رواية في اللوكاندة الفصل الرابع 4 بقلم مريم سمير

° مريم ، احمد فين مبيردش عليا ؟
_ اهدي اهدي طيب ،في أي حصل اي؟
° فوني طلع متراقب وعرفوا أنه قاعد في لوكاندتك
_ ايييي؟؟؟؟؟
قفلت الفون _ عبدالله أنا لازم أمشي حالا
= في أي حصل اي؟
_ هبقي احكيلك بعدين ، ممكن توصلني ب عربيتك بسرعة؟
طلعنا من المطعم وركبنا العربية ووصلت قدام اللوكاندة
_ متشكرة اوي ، امشي انت وهبقي اكلمك
= متأكدة إن كل حاجة كويسة ؟
_ متخافش ، كل حاجة تمام
نزلت من العربية وطلعت بسرعة الأوضه بتاعته ، خبطت ف فتحلي ، زقيته ودخلت
= أي دا في اي؟
_ انت لازم تمشي دلوقتي ، الناس الي بيدوروا عليك عرفوا طريقك كانوا مراقبين فون ليلي
= والمفروض اعمل اي ؟
_ لازم تمشي وتروح أي مكان بعيد عن هنا
= هو انا هفضل طول عمري هربان من حاجة معملتهاش؟
_ أحمد مش وقته ، عشان خاطري تعالي معايا
= أنا مش عاوز اهرب تاني يمريم ، مش عاوز
_ انت كده هتموت! ، عشان خاطري يا احمد اسمع كلامي
طلعت من الأوضة بصيت علي الطرقة ، خرجنا احنا الاتنين ودخلت تاني ندهت علي ملك تخلي بالها من اللوكاندة لحد ما ارجع
_ ممكن تيجي عندنا البيت ؟
= مستحيل ، لو عرفوا مكاني هناك وأذوكم ساعتها مش هعرف اسامح نفسي ابدا
_ طب ممكن نحجز اوضه في أي فندق بعيد ، أنا هروح اجيب عربيتي ونمشي بسرعة
كنت جاية امشي ف وقف قدامي = مريم اهدي ، خدي نفسك بالراحة و..
_ دا وقته؟؟
= هتجيلك الأزمة تاني ، اسمعي الكلام
بدأت اخد نفسى كويس ، روحت جبت العربية بتاعتي وركب ، فجأة طلع علينا في الطريق عربيتين ، حاولت اتفاداهم بس كانوا محاوطيني ، وقفت سواقة وانا بصوتت
_ أنتوا مين وعاوزين أي!!!
طلع اربع رجالة من العربيات وجم وقفوا قدام عربيتي ، واحد جه وفتح باب العربية وسحب احمد من جمبي ، نزلت من العربية بسرعة
° والله ووقعت يا ابن عاصم ، اخيرا الحساب جه
_ سبوه ، سبوه بالله عليكم متأذهوش هو ملوش ذنب في أي حاجة
= مريم امشي حالا
_ لاء ، مش هسيبهم يعملوا فيك حاجة ، طب بصوا ممكن ندفع أي تعويض مادي تقولوه
° اسمعي كلامه وامشي احسنلك
بدأت اصوتت جه واحد كتفني وحط أيده علي بوقي ، احمد ضرب الي كان ماسكه ورجع ضرب الي كان مكتفني = محدش يحط أيده عليها
الاتنين التانيين مسكوه وبدأوا يضربوه ، كنت بعيط مش عارفة اعمل حاجة
_ كفاية ، حد يلحقنا ، حد يلحقناااا
واحد فيهم طلع مسدس ، اتخشبت مكاني ، عيني وسعت مش عارفة اعمل اي ، اتحركت نحيته وانا بمسك أيده لكن زقني ووقعت ، رصاصة اتضربت علي احمد ! صويتي زاد وانا حاسه إن قلبي بيتخلع من مكاني ، سمعت سرينة البوليس جاية نحيتنا ، العساكر بدأوا يقبضوا علي الأربعة الي كانوا واقفين ، جريت علي احمد
_ أحمد ؟ احمد انت سامعني
=..
_ أحمد اوعي تغمض عينك ، أنا معاك ، انت هتبقي كويس
= يمكن دا الي المفروض يحصل
_ لاء يا احمد ، مش هتسيبني أنا مصدقت انك رجعتلي
= مريم أنا بحبك ، كان نفسي كل حاجة تمشي زي ما كنت عاوز
_ كل حاجة هتبقي تمام ، بس انت خليك معايا
غمض عنيه _ احمد؟ احمد لاء مش هتموت ، احمد رد عليا
الاسعاف جت وخدوه ، فضلت قاعدة مكاني في الشارع حتي بعد ما كله مشي ، رجلي مكنتش شيلاني ، ظهر ضل راجل ورايا ف بصيت ب خوف
° أنا عبدالله متخافيش
_ عبدالله! انت الي..
° مكنتش مشيت لما قولتلي امشي ، لما لقيتهم ماسكينه اتصلت ب البوليس بسرعة
عياطي زاد _ اتضرب عليه نار
° أنا عارف المستشفى الي نقلوه عليها ، هاخدك نطمن عليه
قومت ومشيت روحنا عند عربيته ، ركبنا ووصلنا علي المستشفى ، جريت علي الاستقبال وانا بقول اسمه
‘ هو للأسف في العمليات دلوقتي
كنت هقع ف عبدالله سندني ، خدني قعدني علي كرسي في الاستراحة ، مينفعش يحصله حاجة! مينفعش يبعد عني تاني ، كنت بكدب علي نفسي لما قولت اني هعرف أنساه ، عمري ما حبيت حد غيره ، لي كل دا لازم يحصل؟ لي دايما بخسر اهم ناس في حياتي؟ ، أنا عارفة يارب انك عادل وأنه اختبار ، اصعب اختبار ممكن اتحط فيه ، يارب رجعهولي!
كنت عاوزة اقوله إني أنا كمان بحبه ، اني كنت بشوفه كل يوم في الصورة بتاعتنا ، إنها مكنتش مشاعر مراهقة ، اني حتي لما كبرت قلبي اختاره ، اني معرفتش اكرهه ولو دقيقه واحدة ، إن معاملتي معاه كانت دافعة من الأحداث الي حصلت والحاجات الي مكنش لا أنا ولا هو لينا ذنب فيها .
الدكتور خرج ومعاه خرج احمد علي ترولي ، بصيتله ورجعت بصيت للدكتور _ هو كويس يا دكتور مش كده؟
‘ للاسف ال ٢٤ ساعة الجاليين مستوي خطورتهم عالي ، لو عدوا يبقي معاهم عدي مرحلة الخطر ، الرصاصة عدت من جمب قلبه والدم الي فقده مكنش قليل ، ال ٢٤ ساعة الجايين هنشوف هيحصل فيهم مضاعفات لا قدر الله ولا لاء ، ادعوله
رجعت قعدت مكاني ، عبدالله جه قعد جمبي
= هيبقي كويس متقلقيش
_..
= أنا عارف انه سؤال سخيف دلوقتي ، بس هو علاقته بيكي اي؟
_ صديق العيلة من زمان ، اتربيت أنا وهو سوا
= طب اهدي وإن شاء الله ال٢٤ ساعة يعدوا ميحصلش فيهم حاجة
_ أنا مش عارفة اقولك أي ، لولا ربنا ثم انت مكنش البوليس جه ولا كنا لحقناه
= الحمد لله
فونه رن ف رد ورجع بصلي _ شوف شغلك يعبدالله
= أنا آسف والله بس دي صفقة مهمة اوي ممكن تغير حاجات كتير في كاريري
_ وأنا مقدرة دا ، كفاية الي عملته ، روح كمل شغلك
= طب انتي مش هتروحي؟
_ هقعد شويه وهمشي
= طب خلي بالك من نفسك ، هتابع معاكي علي الفون
مشي ف قومت من مكاني روحت اوضه احمد ، كنت بصاله من ورا الازاز وهو محطوط علي الأجهزة وعلي الأكسجين ، دخلت بالراحة الاوضه وقعدت في كرسي قدامه ، مسكت أيده
_ انت هتقوم صح ؟ مش هينفع والله ما هينفع ، كفاية بابا يا احمد ، اوعي تسيبني أنا مستنياك ، كل حاجة هترجع زي الأول ، أنا اسفة علي اي حاجة عملتها ، لما تفوق ممكن تتخانق فيا وتلومني علي كل حاجة ، انت وعدتني من واحنا صغيرين انك عمرك ما هتسيبني ، بعدنا عن بعض مرة بس دا كان غصب عننا ، ودلوقتي! اوعي تبعد عني تاني
كنت بعيط لما صوت عياطي زاد طلعت من شنطتي البخاخة وخدتها ، فضلت قاعدة وانا عيني عليه وعلي الأجهزة ، خايفة حاجة فيهم تضرب صوت! ، نمت علي الكرسي من غير ما احس ، صحيت علي صوت أيده بتتحرك فوق أيدي
_ أحمد ؟؟؟؟ احمد انت كويس مش كده؟
هو راسه ف ضغطت علي أيده وانا بضحك والدموع مالية عيني _ انت رجعتلي!
الدكتور دخل وبصله ‘ الحمد لله ، دا احنا بقينا عال
_ بجد يدكتور ، يعني معتش فيه خطر ؟
‘ لاء الحمد لله ، بس لازم يقعد معانا هنا شويه عشان نتابع حالته
_ الحمد لله يارب ، الحمد لله
الدكتور خرج والممرضه تابعت حالته وخلصت وخرجت ، رجع بصلي ف ابتسمت ف رفع حاجبه وهو بيبص علي أيده ف سحبت ايدي بسرعة ورجعت ضهري ل ورا
_ احممم ، تشرب ميا؟
ضحك = هو لازم اخد رصاصة عشان يبان عليكي ؟
_ يبان عليا اي!!
= يعني مش عارفة ؟
_ مترهقش نفسك بالكلام ، أنا هروح اجيب أكل واطمن ماما عشان قاعدة علي أعصابها من اول ما قولتلها
= هتيجي تاني؟
_ اكيد هاجي تاني ، ارتاح انت اهم حاجة
= مريم ، شكراً
_ أنا مبسوطة اوي انك فوقت
ضحك = بجد؟ ، يعني كده مش باين أي حاجة ؟
_ يوه!!
طلعت من الأوضة وانا حاسة إن الأرض مش سيعاني ، اول مرة اكون مبسوطة كده ، الحمد لله يارب! مكنتش قادرة اتخيل حياتي من غيره ، أي دا؟؟ ، عبدالله!! مينفعش !!!!
روحت لماما طمنتها وعملت أكل وقولتلها تروح هي الزيارة ، كنت عارفة أنه مستنيني ، عارفة أنه هيسأل عليا ، عارفة أنه هيحس إن فيه حاجة غلط ، بس مينفعش حاجة تحصل!
روحت علي اللوكاندة ف معرفتش اركز خالص في الشغل ، كنت عاوزة افصل ب حاجة! ، عبدالله رن عليا
_ أيوة يا عبدالله ، عامل اي؟
= الحمد لله ، المهم انتي؟ وأحمد عامل أي دلوقتي ؟
_ الحمد لله فاق
= طب الحمد لله ، تحبي ناكل سوا؟ أنا بريك دلوقتي
_ طيب ، هفوت عليك انا مليش نفس للشغل أصلا
ركبت عربيتي وسوقت روحت الشغل ، خبطت علي المكتب ف لقيت عنده سلمي
_ اهلا اهلا ، ازيك عاملة اي ؟
° الحمد لله ، انتي عاملة اي ؟
_ كويسه الحمد لله
° طب اسيبكم هروح اكمل شغلي
_ علي فكرة حركة الديت كانت حلوة اوي ، بس مكملتش عشان أنا بومة
ضحكت ° متعوضه إن شاء الله في مرات تانية ، هو عبدالله مبيعرفش يتكلم اوي ولا يعبر ف حبيت اساعده
= انتي علي طول بتساعديني يسلمي
كانوا باصين لبعض ف حطيت ايدي علي خدي
_ احممم ، شجرة واتنين لمون ؟ أنا بقول امشي أنا ؟
° ها؟ ، مبسوطة اني شوفتك ، بعد اذنكم
مشيت ف رجعت بصيت ل عبدالله
_ أي يا عم روميو !
= لاء مفيش حاجة
_ متأكد؟ طيب مش انت عندك بريك ؟ ، تعالي ننزل الكافيتريا نتكلم فيها شويه
نزلنا وقعدنا وطلبنا قهوة ، كان شكله متوتر مش عارف يتكلم _ سلمي
إلتفت = ها ؟ فين؟
ضحكت _ يعني مش عاوز تقولي حاجة خالص؟؟؟
رجع بصلي = لاء مفيش حاجة
_ انت يبني مفيش احساس ؟؟
= أنا مش عارف مالي
_ طب بص هسهلهالك ، أنا الي هسأل وانت هتجاوب
= عاوزة تسألي عن اي ؟
_ عبدالله انت بتحبني؟
=..
_ بقولك أي رد عليا زي ما بكلمك ، وقول الي انت عاوزه أنا مش هزعل نهائي
= مريم انتي مينفعش متتحبيش
_ أنا بسألك انت بتحبني؟
=..
_ تاني؟ ، طيب بلاش السؤال دا ، بتكون عاوز تشوفني ؟
= اكيد ، احنا جيران من زمان و..
_ بس مش شرط عشان تكون عاوز تشوفني يبقي عشان احنا جيران!! بص يا عبدالله ، انت راجل كويس اوي ومفيش بنت متتمناش راجل زيك ، بس انت حاطط الشغل قدام عنيك دايما ، النجاح شئ كويس جدا بس حاولت متموتش قلبك معاه ، يعني مثلا مفيش بنت بتكون عاوز تشوفها كل يوم ؟ بتتبسط لما تكلمها؟
=..
_ البريك هيخلص انجز حالك
= مش هتزعلي من كلامي ؟ انا بعرف اتكلم معاكي واخد راحتي في الكلام زي ما اتعودتنا من وقت ما سكنت جمبك
_ اوعدك اني هتفهم أي حاجة هتقولها ، بس انت انطق
= بصي هي سلمي..
غمزت _ مالها سلمي؟
=..
_ بهزر يعم والله بهزر ، كمل
= سلمي بحب اشوفها كل يوم ، وبحب الوقت الي بتقضيه معايا ، وبكون عاوز اشتغل معاها واتلكك عشان ادربها ، ومبحبش حد في المكتب يكلمها بحس ساعتها اني هتخلي عن احترامي وأقوم اكسر دماغه عادي
_ بجد؟؟
= اه والله ، هي الوحيدة الي حسستني اني كويس واني حتي لو متغيرتش ف دا عادي ، هي فهماني وبتحاول تخليني دايما احس اني مرتاح ، مع اني اول ما اشوفها بحس اني مرتاح
_ مش مصدقة بجد اني بسمع الكلام دا منك انت!! ، دي غيرتك خالص ، بنت اللعيبة
= يعني انتي متضايقتيش؟
_ لاء ابدا ، عبدالله احنا جوازنا كان هيبقي روتيني ، والجواز لازم يبقي فيه حب عشان نقدر نكمل ، نقدر نسامح بعض علي غلطاتنا وتقصيرنا ، مكنش ينفع نسوق العقل في الموضوع دا بالذات ، قولنا هنجرب بس احنا الاتنين عارفين أنه مكنش هينفع ، سلمي الوحيدة الي خليتك تحس المشاعر الي بتتكلم عنها دي ، أنا معرفتش اعمل كده ومكنتش هعرف حتي لو حاولت ، عشان الحب بيحصل مرة واحدة مينفعش نخطط عشان يحصل!!
سلمي جت تاخد قهوة من الكافيتريا
_ سلمي ، تعالي اقعدي معانا
° ثواني هحاسب بس
رجعت بصيتله _ بقولك أي ، قولها
= اقولها اي؟
_ أصوت ألم عليك الناس ؟ قولها الي انت حاسه
= طب وانتي ؟
قلعت الدبلة وحطيتها قدامه _ ها مرضي؟
= اقسم بالله؟ مش زعلانة بجد؟
_ لاء والله ، انت هتبقي اخ كويس جدا ، بس انت انطق
جت وقعدت قدامه ، فضل يبصلها ف بصتلي
_ احممم ، ها؟ يمسهل الحال يارب
= اممم ، سلمي كنت عاوز اقولك حاجة
° بخصوص الشغل؟
= لاء ، بخصوص حاجة تانية
° حاجة اي؟
= هو.. هو يعني ، البليزر الي لبساه حلو اوي مفصلاه فين؟
° اي؟
_ اييييي!! ، قلبي ، هتجلط
° هو في أي يمريم؟
_ أنا وحماقي فركشنا
° اي؟
_ قصدي أنا وعبدالله فركشنا
° بتتكلمي بجد؟؟
_ هو مش المفروض تكوني مضايقة ؟
° ها؟ ، لي بجد ؟ زعلت جدا !!!
ضحكت _ يشيخة ؟ ، طب ها يعبدالله ، يمسهل الحال يارب
= سلمي أنا.. ، عاوزك معايا علي طول و..
_ هو معلش بيسكت عشان بيشحن ، يمسهل الحال يارب
= وبحبك
° ها؟
_ يا ابن اللعيبة ، لاء وقايلها ب احساس
رجعت بصتلي ° هو انتي مش زعلانة؟
_ بقولك اخويا ، عشرة عمري ، ردي عليه
= ممكن تتجوزيني ؟
_ والله واد متربي ، دا بستأذنك
كانت مبسوطة ، كانت بتعيط من الفرحة ! ، كانوا حلوين ولايقين علي بعض اوي ، تقريبا عبدالله معاها عرف أنه عنده قلب! ، وعرف إن فيه حاجة احلي من الشغل .
_ اول معازيم الخطوبة أنا ، حددوها بسرعة
حضنتني ° شكرا ، شكراً اويييي
_ احنا بقينا صحاب ، ربنا يتمملكم علي خير
مشيت وروحت علي المستشفى ، فتحت الباب لقيت ماما عنده ° كويس انك جيتي ، أنا عاوزة اروح مشوار حالا ، هاجي تاني
_ ماشي يحبيبتي ، خلي بالك من نفسك
ماما مشيت وهو دور وشه عني _احممم ، انت زعلان اني مجتش؟
= وانا ازعل لي؟ انتي حرة
_ ماشي ، كلت؟
= يعني احب تخليكي في حالك
ضحكت _ يعني أمشي ؟
بصلي = انتي عاوزة تمشي؟
_ لاء ، عاوزة أفضل جمبك علي طول
= نعم؟؟ بس..
بص علي ايدي ورجع بصلي = هي الدبلة..
_ أنا وعبدالله سيبنا بعض
= بجد؟؟ احلفي ؟
_ كنت من شويه مش طايقني يعني
= بتكلم بجد دلوقتي ، يعني انتي مش مخطوبة دلوقتي ؟
_ لاء
= طيب سيبتوا بعض لي؟
_ احنا الاتنين مش متفقين مع بعض ، هو بيحب واحدة تانية وانا بحب واحد تاني
= نعم يختي ؟ هو لسه فيه واحد تاني ؟
حطيت ايدي علي وشي _ انت واخد الذكاء كله لوحدك؟
= هو مين الي بتحبيه؟
_..
= مريم ؟ ، بتحبي مين ؟
_ بحبك انت
= والله ؟ ، بتحبيني أنا ؟؟
_ بالراحة الحركة دي غلط انت لسه تعبان
= مش مهم ، المهم انك بتحبيني انا؟؟
_ أيوة
= هو يعني لازم اخد رصاصة عشان تنطقي؟
ضحكت وبصيتله ، مسك أيدي
= وأنا عمري ما حبيت ست غيرك
ماما دخلت ° احمد؟؟؟ مريم ؟؟؟؟
سحب أيده = دي قلة ادب ، أي دا ازاي دا يحصل!!
كنت كاتمة ضحكتي من ريأكشناته ، ماما دخلت وقعدت قدامنا ° انتي سيبتي عبدالله ؟
_ يعني اه
° اصل مامته كلمتني وفهمتني وعزمتني علي الخطوبة
_ أيوة ربنا يسعده يارب ، يستاهل كل خير
أحمد زغرلي = بتقولي حاجة ؟؟
_ ملناش دعوة يماما ، احنا مالنا ؟
° بس يا متسابة
_ أي دا في أي!
= متخافيش يذوبة هتجوزها أنا
° بس يا متصاب
= هو فيه اي والله؟ هي امك جاية تذلنا وتمشي؟
° مش انت يالا بتقولي اني طول اني امك؟
= اكيد طبعا
° يبقي مريم اختك
= ولا اعرفك ، مليش امهات أنا
ضحكت ° لما تبقي كويس نبقي نداري عليكم بقي وخلاص
أحمد بقي كويس ، ومعاه رجعت حياتي كويسة تاني ، اتحكم علي الي عملوا كد بالسجن ، معتش فيه خوف ، معتش فيه طار ، ومعتش فيه بُعد ، رجعت لأول حب في حياتي والوحيد ، رجع بقي ليا عيلة تاني ، محستش ل ثانية اني وحيدة وهو موجود ، احمد كان دايما محسسني اني بنت جميلة ولذيذة ورقيقة ، اني استاهل الدنيا ويمكن قليلة كمان عشاني ، انه من غيري حياته ملهاش اي لازمة ، كنت دايما محتاجة احس كل حاجة هو حسسهالي .
المرادي نازلة ديت مع الراجل الي بحبه ، كنت لابسه فستان اسود ، الإضاءة هادية زي الميكب الي حطاه ، بوكيه ورد يجنن قدامي ، كان ديت مثالي ، مع أوسم راجل بالنسبالي . طلبنا العشا وكلنا = غمضي عنيكي
_ محاوة اغتيال؟؟؟
= غمضي بدل ما اقوملك
ضحكت وغمضت ، فتحت لقيت قدامي شيك
_ أي دا يا احمد ؟
= دا حقك ، الفلوس دي بتاعتك ، حطيها ب اسمك انتي وماما في البنك
_ بس أنا مكنتش عاوزة كل دا
= طب ندخل في المهم ، تتجوزيني؟؟
_ ها؟؟ ، طب سيبني فترة افكر
= والله ؟ بعد كل دا؟ تفكري في اي؟ ، بقولك في الراحة والجاية مامتك بتقولي قولوا للي ماسك الايدين يخاف
ضحكت _ أنا موافقة
= أخيراً يشيخة ، هو كان لازم يعني اخد رصاصة عشان تنطقي؟
° أحمد أنا بتسبل ل بنتي!!
= ماما ؟؟ انتي اي جابك ؟ قصدي أي جاب حضرتك هنا؟
° بنتي عزماني
رجع بصلي ف بصيت في السقف _ المهندس الي عامل المطعم دا عبقري
° والله!
_ احممم ، نسيت اقولك إن عبدالله وسلمي جايين بردو
= هو انا نازل ديت سبيل؟ ما تخرجي تجبيلنا ناس من الشارع تقعد معانا!
عبدالله وسلمي جم ، بقوا صحابنا أنا وأحمد جدا ، حلفت عليهم ينزلوا الديت معايا والله لا ينزلوا الديت معايا
طلبنا كلنا عصير ، كانت بضحك علي نظرات احمد الي كانت محكومة بسبب ماما الي قاعدة
° تحب اقوم يا احمد؟
= لاء يماما دا انتي منورة
° أنا محتاجة انام ، خلي بالك من مريم متتأخروش
= بس كده دا احنا عنينا
ماما قامت ف بصيتله ، رجع بص ل عبدالله
= انت يعم المسبلاتي
° حبيبي يا احمد أي الدنيا؟
= انت الي أي الدنيا ؟ دا انا مكنتش بتنطق يعني
° معلش معايا واحدة تنطق الحجر والله
= كلك نظر يحبيب أخوك ، عاوزين نقول كلمتين أحلل بيهم الفلوس الي اتدفعت دي
° اه عاوزنا نقعد في طربيزة تانية؟ دا ياريت دا انت كده بتخدمني
= تربيتي يعبدالله والله ، ربنا معاك يحبيب قلبي
خد سلمي وقام وانا لسه فاتحة بوقي
_ انت عملت فيه اي!! ، أنا غلطانة اني خليتكم صحاب أو اني قعدته معاك بجد
= بكرة يشكرني ، دا انا بديله حصص دا
ضحكت _ كنا بنقول اي؟
= كنا بنقول اني بحبك و..
عبدالله جه ° يسطا انت قولتلي امبارح اقولها كلام كده ، معتش فاكره دلوقتي ف قوله تاني
= يعني اقوم ارقع بالصوت يجدعان!!!
تمت