رواية غيث ونوسة – اسرار خلف الأبواب الفصل الأول 1 بقلم نوسة حمد

رواية غيث ونوسة – اسرار خلف الأبواب الفصل الأول 1 بقلم نوسة حمد

 

 

البارت الأول

 

فتحت دولابو لاول مره لانو نسا المفتاح فيهو وهو النوع النهاي م بحب زول يلمس حاجتو واظنو طلع الشغل لانو كان ملخوم وانا كسبتها فرصه كان عندي حب استطلاع اشوف في دلابو دا في شنو محرص عليهو كده وبقيت اقلب فيهو عشان القا لي قروش م لقيت قلت هو قروش ما عندو ليه قافل مني الدولاب. دا وجاني فضول افرتقو حته حته وبقيت افتش وافتش لقيت لي ظرف فتحتو لقيت فيهو قسيمه زواج قلت مالو راجلي دا خاتي قسيمتنا براها ما مع ورقنا ولا ياربي دي النسخه التانيه ابتسمت واتزكرت زواجنا والعقد والتفاصيل الحلوه ديك قلت ياربي انا بكون الشهد لي منو في العقد كدي النفتح القسيمه اشوفها فتحت القسيمه وبقيت اقرا وياريتني ما فتحتها القسيمه دي بي اسم واحده تانيه بقيت مخلوعه قريت الاسم ميه مره لقيتا صحبتي الما بتفارقني لحظه صحبتي الانا كنت بتشاكل مع اهلي بسببها الانا بدافع ليها في كل المجتمعات ودا كلو هين صحبتي دي متزوجه كيف تتزوج راجلي بقيت مخلوعه وسريع صورت القسيمه وبقفل في الدولاب هو جا داخل مخلوع لقاني واقفه جنب الدولاب وفاتحاهو قال لي فاتحه الدولاب دا ليه انتي م عارفه انا م بحب زول يهبش حاجتي قعدت اتمتم دفرني وقفل الدولاب وشال المفتاح وكان ضربات قلبو زايده من الخوف بقا يعاين لي تعابير وشي عشان يعرف انا شفت حاجه بس انا اتشجعت وعملت فيها نفسي م شفت شي قلت ليهو الشكيه لي الله فتحت دولابك عشان القا لي قروش بس انت اظنك بتدسهن مني حسيت بيهو ارتاح من القلق الكان فيهو قال لي لو قلتي عايزه قروش كان اديتك بدل الالف مليون قلت ليهو م بتقصر يا ابو كريم طلع ليهو قروش كتيره واداني ليها من غير م يحسبها شلتهن منو وانا اصلا م عايزه قروش لمن طلع وقفل الباب انا جدعت القروش في الارض وبقيت ابكي باعلي صوت وفاتحه صوره القسيمه في التلفون معقوله يخوني مع سلمي المتزوجه ووالده كيف يطلعو قسيمه بقيت اعاين للقسيمه المصوراها والقسيمه حقتي لقيت انها ما مزوره نهاي زي بعض بقيت اعاين للشهود لقيتهم اصحابو كرهت زوجي وبطني طمت منو معقوله يتزوج صحبتي البنقوم ونقع مع بعض ولا كيف يعقد علي واحده متزوجه راسي وجعني من كترت التفكير وخلاص جاني استفراغ ساعه كامله انا استفرغ شيلت ولدي ومشيت بيتنا لقيت امي ماف ولسه الاستفراغ م وقف هو اتصل علي قال لي انا جاي البيت قلت ليهو انا مع ناس امي انا عيانه بقا مخلوع وبقول لي عيانه مالك حبيبتي سحروك ولا الحاصل شنو طبعا بقيت اكره كلامو لاني حسيت انو متصنع في الكلام قفلت الخط وحالتي بقت حاله واختي النوع العواف داك قالت لي ما تعي وتجي تطممي بطنا نحنا وقعدت تكورك فيني هو جا داخل وكان ملهوف علي واول م قرب مني الطمام زاد زياده اديتو ولدو وطلعت منو بره وهو اشيل ويتكبكب فيني وانا هو الزايد لي الطمام علي المغسه الجواي قال لي اوديك الدكتور انتي شكلك تعبانه قلت ليهو لا ببقا كويسه وامشي انت انا م فيني حيل امش معاك البيت قال لي م بعرف انوم براك والا تمشي بقيت اقنع فيهو انو يمشي قال لي ستين يمين م ماش وبقا متعابط فيني ويشيل ويقول لي في كلام معسول انا زمان كنت بنبسط بي كلامو دا بس من لحظه عرفت الحقيقه بطني بقت طامه حتي من صوتو وما قادره اواجهوو ولو واجهتو ح ينكر وياعالم يعمل شنو المهم اول مره اعلي صوتي عليهو قلت ليهو ياخ امشي خليني قال لي انتي مالك قلت ليهو والله م عارفه فجاه بس جاني الطمام دا قال لي تكوني حامل قلت ليهو حمل شنو وانا ولدي عمرو اربعه شهور قال لي عادي انتي م حاسبه ولا شنو قلت ليهو والله م بتزكر مواعيدها قال لي طيب امسكي ولدك الننزل اجيب ليك شريط وبي بسمه كده قال لي ان شاء الله تكوني حامل انا بحب الاطفال عاينت ليهو بي قرف وفي قلبي قلت ليهو انا للولاده صاح نزل عشان يجيب لي الشريط واختي طوالي جات استلمتني قالت لي راجلك دا نهاي م قاعده احس انو البعمل فيهو دا اهتمام مرات بجيني احساس انو هو خايف منك قلت ليها يخاف مني ليه مالي انا بخوف وبعدين انا خشمي عندي ما قاعده اهرشو قالت لي م عارفه لكن اصلو م مريح قلت ليها انتي مالك ومالو قالت لي كيف مالي ومالو دا راجل اختي قلت ليها لو لقيتي ممردقني في الواطه دي م عندك فينا شغله وبعدين انتي مالك كلامك كلو كده انا زهجانه والفيني مكفيني قالت لي حسنتي اني قاعده جنبك اونسك قلت ليها لا يختي م تونسيني امشي امسكي تلفونك ونسي بي اخواتي عاينت لي بقرف وفاتت طبعا اختي دي النوع اللا بعجبها العجب لا الصيام في رجب وجنها تناظير الحاجه لو عاجباك تمسخها ليك بس مرات بحس تناظيرها صاح يعني هسي راجلي دا م حكيت ليها بي عملتو العملا فيني وشايفه من تصرفو انو م طبيعي وخايف من حاجه وانا الهبله عايشه معاهو وشايفه راجلي رومانسي وبحبني والوهميات البكونن فيها النسوان المتزوجات ديك لغايه م الله وقعني في دولابو ويلا راجلي دا زول صلاتو في الجامع زول لا بسجر لا بسف لا عندو شغله بالبنات ولا تحسي عينو طايره ولا انا مخدوعه فيهو م عارفه بس م محسسني بكده بعد مسافه شايله ولدي وراسي من الصداع ح ينشقا رابطاهو بالطرحه وحالتي حرجه اداني الشريط واديتو كريم مشيت دخلت الحمام حللت والشريط ولا هظر ولا كذب علي خطين حمر معدتي تاني قلبت وروحي طلعت عديل هو جا جاري علي وبقا يكورك لي اختي تجي تمسك الولد عشان هو يمسكني وانا علي الحال العلي مانفسي اشوفو وبطني طامه منو لمن مغطيه وشي قال لي اها طلع شنو قلت ليهو حامل هو فرح فرح مبالغ فيهو قال لي الف مبروك اختي قالت لي شنو شنو جنيتي وسكرتي يختي حمل شنو وولدك حته لحمه مالك ي بت دايره تجنينا انتي م صغيره م بتعرفي المانع زوجي قال ليها الله الله انتي مالك هسي زعلانه كده شايله في بطنك تحمل ولا ما تحمل ما شغلتك قالت ليهو يشتغلو فيكم الأطباء بطلو الهباله دي بدل واحد م فاهم شي للدنيا تدمرو واحد تاني قال ليها رزق نرفضو وبقو يتشاكلو وانا الاتنين كرهاناهم شديد كان راجلي كان اختي الكلام مسم دا امي جات داخله لقت اختي تردح لي زوجي وانا بوح من الوجع سكتت اختي وشالت منها ولدي قالت لينا مالكم صوتكم جايب اخر الشارع وبعدين ابوك ماعارفاهو جنو وجن صوت عالي لو جا هسي انتي وراجلك بطردك قلت ليها يمه انا خشمي م فتحتو دي بتك دي وراجلي ودا كلو عشان طلعت انا حامل امي قالت لي م تحملي اختك البتتفاصح دي لمن حملت بيها انتي يا دابك تميتي الاربعين قلت ليها يمه لكن ولدي صغير انا م عايزه احمل وبقيت ابكي قلت ليهو الا توديني الدكتور انزلو بقا يكورك فيني قال لي حرام يا نوسه البتقولي فيهو دا انت عايزاني اعمل حاجه حرام مستحيل طبعا بقول في كلامو دا وكلوووووو ثقه كانو الحرام م عاملو قلت ليهو الحرام يفوتك وين انخلع قال لي تقصدي شنو وبقا مرتبك ما رديت عليهو وكاني م قلت شي قصدي اسمم بدنو زي م سمم بدني ومسخ علي الحياه قال لي انتي شكلو الحمل من هسي مأثر معاك وشوفي يا نوسه الفي بطنك دا بتجيهو حاجه ما ح ارحمك قلت ليهو م بتهددني انت وبقيت اكورك وابكي ونفسي اضربو عديل وامي تحجز فيني واختي تولع في النيران تشيل وتحرش فيني وانا اردح في كل صغيره وكبيره حاصله ما عارفه بس الغل الجواي خلاني اتكلم ساي وهو لمن محتار فيني وبدا يتوتر حسا بي م طبيعيه وانا حلفت ابيت اتكلم بس ح اندمو علي عملتو ابوي جا داخل ومن الشارع جاب معاهو خرطوش المويه ووقع فينا من طرف ضرب راجلي زاتو دقاهو قال ليهو انت بدل تسكتن النسوان ديل انت في نصهن وشغال يخبت فينا زول قدر فتح خشمو مافي راجلي بس شالنو كرعينو وجرا فات ابوي لمن نفسو قام وهو زول ضغط وسكري امي قالت لي خليتك لي الله دايره تكتلي لي راجلي وانا بقيت ساكته وماسكه ولدي قلت القاها من وين من اهلي الما بتفاهمو ديل ولا من راجلي المتزوج صاحبتي المتزوجه ………يتبع

 

• لقراءة باقي فصول الرواية أضغط على (رواية أسرار خلف الأبواب)