رواية نمر والهنوف – لا غلاك اكبر ذنوبي ولا قلبي نبي الفصل الثاني والعشرون 22 بقلم اديم الراشد

البارت الثاني والعشرون

في بيت ابو حمد
وصل نمر المتضايق ودخل وهو يحاول يهدا واستقبلته خالته وابو حمد
حمد بهمس: فيك شي!؟
نمر: لا وين رهف !؟
حمد:تنتظرك ادخل
دخل نمر واستقبلته رهف مبتسمه وفرح نمر لانه ماعاد وده يشوف بعيونهم عتب عليه وكأنه هو اللي هدم بيتهم
سلم عليها بحرارة وهو يبتسم: وش اخبار رهوف
رهف : حمدلله انت كيفك وحشتنا ياخوي
نمر: وانتي اكثر يارهوف وانتي اكثر وين ولدك ازعجني حمد فيه
ضحكت رهف وهي تعطيه واخذه نمر بهدوء وهو يسمي وجلس : ماشاء الله ماشاء الله
حمد قرب يجلس بضحك: بالله عليك مب مزيون طالع علي
ناظره نمر بتمعن والتفت وضحك: خاف الله في نفسك وفي البشريه !؟ مزيون وين الله يرضى عليك ولدك اذا بيطلع مزيون بيطلع على امه ولا خواله
حمد : على كيفك !؟؟ انا اللي جاييبه
ضحك نمر: خالتي بالله ردي على ولدك
ضحكت ام حمد: يقولون ياحمد الولد ان طاب طيبه من خواله
حمد : ان طاب !؟ مب ان صار زيين
نمر: هي وحده وحده وبعدين يارديين توقعت اجي وتقولون نمزح سمينا الولد نمر افا هاذي خوتكم
رهف بفشله: والله حمد اللي سماه
حمد: جحوود مثل اخوها ! وبعدين انت ما قلت لي لا تسميه علي!؟
ضحك نمر: امزح امزح ولو سميته عليه بزعل عليك
ابو حمد: ليه يانمر
نمر: احسن له يبعد عن اسمي وحظي بعد
مدت رهف يدها ببتسامه تمسح على كتفه: اسمك كله فخر وحظك بيزين
ضحك نمر : مهما واسييتي يا رهوف مافي حظي طب
وقف حمد على دقة الباب : جدي وصل
نزل يستقبلهم وطلعت رهف وجلس تيّم مع نمر وعلى طول ركض دحيم جنب نمر وهو يعلمه بسوالف عن لين وعن تيّم
وشوي جاء طارق واهله وابو طارق وبالقوه سلم نمر وصد وهو يدري الليله ياهو يا ابو طارق
…………….••…………
وفي بيت حمدان
اللي كان جالس قدام امه وهو يسمع الاخبار وامه ساكته بغضب وقالت: حمدان!؟ كلمتوا ابوكم
لف حمدان بضيق: كلمته ورافض يمه
ام حمدان: حسبي الله عليك يانمر ياولد ابليس
حمدان: يايمه ياااايمه خافي الله في نفسك وفي هالادمي وبعدين كل اللي صار نتيجة فعلك نمر ماله شغل
ام حمدان: ارفع صوتك علي انت بعد
نزل راسه حمدان بضيق: يمه تكفين اصبري اصبري يمكن نمر يحل الموضوع مع ابوي
ام حمدان بغضب: معك حلين بس يا ترجعني لابوك يا تاخذ لي شقه لحالي انا ما تحمل عيالك وقلق
وقفت وطلعت ووقف حمدان بضيق يناظر هدى وعياله مايدري وش يقول
…………….••………… .
وفي الليل
بعد ما كل طلع من بيت ابو حمد يستعدون لرمضان بكره كان نمر طالع بهدوء يمشي بالديره واتجهه لبقاله سرور اللي كانت مفتوحه وغايصه بالاغراض وطلع سرور من بينها : هلا هلا يابرق الخير
صد نمر : هلا سرور وشلونك
سرور: بخير انت وشلونك
نمر: نشكر الله وش تسوي!؟
سرور: انزل مقاضي رمضان
نمر: زين اجل جهز لي كم كيس فيه الاغراض الاساسيه
سرور: بس جدتك تقضى شفته اليوم
تكتف نمر يناظره بطرف عين: ودك تحاسبني على اللي اشتريه !؟؟
سرور تفشل: لا محشوم بس مستغرب لمن وانت مطل.. سحبه نمر بغضب وصرخ فيه: سروووور احفظ دمك ياسرور تراني ادور اي واحد اللعن خيره ضف وجهك سوو اللي قلت لك خلنا ندخل رمضان متصافين
سرور ابعد يرتب ثوبه: ابشر ابشر
وسحب نمر بكت دخان وجلس على نفس الكرسي وسرور يسولف فوق راسه ويرفع له الاكياس ونمر مرتفع ضغطه منه وبعد ماخلص رمى عليه الفلوس وطلع يتحسب
وطلع يمشي بشويش والساعه كانت قريب 2 الفجر وابعد عن وسط الديره واول ما وصل اطرافها المتهالكه والناس المحتاجه فيها بدا ينزل الاكياس على كل باب ويدقه ويبعد وهو ينتظر لين ياخذونها ويرجع وانتهى منها الساعه 3 ورجع يسحب نفسه للبيت وهو يدعي بهالوقت ان الله يجمعه بالهنوف ودخل المزرعه وهو يسمع صوت جده يسبح ويستغفر ودحيم جالس عنده يقلده بحركاته وكلامه وبدريه تجهز السحور
وجلس نمر بهدوء وهو كان وده يدخل رمضان مع الهنوف
…………….••…………
ومن بكره
ابتدت اول اياام رمضان وكل الناس عامره بيوتها بتجهيز الفطور والروحانيه والدعاء وانتشرت في كل مكان ريحة السمبوسه وفوانيس رمضان
ولاول مره من ثلاث سنين يمر على نمر رمضان بالديره
كان جالس عند باب المزرعه هو وجده بعد ماقرا جزءه من القرآن والحاره مليانه حياه
وهو جالس بتعب غفى وفي نص غفوته حلم وغطس بأحلامه لكن كان حلمه غريب كانت الهنوف بحلمه جالسه بزاوييييه بعيد وكأنها مربوطه وفي اطراف اصابعها أُبر وفي يدها مربوط حبلين قماش وفي اطراف القماش مربوط شخصين ما يشوفهم نمر وظهرها منحني ووجهها مليان دموع
وشهق وفز من حلمه على صوت حمد اللي صرخ بأذنه وهو يضحك: رمضااان كريييم يا خلف جدي
جمدت عيون نمر عليه بحده وغضب ووقف وهو يرتجف من الحلم الغريب
مسك نفسه بصعوبه لا يهفه كف يكسر عظامه وغمض وهو يجلس برجفه ملحوظه ولف ابو ادهم بغضب: وش بلاك انت فجعت اخوك
حمد قرب يبوس راسه: امزح معك وش فيك ماخبرتك خواف
لكن سكت حمد وتدارك ان وضعه صعب وان نمر توه طلع من السجن واحتمال يعيش نفس المخاوف : نمر انا اسف
نمر صد بضيق: ماعليه ماعليه
ابعد عنهم ودخل وركض حمد وراه واتجهه نمر للبركه وهو يجلس بتعب عندها
حمد: نمر وش صار امانه قلي!؟ لايكون صدق ارعبتك
نمر: لا ياحمد بس خلني لحالي
حمد: وشلون وانت بهالحال قلي وش فيك
نمر سكت وهو يتذكر ولف بعيون حايره تسطع عليها الشمس: الهنوف ماهي بخير
حمد: ليه وش صار!؟
نمر :مدري حلمت فيها حلم شييين ياحمد شيييين
حمد: يانمر انت قلتها حلم وكله عشانك شايل همها اكيد مافيها شي قم تعوذ من ابليس وتعال ماباقي على الاذان شي
نمر: روح وانا ألحقك
راح حمد وهو خايف بس مايبي يخوف نمر اللي جلس يناظر الشمس بهدوووء ويراقبها بصمت وفي عيونه عيون الهنوف الباكيه واطرأفها الموجوعه وشد على يدينه وكأنه يحس بأحساسها وحط يده على راسه : يارب الهنوف ألطف بنمر
وقف بتعب وراح وهو يشوف الكل جايين للفطور بما فيهم رهف اللي قربت تسلم عليه وتسأله عن حاله لكن كان شارد وافترقوا كل واحد راح لسفرته والكل جالس ويدعي الجد وهم يأمنون ونمر غااااطس بتفكيره وبهالحلم اللي أكل قلبه واشغله ويسمعهم يرددون بعد الاذن ( اللهم لك صمت وعلى رزقك افطرت، وذهب الظمأ وابتلت العروق وثبت الاجر ان شاء الله )
كانت الادعيه اللي يرددها نمر كثييره واغلبها للهنوف وبعد الفطور والصلاة اجتمعوا يتقهوون كالعاده واغلب اهل الديره الشياب جايين
لكن نمر كان جالس وكأنه على مسامير وقف واتجهه لغرفته وهو ماعاد فيه صبر ابد وقف عند الباب ينادي : يااابدريييه بدرييييه
طلعت بدريه : نمر وش فيك!؟
نمر: بطلع لغرفتي
بدريه: اطلع ما فيه احد قدامك
طلع نمر للغرفه وهو يجمع كل شي اغراضه واللي حصله بالبيت
بدريه: نمر وين بتروح !؟
نمر : برجع لحايل
بدريه: وليييه توك جيييت مايصير
نمر: مقدر اجلس يا بدريه مقدر
بدريه مسكته وهي تشد على ذراعه: يا نمر خاف الله في نفسك يانمر انت انتهيت انتهيييت
سحب ذراعه نمر بقلة حيله وهو يقول بصوت منهك وتعبان: وش بيدي يا بدريه قولي وش بيدي
ضرب صدره بقهر : نااااار بصدري نار ماني قادر اجلس الهنوف في مصيبه وانا هنا مكتوفه يديني
بدريه سكتت بصدمه اول مره يكشف نمر قدامها قلقه وخوفه على الهنوف وسكتت واخذ نمر اغراضه وطلع وهو يقول : انتبهي على نفسك ودحيم وجدي
نزل وقابلته امه : نمررر وين رايح يمه!؟؟
نمر : راجع لحايل
فزوا كلهم: ليييه! وش صاير
نمر: ولا شي كملوا فطوركم
طلع بدون اي كلام ووقف حمد وطارق : نمر وين
نمر: راجع
طارق: ليييييه
نمر: طرت لي شغله
حمد هز راسه بضيق: بروح معك
نمر: لا لا خلوكم هنا
سلم عليهم بسرعه وطلع ومحد قدر يقوله لا وطلع حمد يركض وراه: نمر كل هذا عشان حلم!؟
نمر: لا ياحمد انا لي مده وانا حاس الهنوف فيها شي وشي ماهو هييين لكن انا ماينتهي هالشهر الا وهي معي ، مع السلامه
حمد: انتبهه لنفسك وطمني عنك
راح نمر وحمد متكتف ويناظره وده يروح معه بس مايقدر رجع بطريقه وهو يجلس مع الرجال
_____________________.
وفي بيت ابو مقرن
اللي كان جالس مع مرام ويسولف معها ومبسوووط ببنته
مرام بهدوء: وش قصة هالرجال يبه؟؟
ابو مقرن هز راسه بضيق: قصته طويله يامرام بحكيها لك بعدين لكن الحين بروح للمحامي اشوف اوراقنا وش صار عليها
مرام: الله يستر عليك يبه
وقف ابو مقرن وهو يركض بين المحاميين ويدور حل يرجع فيه امواله اللي اخذها عمه وعياله
__________________.
وطول الطريق
ونمر يهوجس ويفكر ويفسر الحلم براسه وش بيكون في الهنوف وش صاير فيها ووش بيسوي وكيف بيحصلها ولا وقف دعسته وحححححده ألين وقف في حارة ابو هذال ونزل وهو يشوف الوقت 1 من الليل واتجهه لهم بغضب وهو حاط براسه الليله ياذابح يا مذبوح وبياخذ الهنوف طيب ولا غصب
واول ما اقبل على الباب حس بأحد وراه وسحبه وهو يسكر فمه ويسحببببه بالغصب ونمر يحاول يتفكك منه وهمس في اذنه: اعقل يا نمر اعققققل
وجمد نمر وابعد يناظره وهو نفسه مقطوع : عمي ابو مقرن وش تسوي هنا
ابو مقرن: نسيت انك موصيني !؟ اراقب بيوتهم
نمر مسح وجهه بضيق: ايه بس الوقت متأخر
ابو مقرن: يمكن ربي ارسلني اشوف وش تسوي من هبال !؟ ويييين راح انت وش بتسوي
نمر: رايح اطلع بروح ابو هذال وولده الكلاب
ابو مقرن: انهبلت انت مافيك عقل
نمر: انا ملييييت ملييت مافيني صبر انا متأكد انه مسوي لها شي
ابو مقرن: نمر اعقل وحط عقلك براسك انت لو رحت له الحين بتسبب لنفسك بمصيبه انت في غنى عنها لو بلغ عنك واتهمك بأي مصيبه بتبلش معه واحتمال تدخل السجن وادخل بحق خاص وحق عام وسين وجيم انت في غنى عنها
نمر : قلي وش اسوي وانا اسويه
ابو مقرن: تعال نرجع البيييييت وتعين من الله خير وتهدأ وبعدين نشوف وش يصير معنا
نمر التفت يناظر البيت بضيق واخذه ابو مقرن ورجعوا البيت ودخل نمر يأس مايدري وش يسوي
وراح ابو مقرن ورجع بأكل وحطه قدام نمر اللي قبل يرفضه احتج ابو مقرن: نمر ولا كلمه مد يدك وسم بالله وبعدين بعلمك باللي صار معي
التفت نمر: وش صار
تكلم ابو مقرن يبي يشغل نمر شوي عن التفكير: كلمت المحامي وقالي اني اقدر اخذ نصيبي من ورث ابوي وحلالي اللي اكله عمي علي ويبي لي جلسات بسيطه وان شاء الله اخذه
ابتسم نمر: حمدلله حمدلله زييييين الله يرجع لك حقك ياعم
ابو مقرن: اللهم امين
وقفت مرام بإستغراب وهي ماعمرها شافت نمر الا معصب او يناقش
_____________________.
وعلى كثر ماكان نمر مصرررر انه ينهي هالشهر ومعه الهنوف على كثر ما حظه عارضه كالعاده وقرب ينتهي الشهر ونمر جالس عند ابو مقرن ولا رجع لرياض ابد وهو من الصبح يطلع ويدور بكل مكان ويرجع ومافيه فايده
وفي بداية العشر الاواخر قرر نمر انه يهدي وضعه شوي ويفضي نفسه للعبادات اكثر
وبعد التروايح جلس بهدوووء بالمجلس وهو فاتح مصحفه ويقرأ
ودخل ابو مقرن: نمر تقبل الله
سكر نمر المصحف : منا ومنك يا عمي ، هاه اشوفك بتطلع
ابو مقرن: اي والله ، انت ما انت رايح مكان !؟
نمر: والله مدري
سكت ابو مقرن وهو يشد على يدينه قطب نمر حواجبه: تبي تقول شي ياعمي!؟؟
ابو مقرن بتردد: والله يانمر انت تعرف يا ابوك ان المثل يقول الكلمه اللي تستحي منها
وكمل نمر : بدها ياعمي بدها انا مثل ولدك لا تستحي ابد
ابو مقرن بتردد: اتصل فيني المحامي وحدد الجلسه ويقول ان بداية الاخبار ماهي طيبه ياولدي وان عيال عمي ناوين الشر ولازم اروح احضر الجلسه واقدم اعتراضي
نمر فز وجلس على ركبه ونص: افا ياعمي انا معك ولو تبيني اروح معك واحميك والله ما اقصر
ابو مقرن: لا لا ماهو هذا اللي ابيه ،انا اللي ابيه انك تحمي مرام بنيتي
نمر بسرعه: افا عليك بنتك برقبتي
ابو مقرن: وهنا مربط الفرس يا نمر
دق قلب نمر بحذر وقال بهمس: وشو !
ابو مقرن بتردد: انت تدري مقدر اوديها لجدها لانه لو حس ان على حياتها خطر بياخذها مني ولا هو معطيني اياها وثاني شي مقدر اخليها بالبيت لحالها
وطال السكوت وقال: انت بالبيت وماعليها خوف لكن مقدر اخليك معها بالبيت لحالكم
رجع نمر ورا بتوتر: افا عليك ياعم اكيد ما تقدر انا بطلع للفندق واجي كل فتره اشوف وش تحتاج
هز راسه ابو مقرن بضيق: لا ياولدي ماهو هذا الحل
نمر سكت اول ما بدا عقله يترجم مخاوف قلبه وتردد ولا نطق
وقال ابو مقرن: ادري والله انك ما انت حول هالامر وانك مستحيييل تسوي هالشي بس انا رايح وانا مدري ارجع ما ارجع احيى او اموت وعيال عمي ماهم مخليين ثار ابوهم
وبنتي مالها غيري الا جدها وجدها رجل بالدنيا ورجل بالقبر واي ازمه ممكن يروح فيها وانا ادري انك مستحيل تضرها حتى لو جلستوا بالبيت انتم بس لكن مايصير وانا بطلبك اذا لي عندك معزه ابيك بس تكتب كتابك على بنتي تملك عليها فتره بس لين اخذ حقي كامل واتطمن على وضعي ووبعدها اذا تبي تسرحها بكيفك
طارت عيون نمر بذهول وانهبل انهبل لا شعورياً وقف وانقطع نفسه ارمش كذا مره يستوعب ووقف ابو مقرن : نمر انا ادري انك ما تبي الا الهنوف ولا تبي تتزوج غيرها او عليها بس انا ما اقولك تزوج بنتي انا اقول بس اعقد عليها بس عشان يكون وجودك معها بالبيت حلال وعشان الناس وكلام الناس وانت ادرى وعشان لو صار شي لاسمح الله ادري اني ما خليتها الا بيد رجال يحميها
بدون اي كلام اخذ اغراضه نمر وطلع مسرع من البيت ماهو مستوعب ان ابو مقرن اللي يعرف كل شي عنه وعن الهنوف فجأه يحمله هالثقل لا مستحيييل اخذته رجوله لنفس الزاويه اللي يجلس فيها دايم وجلس وهو يشعل زقارته مرعوب من هالفكره ووشلون بيرفض
رفع جواله لاشعورياً وهو يتصل بالمنقذ الدايم
__________________.
وفي بيت ابوحمد
كانوا مجتمعين بعد التراويح يتابعون مسلسلهم ورهف جنبه معها ولدها وابوه وامه بطرف
وحمد منسدح وهو نعسسسسان فز على الاتصال ورد مبتسم: هلا بأهل حايل اللي قطعونا
نمر: هلا حمد وشلونك
حمد حس صوته ثقيل وابعد: هلا بخير انت وشفيك
نمر: حمد تقدر تجي لحايل
حمد بخوف: ليه فيه شي!؟
نمر وهو صوته يتقطع من اللي يصير فيه هالايام : محتاجك ياحمد تعال
حمد: ابشر ابشر بدور اقرب رحله وان شاء الله احصل
نمر: عجل تكفى
حمد: ابشر بس ماتقدر تقولي
نمر: ما اقدر على الجوال
هز راسه حمد: ابشر ابشر المهم خلك بخير لين اجي
نمر : طيب
رجع حمد مخطوف لونه وانتبهت رهف وطلعت له: حمد فيك شي!؟
حمد : هاه ! لا لا بس جهزي اغراضي بروح حايل
رهف بخوف: نمر فيه شي
حمد : لا لا بس يبيني اجي
رهف : استحلفك بالله تقولي اذا فيه شي
حمد: مافيه شي ياحبيبي بس متضايق وانتي ادرى بضيقة نمر
تنهدت رهف بضيق: تكفى ياحمد انتبهه له
حمد: ابشري خلصي لي اغراضي بس
رهف: طيب
وقف حمد متكتف ما يدري وش صاير
_________________.
وفي بيت ابو حمدان
كانوا جالسين مع ابوهم اللي طرح عليه حمدان رغبة امه انها تبي شقة لحالها
ولف ابو حمدان يناظر عياله اللي من شهر وهم تعبانين من هالتشتت هز راسه بضيق : تجي وتجلس في هالملحق ولا ابي اشوفها ولا اسمع صوتها
فزوا كلهم ببتسامه : بترجعهاا يبه
ابو حمدان: لاااا لكن انا في مكان وهي في مكان
حمدان: بس يبه مايصير تسكن هنا وهي مطلقه
ابو حمدان: وش اقولك انا تسكن بالشقه اللي بالملحق هي في بيت وانا في بيت وتعتبر في بيت عيالها
وسكتوا كلهم ولف حمدان: اثير جهزي انتي والخدامه المكان لامي
هز راسها اثير بضيق: طيب
وبعد هالقرار الكل ارتاح واولهم حمدان اللي اتعبته امه بالهواش مع هدى ومعه
_________________.
وفي بيت ابو الهنوف
رجعت الهنوف من الخياط بقهر وهي مصدومه كيف سلطانه ما تمر عليهم طول هالشهور ماتدري عن ابوها ولا اختها شافت اغراض عند الباب وعرفت انها من عند عمها اخذتها بغضب وهي توزعها على البيوت اللي حولها وهي ما تبي منهم شي
وبعد ما وزعتها رجعت بحب وهي تناظر فارس اللي كل ما كبر شوي تتعلق فيه اكثر وابوها اللي كل شهر تزيد حالته سوء وشوقها اللي كل شهر يكبر وينتظر نمر تنهدت بضيق وهي تاخذ المصحف وجلست وهذا اغرب رمضان مر عليها
___________________ .
وفي بيت ابو مقرن
كان زعلان ومتضايق انه في يوم كان سبب في ضيق نمر لكن مجبور وش يسوي كل المعطيات حوله تخوف وبنته مايدري وين يوديها مالها الا نمر يحميها يدري انه غلط هاللي سواه وطلبه بس مابيده حيله
التفت يناظر مرام هالصغيره تشبه الغصن المكسور وصعب يتركها ويروح
قربت وهي مبتسمه: يبه وش فيك وش مكدر خاطرك!؟
ناظرها بحزن: وش اسوي يبه انا مالي الا ضيقة الصدر
مرام: بسم لله عليك يبه لا تقول كذا
وضحكت بمزح: لايسمعك ولدك على قولك بيزعل منك ويقول زي ماتقول دايم وشلون تضيق وعندك نمر
ضحك ابو مقرن بحزن: ااااه يانمر بس اااه
مرام: ليه وش فيه نمر يبه!؟
ناظرها بضيق: مافيه شي الا انه رجالل عن مليون رجال
سكتت مرام ماتدري وش اللي صاير وهي من كثر ما ابوها يمدح نمر تحس انه ملاااااك لكن مقصوصه جناحينه
___________________.
وعند حمد
اللي دور اقرب رحله وطار ما قال لاحد الا رهف وابوه وامه وهو خايف على نمر اللي ينتظر بالمطار
واول ما استقر على ارض المطار رفع جواله يدق على نمر بس شافه واقف ومتكتف بهدوء غريب اسرع له : نمر
فز نمر والتفت له وتقدم يسلم عليه وحمد مستغرب الخضوووع والرضووخ في عيونه ابعده بهدوء:وش صاير
نمر: تعال تعال خلك تسحر قبل يأذن
اتجههوا لاقرب مطعم وحمد قلقان وقال نمر بهدوء: ابو مقرن طلبني طلب لوى به ذراعي
حمد: وش طلب!؟؟
نمر قال كل السالفه لحمد اللي كان سااااكت وهو يلقب الاكل قدامه بصمت
نمر: وش تقول بهالكارثه يا حمد
حمد كان يناظره بصمت واخيراً نطق: وش بقول بذمتك!؟ هو فيه مجال شي ينقال!؟
نمر: لازم تقول شي ياحمد
حمد : نمر ابو مقرن ما قصر معك في شي وكل اللي طلبه انك تحمي بنته وهو قال اعقد عليها بس يعني مو زواج رسمي ولا يطلب منك شي وانت ادرى ان صعب يخليك مع بنته لحالكم وصعب ياخذها وصعب يخليها وبعدين ماتشوف انه افضل لك
نمر وقف بجنون: انهبلت انهبلت تبيني اتزوج على الهنوف
حمد : انت ما تتزوج على الهنوف ولا نسيت انك مطلق
ضرب نمر على الطاوله بغضب: انا مجبور اطلق الهنوف يعني طلاقي لها باطل
حمد : خلنا من هالموضوع الحين الموضوع هو مرام
نمر جلس بغضب: حمد افهم انا مقدر مقدر اتزوج ابد
حمد : سؤال بس !؟ ابو مقرن كم مره انقذ روحك وكم مره دفع عمره عشانك !؟ مستختسر انك تنفذ طلبه
نمر: انت تفهم ولا ما تفهم
حمد : نمر انت كذا كذا جالس بحايل مالك احد وبعدين دامك معهم فالبيت انت كل اللي عليك تعقد على البنت بس لين يرجع ابوها ترا اللي سواه عشانك كثير
حط نمر يدينه على راسه : وافترض ان بهالوقت لقيت الهنوف وافترض اني طلعت قدامها متزوج!؟ وش بسوي!؟
حمد: اسمع هالموضوع بيني وبينك لين تطلق مرام
نمر: انجنيت انت في عقلك!؟ تبيني اطلق بنته بعد بنت صغييييره تحملها لقب مطلقه !؟؟ هاذي كارثه وبعدين افترض ابوها فعلاً صار له شي بتقعد معقله برقبتي
حمد : وبترفض!؟؟
نمر غمض : وش اقوله !!؟ كيف اتكلم
حمد سكت هو يفكر: نزوجها سلطان طيب!؟
نمر : صاحي انت سلطان بيتزوج بنت عمه
حمد: طيب وعدنان!؟
نمر : حممممد لا تغثني! ابوي كفايه عليه انا خريج سجون تبيه يزوج ولده بنت خريج سجون انسى
حمد : وش السوات طيب
نمر : مدري مدري
سكتوا وكل واحد يفكر وش بيسوون
___________________________________.
اذن الفجر وبدا الكل يمسك ويصوم ونمر وحمد للحين متقابلين مايدرون وش يسوون رهف كل شوي تتصل وتتطمن وابو مقرن عجز ينام وهو مايدري وين راح نمر
فز حمد: نمر زوجها دحيم كذا ولا كذا دحيم حتى لو طلقها ماعليه شرهه
ناظره نمر بهدوء: مهبول انت تبيه يقول اعطيه بنتي ويعرضها على انسان تعبان
حمد: والحل برايك!
نمر: بكلمه بقوله مقدر انا مستعد احرس الباب بس زواج مقدر اتزوجها مقدر
حمد : وبأي وجهه بتقوله!
وقف نمر وهو يسحب البكت بس رماه بغضب اول ماتذكر انه صايم ومصدع وتعبان
حمد: اسمع تعال ندور لنا فندق نريح فيه واذا صحينا نفكر من جديد
وقف نمر يسحب نفسه سحب وراحوا للفندق ونام حمد ونمر يتقلب وين يودي نفسه من هالمصايب
ولا غفت عينه ألين ما أذن عليه الظهر وفز بعد ماصلوا رجعوا يجلسون بهدوء
والتفت حمد : نمر وش قررت !
نمر : مالي حل ياحمد
حمد: عندي حل
نمر: وشو !؟؟
حمد : اعقد على بنته عقد بس يكون بينا بس سر محد يدري به لين يرجع ابوها وتطلق ولامن شاف ولامن درا حتى لو لقيت الهنوف ماهي داريه بيني وبينك وبس
التفت له نمر بهدوء: هذا اخف العذاب يعني!؟
حمد :ما طلع معي الا هالحل ابو مقرن صعب ترده وهو طلب فتره ولا يطالبك بأي حق مجرد عقد
وقف نمر بضيق : انا ماني بخير وجيت يمي وانت ما انت بخير بعد
حمد : قلت لك هذا اهون شي ولا تخسره ولا تخسر نفسك
سكتوا وطال تفكير نمر اللي وقف العصر وهو يقول : يلا يا حمد
حمد: وش قررت
نمر: اذا شفته بقرر
طلعوا وحمد خايف ونمر خايف اكثر منه
____________________.
وفي بيت ابو مقرن
كان ابو مقرن جالس بهدوء وغافي لانه تعب ينتظر نمر
اما مرام ماكانت تدري وش اللي صاير ودق الباب وراحت مرام وهي تقول : مييين
غمض نمر بضيق : ابو مقرن فيه!
ابعدت مرام بسرعه اول ما عرفت صوته وراحت وهي تصحي ابوها : يبه يبه نمر عند الباب
فز ابو مقرن بسرعه وراح وهو يفتح الباب: نمر وينك يا ابوي اشغل… سكت او ماشاف معه حمد : هلا هلا يا حمد
تقدم حمد يسلم عليه ودخلهم وهو شايف وجيهم ضايقه
جلسوا بهدوء ونمر ماهو قادر يناظره من الخجل واخيرا رفع راسه وقال: ياعمي انت طلبتني طلب ماهو هين ماعرفت وشلون احله او اجاوب عليه انت ما انت بسيط عندي وانت فضلت علي وانا ادري انك مجبور تطلب هالطلب وانت تدري انا وشلون اوضاعي وحالي وظروفي
ابو مقرن: والله اني ادري يا نمر بس انا مالي الا انت بس مالي غيرك ولو فيه رجال فالدنيا هاذي اقدر أأمنه على بنتي ماقصرت ولا احرجتك واحرجت نفسي انا قلت ما اطلب منك الا تحميها مابيك حتى تصرف عليها بريال واحد
كان نمر وده يقول انا مقدر بس مثل العاده عجز لسانه ينكر جميل ابو مقرن عليه وقال: ابشر ياعمي وانا راضي لكن انا مقدر اجلس عمري كله بهالحال
ابو مقرن ابتسم برضا : وانا قلت لك لين ارجع وراضي انك تطلق
انصدم حمد بس يعرف نمر مايقدر يرده وينكر فضله
قال نمر بتردد: ياعمي انا ودي ان هالعقد يكون بينا بس مابيه يوصل لاهل الرياض
ابو مقرن: تم تم
وفي لحظه تحدد مصير نمر هالفتره وضايق صدره والتفت لحمد اللي يهمس: بتفرج ماعليك
وقف ابو مقرن يجيب اوراق يراجعها مع حمد دامه محامي وجاء ونمر اللي بلش بنفسه
________________________ .
وفي بيت ابو حمدان
جات ام حمدان والكل مبسوط وفرحان ان وضعهم استقر
وكانت راضيه انها رجعت للعز
وعلى سفرة الفطور كانوا مقسومين الرجال تحت
وباقي الحريم فوق وكانت اثير تناظر بفرح وخايفه من جيت نمر اللي يجي ويروح محد يعرف عنه شي
وكانت بس هي وارياف ورهف وامها وهدى اللي تخز ام حمدان خز ومحد بالع الثاني
قالت اثير تغير الجو: رهف متى بيرجع حمد من حايل
رهف : بي…
وقاطعتها امها: اقولك انتي وياها طاري هالقروي لا ينجاب على سفرتي لا هو ولا زفت الطين نمروه
وقفت رهف بضيق: ليه يمه وش سوا فيك !؟ سحرك مثلاً
وقفت ام حمدان بغضب : قص يقص لسانك ياقليلة الادب
وقف ارياف : رهف تكفين سكري السالفه
رهف اخذت ولدها بضيق: الشرهه علي اللي بجي افطر مع اهلي
اثير: اجلسي وتعوذي من ابليس
رهف : بالعافيه
اخذت ولدها وطلعت بغرفتها بضيق من امها اللي ما ترحم ابد
ولفت اثير: يمه تكفين ماتعبتي من المشاكل ابوي لو يدري بيسوي لنا قصه
هدى: معلوم عمي لا يدري لو درا الله يستر لا يطلعك من البيت
وقفت ام حمدان بقهر وهي متكفيه من كلام هدى تخاف فعلاً يطردها
ولفت اثير بقهر: انتي انكتمي تسمعين
ارياف: اثييييير تعوذي من ابليس
لفت اثير بضيق وجلست وهي ماتدري وشلون تتصرف
___________________.
وفي الليل
في بيت ابو مقرن اللي كان يشرح كل شي لمرام اللي شهقت بصدمه وخوف لكن مد يده ابو مقرن يطمنها: يابنتي لا تخافين نمر رجال وبيحميك ويحطك بعيونه وترا كل السالفه عقد بس يسمح لنمر يكون معك فهالبيت بصفة انه زوجك واذا رجعت بيطلقك لاتخافين حتى اذا ودك لا تكشفين عنده مجرد عقد يابنتي
ماعرفت مرام وش تقول كانت خايفه ومرتبكه ولا تعرف وش ترد ووقف ابو مقرن: صدقيني عشان مصلحتك
بدا يشرح لها القصه وفهمت لكن الهم الاكبر نمر
وطلع ابو مقرن اللي منادي الشيخ وواحد من اهل المسجد يكون شاهد مع حمد
والكل ينتظر بالمجلس ونمر ذايبه روحه ذاااايبه من القهر انتهى الشهر وهو مامعه الهنوف وانتهى الشهر وهو على ذمته انسانه ثانيه انسانه اصغر منه ب 17 سنه طفله صغييرره
بدأ الشيخ يتكلم ونمر ما نطق الا قبلت وابو مقرن ما اشترط اي شي وكتب كتابه نمر عليها وانتهى كل شي
ورسمياً صارت مرام زوجته
ورسمياً ثقل كتف نمر اكثر من قبل وانحنى ظهره وانفض المجلس ووقف حمد وهو يحضن نمر: ماعليه كل شي تساهيل
نمر شد عليه بكل قوته :الله يعين ياحمد
حمد :الله يعين ، انا رحلتي بعد ساعه بروح تعرف اوضاعي بخلص اموري قبل العيد
نمر هز راسه بضيق: اسلم وسلم
نمر: يوصل
التفت لابو مقرن اللي قال: اعذرني يانمر تكفى انت ادرى بحالي وانا ادري بحالك مالي الا انت تسندني
نمر: ماعليه ياعمي ماعليه وبنتك امانه
كان اليوم موعد سفر ابو مقرن اللي راح مع حمد للمطار
ونمر واقف متكتف يراقبهم رفع راسه اول ما اختفوا وهو يزفر بضيق : ياربيييي تكفى وش اسوي
التفت بضيق يناظر البيت وراه وفيه مرام اللي مايعرفها ابد وجلس ساكت مايدري وش يسوي ومشى به الوقت وناظر ساعته و كان لازم يطلع وهالوقت بذات
تردد ووقف وهو يتجهه للبييت ودق الباب وهو صاد ماكان قادر ينطق اسمها كان يقول : يابنت
فزت مرام بخوف وهي خايفه بعد ماودعها ابوها وعرفت انها مع نمر بلحالهم وهمست: نعم!
نمر بالقوه قال: انا بطلع عشر دقايق وارجع قفلي الباب مضبوط ولا تفتحين لاحد ولاتطلعين الحوش
هزت مرام راسها من جوا ورجع نمر يقول: طيب!؟
مرام بهمس: طيب
ضاق صدر نمر من صوتها الصغير وطلع وهو يقفل الباب وراح كالعاده لاقرب بقاله وهو يجمع كراتين الصدقات زي ماتعود وابتداء يوزعها على اللي حوله من البيوت ووصل لواحد من البيوت وحط الكرتون وابعد وهو يدق الباب وانفتح الباب بحذر وفجأه اندف الصندوق بعييييد وتسكر الباب بقوه وانهبل نمر من التصرف ومن هالطيش و اللي يرمي النعمه رفع نظره للبيت وكان متهالك وشلون يردون هالنعمه
طلع قلم وكتب ( هالكرتون صدقه من فاعل خير)
ورجعه ورجع يدق الباب ويبعد
_____________________.
وفي بيت ابو الهنوف
بعد مانام ابوها كانت تحاول تنوم فارس وتغني له والباب ازعجها ومن يدق بهالوقت اكيد من عمال عمها اللي يجيبون الاغراض وكل يوم وكأنه صدقه عشان تاخذها
فتحت الباب وشافته وابعدته ورجعت واول ماغفى فارس اندق الباب وصحى يبكي ووقفت الهنوف بضيق ورجعت تفتحه وولدها يبكي وهالمره وخرت الكرتون بغضب ماشافت المكتوب عليه
وهي ماتدري من يحطه ولا نمر يدري من هاللي يرد الصدقه لكن اول ماقرب سمع صوت بكى الولد وضاق صدره وتوقع انهم محتاجين اشياء اهم واخذ طريقه ورجع لأحد الصيدليات واخذ كم غرض تخص الطفل متوقع من صوت الولد انه ماهو كبير مايتعدى السنه ورجع وهو يحطها على الكرتون ورجعها للباب ودقه
وهالمرره وقفت الهنوف بغضب وفتحت الباب وانصدمت بالاغراض وعرفت فعلاً انه فاعل خير ابتسمت بخجل من فعلها وهي تاخذ الاغراض : الله يقلع شرتس يالهنوف وحسبي الله على هالشايب( ابو هذال) اللي قطع الناس من الاجر
سكرت الباب وهي تدخل الاغراض وتفشلت وهي تناظر الخط المكتوب وضحكت تناظر حرف( الواو) كانت كتابته تذكرها بخط نمر وصدت بضيق: الله اكبر يا نمر حتى الحروف ماسلمت من طواريك
سكرت كل الاغراض ورجعت لولدها
_____________________.
وعند نمر ضحك لا شعورياً واستساع صدره الضايق من هالبيت وسكانه الغريبين وانه قدر اخيراً يساعدهم ورجع لضيقه اول ماتذكر البيت اللي ينتظره
اخذ طريقه للبيت ودخل وهو يشوف كل الابواب مسكره ورفع يده وكانت الساعه2:30 وصار وقت السحور
وشوي انفتح الباب وطلع منه بنت نحيففه صغيره بهيكلها على راسها طرحه وملابسها وسيعه وشعرها مجدل وواضح ماعرفت بوجوده وركضت بسرعه لزاويه الحوش وهي تسحب دبة الغاز بخوف : الله يستر لا يجي احد ولا يجي هو وانا ماقضيت السحور
وكانت تسحبها وهي ثقيله عليها ولا شعورياً نمر وقف : خليها انا اخذها
شهقت مرام ولفت برعب تناظره وقال نمر وهو مايناظرها: سمي بالله
سكتت مرام وابعدت بسرعه وهي بينها وبينه فرق السماء والارض من جميع الجهات ومافيه اي تكافئ
دخل نمر الدبه وركبها وطلع ووهو يقول : لا تحسبين علي بالسحور
هزت مرام راسها وهي ماتشوفه ولا يشوفها سوت سحورها وتسحرت ومن الشباك كانت تشوف نمر جالس بفرشه على الحوش والانوار مسكره ودايماً بهالوقت من الليل يكون قدامه ابريق شاهي وفنجالين واحد له والثاني ماتدري لمن وحتى قبل يوم يكون ابوها فيه يكون 3 وواحد فاضي ماتدري وش يقصد فيه
وكان صوته شوي خافت بس تعرف انه يغني ولا تسمع زين
اما نمر كان كل ماضاق صدره تذكر ان في مثل هالوضع كانت الهنوف تغني وتوسع صدرها وصدره ولا تغني اي شي تغني السامريه زي ما ابوها يغني ومع ان نمر بعيد كل البعد عنه الا انه حبه من بعد الهنوف وصار يشوفه يمثل احواله
وبين نسمات الهواء كان يتمتم ويغني وهو مازال يحط للهنوف فنجال على امل يجي يوووم وبتكون قدامه وبتشاركه هالوصل وكان يردد بنفس لحن الهنوف هالسامريه
(هدا الليل وتظاهر لي ورا عوج الضلوع هموم
‏تعالى صوتها حتى غدت شيٍ يحاكيني
‏الا من وين مالقيّت اغني او اعد نجوم!؟
‏تجاذبني لحزنٍ مايضم الدمع في عيني
وتنهد بتعب وكمل ….
تعبت من السفر وموادع الخلان والمقسوم
و مسافات الهوى طالت وأنا ما عاد يمديني)
وزفر بتعب وهو يطفي زقارته واخذ علبة المويه قبل يأذن
ومرام تراقبه باستغراب وحيره من وضعه بس كانت متاكده ان ورا ضلوعه هموم تهد جبال
رتبت الاغراض واذن الفجر ووسكرت كل شي وصلت وهي تسمع صوته يصلي بالحوش
ودخلت غرفتها وسلم نمر مايدري وين ينام بالمجلس بس المجلس بعيد مايدري عنها لو يصير لها شي
اخذ فراشه غصب ودخل وهو يدق الباب وقال: يابنت
فزت مرام بخوف: وش تبي!؟
نمر شاف الغرفه المقابله لها وتقدم لها: انا قفلت الباب لا تفتحينه ابد وانا هنا بهالغرفه اللي قبالك اذا صار شي علميني
خافت مرام اكثر وقالت: طيب
وانتهى وراح نمر للغرفه ومرام لغرفتها وكل واحد خايف من الثاني وعلى الثاني
_______________________.
ومن بكره ابتدت دوامة ابو مقرن بمحاكم الجوف ومعارضته لعيال عمه والخطر اللي يهددونه فيه وهم يدرون وراه بنت وكان حمد معه على الخط واي شي يبلغه فيه ابو مقرن وحريص عليه ومقدر الخطر اللي هو فيه ونمر بعد والكل على اعصابه
واستمرت الجلسات ونمر طول هالفتره محافظ على الحدود بينه وبين مرام بنفس النظام مابينه وبينها اي صوت واي كلام الا مجرد سؤال وجواب واوامر
وللحين محد يدري بأمر زواج نمر
وللحين ما وصل نمر لخبر عن الهنوف وخصوصا انه انشغل في مرام وحمايتها
وفي ليلة العيد .. بيت ابو ادهم
كالعاده كان اخر فطور في بيته مثل اول فطور
ولف ابو حمد: حمد وراه نمر ماجاء يعيد معنا!؟
حمد: عنده شغل
ابو ادهم: عجزت افهم هالشغل اللي تقوله
حمد : شغل ياجدي وش عرفني انا
طارق : بس ماهي عدله مايعيد معنا
حمد : حيل الله اقوى
ابو حمد : يلا ورانا شغل ياحمد
وقفوا وكل واحد راح يرتب اموره بعد ما اعلنوا عن هلال العيد
والتفت ابو ادهم: طارق طارق تعال
قرب طارق: وش فيك ياجدي فيك شي!؟؟
ابو ادهم: اسمع اتصل بنمر وقله اني تعبان وضغطي مرتفع وخله يجي يعيد معنا
ناظره طارق بذهول وضحك: جدييي ، وش هالحركات
ابو ادهم: وش اسوي ودي ان نمر يعيد معنا ما ابيه يغربل نفسه زود بس لا تخوفه قله تعبان ويبيك
ابتسم طارق :ابشر ابشر
_______________________.
في حايل
كان نمر ماله نية يروح الرياض ولا حاول حمد يقنعه يجي ولا ابو مقرن رجع لحايل بعد ما افطر بلحاله طلع بعد ما حرص على مرام كالعاده تقفل الابواب ولا تطلع وتدق عليه اذا صار شي
وطلع يلم بعض الكراتين ويحط فيها الاشياء اللي ممكن تفرح الناس بليلة العيد وبعد ما جمع كذا كرتون
بدا يوزعها وهو يدعي ان الله بهالصدقه يفرج عليه همه ووقف عند هالبيت الغريب وحط الكرتون وكتب عليه من جديد ( من فاعل خير)
وابعد بعد مادق الباب وانفتح وطال الوقوف عند الباب وبعدين انمدت يد واخذت الكرتون وابتسم نمر واخذ طريقه ورجع وهو من هالبيت حس بفرحة العيد وكان يمشي ويشوف الناس والعالم والكل فرحان وهو كسير
وفي طريقه دق جواله ورد : هلا والله بطارق
طارق : هلا فيك يا اخوي القاطع
نمر : اي والله قاطع لكن بعذري المهم وش اخبارك وعلومكم
طارق : بخير حمدللله في الف نعمه انت كيفك
نمر: حمدلله ، وش اخبار جدي ودحيم وبدريه
طارق : كلٍ بخير بس جدي والله ماهو على حاله
قطب نمر باستغراب : وشو!؟ ليه !؟؟
طارق: والله يانمر له فتره تعبان ضغطه ماينزل ودايم تعبان منه
نمر: شلووون انا اكلمه وحمد يقول بخير!؟
طارق: مايبون يخوفونك وانا توي جيت من عنده ويوم عرف انك بتعيد بحايل ضاق وارتفع ضغطه
نمر مسك راسه بضيق: :ياااااااااارب وين اودي نفسي انا وييين
طارق : انا اقول تجي تشوفه تطمنه والله خايف انه يصير له شي لا سمح الله
غمض نمر بتوتر: طيب طيب بشوف
سكر نمر وهو ضااايق الحين وش يسوي جده تعبان ومرام معلقه برقبته والهنوف مالها اثر اذا حتى بليلة العيد ما احد راح لها من اهلها اكيد ماهي هنا
رجع للبيت ودخل يناظر البيت الهااادي وجلس في مكانه بهدوووء
وفي المطبخ طلت مرام وهي متضايقه على وضعه الحزين وهي حزينه عليه اخذت ابريق الشاهي اللي سوته وحطت فنجالين وطلعت وتقدمت بخطوه خايفه ونزلتها قدام نمر بتردد وناظرها نمر بهدوء وقالت بهمس : دايم بهالوقت تشرب الشاهي قلت احضره
اخذ نمر نفس : ماقصرتي
هزت راسها مرام ببتسامه وابعدت وقال نمر اول ماشاف الفنجالين: ما انتي جالسه!؟
ابتسمت مرام وهزت راسها ب لا :لا هذا لك
نمر اشر على الفنجال الثاني : وهذا؟؟
رفعت كتوفها ببتسامه وهي فهمت قصته من ابوها وتوقعت ان هالفنجال دايماً يحطه للهنوف : هذا اذا ما خاب ظني للهنوف وزي ماهم يقولون حقوق الطبع محفوظه
جمد نمر مستغرب وهو مايدري شلون عرفت وشلون متقبله هالوضع ولمس في صوتها مواساة له وراحت وهو يناظرها بصدمه بس توقع ان ابو مقرن شرح لها
اخذ الشاهي وهو يشربه ويفكر وبعد شوي وقف متجهه للبيت وقال بضيق وبصعوبه : يااا .. مرام
فزت مرام وهي تلم شعرها وحطت الطرحه على راسها وطلعت وهي اول مره تسمعه يناديها: سم!
نمر : تعالي
خافت وقربت شوي وقال نمر : جهزي لك كم غرض بنطلع لرياض
مرام: هالحزه!؟؟
نمر: ايييه يلا يلا ما معنا وقت
راح لغرفته وتركها وهو يجمع كم غرض وطلع ينتظرها وهو يشغل زقارته ولف ينتظرها وهو يدري انه قاسي في معاملته لها بس مب قادر يتكلم معها او يناظرها واحسن شي مايكون بينهم اي نقطه وصل
طلعت مرام مستغربه واخذ نمر اغراضها لسياره وركبوا بهدوء وهذا اول مشوار لهم طلعوا من حايل ونمر يستودع الهنوف بصدره ومرام تراقب وهي معطيته حقه بهاللي يعيشه وكانت تنتظر متى يجي ابوها وترتاح من هالضيق اللي بصدرها وهي مزعوجه من زقاير نمر اللي تخنقها
وكان نمر منتبه انها ما تحب الدخان وريحته بس مايقدر يوقف ابد
ومر بطريقه المكان اللي يجي له هو الهنوف دايماً واخذ قلبه بذاكره ونمر يراقبه وفجأه صرخت مرام بخوف: انتبببببه
بسرعه لف نمر بخوف وارتباك وتدارك وضع السياره اللي كانت قدامه وكان بيصير عليهم حادث
اعتدل بتوتر: وش فيييييك تصارخييين!؟
مرام : كنا بنصدم
مسح نمر جبينه بتوتر: انا منتبهه لا عاد تصارخين
هزت راسها مرام بخوف وهي عينها على الطريق ونمر من الخرعه قلبه للحين يدق
وهو اصلا الصمت موجود من قبل بس الحين اختلط صمت وخوووف
_______________________.
وفي بيت الهنوف
فتحت الكرتون وضحكت تناظره اللي فيه حلاوه وطرطعان وملابس صغيره بس ماهي قد ولدها وقهوه واشياء كثيره
قربت للكرتون وهي مغمضه شمت فيه ريحة عود ولا شعورياً بكت وهي يطري لها نمر بكل شي وكل خير
مسحت دموعها وهي تدعي ان الله يفرج على نمر ولاهي الا شهور ويطلع من السجن
وركضت وهي تشغل الطرطعان وبعيد وتضحك وولدها يضحك وابوها يبتسم لفرحتها الوحيده
وفي هاللحظه اندق الباب وكان صوت من زمااااان ماسمعته صوت سلطانه
فتحت الباب تناظره بزعل : وش ذكرتس فينا
انهارت سلطانه تبكي: ماهو في يدي والله العظيم انتي تدرين وش يسوي فينا هالظالم
قربتها الهنوف ببكى: الله لا يوفقه الله يكسره مثل ما كسرنا
حضنتها سلطانه وهي تبكي بضيق وتناظر حالها وحال ابوها
وجلست الهنوف بعد ماجابت القهوه: طمنيني عن احوالتس
سلطانه: وش اقول !؟ هاللي اسمه عم ما بقى هم ما وراني اياه كل ما افكر انهج يمكم يحلف ياخذ ولدي ويرمني بهاه !
الهنوف : عسااه الموت عسى الله يفت تسبدووه مثل ما هو معاقبنا
سلطانه: ابوي وشلونوه
الهنوف : حمدلله عايش هذا هو
هزت سلطانه راسها بضيق : تهون تهون وفارس وش اخباروه
لفت الهنوف بفرح: فارس هو اللي مصبرني على هالعيشه وان اشاء الله يطلع نمر ويجي
سلطانه: للحين تبين منه رجاء
الهنوف بغضب: كل الرجاء نمر وغيره مافيه لا سند ولا رجاء
وقفت سلطانه بضيق: انا بنكس جيت بشوفكم ومقدر اتأخر
صدت الهنوف بزعل وسلمت سلطانه على ابوها ورجعت بنفس الحزن
_______________________.
وفي الرياض
بعد ماطلعوا الشباب من الحلاق وافترقوا اتصل نمر بحمد اللي رد: هلا يا قلب النمر
ابتسم نمر : هلابك ياحميّد ، وش وقعك!؟ ( وش اخبارك بلهجة الهنوف)
ضحك حمد: حنيييت يانمر
ضحك نمر بيأس : منفطر قلبي والله لكن نتسلى
حمد: بخير وانت وشلونك
نمر: انا باقي ساعه واكون بالرياض
حمد: في ذمتك!؟
نمر: والله!؟ ليه ما تعلمني ان جدي تعبان!؟
حمد: جدي!؟ ليه وش فيه!؟
نمر: اتصل طارق يقول ضغطه ماينزل
حمد: ا لا والله انا اشيك عليه كل يوم
نمر: المهم المهم قابلني بعد ساعه على الخط السريع
حمد: جايب مرام معك!؟
نمر بهدوء وهو ماطالعها ابداً : ايه
حمد : كييييف!؟ مب على اساس سر !؟ وش بتسوي انت !
نمر:حمد اذا جيت نتفاهم
سكر نمر وهو مايقدر يكون بعيييد بهاليوم وجده اصلا مارح يخليه بس الحين وش يسوي بمرام
كانت مرام ساكته وهي ماهي فاهمه شي ابد ولا وش وضعهم
_______________________.
وبعد ساعه تقابلوا
ونزل نمر يسلم على حمد ومرام تناظر بهدوء !
حمد : بتروح لبيت جدي بها!؟؟
نمر : مدري
حمد : اصلا وين بتخليها!؟؟
نمر : بستأجر شقه ..! وقاطعه حمد : يا سلام استأجر شقه واحط بنت الناس فيها واخليها !؟ انهبلت انت ! تحسب ان جدي بيسولف معك ساعتين ويخليك!؟
نمر : لا والله وش رايك اخذها معي واعرفهم عليها اقول شوفوا زوجتي
حمد : والله ما معك حل ثاني ولا تنسى ان البنت امانه في رقبتك
نمر صد بضيق وحمد لخبط كل افكاره لكن مازال مُصر ما يدخل ابداً بها على اهله
نمر: اسمع بس بناخذ شقة وبس
حمد : اسمعني السالفه كلها على بعضها مالها داعي فالنهايه حنا كلنا كم شخص ومحد بيتكلم انا اقول اخذها وانزل بيت جدي آمن واحسن
نمر : شلون يعني!؟
حمد: في بيت جدي مافيه الا خمس حريم بس امي وامك وخالتي بدريه وجود ورهف بس واذا حذرناهم محد متكلم والرجال بعد اشرح الموضوع وريح راسك
نمر: وش اشرح يا مسلم وش اشرح خل الموضوع مستور احسن في شقة مرتبه وقريبه محد يدري عنها احسن
سكت حمد : براحتك
نمر : يلا يلا
اخذ طريقه نمر يدور شقه وبعد شوي اتصل فيه حمد : ما تشوف انها شينه تجيبها من الرياض واهلك فالرياض وتسكر عليها في شقه واالله احسها اهانه
نمر : لا حول ولا قوة الا بالله ياحمد
حمد: خلاص اسمع بس وش رايك نجيب عندها رهف عشان ما تجلس لحالها المسكينه
نمر: طيب طيب
سكر وهو يوقف عند الفندق : يلا
ناظرته مرام بتوتر : هنا !؟
نمر: ايه هنا
نزلت وراه وهي تراقب تحركاته المستعجله اخذ مفتاح الجناح وطلعوا وجلس نمر وهو يشغل زقارته
قالت مرام بتردد : بتروح مكان
ناظر نمر ساعته كانت 3 وقال بضيق : بعد الفجر بروح لجدي
مرام بهدوء: وانا معك!!
ناظرها نمر بهدوء كانت هاديه جداً وجميله وطيبه ما تستاهل اي معامله قاسيه او انه يسكر عليها ويخليها مهما كان كارهها
وفهمت مرام انه ما رح ياخذها وابتسمت بهدوء: ماعليه انا اصلا تعبت من الطريق وبنام بس تحب اجهز لك شي قبل
ابد ماقدر نمر يتجاهلها وهو طول عمره مايحب تجاهل الانسان او كسره وقف بحيره يناظرها: لا بتروحين معي بس انا افكر ما نزلنا لسوق ولا اخذنا لك ملابس
مرام: لا ابوي اشترا لي
هز راسه نمر بضيق: زين اجهزي
راحت مرام لكن رجعت وهي ماهي مقتنعه بالروحه وتدري ان نمر يبي هالامر سر ماتبي تكون ثقيله عليه اكثر من كذا : نمر
التفت نمر لها بهدووء: نعم
مرام : عادي ما اروح
نمر: ليه!؟؟
مرام : تعبانه مابي اروح
نمر نزل المكينه من يده وجلس: ليه وش يوجعك!؟ مرام: تعب الطريق
ما حب نمر يظغط عليها ولا مرام حبت تضغط عليه اكثر وهز راسه نمر: زين
وراحت مره لغرفتها ونمر بغرفته ويفصلهم صاله
_______________________.
وفي بيت ابو حمد
كان حمد يمشي بين الغرف وهو يغني ( عيد وحب هاي الليله الناس معيدين )
ضحك ابو حمد اللي جالس بالصاله : صار عيد وحب!! الله يرحم ايام العيد فرحه
ضحك حمد: موجوده يا ابو حمد ولا ناسي تيّم بنغنيها له
طلعت ام حمد: وينها رهف!؟
حمد: تجهز
ابو حمد: يلا انت بعد ترا بيأذن الفجر الحين خلص علينا
حمد : يلا يروح بعد شوي
ضحكت ام حمد: خله يا ابو حمد يجلس فالصاله ازين
ضحك ابو حمد وهو يغمز لحمد: اجل مطرود
ضحك حمد بفشله وجلس ورهف محلفته مايجي ابداً عشان تجهز وترتب نفسها لانها خلصت وقت النفاس وتبي تطلع بشكل جديد ولا يشوفه حمد نيولوك جديد لكن طلع وهو يبي يكلمها في موضوع نمر
دق الباب بضحك: رهوف ماقضيتي !؟
رهف: لااا حمد حلفتك بالله ترا
حمد : طيب يابنت الحلال بس ابي اكلمك بموضوع ضروري وشلون!؟
رهف: من ورا الباب عادي
حمد : ياينفع الموضوع خطير
ضحكت رهف : حمد اعرف حركاتك
حمد: والله اني صادق والله
رهف بخوف: طيب دقيقه
فتحت الباب وطلعت وشهق حمد بصدمه اول ماشافها لابسه عبايتها وطرحتها ونقابها وهو ماشافها من يوم جت من الصالون الا بعبايه وطرحه وضحك بكل صوته: ههههههههههههههههههههههههه ههههههههههههههههههههههههه هههههه رهف مو معقوله انتي!؟
ضحكت رهف بفشله: وش اسوي ياخي لا تخرب مفاجأتي
حمد : زين وين ولدي
رهف : لا والله مطلعني عشان تقول وين ولدي!؟
ضحك حمد: لا فيه موضوع بس بتطمن عليه
رهف: نايم ولدك ، وش فيه!؟
حمد اشر بهدوء: تعالي اجلسي جنبي
رهف : خلني هنا احسن
ضحك حمد: يابنت الحلال والله خطير الموضوع
رهف: وشو
حمد : نمر جاء الرياض
وقف رهف بفرح: والله؟؟
حمد: ايه بس معه احد
طارت عيون رهف بفرح: الهنوف!؟
هز راسه حمد بنفي وضيق: لا
رهف: بسم لله مين معه!؟
حمد بهمس: زوجته
قالت رهف بضحك: تستهبل علي ياحمد اكيد الهنوف
حمد كان يدري ان رهف ماهي مصدقه ان نمر يتزوج غير الهنوف اصلا مستحيل هالفكره واخذ نفس وهو يشرح لها الموضوع وشهقت رهف برعب: ياويلي معقوله نمر يسويها!؟
حمد: وانا وش اشرح من اليوم اقولك ماتزوجها عقد بس عليها بس عشان ابوها وبعد مايجي ابوها يطلقها
رهف: مهما كان كارثه كارثه
حمد: ندري يارهف المهم الحين هي معه بالرياض ومايبي يجيبها هنا فا أنا اقول بكره بعد مانعيد تروحين عندها ونقول انك عند اهلك
رهف : وشلون اروح لها لا والله انا مقدر مقدر اروح لوحده غير الهنوف
حمد: لا حول ولا قوة الا بالله ساحرتكم الهنوف!؟
رهف: صعب يا حمد صعب
حمد : طيب انا شرحت لك السالفه
رهف: مدري احس صعب
حمد : رهف انتي بعد لا تصيرين قاسيه مثل نمر ترا البنت مالها ذنب ابد
رهف جلست بضيق: اي والله مالها ذنب
حمد:هذا اللي انا اقوله وابيك تسكرين على الموضوع ولا احد يدري تروحين عندها ساعه ساعتين ونطلع بعدين بس عشان ماينكسر خاطرها
رهف : طيب طيب
وقف حمد بسرعه وضحك وهو يسحب نقابها وصرخت رهف : حممممد
طلع بدون مايشوفها وهو يضحك: اشتقت للوجه الصبوح بس
ضحكت رهف وهي ترجع للغرفه
_______________________.
وفي بيت ابو طارق
كالعاده البيت كان كلللله يستعدون للعيد وبما إن الرجال اقل مهام من الحريم
كان طارق بالصاله وهو كل شوي يتصل جواله ويرد وكلهم مهنئين بالعيد
والتفت على ابوه اللي جاء : اقول وينه اخوك مقباس الشر !؟
ناظره طارق بضيق :وش تبي فيه يبه !؟ راح عنكم وماسلم بعد
ابو طارق : لا انا مافكرت فيه بالعكس مرتاحين من شره لكن كل ما مريت حمد لقيته شايل قشه وطاير لحايل ذبحه وهد حيله
اخذ طارق نفس: يبه نمر وحمد واحد مافيه شي اسمه نمر هد حيل حمد لا ! حمد ونمر حيلهم واحد ينهد واحد يطيح الثاني وراه أو ! اذا ماطاح لازم يرفعه
اخذ اغراضه وطلع وهو يهز راسه بضيق ودخل وهو يشوف جود اللي جالسه تحط مناكير بهدوء وقفت وهي تشوفه متضايق : طارق وش فيك ياعيوني!؟
طارق : ولا شي كملي شغلك
جود : افاا!؟ انت تضيق وانا اجلس كذا قول من مضايقك
طارق : ابد موضوع يوسع صدرك لانكم اصلا كلكم مشتركين في كرهه نمر
هزت جود راسها بضيق من هالنمر اللي في كل مكان يطلع : يا طارق حنا ما نكرهه نكرهه تصرفاته بس انا عني من يوم تعدل وانا مالي شغل فيه
طارق : انا والله عاذره لو صار اكبر مجرم في السعوديه اللله يعينه تحمل شي مايتنحمل
سكتت جود وجلس طارق يقلب في اغراضه وهو فعلاً يعذر نمر
_______________________.
وفي بيت ابو ادهم
كان ابو ادهم كل شوي يطل متوقع نمر بيجي بس خاب ظنه والتفت على صوت بدريه: يبه وش تنتظر !؟؟
ابو ادهم: اقول يمكن نمر يجي!.
بدريه: يايبه انت وين ونمر وين نمر بحايل وزود عليه نمر حتى لو جاء تعرف ان ماله عيد ولا سعاده لين يحصل الهنوف
ابو ادهم: ياليتني ادري وينها والله لعطي روحي وارجعها له
بدريه : لا تخاف على نمر يبه ان شاء الله بيجي وهي معه ان شاء الله
دحيم الللي جاء بزعل وجلس وضحكت بدريه: وهذا دحيييييم بدت دوامته
دحيم بزعل : وقفت فوق ما شفت نمر
ضحكت بدريه: بيجي ان شاء الله
دحيم : من وين لي طرطعان!؟
ابو ادهم: تعال معي انا اشتري لك
اخذ دحيم اللي خايف بدون نمر خايف من العيال ومن كل شي
_______________________.
واذن الفجر
اعتلت تكبيرات العيد والناس تجهز ومبسوطه وفي كل بيت يتردد من سكانه التكبيرات وشعور العيد والفرحه
في الفندق
وقف نمر قدام المرايه بعد ما تجهز وهو يكبر وطلع بعد ماتعطر وهو ملامحه هاديه وتمثل فرحة العيد لكن قلبه في شي يحرقه ومنكد عليه
وقف قدام غرفة مرام مايدري كيف بيتصرف وطلعت مرام وهي أحياء لسنه ولمراسم العيد لبست وهي بس تبي تحس بالفرحه
وجمدت اول ماشافت نمر قدامها وكاااشخ وهي طول هالفتره ما تشوفه الا مشمر اكمامه وعاصب شماغه على راسه واغلب الوقت ماهو محلق لكن كان منظره جداً جميل وجذاب
لكنها تفشلت ورجعت خطوتين ورا ونمر اللي انصدم بعد فيها ما توقعها كاشخه ناظرها بهدوء وهو اول مره يشوفها كذا لكن صد وهو مهما شاف مايشوفها الا اخت
تنحنح وهو يقول : كل عام وانتي بخير والله يعيد عليك العيد واليوم السعيد
ارتبكت مرام وقالت:وانت بخير وعلينا وعليك ينعاد
رفع جواله بارتباك : خلينا نكلم ابوك الحين واروح وتنامين انتي
هزت راسها مرام بهدوء ودق نمر وابتسم اول ما وصله صوت ابو مقرن : هلا هلا يا نمر
نمر : هلابك ياعمي وشلونك وش اخبارك وش مسوي
ابو مقرن: بخير الحمدلله انت كيفك وكيف بنيتي وكل عام وانتم بخير
نمر: وانت بخيييير وهذا هي بنتك كلمها انت وتطمن عليها
عطاها الجوال وطلع واخذت مرام الجوال بلهفه: يبه وش اخبارك وكل عام وانت بخير
ابو مقرن: وانتي بخير يا حبيبي وش اخبارك
مرام: بخير جعلك بخير وش سويت يبه
ابو مقرن: انتظر يا بنتي انتي طمنيني عنك وكيف امورك عسى مافيك شي يكدر الخاطر
مرام:ابداً يبه كل شي زي ما تحب
ابو مقرن بتردد: و نمر!؟
مرام: مايقصر
ابو مقرن:يا بنتي اذا فيه شي ولا شي … قاطعته مرام ببتسامه: لا يبه والله مافيه شي ونمر زي ما انت حكيت عنه رجال ونعم الرجال مايقصر
ابو مقرن: اجل الحمدلله طمنتيني وانا بسكر بس بتصل فيك شوي سلمي على نمر
مرام:يوصل ، فمان الله يبه
سكر وطلعت مرام تعطيه الجوال ببتسامه: ابوي يسلم عليك
نمر: الله يسلمه ، تبين شي !؟
مرام: لا الله معك
يعجز يطلع نمر ويخليها لكن اصرت مرام ما تروح معه ولا تزعجه اكثر واخيراً طلع بعد ما حذرها مليون مره ما تفتح الباب
واخذ طريقه للمسجد اللي قريب بيت جده ومن يوم دخل وهو يسمع الاصوات والتكبيرات والمعايدات
وصل المسجد وصف يصلي معهم صلاة العيد بدون ما يقاابل احد
_______________________.
وفي بيت ابو الهنووف
اللي لبست ولبست فارس وجهزت ابوها وهي ما احد يجي لهم بس فرحة بالعيد
كانت معليه صوت المسجل ويكبر وابوها يناظر بهدوء وهي تبخر وتردد معه التكبيرات
وجلست ببتسامه وهي تتمنى لو انها عيدت مع نمر لو مره كان وده تشوف عيده وتستقبله بالعيد
لكن وقفت ببتسامه تسمع اصوات الرجال يعايدون على بعض وابتسمت بحزن( عاد عيدك يانمر وعاد عيدي معك)
اتجهت لابوها تسلم عليها وتعايده بعد ما صلت وتعايد فارس
وبعد شوي انهارت فرحة عيدها اول ما سمعت صوت الباب وكان ابو هذال وهذال وسلطانه
صدت بضيق ودخلوا محد سلم عليها الا سلطانه وركضت الهنوف تبعد فارس اللي دفه ابو هذال برجله
ووقف الهنوف بغضب : راعِ بطريقك ولا انعميت
ابو هذال:لا والله والله طال لسانتس يا مفتورة الحييل !؟ سلطانه وقفت بخوف: ماهو صيده ياعمي
الهنوف : الا صيدي ونص كلش الا ولدي ما احد يقرب عليه
ابو هذال ترك ابو الهنوف واتجهه لها بغضب: والله انا اعلمتس انتي وولد ابليس ذا
رمت سلطانه سلمان على هذال وركضت لعمها تترجاه مايضرب الهنوف
اما الهنوف وقفت بكل قوتها تدافع عن ولدها بس ما هي قد ابو هذال اللي ضربها وضرب ولدها وهي حاضنته ماتبي يصيبه شي من ضربه وطلع وهو يحلف الا يوريها شغلها واخذ الكل وطلع بعد ما ترك الهنوف طايحه بأرضها تبكي وتهدي ولدها وابوها يبكي والعيد كله تنكد عليهم
_______________________.
في المسجد
فز ابو ادهم اول ماشاف نمر واسرع نمر يحضنه ويعايد عليه ودحيم فرحان والكل مبسوط ويعيد على نمر اللي كان مبتسم بهدوء كعادته
ابو حمد: اشوى انك جيت والله اني شلت همك
ابو ادهم: اي والله
ابتسم نمر: جيت عشانك يا جدي طمني عنك وش اخبارك كيف ضغطك
ضحك ابو ادهم: بخير بخير مافيني شي
التفت نمر على طارق: طارق يقول وضعك صعب
رفع يدينه طارق باستسلام: والله مالي شغل جدي اللي قالي اكذب عليه
اتسعت عيون نمر بصدمه والكل ضحك
حمد : يبونك تجي ياخي
ابو ادهم: اي والله ما بلعت العيد وانت ماجيت
ابتسم نمر: تسلم ياجدي
انتقلوا للبيت وبدت دوامت المعايدات والناس والزحمه.
وفي عز الزحمه ركض دحيم على نمر بتفكير: نمر وش اقول اذا قالوا عساكم من عواده!؟
نمر ابتسم:قلهم الله يعوده علينا وعليكم بالصحه والعافيه
دحيم ركض وراح لسرور يرد عليه وضحك حمد: مبسوط دحيم
طارق: معلوم ابوه فيه
ابتسم نمر يناظره بحب وبعدها وقف: انا بروح اسلم على ابوي واخواني
ابو ادهم: الله معك
حمد: دقيقه بنروح كلنا سوا
طلعوا حمد ونمر والتفت حمد: هاه بناخذ رهف!؟
نمر: وش قالت رهف ؟
حمد: انهبلت بغت تموت علي
نمر ابتسم : قلبها على قلبي رهوف
حمد : اي والله تقول ما اروح لغير الهنوف
تنهد نمر بضحك: اجل اسمع بنروح اول شي لابوي وبعد العصر تجيب رهف وتجون
حمد : زين بروح اناديها لاني ماشفتها ابد جو مع ابوي
نمر: اصبر بجي معك اسلم عليهم
دخلوا قسم الحريم وبدوا ينهلون عليهم يسلمون وكان حمد كالعاده اخف من نمر فالسوالف والضحك
ودخل حمد بيسلم على رهف وبعدييين تسلم على نمر
_______________________.
وفي احد غرف بيت ابو ادهم
كانت رهف تعدل شكلها عشان تطلع بس فزت على صوت تصفير حمد من عند الباب وضحكه: رهوووف وش ذا يابنت الحلال
ضحكت رهف وهي تقدم: هلا هلا من العايدين والفايزين والغانمين السالمين
ابتسم حمد وهو يتقدم لها ببتسامه شاقه وجهه شق وضحك وهو يحضنها: انا والله من اللي فزت بشوفك وغنمت بوجودك بحياتي وسلمت من كل شر ان شاء الله دامك معي
شدت عليه رهف ببتسامه وابعدت: هاه كيف نيولوك
حمد : يوووه يوووه يووه شيٍ يزلزل الارض
رهف: اعجبك
حمد: وفيها سؤال الله عليك!؟
ابتسمت رهف وقال حمد: ا ا اسمعي خليني اركد شوي وتعالي عايدي على نمر عشان بنروح لاهلك وبعدين البيت يجمعنا
ابتسمت رهف:اقولك حميّد!؟
حمد : سمي جعل حميّد فداك
رهف: ما اشوفك تذكرت تيّم !؟
طارت عيون حمد بضحك وهو فعلاً نسى تيّم : لاااااا تكفين نسيت ولدي الله يسامحك يا رهوف
ضحكت رهف وهي تجيبه: ولا حق كشخته يا بابا
اخذه حمد وهو يحضنه بضحك: والله مالي شغل يا ابوك امك تجنن العقّال
ابتسمت رهف: خلك مع ولدك شوي بسلم على نمر
حمد: بنجي كلنا
طلعوا لنمر اللي ابتسم ابتسامه وسيعه لرهف اللي اقبلت منحرجه وهي تسمع نمر يقول : هلا هلا بسيدة سادات الجمال
حمد صفق من بعيد : شكرا لك يا صديقي
قربت رهف تسلم على نمر وتعايده وهي تشوف بعيونه ضيق وعرفت مصدره وشدت على ذراعه ببتسامه واتجهه نمر لحمد ياخذ تيّم وهو يحبه حييل
وانشغلوا بتيم وراحت رهف تجهز وبعدها اتجهوا لبيت ابو حمدان
_______________________ ..
وفي بيت ابو حمدان
رغم ضغط ام حمدان عليهم الا انهم يحاولون يعيدون بدون شوشره
وكان عدنان جالس بين حمدان وراكان ويقارن بين عيالهم ويضحك
واثير بجنب ابوها تقهويه ومبتسمه
وفزوا على صوت نمر اللي يقول : درررب ياولد راكان لف لاثير: ادخلي معه احد
اخذت رغد ودخلت تركض ودخلوا نمر وحمد ورهف واستقبلوهم بفرحه
والكل متعود على نمر يصبح في ديره ويمسي فالثانيه
لكن الخوف من تصادمه مع امهم
لكن ما طول نمر ووقف : انا رايح
ابو حمدان: ما جلست يانمر
نمر: والله معزوم على الغداء ومقدر اتاخر
حمد: وانا بعد
ابو حمدان: ليتكم جلستوا
سكتوا على دخول ابو عامر وابو فهد
وصد نمر: ماله داعي
طلعوا ونمر ما سلم عليهم والتفت على حمد: موعدنا بعد العصر طيب !؟
حمد: طيب
وافترقوا وكل واحد راح لمكانه
_______________________.
وبعد العصر
صحى نمر وقال لمرام ان اخته جايه وارتبكت المسكينه وهي تحاول تكون بشكل يليق بمكانها ماتبي تبالغ وكأنها عروس !؟ ولا تبي تكون بسيطه جداً كأنها مفروضه عليهم
اما نمر ماكان مهتم بالتفاصيل كان يدخن وهو قدامه الشاهي وفي عالم ثاااني سكن فيه من فتره
ودق الباب وكان حمد ورهف
ووقف نمر والتفت لمرام المرتبكه وحزن عليها بس تحرك متجهه للباب وفتحه ودخلت رهف بتوتر وهي ماتدري وش تسوي
وقال نمر بهدوء: ادخلي
رهف: حمد يقول ينتظرك تحت
نمر: زين
طلع وتركهم ورهف واقفه بحيره وجت مرام بحرج: هلابك
نزلت رهف نقابها مصدوومه من مرام كانت ملفته جداً ولا شعورياً قالت بنفسها( الله يستر بس لا تروح على الهنوف) : هلا والله
اسرعت مرام تاخذ منها تيم : عطيني لين تنزلين عباتك
كانت رهف تنزل عبايتها وتفكر معقوله نمر متزوجها عشان ابوها ! لكن خافت من الاجابه دامها بهالجمال
جلست و اخذت ولدها ومرام تقدم لها وهي محرجه وهي قالها نمر ان رهف تعرف كل شي
و رهف كانت ماهي قادره تنطق بحرف طال الصمت بينهم وهم في رسميات ومجرد سوالف سطحيه وعجزت رهف تتحمل وقالت: والله تيّم اليوم تعبان لكن اسمحي لي بروح
ابتسمت مرام وهي فاهمه اللي فيها وشدت عليها: سلامته ، لكن يا رهف انا ادري انك تفكرين اني باخذ مكان الهنوف لكن انتي تدرين بالقصه وكلها فتره لين يجي ابوي بس
تفشلت رهف : والله ماهو هذا قصدي بس
مرام: لا تقولين شي بس اقل شي خلينا نتعشى مع بعض ترا والله مونستني
رهف ضاقت عليها: ابشري
_______________________.
وفي حايل
في بيت الهنوف تحديداً وقفت وهي تمسح دموعها بقهر
وجلست قدام ابوها تعطيه ادويته وبعد ما اعطته اكله وادويته ونام راحت تشوف فارس اللي نام من البكى وهي مقهوره عليه
وجلست بحيره تفكر وتتذكر رقم اي احد غير نمر وفزت اول ما طرا لها رقم رهف ايه كأنها تذكره !؟ فزت تاخذ ورقه وقلم وكتبته واخذت عبايتها واستودعتهم الله وطلعت تركض وتركض لين وصلت عن البقاله اللي تبعد عنهم في الديره الثانيه وهي اقرب شي
استاذنت واخذت التليفون وهي تدق برجفه وتدعي انه جوالها صدق وانها ماهي غلطانه
_______________________.
وفي الفندق
كانت رهف جالسه بهدوء مع مرام اللي كانت فرحانه فيها وفي ولدها
وقامت بهدوء: جوالي يتصل
مرام: ماعليك خذي راحتك روحي غرفة نمر
راحت رهف وهي ترد على رقم غريب : الوو
شهقت الهنوف بفرح: رهف هذا انتي رهف
شهقت رهف بصدمه : الهنوف الهنووف
الهنوف بفرحه: ايييه يارهف اخيراً
رهف: انتي وينك انتي وينك نمر تكسرت رجوله يدورك عليك
الهنوف : نمر !!؟ نمر ماهو بالسجن!؟
رهف من الفرحه ماعرفت وش تقول : ايييه طلع من شهور ودورك ما حصلك
الهنوف انهارت من البكي والفرحه : وينه وينه هو عندك!؟
رهف بدون ما تحس قالت: لا ماهو عندي انا عند زوجته بالف.. سكتت بخوف وقطبت الهنوف برعب : نمر تزوج
رهف : لا لا اسم.. سكرت الهنوف بصدمه وهي ماهي مستوعبه مستحييييل نمر يسويها مستحيلل رمت السماعه ورجعت تركض لحيهم وهي تبكي بحرقه
اما رهف اللي ضربت خذها بخوف : ياويلي وش سويت يا ويلي
اخذت عبايتها وركضت ومرام مفجوعه : وش فيك رهف وش فيك
ما اهتمت رهف وركضت وهي تدور نمر وحمد وهي مفجوعه وخايفه
في الفندق تحت
كانوا جالسين نمر وحمد في اللوبي
حمد : وش بتسوي!؟ ما خلص ابو مقرن !؟
نمر: يقول ماباقي شي
حمد : هانت ان شاء الله
نمر : بتهووون اذا لقيت الهنوف
حمد : انا صراحه احسها صارت سراب
نمر :اخ ياحمد بس.. فز على جيت رهف تركض : نمر نمر
نزل حمد كوبه بخوف : وش فيك!؟؟
رهف: الهنوف اتصلت فيني
نمر: وشوووووو
حمد: شلون ومتى وكيف
رهف: اتصلت علي من رقم غريب وثابت
نمر: وينها وينها قالت وينها!؟
رهف بخوف : لا هي..
حمد: وش فيك تكلمي
رهف : كانت بتقول بس
نمر : تكلميييي
رهف بخوف :قلت لها ان عند زوجتك بالغلط
الكل سكت وفجأه صرخ نمر بقهر: وش سويتيي يا غبييييييييييه
انتشر صوته والكل التفت له وسحبهم حمد وهو يطلع بهم للجناح ونمر ما زال يصارخ على رهف
رهف: والله بالغلط
حمد: خلاص يا نمر خلاص
نمر: عطيني الرقم عطيني
اخذ الجوال وهو يدق على الرقم برجفه ورهف تبكي وحمد يناظرها بضيق
كانت مرام تسمع كلامهم ماتدري وش اللي صاير
ورد الجوال وقال نمر بخوف: الهنوف اله..
انقطع صوته اول ما سمع صوت الهندي : الو مين كلام
رمى نمر الجوال على رهف بغضب واخذه حمد قبل يوصلها: وش بلاك
غمض نمر وهو يصرخ: اذبحك الحين ولا وش اسوي
رهف : والله مادريت
حمد :الو الوو فين هذا تليفون
الهندي : بقاله
صد حمد بضيق بس قال بسرعه: وييين
قاله الهندي العنوان وسحب حمد نمر مسرع: تعال عرفت العنوان اكيد الهنوف قريبه منه
نمر :وين اودي هاذي الحين
حمد : اسمع بنحطهم عند جدي وبدريه
نمر: مافيه وقت مافيه
حمد :نكلم طارق يجي
دق حمد على طارق ودخل نمر بغضب : جهزي نفسك بتروحين مع رهف
مرام: ليييه
صرخ نمر: من دون لييييييه
والتفت لرهف بغضب: حسابي معك بعدين يارهف
خافت رهف زود وولا هي الا دقايق ووصل طارق مفجوع: وش فيكم وش السالفه
نمر : اخذ رهف والبنت اللي معها وودهم بيت جدي
طارق: من البنت
نمر: مب وقت الشرح المهم حطهم بعيونك وانتبه
حمد بهمس:زوجته المهم خذهم وبعدين افهمك المهم انتبه عليها بقوه وضعها خطير
طلعوا وتركوا طارق مصدوم رهف تبكي والبنت وكل شي حوسه
اما نمر كالعاده ما وقفت رجله عن السياره ابداً متجهه لحايل لنفس العنوان
_______________________.
وفي حايل
دخلت الهنوف البيت على صوت بكى فارس وركضت له وهي تبكي بحرقه ما توقعت نمر يسويها ولاهي مصدقه انه يسويها ومستحيييل
لكن اخر الفتره اللي عشاتها معه ما تخليها تثق فيه ابد ومشاكلهم اللي كانت مستمره
حطت يدها على راسها تبي تستوعب ما قدرت انهارت بكي وهي تدور بذهول املها الوحيد كان نمر والحين طااار
ناظرت جدران البيت بحسره كانت في كل زاويه صوره لنمر عشان ما تنساه ولا يجهله ولده
بكت وهي تقول : ضاع ابوك يا فارس ضاع املنا وتعب السنين
_______________________.
وفي بيت ابو ادهم
وبين ما الكل مجتمعين دخل طارق ووجهه جامد ما يتفسر
وقفوا كلهم يناظرون رهف اللي دخلت تبكي ومعها بنت
ابو حمد: طارق وش ذا وش فيه!؟؟
طارق رفع يدينه بذهول: مدري
ابو ادهم: وش فيه وينهم حمد ونمر!؟ صاير لهم شي
طارق: لا بس راحوا !؟
ابو حمد: نسحب من الكلام تكلم
طارق: ماقالوا شي قالوا اخذهم وانتبهه عليهم
وابو ادهم: ومن هاللي مع رهف!؟
طارق: زوجة نمر
عم الصمت والكل يناظر الثاني مفجوع مايدري وش صاير
اما رهف دخلت وهي تعطي جود ولدها
وركضت بدريه بخوف: وش فيك
ام حمد: حمد صار له شي!؟؟
ام طارق: نمر!؟
الكل التفت يناظر مرام وقالت جود: من ذي!؟
رهف ناظرتها بضيق: زوجة نمر
الكل ناظرها بذهول وقامت رهف وهي تاخذ مرام لغرفة بدريه وسحبت بدريه رهف: وش فيهم
جلست رهف بخوف وهي تشرح لهم والكل مذهول
_______________________.
وبعد ساعات في حايل
وصلوا نمر وحمد وهم هلكانين من الطريق الطويل ووصلوا على الساعه 10
واول ما وصلوا عنوان البقاله نزل نمر يركض وهو يدخل البقاله
وفز الهندي وركض نمر: وين وين الحرمه اللي كلمت من التليفون اليوم
دخل حمد يهدي نمر وقال: سلام عليكم صديق كيف حال
التفت له نمر بغضب : وقتك!؟؟
حمد طنش: صديق في حرمه اليوم اتصلت من هذا تليفون معلوم انته فين بيت
الهندي: لا مايعرف
انجلط نمر وهو يسحبه من قميصه: اقووولك وين مكانها
حمد سحب نمر يبعده: نمررر لا تنجن لا يشوفك احد ويبلغ عليك يحسبك تسرقه
نمر : يقول مدري مدري
حمد: بعد هو وش دراه اكيد ما يعرفها
حاول حمد يعرف من الهندي شي بس ما قال الا انه شافها تروح يمين
نمر: وش الدبره الحين
حمد: مدري!؟
نمر :اسمعني مالنا الا ندور بهالبيوت
حمد : لاااا انت انجنيت
نمر : وش اسوي يعني وش اسوي كفايه علي هبالة رهف
حمد: ياخي غلطت خلاص
نمر: انا رايح ادور وانت بكيفك
حمد : تعال تعال الله يصبرني عليك انا بروح يسار وانت يمين ونشوف
نمر : يلا
افترقوا ونمر قلبه بيطلع من ضلوعه وهو يتأمل بكل بيت يجيه
وحمد يدور معه وكلهم على اعصابهم
_______________________.
والكل سواءً بالرياض او حايل متوترين ومحد مستوعب وش بيسوي نمر او وش مسوي !؟
وعند نمر اللي وهو مار بين البيوت شاف البيت الغريب وتذكره وتذكر اهله بس كان مستبعده من كل خطته لانه يعرف اهل البيت ويعرف ما عند الهنوف وابوها اطفال
لكن كان وده يسوي شي يساعده ويفك ازمه وهو يسمع ان الصدقه تغير الاقدار و اخذ ظرف وهو يطلع فلوس من جيبه واتجهه للباب بيدقه
لكن جمد وبردت عظامه اول ما سمع صوت يسري به الليل صوت يعرفه زيييييين وزين بعد
_______________________.
الهنوف
اللي من ضيقة الصدر ما تدري وش تسوي وين تروح وش تعمل بعمرها مالها الا حلها الدايم حلها الوحيد صوتها
بعد ما ناموا كل اللي بالبيت طلعت تشوف الصوره الناقصه من صورة نمر ما كملتها اخذت ألونها وفرشتها بحزن وجلست عندها وهي تبكي وطرا لها تغني
وقالت بصوت يوضح كل همها وحزنها (قلب بنت سليمان وقادي …من همومه ذاب اجا كله
يا بعد حيي والاجدادي … ارحم اللي صابته علة
ان ذبحني يا حمد عادي … من يحاسب يا حمد خلة)
نزلت راسها تبكي بقهر
وهي ماتدري ان ورا هالجدار يسمعها خلها يسمعها نمر اللي كان يعرف الصوت اللي سحبه من بين اوجاعه يعررف زيييييين صوت الهنوف وتأكد اول ما قالت ( بنت سليمان)
انهبل ورا الجدار اول ماسمع ونينها وبكاها ركض للباب وهو يدقه برجفه
وفزت الهنوف بخوف ورعب وركضت تاخذ عبايتها المعلقه وطرحتها واخذت السكين وهي خايفه ورجع الباب يندق اكثر
اما نمر تصلبت يدينه عجز يرفع يدينه ومايدق دقه كان مرعب لكن ماقدر ينطق الا صوت انفاسه الحاره المرعوبه
كان منهبل مو معقوله الهنوف في هالبيت اللي يتردد عليه من شهر مستحيييييل
قال بصوت يرجف : الهنوف الهنوف !؟ انتي هنا اذا انتي هنا افتحي الباب
الهنوف من الخوف ما قدرت تميزه لكن اول ما رجع يقول : الهنوف انا نمر
شهقت وهي تحس ان صوتها اخترق ضلوع صدرها من دون ما تحس فتحت الباب
وكان نمر واقف يده متعلقه بالهوا وعيونه تراقب الباب بتوتر وفيها لمعه تشوفها في عز الظلام
رمى الظرف اللي بيده وهو يناظرها ما يشوف منها الا كفوف يدينها تقدم وهو يتعثر بخطوته: الهنوف!؟
بكت الهنوف : ابطييييت يا نمر ابطييت بالحييل لين قضى حالي
انجن نمر وركض مايبي شي الا انه يحضنها بس وقفته الهنوف بيدها وهي تبكي : لا تقرب يا نمر
انفجع نمر يناظر يدينها اللي تبعده ورجع يناظرها بخوف: الهنوف انتي وش تقولين ؟ انتي !
قاطعت الهنوف : مايصير انت مطلقني ولا ناسي
نمر هز راسه بنفي وغضب : باطل والله انه باطل انتي مجبوره وانا مجبور و
الهنوف قالت بعتب:مجبور؟؟ وانت متزوج !؟ والله اعلم متى طلعت وانا احترق واتجرع الموت وانتظرك على احر من الجمر وانت لاهي غميضة عيوني اللي راحن وانا اراعي لك
غمض نمر بقهر: لا تكفين يالهنوف كل شي الا هالكلام ومنك انتي لا والله ماهو مقبول انتي ما تدرين عني ماتدرين وش اللي صار انا ماتزوجت برضا وانتي فاهمه غلط ورهف نقلت لك السالفه غلط
ما ردت الهنوف وهي للحين تبكي وكل ما حاول نمر يقرب تمنعه
وفجأه صحى فارس على الصوت وهي يبكي والتفت نمر وعيونه من الصدمه اتسعت وارتجف صوته وهو يقول : قبل كل شي قبل كل شي من هالولد!؟
ماردت الهنوف وهي تبكي وجلست وهي مافيها حيل تشيل نفسها وجلس نمر قدامها بس بعيد : الهنوف تكفين ما عاد لي حيله ولا حيل تكفين
رفعت راسها الهنوف ببكى : هذا فارس
انهبل نمر وابعد يدينها بغضب وهو ييقرب لها مسك يدها يهزها بصدمه: وشوو فارس!؟؟ فار..
التفت للغرفه اول مازاد بكاه وقالت الهنوف بنفس الانهيار: ألحق فارس يا ابو فارس
وقف نمر بصدمه وتعثر بخطواته مليييون مره لين وصل الغرفه اللي يطلع منها الصوت شغل النور وهو من دموعه مايشوف رؤيته مغبشه شاف طفل جالس وهو يبكي وفي طرف الغرفه ابو الهنوف يناظره بخوف
قبل يوصل نمر لفارس وصلت له الهنوف اللي رفعته وهي تحضنه ببكي وتسمي عليه
ونمر تصلب على الباب عجز عجز يتحرك او ينطق او يقول شي كان ينتظر الهنوف بس وشلون تجي الهنوف ويجي معها فارس كيف عنده ولد رسمياً طاح من طوله يناظرهم وهو عيونه مغورقه بدموعها صمد كثيييير والحين ماعاد يقدر كان يوصف حاله ‏- هالسطر –
‏(أُصبت في جوفي إلى أن وصلت الإصابة لمثنى رُكبي فسقطت)
كان جالس على ركبه ومستند على يدينه ولا في عيونه الا الهنوف وولدها ولا في اذنه الا بكاهم
صحى على صوت جواله واتصاله للمره المليون ورفعه لاذنه وهو يرجف وجاه صوت حمد: نمر وينك وش صار معك انا ما لقي..
قاطعه صوت نمر المهزوز : بس انا لقيتهم ياحمد
طاح جواله منه ووقف وهو يتجهه لهم ماهو قادر يستوعب انه فجأه ومابين ليله وضحاها صار ابو
قرب يناظر فارس اللي حاضن الهنوف ويناظره بخوف ومد يده له وابعد عنه فارس
وهمست الهنوف : مايعرفك مستنكرك
اخذ نمر نفس هد صدره وهو يقول : وشلون !؟؟ ليه ماعندي خبر !؟؟ليه ماقلتي لي
الهنوف ببكى :ليييه انا لقيتك !؟ انت ما تعرف وش عشت عشان شفت هالوغد وصار بين يديني ما تعرف يا نمر شي انا طاحت عيوني على كل درب وانا اراعي لك والله يشهد علي وتشهد علي الدنيا ما مرت علي ساعه الا وانا ادعي ان الله يفك اسرك وتنهج يّمنا وتنصرنا على هالظلم .. وانقطع صوتها وبكت بونين: “لكن انا ويييييين والمعرس وييين ”
فز نمر وقرب وهو يهزها بغضب: قلت لتس انتي فاهمه غلط غلط يالهنوف!؟ ومثل ما شهد ربي عليتس شهد علي انا بعد والله والله اني ما أبات الليل ولا أقيل النهار والله اني مثل اليتيم احوم وادور عليتس بكل ديره ودرب والله من يوم اللي طلعوني فيه وانا احوس وادور عليتس والله ان حتى اسامي الاموات نبشتها بيديني والله مابقى الا احفر القبور يالهنوف
والله والله ان كل متر في حايل حفظ خطوواتي وانا اتعثر واقوم واطيح وادورتس انا حتى رمضان مر ومشى بدال ما اكون بين اهلي انا بين شوارع حايل وجدرانها ادورتس انا حفظت تفاصيل بيت هذال وابوه وانا انتظر متى يطلعون ويروحون لك
انا حتى العيد ما حسيت به ابد ولا رحت الرياض الا امس بهالوقت
كانت الهنوف مصدقته لكن ماهي مستوعبه انه تزوج : وهاللي تزوجته!؟
نمر: اجبرني ابو مقرن ماهو بيدي قصتي طويله يالهنوف
وقطع عليه اتصال حمد اللي انهبل وهو يركض ويدوره: نمر وينك
نمر وصف له وسكر الجوال وهو يناظر في حالهم بضيق: اتركيني قولي قولي وش اللي صار ليه اختفيتي وش مسوي فيك هالكلب وابوه
صدت الهنوف : وش بقى ما سوى
نمر : علميني علميني وش اللي صار
سكتوا على الباب وكان حمد وقف نمر وطلع
حمد: نمر وش صار !؟ كيف لقيتهم
نمر: بقولك القصه بس اصبر اصبر جهز السياره بناخذهم
حمد: طيب
رجع نمر : تعالي تعالي قومي نعي بنروح كلنا
سحبت يدها الهنوف بضيق : مقدر اروح معك
نمر: وشلووون ليه ليه!؟؟
الهنوف : ابوي والوضع ما يسمح
التفت نمر وهو صدره يطلع ونزل من الذهول: من متى يهمني الوضع ان سمح او ما سمح
اتجهه لابوها وهو يناظره وخاطره مكسور عليها وابو الهنوف يناظره بضيق
قرب نمر يجمع اغراضه: لا تخاف ياعم لا تخاف
طلع ينادي حمد : تعال بنشيله
الهنوف :نمر ل.. التفت نمر بغضب : انهبلتي!؟؟؟ تبيني اخليك بعد ما لقيتك معصي معصي
دخل حمد متفشل وهو يقول: حمدلل.. جمد اول ما شاف الولد والتفت يناظر نمر وتقدم نمر ببتسامه حزينه: شوف يا حمد وتخيل ان هذا فارس!؟ اشر على نفسه بإنكسار: ولدي !؟ تخيل عندي ولد بهالعمر مادريت عنه
طاحت المفاتيح من حمد بذهول:ولدك!؟؟
نمر : ايه
كان نمر يتكلم وهو يناظر الهنوف اللي ماهي قادره تشيل عينها عنه ابد ودها لو تركض وتحضنه بس ما تقدر مازال مصير طلاقهم مجهول
تنحنح نمر : تعال ناخذ عمي وبعدين نتفاهم
تقدمت الهنوف : نمر ماحنا رايحين من هالمكان
التفت نمر بغضب: تجلسين هنا وش تسوين؟؟
الهنوف قربت بهمس : اذا تصلحت الامور انهج معك
نمر: وش اموره!؟؟
الهنوف : طلاقنا!؟ وزواجك
نمر سكت يناظرها بحيره: للحين بنفس العناد
الهنوف : انت علمتني ما اتنازل ابد
صد نمر ببتسامه والتفت : لا تنهجين معي على قولتس لكن انا ماني رايح مكان
صدت الهنوف ببتسامه وهي فرحانه بشوفته
طلعت الهنوف من الغرفه وطلع نمر وراها
والتفت حمد لابو الهنوف يناظره بضيق وتنهد : ااااه يا عم الدنيا ماخلتك بحالك بعد!؟ ولا انت يهالرجال اللي تهز الارض صرت طايح على هالارض ما بيدك حيله ابد
صد ابو الهنوف بحزن وقرب حمد يبوس راسه : الله يعوضك
اما نمر طلع للهنوف وهو بالقوه ماسك نفسه لا ينفجر تقدم وهو يقول : الهنوف قولي كل شي قبل احد يجي و..
قاطعته الهنوف بضيق: ابشرك محد يجي
قرب نمر وهو يهز راسه: والله والله والله يالهنوف لأخذ حق هالصوت الكسييير قبل كل شي
رفعت الهنوف راسها تمسح دموعها : وهذا اللي رجيته طول هالسنتين
قرب نمر ياخذ فارس بشويش: عطيني اياه عطيني يمكن يلم ضلوعي شوي
عطته الهنوف واخذه نمر وهو يحضنه بكل قوته واخذ نفس يشمه كانت هي هي نفسها الريحه عطر الهنوف هو نفسه عطر فارس
وابعدت الهنوف تشوف نمر اللي جلس على الارض بدون بساط وفارس بحضنه يناظره مستغربه ونمر اللي يمسح دموعه كل ثانيه وهو يضحك له ويتأمله كأنه معجزه
ابعدت اول ما طلع حمد ينادي ووقف نمر بفارس وراح له وابتسم حمد بذهول : نمر انت صادق!؟؟ هذا ولدك نمر: ايه
حمد: وليه ما ندري عنه؟؟؟
نمر: مدري ياحمد
قرب حمد بياخذه وبكى فارس وغمض نمر بضيق:ما يعرفنا وخايف
حمد: ليه ما تبي الهنوف تجي
نمر :تقول الطلاق وتقول زواجي
حمد صد بضيق : الله يصلح رهف
نمر راح وهو يعطيها فارس : تعالي قولي لي كل السالفه
طلعت الهنوف ونمر واقف متكتف وحمد طلع لسياره
وبدت الهنوف تقول لنمر كل شي من الساعه اللي انسجن فيها ألين حملت ووللي صار وولدت وكل العذاب ألين هاليوم وفز نمر بقهر من اللي سمعه : انتي!؟؟ يسوي فيك هالكلب كل هالسوايا !؟؟ لييه ليه ساكته لييه!؟؟
الهنوف ببكى:عشان ابوي وولدي وعشاني احتريك
نمر: والله مايسلم هالكلب والله
الهنوف ماردت وهي تبكي ونمر يفور من الغضب والقهر : قومي قومي الحين تروحين معي قومي
الهنوف: بجلس هنا لين تثبت ان الطلاق باطل
ضرب نمر الجدار بغضب وهو يسمع صوت الاذان اذان الفجر ووقف وهو يقول : انا اربييهم انا
طلع وهو يقول : قفلي الباب زين لا تفتحين لاحد
طلع وهو يركض لحمد الغافي وفز: وش صار وش صار
نمر: اول شي لازم اثبت ان طلاقي للهنوف باطل كيف!؟؟
حمد : هو شكلياً باطل بس لازم يثبتونه المحكمه
نمر: طيب كيف!؟
حمد: اول شي نقولهم انكم كلكم مجبورين !؟؟ وان الهنوف كانت حامل !؟ وانك كنت مسحور في غير عقلك وكنت اقرب للجنون وبعدين نقدم الاتهامات لعمها ابن الكلب
نمر : ااااه ااه يا هالكلب والله والله لاخذ عمره
حمد: لا قول بتروح بيته وتتهجم عليه ؟
نمر: لا بصفق له وارجع
حمد: خبل انت ناقصين بلاوي نمر ترا الثالثه ثابته اركد وانا اخذ حق الهنوف بدون مشاكل
نمر: لا والله معصي يا حمد معصي والله لتعلم هالعصا على ظهره وظهر ولده
حمد: اول شي هالاسبوع ما تقدر تسوي شي
نمر: ليه!؟؟؟
حمد: المحاكم والدوائر الحكوميه ماتداوم الحين لا تنسى عيد
نمر: خيييير!؟؟ تبيني انتظر اسبوع !؟
حمد: انتظرت كل هالمده بتموت من اسبوع
نمر: مقدر ياحمد مقدر
ضحك حمد وقرب يحضن حمد: اول شي قرة عينك يابو فارس
ضحك نمر اول ما استوعب انه لقاهم وهو يشد على حمد لكن تحول الضحك بكى عظظيم
_______________________.
وفي بيت ابو ادهم
الكل كانوا ينتظرون خبر محد نام ولا احد فاهم وش السالفه واتصلت مرام على ابوها وهي خايفه ولا اذن الفجر الا هو في مزرعة ابو مقرن
ووقف طارق : ابو مقرن؟؟
وقفوا ابو حمد وابو ادهم والكل يناظره دخل بضيق: وين بنتي!؟؟
طارق: ياعمي استريح بنتك داخل وفي الحفظ والصون بس بننتظرر نمر !
ابو مقرن: نمر اذا جاك نمر سلم عليه وقله إني اخذت امانتي
ابو ادهم: يا ابو مقرن اجلس اجلس وافهم الموضوع
ابو مقرن: مشكور ناد لي بنتي ياطارق
تحرك طارق وهو مايدري كيف بيتصرف
وعند رهف كانت تكلم حمد اللي ماقال اي تفصيل الا انهم حصلوا الهنوف وبس
ووقفت رهف على صوت بدريه اللي دخلت بهدوء: مرام ابوك برا
فزت مرام تلبس عبايتها ووقفت رهف: لا تروحين تكفين نمر بيقلب الدنيا علي اكثر
مرام: لا تخافين هذا هو اتفاق ابوي ونمر مشكورين
طلعت بسرعه وهي فرحانه ان نمر حصل الهنوف بس ماتدري وش بيصير مع ابوها ونمر
شافت ابوها واقف واسرعت له وتقدم يحضنها: انتي بخير؟؟
مرام: بخير بخير يبه ابشرك نمر حصل الهنوف
ابتسم ابو مقرن برضا : حمدلله حمدلله
والتفت على ابو ادهم وابو حمد وطارق: قرة عينكم
طارق: عمي اجلس الله يخليك اقل شي لين يكلمنا نمر انت من غير شي تعرف جنانه
ابو مقرن ضحك: ماعليك اعرفه ويعرفني ماعليك يلا فمان الله
طلع وكأنه مادخل والكل يناظرون بعض
ابو حمد: انا في دوامه ماني فاهم شي
ابو ادهم: انا بموت والسبب فعايل نمر اللي مايندرى وش تاليها
طارق تكتف وهو شايل هم نمر
_______________________.
في حايل
رجع نمر وهو يقول لحمد يروح يرتاح لين يعرف كيف يتصرف
حمد: حلفتك بالله ما تسوي شي يضرك
نمر: طيب
حمد: وبعدين بتنام وين انت!؟
نمر: بنام هنا ان شاء الله انام على هالعتبه لكن ما اخليهم لحالهم لو اموت
ضحك حمد: زين زين براحتك
نزل نمر وهو حتى جواله مايدري وينه دق الباب من جديد وقلبه يدق
اما الهنوف اللي من يوم طلع وصلت وهي تبكي وتضحك بنفس الوقت ماهي مستوعبه ان نمر فيه ماهي مستوعبه
فزت على دقت الباب وركضت وفتحته بعد ما تغطت
وقطب نمر بعتب وذهول: ما قلت لا تفتحين لاحد!؟ رجعت الهنوف بفشله : محد بيجي غيرك
ابتسم نمر ببتسامه واسعه وهو خاطره يحضنها: والله ان هالطلاق باطل والله
تكت الهنوف على الباب وهي مبتسمه لكن قادره تحكم في صوتها : نشوف وش يقول القاضي
نمر : ما تخافين الله تبيني انتظر اسبوع
الهنوف ببتسامه: انا احتريتك سنين
تكتف نمر وهو مستعد يرسم ملامحها وحافظها ويعرف وش هي تعابيرها :وانا عديت ثواني هالسنين كلها
اختنق صوت الهنوف من العبره والفرح وقالت: ليه ما نهجت مع حمد ليه جيت ؟
قرب نمر يهمس: صح كنت شبه مجنون بس ماوصل جناني اروح واخليك وانا توها الدنيا صارت بخير بعيوني
الهنوف اخذت نفس مليان حُب وهي للحين ما تعرف قصة زواجه وعتبها الوحيد عليه ( شلون يقول مجبور ونمر عمره ما احد اجبره) : لكن البيت ضيق وين تبي تنام
نمر: اذكر ان عيونك كانت تشيلني اذا ضاقت الدنيا وش عاد لو ضاق البيت
الهنوف بعتب: بس ما عدت انت لحالك صار برقبتك احد
فهم نمر عتبها وضحك : ما احد برقبتي الا انتي وولدي
الهنوف وهي للحين مبتسمه : واللي بذمتك!؟
نمر رفع يدينه باستسلام : امانه وبس
الهنوف : بتعلمن وش قصته!؟
نمر: بعلمتس بس ماهو على هالعتبه!؟ ( درج الباب)؟
الهنوف ابعدت وفتحت الباب ودخل نمر وهو ماهو قادر يتمالك ابتسامته
راحت الهنوف وتركته ووقف نمر يراقب البيت وفجأه طلعت الهنوف وانتشرت ريحة الشاهي بكل المكان والتفت نمر ببتسامه : هلا ياجامع على الود قلبين
نزلته الهنوف بضحك وهي كانت تنتظر اللحظه اللي بترجع هاللحظات بينهم
وجلس نمر ومدت له الهنوف فنجاله لكن اختفت ابتسامة نمر يناظر اثر الابر بأصابعها ارتجف جسمه اول ما تذكر حلمه واعتدل وهو يمسك يدها بخوف : الهنوف
سحبت الهنوف يدها بشويش وخجل
نمر : وش ذا !؟ من مسوي فيك كذا؟
نزلت راسها الهنوف بضيق: ابد كنت اصرف على بيتنا وابوي وولدي من الخياطه واطرز الملابس اللي يجيبها الخياط والابر لازم تأثر في اصابعي
ضاق صدر نمر بغضب ووقف وهو وده ياخذ نفس ابو هذال مسكت الهنوف طرف ثوبه: نمر تكفى يا عزوتي لا تبلي نفسك بوه
ومثل تأثير هالكلمه على نمر اول مره انعاد هاللحظه واتبخر غضب نمر وجلس : ابشري ابشري لكن الحين بس
الهنوف ابعدت : الحين دورك تعلمن وش قصته هالزواج
اعتدل نمر يشرح من جديد قصة هالزواج ويحلف ويكرر انه ما يجمعه بمرام الا عقد وانه ما يشترك معها حتى بالاكل
ابتسمت الهنوف بثقه ورضا وهي تناظر شروق الشمس اللي جاء وقته الحيييين ولا كانت الشمس بس تشرق!؟؟ كانت حياة نمر تشرق من جديد وأمل الهنوف اشرق من جديد
اخذت نفس وهي توقف والتفت نمر: وين بتروحين
ناظرته الهنوف بضحك: الظاهر اشرقت الشمس على الدنيا وغربت بعيونك
( وهي تقصد ان لون عيونه بدا يطغي عليه اللون الاحمر وبدت ترتخي جفونه من التعب وهو من ليلتين ما نام)
وضحك نمر: الله يسامح اللي كان السبب
الهنوف: بجهز لك فراشك تنام
دخلت ونمر يهدي قلبه وهو ماهو مهتم بالدنيا تقوم تقعد تحترق ماهي فارقه
ورجعت الهنوف وهي للحين متغطيه ماشافها نمر : يلا
وقف نمر مبتسم وهو ماوده يغمض عيونه بس انهد حيله من التعب وانسدح بغرفه صغيييره وضيقه بس يحسها بسعة الدنيا عنده وغفى على طول
وطلعت الهنوف وهي تناظر مكانه له اثر فيه حتى بريحة العود والمسباح والعصا والشاهي
_______________________.
وفي بيت ابو ادهم
بعد ما طمنهم حمد الكل راح ينام بتعب الا رهف اللي انهبلت وهي ماتدري وش سوت بحياة نمر
كانت جالسه وهي خايفه وفزت على اتصال حمد وردت : حمد
حمد : ياعيونه
رهف: حمد تكفى قلي وش صار!؟
حمد : كل شي بخير ماعليك
رهف: نمر حصل الهنوف صدق
حمد: ايه ووحصل معها غنيمة عمره
رهف : وشلون يعني !؟
حمد: تخيلي الهنوف حامل وجابت ولد وسمته فارس ولا احد عرف منا عنها شي
شهقت رهف : ايششش
حمد: اللي سمعتيه
ضربت خدها : ياربييي ياربي ماني مصدقه وانا وانا خربت كل شي
حمد : لا لا ماعليك بيحل نمر الموضوع وبعدين الغلط إنا ماحذرناك
رهف: مايحتاج انا الغبيه
حمد: افا يا رهوف هذا كلام تقولينه عن نفسك وبعدين قلت لك كل شي بخير لدرجة اني نايم بالفندق لحالي ونمر عند اهله
ابتسمت رهف بفرح: حمدلله يارب حمدلله
حمد: حمدلله المهم انا تعباااان وبنام اذا صحيت بكلمك او مدري يمكن انشغل مع نمر شوي
رهف: طيب نوم العوافي وطمني طيب
حمد: طيب
سكرت رهف وهي بتموت من الفرحه والذهول
_______________________.
في بيت ابو الهنوف
كانت الهنوف تاركه كل شي وراها وجالسه تتأمل نمر النايم اللي كان مرتمي بتعب كأنه ميييت ماهي قادره تشبع منه ابد طلعت على صوت بكى فارس وهي تبي تسكته قبل يصحى نمر
اما نمر كان غاااااارق بأحلامه وماوده يصحى منها يخاف يصحى ويطلع كل شي حلم لكن فتح عيونه على بكى طفل وفز يناظر حوووله المكان غريب !! اتسعت ابتسامته اول ما تذكر انه فعلاً حصلهم اخذ اغراضه بسرعه وطلع وهو يدور الهنوف سمعت الهنوف صوته وابتسمت وهي تلبس عبايتها وطلعت وزفر نمر بضيق: للحين على هالعبايه
ضحكت الهنوف : ناخذ احتياطنا
تنحنح نمر وهو يقرب : ماعليه تهون
الهنوف : اجلس بنزل الغدا الحين
نمر جلس بتعب : انا والله مشتاق لكل هالحفاوه
ابتسمت الهنوف بدون ماترد وهي بس تبي تتأمل طلع فارس االلي يحبي ونزل نمر لقمته يناظره ببتسامه وقف واتجهه له بعد ماغسل وهو يشيله وفارس يناظره ويمرر يده على وجهه نمر المستسلم ومبتسم لكن نزله اول ما تذكر شي لازم يسويه
واخذ اغراضه وقالت الهنوف بهدوء: وش بتسوي الحين!؟؟نمر امانه لا تسوي شي يرجعك لسجن!
ابتسم نمر: ماعليك انا بأخذ حقك بس انتبهي لنفسك واذا صار شي اتصلي علي
الهنوف : طيب
طلع نمر مسرع للفندق وهو لازم يحل هالشي
_______________________.
في الفندق
كان حمد وسلطان متقابلين وحمد يروي لسلطان القصه كلها وسلطان متكتف بذهول : عمري ما تخيلت بيكون هذا الموقف !؟؟
حمد : اللي يكسر الظهر ان عنده ولد يا سلطان وياسبحان ربي لو تشوفه تقول نمر جالس قبالك
سلطان: بس اتوقع ان هذا اعظم تعويض !؟
حمد : اي والله
سلطان: طيب عرفت قصتها وشلون اختفت!؟
حمد: لا نمر ما حكى كثير كان مختبص وكأنه صاحي من غيبوبه
سلطان: محد يلومه والله
لفوا على صوت الباب ووقف حمد وفتحه وابتسم: الطيب عن ذكره
دخل نمر مبتسم: شكلي بصير حديث الساعه
ضحك حمد: اوووه
دخل نمر : حمدلله سلطان هنا جيييت وجابك الله
وقف سلطان واتجهه له يسلم عليه ويهنيه وجلس نمر بتعب وهو يسحب بكت الدخان بتعب: انا احس اني احلم
ضربه حمد على فخذه بضحك: ابد انت في معمعة الواقع
سلطان: هاه الوجهه مسفهل اليوم
نمر: افا يا سلطان وشلون يتكدر
حمد: هاه كيف الامور اليوم!
نمر: ماشيه لكن قبل اي شي دام الوضع يبي له انتظار خلنا ننشغل بشي ثاني
سلطان: وشو !؟
نمر: بنشتكي على ابن الكلب ابو هذال
حمد : طيب!؟؟ وبتشتكي على وشو !؟
نمر بإنفعال : اشتكي على وشو كل هذا وبعد تسأل!
سلطان: نمر هدي وقلنا وش القصه
وقف نمر بقهر: انا اذا ما اشتكيت والله لذبحه
حمد: طيب بس قلنا وش اللي سواه
نمر بدا يقولهم اللي سواه واجباره للهنوف واختنق صوته وقال: وفوق سواد وجهه راميها بديره مقطوعه بلحالها مع ابو مريض وحامل وتعبانه ولا يجي ولا حتى يطل!؟ اجل الهنوووف تولد في بيت مهجور!؟؟ ولحالها!؟ وولدي ينولد مجهول!؟ في خرابه!؟؟
سكتوا حمد وسلطان بصدمه وكمل نمر: وليته يوم عرف سوا شي لاا خلص الموضوع في نفس المكان وتعمد يخفيه عني ولا حتى رحمهم واخذهم لمستشفى!؟
حمد : هالواااطي!؟
سلطان: تعوذ من ابليس يا نمر
زفر نمر بأنفاس مليانه دخان وقهر: وليته على هذا!؟ انا ولدي يتصدقون عليه الناس!؟ وولدي ينام جيعان وبردان ؟ وزوجتي تنضرب وتنهان؟؟ اخر البلاوي تشتغل الهنوف عند خياط!؟ عشان تعيش نفسها وولدها والسبب هالكلب لكن والله والله ما اخليها له هالكلب
حمد: اجل اسمع تشتكي عليه الهنوف وانت تقدم شكوى وهاذي لحالها قضيه ومن بعدها بتطلع فضايحه شوي شوي
سلطان وقف :اسمع اجل انا صاحبي ضابط بكلمه بالموضوع ويساعدنا هو بعد
نمر مسح وجهه برضا: زين زييين اجل نبدا قبل يسوي شي
حمد : يلا يلا اخذ الهنوف وحنا بنلحقك
سلطان: يلا
وقف نمر بس قال حمد: نمر دقيقه في شي ثاني
نمر: وشو !؟
حمد بتردد: كلمتني رهف قالت ابو مقرن جاء واخذ بنته وراح
التفت نمر وعيونه متسعه بذهول: وشو!؟؟
حمد : ايييه ومحد يدري وين راح
لف نمر يدور جواله بذهول : ياربي وش هالمصايب
سلطان: وش سالفته!؟؟
حمد: افهمك انا اصبر
نمر: بروح يمكن رجع بيته
طلع نمر مسرع وهو ضايق ومتفشل من ابو مقرن مهما كان هو عطاه امانه وعمره ما بخل على نمر بشي ويوم جاء وقفت نمر اختفى

لقراءة باقي فصول الرواية أضغط على (رواية نمر والهنوف – لا غلاك اكبر ذنوبي ولا قلبي نبي)

البارت الثاني والعشرون

اترك تعليقاً إلغاء الرد