رواية غيث ونوسة – اسرار خلف الأبواب الفصل العاشر 10 بقلم نوسة حمد

رواية غيث ونوسة – اسرار خلف الأبواب الفصل العاشر 10 بقلم نوسة حمد

 

 

البارت العاشر

 

#اسرار_خلف_الابواب10
#نوسه_حمد
طلعت واول مره في حياتي اطلع في وقت متاخر ومشيت ماف زول شافني قبل م امش كتبت ورقه وختيتا لي سحر جنبها كتبت فيها ابوي وامي انا متاكده بعد تعرفو اني هربتا ح تتعبو شديد بس احساسكم م ح يكون زي احساسي لمن غيث يشيل مني ولدي ولدي صغير ومافاهم شي واعفي لي يا ابوي الله عالم قدر شنو تعبت عشان توفر المبلغ لي غيث بس يا ابوي انا اهون لي اطلع وما اشوفك تبيع البيت وما تخافو علي ربنا عالم اني غلبت حيله والله يجازي السبب واعفو لي وخليكم واثقين اني م ح اغلط بس ادعو لي القا مكان اعيش فيهو انا وولدي لغايه ما الد وتاني ربنا كريم ماتتعبو تفتشو لي لانو م ح تلقوني انا ح اقعد في مكان ما ح تعرفوهو وغيث لو جاكم اقرو لي الورقه دي وقولو ليهو انا م عافيه ليهو لمن اموت واولادي بقدر اربيهم
متاكده من سحر ح تقرا ليهم الكلام دا متاكده انو امي وابوي ح يتعبو شديد بس سحر ح ترتاح مني وح تنبسط شديد
بقيت ماشه وولدي يبكي من الحمه وبقيت واقفه في نص الظلط وماف عربيه جات والوقت ماشي يمر والشمس خلاص عايزه تشرق مشيت من حلتنا مسافه طويله لمن شبشبي اتقطع وبقيت ماشه حفيانه وفي نظر كل الماره انا مجنونه ودا كلو يهون وولدي يكون في حضني لقيت لي دكان في الحله الجنبنا مشيت وقفت وقلت ليهو عندك فلاجين اطفال قال لي عندي ومالك انتي حفيانه قلت ليهو شبشبي اتقطع وماشه مسافه بعيده برجليني قال لي النجيب ليك سفنجه قلت ليهو م عندي قروش غير الف للحبوب لانو ولدي محموم قال لي انتي شكلك بت ناس وشكلك سليمه العقل وما عارف الوصلك للمرحله دي شنو بدعي ليك ربنا يهون ليك ويسترك انتي وطفلك ولو مقطوعه ارح اقعدي مع اولادي البيت بشيل ميه قلت ليهو جزاك الله الف خير دعواتك دي بالدنيا انا اصلا م عايزه اقعد مع ناس انا عايزه اطلع من الولايه طليقي مهددني اشيل ولدي قال لي يا ساتر طيب اهلك وين ليه م اتكلمو معاهو قلت ليهو ابوي تعب وعايز يبيع البيت عشان يديهو القروش ويخلي لي ولدي قال لي راجلك دا م راجل بي قلبي قلت ليهو لو عرفت انو متزوج مره متزوجه ف السر ح تقول شنو قلت ليهو راجلي الله يسامحو هو السبب في الانا فيهو دا قال لي طيب يا اختي ح تعملي شنو انا اساعدك بشنو قلت ليهو م بتقصر انا ح اشوف اي عربيه تطلعني من الولايه دي وامش مكان طليقي م يعرفني فيهو قال لي الله معاك قطعتي قلبي وربنا برحمك وح تلاقي ناس احسن من الفارقتيهم وربنا يسترك قلت ليهو ان شاء الله اداني الحبوب وجاب لي معاهم سفنجه قلت ليهو لا لا م عندي قروش قال لي معقوله يا اختي انا والله لو علي تعيشي معاي عديل سفنجه شنو البشيل قروشها وعلي الطلاق ديل قروش اتواصلي بيهن ما تفتحي خشمك بي كلمه عاينت ليهو ودموعي مغرقاني قال لي معليش يا اختي ان شاءالله حياتك ح تتغير وطالما اخترتي انك تطلعي اطلعي بس حافظي علي نفسك وانتي ظاهر عليك انك زوله ملتزمه انا بعرف البت من وشها وولدك الشايلا دا ح ينفعك وح يجي زمن علي ابوهو ويندم انو طلقك وكلو لخير قلت ليهو ان شاء الله ادعي لي كل م تتزكرني قال لي ان شاء الله مشيت منو حسيت الدنيا بي خيرا اديت ولدي الحبوب حسيت الحمه اختفت لقيت لي شجره قريب للخلا رقدت فيها وفرشت لولدي البشكير ورقدتو فيهو ونومتا نومه صحيت بي ولد بصحي فيني قال لي مالك راقده هنا قلت ليهو انا تايهه قال لي ولدك دا بقرصو دبيب قومي بيهو ارح بيتنا قلت ليهو لا انا بس عايزه لي عربيه تطلعني قال لي ماشه وين انتي قلت ليهو انا ماشه اي مكان غير ولايتنا دي قال لي ربنا يسهلك ليك لو عندك مشكله انا ممكن احلها ليك قلت ليهو م بتقصر بس ادعي لي في كلامو معاي داك جا قلاب بتاع طوب وقفو وركبني معاهو وبتاع الدفار نهاي خشمو م فتحو معاي نزلني في مكان م عرفتو وين قال لي انا اخري هنا قلت ليهو م بتقصر شيلت ولدي ونزلتا. وبقيت ماشه والجوع داير يكتلني لقيت لي مطعم في المكان النزلني فيهو قلت ليهو عندك شنو انا عايزه اكل قال لي انتي من وين اكيد م من حلتنا قلت ليهو اي انا ضايعه قال لي تمام المطعم دا م بقعدو فيهو نسوان اتفضلي علي البيت اكلي واستحمي وارتاحي قلت ليهو لا لا انا بشتري منك اكل قال لي م عندي مشكله انا بس افهميني المطعم دا حق رجال وهسي بتملي رجال انا الما برضاهو لي اختي م برضاهو ليك ماتخافي عندي اخوات قدر اقنعني ووداني بيتهم قال ليهم دي قاطعه الطريق اكرموها وخلوها ترتاح وليكم الاجر امو طيبه شديد رحبت بي وهم النوع الناس الكريمين ديك اكلوني وشبعوني شبع لمن حسيت نفسي دايخه بس خايفه قلت ليها يمه انا نعسانه وانا م بعرفكم ممكن يمه تعتبريني زي بتك وتقفلي علي الباب دا اولادك ما يجو داخلين لغايه م اخد نومتي واصحا قالت لي يابتي م تخافي انا والله بي بناتي واولادي ما اشكرن ليك بعد يعرفو في البيت في مره غريبه برقدو في الديوان المره كلامها طمني مسكت ولدي علي واتحصنتا ونومتا نومه طويله ما صحيت الا بليل وهم زاتن نايمين لمن صحيت صحو بي قال لي م حبينا نصحيك قلت ليهم م بتقصرو انا ماشه قالو لي تمشي كيف بليل دا نهاي م بتمشي قلت ليهم عليكم الله خلوني النمش انا الطريق وراي طويل قالو لي مابنحميك بس خلي الشمس تشرق انتي ولدك صغير اقنعوني وتميت نومتي الصبح خليتهم نايمين وشيلت ولدي وطلعت لحسن حظي لقيت لي عربيه طالعه من حلتهم اشرت ليهو وقف قال لي ماشه وين قلت ليهو انت ماشي وين محل تمش نزلني حسا بي اني عايزه اطلع وبس قال لي انتي م من الحله صاح قلت ليهو اي انا م من الحله وبقا يسال فيني واجاوب سالني مالي طالعه حكيت ليهو بطليقي قال لي ربنا ينتقم منو اوعك ترجعي وان شاءالله ح تلقي الاحسن منو انتي زوله طيبه قلت ليهو تسلم قال لي هسي ح تمشي وين قلت ليهو م عارفه والله بس عايزه اشق طريقي براي اربي ولدي والفي بطني دا قال لي ربنا يحفظك ويسترك لو احتجتي لي اي حاجه دا رقمي انا مقيم في السعوديه جيت لي عرس اختي قلت ليهو ربنا يتم علي خير
قال لي امين يارب وعقبالي قلت ليهو ان شاءالله قال لي شوفي والله انا الولد الشايلا وببكي دا قطع قلبي ومابخليك براك قلت ليهو لا لا عليك الله والله انت م قصرت وكل احساسك وصلني بس انا زي م وريتك عايزه امش مكان بعيد قال لي يعني تمشي وين قلت ليهو اي ولايه تكون بعيده ماف زول يعرفني فيها قال لي انا بقترح ليك كسلا ولا بورسودان ولا القضارف قلت ليهو كلهن بعرفن كاسماء ولايات بس هم علي وين انا م بعرفهم قال لي م تخافي انا بركبك لغايه م تصلي قلت ليهو لمن اصل الله كريم انا من يوم طلعت لاقيت تلاته رجال كلهم اولاد ناس وانت رابعهم اتعاطفو معاي واثبتو لي انو الدنيا بي خيرها ان شاءالله ربنا يوقع في طريقي تاني اولاد ناس قال لي ان شاءالله وركبني بورسودان ودفع لي التزكره واداني قروش كتيره ابيت اشيلن بس حلف والبص اتحرك وانا دموعي نهاي م وقفت ما بقدر علي التلتله دي من قومتا ابوي م حوجنا نطلع اتزوجت غيث وكنت عايشه في نعيم وكان بمثل علي بس نهاي م قصر مني مرات بقول اريتني لو بقيت عمياء وطرشه وما اتكلمت بس لمن اتزكر انو اتزوج سلمي الخادعاني بي خوتها قلبي بنقسم النص ودموعي نهاي م وقفت وكانت قاعده جنبي بت قالت لي معليش ما عايزه ادخل بس حاساك مهمومه وشايله حمل كبير مالك قلت ليها لا لا عادي وحكيت ليها قالت لي معليش بس تاكدي انو قدرك احلي وما تهمي انا كمان ماشه بورسودان لاول مره ح تلاقيني صحبتي الببقا علي ببقا عليك وانا كده كده ح ااجر في داخليه نشوف داخليه ونأجر فيها الاتنين قلت ليها الله يباركك انا كنت خايفه قالت لي باذن الله م ح تجينا عوجه وماتهمي كلام البت طمن قلبي بس الدنيا داسه لي شنو م عارفه ودا الحا نعرفو الحلقات الجايه بأذن الله ……..يتبع

 

• لقراءة باقي فصول الرواية أضغط على (رواية أسرار خلف الأبواب)