رواية غيث ونوسة – اسرار خلف الأبواب الفصل الثامن والعشرون 28 بقلم نوسة حمد

رواية غيث ونوسة – اسرار خلف الأبواب الفصل الثامن والعشرون 28 بقلم نوسة حمد

 

 

البارت الثامن والعشرون

 

#اسرار_خلف_الابواب28
#نوسه_حمد
حسيت امي م عايزه سيره غيث وبطنها طمت منو بقيت محتاره اكلمها اني ح اقيف معاهو لمن يبقا كويس ولا لا بالذات قالت انها م ح تعفي لي وابوي ح يكون اكعب منها انا بعرف تفكيرهم لانهم خاتين راسهم مع بعض الحاجه الما بتحبها امي وما عايزاها ابوي زاتو بكون ما عايزها كلمت سوسن قالت لي نوسه انتي تكلميهم في حاله انك قررتي ترجعي ليهو بس انتي عايزه تنفذي وصيه اخوهو وعايزه تقيفي جنبو عشان برضو هو ابو اولادك ربنا عالم بي نيتك واهلي خليهم قلت ليها لاقدر الله لو جابتن لي الظروف هناك القوهو معاي ويزعلو مني قالت لي منو امي وابوي جنهم وجن السفر مستحيل يجوك هناك انا متاكده وحتي لو جاينك انا بوريك تتصرفي وانا وصلاح عارفين اي شي عنك ح نقيف نتكلم معاهم سوسن كلامها بطمني وبشجعني دايما بتونس معاها كده سحر جابوها بطنها موجعاها كلمت سوسن وقفلت جو ساقو معاهم امي المستشفى وانا بي تعبي داك الليل كلو انظف واغسل في البيوت لانو امي م كانت مجهزه حالا وما نومتا نهاي وللصباح جابوها والده وانا خلاص منتهيه م شايفه قدامي لمن حسيت بلفه راس باركت ليها المولود وامي قالت لي مالك حيلك ميت وما تقولي لي غسلتي البيوت بليل قلت ليها اي ي امي سحر بجوها نسابتا اقولو علينا وسخانين قالت لي لكن انتي جايه من سفر وبتكوني موتي موت قلت ليها م مشكله انا هسي تعبانه واولادي صحو ي داب يمه انا م شايفه عديل بدل اقع ليكم وتبقو في المستشفى وتسعفوني انا عايزه ارقد ارتاح ان شاءالله ساعه بس امسكي لي اولادي ديل وسوسن ح تجي هسي قالت لي اي طوالي نومي وانا بمسكهم ليك دخلت غرفه ابوي وامي لاول مره وكنت تعبانه نومتا غرقتا غرق في النوم سمعت صوت كواريك ونقاش حاد قومتا مخلوعه لقيت سحر وسوسن اتناقشن قلت ليهم مالكم انتو نسيتو ح يجوكم الضيوف عليكم الله خلوها المشاكل واظنهن متشاكلات فيني سوسن عاينت لي وماقالت لي حاجه بس سحر تسكت مستحيل قالت لي خليها عاطفيتك دي وامسكي اولادك عليك ولدك خرب المكان وانا النسوان بجني وشفعك الصغار ديل ينبحو زي الكلاب التقول شغالين بي كهرباء صحو لي ولدي من النوم انا بقيت مصدومه بعاين ليها سوسن اختي بقت تتكلم معاها قالت ليها م فيك فايده كاسره ضهرا الليل كلو في غسيل البيت تجي تتكلمي معاها هسي كده وسحر شغاله تفاصح في سوسن وتكورك وبقت تقول ليها انا دي اول لي ولاده عايزه اكون مرتاحه بس نسيبه وشفعا ما معاهم راحه كرهت البيت دا من هم جو نهاي م اتكلمت شيلت اولادي وطلعت حممتهم وستفت شنطتي وقلت لي امي انا مسافره والوقت كان ظهر كده قالت لي ستين يمين م بتمشي قلت ليها انا مستحيل اقعد وابوي جا قدر م حنسني ابيت اقعد ودموعهم كانت عشره عشره ولمن جيت اودعهم كاني عايزه اموت اتجرسو وجرسوني معاهم وودعتهم وطلعت وسحر نهاي م ودعتها ولا ح اودعها كنت كرهانه اشوفها ابوي وصلني حدي الموقف وركبني اتصلت كلمت نمارق قلت ليها احتمال اصل متاخر قالت لي م مشكله بجيب سفيان في الميناء وكانت مبسوطه اني جاياهم وطايره من الفرحه قفلت منها وبقيت محتاره معقوله اختي بت امي وابوي تعاملني كده والغريبه تفرح بي اتوقعت اي شي الا اني اعيش احساس انو اختي تكون رافضاني الشي المطمني سوسن اختي عاوزاني وواقفه معاي شديد وصلت متاخر شديد لقيت سفيان منتظرني بالعربيه ومشينا الشقه لقيت مني اخت غيث ونمارق اخر ونسه مني من شافتني مسكت مني اولادي ونمارق حضنتني وبكينا بكا التقول ميت لينا زول غيث خاف مننا وبقا جايط الا وديناهو المستشفى ادوهو حقنه حتي هدا وسكت ونام كل م اعاين ليهو يقطع قلبي اتعشيت ونومتا لاني كنت تعبانه واول مره انوم مرتاحه بجد نمارق وجودها راحه بالنسبه لي ولحسن حظي تاني يوم الناس الحا نأجر الشقه بعديهم جو قالو طالعين نجي نستلمها منهم طوالي مشينا معاهم واستلمنا الشقه ورحلنا حاجاتنا بس سفيان كان ضابح لينا كرامه لمن عملناها واكلنا وانا ومني رتبنا مع نمارق المكان ورحلنا في باقي ليلنا داك سفيان قال لي ح نبدا لي غيث رقيه شرعيه مع العلاج لانو الدكتور زاتو قال كده وانا فترتي دي كلها كنت بفتش لشيخ يكون بخاف ربنا وما دجال ووصفو لي واحد بكره ماشين ليهو رايك شنو قلت ليهو انا معاكم في اي شي قال لي تمام بعدّ الشغل انا بجيكم قلت ليهو تمام 🤝 مشينا الشقه وكانت كبيره انا شيلت غرفه وغيث ومني غرفه كانت واسعه شديد وعفشها سمح اتوكلت علي الله وحصنت نفسي واولادي وقومت صليت ركعتين وادعيت فيهم لنفسي واولادي وغيث اولادي نامو مرتاحين وانا كمان وحسيت غيث هادي حتي مني علقت عليهو قالت لي غيث م مجنون غيث عدمكم جننو من امس ما كورك ولا تعبني وكانت بتبكي قالت لي عين السواد الدخلت في اخوي القامه والمتعلم الفاهم والبخاف ربنا عين طفشتو من اولادو وحياتو قلت ليها كلها اقدار ي مني انا كنت متجرسه زمان وبقول الدنيا دي بدون غيث كعبه بس تاني جاتني قناعه وشقيت طريقي والحمد لله اتعلمت واشتغلت ونجحت في شغلي وجيت هسي عشان اكمل تعليمي وغيث باذن الله يبقا كويس ويتزوج ويعمل ليهو اسره وبيتو يرجع ليهو قالت لي اسره غير كريم قلت ليها ح يلد بدل كريم ميه وربنا مايحرمو من الخلفه ويخلي ليهو اولادي ديل انا العملو لي غيث والله بي امكاني لو لقيتو في النار ازيدو حطب بس دا ابو اولادي قالت لي غيث مالك م بتعرفيهو غيث بحترم المرا وبقدرها بس الحمد لله ع الحصل ليهو لو واعي م بقصر فيك واطردي الشيطان يا نوسه ماتغرك الدنيا الدنيا مافيها طعم لو عيشتي مطلقه قلت ليها الحمد لله انا عايشه الان مطلقه ومبسوطه م زعلانه قالت لي بتقولي كده هسي عايني لي وشك دا لمن كنتي في عصمه غيث وهسي واحد قلت ليها م بالشكل قالت لي الراحه الجوه بتظهر في الوش ماتقنعيني وتغشي نفسك اطردي الشيطان وارجعي لي راجلك بعد يبقا كويس وسامحيهو ابدو حياه جديده وغير سعادتكم ما عايزين حاجه قلت ليها م بقدر انا عايزه اقرا
مني مشت زعلانه دخلت اعتزرت ليها قلت ليها م تزعلي وصدقيني غيث ربنا بديهو الاحسن مني قالت لي احسن منك انتي ما دايرين نحنا تاني م ح نكون مطمئنين غير هو معاك ولو اصريتي علي موقفك بنخلي يكتب ليك البيت بي اسمك ويرجع معانا الحله اعرس من بنات الحله الرفضن زمان ديل غير كده ما ح نخليهو يتزوج قلت ليها كدي هسي خلي الكلام دا ادعي ليهو ربنا يشفي والعندو دا م جن دا عمل وبكره ح نمشي نبدا علاج عند الشيخ وانا متفائله خير قالت لي ان شاء الله وماقصرتي انتي ي نسيبه كفايه جيتك معانا هنا قلت ليها العفو عشرتكم ما ساهله حسيت مني عايزاني شديد لغيث بس انا قلبي بقا كعب وم عايز غيث بقيت ادعي في سري غيث بعد يتعالج ربنا اديهو بت الحلال تاني يوم مشينا الرقيه والمكان عباره عن ناس مسحوره ومكتوبه وصوت الرقيه من بره شغال غيث من باب الشارع داير يجري لو م جبنا معانا سفيان وزميلهم تاني اسمو همام ومسكوهو م قدرنا نثبتو ودخلناهو للشيخ وبقا يقرا ليهو وغيث لو م مثبتنو ما وقف انا كنت بشوف الناس البتجرسو ديل بمثلو بس بعد شفت غيث اقتنعتا وتعب تعب شديد لمن عرق ورجف من القرايه وبقا يستفرغ وم ارتاح الا لمن الرقيه وقفت الشيخ قال لينا الزول دا الرقيه في البيت شغلوها ليهو لانو محتاج قرايه كتيره وقال لينا حاولو وضوهو ونزلو ايات السحر في فلاشه وشغلوها طول اليوم قلنا ليهو ان شاء الله رجعنا البيت غيث دا نام نوم لمن خوفنا عليهو ومرت الايام ونحنا شغالين مع الشيخ دا غيث في البدايه كان ما بدخل لمن يسمع صوت القران بس تاني ارتاح وبقا عادي يمشي ومني اتصلو عليها ولدها كسر يدو وزوجها قال ليها لو م جيتي طلقانه قلت ليها مني راجلك م قصر والله قالت لي م نفسي افوتو ليك قلت ليها لا لا عادي غيث م زي زمان بقا واعي شويه قالت لي خلاص اسبوع وبجيكم قلت ليها ان شاءالله ووديناها الموقف ركبت وودعناها وفاتت طبعا غيث بقا بس ساكت وطابل الغرفه عليهو وهادي زمان كانت تصرفاتو كلها ما واعي بنفسو كان مرات بحاول اطلع ملابسو قدام الناس وبكورك وبتجنن بس الحمد لله بقا بس ساكت ومحبوس في الغرفه وبستحما براهو بس م بتكلم واولادو ديل م عارفن كان شايفني انا اختو وديل اولادي بقول ليهم قولو لي يا خالو كريم طبعا واعي بقول ليهو لا لا انت بابا م خالو انا م عندي خال قال لي انتي ابو الاولاد ديل وين مسافر ولا شنو قلت ليهو اي مسافر قلت م بقول ليهو ابوهم انت ازيد نفسياتو زياده وكل يوم بمر علينا بحس بي غيث ماشي اتحسن ولسه مواصلين في العلاج وجبت بت اشتغلت معاي عشان الصباح بمش الجامعه والاولاد وغيث عايزين البجهز ليهم طلباتهم والبت م شاءالله مرات الاكل بلقاها عملتو وكانت مريحاني شديد مني اتصلت وكانت بتبكي قالت زوجها قال ليها كان مشيتي طلقانه قلت ليها مني خلاص م بتقصري اقعدي مع اولادك وانا ان شاءالله بتابع مع غيث ووريتا اني جبت بت شغاله وغيث لو اتحسن بتصل عليكم تجو ليهو ونعمل الكرامه قالت لي م بتقصري مرت الايام وصحيت من الصباح لقيت غيث بصلي حمدت ربنا وشكرتو حسيتو بقا تمام انا صحيت كنت بجهز للجامعه وكريم طبعا لو م صحا وعمل جوطه م برتاح وهو كان بصلي عملت ليهم الشاي وقلت لي كريم اقعد هادي بابا بدقك قال لي لالا بابا م بدق بتدقي انتي دي قعدت اضحك قلت ليهو منجضني نجاض ومشكلتك فصيح غيث بعد سلم كريم جرا عليهو بقا خاتي كريم في كرعينو قال ليهو انت ولد شاطر اقعد رايق وم تعذب ماما حسيت بي غيث طبيعي جدا لمن قلبي قال شح وبقيت متوتره م نفسي يوعا ويلقاني انا وهو في بيت واحد قام من المصلايه وكان بعاين لي ونظراتو كانت قصادي عديل لمن كان عيان نهاي نظراتو م بتكون قصاد الزول فكرو كان مشتت نظراتو في كل الاتجاهات حسيت نظرتو لي دي نظره زول واعي لمن حيلي مات وبقيت اتهرب منو وانا كنت جاهزه ولابسه طرحتي وشلت شنطتي وعايزه اطلع قال لي نوسه لمن اتلفت عليهو حسيت انو ح يغمي علي ومشاعري كانت جااااايطه وربنا يستر …………… يتبع

 

• لقراءة باقي فصول الرواية أضغط على (رواية أسرار خلف الأبواب)