رواية رغبة في الإنتقام الفصل الأول 1 بقلم نوسة حمد

رواية رغبة في الإنتقام الفصل الأول 1 بقلم نوسة حمد

 

 

البارت الأول

 

 

سمعت صوت امي بتتناقش مع ابوي قالت ليهو انت متين ح تبطل الانت فيهو دا انا تعبت والله كايسه الستره بس معاك مالقيتا محل ما نمش انت حركاتك ما بتخليها فضحتني وبقيت م عندي وش اقابل بيهو الناس انت عايز من الدنيا دي شنو عاين لي اولادك ديل امي كان صوتا واطي بس انا كنت سامعاها لاني م نايمه كويس وهي مفتكرانا نايمين ابوي قعد يكورك ويجوط فيها وهي بتقول ليهو عليك الله وطي صوتك اولادك نايمين ياهو الليل دا البنرتاح فيهو النهار كلو شغالين وانت ولا هاميك لا حاسي بالمسؤوليه لا عايز تحس بيها م سمعت كلام اهلي وما عرستك صدقتك بس طلعت اكبر كذاب وانا المصبرني عليك اولادي ديل مستعده اموت قصاد سعادتهم وبقو جايطين وابوي ابسط حاجه يعملا بمد يدو علي امي وماف يوم بمر بدون مشاكل بقا يضرب فيها ضرب ونحنا كلنا صحينا وبقينا بنزح في أبوي من امي وابوي يدفرنا يوقعنا وهو ما شاء الله

 

 

صحتو سمحه وامي رغم العليها والضرب بتحاول تفدينا عشان ما ننضرب احتمال الحاجه دي عند ابوي ساهله بس المنظر دا عمرنا ما ننساهو اخوي بسبب فعايل ابوي مرض عديل جاتو نفسيات وفقدناهو وامي الحال العليها ما يعلم بيهو الا ربنا وعايشين في بلد ما بلدنا بسبب ابوي وافعالو امي شغاله بتبيع ف الشارع فول وتسالي وبتعمل الاسكريم كل البنشتغلو نجيب بيهو حاجات للبيت ومرات ابوي يجي يقلعن منها ما اخليها تلم جنيه نحنا اربعه ولدين وبتين انا اكبرهم نوسه عمري ١٥سنه اخوي نادر عمرو ١٣ وندي عمرها ١٠ اصغرنا ناجي عمرو ٨سنه امي اسمها اميمه نحنا من شرق النيل ابوي من الخرطوم قبل الزواج كان واهم امي انو شغال بس بعد اتزوجت اكتشفت انو م عندو وظيفه غير اللف والدوران مع الناس وياريتها بقت علي كده لعب قمار وسكر ونسوان والمشكله ما هنا كان بلبس افخم اللبس وبتعطر بي عطور خليجيه ودا كلو بتعب امي وشقاها من وعينا للدنيا لقيت امي خاته صينيه في الشارع وبتبيع بعد كبرنا بقينا نقعد مكانها عشان نخفف عليها كنا بنجي من المدرسه عشان نساعدها وما كان عندنا بيت البيت القاعدين فيهو مديننا ليهو ناس من الحله القاعدين فيها غرفه واحده حقت طين فيها سريرين امي بترقدنا في سرير وابوي برقد في سرير وهي بتفرش في الارض مرات كنت بتاثر لي حال امي وببكي نوم م بنومو دا السبب البخليني اسمع كلام امي امي طيبه شديد وحنينه في نفس الوقت رغم البعملو ليها ابوي بس بتحترمو وبتعمل ليهو الف حساب وما عندها طلعات كتيره ولا عندها صاحبات الناس كلهم اصحابا بس نهاي م حصل شفنا امنا في بيت زول الناس مرات بجو يقعدو معاها يونسوها لغايه م تخلص حاجاتتا وتدخل والبقعد معاها تشبعو من حاجاتا العايزه تبيعن تقول لي الناس البدي من قليل الله بديهو كلمتها دي عمري ما انساها امي كانت مدرسه بالنسبه لينا انا كنت بحسب في الايام والشهور ومنتظره نفسي اكبر عشان اريحها نادر اخوي امي بتوديهو الدكتور يتعالج وكانت تعبانه معاهو شديد وطبعا ابوي نهاي ما شغال بيهو وكان بقول لي امي فكيهو الولد دا خليهو يطلع الشارع ويلف زيو وزي اي مجنون احتمال القا زول يرحمو امي بتقول ليهو بس ولدي م مجنون وان شاءالله ولدي ببقا كويس وبتعالج وابوي كان بيضربو بدون سبب لمن امي تحجزو منو وبتقول ليهو حرام عليك الولد م واعي وما فاهم ذنبو في رقبتك انا كنت بكره ابوي وامي حاسه بي بتقول لي لا ي بتي دا ابوكم مهما كان انا غلبني اغيرو انا شاحده الله تكبرو وتغيروهو انا غلبني ما حصل مرا علينا يوم من غير ما نبكي فيهو وابوي ولا شغال بينا
مرت الايام والشهور والسنين ونحنا بنكبر والهم ماشي يكبر معانا انا بقيت واعيه وكم مره خطبوني بس برفض ونهاي م عايزه زواج عايزه اكبر وانفع امي مره حسيت امي غريبه وما ياها قلت ليها يمه انتي مالك فيك شنو قالت لي ماف شي قلت ليها كيف ماف شي وانتي وشك مورم وعيونك مورمه وبطنك زايده ورجلينك مورمه يمه خلينا نمش الدكتور قالت لي لا لا ماف

 

 

حاجه ماتركزي معاي كل يوم كنت بعاين لي امي والعلامات دي ماشه في زياده يوم نص الليل كنا نايمين سمعت صوت امي بتوح صحيت مخلوعه قلت ليها امي مالك قالت لي صحي ابوك مشيت صحيت ابوي وبقا يسب لي ولي امي قام بي زهج وكواريك كالعاده قال ليها مالك والفاظو كانت زي الزفت امي قالت ليهو معليش بس امش لي حواء ناديها لي قال ليها انا نعسان اوعك تصحيني تاني قلت ليها يمه مالك قالت لي انا عايزه الد انا بقيت مخلوعه قلت ليها يمه انتي فشنو ونحنا في شنو ولاده شنو يمه قالت لي يا بت دا وقت محاضرات اجري الحقيني وكانت متألمه وكانت بتكورك وبتقول لي امشي نادي حواء فتحت الباب لقيت الدنيا ظلام وغلبني اخطي خطوتين وكنت سامعه اصوات غريبه لانو نحنا بيتنا قريب البحر قلبي يضرب جيت راجعه قلت ليها امي انا خايفه وهي تكورك وتقول لي ح اموت وانا ابكي مشيت لي ابوي وكان اشخر زي التور كانو ما سامع صوت امي قلت ليهو ابوي ارح معاي انا خايفه المكان مظلم وامي تعبانه دفرني بي كل قوتو قال لي ما تجي تصحيني تاني قومتا وقويت قلبي وامي بقت تكورك زياده غلبني افوت وغلبني اقعد موقف عمري م انساهو جريت جريء وبي سرعه وصلت بيت ناس حواء وهي راجلها صعب اي زول بجي لي مرتو بليل بشاكلو قال لي منو الفي الباب قلت ليهو انا نسيبه قال لي نسيبه شنو كمان قلت ليهو امي عايزه تلد قال لي امك تلد ولا تموت ما تصحونا بليل امك من الصباح مالا ما ولدت قلت ليهو كيف يعني تلد قبل مواعيد قال لي كمان فصيحه قلت ليهو عليك الله ي عمو نادي حواء امي ح تموت قال لي امشي ي بت شوفي شغلتك اوعك تاني تطقي الباب دا راجلها اكعب علي ابوي م عندو رحمه جريت لي امي ولقيتا خلاص عايزه تولد وبتقول لي نسيبه تعالي تعالي انا ح اموت ولاول مره في حياتي اشوف مره بتولد وراسي دايخ كاني سكرانه وغالبني البعملو وامي بتموت قدام عيني من الالم وحسيتا فعلا عايزه تموت ……يتبع

 

يُتبع ..

 

• لقراءة باقي فصول الرواية أضغط على (رواية رغبة في الإنتقام)