رواية مغامرات عائلية الفصل الخامس 5 بقلم همس كاتبة

رواية مغامرات عائلية الفصل الخامس 5 بقلم همس كاتبة

 

 

البارت الخامس

 

 

بارت 5
وضع يداه على خصرها بهدوء مباغت …. استدارت له و كانت نظراتها تدل على شوقها له
وضع كفه على وجهها بهدوء
اوس : بحبك
اخففضت رأسها بخجل تحاول كتم ابتسامتها …. سحبها الى حضنه و اعتصرها بداخله
اوس : مش بحب اشوفك زعلانة … حبيبة اطلبي الي انتي عايزاه بس ما تبعديش عني .. انتي ما تعرفيش انا بحبك ازاي
حبيبة بهمس : بس انت الي بعدت
اوس : و انتي عارفة ليه بعدت … انا بحبك و هفضل احبك لاخر ثانية بعمري … كنت بصبر نفسي طول السنين الي فاتت عشان ارجعلك و انا محقق هدفي .. انا حبيتك لدرجة انك لو طلبتي مني امو..ت عشانك همو..ت يا حبيبة
حبيبة بسرعة : بعد الشر عليك
ابتسم و ملس على على شعرها بحب و هي لازالت في حضنه تغمض عينيها و مستمتعة بقربه منها
: احم احم
خرجت حبيبة من حضن اوس بسرعة و انتبهت الى مصدر الصوت بصدمة
حبيبة بخضة : اونكل عدنان !
عدنان بابتسامة : ليه صاحين لغاية دلوقتي؟
حبيبة بخجل : انا هروح انام .. تصبحو على خير
عدنان : و انتي من اهله يا بنتي
ذهبت بسرعة الى اوضتها و وجهها محمر من شدة الخجل
عدنان بخبث : ايه ؟ بقطع عليك ؟
اوس بابتسامة : بس يا بابا
عدنان بضحك : يا ابني دي مراتك و حقك تعمل الي عايزه بس مش على البلكونة قدام الناس … اتكسف شوية ده انت بقيت رجل اعمال …. و لا هو السفر بيبوظ ؟ احنا صعايدة ما تنساش اصلك ياض
اوس : اديك قولت مراتي يعني انا حر
عدنان بنفاذ صبر : الله المستعان.. ربنا يهديك يا ابني .. ما تروح تنام انت ما ارتحتش من ساعة ما وصلت
اوس : رايح اهو .. تصبح على خير
عدنان : و انت من اهله يا حنين
*******************
دلفت حبيبة اوضتها و هي تحاول اخفاء خجلها
دينا بفزع : مالك يا بت وشك احمر كدة ليه ؟
حبيبة بغيظ : انتي كنتي فين يا واطية .. اونكل عدنان شافني و انا بحضن اوس .. هففف اتكسفت اوي .. شكلي بقى زبالة قدامه
دينا بضحك : ليه يا هبلة ما اوس جوزك يا غبية .. كويس انها جات ع الحضن .. ده لو شاف البوسة كان هيطين عيشتكم
حبيبة : حتى لو جوزي … لازم نحترم الي حوالينا .. بس اعمل ايه مهو الي قليل الادب
دينا بخبث : اممم و انتي ما بتصدقي يقل ادبه عشان تدوبي فيه
حبيبة بخجل : اخرسي يا واطية .. انا و الله بنسى نفسي و انا معاه .. مش بفكر بحاجة غيره
دينا : يا ساتر ع المحن .. بقولك ايه ما تقرفينيش معاكي .. عايزة اخلص قراية الرواية قبل ما انام
حبيبة بغيظ : اتلمي و اطلعي اقريها برا عايزة اطفي النور
دينا بنفخ : امري لله .. عيشة تقصر العمر
خرجت دينا و استلقت حبيبة على سريرها لتنام … و لكنها تذكرت احداث اليوم و ابتسمت بخجل
امسكت هاتفها و صورت شاشة سوداء و كتبت عليها عبارة ” الحياة تزدهر حين يمتلئ القلب بالحب والسلام ” …. و ارسلتها ستريك
*******************
خرجت دينا الى حديقة البيت و جلست تقرا باستمتاع
بعد دقائق …. اتت حلا و جلست معها
دينا : كنتي فين يا حلا ؟ قولتي هتنامي و ما شوفتكيش بالاوضة
حلا بضيق : مخنوقة .. روحت اتمشى شوية
دينا باستغراب : ليه في ايه ؟ ما انتي كنتي مبسوطة من شوية و احنا قاعدين
حلا : انا اتخنقت من البيت ده .. و بدأت احس ان كل الي فيه توكسيك .. حتى فارس .. مش مهتم بيا زي عوايده
دينا : ليه حصل حاجة بينكم ؟
حلا : لا .. بس مدايقة من كارما و لارا … كارما دايقت حبيبة النهاردة .. و لارا بتخطط تلف على اوس .. و اصلا كل الي في البيت عارفين ان اوس و حبيبة متخانقين … لما اتكلمت مع فارس عشان لارا ادايق و قالي ان انا مزودة الموضوع قال دول عيال و لازم اكبر دماغي
دينا : على فكرة فارس عنده بعد نظر … يمكن حس انك عايزة تقلبيه على اخته .. مهما كان مفيش راجل بيحب ان مراته تشتكيله من اهله .. و انتي هتبقي مراته يعني هو بيفكر بالمستقبل
حلا : لا كدة تو ماتش .. مهي فعلا لارا دايقتني كتير .. انا الغبية الي قولتلها على على حكاية فسخ الخطوبة … دي طارت من الفرح لما سمعت كدة و بدأت تتصرف بطريقة مستفزة قدام اوس .. و الكل واخد باله انها عايزة تلفت نظره
دينا : حلا .. انتي غلطتي انك اتكلمتي بموضوع يخص حبيبة .. انا فاهمة انها اختك و مصلحتها بتهمك .. بس انتي سخنتيها كتير على اوس .. و زعلها ده من الاساس بسبب زنك .. هتبقي مبسوطة لو اتطلقت منه ؟
حلا : لا طبعا انتي بتقولي ايه
دينا : ما ده الي هيحصل لو ركبت دماغها … الناس مش هتقول اختها و خايفة عليها .. لا دول هيقولو غيرانة منها
حلا بابتسامة سخرية : هه .. يتفلقو .. انا الي يهمني ان حبيبة تحافظ على كرامتها .. خايفة لما يتجوزو يستعبدها .. هتنزل بنظره لو سامحته بسهولة على كل السنين الي فاتت دي .. مش هستحمل اشوفها مكسورة .. و انتي عارفة حبيبة عاطفية بتزعل بسرعة و بترضى بكلمتين
دينا بابتسامة : و الله انا فاهماكي يا حببتي .. انتي بنت فاهمة حقوقك صح و حاطة حدود للكل و اولهم فارس … بس حاولي ما تتدخليش بعلاقة اوس و حبيبة عشان اوس بيعشقها و بيتمنالها الرضى ترضى …. ده من ساعة ما وصل لا فكر يرتاح و لا ينام بالعكس فضل وراها لغاية ما تصالحو … ما تخافيش عليها معاه … طب اقولك على سر ؟
حلا باستغراب : قولي
دينا بخبث : اوس كان كل يوم بيكلمني على الواتساب و بيطمن عليها و بيسألني على كل حاجة بتعملها .. حتى اني كنت بصورها فيديو من غير ما تاخد بالها و ابعتله
حلا بشهقة : يا انهارك اسود
دينا بضحك : و الله العظيم .. كان دايما بيوصيني عليها و اي مشكلة بتحصل على طول بيبعت تميم يساعدنا
حلا بصدمة : ازااااي .. انتي يطلع منك كل ده ؟ ده احنا ما حسيناش عليكي يا بت
دينا بغرور : طبعا ده شغل مخابرات انتي ايش فهمك
حلا : اممم طالما كدة هسامحه و مش هتدخل تاني .. ترجعله بقا .. بس على الله يزعلها كدة و لا كدة و الله همسح بكرامته الارض هو و الي يتشددله
دينا : طيب خليكي بفارس انتي .. علاقتكم ماشية ازاي ؟
حلا بابتسامة : علاقتنا حلوة .. احنا متفاهمين و بنحب بعض .. اكتر حاجة مريحاني ناحيته انه بيفهم تفكيري و بياخدني على قد عقلي … بس بصراحة بدايق اوي لما يهزرو على حسابه و هو يضحك … يعني مهما كان بحس انه لازم يحط حدود ليهم
دينا : بس دي طبيعته يا حلا … هو متنمر نمبر ون .. ده ان ملقيش حد يتنمر عليه بيتنمر على نفسه … و انتي عارفة ان دي اكتر صفة بارزة بشخصيته
حلا بابتسامة حب : انا بحب كل حاجة فيه … حتى لما يتريق على نفسه بيضحكني … بس مش بحب حد يقل منه قدامي .. بيكون نفسي اقوم افرمهم
دينا : فارس بيحبك بجد يا حلا .. هو اصلا اتغير علشانك .. ده كان فاشل و حمار .. بس من ساعة ما ارتبطو بدا يشتغل بجد عشان تتجوزو … ما تخليش مشاكل بسيطة تاثر على علاقتكم عشان انتو لايقين على بعض
حلا : ياااه اول مرة تبلي ريقي بكلمتين حلوين يا بت .. ما تجيبي بوسة
دينا بضحك : موااااه
************************
في اليوم التالي
على مائدة الفطور
عبد الله باستغراب : فين الباقي يا ولاد ؟
غادة : حلا و دينا و حبيبة لسا نايمين .. و فريدة و تميم خرجو من بدري
فارس : و اوس و زياد بيشتغلو على اللابتوب في اوضتهم
سحر : اطلعي يا غادة صحي البنات و نادي على الشباب يفطرو .. بعدين يبقو يكملو شغل
غادة : حاضر يطنط
و صعدت للاعلى لايقاظهم
ايهاب : طلبية الدرة جاهزة يابا بكرا الصبح هنشحنها كاملة
عبد الله : ممتاز .. عشان لازم ندي العمال اجازة و احنا نتفرغ لتجهيزات الفرح .. عايزه فرح قد المقام .. ده اول حفيد ليا
عدنان : ما تقلقش يابا انا ههتم بالموضوع ده بنفسي
وصلت غادة اوضة الشباب و طرقت الباب
فتح زياد الباب
زياد باستغراب : في ايه ؟
غادة بتوتر : جدو بيقولكو انزلو افطرو .. و بعدين تكملو شغل
زياد بهدوء : ماشي نازلين وراكي
بعد وقت قصير اجتمع كل الافراد على مائدة الفطور و قد عادت فريدة من الخارج
حبيبة بهدوء : كنتي فين يا فريدة ؟
فريدة : رحت اجيب فستان الفرح
حبيبة : تاكدتي انه على مقاسك ؟
فريدة بهمس : هطلع اقيسه بعد الفطار …. المهم انتي حصل ايه بينك و بين اوس امبارح ؟ صالحتيه ؟
حبيبة : يعني تقدري تقولي كدة
فريدة بخبث : اممم .. شوفت الستريك بتاعك واضح انك صفيتيله
حبيبة بحب : عمره قلبي ما شال منه .. بس برضو مش هسامحه بسهولة
فريدة : شكلك هتحصليني قريب يا بت
حبيبة بخجل : بس بقا
بعد وقت صعدت فريدة مع حبيبة و دينا لتقوم بقياس فستانها
حبيبة بتعب : هفف .. مش راضي يقفل .. روحي للست الي فصلته خليها توسعه شوية
فريدة بدموع : لا انا الي تخنت .. ده كان على مقاسي الاسبوع الي فات لما قسته … اعمل ايه بس … لازم اخس بسرعة
دينا : استني .. اطلعي على الميزان و نشوف .. لسا فاضل وقت للفرح تقدري توسعي الفستان و هتلحقي تخسي لو عايزة
وقفت فريدة على الميزان بتوتر
فريدة : 66 اهو زايدة 2 كيلو .. يا انهار اسود .. اعمل ايه يا ربيييي
حبيبة : عادي هتقدري تنزليهم باسبوع واحد .. لو عايزة احنا ممكن نعملك نظام غذائي و كلنا نلتزم معاكي هتنزلي بسرعة … بس مش لازم تتوتري قبل الفرح بشرتك هتتعب و هيبان عليكي
فريدة بقلق : خلاص احنا نعمل دايت مع بعض عشان تشجعوني و لو ما نزلتش هروح للست و اخليها توسعه شوية .. بس مش عايزة ابان تخينة بالفرح
دينا : تمام كدة .. هعمل جدول مكثف و كلنا هنمشي عليه
دلفت حلا و قالت : مالكم في ايه ؟ .. الله الفستان تحفة يا فريدة
فريدة : بس مش راضي يقفل عليا
دينا : هنعمل دايت كلنا مع بعض عشان تخس بسرعة .. ايه رايك يا حلا
حلا : يا انهار اسود .. انا لو خسيت هختفي انتي مش شايفة شكلي
دينا بهمس : ابقي اطفحي اي حاجة من وراها بس قدامها لازم كلنا نساعدها
حلا : اه ان كان كدة ماشي
***************************
مصطفى : و بس كدة … كل واحد كان بيتغزل بالحتة بتاعته من تحت لتحت .. حتى زياد كان كل كلامه موجه لغادة … بس هيا ايه .. مطنشاه خالص
عبد الله : يعني هيا مش عايزاه ؟
مصطفى : بالعكس دي باين عليها بتموت فيه بس مقهورة منه
عبد الله : طيب ما دام لسا عايزاه كويس .. هنعرف نرجعهم لبعض .. المهم حبيبة و اوس اتصالحو و لا اتخانقو تاني ؟
مصطفى بخبث : ايه .. دول اتمسكو متلبسين و هما حاضنين بعض على البلكونة .. بابا شافهم .. و حبيبة واضح انها حنت لاوس .. دي اتقلبت 180 درجة من ساعة ما رجع
عبد الله بسعادة : الحمدلله .. كدة كل حاجة ماشية صح … خد يا حبيبي .. ده الايباد الي طلبته
امسك مصطفى الايباد و قال بفرح : ربنا يخليك ليا يا احلى جدو بالدنيا
**************
في المساء كانت الساعة قد تعدت الثانية عشر …. و كالعادة بعد اجتماع العائلة ذهب الكبار للنوم و بقي الشباب جميعهم
جلست كارما بجانب حبيبة مما اثار استغراب الجميع .. كان جميعهم مشغولين على هواتفهم
حلا باستغراب : هو ايه حكاية المنطقة الي ورا الغيط بتاع جدو ؟ بنت الجيران قالتلي انها منطقة محظورة … هو ده بجد ؟
نظر اوس و تميم لبعض
تميم : ايوة .. انتي ما سمعتيش عنها قبل كدة ؟
حلا : و هسمع منين منا طول عمري عايشة بمصر
فارس : الا صحيح يا تميم ايه حكايتها ؟ انا برضو من ساعة ما جيت و انا بسمع عن المكان ده
تميم : دي حتة مهجورة من زمان .. حصل فيها مشكلة قديمة و اتقفلت من حوالي 10 سنين
دينا باهتمام : ايه المشكلة الي حصلت ؟
تميم : تار بين عيلتين كانو عايشين هناك … في عيلة هجمت على بيت هناك و اشتغل ضر..ب النار فيها .. و ما..ت حوالي 5 اشخاص .. و طبعا العمدة حكم عليهم انهم يعزلو من المنطقة .. و كدة اتقفلت لغاية النهاردة
حبيبة بخوف : يا انهار اسود … 5 اشخاص ؟
لارا : هو ليه انا بحس ان الق..تل بالارياف ده حاجة عادية .. زي شرب الشاي كدة
دينا : عشان هبلة .. اكيد مش حاجة عادية .. مهو بقولك اتحكم عليهم يعزلو من الحتة كلها
حلا : يعني دلوقتي بقت حتة مهجورة ؟!
تميم : اه طبعا .. محدش بيروح هناك خالص .. و حتى كنا بنسمع اصوات من هناك .. في ناس بيقولو انها اصوات ارواح الم… يتن
حبيبة برعب : تميم لو سمحت اقفل ع الباقي .. يا انهار اسود .. انا ازاي هنام الليلة
لارا بهمس : بكمي
دينا : اجمدي يا بت … بقولوكو ايه
تميم : ايه
دينا بحماس : ما تيجو نروح هناك
زياد : تروحي فين يا هبلة .. بيقولك منطقة محظورة .. و جدي محرج علينا ما نروحش هناك من زمان
فارس : يا ابني سيبك من جدي دلوقتي .. تعالو نغامر شوية .. الجدع فيكو الي يروح
فريدة : انت اهبل يا ابني .. عايزنا نكسر كلام جدو
فارس : مش هيحصل حاجة لو رحنا استكشفنا المكان .. بيقولك ما حدش راح هناك من عشر سنين
حلا : و الله فكرة حلوة .. اهو نتسلى شوية
حبيبة : انتي اتجننتي .. المكان مرعب و لو بابا عرف اننا خرجنا من غير اذنه هيزعل
كارما : ما تجمدو شوية .. فيها ايه لو رحنا كلنا مع بعض .. اكيد مش هيحصل حاجة
زياد : طب نعمل تصويت الي عايز يروح يرفع ايده
رفع الجميع يده عدا حبيبة و فريدة
دينا : اه يا جبانة انتي و هيا … ما تنشفو شوية
زياد : خلاص انتو مش هتروحو .. خليكم هنا و لو جدو حس على غيابنا كلمونا .. هنرجع بسرعة
نظرت حبيبة لاوس الذي يرفع يده و يبتسم لها .. و نظرت الى لارا و كارما السعيدات جدا بعدم ذهابها…. فشعرت بالغيرة
حبيبة : لا انا عايزة اروح معاكو …………… يتبع

 

 

• لقراءة باقي فصول الرواية أضغط على (رواية مغامرات عائلية)