رواية بطلة الخديعة الفصل الثاني 2 بقلم يسرا

البارت الثاني

فكما تناولت طعام الغداء وحدها فالوحده ستظل رفيقتها على طاوله العشاء مما جعلها ترفض الفكره تماما وتتخلى عن وجبتها الساخنه التى اجتهدت فى تحضيرها دخلت لتنام
وانصرف الابناء الى غرفهم منهم من يتابع الشبكه العنكبوتيه باهتمام والاخر يتابع اخر مباريات الدورى
حاولت نهى النوم ولكنها لم تستطع تذكرت انا عليها غسل قمصان زوجها بالاضافه لبعض الملابس الاخرى اخرجت نهى القمصان المتسخه ولاحظت على الفور العطر الانثوى القوى الذى يفوح من احداها
استنشقته نهى باهتمام واستطاعت تحديد نوعه انه عطر فاخر من احد بيوت الازياء العالميه اهداه لها زوجها السنه الفائته بمناسبه عيد زواجهم
عقدت نهى حاجبيها وطردت الوساوس بعيدا وقالت بثقه.. مستحيل اللى بفكر فيه مستحيل رؤوف يخونى رؤوف فيه كل العبر الا الخيانه تلاقي الريحه منى ما انا ساعات بحط منه
هزت رأسها طارده وسواس الشيطان وانصرفت الى اعمالها المنزليه
دخلت غرفه ابنها.. احمد فيه عندك حاجه عايزه تتغسل
احمد.. ااه يا ماما افتحى الدولاب هتلاقيه
نهى.. ميت مره ااقولك تشيل الهدوم اللى مش نضيفه فى الباسكت انا بدخل الاوضه مش لسه هقعد ادور على الغسيل فى الدولاب وبعدين يا بنى ريحه الهدوم اللى مش نضيفه بتملى الدولاب
نظرت الى ابنها الذى يبدو فاقدا للسمع وهو يتابع احداث المباراه باهتمام ثم صرخ عاليا.. جوووون والنعمه جون ده حكم ابن لاذينه متحيز للاهلى
هزت نهى رأسها بأسى.. طول ما الزمالك والاهلى واكلين دماغك والله ما انت نافع ولا كأنى بادن فى مالطه
غادرت غرفته وتوجهت الى غرفه ابنتها.. مى فى غسيل عندك
مى.. انا حطيته فى الغساله يا ست لكل
نهى.. طيب يا حبيبتى مش عاوزه حاجه
رفعت مى اخيرا انظارها من على شاشه الحاسب.. لا يا جميل مانحرمش يارب
ابتسمت نهى وقالت.. ربنا يهديكو يخليكو ليا
انهت نهى اعمالها المنزليه ونظرت فى الساعه فوجدتها تجاوزت منتصف الليل حاولت الاتصال بزوجها مره اخرى فوجدت هاتفه مغلق عبست نهى ولم تدرى كيف التصرف فهى تشعر بالقلق على زوجها ولكنها
لاتريد البوح بما اعتمل داخل صدرها الى ابناءها كى لا تشعرهم بالقلق هم الاخرين
دخلت غرفه ابنها واوقظته من نومه.. احمد.. احمد
احمد.. ايوه يا ماما فيه ايه
نهى.. الساعه داخله على واحده الصبح وابوك لسه مارجعش
احمد.. عادى يعنى ياماما هو من امتى بابا بيرجع قبل 3 اليومين دول تلاقيه مع حد
نهى.. انا بتصل بيه على الموبايل لكن قافله
احمد.. يبقى معاه ناس مهمين ومش عايز ازعاج وبعدين هوه بابا عيل صغير
نهى.. يعنى ايه انت هتنام كده وابوك مش عارفين عنه حاجه لحد دلوقت ده نازل من الضهر
احمد.. يعنى يا ماما عايزانى اعمل ايه انزل انادى بابا تايه يا ولاد الحلال
نهى.. لاء اتصل باللى اسمه ايمن ده واسأله عن ابوك
احمد.. وماتتصليش ليه انتى بيه يا ماما
ردت نهى بعصبيه.. عايزنى اتصل براجل غريب فى الساعه دى يا خساره تربيتى فيك
احمد.. طيب طيب خلاص حقك عليا فين نمرته
نهى.. قوم يالا اتصل بيه هتلاقيها فى الاندكس فى اوضه المكتب
ذهب احمد بالفعل للاتصال بشريك والده
نهى.. هاه لقيت ايه
احمد.. مابيردش اتصلت 3 مرات ومابيردش ممكن اروح انام بقى
نظرت له نهى غاضبه.. اتفضل روح نام
مضت ساعتين ولم يعد رؤوف بعد نامت نهى وهى فى انتظاره على احد كراسى غرفه المكتب
عاد رؤوف فى تمام الرابعه فجرا واتجه الى غرفه النوم مباشره لم يجد زوجته فى السرير ولم يبالى غير ملابسه واخلد للنوم استيقظت نهى عند سماع آذان الفجر اتجهت للحمام كى تتضوء لاحظت وجود
زوجها فى السرير نائما لوت نهى شفتيها بامتعاض وهزت رأسها وذهبت لتملس على شعره حاولت ايقاظه برفق.. رؤوف رؤوف
رد رؤوف نصف نائما.. همممم عازه ايه
نهى.. انت كويس
رؤوف.. بتصحينى من النوم عشان تسألينى اذا كنت كويس سيبينى انام
نهى.. مش اتطمن عليك
رؤوف.. اه يا ستى انا زى الفل ممكن تسيبينى انام بقى
نهى.. مش هتصلى الفجر
رؤوف.. مش قادر تعبان وعاوز انام
تركته نهى واتجهت الى صلاتها دعت ربها ان يصلح حالها وحال اسرتها كثيرا نامت بعدها بعمق
الحلقة 2
فى اليوم التالى
استيقظت نهى فى التاسعه صباحا اغتسلت واتجهت الى المطبخ لتعد طعام الافطار
اخذت بعضا من الوقت وعادت الى غرفتها لتوقظ زوجها لتجده فى الحمام يغتسل اعدت له ملابسه
خرج رؤوف من الحمام ووجهه يعكس نشاطا وحيويه وهو يدندن بأحد الالحان الخفيفه
نظرت له نهى بحسد كيف له ان يفعل ذلك يخلد للنوم منذ خمس ساعات فقط ليستيقظ بكل تلك الهمه والنشاط وهى التى تشعر بالتعب دائما
نهى.. صباح الخير شكلك رايق وفايق
رؤوف.. صباح النور هو حرام ابقى رايق وفايق
نهى.. لا ابدا مش حرام ربنا يروقلك الحال على طول
ابتسم رؤوف ابتسامه جانبيه ونظر فى المرآه الى انعكاس صوره زوجته التى لازالت بملابس النوم الفضفاضه وشعرها المربوط بإحكام للخلف دائما
تنهد وهز رأسه وبدأ فى العنايه ببشرته الحليقه وسرح شعره باهتمام ولاحظ تمعن زوجته فيه
رؤوف.. مالك بتبوصيلى كد ليه
نهى.. ابدا بس اصلك اليومين دوول اخد بالك من روحك كده وعايق اووى خير فيه حاجه
رؤوف.. يا فتاح ياعليم على الصبح هوه حرام اخد بالى من روحى ومن مظهرى ولا دى فيها حاجه كمان
نهى.. لا ابدا بس مش عادتك يعنى
رؤوف.. كفايه علينا انتى هبقى انا وانتى كمان
نهى.. قصدك ايه
رؤوف.. بصراحه كده شكلك مش عاجبنى ايه الجلابيه اللى انتى لابساها دى ولا شعرك ماله عامل كده ماتفكى الحصار من عليه شويه
نهى.. شكلى مش عاجبك الله يسامحك انا مش هرد عليك عشان ماتقوليش بتخانق معاك على الصبح وبعدين انا لسه صاحيه لسه حتى ماغسلتش وشى يا دوب غسلت ايدى
رؤوف.. وايه اللى مخلاكيش تغسلى وشك
نهى.. قلت احضرلك فطارك ولبسك بس الحق عليا انا اللى غلطانه
ارتدى رؤوف ملابسه على عجاله وقال.. الحق عليا انا ياستى ولا يهمك حقك عليا انا اللى جبته لنفسى
خير تعمل شر تلقى
نهى.. شر انا شر يا رؤوف الله يسامحك
رؤوف.. اووه اووووه الله يسامحك الله يسامحك انا ماعرفش اتكلم معاكى كلمتين على بعض الا لما تدعى عليا
نهى.. ما انا لسه داعيالك من شويه
رؤوف.. طيب طيب
رش رؤوف عطره المفضل بوفره واستطرد.. انا نازل دلوقتى عندى مشاوير مهمه
نهى.. مش هتفطر !!!!!!!
رؤوف.. مش عاوز
حاولت نهى اكتساب بعض الوقت قبل ان يغادر فأطالت الجدال العقيم
نهى.. يعنى انا واقفه احضر فى الاكل ده كله على الفاضى
رؤوف.. وانا مقولتكيش تعملى حاجه ممكن انزل بقى ولا عاوزه حاجه منى
نهى.. طيب انا نازله النهارده
رؤوف.. رايحه فين
لم تشأ نهى ان تخبره ان تلاقت مع صديقتها سلوى بالامس واتفقت على لقاءها مجددا اليوم فهو كان يكره خروجها برفقه اصدقائها
نهى.. هنزل اشترى لبس
تهلل وجهه رؤوف.. طيب وماله معاكى فلوس
نهى.. ااه مايجيش من بعد خيرك
اخرج رؤوف من جيبه مبلغ نقدى واعطاه لزوجته.. طيب خدى دوول كمان يمكن تحتاجى حاجه تانيه
حاولت نهى الاعتراض.. يا رؤوف قولتلك
اسكتها رؤوف وقال.. نفسى مره اقولك على حاجه تعمليها منغير ماتقاوحينى
ثم امسك رأسها وقبل جبهتها وانصرف وترك زوجته تحملق فيه بتعجب حاولت تذكر اخر مره فعل زوجها ذلك ولم تستطع ولكنها رغم ذلك لم تشعر بالسعاده
بل شعرت بالنقص والأسى على نفسها
ما ان نزل زوجها حتى انطلقت نهى الى الحمام لتمتع نفسها بحمام دافىء طويل واعتنت ببشرتها وشعرها خرجت وتناولت فطورا خفيفا ثم اتجهت الى غرفه ابنها لتجده لازال نائما واوقظته بصعوبه
نهى.. احمد احمد قوم يا احمد انت ماعندش كليه النهارده
احمد.. لا يا ماما بقى سيبينى انام عندى سيكشن الساعه 3 لسه بدرى
نهى.. وانت هتفضل نايم ل 3
احمد.. طيب ااقوم اعمل ايه
نهى.. قوم افطر واتنشط كده وذاكرلك كلمتين ينفعوك قوم
احمد.. يا ماما بقى..
نهى.. يا ماما بقى.. كاك مو عارف لو طلعت بماده السنادى انت حر عيب عليك دى تانى سنه تعيدها
احمد.. طيب طيب ماتقلقيش انا مذاكر لحد اخر صفحه وقايم اهوه
نهى.. اما نشوف
توجهت نهى الى غرفه ابنتها لتجدها نائمه هى الاخرى اوقظتها برفق.. مى.. ميوي حبيبه ماما
مى.. ماما بليز سيبينى انام انا نايمه بعد الفجر
نهى.. سهرانه على النت طبعا ماشى براحتكم
خرجت نهى وكلها عزم على مغادره المنزل فى اقرب ساعه وغادرت بالفعل بعد ان تأنقت فهى ذاهبه للقاء صديقتها التى لم تلقاها من سنين
وقفت نهى تحت منزل صديقتها شاعره بخجل فقد وصلت مبكرا فآثرت الانصراف ولكنها توقفت لبرهه واتصلت بها على هاتفها النقال
نهى.. الو صباح الخير يا سلوى
سلوى.. صباح النور يا قمر هاه نزلتى من بيتك ولا لسه
ردت نهى بخجل.. اه نزلت وواقفه تحت بيتك
سلوى.. بجد طيب اطلعى اطلعى
صعدت نهى بالفعل وفتحت لها سلوى ورحبت بها ترحيبا عارما
سلوى.. البيت نور مش معقول مش مصدقه عنيا نهى عندى وف بيتى
نهى.. ازيك يا سلوى وحشتينى معلش نزلت مابصتش فى الساعه
سلوى.. وماله كده احسن دااحنا بقالنا سنين يانهى بس بذمتك يا نهى انتى قولتى لرؤوف انك جايالى
اطرقت نهى برأسها.. اصل احنا شبه اتخانقنا ومالحقتش اقوله قولتله انى خرجت اجيب لبس
سلوى.. احسن برضه انا عارفه رؤوف مش هيرتاح الا لما يمنعنا من بعض من جديد وانا ماصدقت انى قابلتك تانى
نهى.. انتى على طول نقرك من نقره
سلوى.. مش كفايه انه سيبك الجامعه بعد ما كان واعدك انك تكملى تعليمك بعد حوازكم
نهى.. ما انتى عارفه يا سلوى انى حملت فى احمد اول ما اتجوزت ووراها بسنه واحده مى كنت فين انا وفين الجامعه والمذاكره
سلوى.. ياله على العموم الكلام ده عدى ميعاده خلاص .المهم انتى عامله ايه معاه وليه بتتخانقوا على طول كده
نهى.. رؤوف ما عدتش زى زمان يا سلوى على طوول شغل شغل وسهر كل يوم بره البيت لحد الفجر
سلوى.. نعم سهر لحد الفجر ليه اوعى يا عبيطه تكون واحده لافه عليه وانتى نايمه فى العسل
نهى.. طيب بذمتك رؤوف بتاع الحاجات دى انتى عارفه انه طول عمره دوغرى وعمره ما كان بتاع ستات لاااااا انا من الناحيه دى متطمنه خالص
سلوى.. دوغرى ااه لكن ماتنسيش انه فى الاول والاخر راجل هتفضلى طيبه وعبيطه لحد امتى يانهى حرص ولا تخونش بلاش الثقه العاميه دى
نهى.. يعنى ان ماكنتش اثق بجوزى شريك عمرى كله دا انا عشت معاه اكتر ما عشت مع اهلى هثق بمين
سلوى.. يعنى هوه بيقعد لوش الفجر فين
نهى.. فين يعنى يا فى المكتب يا اما فى مقابله ولا اجتماع مع عملاء ما انتى عارفه الاجانب بينزلو مصر فسحه وشغل مع بعض وبيسهروا ولا بيهمهم
سلوى.. يا سلاام وهوه بقى اللى مفهمك كده لاء طبعا الاجانب احسن مننا احساسا بالوقت وقيمته ولا يمكن يضيعوه
المهم انتى مش كنتى قاليلاله انك نازله تجيبى لبس ايه رأيك ننزل سوا نعمل شوبنج انا كمان فى حاجات نقصانى عايزه اشتريها
نهى.. ياريت احسن انا زهقت من كتر القعده فى البيت نفسى اخرج واعوض اللى فاتنى
سلوى.. حد قالك تتجوزى وانتى بنت 19 ضيعتى احلى سنين عمرك فى الحواز والهم من بدرى بس ملحوقه طول ما انتى معايا ماتحمليش هم
نهى.. طيب وسميه
ما احنا هنروحلها بعد ما نخلص اصلها بتحضر عشان تسافر لجوزها اصلها بتنزل فى اجازه نص السنه وبترجع تانى على الكويت
جوزها اتجوز عليها الاستاذ وبيبدل بينها وبين ضرتها عشان قال ايه يبقى عادل مابينهم بس شكله مش مرتاح فى حوازته التانيه وهيطلقها
نهى.. ايه اتجوز عليها معقول بعد الحب ده كله
سلوى.. عشان كده بقولك حرص ولا تخونش
شعرت نهى بالقلق يتآكلها عبست قليلا وتذكرت العطر الانثوى القوى هزت رأسها كأنما تطرد ذاك الهاجس من تفكيرها
امضت نهى مايزيد عن الثلاث ساعات برفقه صديقتها تتبضع ملابس ومشتروات متنوعه ما بين ادوات للزينه ومكياج واكسسوارات
لم تشعر نهى فكأنما انتابتها حمى التسوق برفقه سلوى المسرفه هى الاخرى نظرت نهى الى الكم الهائل الذى تحمله من حقائب تحوى ما اشترته ولم تصدق عيناها
نهى.. يالا يا سلوى كفايه لحد كده احنا تقريبا اشترينا كل اللى فى المحلات
ردت سلوى بتصميم.. لللللللللللللللللل لسه
نهى.. لسه!!!!!!!!!!!!!!!لسه ايه حرام عليكى انا دراعى هيتخلع وصارفه فوق الالف جنيه لحد دلوقتى
ضحكت سلوى باستهتار.. وماله ان شالله 3 الاف ايه يعنى المهم اجيب اللى نفسى فيه
نهى.. طيب هنجيب ايه تانى شنط وجيبنا وكمان جزم ده غير اللبس والاكسسورى والمكياج والبرفانات ايه تانى
ردت سلوى بحزم.. اللانجيرى
اتسعت عينا نهى.. نعم !!!!!ثم نظرت الى سلوى بشك.. ولازمته ايه اللانجيري
سلوى.. مش ليا يا تحفه ياريته كان ليا ليكى انتى ياهانم
نهى.. لا ياستى اعفينى
نظرت لها سلوى غير مصدقه.. اعفيكى ده ايه ثم اكملت بلهجه آمره.. قدامى المحل اهوه ادخلى يالا
حاولت نهى الاعتراض.. بس..
ردت سلوى بنفاذ صبر.. مابسش يالا
امضت نهى بعضا من الوقت ترفض كل ماتعرضه عليها صديقتها من لانجيري فاضح
سلوى.. بقولك ايه انتى هتشترى ده يعنى هتشتريه مافيش كلام
نهى.. لاياسلوى اتكسف مش ممكن البسه ياشيخه ده يتلبس فيه ايه اصلا
سلوى.. ماهو ده حلاوته
احمر وجهه نهى.. لا ياسلوى بصى حلو الابيض ده
نظرت سلوى له بتقزز.. ده!!!!!لاء طبعا انا قولت ده يعنى ده وهتاخدى الاسود فى الاحمر بتاعه واو بجد هيبقى عليكى تحفه
نهى.. مقدرش ياسلوى البسه رؤوف يقول عليا ايه
سلوى.. اااااه اشد فى شعرى ياناس رؤوف يقول عليكى ايه قولى رؤوف هيتهبل عليكى ازاى وانتى بالاسود ده يابياضه
ابتسمت نهى رغما عنها.. ااه منك انتى طيب ده وبس وياعالم ان كنت هلبسه ولا لاء
سلوى.. هتلبسيه يعنى هتلبسيه تعالى بقى نجيبله بقيه الحاجات اللى تليق عليه
نهى.. حاجات حاجات ايه
سلوى.. هتشوفى دلوقتى
خرجت نهى بعد حوالى الساعه من المتجر حامله ما يقرب من 10 قطع متنوعه وهى تكاد لاتصدق انها اطاعت صديقتها واشترت تلك الملابس الفاضحه على حد قولها
سلوى.. يانهى فوكيها شويه
نهى.. ماهو انا فكيتها اهوه فيه اكتر من كده ربنا يستر رؤوف اصله مش بيحب كده
سلوى.. نعم مش بيحب كده انتى لبستى حاجه زى كده قبل كده وقالك لاء
نهى.. لاء بس هوه طول عمره يكلمنى عن الحشمه والوقار ده قالى كده بالحرف اول ماتجوزنا انسى اللى اتعلمتيه فى بيت اهلك من هنا ورايح تعملى اللى اقولك عليه
مراتى لازم تكون ست حشمه وحجبنى ولبسنى طويل ده كان عايزنى البس خمار كمان لولا ان بابا الله يرحمه وقفله وقاله انت اصلا مابتخرجهاش حتى الزياره لينا مرتين فى الشهر
سلوى.. ياه ماكونتش اعرف انه صعب كده مع انه شكله ماكنش مبين
نهى.. مش بقولك ده بس من كام سنه كده فكها شويه وبطل يسألنى عن كل حاجه واخيرا بقى يثق فيا ويسبنى انزل مع ولادى لوحدنا
سلوى.. ليه هوه كان عامل عليكى حظر تجول
نهى.. تقريبا ماكنش بيحبنى اخرج خالص ولا هوه كان بتاع خروج انا مش عارفه ايه اللى غيره كده كله من الزفت ايمن ده
سلوى.. وده مين ايمن ده
نهى.. شريكه ياستى طلعلى فى المقدر دخل شركه معاه من اربع سنين كده ومن ساعتها حاله بقى غير الحال بقى بنى ادم تانى ربنا يصلح حاله وحالنا
سلوى.. مش يمكن اتغير لاحسن ماهو برضه عدم الخروج والحبسه اللى انتى كنتى فيها دى ماكنتش حاجه حلوه برضه
نهى.. ااقله كنت حاسه ان ليا راجل وزوج متواجد معايا دايما كان يرجع يتغدى معانا ويقعد بتاع ساعتين تلاته وينزل من جديد وبكتيره على 9 ولا 10 لما كان يرجع
والاجازه كان بيقضيها معانا دلوقتى على طول مشغول ومش فاضى وبقيت بشحته تقريبا
سلوى.. ماحدش عارف الخير فين يانهى بس انتى برضه فتحى عنيكى
نهى.. تانى يا سلوى
سلوى.. تانى وتالت ده انا مدوباهم اتنين اسمعى كلامى ده صنف مايملاش عينه التراب وعينيهم زايغه
نهى.. رؤوف لاء استحاله
سلوى.. طيب وشريكه!!!!!
نهى.. زفت اهوه ده اى واحده مكتوب فى شهاده ميلادها بس انثى يعاكسها بالك انتى ده لو النمله معديه من قدامه ممكن يعاكسها
سلوى.. هههههههههههه لسه دمك زى العسل يانهى يالا ادينا وصلنا احنا نسيب الحاجات دى فى العربيه احسن انا هطلع واسبقك وانتى تحصلينى لما ارنلك تضربى جرس البيت اوك
نهى.. ماشى بس فهمينى هتعملى ايه
سلوى.. هاخد معايا العلبه الفاضيه دى وادهيلها هديه واخلي سميه تفتحها وطبعا هتتفاجىء انها فاضيه لما ارنلك تضربى الجرس وبكده تتفاجىء اكتر
نهى.. يابنت ال ايه هنروح فين احنا من افكارك الجهنميه دى
نفذت سلوى بالفعل خطتها وتفاجئت سميه بصديقتها الغائبه منذ فتره تزيد عن العشرون عاما واقفه هاهى على عتبه منزلها
سميه.. نهى !!!!!!!!!!مش معقول !!!!!!!!!!!وحشتينى اوووووووووووى اوى
احتضنت سميه صديقتها بشده ورحبت بها ترحيبا عارما.. مش معقول بجد انت ياسلوى بنت لاذينه ماجبتيش سيره انك قابلتيها
سلوى.. انا لسه شايفاها امبارح فى كارفور
سميه.. اخس عليكى وكلمتك امبارح وماتقوليش
نهى.. ادينى واقفه قدامك بشحمى ولحمى اهوه
سميه.. لحم ااه انما فين الشحم ده دا انتى ولا المنيكان ولا باين عليكى ياعينى عليا انا كل البت دى اما تشوفنى تقولى خسي خسي
سلوى.. ولسه بقولك خسى ولا عايزه ضرتك تاكل الجو
سميه.. لا ما انا ماقولتكيش كلمنى النهارده
سلوى.. عادل
سميه.. ااه خلاص اتفقوا على الطلاق وهترجع لطليقها
نهى.. معقول يعنى هيا كانت متجوزه واتطلقت وبعد ما اتجوزت جوزك نوت ترجع لطليقها طيب ماكان من الاول
سميه.. لا وانتى الصادقه هيا كانت متجوزه واتطلقت عشان تتجوز عادل
نهى.. نعم
سلوى.. الحكايه طويله تحبى احكيهالك انا سميه اصلها بتحب تخوض فى التفاصيل اووى
نهى.. ياساتر عليكى انتى غلسه ماتسيبيها تحكى بقالك يومين واكله ودنى بلاش اسمع صاحبتى
نهى.. احكى ياسميه انا سمعاكى
سلوى.. طيب ااقوم انا اعمل شاى لينا لان الظاهر ان سميه نسيت اصول الضيافه
سميه.. ياسلام عامله نفسك ضيفه ومكسوفه يعنى
غادرت سلوى باتجاه المطبخ الذى يحمل الطابع الغربى بامتياز حيث كان بامكان سلوى متابعتهم بسهوله والتعليق على احاديثهم بل ورؤيتهم
سميه.. ابدا ياستى طلعت حبه القديم كانو بيحبو بعض من وهما عيال كده وفضلو مع بعض لحد ثانوى
وبعدين انتى عارفه القصه اتفرقوا شويه يرجعو لبعض شويه يبعدو تانى لحاد ماهى اتجوزت وجابت ولدين وانا قابلته واتجوزنا وجبنا ولادنا
المهم القصه الاكثر شيوعا اليومين دوول رجعوا يتكلمو مع بعض على النت عن طريق الفيس بوك
الفتره دى انا كنت مشغوله بالاولاد وامتحانتهم والاستاذ عايش مغامراته مع حبه القديم
نهى.. ايو بس دى متجوزه .دى خيانه ازاى الاتنين يعملو كده
سميه.. هوا ما كنش شايفها خيانه كان شايفها صداقه ولما اكتشفت زعق فيا وقالى انه عمره مايكون بالاخلاق دى
وانها اتجوزت خلاص ومعاها ولاد واللى بينهم صداقه بريئه وانى انا اللى بشك فيه المهم اتخانقنا خناقه جامده
وغلطت غلطه عمرى ونزلت فى الاجازه لمصر رجعت بعدها للكويت وحسيته واحد تانى على طول سرحان على طوول مش معايا واكتشفت انه لسه بيكلمها
نهى.. وبعدين
سميه.. بعديها صارحنى انه هيتجوزها وانها اطلقت من جوزها وطلب منى ما اقفش فى طريق حبهم لانه ماصدق انه لاقاها بعد العمر ده كله وانه بيحبنى زى مابيحبها
نهى.. ياخبر يا سميه وانتى عملتى ايه
سميه.. اعمل ايه يعنى انهرت طبعا واترجيته كتير مايضيعش اللى بينا وماتتخيليش انا نزلت من نظره اد ايه
قاطعتهم سلوى.. كنت غبيه
سميه.. معاكى حق يا سلوى بس الواحد اتعلم متأخر
نهى.. ليه الواحده المفروض تعمل المستحيل عشان تحافظ على بيتها
ردت سلوى وسميه فى وقت واحدغلط !!!!!!!!
سميه.. اكبر غلط كمان يانهى وصدقينى عن تجربه
سلوى.. الراجل لما بيحس ان الست اللى معاه دي تحت امره وضمنها خلااص بيروح يدور على غيرها
لكن لو كانت سميه بينتله انها بايعاه وهتاخد عيالها وتسيبه ساعتها هيفكر الف مره قبل مايخرب بيته
سميه.. مش كلهم على فكره
سلوى.. فعلا مش كلهم بس الصنف اللى زى جوزك اللى بيحب ولاده اوووى ده وبيخاف على بيته ده اللى ينفع معاه خاصه انك ماكونتيش مقصره معاه
نهى.. لاا وافرضى ياسلوى كان ركب دماغه وطلقها تبقى كسبت ايه انا مش مع ان الواحده تتطلق وتهد بيتها عشان كرامتها
سلوى.. وهيا بعد الكرامه فيه ايه تانى ان ماكونتيش تعيشى مع واحد بيحترمك ويقدرك لازمتها ايه العيشه
نهى.. طيب والولاد اللى بينهم
سلوى.. هيفضلو بينهم برضه ولا يعيشوا مع امهم وهيا مكسوره ومهضوم حقها انتى مثلا يانهى وبقول مثلا لو لاقدر الله رؤوف عملها وولادك عرفو

لقراءة باقي فصول الرواية أضغط على (رواية بطلة الخديعة)

____

لو عاوز تقرأ الفصول الجديدة من الرواية دي بشكل حصري قبل صدورها

أنضم لقناتنا على تليجرام (من هنا)

البارت الثاني

اترك تعليقاً إلغاء الرد