رواية 120 كيلو الفصل الرابع 4 بقلم جمانة السعيدي

رواية 120 كيلو الفصل الرابع 4 بقلم جمانة السعيدي

 

البارت الرابع

 

رهف…هلكد ما اشوف البنات تقلد عليه بلمدرسه وما خذتني محتوى ضحك وتحشيش
واستهزاء كرهت نفسي كرهت الناس
اني ماعندي اي متعه بهاي الدنيا غير الاكل
اشرد من الناس ومن ضغوطات الحياة بلاكل
ماعندي احد يسمعني ويخفف عني
اشرد للأكل صحي مو صحي المهم اني ما استمتع بس من اكل
حتى المدرسات يضحكن عليه
لان اني مستواي الدراسي ضعيف
يحجن عليه وعلى وزني
دائما المدرسات ماعدهم غير اهتمي بدراستي بكد ما تهتمين بلاكل
اعرف اني وزني زايد واعرف صرت سمينه وهذا الشي مو حلو ولا صحي
بس ولله كوه جارعه الايام
اني بيت خالتي احس نفسي وحيده
احسهم كوه متحمليني
وين اروح شسوي بنفسي عاد افرغ ضوجتي بلاكل
كرهت الطلعه من البيت
مااطلع الاي مكان من المدرسه للبيت ومن البيت للمدرسه
امشي بصف الحايط
حتى صديقات ماعندي
بلبيت كل وقتي تنظيف وطبخ وشغل ما ينتهي

اني عايشه وبس ماعندي اي هدف بلحياة
عايشه علمود شنو مااعرف شنو نهاية هذا السمن مااعرف

دخلت سادس ادبي ومن اول فصل راسبه بكل المواد
وبنص السنه طلعت ناجحه بمادتين والباقي راسبه بيهن
جمانه السعيدي
مادخلت بكالوريا
والشماته مااحجيلكم خالتي وشكران
الشماته وصلت بيهن يضحكن عليه كل الوقت
حتى عمي هم اتشمتن بي لان هو الوحيد الي يدافع عني
من يطلع عمي لمن يرجع هنا يضحكن عليه

عمي من سمع اني رسبت كعد يهون عليه ويكول ميخالف
السنه الجايه تعوضين

رهف…كلش ضجت احس نفسي فاشله بكلشي

خالتي….لو تقرا بكد ما تاكل جان على الاقل دخلت بكلوريا
شكران….يمه ولله ميزانية البيت خربت بسببها
الاكل الي تاكله يكفينا شهر

خالتي…خايفه من كد السمن بعد ماتكدر تطلع من الباب
شلون نفلش الحايط

شكران….اني اكول خليها تصوم بلكت تفش شويه
خالتي…يااا اصوم يمعوده هاي هايشه لافهم ولا علم
طايحه على الاكل عبالك راح يخلص

البشر ياكل حتى يعيش وهاي مثل الحيوانات عايشه حتى تاكل
رهف……من كد ما سمعت منهن كلام مزعج انقهرت
كمت ابجي
اني ليش مارحت وياا اهلي بذاك اليوم الاسود
ليش بقيت
جان ميته هسه ومرتاحه
بسبب القهر والبجي تهيج عندي القالون
كمت مااتنفس
بس وصل عمي طلعت علي كتله الحكلي
الحكلي كلبي يوجعني ومااكدر اتنفس

عمي…ليش احد ضوجج احد حجا عليج
رهف…بعد مااكدر فدوه راح اموت

اخذني عمي وطلع خطيه حتى لانزع ملابسه ولا اكل
كبل للمستشفى
اريد احجي ويا الدكتور مااكدر احس كلبي انقبض
والنفس ضاع عليه

عمي شرح حالتي للدكتور
بعد الفحص الدكتور اكد هذا قالون عصبي
اجت الممرضه خلت ابره بلمغدي خلتلي كانونه

نص ساعه واني حالتي حاله بعد ماخلص المغذي يله استقرت حالتي شويه

اجرنا تكسي ورجعنا للبيت
عمي…انتي احد غثج احد سمعج حجي
رهف…لا يمكن من الاكل صرت احسن لاتخاف عليه

مااكدر اكول اي شي لان راح يسودن عيشتي اكثر ما هي سوده
عمي…اذا احد من البيت سمعج حجي كولي لا تخافين اطردهم كلهم واخليج بس انتي بلبيت
انعل والديهم اذا قربو عليج

رهف…الله يحفظك اليه

رهف…… يحجن عليه ثنيبنهن مع ان شكران هاي السنه الثانيه تعيد السادس
بس محد يقرب عليه لان خالتي تكلب الدنيا اذا واحد مر بيها

السنه شكران دخلت بكلوريا
شهر بلبيت تقرا واني صرت خدامه عدها
خالتي كلمه والثانيه وكالت خلوها تقرا عدها امتحانات

انضف غرفتها واغسل ملابسها واغير جرجف الحربايه
وهي تقرا تصيح وينج الهايشه تعاي اريد جاي

حتى ولد خالتي هم يصيحون عليه الهايشه
بس ذوله اهون على الاقل طول النهار برا البيت
بس مثل شكران ماكووو
جمانه السعيدي
امتحنت شكران وخالتي مخبوصه بيها عبالك راح تصير رئيس وزراء
جان اتأجل درسين وطلعت إكمال بدرسين

عادي ولا جنها مكمله وخالتي شكد مهتمه بيها

خالتي…لا اضوجين حبيبتي امتحني دور ثاني وحتلو دور ثالث واذا ما تكدرين عيدي السادس

رهف. كلت بكلبي هاي ثاني سنه وهيج تعاملها
واني ليش شاده ياي وهاي الي السنه الاولى

اليوم الي بعده خالتي قررت اطلع شكران تغير جو
وتشتريلها ملابس وشغلات بناتيه خاف ضايجه
تريدها ترتاح نفسيا
جان تجي عليه يله تعاي ويانا للسوك
رهف…اتعجبت شعجب اني خاله
خالتي.. اي انتي اكو غيرج
رهف…اني مااريد اروح الاي مكان
خالتي….مو عبالج ميته عليج لو اريد اطلع اكشخ
بيج اصلا استحي امشي وياج
عبالك هايشه ضايعه
اريد اشتري غراض ومااكدر اشيلهن تعاي حتى تشيلين الغراض ويانا
بلكت اذا مشيتي يخف وزنج شويه

لو عليه مااطلع وياج الاي مكان اتفشل من شكلج
عبالك فيل ويمشي

رهف.. مااروح اني مااريد اطلع
خالتي. شنو هو بكيفج مااكدر اشيل الغراض وافتر بلسوك
تعاي شيلي الغراض
اني ماخذتج احمل عليج مو حبا بيج

زمخت بيه بعصبيه يله كومي بسرعه

رهف…حكم القوي على الضعيف امري لله
لبست رداء اسود وشال وبقيت انتظر ست شكران
ساعه تبدل وتتمكيج وتتعطر لبست بنطرون جينز ضيك وبدي لازك على جسمها

المكياج فول العطر واصل الراس للشارع
فتحت شعرها وسرحته
طبعا هي مو حلوه سمره وشعرها مجعد
عيونها زغار بس جسمها حلو رشيق ومرتب

المهم ساعه واني وخالتي ننتظرها تكمل حتى نطلع

طلعنا الراس للشارع اجرنا تكسي وطلعنا

ماخلت مول ولا محل ولا شارع مادخلت بي
واي شي يشترنه
ينطنيا اشيله
اديه تكطعن من العلاليك واني منا سمينه كوه امشي
كمت الهث من التعب
شكد اشترت شغلات الشكران وبلجذب ماكالت تعاي اخذيلج
حاجه حتلو نعال لو شال لو معطر من ابو ٣ الاف

اخر شي كمت اسحل بروحي سحل
ووجهي صار احمر من كد المشي والتعب اخير شي
دخلن محل ملابس
اني بقيت برا شسوي داخله جوه
بعدين الصراحه اني جاي اتهرب من عيون الناس
احس نفسي وحش ويمشي
لان سمينه يمكن اني مو كلش سمينه لان شايله سمني بطولي
بس فقدت ثقتي بنفسي هلكد ما خالتي وشكران يضحكن عليه طول الوكت

دخلن شكران وخالتي للمحل واني بقيت واكفه برا

صاحب المحل ولد شاب تقريبا ٢٨ سنه طلع علمود يطلع علاكة زباله برا علاكه بيها جياسة ملابس فارغه وكراتين

بس شافني اتفاجئ بيه
عصام…ليش واكفه برا

طبعاةاني خدودي صايرات حمر وحالتي حاله من التعب

رهف…لا ماكو داعي انتظر هنا
عصام…شنو تنتظرين هنا الدنيا حاره مبين عليج تعبانه
تعاي تعاي ادخلي المحل بارد

رهف.. حسيت نفسي محرجه من كلامه دخلت
للمحل خالتي وشكران ما انتبهن جاي يقيسين ملابس

جابلي كرسي وبطل ماي بارد
عصام.. اتفضلي تفضلي
رهف….كعدت على الكرسي وأخذت بطل المي من
صدك عطشانه وتعبانه
جمانه السعيدي
بقينا بلمحل تقريبا نص ساعه اني كاعده وهنا يقيسن بلملابس
كلما ارفع عيني اشوفه يباوع عليه

رهف…كلت اي اكيد يكول هاي شلون تمشي من هذا السمن
عبالك فيل كاعد على الكرسي
يمكن يخاف على الكرسي لاينكسر بسبب وزني

شلون بلوه اني ليش دخلت
جان باقيه برا هسه هوه ماشايف وحده سمينه ابد
شكد يباوع عليه
ولله ضجت هسه غير يخلصن ويفضنها

طلعت خالتي شايله نفنوف بايدها
كالتله اريد جنطه تتناسق ويااا
اختارلها جنطه

خالتي….شكد السعر اريد خصم
عصام….لا مابيهن خصم سعر نهائي
خالتي…ايجوز نصير معامليك ولله ذوقك حلو بلملابس
عصام…شكرا
خالتي…يله شكد وياا الخصم
عصام…هاي لان اول مره راح اسويلكم خصم
خالتي…يله خليهن بلعلاكه

شالت خالتي العلاليك وصاحت رهف تعاي شيلي
رهف…كمت قربت عليها اخذت منها العلاليك
واني مناك شايله اربع علاليك متروسات ملابس واحذيه

رهف..اخذتهن وطلعت برا انتظرهن

عصام.. هاي بنتج
خالتي. اي بنتي
عصام…الله يحفظها ممكن عنوانكم ورقم ابوها يمكن نصير نسايب

خالتي….نسايب ياا تحجي صدك نشرف بيك مبين انت ابن اوادم
انطته خالتي العنوان ورقم عمي

طلعت برا المحل اني ما اعرف شنو القصه

خالتي.. اي شفتي شلون طلعه بيها ستين حظ
يمه انتي طالعه تخبلين الولد انعجب بيج

شكران….مبين ابن ناس راح البس ملابس كلها ماركه

خالتي…اني مامصدكه معقوله من اول مره دخلنا علي
هيج كبل قرر يخطب
شكران…شنو بنتج قليله شعبالج اني اكبر شارب
اسحله سحل

رهف.. خاله اني تعبت لو تشيلن وياي لو اتاجرن تكسي
كلش تعبت
خالتي.. على خبر خطوبة شكران تعاي اناجر تكسي
ونرجع للبيت

رهف…أجرة خالتي تكسي ورجعنا للبيت
طول الطريق يخططن للخطوبه وشلون يسون حفله
وشكد يطلبن مهر من عصام

بس وصلنا للبيت خالتي كامت تهلهل
وشكران تكمز

رهف. اني دخلت العلاليك ورحت نزعت الرداء ودخلت للمطبخ احظر عشى
جمانه السعيدي
بس دخل عمي خالتي لا كته بلباب
خالتي..باركلنا شكران انخطبت
عمي.. انخطبت بدون مااعرف
خالتي…الولد كال اريد عنوان بيتكم ورقم ابوها
ايجوز باجر يتصل عليك
عمي…شنو شكران قررت تعوف المدرسه وتتزوج
خالتي.. لا نشرط علي تكمل دراستها
عمي…وليش انتي هيج فرحانه
خالتي .. لان مبين خوش ولد هااا من يجي نشرط علي بيت وحدها
اني بتي مدلله مستحيل اقبل تعيش وياا عيال

عمي…على كيفج خل يجي بلاول ونسئل على اهله
ايجوز ما يعجبنا
خالتي.. شنو ما يعجبنا اكلك شاب مرتب مبين ابن خير

لو غايتة لعب جان اخذ رقم شكران بحجة تعارف
بس هو سئل عليك وأخذ رقم تليفونك

عمي…ولو اسئل عنه بلاول بعدين اشوف اذا اقبل بي لو لا

خالتي…اهوووانت دومك مصعب الأمور علينا
خوش قسمه خلي البنيه تمشي بنصيبها

رهف….بعد يومين بلضبط الولد اتصل على عمي وطلب يجي يشوفه يعني كعدت تعارف
الضاهر سئل على عمي وعلينا بذني اليومين

عمي وافق على كعدت التعارف حتى بعدين يسئل عنه وعن اهله

عمي حدد له موعد بليل يجي حتى يتعرف علي

خالتي انخبصت خبص
دزت على اربع انواع حلويات وكيكه جاهزه وجكليت
وببسي وعصير

بيومها طيحت حظي بلشغل تنضيف وترتيب
ودزت شكران للصالون لان اكيد راح تصير شوفه شرعيه

المغرب يله رجعن شكران وخالتي من الصالون
لابسه فستان وردي فاتح والشعر حايره شلون مسرحته
والعطر والمكياج

رهف…ضحكت بكلبي خالتي عبالك مامصدكه
جاي تكول للولد اخذها وياك خالتي فاهمه الشوفه الشرعيه غلط عبالها مهر مو شوفه شرعيه

اني كملت العشى كعدنا نتعشى وخالتي تسوي لفات وتوكل شكران خاف مكياجها يخرب

المهم الساعه تسعه بليل اجا عصام
بلبدايه كعد هو وعمي تعرفو على بعض
الضاهر عمي انعجب بي وهو فعلا مبين محترم

اجا عمي وكال الخالتي تعاي انتي وشكران
حتى الولد يشوفها قبل الاتفاق

خالتي طارت طارت من الفرح ما مصدكه عمي قبل بعصام

راسا اخذت شكران وراحت دخلت على عصام

بس شافها عصام تفاجئ
عصام…من رخصتكم يمكن صار سوء فهم بلموضوع
مااقصد هاي البنيه اقصد بتكم الثانيه
خالتي…ماعدنا بنيه ثانيه هي بس شكران
هي هاي الي شفتها وياي بلمحل

عصام…لا اقصد الثانيه الي لابسه رداء الي كعدت على الكرسي
خالتي.. يااا تحجي صدك تقصد رهف
عصام…اي رهف سمعتج تكولين اسمها بلمحل
اني اريد رهف

 

• لقراءة باقي فصول الرواية اضغط على (رواية 120 كيلو)