رواية حكايات حور ويوسف كاملة – جميع الفصول في مكان واحد | بقلم سلمى شريف

رواية حكايات حور ويوسف كاملة – جميع الفصول في مكان واحد | بقلم سلمى شريف

رواية حكايات حور ويوسف هي واحدة من الروايات الرومانسية المميزة جدًا التي نشرها مؤخرًا، وتعتبر من أفضل وأشهر الروايات التي تم نشرها مؤخرًا وهي رواية للكاتبة الموهوبة والمميزة سلمى شريف.

رواية حكايات حور ويوسف الفصل الأول

_ازيك يا حور.
بصتله بتردد لكني رديت برسمية _الحمدلله.
بعدت عن الترابيزة الي كنت قاعدة لوحدي عليها و وقفت قدام البوفيه علشان اشغل نفسي
لكن حمزة جه ورايا و قال _عرفت انك اتطلقتي من يوسف، على قد ما حزنت عليكي لكن في نفس الوقت كنت مبسوط و اعذريني و انا بقول كده.
بلتفتله و بقول بهدوء _من فضلك يا حمزة انا مش حابة اتكلم عن الموضوع ده.
حاولت امشي تاني لكن حمزة كان مُصمم يضايقني ف قال _انا عايز اتجوزك يا حور، هستنى شهور العدة تخلص و هاجي اتقدملك، يمكن في الاول معرفتش اخليكي ليا لكن دلوقتي الفرصة بقت في مصلحتي.
كنت لسه هصده تاني لكن يوسف فاجأة ظهر و لـ ـكمه في وشه و هو بيقول بغضب _فرصة ايه يا روح امك.
شهقت بصدمة و حاولت ابعد يوسف عن حمزة لكن لا حياة لمن تنادي
ضربوا بعض والاتنين اتأذوا و الفرح اتقلب لخناقة كبيرة و الكل كان بيحاول يبعدهم عن بعض حتى العريس اخو يوسف
انا و يوسف اتطلقنا من اقل من شهر بعد مااتخانقنا بسبب عنادنا
كنا عايشين قصة حب جميلة الكل بيشهد عليها، كانت في الحلال طبعًا لأن يوسف لما اتقدملي مكناش نعرف بعض، وكتبنا الكتاب بعد خطوبة اقل من سنة علشان اعرف اخد راحتي اكتر وميكونش علينا ذنب لما نتكلم ونخرج سوا
خلال فترة كتب الكتاب حبي ليه كان بيكبر اكتر، قعدنا على الحال ده لمدة سنة كاملة وبعدها كان فرحنا،
سافرنا شهر عسل وكنت بعيش احلى ايام حياتي معاه، يوسف كان راجل كويس اوي والف بنت تتمنى ان شريك حياتها يكون زيه،
لكن بعد تلات سنين جواز اتطلقنا،
وانا هنا دلوقتي في فرح صحبتي الي لسوء الحظ اتجوزت اخوه،
كنت عارفه اني هقابله انهارده علشان كده مرضتش اروح لكن مقدرتش اعمل كده علشان صحبتي متزعلش خصوصًا انها كانت اقرب صاحبة ليا و هى كالآتي.
بعد الخناقة دي بصلي بغضب و قال _امشي قدامي.
بصتله بتردد لكن بسبب نظراته وغضبه خوفت ومشيت فعلًا
طلعنا برا القاعة تمامًا
فتح عربيته و قال _اركبي.
قولتله بغضب طفيف _لا طبعًا مش هينفع، انا وانت مبقاش يجمعنا حاجه يا يوسف.
على صوته و قال_بعد كل الي كان بينا جاية تقولي بسهوله ان مفيش حاجه بتجمعنا.
عليت صوتي اكتر ورديت عليه _كل الي كان بينا انتهى ساعة مانت طلقتني.
سكت شوية و كملت بحزن_لما قولتلي انتي طالق ومشيت يا يوسف من غير حتى ماتبص وراك، مهمكش اي حاجه غير نفسك، كنت فاكرة ان دي مجرد خناقة وهتعدي وقعدت مستنياك اليوم ده كله من غير مايغمضلي جفن، بس اتفاجأت ان تاني يوم بابا بيتصل بيا وبيقولي انك بعتله ورقة طلاقي.
شوفت في عينه نظرة ندم لكن في لحظة اتغيرت وقال بعصبية _ده مش معناه انك تُقفي تتكلمي مع الواد ده، احترمي شهور العدة على الاقل.
ابتسمت بسخرية _هى دي الحاجه الوحيده الي لفتت نظرك!
مشيت من المكان كله ودموعي على خدى وانا بفتكر كل مُعاناتي
ويوسف كان واقف باصص عليا من بعيد لحد مااختفيت من انظاره
يُتبع..
لو وصلتوا لحد هنا متنسوش تصلوا على النبي وتقولولي رأيكم

رواية حكايات حور ويوسف الفصل الثاني

_مبروك، انتي حامل!
ضربات قلبي عليت وحسيت ان الدنيا بتلف بيا
مكنتش قادرة استوعب الخبر
الدكتورة حست بيا و طبطبت عليا وعلى وشها ابتسامة _متقلقيش ياحور، كل الناس في الاول بتبقى خايفه ومتوترة بالشكل ده.
حسيت فاجأة اني هديت وضحكت بفرحة _انا حامل في الشهر الكام يادكتورة؟
_انتي لسه في الاسبوع التاني، حاولي متبذليش اي مجهود طول الاشهر الاولى، وهكتبلك على شوية فيتامينات ياريت تستمري عليها.
هزيت راسي بالموافقة وانا بالي مشغول وبفكر في ردة فعل يوسف لما يعرف
روحت البيت اخيرًا ولقيت يوسف في البيت
قولتله بدهشة _انت رجعت امتى؟
رفع حاجبه وقالي _المفروض انا الي اسأل كنتي فين من غير ماتقوليلي!
ابتسمت بحماس وقعدت قدامه _انا عايزه اقولك على مفاجأة.
هز راسه بابتسامة _انا كمان عايز اقولك على حاجه ياحور.
_طيب قول الاول يلا.
_مبحبش لعب العيال ده يا حور، خلصي.
هزيت راسي بعناد _يلا علشان انا متحمسة اوي.
اتنهد وقال _انا جالي شغل برا مصر والمفروض اسافر كمان يومين.
اللمعة الي في عيوني انطفت وسألته باستنكار _هتسافر؟
هز راسه بتأكيد _دي فرصة شغل متتعوضش يا حور، هقعد هناك سنة واحده وبعدين هاخدك معايا ونكمل بقية حياتنا هناك.
_وعيلتي وعيلتك؟
_متقلقيش هننزل زيارات ليهم كل ٦ شهور نقعد اسبوعين وبعدين نرجع تاني.
_الموضوع مش بالسهولة دي يا يوسف! ازاي تاخد قرار زي ده بالسرعة دي، انت جاي تسألني عن رأيي ولا بتحطني قدام الامر الواقع؟
قرب مني وباس ايدي وقال بهدوء _انا هعمل كل الي انتي عيزاه يا حور، ولو مش عايزة السفر ولا الشغل ده يبقى في داهية، اهم حاجه انتي تكوني مرتاحة وموافقة.
ابتسمت وقولتله _انا حامل يا يوسف.
اتصدم وفتح بؤقه بصدمة ف ضحكت على منظره _احلفي!
رفعت حاجبي وقولت بهزار _تؤ زمان ماما قالتلي ان الحلفان حرام.
صرخ وقال _انا هبقى اب.
كان بيرددها كتير وسط ضحكاتي وفرحته.
♡♡♡
بعد سبع شهور
كلمت يوسف اكتر من مره لكن مكنش بيرد
اتنهدت بتعب ف ماما قالتلي _اقعدي يا حور وبطلي قلق، غلط على الحمل يا حبيبتي.
قولتلها بتوتر _مبيردش عليا ياماما من الصبح، ازاي مقلقش عليه!
_اكيد عنده شغل كتير، هيخلص ويكلمك.
هزيت راسي وانا بحاول اصدق ماما
وبالفعل مش بيعدي الا دقايق قليلة وبيتصل يوسف عليا
برد بسرعه _يوسف، انت كويس!
بيجيلي صوته المرهق _ايوه ياحور انا الحمدلله كويس، طمنيني عليكي وعلى مريم.
حطيت ايدي على بطني وقولت بابتسامة _احنا الاتنين بخير، بس ست مريم قالتلي انك وحشتها.
بيسكت شوية وبيقول _انا مش هعرف انزل مصر الفترة الي جاية خالص ياحور.
_الدكتورة قالتلي ان لسه فاضل شهر ونص بحالهم.
_لا ياحور، انا محتاج اقعد سنة كمان هنا من غير ماانزل مصر.
_سنة كمان!
الايام الي بعدها كانت مليانة حزن وكآبة
ماما جت وقعدت معايا في شقتي عشان اخر شهور الحمل
لكني كنت محتاجاه هو يكون جنبي مش حد تاني
في نهاية الشهر التامن حسيت بألم جامد في بطني وروحت بسرعه للدكتورة وقالتلي الكلام الي وترني _لازم تدخلي العمليات فورًا.
معرفش فات قد ايه لكن لما فوقت لقيت يوسف جنبي
كنت فاكرة انه خيال لكن اتأكدت لما اتكلم بخوف _انتي كويسه ياحور.
هزيت راسي بتعب وقولت _انت نزلت مصر علشاني انا ومريم؟
لقيت فيه دموع بتنزل من عيونه ف قولتله باستغراب _انت بتعيط يا يوسف؟ ايه الي حصل! مريم فين؟
مسح دموعه بسرعه وقال _انتي عارفه اننا طالما مع بعض هنقدر نعدي اي حاجه وحشة بتحصل صح؟
_رد عليا يايوسف! مريم فين؟ بنتي فين يايوسف؟
اتنهد بحزن وقال _مريم راحت لربنا ياحور.
حسيت بصوت نبضات قلبي بيعلى، قولتلع بصوت خافت _انت بتقول ايه يا يوسف؟ ازاي تقول على بنتنا حاجه زي دي؟!
التقبل مكنش حاجه سهله بالنسبالي، صرخت وعيطت وطلعت كل غضبي وحزني في يوسف، الي كان مستحمل كل حاجه من غير مايمل.
لكن في يوم بكون قاعده لابسة اسود كالعادة
بيقعد جنبي و بيقول بهدوء _لحد امتى هتفضلي كده ياحور؟
انتي مشوفتهاش حتى.
بصتله بغضب وقولتله _انت السبب!
بصلي بنظرات مش مفهومة فكملت _الدكتوره قالت انها ماتت بسبب حزني طول فترة الحمل والي كنت انت السبب فيه، كنت مستنياك بفارغ صبر وانت بمكالمة واحده هديت كل حاجه بأنك مش هتعرف تيجي! عاجبك الشغل برا؟؟ سافر تاني يا يوسف.
رد عليا بضيق _انتي بدأتي تخبطي بالكلام ياحور، بقالي ايام ساكت وعامل حساب انك لسه مصدومة بس كفاية كده!
_هتعمل ايه يعني! هتطلقني مثلًا؟؟ طلقني يايوسف!
_انتي طالق ياحور.
بصتله بصدمة وشوفت على ملامح وشه التردد
دموعي نزلت لوحدها لكنه مشي بسرعه من غير مايبص وراه حتى
ومن بعدها بعتلي ورقة طلاقي عند بابا
بفوق من شرودي وشريط ذكرياتي لما بوصل البيت
مش بيكون في حد في الصالة ف بدخل اوضتي مباشرة، بطلع بوكس صغير محتفظة بيه وبفتحه وبطلع منه صور كتير ليا انا ويوسف، ببتسم بحزن وانا بتفرج على حياتنا الي اتدمرت في يوم وليلة، والصورة الاخيرة بتكون لسونار فيه الجنين، بتنزل دمعة من عيني وانا بحضن الصورة لكن بخبي البوكس بسرعه لما بتدخل ماما عليا_ اليوم كان كويس ياحبيبتي؟
بهز راسي بتأكيد ف بتقول _مخبية عليا ايه بس ياحور؟
يوسف كان هناك صح؟
مبردش ف بتحضني بهدوء وبقعد اعيط وهى تطبطب عليا لحد مانمت زي الاطفال بالظبط..
يُتبع..

رواية حكايات حور ويوسف الفصل الثالث

_يوسف كلمني وقالي انه عايز يُردك.
ابتسمت بسخرية وقولت _هو لسه فاكر؟
اتنهد بابا وقال بهدوء _لو مش عايزة يا حور محدش هيضغط عليكي ياحبيبتي، دي حياتك انتي، بس متنسيش ان يوسف ده الي كنتي بتحكيلي انك مبسوطة جدًا معاه، وانه ده الي كنتي بتتمنيه طول حياتك، مش كده؟
سكت وانا مشوشة فقال بابا _فكري براحتك ياحور، وهو بكره هيجيلنا زيارة.
هزيت راسي ودخلت اوضتي بعد مااستأذنت من بابا
للحظة حسيت اني عايزه اتصل بـ “مريم” صاحبتي القديمة
دورت على رقمها وانا بتمنى من جوايا انها متكونش غيرته بعد السنين دي كلها
اتصلت بالرقم وكان بيرن بس محدش رد
يأست وقررت اقفل لكن فاجأة بترد
بحط الموبايل على ودني تاني وبسمع صوتها وهى بتقول _السلام عليكم.
ببتسم بفرحة _وعليكم السلام ورحمة الله وبركاته.
بتسكت للحظات قبل ماتقول _حور؟
هزيت راسي وكأنها قدامي ف بتقول _مش معقول! عامله ايه ياحور في حياتك، طمنيني عليكي ياحبيبتي.
بضحك بهدوء وبقول_ لسه زي مانتي يامريم متغيرتيش، انا الحمدلله بخير، انتي فين دلوقتي يامريم؟ لسه ساكنة في اكتوبر؟
سمعت صوت ضحكاتها وهى بتقول_تخيلي انا اتجوزت من سنتين وبرضو لسه عايشه في نفس المكان مع اختلاف البيوت.
قولتلها بهزار _الي يحتفظ برقم بقاله السنين دي كلها تفتكري هيقدر يغير المكان الي عاش فيه طول حياته؟
_النصيب والله كده، والرقم ده في موبايل قديم مركون بقاله كتير وسبحان الله طلعته عشان اشحنه امبارح وكأني كنت حاسه انك هتتصلي بيا.
_انا محتاجة اقعد معاكي يامريم، محتاجة اشكيلك همي لو لسه هتسمعيني زي زمان، ولو مش زعلانه من غبائي زمان، واني فرطت في اخت وصاحبة زيك.
_انا عمري مازعلت منك ياحور، ويمكن كل ده كنت مستنياكي تتصلي بيا تاني، واديه حصل اهو الحمدلله.
كنت مبسوطة اوي اني كلمت مريم من تاني، اتعرفت عليها في ثانوي ودخلنا مع بعض نفس الكلية، اهلها كانوا عارفيني واخواتها البنات اخواتي والعكس برضو، كل اسرارنا كانت مع بعض، كانت زي اختي بالظبط، لحد مادخلت بينا بنت اسمها منة
فرقت بينا وخلتني ابعد عن مريم، مريم حاولت تصلح الي دمرته منة، وحاولت تفوقني وكانت بتحاول بكل الطرق انها ترجع صداقتنا
لكن انا كنت بهدها بايدي لحد مابعدنا نهائي ولقيت نفسي وحيدة من تاني
كل مره كنت بحتاج حد يسمعني مكنتش بلاقي، كنت بحكي لماما او اسكت، وندمي كل يوم بيزيد،
لكن لسبب ما حسيت ان كفاية كده، يمكن متأخرة سنين، لكن بالنسبة لمريم ان تأتي متأخرا خير من الا تأتي ابدًا.
اتقابلنا فعلًا في نفس اليوم وحكيتلها عن يوسف وتشتتي
نصحتني كتير وفضلنا نتكلم لساعات طويلة كأننا كنا في الجامعه سوا امبارح.
تاني يوم
جه يوسف وقعد في الصالون مع بابا
كنت في اوضتي وقتها وبعد فترة قليلة نداني بابا
قعدت جنبه وفضلت ساكتة لحد مابابا اتكلم _موافقة ترجعي ياحور؟
اتنهدت بتوتر وانا بفرك ايدي ف قال يوسف بسرعه _ادينا فرصة تانية ياحور، الي حصل كانت غلطتنا احنا الاتنين، يمكن انا اتسرعت وفي لحظة غضب طلقتك بس انتي كمان غلطتي في حقي ونسيتي ان الي ماتت كانت بنتي انا كمان.
_انت مستحملتنيش يايوسف، مستحملتش وجعي وحزني على فراق بنتي، وبدل ماتفضل جنبي تهون عليا طلقتني وسبتني.
_عشان كده جاي تاني وموافق على اي شروط مقابل رجوعك ليا.
بصيت لبابا الي كان متابع من الاول وبعدين هزيت راسي _ماشي يايوسف، انا موافقة.
ابتسم بفرحة وقال لبابا _هجيب المأذون بكره ياعمي.
بابا هز راسه بالموافقة وهو مبتسم
بعد ما يوسف مشي كنت قاعدة في اوضتي ماسكة موبايلي بلا هدف
لحد ما اتبعتتلي رسالة من رقم غريب
فتحتها بفضول ولقيت الي مكنتش متوقعاه ابدًا
“سذاجتك مخلتكيش تفكري ان يوسف ممكن يكون شاف حياته برا واتجوز واحده تانية خلال الفترة الي فاتت، عشان كده حب يطول مدته هناك”
مكنتش مصدقة الي اتبعت وقبل مااقفل الموبايل اتبعتتلي صورة تانية ليوسف وواحدة جنبه بفستان فرح وووكأنه في فرحه؟
يُتبع..

رواية حكايات حور ويوسف الفصل الرابع

_انا وثقت فيك تاني، اديتك فرصة انك تصلح الي فات، كنت فاكرة انك هتطبب جروح روحي، وللمرة التانيه يايوسف بتكسرني.
_انا عملت ايه؟ ايه الي حصل ياحور قوليلي!
مسكت موبايلي وطلعت الصورة واديتهاله
مكنتش بعيط، بس كان جوايا غضب كبير منه، وشوية امل..
ملامح وشه متغيرتش كتير فقولتله _مش هتبرر؟ ده فرحك فعلًا ولا فوتوشوب ولا مقلب، اتكلم!
صرخت في اخر كلمه ف قال بهدوء وهو بيديني الموبايل _مين بعتلك الصور دي؟
_هيهمك اوي؟ قول يايوسف وريح قلبي، ايه ده؟
هز راسه بتنهيدة _كان فرحي ياحور
بصيتله بصدمة وتلقائيًا دموعي نزلت على خدي
ف قال بسرعه _هفهمك كل حاجه ياحور، ده موضوع قديم.
_اسكت!
انا غبية، رجعتلك تاني حتى بعد مااتبعتلي الرسايل دي، كنت واثقة فيك انت وكدبت عيوني،
عشان كده كنت كل مااتصل بيك متردش وتتهرب مني،
رجعت ليه تاني طيب طالما انت بقى عندك حياة تانية؟؟ ولا انا صعبت عليك وقررت اخيرا تشفق عليا؟
كنت حاسه بأن كل حاجه اتدمرت حواليا
حسيت بوجع في قلبي ف قعدت بسرعه وانا بتنفس بعنف
سمعت صوته وهو بيقول بهدوء _خلصتي خلاص؟
متكلمتش ومبصتش عليه حتى ف قعد جنبي وقال _انا اتجوزت فعلًا ياحور لكن قبل مااتجوزك باربع او خمس سنين، كنت لسه متخرج على طول من الجامعه وكان عندي شقة وشغلانة ثابتة فاتجوزت سلسبيل بنت عمي، متفقناش واتطلقنا بعد اقل من سنة.
سألته بهدوء _لو انت صادق يايوسف، انا معرفش ليه من قبل كده؟
_يوم مادخلت بيتكم انا واهلي اتكلمت مع والدك وقولتله وهو رفض انه يقولك او انا اقولك لأسباب معرفهاش، لكن الي اعرفه ان الي بعتلك الرسايل دي بيحاول يوقع بينّا تاني والدليل على كده انه بعتلك قبل كتب الكتاب بيوم.
بصتله بشك ف كمل وهو بيديني موبايلي _اتصلي بوالدك ياحور واتأكدي منه.
مديت ايدي بتردد واتصلت ببابا
سألته وهو مأنكرش ده تمامًا بحجة اني كنت برفض العرسان وقتها ولو كنت عرفت ان يوسف كان متجوز قبل كده هرفضه هو كمان وهو كان شاب كويس جدًا ومعروف بأخلاقه بين الناس.
بعد ماقفلت الموبايل بصيت في الارض كأني طفلة مذنبة
دام الصمت بينّا ومقدرتش ارفع عيني واحطها في عينه بعد الكلام الي قولته
سمعت ضحكته فاستغربت وبصيتله بضيق _عاجبك كده؟
_عشان تتعلمي بعد كده متحكميش على الحاجه من غير ماتسمعي الاول وتفهمي.
شاور على دماغه وهو بيقول _شغلي ده ياحور شوية.
اتأففت وانا بقول _خلاص اسفه.
ملحقش يرد عليا ف سبقته _مايمكن انت اتجوزت لتالت مره يايوسف؟ ايه الي يضمني ان بابا بيتكلم على نفس البنت.
بصلي بغضب وقال _لو ممشيتيش من قدامي دلوقتي هرجعك لابوكي يتصرف معاكي.
خوفت منه ودخلت المطبخ وانا بقول _والدك والدك ويوم مااتنرفز بقى ابوكي.
_سامعك ياحور.
رجعتله تاني وقولتله بضيق _ايه الي خلاك تمد فترة شغلك برا يايوسف ومنزلتش.
اتنهد بهدوء وقال _محدش بيطلب انه يبعد عن مراته وبنته ياحور، محدش بيحب الغُربة
بس الشركة هناك كانت محتاجة عُمال يشتغلوا من غير ماينزلوا بمرتب كبير، وعلشان عدد قليل بسبب الي وافق اضطروا انهم يجبرونا نقعد، وده طبعًا عن طريق انهم هددونا بالرفد من الشركة الي كنت فيها برا والي في مصر كمان، كنت عايز اضمنلكم حياة سعيده ومفكرتش في العواقب.
عيطت تاني وقولتله _خبيت عليا كل ده يايوسف؟ واكيد كانوا بيعاملوك وحش برا.
_متفكريش في حاجة دلوقتي ياحور من الي فاتت، وخلينا نبدأ من جديد، علشان كده هقوم اطبخ انا احلى كباب.
ربعت ايدي وقولت _لا يايوسف انت اخر مره دخلت المطبخ حر قته.
_مانتي كنتي داخلة تعملي اكل ورجعتي تاني!
_خلاص يايوسف هسخنلك من الاكل الي ماما جيباه.
_تؤ انا عايز اكل من ايدك انتي.
ابتسمت بانتصار _يبقى انزل جيب الطلبات الي محتاجينها ياشطور.
♡♡♡
بعد وقت
في كافية بيبان عليه الرقي
دخل يوسف وملامح الغضب على وشه
قرب من حمزة الي كان بيشرب قهوته بتلذذ ودلق عليه الكوباية
اتنفض حمزة وقبل مايتكلم لكمه يوسف في وشه _انت اتجننت يالا!
مسكه من ياقة قميصه فقال يوسف _رايح تبعت لمراتي صور فرحي القديمة ياخسيس!
ابتسم حمزة وقال _اسمها طليقتك، وبعدين انا مبعتش حاجه.
_كداب ياحمزة، طول عمرك كداب، محدش له مصلحة انه يبعتلها حاجه زي كده غيرك.
_وانت ياحنين كنت ناوي ترجعلها؟
ضحك يوسف بانتصار _انا رجعتلها يانجم، حور عمرها ماكنت لحد تاني غيري، وعمرها ماشافتك ولا هتشوفك غير واحد ندل بص لمرات صاحبه.
الناس بعدتهم عن بعض اخيرًا وقبل مايوسف يمشي قال بصوت عالي _اعمل الي تعمله ياحمزة، كده كده انا مش ناوي اطلق تاني.
مشي يوسف والدنيا هديت ورجع حمزة تاني يقعد على الكرسي بتاعه
كان باصص بشرود ودموعه نزلت على خده وهو حاسس بألم كبير في قلبه
كان عارف انه غلطان، لكن دي الفرصة الوحيدة الي جاتله..
هو ويوسف كانوا صُحاب، لكن صداقتهم انتهت بمجرد ما يوسف اتجوز حور
كانوا في كافية مع بعض وحمزة شافهم بالصدفة
سلّم على يوسف وكان اول مرة يشوف حور لأنه كان مسافر وقت فرحهم
مد ايده عشان يسلم عليها وقبل مايوسف يعترض قالت بهدوء _انا اسفه لكن مش بسلم على ناس اجانب عني.
ابتسملها يوسف بفخر ونزل حمزة ايده بخجل
اعجابه بيها كان بيزيد مش بيقل تمامًا
حاول يتواصل معاها ويوسف عرف وحصلت بينهم مشكلة كبيرة جدًا انتهت انهم اتفرقوا.
واخر حاجه كانت بعد طلاقهم لما هما الاتنين راحوا الفرح وحمزة كمان راح لما اخو يوسف ضغط عليه علشان يجي لأنه كان صاحبه هو كمان.
اتنهد حمزة ومسح دموعه بسرعه وخد موبايله وحاجاته ومشي بعد ماساب فلوس على الترابيزة
ومن جواه استسلم للأمر الواقع..
♡♡♡
بعد سنتين
كان يوسف في شغله مركز في الاوراق الي قدامه
بيقاطعه صوت موبايله وقبل مايقفل بيشوف الاسم وفورًا بيرد
بيجيله صوتي من التليفون وانا بصرخ _الحقني يايوسف!
بينتفض وبيقول _ايه الي حصل ياحبيبتي؟؟
_انت لسه هتتكلم؟؟ انا بولد الحقني.
بيسحب جاكيت بدلته وبيجري برا الشركة والموبايل لسه على ودنه _انتي مش قولتيلي انك هتولدي الاسبوع الجاي!
_حاضر يايوسف هرجعه تاني، هتموتني انت وابنك!
فاجأة بحس بألم شديد وبصرخ اكتر ف بيبعد الموبايل عن ودنه شوية وهو بيركب عربيته _انا جايلك ياحور متقلقيش.
♡♡♡
بدخل اوضة العمليات و بيكون يوسف واقف برا متوتر وموجود معاه بابا وماما وحماتي
كلهم كانوا قلقانين عليا
لكن كل ده بيروح بمجرد ما بيسمعوا صوت البيبي وهو بيصرخ
ابننا انا ويوسف
يحيىٰ♡
بتطلع الممرضة و بتديه ليوسف الي بيحس بإحساس مختلف لأول مره
بيكون متوتر وخايف انه يأذيه لكن في نفس الوقت حاسس بالفرحة
ابتسم يوسف لما يحيى فتح عينه
قالتله ماما بابتسامة _أذْن في ودنه يايوسف.
هز يوسف راسه وبدأ يأذن بصوت واطي في ودن يحيى
ومن هنا اقدر اقول ان قصة حُبنا بدأت في الحلال وانتهت بـ يحيى احلى حاجه في حياتي.

تمت.