رواية مغامرات عائلية الجزء الثاني الفصل الثالث 3 بقلم همس كاتبة
رواية مغامرات عائلية الجزء الثاني الفصل الثالث 3 بقلم همس كاتبة
البارت الثالث
3
عبد الله بابتسامة : وحشتوني يا عيال
حبيبة بمشاكسة : ايه الي عيال ده احنا هنخلف يا جدو
عبد الله : حتى لو بقا عندك مية ولد هتفضلو بالنسبالي عيال .. و لو غلطتو هتتعاقبو كلكم
زياد : لااا ابوس ايدك كفاية علينا المرة الي فاتت اتربينا لالف سنة قدام .. انا عايز اتجوز بقا ارحموني
نزلت كارما من الاعلى و ركضت نحو زياد
كارما و هي تحتضنه : وحشتني اوي .. كنت فين ؟ كل ده مش بتيجي تزورنا ؟
زياد : اسألي ابن عمك المتسلط ده .. ده انا لو يهودي كان عتقني لوجه الله
اوس : اتلم يا زياد .. هيا ماما فين ؟
كارما : طنط عند فريدة بشقتها و كل الستات هناك .. يمكن ما يعرفوش انكم وصلتو
مصطفى : هطلع اقولهم
عبدالله : ايوة و قولهم يجهزو العشا كمان
مصطفى : حاضر
عبد الله : تعالو نقعد و احكولي عملتو ايه في مصر الايام الي فاتت
اتجهو للمجلس الكبير
حلا بحماس : حفيدتك الي هيا انا يعني … بفضل الله اترشحت لمنصب امين الصندوق في جمعية حقوق المرأة و كمان اخدت جائزة بسبب انجازاتي و ابحاثي الي عملتها للجمعية بعد ما تخرجت
فارس : و انا ساعتدتها بيهم طبعا و اتسحلت معاها
عبد الله : برافو .. برافو عليكي يا حببتي طول عمرك شاطرة .. و انت يا فارس برافو طلعت شهم و وقفت جنبها
غادة : انا بقى التزمت و اتحجبت يا جدو .. ما قولتليش ايه رأيك بيا ؟
عبد الله بابتسامة : دي اكتر حاجة صح عملتيها يا غادة و انا بجد فخور بيكي و اتمنى البنات ياخدوكي قدوة ليهم
لارا : طب منا كمان قدوة و طلعت الاولى على الثانوية العامة
حبيبة : انا اتصدمت يومها بجد.. ما توقعتش انك شاطرة اوي كدة
لارا بغرور : طبعا انا لهلوبة في الماث و الانجلش
كارما بعبوس : الدنيا حظوظ … ده انا طلعت روحي عشان انجح بس
زياد : مش مهم المجموع يا حبيبتي المهم انك تعبتي عشان مستقبلك و اديكي فترة بسيطة و هتيجي عندنا عشان الجامعة
عبد الله : و انتي يا دينا .. عملتي ايه ؟
دينا بضحكة بلهاء : انا و الله انشغلت شوية مع ختيبي
حلا بحدة : اعدلي لسانك قبل ما اقطعهولك .. مش ناقصين سهوكة
دينا : اتلمي و ملكيش دعوة .. ازاي بتدافعي عن المرأة و انتي قالبة على دكر
عبد الله : بس منك ليها .. حبيبة انتي عاملة ايه ؟
حبيبة : انا كويسة يا جدو و بلاش حد يسألني على الجامعة عشان مش ناقصة احراج
عبد الله : معلش يا بنتي طبيعي الجواز و الخلفة برضو مسؤوليه … و انتو يا شباب ساكتين ليه ؟ احكولي عملتو ايه بشغلكم ؟
فارس : احم .. اتفضل يا اوس اتكلم انت
نزلت سحر في هذه اللحظة
سحر بلهفة : يا قلب امك وحشتني اوي يضنايا
توجه لها اوس و حضنها
اوس : و انتي كمان وحشتني اوي يا ست الكل
حبيبة : ازيك يا طنط
سحر و هي تحضنها : واحشاني يا حبيبتي كل ده مش بتيجي تشوفي حماتك يا بت ؟
حبيبة : و الله حضرتك دايما في بالي بس البيبي تعبتي اوي
فريدة من وراهم : هه .. اتدلعي يختي اتدلعي .. جايك ايام سودة
حبيبة : فريدةةة .. ازيك وحشتنيي
فريدة بتعب : ااااه .. ما تسأليش على حالي عشان تعبانة تعب السنين .. بس انتي بطنك صغيرة كدة ليه ؟! مش المفروض دخلتي التاسع من يومين ؟
حبيبة : مش عارفة .. بس الدكتورة قالتلي صحة البيبي ممتازة
سحر : انتي مش بتاكلي كويس يا بت ؟ اوس قصر معاكي بحاجة ؟ قوليلي عشان اهزقهولك دلوقتي
حبيبة : لا و الله يطنط اوس واخد باله مني كويس اوي .. ده مفيش بحنيته و اهتمامه بيا
سحر : ربنا يخليكم لبعض يحبيبتي
حبيبة : ميرسي يا طنط .. فين آسر ؟ وحشني اوي عايزة اشوفه
فريدة : سيبته مع طنط خديجة و نزلت اسلم عليكم .. قولت ازوغ منه 5 دقايق اريح شوية
حبيبة : هو تميم مش بيساعدك ؟
فريدة : بيساعدني بس مش اوي يعني .. برضو هو وراه شغل
دينا : هو احنا لما نتجوز يا بت هتبقى احاديثنا كدة ؟!
حلا : اممم تخيلي
دينا : ده ايه القرف ده .. بقو ستات اوي
مصطفى بخفوت : دينا .. كلمتي ليلة ؟
دينا : اه .. ليه عايز حاجة ؟
مصطفى : ليه مش بترد عليا ؟ بكلمها بقالي اسبوع و هي مطنشاني خالص
دينا : اممم عشان عندها امتحانات و باباها خد منها الموبايل
مصطفى بغيظ : ايه العقلية دي ؟! الراجل ده دقة قديمة اوي .. ده انا قولت اجنبي بقا و اوبن مايند و مش هيقرفني
دينا : اتلم ده انت لسا قدامك كتير .. هات موزة اسكت بيها معدتي قبل العشا
كارما : حبيبة هتسمي البيبي ايه ؟
حبيبة بابتسامة : كنان يا كرملة
حلا : و هندلعه و نقوله كوكيز
غادة : ما كفاية طفاسة حتى البيبي هتدخليه بالطفح بتاعك ؟!
سحر : على سيرة الاكل يا بنات .. اتفضلو العشا جاهز
اتجهو جميعا الى طاولة الطعام تزامنا مع دخول تميم
تميم : الله الاكل جاهز حماتي بتحبني .. ازيكم يا عيال
زياد : عيال ؟ انت بتقولنا عيال يا تميم ؟
تميم : ايوة
فارس : شاف نفسه خلف حتة عيل قال خلاص انا كبرت و بقيت راجل .. ياض ده انت من سنة بس كنت بتتبهدل في الغيط زي العيال و انيل منهم
تميم : هبقى احسن منك و مش هرد عليك
عبد الله : فارس .. عينك في طبقك يلا
فارس : امرا و طاعا يا جدو
تميم : فين اسر يا فريدة ؟
فريدة : مع طنط خديجة فوق .. هطلع اخده و اقولها تنزل تتعشى معاكم
سعاد : طب هاتي الواد و تعالي اتعشي انتي كمان
فريدة : لا دول لسا واصلين من برا يعني محملين بالفيروسات و الميكروبات … مش ناقصني البيبي يعيا
دينا : يا ساتر .. كل ده عشان قولنالك هاتيه ؟ اومال لو حد باسه قدامك هتعملي ايه ؟
سحر : دي بقا اسطوانة كل يوم .. مش بتسمح للواد يتنفس الا لما تعقم الهوا الاول و ما شاء الله تميم ماشي معاها و بيطبلها
حلا : لا كدة اوفر كتير بصراحة
سعاد : كلنا خلفنا يا فريدة و جبنا عيال زي الفل مفيش داعي للوسوسة دي
حبيبة : يعني اوك لازم تكوني مهتمة بالبيبي جدا بس مش للدرجادي .. الاطباء بيقولو ان البيبي برضو لازم يخرج و يغير جو
فريدة : طب خلاص خلاص هطلع اجيبه و اجي
بعد ساعتين
كانت حلا تحمل اسر و تمشي به في شقة تميم و حبيبة تجفف شعر فريدة المبلول بمجفف الشعر
حلا بنفخ : ليه عودتيه ع الشيل يا بت ؟
فريدة : هو اتعود لوحده
حلا : يا سلام ؟ هو الي قالك شيليني ؟
فريدة : انتي جاية تساعديني و لا تديني محاضرات ؟
حلا : منا وسطي اتقطم و انا رايحة جاية بيه
فريدة : معلش اهو تجربي الخلفة و عمايلها .. على فكرة انا سمعت ان الولاد ما بيتعبوش مامتهم زي البنات .. بيقولو ان البنت من ساعة ما تتولد بتبقى زنانة
حلا : دا اسمه عنصرية و تخلف … انا عن نفسي مش عايزة اخلف ولاد .. خصوصا بعد ما شوفت الخلفة النجسة بتاعة البت صاحبة زياد صرفت نظر عن الموضوع كله
حبيبة : حرام عليكي كل الي يجيبه ربنا حلو .. فكرتيني في بطيخة
حلا بجوع : بطيخ ؟ الله نفسي فيه
حبيبة : لا ده بني ادم … اسمه بطيخة و بيبيع ورد بالشارع
فريدة : و ما عرفوش يلاقوله اسم احسن من ده ؟
حبيبة : الولد ما يعرفش اهله يحرام .. اصله تخين شوية عشان كدة بيقولوله بطيخة
حلا : و انتي تعرفيه منين ؟
حبيبة : كنت من يومين بعيط و جيه عندي كلمني .. تصدقي اني اتصدمت من اخلاقه العالية و عزة نفسه .. بجد طفل يتحط ع الجرح يطيب
حلا بشفقة : يحرام … و الله العيال دول يقطعو القلب بجد .. انا لازم انظم لقاء و اتكلم عليهم يمكن حد يحس فيهم
فريدة بتعب : و الله يبقى كتر خيرك بجد
فجأة بدأ آسر بالبكاء
حلا بانفعال : ازاي هسكته ده .. خودي ابنك يا بت ايديا نملو و انا شايلاه
دلفت غادة و دينا سويا
غادة : هاتي اشيله شوية و سيبي مامته ترتاح دي حالها يصعب ع الكافر
اخذته منها و بدأت تمشي و تقرأ آية الكرسي بصوت منخفض
حبيبة بعبوس : اهو سكت معاهم الاتنين بس معايا فضل يعيط كأني ضرته
دينا بخفوت : يا بنات .. قانون الصداقة بيقول الصديق وقت الضيق مش كدة ؟
فريدة : عايزة ايه يا دينا ؟!
دينا بخبث : هغيب نص ساعة .. و النبي تغطو عليا و لو ماما سألت قولولها نايمة او بالحمام او اي حاجة
حلا : ليه هتروحي فين
حبيبة : واضحة زي الشمس هتروح تقابله
فريدة: ايه الجنان ده .. لا طبعا اوعي تعملي كدة الوقت اتأخر
دينا بانفعال : بقولك ايه انا ما صدقت كتبنا الكتاب عشان اتزنق زيكم … بعدين انا بقالي كتير ما شفتوش و مش قادرة اصبر لبكرا .. اتلمو بقا و سترو على غيابي
حبيبة : ماشي بس ما تتأخريش
دينا : اتفقنا
**********************
كانت تركض في الغيط باتجاه ارض العزايزة وسط برودة الجو و ظلام الليل … وصلت اخيرا الحد الفاصل بين الغيط و الارض … لمحت يزن ينتظرها خلفه .. اقترب بسرعة وساعدها بالنزول الى ارضهم
دينا بشوق : وحشتني اوي
حضنها بقوة لدرجة انه رفعها عن الارض و اخذ يدور بها في المكان لشدة شوقه
يزن بعشق : كل ده غياب يا حبيبتي ؟
دينا : و الله غصب عني .. ماما بتعاملني على اني ضرتها .. كل ما بقولها عايزة اروح سوهاج بتقولي ممنوع
يزن : يرضي ربنا الي بتعمله بيا الست دي ؟ من ساعة ما اتخطبنا و هيا مش بتسمحلي اشوفك زي الناس
دينا : معلش هيا خايفة عليا انا بنتها الوحيدة
شدها له اكثر و اخذ شفتيها بقبلة قوية و عنيفة تعبر عن شوقه الشديد لها
بعد دقائق …
دينا و هي تتنفس بسرعة : بحبك
يزن بعشق : و انا بموت فيكي
دينا : امشي نقعد في المكتبة عشان الجو سقعة اوي
امسك يدها و قال : يلا
دينا : انا بقيت طول الوقت مركزة بيك انت بس .. ما توقعتش الحب يبقى حلو كدة
يزن بابتسامة : و انا عمري ما تخيلت اني هحب اصلا .. جيتي انتي و وقعتيني بغرامك
دينا بسعادة : المكان ده شاهد على حبنا .. هنا قولت انك هتقع بغرامي من غير قصد و اهو وقعت فعلا
يزن : من ساعة ما عرفتك و انا حاسس ان الدنيا بتضحكلي .. مش هتصدقي ان السنة دي بس الي حسيت بيها قد ايه الحياة حلوة و تستحق اني اعيشها بجد
دينا : دي احلى سنة بعمري كله
اثناء حديثهم فتح يزن باب المكتبة .. مجرد ان رأت دينا المنظر صرخت بسعادة
دينا بحماس : يلهوي هيغمى عليااا .. ايه الحلاوة دي يا ربي
يزن بضحك : انا اسمع ان البنات بتتبسط لما تشىف هدوم جديدة او اكل او ميكاب .. بس كتب و روايات دي مشوفتهاش عند غيرك
دينا : طبعا انا انسانة مثقفة … عايزاك تشيلي كمية كبيرة هقرا نص هنا و نص هاخده لما ارجع مصر
يزن : هو احنا مش هنتجوز بقا ؟ ايه رأيك نستغل وجودكم هنا و اقول لابويا يكلم جدك و يتفقو على موعد فرحنا
دينا : لا ماما مش راضية نتجوز قبل ما اتخرج من الجامعة .. و انا فاضلي ترم و اخلص
يزن : يعني هتسيبيني تاني
دينا : معلش يحبيبي كلها فترة و هتعدي و بعدها نبقى مع بعض على طول
يزن : هتعزميني عندكم على العشا بكرا و لا اعزم نفسي بالعافية ؟
دينا : انت من امته بتتعزم اصلا ؟! ما انت مرابط عندنا من السنة الي فاتت
يزن بضحك : الله يسامحك انا عملت كدة عشان خاطرك … جو البيت بتاعكم حلو اوي و دافي .. مش زي عندنا كله جعير و خناقات ستات ع الطالعة و النازلة
دينا : ما طبيعي .. باباك فاكر نفسه الحاج متولي و جايبلي طقم شاي كلهم تخان و قصيرين
يزن بضحك : يخريبت لسانك ده .. دول حمواتك يا بت
دينا : لا مليش في الجو ده .. المهم انا عايزة اطلب منك خدمة صغننة قد كده
يزن : انت تؤمري يا ست البنات
دينا : بلدييييي .. المهم .. في وحدة اسمها صوفيا عايزة شوية معلومات عنها
يزن : و دي هجيبلك معلوماتها ازاي ان شاء الله ؟ محتاج اسمها الكامل و لو معاكي صورة بطاقتها
دينا : مش عارفة حلهالي .. اوس يعرفها كويس اشتغلت عنده بالشركة بس انا مش عايزة معلومات عادية .. عايزة حاجات عن حياتها الخاصة
يزن بذهول : ليه يا حبيبتي ؟! عايزاهم في ايه ؟
دينا : عايزة اتاكد لو يمنى بتقول الحقيقة او لا … يعني عايزاك تعرفلي لو البت دي عندها حركات هيهي زي ما انت فاهم يعني
يزن بادراك : اااااه فهمت .. انتي رجعتي لشغل الملاك الحارس و اصلاح العلاقات ده مش كدة ؟
دينا : بالزبط كدة
يزن : و بالاخر كل ده يطلع على قفا الي خلفوني مش كدة ؟
دينا : هو ده
يزن بنفخ : الرحمة يا رب .. ماشي يا ستي انا بجاريكي بس عشان بحبك لولا كدة كنت رميتك بالحجز من زمان
دينا بمشاكسة : ده انا الي بموت فيك يا ضبوطتي .. انا جايبة معايا كيس لب كبير هنقعد نقزقز و نتكلم على كل مخاليق ربنا دلوقتي
*******************************
في صباح اليوم التالي
فتح اوس الستائر و هو يشرب فنجان القهوة بهدوء …. نظر الى حبيبة النائمة وجدها تتعرق و تتنفس بصعوبة
اوس بقلق : حبيبة .. حبيبتي … مالك يا روحي
فتحت عيناها و قالت بفزع : لاااااا
اوس : مالك يا حبيبتي ؟ حاسة بحاجة ؟ تعبانة ؟
حبيبة و هي تتنفس بسرعة : لا .. كان .. كان كابوس … كابوس
اخذها بحضنه و بدأ يملس على شعرها بحب
اوس : ما تخافيش يا روحي .. اهدي
حبيبة بغصة : اوس .. انا مرعوبة بجد .. خايفة اوي
اوس بصدمة : من ايه يحبيبتي ؟
حبيبة : اسر ما قبلش اني اشيله امبارح .. تفتكر ابننا هيكرهني ؟
اوس : ايه علاقة ده بده ؟! اسر متعلق بمامته و ابننا هيتعلق بيكي انتي .. طبيعي يعني البيبي بيتعلق بمامته اكتر من اي حد
حبيبة : اوس انت شايف اني ممكن اكون ام كويسة ؟
اوس : صدقيني هتبقى احسن ام بالدينا .. كفاية حنيتك و طيبتك يا حببتي .. ما تخافيش البيبي مش مسؤوليتك لوحدك .. انا المسؤول عنكم انتو الاتنين .. يعني ما تشيلش هم اوك ؟
حبيبة : انا بحبك اوي .. وجودك جنبي هو الي بيطمني .. اوعا تسيبني يا اوس
اوس بعشق : مش بسيب روحي .. انتي الحب الابدي يا حبيبة
حبيبة : اوس … انا جعانة
اوس بضحكة : ايه النقلة دي .. يلا ننزل نفطر
بعد وقت قصير .. نزلت حبيبة للطابق السفلي بينما اوس ذهب لاجراء مكالمة
كانت النساء جالسات سويا عدا سعاد و خديجة في المطبخ و خولة في شقة تميم
حبيبة : صباح الخير .. فين اسر يا فريدة ؟
فريدة : صباح الفل .. اديته لطنط خولة تاخد بالها منه و قولت اعمل فنحان قهوة يفوقني
حبيبة : فريدة .. هو انتي ظهرلك ستريتش ماركس و انتي حامل ؟
فريدة : طبعا .. و جربت كل حاجة و مش بيروحو
حبيبة بقلق : كدة شكل بطني هيبقى وحش اوي
فريدة : هتعملي ايه ده تمن الامومة
سحر : ايه الهبل ده يا بت .. في كريمات تشيلهم و ما بيبقاش ليهم اثر .. انا خلفت تلاتة و اهو بطني لغاية النهاردة مشدودة تقولي عندي 20 سنة
دينا : ايه الكلام ده ع الصبح ؟ خلاص بقت كل قعداتنا و حديثنا ع الخلفة و قرف المتجوزين دول ؟!
سحر : اتلمي يا بت احترمي وجودي
فريدة : طنط سيبك منها و قوليلي ازاي اختفو عن بطنك ؟
سحر : امي عملتلي خلطة تحفة خلال اسبوع واحد بس كل حاجة اختفت .. حتى عدنان اتصدم .. و عندها وصفات لكل حاجة .. هحكيلكم عليهم بعدين عيب عشان البنات قاعدين
فريدة : ما كنتي تقوليلي من الاول يا طنط بقالي تلات شهور محتاسة و مش عارفة اعمل ايه
سحر : منتي ما قولتليش
حبيبة : بجد يا فريدة انتي حالك اتقلب .. معقولة كل ده من الخلفة ؟!
فريدة : طبعا .. و جايلك الدور يختي .. بصي بشرتي اتدمرت ازاي .. حتى اني تخنت اوي مع الحمل .. كنت باكل زي الجاموسة على اساس كل ده هيروح بعد ما اولد .. ده حتى لبس البيت مفيش حاجة بتيجي على مقاسي
حبيبة : قولتلك وقتها ما تكتريش من الهدوم دي ما سمعتيش مني
فريدة : هففف
غادة : على فكرة انتي الي اوفر يا فريدة .. ع الاقل انتي عايشة في بيت عيلة غيرك عايشين لوحدهم و حياتهم ماشية عادي .. نظمي وقتك شوية هتلاقي الدنيا سالكة معاكي
حلا : بصراحة عندها حق .. مش معقول منظرك ده
حبيبة : ليه ما تجيبي دادة تاخد عنك البيبي شوية
سحر : من ساعة ما ولدت و انا بتحايل عليها و مش بترضى قال مش عايزة ابنها يتربى مع غرب
دينا : يلهوي ع التخلف .. في حد تجيله فرصة يجيب دادة و يرفض يا حمارة ؟
فريدة : انتي الحمارة اتلمي .. ازاي هأمن على ابني مع ست غريبة
حبيبة : حطي كاميرات في الشقة عادي .. او ما تخرجيش بس اهي تشيله عنك شوية و تعرفي تاخدي بريك
فريدة : هكلم تميم و اشوف رأيه
حلا : ليه ؟ انتي ملكيش رأي ؟
حبيبة : حلا اسكتي
اتت كارما و قالت : طنط سعاد بتقولكم اتفضلو على الفطار
سحر : اطلعي اندهي للشباب يلا
*****************************
مر النهار بهدوء و اجتمعو مساءً في حديقة البيت لشرب الشاي
عبد الله : بقيتو شاطرين اوي و عقلتو ما شاء الله
فارس : لا مش كدة يا جدو … كل الحكاية ان الاتنين المشاغبين اتجوزو يعني خلاص مفيش مشاكل تانية
يزن : تقصد تميم و اوس ؟
فارس : هو في غيرهم ؟ ما كل مصيبة كانت بتحصل من وراهم
تميم : تحب امسح بيك الارض و لا تخرس احسن ؟
فارس : لا هخرس بكرامتي احسن
زياد و هو يمشي بآسر : الواد ده مش سهل على فكرة .. انا دوخت و انا بمشي بيه
سعاد : هاته من ايديك الجو سقعة عليه حرام .. فريدة انا هنيمه يا حبيبتي انتي خليكي مع البنات
فريدة : كتر خيرك يا طنط ربنا يخليكي لينا و تفرحي بعيال حبيبة و حلا
دينا بقرف : بقت تتكلم زي الستات الكبار كمان
غادة : ما خلاص بقت مدام .. ما فضلش غير تضرب شعرها اصفر و تبقى زيهم بالزبط
عبد الله : حسين انا كنت عايز اكلمك انت و ايهاب بحاجة كدة
حسين : اتفضل يا عمي
عبد الله : انا عايز فرح حلا و فارس يبقى بعد شهرين بالزبط ايه رأيكم ؟
حسين : انا معنديش مانع ..البنت بنتك يا عمي و حضرتك كبيرنا
ايهاب : بس فارس لسا مش جاهز تماما .. ده لسا يا دوبك حوش شوية ملاليم
عبد الله : انت عارف ان تكاليف الجواز مسؤوليتي انا .. طالما الفرح هيتعمل هنا انا الي هدفع
ايهاب : انا عارف الكلام ده .. بس بتكلم على تحويشته هو .. يعني هيصرف ع مراته منين .. خصوصا اني عرفت ان الهايف ده اترفد من الشغل
بدأ فارس يكح من شدة الصدمة و حلا تضحك على شكله
فارس باحراج : استقلت اقسم بالله انا الي سبت الشغل
عبد الله : ليه ؟
فارس : غادة قالتلي ان الشغل ده حرام
ايهاب : ما تلزقهاش باختك .. انت الي اتخانقت مع المدير و شتمته كمان
فارس : مهو برضو عشان خاطرها ما رضيش يديني اجازة احضر الفرح
عبد الله : و هتشتغل فين يا حنين ؟
فارس : ما انا قدمت اوراقي في الشركة بتاعة اوس و هو وعدني اول ما نرجع مصر هيشغلني عنده
نظر له اوس باستغراب
يزن بخفوت : بيكدب مش كدة ؟
اوس : طبعا
يزن : ربنا يعينك لو اشتغل عندك اكيد هيفقعلك مرارتك
عبدالله : طيب كدة كويس يبقى مفيش مشكلة يتجوز بعد شهرين
ايهاب : انا بقول نصبر شوية هما لسا صغيرين
خديجة : ليه يا ايهاب ما العيال مكتوب كتابهم .. سيبهم يتجوزو و يتلمو بقا
فارس : طالما خديجة تدخلت يبقى نسمع كلامها و لا ايه يا هيبو ؟
ايهاب : اتلم يالا .. خلاص يابا زي ما انت عايز
عبد الله : على بركة الله .. يبقى ترتبو وضعكم عشان هتفضلو هنا شهرين
بعد وقت … ذهب الكبار للنوم و بقي الشباب سويا
دينا : انا عملت شاي بلبن لينا كلنا
حلا بحماس : هو ده .. هاتي بقسماط بقا و دلعينا
فارس : الجو حلو النهاردة ما تيجو نلعب زي زمان
تميم : و الله الجو ده حلو نلعب كورة
زياد : كورة ايه الوقت اتأخر يا باشا
فريدة : انا عاملة حسابي و جايبالكم لعبة تجنن
فارس : عارفينها قديمة و مملة
غادة : مش دي لعبة البطاقات الي اتقمصت حبيبة منها ؟
فريدة : ايوة بس هما عملو منها اصدار جديد و فكرتها حلوة اوي .. استنو هروح اجيبها و اطمن على اسر
ذهبت بسرعة للداخل
حبيبة : حلا اديني حاجة مسكرة
حلا و هي تعطيها شوكلاتة : حاسة بحاجة ؟
حبيبة : لا بس عايزة البيبي يتحرك شوية اطمن عليه
تميم : ما تخافيش الطبيعي ان في الشهر التاسع حركته تقل
فارس : يعم الخبرة .. ايه حولت مسارك و بقيت دكتور نسا و لا ايه
تميم : العيل ده مش هيرتاح الا لما يتضرب على وشه
حلا : انت ليه دايما مخنوق من خطيبي ؟ هو دايسلك على طرف ؟
تميم : اهو انا كدة مبحبش الناس الرخمة
اتت فريدة و جلست على الارض
فريدة : يلا اقعدو اشرحلكم اللعبة و الله هتحبوها اوي
جلسو جميعهم على الارض
يزن : انا من يوما جيت للعيلة دي و انا حاسس نفسي عيل
دينا : ما احلى حاجة بالدنيا تعيشها عيل
فريدة : اللعبة مكونة من 30 بطاقة مقسمين لتلات مجموعات .. مجموعة الاسئلة العلمية و مجموعة الاسئلة النفسية و مجموعة تحدي لو تستطيع
فارس : انا تحدي
فريدة : مش على مزاجك .. في ورق في العلبة دي تسحب منها و تطلعلك المجموعة بتاعتك
حبيبة : طب يلا مين هيسحب اول واحد
فريدة : تميم .. و بعدها هتلف علينا كلنا
تميم : طبعا انا كبيركم .. و البداية من عندي
سحب ورقة تميم ثم سحب بطاقته
تميم : السؤال بيقول ما هو اكثر عنصر وفرة في الكون …. الهيدروجين
فريدة و هي تقرأ عن الورقة : صح
سحبت فريدة و قالت : انا طلعلي سؤال علمي و انا قرأت الاجابات يبقى ما ينفعش اجاوب
فارس : طب خلاص اسحب يا اوس
اوس : ما الرائحة التي ترتبط بذكريات سعيدة لديك ؟
غادة : ايه السؤال ده ؟!
اوس : ريحة الفانيليا
حبيبة باستغراب : و بترتبط بايه ان شاء الله
اوس بضحك : بقالب الكيك الي عملتيه و اتحرق من تحت فاكراه ؟
حبيبة بحدة : و دي حاجة سعيدة يا استاذ اوس ؟!
دينا بخبث : ايوة طبعا وقتها كنتي حامل جديد و هرموناتك بتلعب و فضلتي تعيطي بحضنه يومين
فارس : الله الله ع الرومانسية اوعدني يا رب ده انا غلبان
سحبت حبيبة بطاقة و قالت : اتحداك لو تستطيع اكل مخلل مع نوتيلا .. ايه العك ده
فريدة : انا اتوحمت عليهم مع بعض على فكرة .. قومي يا كارما هاتيلها شوية مخلل و شوكلاته
كارما : حاضر
سحبت دينا و قالت : ما الحيوان الذي يغير لونه … عماتي الحرابيق
يزن بضحكة : و حماوتك الاربعة
دينا : انا حياتي كلها حرابيق ما شاء الله
كارما : خودي يا حبيبة
امسكت حبيبة الطبق من كارما
اوس : لا ما تاكليش منه .. ممكن يجرالك حاجة
كارما : طب ليه تخلوني اقوم من اصله ..الله
حلا : ما ده التحدي كلي يا حبيبة يلا
حبيبة بقرف : لا مش قادرة .. معدتي اتقلبت
حلا : عنك .. هاتي انا هتسلى عليهم
سحب يزن بطاقة و قال : ما الدرس الذي علمته لك الحياة
تميم : الله دخلنا على الفلسفة و المشاعر
يزن : اتلم … انا اتعلمت ان الست هيا اساس البيت و لما ما بتكونش موجودة مش بيكون فيه بيت اصلا
زياد : ارجو التوضيح
يزن : يعني من يوما ما امي ماتت و انا حاسس ان بيتنا مش بيت .. بقيت مركز على شغلي على اساس يعني هو هدفي … بس من يوما جيت للعيلة دي حسيت بالفرق خصوصا يعني لما خطبت دينا و بقى في ست بحياتي
دينا : الله .. سو رومانتك
كارما بتأثر : انت لغاية النهاردة حاسس انك محتاج لمامتك ؟
يزن : طبعا .. الام ما حدش يقدر يعوضها
حلا و هي تأكل : سؤالي بيقول ماذا لو سافرت لمكان بعيد و مهجور ما اهم خمس اشياء ستأخذها معك ؟
فارس : اكيد هتاخدني انا اولهم
حلا : لا .. هاخد خمس تلاجات فيهم اكل كتير و اتكيف انا بيهم لوحدي من غير ما حد يقر عليا
لارا : طفسة هقول ايه
سحب فارس بطاقته و قال : اتحداك ان تقول جملة ” فراش فراس مفروش ” ثلاث مرات و بسرعة
زياد : اهو جالك تحدي يلا
فارس بسرعة : فراش فراس مفروش فراس فراشمفروس .. فشار فراش مشروس
حلا بضحك : يخربيتك هموووت
زياد بسخرية : اومال .. فارس ملك التحديات
سحبت كارما و قالت : ما الشيء الذي تخاف الاعتراف انك تحتاج اليه
غادة : ها قولينا
كارما بغصة : حضن ماما
زياد : ربنا يرحمها يا حبيبتي
اخذها بحضنه بينما الجميع يتبادلون النظرات
كارما و هي تمسح دموعها : عن اذنكم .. كملو لعب انا هروح انام
ذهبت من امامهم
دينا : هقوم اشوفها
زياد : استني انا هكلمها …….. يتبع
مغامرات عائلية 2
همس كاتبة
- لقراءة باقي فصول الرواية أضغط على (رواية مغامرات عائلية)
لو عاوز تقرأ الفصول الجديدة من الرواية دي بشكل حصري قبل صدورها
أنضم لقناتنا على تليجرام (من هنا)