رواية رغبة في الإنتقام الفصل السادس عشر 16 بقلم نوسة حمد

رواية رغبة في الإنتقام الفصل السادس عشر 16 بقلم نوسة حمد

 

 

البارت السادس عشر

 

#رغبة_في_الانتقام16
#نوسه حمد

اليوم الوحيد الفرحت فيهو من جوه قلبي وراجعه مبسوطه لقيت مكالمات من عم احمد رجعت ليهو قال لي نوسه الحقي ابوك انا بقيت مخلوعه وضربات قلبي زادت قال لي ابوك والله ما عارف عندو شنو بس بين الحياه والموت ومجدوع ف المستشفى ليهو اسبوع وانا م كنت عارف لغايه ما لاقاني منشور منزلو دكتور ولا ممرض من دكاتره الامتياز الشغالين في شرق النيل ديل منزل صوره ابوك وصوره بطاقتو وقال الحاج دا ليهو اكتر من اسبوع مجدوع ف المستشفى الرجاء من يتعرف عليهو يجيهو انا مشيت وفي الطريق بتصل عليك وانتي م بتردي وصلت حدي هناك ولقيتو بحاله تصعب علي الكافر وماف زول مهتم بيهو ولافي زول جنبو اتكلمت مع أداره المستشفي وقالو محتاج عنايه والعنايه عندهم مافيها سرير فاضي حولوني مستشفى خاص قدرت دفعت حق الاسعاف وتزكره المستشفى بس والله ي بتي ربنا عالم بي م عندي قروش للمستشفي الخاص اهل ابوك ديل وين قلت ليهو والله اخباري مقطوعه منهم ومن زمان م بجونا وما بنعرف عنهم حاجه وانا بكره بتحرك اجيهو ان شاءالله مهما كان دا ابوي م بخليهو مجدوع جريت كلمت نادر قلت ليهو ابوي محتاج لينا قعد اضحك قال لي محتاج لينا ولمن نحنا كنا محتاجين ليهو ولمن امي شالت الحمل براها ولحظه الولاده احتاجت ليهو يقيف جنبها ليه م حسا بينا ليه م وقف جنبنا قلت ليهو نادر عليك الله انسا الماضي الانسان سمو انسان عشان بنسا قال لي بنسا اي شي الا قسوه ابوي الدخلتني في حاله نفسيه ودمرت حياتنا ولو كنا معاهو للان كان باع واشترا فينا كان دمرنا كلنا ودايراني اقيف جنبو دا ابسط عقاب لي ابوي لانو انسان م مسؤول انا بتمني نهايه اي راجل اكون ظالم وما مسؤول زي نهايه ابوي كده قلت ليهو نادر انت ليه قلبك قاسي كده قال لي م تحتاري دي جينات ابوي وطيبه امي وحنيتها غطت شويه عليها صارعت جيناتو مع جينات امي عشان اكون ف الوسط غلبني والناتج كان طفل مريض نفسيا قلت ليهو نادر مهما كان والحصل من ابوي خليهو دا ابونا اسمو مرتبط بي اسمنا قال لي للاسف نحنا ح نكون الاولاد الوحيدين البربطنا بي ابوي الاسم عشان كده ي نوسه انا م ح اخليك تتحركي شبر من هنا قلت ليهو لا ي نادر زي ما نحنا م رضينا تعامل ابوي وقسوتو معانا م ح نعمل ليهو زي م عمل لينا وانت لو م ح تمشي انا ح امشي ي نادر ودا ابوي يا نادر لو ختيت في رقبتي سكين م ح اقعد انت امسك اخواني واميمه وديها لي ام مهند واديني قروش عشان امش المستشفى قال لي م عندي قروش بديك حق المواصلات بس لكن قروش لعلاج م عندي ولا تعشمي اديك قلت ليهو نادر م معقوله بجد م اتوقعت منك كده قال لي كويس انها جات ع كده انا لو علي كنت ح اقتلو سعادتي كانت واقفه بموت الراجل دا قلت ليهو استغفر قال لي لو م الاستغفار واني رجعت لربنا كان اكون انا هسي مرتكب جريمه اتحدث بيها المجتمع وابوي لو فيهو خير اهلو ما للان م بعرفو عنو شي بس ابوي انسان انقطع من اهلو وهانت عليهو عشرتهم قلت ليهو نادر مهما كان دا ابونا ماف انسان بقدر يحاسب أبوهو دا نصيبنا من الدنيا الاب القاسي ح نقول لي ربنا لا ع العموم يا نادر انا ح اقيف مع ابوي وهسي امي لو كانت موجوده والله كانت ماتت معاهو عديل ما كانت زحت منو شبر وكل انسان بي تصرفاتو وانت شكلو القساويه متغلبه عليك وكانت دموعي في عيني والهم داير يكتلني م عندي زمن اشتغل عشان ادفع لي ابوي حق المستشفى واموري جايطه كلها اليوم داك كلو م نومتا والصباح بدري غشيت ام مهند وحكيت ليها بي ابوي ومشيت وصلت ابوي وكانت حالتو صعبه وما واعي الدكتور قال لي ابوك محتاج عنايه وليه خليتو وصل للمرحله دي ابوك من بدري عندو تليف في الكبد وهسي شبه الكبد خلاص وعندو مشاكل داخليه كتير من الخمره البشربها انتو ليه م خليتو امتنع عن الحاجات دي وهو زول م صغير وشكلو ليهو شهر حاسي بالالم كان تتحركو بيهو طوالي ع الاقل كانت اتعملت ليهو عمليه ونجحت قلت ليهو نحنا كنا مافي ي دكتور وماف طريقه تعملو ليهو العمليه قال لي للاسف ووضعو الحالي م مستقر محتاج عنايه انزلي الحسابات ادفعي حق العنايه وتعالي نزلت الحسابات البت الشغاله ادتني رقم خرافي انا م حصل مسكتو في يدي محتاره اعمل شنو م عديت دقايق وعم احمد جا وكفر لي وقال لي نادر وينو وريتو الحاصل قال لي نادر ما مفترض اغلط غلطه ابوهو وابوكم محتاج ليكم حتي لو هو كعب انتو لحمو ودمو اها عملتي شنو قلت ليهو حالتو خطره ولازم عنايه قال لي القروش كتيره صاح قلت ليهو عمري م مسكتهن في يدي قال لي كدي حاولي اصلي لي اعمامك وخيلانك لانو دا الوقت المحتاجاهم فيهو قلت ليهو ان شاء الله جازفت لي رقم لي اعمامي واتصلت وكلمتهم قالو م عندهم ولا جنيه سالتهم قلت ليهم ابوي م عندو ورثه اي شي تبيعو قالو لي ابوك خلا لينا ورثه باع الورانا والقدامنا اتكلمت معاهم ومن غير نتيجه وردهم دا كان حصاد صله رحمو القاطعها ولهيو بالمحرمات اتصلت علي خيلاني وحكيت ليهم قالو لي ابوك لو لقينا ف النار نزيدو حطب ونحنا ممكن نساعدك انتي بس في ابوك م ح نساعدك قلت ليهم انتو مستحيل تساعدوني وانا م بتوب منكم والله أسامحكم والله لا ضوقكم الضوقناهو قالو لي الضقتو قسمتكم قفلت الخط في وشهم كلامهم كلو نكد وذم وناسيين انو القسمه هي البتلعب دور رجعت لقيت عم احمد زاتو محتار قال لي اها ان شاء الله خير قلت ليهو خير من وين اجي اهل امي وابوي الاتنين دا اصعب من دا وخلاص دا الحد الفاصل بيني وبينهم والله تاني نهاي م بتصل عليهم قال لي اعوذ بالله من قطع صله الارحام قلت ليهو لي خير ان شاءالله.

وعلي فكره يا عمي نحنا ما البادرنا بقطعها من قومنا ونحنا صغار لا لقينا اب لا لقينا خال لا لقينا عم والحمد لله ع كل حال انا حاولت كتير ادخلهم في الصوره بس هم ما عايزننا عديل وانا ابوي بتصرف ليهو واخواني بربيهم والله لا حوجني لي زول احتمال دي اكتر حاجه اتعلمتها من امي الصبر وانها نهاي م مدت يدها لزول بس مشكلتي الان انا م بقدر اخلي ابوي واشتغل ومابقدر اقعد مكتفه يدي واعاين ليهو بموت ياربي احلها كيف فجاه اتزكرت ذكي انو اكبر جراح حكيت لي عم احمد بيهو قال لي دا راجل ترفضيهو ي بتي وحكيت ليهو انو هو الاتبرع ليهو بالعمليه بس منعني اني اتكلم وهسي لو ما السيره جابت سيره م كان حكيت قال لي شوفي ي بتي نصيحتي ليك الراجل دا لو للان دايرك اتزوجي مهما كانت الاسباب اتشجعت بكلام عم احمد واتصلت عليهو ع طول ردا علي قال لي كيفك ي نوسه وبقا يعتزر لي علي كلام ولدو قلت ليهو م زعلانه وانا اتصلت عايزاك في خدمه قال لي انتي تأمري قلت ليهو موش انت دكتور قال لي اي اخصائي جراحه خير ان شاءالله وعافيه قلت ليهو ابوي داخل في غيبوبه والدكتور قال عندو تليف ف الكبد قال لي ياساتر وانتي وين هسي وريتو اسم المستشفى قال لي المستشفى دي المدير بتاعها اسمو دكتور وائل امشي شوفي قولي ليهو جاياك من طرف دكتور ذكي قلت ليهو طيب طوالي مشينا نسال من المدير دخلونا ليهو قلت ليهو جاياك من طرف دكتور ذكي واديتو ليهو بالتلفون وشكلهم بعرفو بعض شديد قال ليهو علي العين والراس م محتاج توصيه وقفل الخط قال لي الف سلامه للوالد وم تشيلي هم وربنا اتم ليكم علي خير ذكي دا ما راجل ساهل وانتي شكلك طيبه تستاهليهو عرفت ذكي قال ليهو دي البت العاوزها قلت ليهو تسلم ي دكتور طوالي طلع قدامنا ومشينا الانعاش المرقد فيهو ابوي وفي ثواني رفعو ابوي العنايه وركبو ليهو الاجهزه وقالو لي ان شاءالله وضعو يستقر وادوني غرفه رهيبه قالو لي اقعدي فيها لو احتجتي لاي شي م بنقصر منك قلت ليهم كده انتو م قصرتو جزاكم الله الف خير ربنا اديكم العافيه عم احمد قال لي كل يوم بجي اطمئن عليكم وزي م قلت ليك راجل زي دا هو البسندك وبقويك انتي محتاجه السند ي بتي فكري في نفسك ما تتلهي بالدنيا قلت ليهو حاضر بعد نص ساعه اتصل علي ذكي قال لي انا بكره بتحرك اجيكم ان شاءالله قلت ليهو لا م بتقصر جزاك الله الف خير قال لي معقوله دا نسيبي لازم اجي اقيف جنبو واطمئن عليهو بنفسي ولا انتي رايك شنو ولا ما نسيبي سكت غلبني ارد قال لي نوسه انا م بضغط عليك بس بقولا ليك لاخر مره نفسي اشيل معاك الاجر في اخوانك وتكوني ام اولادي قلت ليهو ربنا يهون ان شاءالله وبقيت م قادره افكر وماا حسبت لي اي شيء همي ابوي ف اللحظه ديك ومابي يدي حيله قلت ليهو اديني بس يوم الليله استخير وبكره برد عليك قال لي جدا وانا استخرت ولقيت خيرتي معاك قلت ليهو طيب بكره انا بديك رد قال لي ابشري بالخير ولو ما ارتحتي للموضوع ورفضتي ما تشيلي هم ابوك انا كفيل بيهو ودا جزء بسيط من جمايلك علينا ياست البنات قلت ليهو جزاك الله الف خير في ميزان حسناتك دي المره التانيه تمد يدك لي قال لي عقبال م امد يدي ليك وانتي متوجه بالزفاف ………..يتبع

 

 

 

 

 

• لقراءة باقي فصول الرواية أضغط على (رواية رغبة في الإنتقام)