واذبها بالشارع يممممه
-والله يا يمه انت على نياتج .. ساعة ابوها كاكا دلشاد اللابسها بـ ٢٠٠ مليون
– يااااع ساعة هاي التلبس بالايد لو الجبيرة
– لا تلبس بالايد
– صخام يمه منيلهم
– شني منيلهم هاي بعد جا خير العراق قابل ابطني لو ابطنج .
– بواكين يعني
– لا مو بواكين بس هم يبنون عمارات باربيل ولازمين وزارات وكل الفلوس والسيارات بديهم .. ارخص شي عدهم البشر .. والله يايمه قندرته بمليونين يعني اعلى من راتبي المديوس ومهيون حتى احصله
– مهيون ليش ييمه .. ياهو الهاينك
– جا يمه شتسمينها من اشتغل عد مرة كل ما كبت هرموناتها صاحت علي ورزلتني ولا جني زلمة مشوربة شطولني شعرضني يباوعلنه عبيد مو بشر .
– هاي هاي الاجتي هيج تعاملك ، هجم بيتها حسبالي زينة ووكلتها كباب عروك وصرفت عليها اللحمات طلعت ما تستاهل لو عايفتها بدون عشى .
– والله يا يمة طالعة روحي وكوة متحمل
– شتسوي يا ابني هي هاي الدنيا ناس تنزل من بطون امهاتهم وبحلوكهم خاشوكة ذهب وناس ييمه بس الضيم مكدر عليهم
هزيت راسي واني احاول الهيها بالحجي خاطر ما تتألم .. وصلت لمستشفى مدينة الطب ، نزلتها هي واختي .. ورحت اطبك السيارة بكراج .. طبكت واستلمت الوصل .. هستوني كاعد امشي للمستشفى ..
دك رقم غريب ..
ما رديت .. دك مرة ومرتين وما جاوبت وصلت المستشفى ..
اندزتلي رسالة ..
ابنك مريضة ومحد بالبيت ياخذه مميته عليك مخابرتك
فزيت بسرعة واتصلت ، ردت : الو
– الو متجاوب شبيك
– منو مريض
– مصطفى ، مصخن حيل فد مرة وكاعد ديزوع واهلي بالزيارة وبس اني واختي بالبيت .
– يلا جاي ..
افتريت نفس الباب الطبيت منه طلعت وخابرت علياء كتلها : خوية غيد خابرتني مصطفى ابني مريض لازم اروح اخذه .. راح اخابر محمد خاف ما الحك عليكم ..
– خوش خوش عود طمنه عليه .
رجعت شبه الركض اخذت السيارة وطلعت بيها لبيد طليقتي غيد .. واني اخابر محمد .. مرة مرتين ما رد .. الثالثة طلعتلي مرته : ها عباس محمد نايم
– امي بالمستشفى كليله خل يروحلها بسرعة
– خير شبيها
– متألمة وخذيتها ورايح لمصطفى ابني مريض
– بس متألمة
– جا خوية منتظرتها تموت رحمة لاهلج .. دكعدي
– كبل شوية اجا من الشغل خطية
– واني وين جنت اركص هم حالي حاله جنت بالشغل .. كعدي وكليله عباس يريدك بسرعة .
– ماشي ماشي
سديته منها شوية وصلت البيت .. خابرت
طلعتلي غيد بس ما لابسة حجابها كتلها : جيبي
– فوت اخذه ما اكدر اشيله
– شلون افوت ومحد موجود
– اي شكو قابل ، غير ابنك دطب اخذه .
– دسويلي درب .
– محد اكو فوت
فتت هي تبعتني ، وكفت مدنك هي فالة الشعر ما حجيت ولا كلتلها شكو طالعة مفرعة تروح تتلاسن وياي وتكلي شدخلك وياهو مالتك .. سكتت كلت معلي .. اخذ ابني واطلع
حجت وهي تمشي : كالولي صاير احوال ما صدكت شغل وسيارة عالية شنو طلعلك ورث ؟
– هسه دشوفيلي مصطفى وين
– هذا
فتحت غرفة مصطفى كاعد كدام كتبه وكاعد يكتب وحيدر متمدد يباوع كارتون .. عقدت حاجبي : ها بابا حبيبي شبيك ؟
فزوا اثنينهم من شافوني ، دنكت بستهم .. وكضيت مصطفى صدك مصخن كتله : كوم خل اخذك للطبيب
حيدر : بابا خل اروح وياك اني هم
– مو يدلل البطل ، يلا البس وتعال
باوعت لمصطفى : اشيلك بابا لو تكدر تمشي
– لا اكدر امشي بس حلكي مو طيب
– من الصخونة .. هسه اوديك للمضمد اتطيب
غيد : انتظرني البس واجي
– ما يحتاج اني اخذهم اشوف شبيه واجيبله علاج وارجعهم
– لا ما اكدر اعوفهم وياك
– ما تكدرين شنو عايفتهم ويا حرامي غير ولدي
– ومنو كال ترجعلياهم
– واني كاعدلهم حتى اخذهم لو ما مخابرتني ما اجي
– لو اروح وياهم لو ممنوع يطلعون
– اسمعي لج خابرتني وجرجرتيني مناك لهناك حتى اخذه .. چفيني شرچ وكعدي مالي حيلج .
كاعد احجي .. دك التليفون كاكا دلشاد
ضليت اباوع بحيرة .. شلون هسه ارد لو اتجاهله
لو اتجاهلته شيفكني غير يسحكوني سحك !
شلت راسي وهي تصيح : بس مو صوجك صوجي اني خابرتك
ما سمعت شجانت ترطن ، ضميت التليفون بجيبي وكتلها : سويلي درب هل اطلع وراي شغل لفوك راسي
– وكت والله عباس الجان كاضيها نوم يكلي شغلي فوك راسي
– انتظركم بابا
– ميطلعون
– اي ليطلعون واي شي يصير عليهم اشيلج انت واهلج والله
– والله اذا ما اخذهم بيدي وارجعهم بيدي ما امن
– يطبج طوب لا تأمنين
فتحت محفظتي وطلعت ٥٠ الف : هاج هاي اخذي دكتور وجيبيله علاج
– مكلف روحك منطيني خمسين .. هي بس كشفية ٢٥ علاج بيش
– جيبي اني اخذه
– متاخذهم بدوني
هزيت راسي وطلعت .. مصطفى لابس نعاله وراكض وراي وحيدر تابعه وهي تصيح عليهم .. رايدة تمنعهم وتسد الباب طلعوا كبل لتكضهم كامت تصيح عليهم من الباب يرجعون ، كتلهم : صعدوا بابا .
– والله لو خذيتهم يا عباس .. لا اكلب الدينا فوك راسك .
سديت باب السيارة وهي تحجي .. دك تليفوني .. باوعته نور .. رديت : ها
– هلو
– صاير شي
– لا بس لان طلعت عصبي واعصابك تعبانة كلت اطمن عليك
– مشكورة رحم الله والديج
– شلون صرت
– شبيه مريض وشلون صرت
– لا يعني هديت
– هو اني شفت دربي خاطر اهدى صار المغرب واني على داير فرة
– الله يساعدك ..راح ترجع لبيت الست فيان لو لا ؟
– ما ادري كالتلي اخابرك .. ليش محتاجين شي
– لا رجعنا لبيتنا احنا .. بس متضايقة وكلت اخابرك
– الله يساعدج .. من رخصتج ابني مريض وجايبه للمضمد
– يا خطية شبي
– مصخن
– سودة عليه يا روحي خطية كلش شغلت بالي عليه مو تنسى اطمني عليه
– الله كريم
– من تفرغ خابرني نسولف عود مقهورة .
– ان شاءالله
سديته منها ونزلت للمضمد حميد .. انطاه شرابات ولزكة مال صخونة لزكها بظهرة حتى تمتص حرارته و تنزل بسرعة.
شربته العلاج واني عد المضمد
خابرني خالي : ها عباس وينك
– ويني ماخذ ابني للمضمد
– ابو غيد خابرني وعصبي يكول عباس جاي للبيت واحنا ما موجودين وطاب ماخذ ولده وطالع .. شلون تتعدى ع البيت خالي وهو ما بيه احد بس نسوان
– ياهو المتعدي خالي هي خابرتني كالتلي تعال اخذه كتلها صيحيلياه كالتلي طب شيله ما اكدرله وطبيت
– جا ابوها يكلي متعارك وياها ومهددها وماخذ ولدك
– غيد بعد خالي اجوز من سوالفها
– خاف تريدك خالي هالسوتلها الهوسة هاي
– واني عايز هوسة يا خالي حتى اريدها .. تولي روحي تجز من طاريها
– ميخالف خالي ام ولدك جا شتسوي
– الله كريم هسه ارجع الولد
– ديلا خالي لا تبطي ويروحون يسوولنا سالفة
– الله كريم
– كالوا جاي تشتغل وشغلك زين وين جاي تشتغل انت
– والله اطيت فلوس لواحد وشغلاني بس بعدهم ما مثبتيني
– ها خير ان شاءالله ، لو شفت اشغيله لمنيضر يا خالي اكون ممنون
– ابطن عيني اذا كدرت ما اقصر
– بعد خالك .. ديلا تبط لا هاي المعذربة تسويلنا هوسة
– ان شاءالله خالي ان شاءالله .
سديته منه ، وباوعت لمصيفي : ها بابا شلون صرت
– بابا جا هستوني شربته شنية
– ها هم صدك حقك .. شتريدون اوكلكم ؟
حجه حيدر : بابا عليك الله اشترينا همبركر
– يلا همبركر همبركر .. امشو
مصطفى : بس بابا خاف حلكي مو طيب
– ضمها من يصير حلكك حلو اكلها ..
هز راسه حضنتهم اثنينهم وبستهم وكتلهم : يلا صاعدوا بس لا توصخون السيارة مو مالتنا بابا عيب
– مالتمن
– مال الشغل
خذيتهم على مطعم يبيع همبركر اشتريتلهم ودخلتهم اسواق اخذوا اليشتهونه .. وصعدتهم بالسيارة .. مصيفي مخنچر كوا يمشي خطية ..
صعدت واني اكلب بالتليفون على رقم علياء ، خابرت ومشيت بالسيارة .. ردت : ها عباس
– ها خوية بشري شلونها اني
– والله يا عباس الدكتور كال لازم تنام مستشفى ..
– ليش !
– والله خوية ما ادري شغل بالي يكلي الورمة كبرانة .. و لازمها عملية بس بالاول لازم نسويلها زرع
– لا تخوفيني علياء زرعيش مو سوينالها كبل شكد وكالوا حميدة
– والله يا عباس ما ادري حيلي كاعد يرجف وعلي ما ضل بيه حيل من كلالي روحي راحت كمت ادعي الله واهل البيت بس كون تضل سالمة .
– لا حول ولا قوة الا بالله العلي العظيم ، محمد يمج
– لا جا ما اجاني كالك يجي
– مو خابرته يجيكم صدك تحجين
– ماكو لا خابر ولا وصل عسبالي ما يدري .
– دروحي هسه اخابره .. شتحتاجون كتبيلي رسالة اوصل الولد واجيكم
– حكه صدك مصيفي شلونه
– زين يمعودة هذا كاعد ياكل همبركر
– لعد عليمن خابرت البومة
-البومة مسويتلها سالفة على اساس اني متعدي على البيت وماخذ ولدي بالغصب خابراني خالي يلوم
– ياااا صدك تسولف تجذب
– دروحي خل اوصلهم واشوف شلون اجيكم
– ديلا ترا امي ما ماكلة من نهد الريوك اذا تكدر تجيبلك شي يلزم كلبها
– ان شاءالله ان شاءالله
سديته منها وسقت السيارة .. دك التليفون ، باوعته الست فيان .. رديت : ها ست
– اتصل بيك حضرتك مشغول
– اي ست جنت احجي بالتليفون
– ويا منو جنت تحجي !؟
– ويا منو جنت احجي !؟
– دا ترد على سؤالي بسؤال !؟
– لا بس هالشي مو يخصني
– يخصك لما ميأثر على شغلك اما لما اخابرك مرتين ويطلعلي مشغول .. هذا ميخصك واثر على شغلك .
– هسه ست رديت امريني
– اكولك انت شنو دا تسايرني وتمشيني لو مفتهمت
– ست انت مو مخابرتين غير اعرف شتريدين حتى اخدمج
– منو خابرك
– كاكا دلشاد وما جاوبته
– بابا يخابرك وتتجاهله
– ست مو انت الكتيلي لا تجاوب واحد منهم
– وبابا مو واحد
– جا اثنين
– دا تستهزأ حضرتك
– اكلج هسه المطلوب مني شنو
– بضميرك هذا اسلوب تستخدمه بالكلام ويا مديرة عملك .
– ست ابني مريض من صفحة و امي بالمستشفى من صفحة والامة مشتعلة براسي والعباس فارحميني وخففي عني ترا واحجيلي التريدينه عمي خادم اعرفهم كلهم واجيك
– الحجية نايمة مستشفى !؟
– اي
– بأي مستشفى ؟
– مدينة الطب
– انت وياها حالياً
– لا راح اوصل ولدي لبيت اهل امهم وارجعلها.
– طيب ، اخذ راحتك اذن .
– مشكورة
فيان : سديت الخط منّا .. وماما تكولي : خابرتي ابوج
-لا بابا مخابر ع السايق اللي ضرب شوان و السايق ممجاوبه
– حييييل والله هالسايق على راسي يعني اتجاهله لابوج.
دا تحجي .. طب زوجها اكرم .. امي كامت من مكانها تستقبله .. تباوسوا من الحلوك كدامي اني سويت نفسي مركزة بالتليفون ..
حجه اكرم : اليوم هنا ست فان القديرة شدعوا خاف مو كد المقام
– اهلا بيك
– اكيد صايرة مشكلة وجاية لان انت متعرفين امج بس من تتمرضين لو تصير وياج مشكلة وتعاي يا ماما حليها
حجت امي : اووو تمون فيونه بكل وقت شعندي غيرها بنيتي
– اي ما گلنا شي بس حلو تذكرج كل يوم مو بس من تحتاجج
كمت من مكاني واني اتجاهل كلامه ، كلتلها : ماما اني حروح لمدينة الطب
– خير
– عندي صديق هناك امه مريضة ولازم اروح
– بس بهالليل
– خلي واحد من السواق يطلع وياي
اندارت لزوجها : السايق موجود
– اي اركان موجود
– بلغه حتى يوصلها
– ليش لازم ابوها فلس على اعلانات الانتخابات مالته وجردها من حراسها
– ماما ملازم حبيبتي اني اخذ تكسي واروح .
كمت لحكتني و ندغتني : ترا ديشاقه وياج شبيج
– مشاقه وياه كبل حتى ديشاقيني وبعدين بلغي ليجيب اسم بابا ع لسانه .
-وي على حور ابوج وميجيبه على السانه
– ممجبوره تحبي بس مجبورة تحترمي لانه ابويه
-اي تمام تمام لا تكلبيها .. حترجعين لهنا
– بلي ، خلي التليفون قريب منج خاف ارجع بالليل .
اخذت جنطتي ولبست البوتين ومشيت ويا السايق وصلني لمستشفى مدينة الطب .. بس من وصلت هناك ضعت اول مرة ادخل الها توقعت هي مكان واحد طلعة مجموعة مستشفيات بمكان لهذا مسميها مدينة الطب .. بس هي بيا مستشفى ؟
رجعت خابرت على عباس ..
ما رد، رجعت دكيت .. رد : ها
– وين انت ؟
– ست اني متوجه للمستشفى
– يا مستشفى
– مدينة الطب جا كلساع اعيد
– انت ليش بصلتك محروكة وخلكك هلكدوته ترا دا احجي وياك مثل البشر اتأدب واحجي عدل ولتشمر
– ست رايح لمدينة الطب .. لمستشفى غازي الحريري … امريني
سدته بوجهي ..
ديلا هو ناقصني هالطكة ونص الما تفتهمها شتريد .. يا الله ارحمني من هالبشر دخيلك اطك براسي وعلي اجطلهم تجطل
احجي وعين بالتليفون وعين ع الطريق كاعد اطلع رقم محمد.. اتصلت .. جاوب : ها عباس
– محمد شنية جا مو خابرتك
– يمتى خابرت خير شكو ؟
– مرتك ما كلتلك ؟
– لا هسه غير يكلي
– امي بالمستشفى .. ووصلت الجهال لامهم وصارتلي مشكلة ما ادري عليمن اندار
– اني شبيها يا جهال وصلتهم
– انت بس كلي وين ؟
– بالكوفي
– بالكوفي محمد بربك ؟
– هي شني اشم ايدي امي مريضة
– اي مو خابرتها للشرفنص مالك وكالتلي هسه اكعده
– عباس لا تضل تتجاوز
– خب دررروح
سديته بوجهه .. وكملت للمستشفى.. طبكت واجيت اريد ادخل المستشفى .. لكيت الست فيان واكفة
عقدت حاجبي : ست العفو شعندج هنا
– مكدرت الكى والدتك وما اعرف اسمها حتى اتفقدها بالمعلومات .
– جان كلتيلي امرلج
– جابتي السايق مال ماما
– تفضلي ست … مشكورة على جيتج
مشت كدامي .. لابسة تراكسود بالبيت ما نلبسه جسمها بارز وحاطتلها كاسكيتة ورافعة الشعل الزلم البالمستشفى اكلوها اكل بنظراتهم .. كتلها : ست امشي كبالي .
– حتبات هنا امك
– اي
– مدا تحس المكان مو صالح ، اشوف لو تاخذها لمكان افضل وانظف ..
– هسه اشوف وضعها وعود الله كريم
خابرت علياء دلتني وصلت الهم .. سلمت الست على علياء ودنكت باست امي وسلمت عليها، امي اتشكرت منها وكالتلها : قصرتي يخالة جاية بهالليل
– حبيت اطمن عليج
– من اروحنلج فدوة يخالة .. زينة اني شوية مالومة للصبح ما يضل حمل مطروح
– ان شاءالله الشفاء العاجل
دا احجي ويا خاله .. شفت عباس سحب علياء وطلعوا يحجون .. ابتسمت بوجه خالة بس مستحية معرفت شأحجي .
تحركت خالة .. وتريد تكوم .. مديت ايدي الها كمشتني وكاعد دا تتجى عليه وصاحت : ولج علياء
ركضت الها علياء ..
واني طلعت لعباس لكيته مدمع .. حجيت : الحجية بيها شي
– شاكين الورم صاير خبيث
– سلام قولاً من رب رحيم .. متستاهل خطية
بقى يمفرك بعينه يستحي يبجي .. شفت بعيونه مشاعر صادقة اتجاه أمه .. قهرني .. كتله : لابد اكو علاج واذا ببدايته يكولون سهل يطيب.
هز راسه ومن طوله كعد بالكاع فات رجليه وثانيهم .. ضليت اباوع عليه ، حجيت : راح تبقى هنا
– جا اعوف امي واروح
– دا اقصدها الها ، حتبات هنا
– ما ادري كايلين لاختي تبات .
ديحجي .. دك تليفونه .. رد : ها خالي .. والعباس ما متعدي هي شني قابل ما افتهم هي خابرتني كالتلي تعال اخذهم كتلها حيبي كالتلي فوت
اي يروح يطك راسه بالحايط ابوها اني ياهو مالته يريد خل يكض دودة بته .. هسه خالي اني ما استحي ومسربت الرايدينه شنو
وعلي انجوم السما اقربلها ..
خالي هسه اني بالمستشفى وحيلي مهدود .. مالي خلك رحمة لوالديك .. عود اي احجيله بيها
الله وياك .. قفل التليفون بنتره وشمرة بالكاع كدامه .. حجيت : صاير وياك مشكلة
– هيج ويا الجهال
– اطفالك ؟
– اي ابني مريض
– همم الله يعينك الحجية وابنك اجتمعوا اذا تحب اخذ اجازة كم يوم واتفرغ
– الله كريم ست مشكورة
ضل ساكت وحاير واني واكفة ومتجي ع الحايط واديه ورا ظهري ، حجه : ست خاف تريدين تروحين اذا هاي اوصلج وارجع ما عندي مشكلة
– خل نشوف وضع الوالدة وبعدها سهلة .
بقينا واكفين بالربع ساعة اجا الدكتور ، وكفله عباس ، كاله : لازمها زرع باسرع ما يكون يفضل على حسابكم لان يحتاج تدخل عملية فورا وخطر عليها نجرب العملية وما نعرف نوع الورم .
– يعني اسويلها برا دكتور
– افضل .. ولازم تاخذ هذا العلاج وتستمر عليه لحين وقت العملية
– زين هي لازم عملية
– طبعا الا اذا رايدها تموت
– لا اسم الله بس تعبت من العمليات هاي ثاني عملية استأصال ورم
– شتسوي بعد مو افضل ما يصير اخطر
– لا بعد يم الله ، زين دكتور اطلعها لو تبات ؟
– لا لا طلعها بس من تتألم زايد جيبها
– ان شاءالله ، بس دكتور بروح اهلك حالتها خطرة لو لا ؟
اجا محمد من وراه : ها عباس وين امي
الدكتور : ادعولها ان شاءالله تكون بخير .
راح الدكتور ومحمد وكف : ها شني امي
– شاكين بيها ورم خبيث .. لازم نسويلها عمليه
– صدك عود ، ما صالنه هواي من سوينالها عملية .
– ما ادري محمد ما ادري ، اسمع لا تكللها اي شي نكللها الدكتور يريد اجرائات خفيفة حتى يسويلج عملية
– وما تعرف الزرع هي ونجذب عليها
– اي نكلها اجرائات روتينية للعملية نفس ذيج المرة حتى يتأكدون
– هسه هي وينها
– بالردهة جوا ..
اندار باوع على فيان كصها كص .. حجيت : محمد جوا
واجيت : ست تريدين اوصلج لو شتأمرين ؟
– وامك شلون توصلها ؟
– محمد ياخذها للبيت
– طيب، بس اذا بالك مشغول عليها ممكن اخذ تكسي وانت ابقى وياها
_ لا هيج راح يضل بالي وياج اكثر .. محمد
– ها
طب : راح اوصل الست فيان انت اخذ ام وام علاوي ورجعهم للبيت
– ست فيان منو نعرفها ؟
باوعلها ..
– هسه دخذهم واني ارجع للبيت
– اوكف
تقرب مني : ترا ما شايل فلوس تكسي كل البجيبي ١٠ الاف دينار .. رجعهن وياك اذا تكدر
– محمد هاي المديرة ماتي اروح احط امي وياها ما يصير
– اي اترخص منها، خوية بيها مجال توصلون امي
جريته : محمدددد شني سالفتك خوية
فيان : اي طبعاً ، لتترك والدتك
– لا ست
جريت المحفظة : هاك فلوس تكسي بس روح
صاحتلي : عباس ، روح جيب السيارة على متكمل الوالدة
– بس ست
– نفذ بدون نقاش
تنهد وهو يخزر بمحمد .. راح ومحمد ضل يمه امه يحاجيها ويطمنها ويبوس براسها .
باوعت هم كعائلة انحرجت اوكف وياهم ..
تبعت عباس ومشيت وراه، لكيته واكف وناس هواية منتظره المصعد باوعني : ها ست ، كولي
– دا اريد اروح وياك للسيارة
– مسافة لحد ما نوصل ابقى اجيبها واخابرج
انفتح المصعد، حجيت : مو مشكلة نمشي
دخلت ويا الناس .. وكفت بنص المعد وناس هواية.. ولد واكف ورايا ومتجي ومنزوي كاله : بعد اخوك خلي الست تدخل بلا زحمة عليك
فز : اي ، اتفضلي
اخذت مكان الولد وعباس وكف كبالي .. ونظراته محتارة بعيونه الف حيرة وهم وبين مرة ومرة يذب حسرة ..
انفتح المصعد اكثر من مرة وهو ميستوعب يشيل اكثر .. اندار باوع بعيوني لكاني مركزة بوجهه ، ابتسم : خابرتي بابا
– لا مخابرني
– بس خابرني واتجاهلته خاف يعني
– من يخابر راح اكوله اني نبهت عليك مترد على اي احد .
هز راسه .. وبقى واكف كبالي
انفتح المصعد ، همس : خليهم كلهم يطلعون
بقى واكف كبالي ويتقدم شوية شوية لحد ما الكل طلع .. طلعنا .. هو يمشي بسرعة واني امشي وراه ، اندار : تبقين بالباب اروح اجيبها واجي
– لا
سكت وكملنا مشي .. اخذ سويج السيارة واجا صعدنا .. طلع ووكف عند ابو كشك .. اشترى مي وعصير وكيكة وناوشلياهم
: المن ؟
– الچ
– بس اني مطلبت
– كلت خاف عاجبج تاكلين شي او عطشانة
اخذتهم من ايده : شكراً
يوم يوم تصرفاته دا تقبع بداخلي .. عنده حنية بالفطرة يخلي الإنسان الوياه يحس بشعور حلو من الإهتمام .
.. دك تليفوني ، باوعته ، بابا .. رديت : الو
– فيان وين انت
– اجيت لبيت ماما
– شنو السبب
– بابا لتحجي ويايا وكأنك متعرف السبب ولا تعرف شوان شنو سوا
– لا اعرف وهذا شوان يمي وين انت حتى احي اخذج ونحجي
– اعتذر بابا ممستعدة اشوف
_ فيان لازم نحل المشكلة بيناتكم هو مفتهمج غلط والرجل ديعترف بغلطه وكل العلط من السايق هذا الهمجي .. ساء التصرف وزاد الامر سوء
– السايق كاله يضربني بابا !
– مو موضوعنا السايق ، تعاي حتى نتفاهم .
– مراح اكدر اتفاهم ولا بأي طريقة مع انسان طعن بيه وضربني وعنفني .. واحنا بعدنا ممتزوجين لما نتزوج شحيسوي يخليني اتبع اختي بابا
– فياااان
– ارجوك بابا لتظلمني اكثر من هيج اني وافقت باللي تريده كله بس مو يضربني ويتهمني .
– فيان بنتي
– صار لازم اروح .. اعتذر منك مع السلامة
سديته باوعلي واتصل بلغ امه واخته ينزلن .. واندارلي : كاكا كاعد يدافع لشوان
– تلكى شوان كعد يمه يبجيلا فصدكه
– طبعا قابل مثلج ست رحتي كابلتي امج
– انت دا تلومني
– لا بس المفروض تكسبين ابوج .. مو تتركي لشوان يكسبه خصوصا انت اليوم كلبتي الدائرة كلها وغيرتيها ممكن يعطل كل تعليمات ويرجع الوضع نفسه .
– ما ممكن ، اعتقد بابا حيطلب مني افصلك .
تنهد وهز راسه ..
سكتت .. صار هدوء لحد ما اجوي اهله .. صعدت امه ليكدام .. واخوه رجع بتكسي .. طول الطريق امه واخته ديسولفن .. معرفت اشاركهم بحديث لكن رغم الموقف الصعب اللي هم بيه يضحكون وينكتون و كأنما ما عدهم هم !
طلبت منه يوصلهم ويرجعني
وصلهم ورجع صعد .. ديسوق .. دك تليفون
ما رد ، حجيت : تليفونك ديدك لويش مدا تجاوب
– مو مهم
– بس يمكن مهم
– لا .. اوصلج ست
– اشوف خاف بابا
– لا ست رقم اعرفه
– مو مشكلة جاوب
– بعدين
– كلت جاوب
تنهد .. وجاوب : ها
اجا صوت نور خفيف كاللها : اني بالشغل حاليا بعدين اخابرج
قفل
حجيت : صوت بنية
– لا ست .. صاحبي
– صاحبك صوته بناتي
– بعد هيج الله خالقه
تنهدت وضجت منه .. وصلني للبيت
نزلت ودخلت البيت كلش متضايقة .. لكيت ماما كاعدة بس لابسة روب ستن طويل بلا اكمام .. وناثرة شعرها ..
– ها شلونها صديقتج
– مو صديقتي
– مو جنتي ويا صديقتج
– لا ام السايق مالتي
– وانت رحتي لاهله ؟
– ماما ديصير ويايا شي غريب
وكفت وانتجت ع الحايط عاقدة حواجبها .. وتركز ويايا .. انتجيت على جانب التخم وكعدت : د تصير عندي مشاعر غريبة اتجاه السايق مالتي
– شنو هاي المشاعر
– ما اعرف احب الوقت الهو موجود بيه اكون مرتاحة ووجوده يحسسني بشي من الاطمئنان .. بس دا اتضايق لان هو ديتواصل ويا بنات
– انت شدا تسوين بنفسج .. فيان دا تحجين صدك
– دا احجيلج اللي احس بيه !
– هذا السايق مالتج بنتي لا هو مستواج ولا يليق بيج حتى تباوعيله مو تصيرلج مشاعر اتجاهه
– بس هالشي ديصير ويايا بدون ارادة .. يعني اني المفروض ما اتضايق اذا اجاه اتصال من اي ان كان بس دا اضوج .. احاول ما اهتم بس بلا شعور الكى نفسي متوترة ومتضايقة .
– هو نفسه اللي كتل شوان اليوم
– اي
– هو مامنج بشي
– هو معتبرني مديرته مشفت منه شي ثاني
– اذا مشفتي منه شلون حبيتي
– ماما اني محابته ، اني دا اكولج دا تصير ويايا شعور خارج عن ارادتي
– وشنو هالشعور غير حب بنتي
– وشسوي بهالحالة ؟
– صارله شكد يشتغل عندج
– من شهر
– بشهر واحد صار عندج شعوووور شو ماما انت مستعجلة زايد
– اللي حسيته من هالرجال بشهر محسيته من شوان بـ ١١ سنة .
– وشنو اللي حسيتي
– حسيت اكو رجال كدامي
– حسيتي اكو رجال كدامج !! مديرة ادارة انت ماما وتحكمين زلم جاية دا تكوليلي حسيت اكو وجال كدامج .. الباقين شيتسمون لعد
– بشر عاديين ذكر وانثى .. ما احس بموقف يعبرلي عن رجولة الانسان اللي كدامي حتى لو خطيبي محسيت .. مو بيدي
– ويمكن محتال ديحاول يجرجرج
– هو ممهتملي وهذا المضايقني
– عزا ولج بنتي دا تحبين السايق مالتج اللي ممعبرج ولج شصايرلج
– ماما هسه مو هذا همي ..
– لعد
– بنت ام غيث اللي اسمها نور
– الشغالة مالتج
– اي
– بيها
– دا تتقرب منها وهو احس دينطيها مجال
– حتخليني الطم و ألله لج فيان صدك تحجيييين دا تساوين نفسج ويا بنت خدامتج وتغارين منها ع السايق مالتج .
– شنو الحل
– افصليهم كلهم .
– افصلي الشغالة وافصلي السايق وابعدي نفسج عن هالمتسوى الضحل .
– ليش ضحل لان ما عدهم فلوس !؟
– لا مو بس فلوس هم لا بمستواج العلمي ولا الاجتماعي ولا حتى العملي لتنزلين اقل من مستواج حتى لتنهانين ..
-اني ما اقيس الناس بهشكل ، اقيسهم بمدى صدقهم واخلاقهم .. الإنسان اذا فقد قيمته من الخلق والصدق مينفع وياه لا مال ولا التعليم ولا العمل .. متكدر تعاشره ولا تعيش وياه بأي شكل من الأشكال
– ماما ابتعدي عن الكلام المثالي.. وابعدي هذا السايق منج .. بأي طريقة .. افصلي انقلي المهم ميبقى يمج
-ماما الصبح جان ديشمر روحه كدامي ويضرب شوان لخاطري
-لوكي لا تعتقدين ميت عليج، رايد يكسبج
– هو حتى مدا يحاول يكسبني .. اصلا غريب الاطوار ميعاملني كأني مديرته
–
– يتمادى وياج ؟
-لا بس هو طبعه هشكل
-زوجج هو ودا تكوليلي طبعه هشكل ؟ بنتي عقلج مخترب دا اكولج افصلي خلي يبعد عنج هذا ديأثر عليج بشكل سلبي
-بالعكس اني اشوف ديأثر عليه بشكل ايجابي .. حتى ادوية مضاد إكتئآب مدا اخذ .. ديساعدني هواية بالتفكير وحتى طريقة العمل .
-لا انت الظاهر من صدك عقلج بطل ..
عافتني ومشت ..
من جانب حقها ومن جانب لا ، لإن هي متعرف عباس دا تتصوره استغلالي لو يحاول يكسبني .
كعدت ع التخم واخذت الكوشة حطيتها بحضني وبقيت افكر ، دك تليفوني .. باوعته عباس ، رديت : هلو عباس
– هلو ست
– اكو شي
– خابروني كالوا رافعين بيه مجلس تحقيقي
– على ؟
– لان متعدي على مدير المالية مال الدائرة اثناء اداء واجبي وابوج رافع المجلس .. ردت افهم منج اذا رفعوا بيه شيصير
– تتحول للقضاء تتحاكم وتنسجن
– بس هو تعدى عليج واني دافعت من حرارة كلبي لان تعدى على مرة بمسؤليتي
– ما اعرف .. باجر اشوف شگدر اسوي
– ست اني اعرف نفسي رحت زايد واخذت مسؤليتج على محمل الجد بس امي بحاجتي واذا يصير عليه شي لو تسمع لازميني سجن والله تموت
– كان فكرت قبل للتتهور عباس ..
– كاعد تلوميني
– طبعا الومك تصرفاتك مو بمحلها ابد .. خصوصا اكو امور مدا اكدر اتقبلك بيها نهائي وانت تفهم شدا اكول
– هاهية ست فدوة الج حتى لو انسجن اسف اخذت من وكتج مع السلامة .
سد التليفون بوجهي
ضليت اباوع ع الموبايل ..
وافكر بالموضوع .. احتاريت شسوي ..
مدا اعرف شديصيرلي .. انشغل بالي جداً وطار النوم من عيوني بقيت افتر بالبيت وافكر ..
طلع اكرم زوج ماما ..
اني جنت مبدلة ملابس بيت .. بيجامة وتيشيرت
فات من عندي .. نظراته مقززة وهو يتفحصني .. رغم هو شايب نهاية الستينات .
اشمئزيت من وضعه كمت فتت للغرفة وتمددت ع السرير ومنزلة رجلي .. فات بلا ميدك الباب : ها
باوعتله عاقدة وجهي وعلامات الاستفهام واضحة من تصرفه .. حجه : محتاجه شي
– شكرا .. وبلا امر عليك لما تريد تدخل المفروض تدك الباب
ضحك: هاي شنو تستحين مني ترا اني مثل ابوج
– شكراً .. تكدر تتفضل
– اعصابج يحلوة .. ليش هلكد عصبية
حجاها وفات للغرفة ، وسد الباب وراه .. كمت من مكاني : اريد انام .. لو سمحت ورايا عمل مهم الصبح
مد ايده على زندي يلزم ويكولي : ارتاحي باباتي حبيبتي من حقج .. والبيت بيتج يمتى متجين اني كلش افرح من تجين للبيت انت انسانة جميلة ومحبوبة
وكفت عند الميز تواليت .. حجه : شسويتي على موضوع شوان
مجاوبته ، حجه : هالحيوان ميناسبج .. انت المفروض الواحد يمشيج على ذهب وينومج على حرير
– طيب ، تصبح على خير .
– اني دا انصحج لان احسج حزينة وكئيبة واضوج من اشوفج مثل القمر وذبلانة .
– اني بخير .. بس نعسانة اريد انام
مد ايده يرد يلزم وجهي : انت مصخنة
دفعت ايده : هالشي ميخصك .. واحترم نفسك واطلع برا
– عيب هالتصرف
– عيب اللي دا تسوي .. اطلع منا ارجوك
– زين زين بس اهدي
ولزمني باثنين ادية من زندي
نفرته وصحت : كلت لك اطلع مناااااااا
– اششش لتصيحين شنو هالبنت الغير مؤدبة ..
اجت امي : شكو شنو
– بنتج مجرد دا اسألها اذا محتاجة شي ومعتبرها مثل بنتي بس هي كارهتني ما اعرف شبيها .. هذا ابوها يعرف شلون يحشي راسها
– لتجيب بابا على السانك لإن لو تذبحها لنفسك متكدر توصل شسع نعله
صاحت امي : فياااان
– طيب اخذيييييي من كدامي
هو راح واندارتلي : انت من صدك تحجين شلون تكلمي بهالطريقة هذه فييييان هذه مو بيداء وتعاملي هشكل
– زوجج فاسد امي .. نظراته سخيفة ومقززة
– وشسوالج
– لتكولين شسوالي .. دا اكولج فاااسد
– اتأدبي واحجي عدل افتهمتي هذا زوجي وبمقام ابوج وغصبا ما عليج تحترمي
– اني دا اكولج فاسد وانت ادافعيلا
– لان زوجي واعرفه .. واعرفج تكرهي .. حقدج هذا حيدمرررج
– طيب شكراً .. اني كنت غلطانة لما حاولت اجي عندج واشوفج
حجيت وانداريت .. اخذت تليفوني وهي تصيح .. خابرت على عباس .. رد بسرعة .. كتله : تعال بسرعة
– هسه !
صحت : دا تفتهممممم شدا اكولك تجي فورا
– جاي
– لتكبرين الموضوع وتأولي بغير منحدر
– اني دا اكبر المواضيع فعلا اعتذر منج ماما
– ميحتاج اتطلعين بهالوقت المتأخر الساعة ٣ بالليل مو صحيح طلعتج
– والله ماما اني اطلع وقت اللي يعجبني لما المكان ميناسبني
– تختلقين المشكلة وانت التتزعلين فيان ماما بطلي اطباعج الصعبة هذه
– تأمرين ما حبطلها
حجيت واني عيوني تحتقن بالدموع بدون ما تنزل .. لميت غراضي كلها .. واخذت التراك الشتوي لبسته مثل القمصلة ع التيشيرت ورفعت الكبوس مالته فوك راسي ..
حاولت تمنعني بقت تحجي وتلوم
مجاوبتها ولا بحرف .. لحد ما شفت السيارة بالكاميرات دخلت الفرع .. طلعت فورا وهي تحاول تجرني
صف عباس .. وهي تصيح : فيان راح ازعل والله لو مشيتي واتجاهلتيني
– لتزعلين ما اريد اخرب بيتج بطبعي الصعب ، مع السلامة .
نزل عباس فتحت باب السيارة وهي تحجي .. صعدت وهو سد الباب وراي وصعد حرك السيارة بسرعة ومشى .. ساعتها كامت تنزل دموعي بدون صوت بس دموع تجري بهدوء
باوعلي : صاير شي ست
– اكولها زوجج فاسد تكولي طبعج صعب .. تصدكه وتكذبني وتحط العيب بيه بدون متسأله ولا حتى تلومه وتحقق وياه
وكف السيارة : سوالج شي
باوعتله : ليش وكفت
– ست اذا اتعرضلج بشي خليني ارجعله انعل والد والديه
– امشي عباس لتزيد الموضوع
– هو سوالج شي
– عباس امشي كافي ..
حرك السيارة وهو يكلي : اذا اذاج بشي بس اشري وعلي اتربصله من الصبح اطكه وانعل لشة اهله
– عباس اسكت كافي
كمت ابجي بصوت .. رجع وكف السيارة : ليش دا تبجين
– ميخصك كافي
– انت اللي كافي .. متحملة شوان يضربج وابوج يهينج و زوج امج يتحرش بيج و امج ترزلج ومتصدكج انت الكافي
– وشتريد اسوي ؟ اوكف بوجه ابويه واعارضه لو اخلق ازمة واوصلها لابويه زوج امي فاسد ويروح يخرب بيتها وتصير مشكلة بسبب امر صعب ينجاب اسمي بيه .. امشي
– اي سكتي .. موتي وانت عايشة .. ابقي هييييج
– لتزيدها عليه الله يخليك كااافي .
– خل يولون انعل والد والديهم خوات الكح.. والله لتبجين ..
– عباس لتفشر
– هسه ما ادري اسف بس لا تبجين ما يسوون ترا خل يولون
– وصلني للبيت كلش تعبانة
– منو موجود بالبيت
– ماكو احد ، امشي كلش تعبت
– هاي وصلنا لا تبجين ..
وصلنا للبيت .. نزل امشي وهو يدخل السيارة ..
انداريت : اخذ راحتك اذا تريد اني راح انام
– راح ابقى بغرفة الحرس مو صحيح ست تبقين وحدج بالبيت
– طيب ، اقفل الباب وياك
دخلت اشوف الصالة كلها مي ..
ادوس ع الكاع روجات روجات المي .. عجيب شنو هذا !؟
كمت امشي بالبيت ..كله غركان مي والبيت ثلج
فتحت الباب وصحت : عباااس
-امريني ؟
– تعال شوف هذا المي شنو سببه
اجاني يركض .. هاي شنو طاك بوري
ما اعرف بس البيت ثلج والاثاث اندمر حاول تعرف وين مصدر المي
-طيب ست اخذي راحتج فوك واني راح اشوف مصدر المي واحل الموضوع
صعدت بدلت ملابس ثخينة من البرد ونزلت حتى اشوف شنو السبب لكيته واكف بالمطبخ وجار السنك
-هاي شنو
-ست هذا البوري طاك منا لازم ينسد الكاك وين صاير
-بالترك منا
مشى واني تبعته سد البواري كلهم وكف بنطرونه وقميصه وكام يمسح بالمي ويطلعه واني شغلت السبالت تدفئة ..
واني ارفع بالغراض وابعدهم واشيل .. نشف الكاع وسد الباب وكال : اخذي راحتج ست عوفي الهوسة الصبح تجي ام غيث وتتكفل الموضوع
– تمام كلش نعست تصبح على خير
-اقفلي الباب وراي ست مو صحيح تنامين والباب مفتوح اني ابقى احرس برا
– تمام
ديريد يطلع واني وراه اريد اقفل باب الصالة .. فتح الباب جان شوان يطلع بوجهنا .. انصدمت بيه بهالوقت ، حجه : كلتيلي بايتة ابيت امج مو بالبيت موووو ؟ ….

يتبع….

 

 

• لقراءة باقي فصول الرواية اضغط على (رواية على حافة الثأر)