رواية جبروت جد الصعيد الفصل الرابع عشر 14 بقلم ياسمين علاء الدين

البارت الرابع عشر

جبروت حكم جد الصعيد

ال١٤

سبحان الله وبحمده سبحان الله العظيم

اليوم التالي

الكل بيستعد للفرح

حنين وهي بتزغرد : مبروك يا شهد . طالعه كيف القمر
. شهد : انا دائما حلوه واحلي واحده كمان

حنين بصت لزهره وضحكو الاتنين.

حنين : اما اروح شوف ورده جهزت وله لا

زهره : هو جدك مصمم برضيك يجوز البت وهي لسه صغيره

حنين : ما انتي خابره اللي فيها
دخلت حنين اوضه ورد كانت لابسه فستان وشكلها صغير خالص وجميل

حنين ؛ قمرين
ورد : شكلي حلو
. حنين : احلي من الحلو .

ضحكت ورد ..

…

وصل الماذون وكتبو كتاب حمزه علي شهد .. وكتاب شهاب علي ورد

ضرب نار في السما احتفالا بزواج الاحفاد

الجد لاول مره ياخد عكازه ويرقص وسط احفاده بسعاده .

بعد ليله طويله من الاحتفالات

حمزه خد عروسته علي بيته مع زفه كبيره ..

…

ورد كانت واقفه في الجنينه بتكلم حنين وزهره

شهاب قرب عليها : مبروك يا عروسه
ورد بخجل : الله يبارك فيك

حنين : شوفت كيف وقعت علي بوزك
شهاب : احم .. احترميني شويه قدام مراتي

زهره : عم يقول مرته . هههه .

حنين : شباب بقي. احنا كنا أكده في لاول

سمعت صوت حامد : ودلوقيت انتي ايه
. حنين : شباب برضو يا ابو الصحاب

ضحكو عليها .. حامد : اعقلي هتربي الواد كيف

حنين : هجننه زي ما جننت ابوه
. زهره : لا وانتي صادقه هو اللي هيربيه زي ما ربا امه

حنين : والله لاضروبك

لسه هتجري وراها كان حامد مسكها : رايحه فين يا هبله . انتي ناسيه انك حامل

حنين : وه . نسيت خالص

حامد : بعد أكده هعلق ورقه علي صدرك كيف البقره ما بتعلق جرس

حنين : يووه يا حامد وطي صوتك بقي . هيسمعوك ويضحكو عليك ..

حامد : محدش يقدر يضحك عليكي يا ام عتريس
حنين : عتريس مين

حامد : عتريس ولدنا

حنين : علي جثتي اسمي عتريس
حامد : هنسمي عتريس بقي
زهره ضحكت : حرام عليك . ده اسم .. الاسامي كتيره

حامد عشان يغيظ حنين ؛ عتريس اسم زين

حنين : ولدي مش هسميه عتريس. ريح حالك

شهاب : يا ربي مش اما تعرفو الاول نوع الجنين اتخانقو علي الاسم

حنين : امي قالتلي اني حامل بواد
شهاب : عرفت ازاي
. حنين : من شكل بطني ومن وشي . عشان خاسه واكده

زهره : اصلهم بيقولو الحامل انا تخص بتكون حامل في ولد وأما تتخن بتكون حامل في بنت

شهاب : غريبه اوي الحكايه دي .
ورد : ده علم روكا مش حقيقي
. حنين : مخبرش. بس زي ما تقولو هي خبره

علي انضم ليهم : بتتحدتو عن ايه

كملو سهرتهم مع بعض

…….

في بيت حمزه

دخل حمزه وهو شايل شهد

شهد : نزلني خلاص احنا بعدنا عن. الناس . الشوو خلص

حمزه عاند معاها : شووو ايه

شهد : الشوو دي كلمه انجليزي لو مش فاهم يعني معناها استعراض وانا بقولك الاستعراض خلص .

حمزه ضرب باب الغرفه برجله ودخل بيها نزلها علي السرير : تكونيش شايفاني جاي من ورا الجاموسه عاد وله ايه

شهد ؛ يعني انت جاي منين ، مش من ورا الجاموسه برضو

حمزه مسك أيدها بغضب : انا عمري في حياتي ما رفعت يدي علي حرمه بس شكلي أكده انتي اول واحده هرفع يدي عليها . عشان اربيكي. تتكلمي معايا بأدب
انا راجلك من انهارده قلت الادب والصوت العالي والأسلوب الزباله ده مش عليا أنا . أهنأ في احترام . لو شوفتك بس في مره شايفه نفسك علي خلق الله . هكسر مناخيرك دي .فهماني وله لا يا بت الحلال

شهد عيطت وحركت رأسها بنعم بسرعه

حمزه : انا بقولك اهو حياتنا انا اللي هديرها . انا راجل البيت اقول تروحي فين وامتي وانتي أهنأ ست البيت وملكته محدش يقدر يدخل بيتك من غير استاذنك . اللي اقولك عليه تسمعيه ويكون حلقه في ودنك

شهد مسحت دموعها : ماشي

اتنهد حمزه وبصلها وهي بتعيط .. شهد جميله بس هي مشكلتها انها مغروره وشايفه نفسها احسن من الكل والناس اقلل منها .. بس هي محتاجه اللي يحتويها ويحسسها بالحب

حمزه : مكنتش عايز اول حاجه بينا تكون أكده. بس انتي طابعك واعر ولازمن ادبحلك القطه ..

شهد بخوف : لا . انا بخاف من القطط . والله هسمع الكلام

ضحك حمزه بصوت عالي : مندبحش القطط احنا بندبح حاجه تانيه

شهد : حاجه ايه
. حمزه وهو مستمتع بقلقها : الفراخ يا شهد ..
تعالي نقعد ناكل . انتي اكيد.جعانه

شهد : لا مش جعانه انا عايزه انام

حمزه : دلوقيت .

شهد : اه . عايزه انام لوحدي محدش معايا .. هنام علي السرير وانت نام بره الاوضه

حمزه : معندناش رجاله بتنام بره أوضتها

شهد : خلاص هنام انا بره

حمزه : ومفيش حريم كمان بتنام بره اوضتها

شهد بتعيط ..

حمزه : نامي يا شهد . نامي .
شهد قعدت علي الكرسي : مش هنام .
حمزه : غيري الفستان وكلي

شهد :. لا . مش عايزه اكل وله اغير الفستان

حمزه : براحتك انتي اللي هتتعبي مش انا . اللي ياكل علي ضرسه ينفع نفسه

بعد وقت

كانت شهد نامت مكانها علي الكرسي . اتنهد حمزه وراح شالها ونيمها علي السرير

….

عدت الليله

والصبح صحيو علي خبر موت جدهم وهدان القاضي

كانت صدمه علي الجميع لسه كان بيرقص امبارح في فرح حفيدته …

اتجمعت العيله كلها مع بعض وتم دفن الجد في مقابر العيله .

بليل كان العزا…

كان في كتير فرحانين بموت الجد . أولهم كان علي اللي ارتاح من تحكماته

حامد كان اكتر واحد حزين علي موت جده لانه كان قريب ليه …

بعد ٣ ايام العزاء

وصل المحامي ومعاه الوصيه اللي الجد كتبها وهي أن الميراث هيتقسم بشرع ربنا بين الرجال والنساء

علي: اخيرا ارتحنا من تحكماته
حامد : بدل ما تقول ربنا يرحمك يا جدي .
علي: ربنا يحاسبه علي اللي عمله فينا. اهو جوزنا كلنا غصب عنينا

حامد وقف بعصبيه بس حمزه لحقه بسرعه ومسك أيده : اهدا يا حامد مش أكده . سيبه يقول اللي عايزه

علي : انا هسافر القاهره وهبيع الارض

حامد : أرضنا متروحش الغريب

علي : خلاص لو عايز تشتري الارض اشتريها انت

حامد : هشتريها

ابو علي : انت عتقول ايه. كيف هتبيع ارضك . هتقطعنا ياعني

علي: يا بوي. انا معيزش اعيش اهنا . تعال عيش معايا انت وامي واختي

ابو علي: احنا مش هنسيب ارضنا وله بلدنا

علي : خلاص هاخد ورد اختي

شهاب: ورد مراتي مش هتروح في مكان

علي: انت صدقت نفسك وله ايه . ورد دي لسه عيله صغيره .

شهاب: بس قدام الناس كلها مراتي وكتبت كتابها .. واحد اما نتجوز هي عايشه مع والدها ووالدتها انت ملكش حكم عليها . احكم علي مراتك

زهره اتوترت .. وعلي بصلها بشر: ههه . انتم متعرفوش وله ايه مش انا طلجت زهره

هنا وحامد كان جاب اخره منه وهجم عليه ضربه بعنف

بعدوه عنه بالعافيه . زهره جريت علي فوق قبل ما حامد يكلمها وهو متعصب كده

. ممدوح ابو زهره : طلجت بنتي ليه .. هي دي صله الرحم

علي مسح الدم علي بوقها ومناخيره: انا معحبهاش . بحب واحده غيرها وهي كمان معتحبنيش. وانتم عارفين ان الجواز كان مصلحه عشان الفلوس.

حامد : سيبني يا حمزه . خليني اقتله و اشرب من دمه

حمزه : ميستهلش توسخ يدك بدمه

علي ضحك : عايز ٦ مليون في الأرض يا اما هبيعها لحد غريب

حمزه : بكره هيكونو عندك الفلوس .

علي : تمام ..

طلع علي أوضته

حامد : فين زهره

شهاب : طلعت علي فوق وحنين معاها

طلع حامد علي اوضته. وابو زهره كان زعلان من اللي عمله علي .

…..

شهاب خد ورد يكلمها : ورد ، انتي مش عايزه تكملي معايا زي ما اخوكي قال

ورد : انا مش عارفه

شهاب اتنهد : بص يا ورد . انا بحبك ومن هنا لحد اما تكوني جاهزه للجواز انا معاكي خطوه بخطوه ، مش غصب عليكي في حاجه

ورد : يعني هتسبني اكمل تعليمي

شهاب : هسيبك تكملي تعليمك .وتحققي كل اللي تتمنيه

فرحت ورد : خلاص موافقه

…..

حمزه رجع مع شهد بيتهم

شهد : حمزه انا عايزه اطلق
حمزه : روحي نامي يا شهد. وخلي يومك يعدي

شهد : انت عارف اني كنت متجوزاك عشان جدي غصب عليا. زي ما غصب عليك عشان تتجوزني
حمزه : محدش يقدر يغصب عليا بحاجه . انا اتجوزتك عشان عايز اتجوزك .. طلاق مش هطلق

شهد : بس انا عايزه اطلق . انا هاخد فلوس الميراث واعمل اي مشروع في القاهره وأكمل حياتي اللي هي هناك مش هنا .

حمزه : والناس تقول عليكي ايه اما تتطلجي بعد ٤ ايام.

شهد : انا ميهمنيش الناس تقول عليا ايه .

حمزه: هتعيشي لوحدك . اخوكي هيكمل حياته هنا. انتي بقي ليكي مين تاني

شهد : انا مش محتاجه حد . انا هكمل حياتي بالشكل اللي انا عايزاه . هتفضل علي نفسك تعيش مع واحده مش عايزاك

حمزه :لع . مش حمزه اللي يعيش واحده معاه غصب. بس عشان صله الرحم واسم جدك ، اصبري لأربعين جدك وبعدها هطلقك وتروحي لحالك

شهد : بجد

حمزه : بجد

*******

حامد كان بيسمع أخته وهي بتحكي عن معامله علي ليها وانه من اول يوم وهو قالها أنه بيحب مني زميلته . غير معاملته ليها علي أساس أنها أقل منه وأنه ضربها وفتح دماغها و هي عاشت مع الدكتوره اللي كانت بتعالجها بعد ما طلقها ومسالش فيها…

حامد جواه غل من علي. ازاي يقبل علي نفسه أن بنت عمه اللي من لحمه ودمه تعيش مع ناس متعرفهمش

حامد : انتي ليلتك سوداء معايا .هقتلك د
حنين : ليه يا حامد . كنت عايزها تعمل ايه . تيجي وتقولكم علي ضربوني
حامد : ايوه مش تقعد مع ناس منعرفهاش

حنين : هي عملت اكده عشان جدك كان يرجعها تاني علي زمه علي وهو يفضل يطنط عليها ويقل منها . كفايلكم عاد ظلم

حامد بصلها وبص لأخته اللي بتعيط

زهره : اللي تحكم عليا بيه يا خويا انا هوافج عليه . بس احب علي يدك ما ترجعني للبني ادم ده تاني . مش عايزه اعيش معاه

. حامد هيرد بايه؟؟
*****

يتبع

لقراءة باقي فصول الرواية أضغط على (رواية جبروت جد الصعيد)

البارت الرابع عشر

اترك تعليقاً إلغاء الرد