رواية غيث ونوسة – اسرار خلف الأبواب الفصل الرابع والعشرون 24 بقلم نوسة حمد
رواية غيث ونوسة – اسرار خلف الأبواب الفصل الرابع والعشرون 24 بقلم نوسة حمد
البارت الرابع والعشرون
#اسرار_خلف_الابواب24
#نوسه_حمد
اتصلت في تلفون محمد ماف رد واتصلت في تلفون اخواتو ردت علي مني قلت ليها كيفكم اتصلت اطمئن علي محمد بقا كيف قالت لي يا حليل محمد لي اخوهو وياحليل محمد الكلامو كلو غيث واولاد غيث قلت ليها مني م تتشائمي عليهو محمد ان شاء الله يبقا كويس قالت لي محمد مات ي نسيبه عمود البيت مات احيا يا ود امي انا انهرتا وغلبني افتح خشمي وبقيت ابكي وجدعت التلفون وبقيت اكورك باعلي صوت م قادره انسا محمد وكلامو لي وهمو الكان في اولادي وحقهم
ابوي وامي جو جارين قالو لي فشنو قلت ليهم محمد اخو غيث مات ابوي بقا م قادر يقيف ويحوقل وامي تبكي وتعزي فيني وانا قلبت البيت بيت بكا وناس فريقنا اتلمو فيني لغايه م ابوي جاب العربيه ومشينا كلنا ومن باب الشارع اتلقني اخوات محمد وشكلهم متجرسين وجيت انا جرستهم زياده اول مره في حياتي ابكي علي انسان بالطريقه دي وكل م اشوف غيث ابكي واتزكر كلام محمد لي سبحان الله طيب وحنين الدنيا دي ما ليها امان وبموتو فيها الناس الطيبين والزي نوعيه سلمي ديل نهاي م بموتو ربنا بديهم الفرص عشان يتراجعو ويتوبو بس سلمي دي لسه غرقانه غرق ربنا انتقم منها
وموت محمد خلاني افكر كيف اوقف البشر دي انا م قادره اخد راحتي عشان ابوي النوع الما بحب المشاكل وبفضل ستره الحال بس لكن لو سكت لي سلمي دي ح تدمرني وقررت اقيف قدامه في المحكمه وامي ح تموت عديل بس انا عندي اصرار عجيب اوقف المخلوقه دي قعدت في البكا اسبوع ويومي الراجعه اهلي بكينا و كانو محمد مات الليله بكينا بكا شديد قلت ليهم ح اجيكم ان شاء الله اتزكرت كلام محمد ووصيتو لي اني اقيف مع غيث سالت اخواتو قلت ليهم الحا يودي غيث الدكتور منو قالو لي نحنا ح نوديهو بس م زي محمد محمد كان قاعد معاهو عديل ومهتم بيهو ياريت اولاد غيث كانو كبار عشان يعالجو ابوهم كلامهم قطع قلبي ولو قلت لي اهلي عايزه اجيب غيث ابوي بقتلني بس عايزه افكر في طريقه اساعدو بيها
.
بعد وصلت البيت اتصلت علي نمارق وكلمتها بموت محمد نمارق دي بكت بكا قالت لي م شفتي ي نوسه لمن جانا الولد دا شكرك كيف وبتكلم عنك وعن اهلك بطريقه حلوه كيف وزعلان من غيث اخوهو زعل وكرهان سلمي بتزكر قال لينا سلمي الوصلت اخوي للجن مابخليها تستمتع قلت ليها احيا يا نمارق اتحداها ودمرتو وانتي عارفه انا ح اتحدا سلمي ويا انا يا هي اقسم بالله اخليها عظه وعبره لي غيرها نمارق عاطفيه شديد قعدت تبكي قالت لي نوسه سلمي الاعمالها بتودي المقابر دي خليها البيت عايزه بيهو شنو خليها تبيعو قلت ليها القصه م قصه بيت سلمي دي لو عرفت موت محمد ح تحس بي أعمال الشيطان البتعمل لينا فيها دي انها انتصرت وغلطتي انا م نبهت محمد انو الزوله دي بتاعت كتابه والمفترض اعمل شنو عشان يتفادا الكتابه دي وما تمشي فيهو زي م قال لي شيخ حلتنا نمارق قالت لي الشيخ قال شنو خليني كمان اعمل حسابي انا مرت سفيان من عرفت ولادتي قالو جنت عديل وصراحه سفيان بقا روحو ونفسو بتو مرات لمن اكون اليوم يومها واقول ليهو يمشي بقول لي لا خليني مشتاق لي بتي م قادره علي اقنعو واقول ليهو مهما كان لازم تعدل وبقيت خايفه منها عايزه اعمل حسابي قلت ليها كلام الشيخ لي وراني الايات البتبطل السحر كاتباهم في ورقه في كم سوره مختلفات وقال لي م تنومي الا وانتي طاهره واليوم كلو حاولي تكوني طاهره والصبح اقرا سوره البقره ويس انا من يومو القال لي كده ماشه بي كلامو لدرجه اني حاسه اني مستعده اقيف مع الناس البعملو اعمال زاتهم م مع سلمي بس البقنع اهلي شنو راسي شاطب ولازم انا افهمهم براحه عشان كده بكره بسوق امي للشيخ واتكلم قدامو اشوف رايو شنو هو اعلم بالحاجات دي لانو بعالج الناس بالقران من السحر والعين قالت لي ربنا بسهلا واصلك م تستسلمي ليها وما تخليها تحس انها انتصرت فاجأيها بي قوتك واصدميها بي ابطال عملا البتعمل فيهو قلت ليها ح اطفشا من حاجه اسمها عمل بس انتي ادعي لي قالت لي م بنساك ي نوسه وربنا يقدرك ولو احتجتي لحاجه سفيان قاعد ولو كلمتو بمحمد اخو غيث ح يجي يعزي فيهو لانو بحترمو شديد ومحمد لمن مات بتصل عليهو قلت ليها م بقصر قفلت منها ومشيت اتوضيت وصليت وبقيت اقرا قران ونزلت ايات السحر من النت وقبل انوم بشغلهم وبردد معاهم الايام الاولي كنت بقلق وبحس نفسي مخنوقه بس نهاي م استسلمت ومواصله فيها مرت الايام وانا مواصله في القرايه واستخرتا قلت لو ارتحت للموضوع ح امشي المحكمه لو الموضوع م دخل في راسي ح اوقف اي شي وربنا يهد سلمي من السماء المهم استخرت تاني يوم لي مراد امش بليل المحكمه حسيت انو الموضوع دا لازم امشي فيهو وعشان اقنع اهلي سوقت امي الصباح لي شيخ حلتنا ومشيت حكيت ليهو بموت محمد اخو غيث بقا يتعوذ من أعمال سلمي قال لي الزوله دي شكلها بتتعامل مع دجالين كبار قلت ليهو اي صاح بس انا جبت امي عشان تطمن قلبها انو م ح تجيني حاجه ولازم اقيف لي سلمي عشان م تضيع حق اولادي وخصوصا بعد موت محمد الكان واقف ليها ممكن بيتهم الكبير تبيعو وتجدعهم في الشارع الزوله دي متحديه وما عندها حق عشان تبيع املاك غيث قال لي اكيد دا حق اولادك اسعي فيهو واتوكلي علي ربنا وان شاء الله ما ح تقدر تعمل ليك حاجه اتحصني وحصني اولادك صباح ومساء ورددتي الايات الكتبتهم ليك وسوره البقره ويس وان شاء الله ح تعجز انها تصيبك امي قالت لي ستين يمين م بخليك تقيفي قدامها بيت شنو وحق شنو لو علي البيت انتي م محتاجه الشيخ قال ليها دا حق اولادها ليه تخافو منها كده حتي لو شغاله فيكم كتابه مفترض نهاي م تخافو منها وانتو لازم تغيرو عقليتكم دي ربنا لو م رايد ليكم حاجه مهما عملت ليكم م ح تحصل خلي بتك تقيف قدامها وتقلع حق اولادها واطمني بتك زوله واعيه واستخارت واتوكلت علي ربنا وربنا م بخزلها الشيخ قدر اقنع امي وقال ليها لازم تقنعو ابوها وما تسكتو نهاي وانا معاها ان شاء الله شكرت الشيخ وطلعنا مشينا البيت وامي الشارع كلو تطنطن وانا لو عارفاك مودياني لي كده م كان جيت وكانت خايفه علي شديد قلت ليها يمه خلي ايمانك قوي وخلينا نتوكل وصدقيني م بتجيني اي حاجه وبخوفك دا لو اتكلمتي مع ابوي ممكن يرفض انا عايزاك تدخلي وتتكلمي معاهو بالعقل وتطمني وانا عايزه رضاكم انتو انا لو علي حق اولادي دا بموت فيهو موت بس من غير رضاكم ماف شي ببقا افهمني يمه قالت لي فاهماك بس قلب الام وبدل الهم عندي همين انتي واولادك وانا زوله كبيره الموت م معروف قلت ليها يمه يلا النوريك لو ربنا قاسم لي اموت بموت بسبب ومن غير سبب مابتعرفي القدر قالت لي خلاص ي بتي تفي من خشمك حسيت امي خايفه علي لدرجه انها م قادره تفكر الصاح شنو والغلط شنو مشينا وكلمنا ابوي وابوي اكعب من امي وقال ستين يمين م يخليني وقال لي لو عملتي كده بمرق من البيت يا الله ويامين قدرنا اقنعاهو لمن جات سوسن ومعاها راجلا اتكلمو مع ابوي وقالو ليهو الزوله دي ممكن لو سكتَو ليها تعمل اي شي المهم اقنعناهو وقال لي خلاص اعملي العاوزاهو وربنا يحفظك اول مره احس ابوي وامي خايفين علي لدرجه انو حسيت انو فعلا انا ح اموت بس اتوكلت وقلت الصباح ح امش اول جلسه وم ح اخاف من سلمي حتي لو تعبت ومرضتا الا اموت
ناس سوسن الصبباح جوني هي وزوجها ومشينا المحكمه وقلت ليهم انا زوجه غيث وعندي منو ولدين وبت وسلمي م من حقها تبيع املاك غيث قالو لي علي حسب معلوماتنا غيث م متزوج غير سلمي قلت ليهم شنو شنو انا زوجه غيث الاولي وسلمي دي صحبتي وكانت متزوجه واتزوجت راجلي وهي متزوجه وفي عصمه راجل تاني يعني زواجها باطل انا كشفت الحقيقه لي زوجها طلقها وانا اطلقت من غيث ومعاي القسيمه البتثبت صحه كلامي دا اديتهم قسيمه غيث وسلمي وقسيمتي قالو لي قسيمه غيث وسلمي دي مزوره ونحنا معانا الاصل وزواجهم كان بعد اطلقت من طليقها بي ٤شهور ومعانا كل الادله انا راسي شطب وبقيت ابلع في ريقي وحسيت الدنيا ضاقت بي سلمي عملت حساب لي اي شي ووزورت الاوراق وبقيت م عارفه اقول شنو وضعف موقفي ح يفشل القضيه والله يستر………. يتبع
- لقراءة باقي فصول الرواية أضغط على (رواية أسرار خلف الأبواب)