رواية خلف الابواب المغلقه الفصل الثاني 2 بقلم مشاعر مبعثرة

رواية خلف الابواب المغلقه الفصل الثاني 2 بقلم مشاعر مبعثرة

 

 

البارت الثاني

 

#خلف_الابواب_المغلقه_2
بقلمي : مشاعر_مبعثره
.
طبعا في اثناء جدالي مع الراجل دا وقعت منو عيشه في الارض! وهاني ولدي شافا، خلاني بعد دخلت جوا جرا عشان ياخدا من شدة جوعو وبدا ياكل فيها بترابا بس الباب تاني دق بقوة، فتحو وهو شايل العيشه في يدو
الطارق كان نفس الشخص ولمن شاف المنظر دا قلبو وجعو شال العيشه من يد هاني وقال له :
يا ولدي دي فيها تراب ما تاكلا واداه واحده نضيفه من الكيس هو اتردد في البدايه.
قال له امي بتدقني لو شلتا منك
: شيلا وما تخاف من شي امك دي انا بتفاهم معاها.
انا طبعا جيت على اصواتهم ولمن شفت هاني بياكل في العيشه زعلت زعل حمرت له، وقف اكل ولميت في الراجل نبذ وشغاله اقول له اطلع برا بيتي، هو زاتو انفعل فيني لمن خوفني.
ما على كيفك!! الاولاد ديل امانه عندك انتي بس ذنبهم في رقبتنا كلنا ما بتخافي الله؟! الولد قال لي امس اليوم كلو ما اكل غير عيشه واحده!
: وانت مالك مسؤول عنو ولا من باقي اهلو؟؟ شيل حاجاتك دي واطلع برا، هو طبعا ولا اشتغل بي شاف شادن ناداها هي التانيه وقال لها تعالي يا بنتي اكلي.
والجوع عدو ما برحم ولابخلي الزول يفكر في حاجه غير يشبع رغبتو دي خلي طفل صغير جعان وشايف قدامو كل الاكل دا. قامت جاريه شالت تفاحه مدتا على خشما خطفتا منها وجدعتا في الارض، وشلت العيشه من يد هاني برضو جدعتا ونبذت الراجل.
هو قام رفعهم، وختاهم في واحد من الاكياس وقال لي
بترمي النعمه في الارض كدا يا مرا يا جاهله؟؟ وهاين عليك تاخدي اللقمه من خشم بنتك؟؟ كدي تاني كرري الحركه دي قدامي؟
طلع عيشه من الكيس ومداها لهاني وهو بعاين لي جوا عيوني.
هاني هو التاني يديه كانت بترجف وبعاين لي وانا بحمر بس ما قدر يقاوم ويديه اتجهت مباشرة ناحية الراجل ومسك منو العيشه.
انا طوالي رفعت يدي عاوزه اكرر نفس الحركه وارميها من يدو بس الراجل مسك يدي بقوة، عاينت له، وشو صاري! قعدت اقاوي فيه واصلا ما فيني قوه طوالي وقعت في الأرض واولادي قعدو يصرخو.
قال لهم اهدو اهدو ما تخافو شالني ختاني في السرير ودخل الغرفه قال لهاني وين الملح والسكر؟ هاني قال له نحن ما عندنا حاجه وفعلا لمن اتلفت لقى الغرفه مافيها اي حاجه قام نادى على بناتو بالحيطه قال لهم سريع واحده تعمل جلكوز وتجي، وقعد يصحي فيني قال لهم ضغطا منخفض شديد من متين م اكلت؟
هاني كان ببكي قال له لها ٣ ايام جعانه عليك الله وديها المستشفى ياعمو😭😭😭😭😭😭
: انا دكتور ما تخاف بسفعا خليكم معاها لحدي م اصل الصيدليه واجي.
انا صحيت لحظتا وراسي دا لافي شديد بعاين فيهم كدا وعيوني مطششه كنت مركزه بس على صوت ولدي الببكي لمن بناهد قلت لهاني جيبو لي ارضعو.
ليان جات داخله ومدت لي الكبايه الفيها الجلكوز، قالت لي
: اشربي يا خالتو طيرت الكبايه من يدا وصرخت
: ادوني ولدي ارضعو من امس ببكي وما رضع حاجه.
كنت دايما بنهي النقاشات بقوة صوتي بس المره دي سمعت صوت اقوى منو!
قلتي لي انتي قاريه جامعه وموظفه؟؟ والله فهمك دا حق واحده خلوة ما قرتا ومكانك محو الاميه عاين لولدي الصغير قال لي بخلعه انتي بترضعي😳؟؟ وعاوزه الولد بتعذى من وين وانتي ما عندك حليب؟ انتي بتقتلي في نفسك واولادك بالبطيئ.
قلتي لي انتي قاريه جامعه وموظفه؟؟ والله فهمك دا حق واحده خلوة ما قرتا ومكانك محو الاميه، عاين لولدي الصغير قال لي انتي بترضعي؟؟😳 وعاوزه الولد بتعذى من وين وانتي ما عندك حليب؟ انتي بتقتلي في نفسك واولادك بالبطيئ!!!
انا حسيت بغصه في حلقي ودموعي خانتني بس م اتعودت ابكي الا في الظلام وبعيد عن العيون قمت لفيت وشي على الحيطه وقلت لهاني جيب لي اخوك دا.
جابو لي ختيتو في حضني واتغطيت ب التوب عشان ارضعو وطبعا مافي حليب والكاسترد الكنت بديه منو خلص من امس وهو يصرخ في حضني ويمتص بخشمو على أمل تصلو نقطة حليب واحده تبل ريقو الناشف💔
حسيت بقلبي بنزف عليه وما قدرت اتحمل غطيت وشي بالتوب وبقى صوت تنهيداتي يطلع بس برضو كاتماه
ليان عاوزه تتكلم معاي ابوها اشر لها ب اصبعو وقال لها سوقي الاولاد جوا اديهم ياكلو ، انا طبعا م اعترضت ولا فتحت خشمي لاني وصلت لمرحلة من الضعف ما بقدر حتى اظهر كبريائي المكسور.
كنت راقده في سرير في الحوش ومتغطيه بتوبي ابكي بصوت مكتوم لمن ابو ليان مشى الصيدليه وجاء، كان شايل كيس في يدو وقف مسافه وهو بعاين لي بعد شويه خت الفي يدو وجاء يشيل مني ولدي كنت بقاوي فيه بس بياتو حيل؟؟!! بسهوله انتزعو من بين يدي ودخلو جوا طلع حليب من الكيس وخلى بنتو تديه منو.
مهيلم كان بشرب بنهم شديد ويقابض بيدو لمن وسخ جسمو وهي تقول له براحه ما تتشرق ابوها قال لها انتبهي وانتي بتشربيه ، بعداك جاني برا ومد يديه عاوز يشيلني قلت له ابعد مني وشي كان لسه مغطى بالتوب وهو ولا كتر معاي رفعني غصب مع مقاومه طفيفه مني قدر الحيل الفيني دخلني جوا.
الغرفه فيها سريرين كانو الاولاد في واحد ومهيلم في التاني ختاني جنب مهيلم وعلق لي درب
انا كنت مصدعه وحاسه بتعب شديد وما قادرة حتى افتح عيوني خلي اعلق او اعترض.
قال لي لازم اديك حقنه بتاعة مسكن وانا طبعا عارفه الحقنه دي في العضل وما قادرة اتكلم رفعت له اصبعي بالرفض ليان قالت لي ما تخافي بابا دكتور.
برضو هزيت راسي بالنفي هو قال لي حاولي اكلي حاجه بعد ترتاحي، شال مهيلم في يدو وبقى يتفحصو ويشوف حراتو انا نمت بعدها ومهيلم زاتو شكلو نام بعد شبع وبل ريقو الناشف.
صحيت لقيت نفسي في نفس الوضع بس من غير الدرب كنت حاسه بنفسي احسن، اولادي نايمين في السرير التاني وفيه مرتبه؟؟ ما بتزكر انو نحن عندنا مراتب حتى انا نايمه في مرتبه! بس كيف؟😳 حسيت بهواء بارد كمان اتلفت لقيت مروحه متحركه شغاله وموجهة علينا استغربت شديد كنت محتاجه ادخل الحمام بسبب الدرب.
قمت دخلت وجيت طالعه جعانه جوع كان في اكل في التربيزه ونفسي ضعفت شديد بس بقاوما، كل م احاول امد يدي اتراجع قربت ابكي من الشعور دا طوالي بعدت التربيزه لحظتا جاني الصوت داك
: انتي امكن ما تخسري نفسك بسبب الجوع بس اكيد ح تخسري ولدك الجنبك دا…يتبع♥

 

 

• لقراءة باقي فصول الرواية أضغط على (رواية خلف الأبواب المغلقة)