رواية غمرتني عشق الفصل العاشر 10 بقلم شيمو الخطيب

رواية غمرتني عشق الفصل العاشر 10 بقلم شيمو الخطيب

 

 

البارت العاشر

 

من (غمرتني عشق)
💕اللهم اغفر لنا وارحمنا، واحسن خاتمتنا وقنا عذاب القبر وعذاب النار يارب العالمين💕
بسم الله نبدأ
رنا بعد ما اتكلمت مع حسام طلعت على اوضتها، وهي داخله مقدرتش تمسك نفسها و داخت واغمى عليها
هدى خارجه من اوضتها هي وزهره وزينب وده طبعا لأنهم كانو بينضفوها، ويرتبوا بعض الحاجات فيها
هدى شهقت: يانهار ابيض،، رنا،، (جريت عليها)، رنا حبيبتي ردي عليا يا رنا، رنا، ردي ياقلب مامي، (بصت لزينب وبزعيق) بسرعه يا زينب نادي على حازم بيه او قاسم بسرعه، بسرررررعه
رنا حبيبتي ردي عليا، طمني قلبي يابنتى، مالك رنا، رنا، رنااااااااا
عشق لسه، طالعه تشوف ايه الصوت ده، قابلت زينب بتجري على السلم
عشق بخوف: في ايه يا زينب، ايه اللي حصل
زينب بقلق: ست رنا ياعشق مغمي عليها، وواقعه في الأرض، ومش عارفه مالها
عشق طلعت جري على السلم :يانهار ابيض، طب اوعي كده لما اطلع اطمن على الست رنا
قاسم سمع صوت امه، ساب حسام ودخل بسرعه، وقابل زينب، اللي قالتله يلحق رنا، بس طبعا هو كان بيسمعها وهو طالع بسرعه على السلم
قاسم طلع لقى رنا مرميه على الأرض،
شالها بسرعه، وسأل بقلق : ايه اللي حصل يا ماما، رنا مالها
هدى بعياط : معرفش،، معرفش يا قاسم، انا خارجه من اوضتي لقيتها بالمنظر ده، اتصل على الدكتور بسرعه ياقاسم
عشق بهدوء: مش مستاهله دكتور ياست هانم، احنا نفوقها ونعرف هي حاسه بايه
قاسم بص لعشق: وانتي تعرفي منين اذا كانت مستاهله او لا، انا هتصل بالدكتور حالا
عشق مهتمتش لكلامه وده ضايقه جدا
عشق: ياست هانم، هاتي اي برفان نفوقها، هي اكيد زعلانه من حاجه او مخنوقه وده مجرد ضغط عصبي مش اكتر
هدي: جابت برفان بسرعه وحاولت تفوق رنا، لكن مفاقتش، هدى بعياط شديد، بنتي اكيد فيها حاجه، اتصرف يا قاسم انت واقف بتعمل ايه،
عشق قعدت جنب رنا، وبحركه معينه في جبهتها، بدأت رنا تفوق، والكل مستغرب ازاي عشق فوقتها
عشق وقفت: حمدلله على السلامه يا رنا هانم، طمنينا عليكي
رنا بتعب: ااااه، اااه، انا دايخه قوي، هو ايه اللي حصل
هدى بلهفه: رنا حبيبتي، مالك يا حبيبتي، طمنيني عليكي
رنا بتعب: دايخه قوي يا مامي، انا فاكره اني كنت طالعه اوضتي ومعرفش ايه اللي حصل بعد كده
قاسم بعد ما كلم الدكتور: ايه يا حبيبتي، مالك، انا كلمت الدكتور و زمانه جاي حالا،
رنا بتوتر: لا يا ابيه، مالوش لزوم، انا بقيت كويسه
هدى بقلق: لا يا حبيبتي انا لازم اطمن عليكي، انتي مش شايفه شكلك عامل ازاي
حازم داخل بلهفه، : رنا حبيبتي مالك يا حبيبة بابي ، ايه اللي حصل زينب قالتلي انك مغمي عليكي
رنا: مفيش يا بابي اطمن، انا كويسه، انا بس دوخت شويه، والحمد لله بقيت احسن
عشق: حمدلله على السلامه يا رنا هانم،(وبصت لهدي) تؤمريني بحاجه يا ست هدى،
هدي: شكرا يا عشق، لو الدكتور وصل ياريت توصليه لاوضة رنا
زهره دخلت : الدكتور وصل اهو يا ست هانم
انا نزلت وطلعته على هنا
قاسم؛ اتفضل يا دكتور
دخل الدكتور وقال: السلام عليكم، انا كنت قريب من حضراتكو لما قاسم بيه كلمني،خير ايه اللي حصل
هدى بقلق: رنا يا دكتور، رنا بنتي اغمي عليها، لكن الحمد لله قدرنا نفوقها
بدأ الدكتور يتكلم مع رنا، وكشف عليها، وقال: لا، انتي زي الفل يا انسه رنا، بس يمكن انتي زعلانه من حد، أو في حد مدايقك في البيت، لأن اللي عندك مرض نفسي مش عضوي، وده يستدعي ان لازم حالتك المزاجيه تبقى تمام، فشوفي بقه مين مزعلك واحنا ناخد حقك منه، هههههه، انا هكتب لك على شوية مقويات، وأن شاء الله تبقى زي الفل
الكل بص لعشق، اللي اتعلقت عينها بنظرة انتصار مع قاسم، وهو بص ليها واتكلم مع الدكتور بعدم اهتمام
قاسم: يعني اختي كويسه يا دكتور
الدكتور: زي الفل يا قاسم بيه، هي بس تلاقيها محتاجه تغير جو وهتبقى تمام ان شاء الله
حازم : ان شاء الله يا دكتور، والف شكر ليك جدا
الدكتور : لا شكر على واجب انا تحت امرك في اي وقت يا حازم بيه، والف سلامه على رنا هانم
وكتب الروشته ومشي
قاسم نزل مع الدكتور وصله لبره الفيلا،
وطبعا حسام قاعد قلقان جدا، ومش عارف ايه ممكن يكون حصل
حسام جري لقاسم : ايه يا قاسم طمني ايه اللي حصل
قاسم: مفيش يا سيدي، دي رنا اختي اغمى عليها، لكن الحمد لله هيا احسن دلوقتي
حسام بلهفه: ايه،،، رنا، طب ليه،؟ وهي كويسه دلوقتي؟ ، طمني يا قاسم بالله
عليك
قاسم بص لحسام باستغراب وسكت
حسام بتوتر ولخبطه : ا، اي، ايه، يا قاسم انت بتبصلي كده ليه، هو حرام اخاف واقلق على انسه رنا، انت عارف كويس قوي اني بعتبرها اختي، خصوصا ان ماليش اخوات
قاسم رفع حاجب وبصله: اممممم، ماشي يا حسام، بس رنا الحمدلله بخير، اطمن،
حسام: الحمد لله، طيب الدكتور مقالش هي ليه وصلت للاغماء
قاسم بخبث : الدكتور قال انه تعب نفسي، تقريبا يعني يا حسام والله اعلم طبعا، ان في حد مزعلها وانا معرفش، لكن ان شاء الله هعرفه، وهعرف هو مزعلها ليه، و(بص لحسام وابتسم)
حسام بتوهان : اه،، اه طبعا هتعرفه،، ان شاء الله، ربنا يقدرك على فعل الخير، (وابتسم)
قاسم : طب يلا يا عم تعالي كمل قعدتك، وانا هقولهم يعملوا القهوه اللي حالفه متتشرب انهارده دي، ههههه
حسام بتوهان: اه، اه ماشي ياقاسم، ماشي
قاسم بصوت عالي: حساااام،، مالك في ايه،، سرحان كده ايه
حسام (حاسس بالذنب ناحية رنا) : لا يا قاسم مفيش، بس هو ممكن،…..
اقولك خلاص، مفيش حاجه
قاسم: ماشي يا حسام انا هسيبك على راحتك، ووقت متحب تتكلم، اكيد هتلاقيني، انا هدخل اطمن على رنا واستعجل القهوه
قاسم داخل وعشق خارجه بالقهوه
قاسم: بنت حلال، انا كنت لسه داخل اقولك عليها،
عشق ببرود: انا تحت امرك ياقاسم بيه، القهوه جاهزه
قاسم: طب معلش ياعشق، قدميها لحسام، وانا هطلع اطمن على رنا وانزل على طول
عشق: من عنيا ياقاسم بيه، اتفضل حضرتك
قاسم طلع، وعشق خرجت الجنينه
عشق: اتفضل يا حسام بيه، واسفه اني اتأخرت، بس اكيد قاسم بيه حكالك
حسام بلهفه : طمنيني يا عشق، رنا عامله ايه؟ ، وليه اغمى عليها؟
عشق ضحكت: اكيد حضرتك زعلتها يا حسام بيه، هي دخلت من الجنينه بتعيط، وبعدين طلعت علي اوضتها واغمى عليها
حسام بتوتر : انا، لا طبعا وانا هزعلها ليه
عشق بضحك: مالك يا حسام باشا، متوتر ليه كده، متقلقش قاسم بيه مش موجود، عشان كل التوتر ده، وبعدين سرك في بير
حسام بجديه: عشق، انتي بتقولي ايه، لا طبعا مفيش حاجه، انا مشوفتش رنا خالص
عشق بتريقه: فعلا أصلها كانت داخله من الجنينه بتعيط، يمكن ريكس اللي زعلها ولا حاجه
حسام ابتسم ولف وشه الناحيه التانيه : انتي عايزه ايه يا غلابويه انتي، اه ياستي انا اللي زعلتها ارتحتي كده
عشق بضحك: اه بصراحه انا كده ارتحت، بس هرتاح اكتر لما اعرف، هان عليك ازاي تزعلها، دي حتة سكره، تحسها بسكوته كده، مينفعش يتزعل منها ابدا
حسام اتنهد: الموضوع كبير يا عشق، المهم طمنيني عليها الأول، هي كويسه
عشق: اه الحمد لله كويسه، متقلقش عليها
حسام: عشق،، هو انا ممكن اطلب منك طلب؟
عشق: طبعا يا حسام باشا حضرتك تؤمرني
حسام: ممكن تحاولي تنزلي رنا باي طريقه وتخليني اشوفها، معلش انا عارف اني بتعبك، بس عشان خاطري حاولي
عشق ابتسمت: لا ده شكله حب بقه، على العموم ماشي يا حسام باشا، بس هتدفع كام
حسام اتصدم : نعم، ادفع كام!؟
عشق ضحكت جامد وصوتها كان عالي:
ايه ياحسام باشا حضرتك اتخضيت كده ليه، انا بهزر على فكره، انا هظبطلك الموضوع كده وهقولك على طول
حسام ضحك: يابنت اللذينه، انا صدقتك والله، على العموم. أنا بشكرك قوي يا عشق على جدعنتك معايا،
عشق : لااا يا حسام باشا،،، اجل الشكر لما تتكلم مع رنا هانم، مش يمكن معرفش اظبطها
حسام:بس انا واثق في ذكائك، هههههه
قاسم خارج من الفيلا وسمع صوت ضحك عشق وحسام،
قاسم بضيق : خير، مش تضحكوني معاكو
عشق بعدم اهتمام : بعد اذن حضرتك يا حسام باشا، وياريت تشرب القهوه قبل متبرد
وبصت لقاسم ومشيت، وهو وشه بيطلع نار، من عدم اهتمامها ليه، وعدم ردها عليه
حسام: ايه ياقاسم، هو انت مدايق عشق ولا ايه
قاسم بيصك على سنانه… ………
حسام: قاسم، مالك يابني؟
قاسم :مفيش يا حسام مفيش، وسرح وبيفكر في عناد عشق قصاده، وتجاهلها ليه
؛——————بقلم شيمو الخطيب
عشق طلعت تطمن على رنا،
عشق: خبطت على الباب، ودخلت : السلام عليكم، اخبارك ايه ياست رنا دلوقتي، يارب تكوني بخير،
رنا: الحمدلله بخير ياعشق، شكرا على سؤالك
هدي: تعالي ياعشق، انا عايزه أسألك سؤال
عشق: خير ياست هانم، حضرتك تؤمري،
هدي: انتي عرفتي تفوقي رنا ازاي، ده حتى تشخيصك لحاله رنا كان صح، واللي قولتيه نفس كلام الدكتور،
عشق ضحكت : هههههه، ياست هانم انا قضيت وقت كبير قوي في المستشفيات، لأن بعيد عنكو يارب، امي مريضه، وكان موضوع الإغماء ده بيحصلها كتير، فأنا دايما كنت ببقي معاها، وقدرت اتعلم من الممرضات، كل حاجه، والحمد لله، ربنا قدرني، وبقيت اوقات كتير مبضطرش اني انقل امي المستشفى، وبقيت بعالجها في البيت، وربنا يشفي كل مريض يارب
رنا بتعب: هو انتي متعلمه ياعشق؟
عشق بوجع :طبعا ياست هانم، انا اتعلمت لحد الثانوي، وبعدها خرجت من المدرسه، امي تعبت ومقدرتش اسيبها واروح الجامعه
هدى باعجاب شديد:ما شاء الله عليكي ياعشق، وعلى كده كنتي شاطره في الدراسه
عشق: انا كنت متفوقه ياست هانم مش شاطره بس، لكن الحمد لله على كل حال، قدر الله وماشاء فعل،،(وبصت لرنا) المهم انا مش عايزاكي ياست رنا تستسلمي للتعب كده. أنا عايزاكي، تنزلي تتمشى معايا في الجنينه تشمي هوا، يمكن تبقى احسن
رنا بتعب: والله مش قادره ياعشق، سيبيني عشان خاطري، حاسه اني دايخه ورجلي مش شايلاني
عشق: لا، ايه الكسل ده، قومي بس معايا وانا هسندك، وصدقيني، لما تنزلي هتفوقي، والله
هدي: فعلا يارنا حاولي تقومي، وانا هقوم اشوف باباكي فين لانه نزل وقال إن محسن بيه كل شويه يكلمه، هشوف في ايه وهجيلك، ياريت ياعشق تخليكي معاها
عشق: من عنيا ياست هانم،
وخرجت هدى
عشق: يعني انتي مش هتنزلي معايا ياست رنا،
رنا بتعب: معلش ياعشق خليها مره تانيه
عشق بتريقه: ماشي، لما انزل بقه أبلغ حسام باشا ان رنا هانم مش نازله
رنا بلهفه: حسام!!! هو حسام هو اللي قالك تنزليني؟،،
عشق بابتسامه: اه،، شوفتي بقه،،، فأنا هنزل واقوله انك تعبانه
رنا عيطت بصوتها كله، طب ليه، ليه بيعمل معايا كده، انا تعبت، تعبت والله، حرااام
عشق قلبها وجعها على رنا: جريت عليها: ايه ياست رنا، اهدي كده ووحدي الله، انزلي وشوفي هيقولك ايه، يمكن يريح قلبك، ده والله شكله بيحبك
رنا بخوف: هو ابيه قاسم عارف انه قالك كده
عشق: لا طبعا ياست هانم، قاسم بيه جه بعد ما اتكلمنا
رنا بخوف: اوعي ياعشق حد يعرف، عشان خاطري، وعيطت
عشق طبطبت عليها : سرك في بير يا ست هانم، بس قومي بس معايا، يمكن تبقى احسن لما تتكلمي معاه
رنا : طيب هو ابيه قاسم فين؟
عشق : قاسم بيه تحت مع حسام باشا، بس ربنا هيدبرها انزلي بس معايا وان شاء الله خير
قامت رنا بتعب ونزلت مع عشق
عشق بتمشيها في الجنينه، وحسام لمحهم خارجين من الفيلا، قلبه دق جامد، وحس انه نفسه يروح ويضمها لقلبه،
قاسم بص على اتجاه نظرة حسام لقى رنا وعشق
قاسم: ايه ده، ده رنا شكلها بقت احسن والحمد لله
رنا وعشق قربوا منهم
عشق: السلام عليكم، ممكن اسال ايه رايكو في القهوه،؟ يا ترى، زي المره اللي فاتت ولا احلى،
قاسم ببرود : وليه احلي يعني، مش يمكن تكون اوحش،
عشق بثقه: لا، انا واثقه اني معملش حاجه وحشه ابدا، فأكيد احلى، ههههه
قاسم ببرود: عاديه يعني، زيها زي غيرها، ولا ايه ياحسام
حسام ورنا عنيهم متعلقه ببعض،
قاسم بغيظ: حساااام، انا بكلمك
حسام: ها، احم، اه، كنت بتقول حاجه ياقاسم
عشق: كان بيقول ان قهوتي، وحشه، طب بذمتك يا حسام بيه، قهوتي وحشه،
طب حتى اسأل رنا هانم
رنا : انتي متعمليش حاجه وحشه ابدا ياعشق
عشق: تسلمي من كل شر يارب يا هانم،
(بصت لقاسم)، شوفت، اهو، شهد شاهد من أهلها
قاسم :ضحك،،، ههههه، والله انتي مشكله، ماشي ياستي، قهوتك زي الفل، كده ارتحتي،
عشق بعند: اه ارتحت وجدا كمان، ههههههه
كلهم ضحكوا عليها،
قاسم : طب متحكيلي بقه، عرفتي، تفوقي رنا ازاي، وازاي قدرتي تعرفي هي مالها
عشق بمشاكسه: اممممم، منا قولتلك ياباشا، انا اعرف كل حاجه، تعالي بس معايا، نأكل ريكس، وبعدين احكيلك على كل حاجه،
قاسم بص باستنكار، : اممممم، ماشي ياعشق
وفعلا مشيو وسابو حسام ورنا مع بعض،
حسام : ايه يا رنا، بقيتي احسن دلوقتي
رنا بدموع: وده يهمك يا حسام اذا كنت كويسه او لا
حسام : اكيد طبعا يهمني، (رنا عنيها اتعلقت بيه) حسام حب يهدي من مشاعره، كمل وقال : ده لاني مش عايز اكون السبب، في تعبك
رنا بوجع: يعني هو ده اللي يهمك بس، غير كده لا
حسام: جاوبي على سؤالي من غير اسئله يا رنا، ممكن ولا مش ممكن
رنا بخنقه:، لا مش ممكن يا حسام، ولما انت مش قلقان عليا، قلت لعشق تنزلني ليه، عايز تكمل على اللي باقي مني، انا تعبت، وزهقت ومبقتش قادره استحمل معاملتك دي، انت كرهتني في نفسي يا حسام، وكل ده ليه؟،،، لييييه
حسام بزعيق: متعرفيش ليه؟ ،،، رنا انا مش عايز اتكلم في حاجه، انا كل اللي عايز اقولهولك، بلاش تعلقي نفسك بيا، انا عمري موافق احب واحده……
رنا بوجع: متكمل، ولا خايف ياحضرة الظابط،،، ، لا يا حسام باشا متخافش، انا خلاص، هقفل على قلبي، وهبقي بارده، لأنك بصراحه متستهلش كل اللي الحب اللي جوايا ليك
حسام بصلها بصدمه لأنها اول مره تعترف بحبها ليه وتكون صريحه ،،
رنا: ايوه للأسف بحبك، لكن انت متستاهلش، بحبك، وبكره نفسي، لاني فكرت فيك في يوم من الايام، بحبك يا حسام لكن للأسف مش قادره اكرهك، مش قادره اتخيل حياتي من غيرك،،
انا عارفه انك مش عايزني، لكن كل اللي بطلبه منك، انك تبعد،،، ، تبعد بس من غير متجرح، لاني خلاص، مبقتش قادره على اي جرح منك،،، حسام، انا عمري مهكرهك. عارف ليه؟
حسام عينه متعلقه بيها وبس ومردش
رنا: لأنك مينفعش غير انك تتحب وبس، انت في قلب رنا يا حسام، ومقفول عليك، وعمرك مهتخرج ابدا مهما عملت، وعلى فكره، انت لو متستحقش ده، انا مكنتش فكرت فيك ابدا، لكن انت تستحق اكتر من كده.
حسام : اتنهد وسكت ومردش عليها
رنا: انا مش عايزه منك رد، يا حسام، انا هفضل احبك وبس،
حسام رجع ضهره لورا وبص للسما وسكت خالص، وبعد عينه عنها لانه مش عارف فعلا يرد، جواه صراع مش عارف يحسمه
؛—————- بقلم شيمو الخطيب
عشق رايحه هي وقاسم لمكان ريكس، قاسم وطي على ريكس واكله، وقعد يلعب معاه وعشق جنبه
قاسم بصوت مخنوق: ياريت ياعشق لما تحبي تدي فرصه لرنا او حسام او غيرهم للكلام فتعمليها بذكاء اكتر من كده، انا جيت معاكي بمزاجي، وانا عارف ان فيه مشاعر معينه بين حسام ورنا، لكن هو مصارحنيش لسه، وثقتي في حسام تخليني اصبر عليه، لكن مش كتير، والا هيخسرني للأبد، فبلاش الأسلوب ده لاني بكرهه
عشق مصدومه ومتوتره : بس انا مقصدش حاجه ياقاسم بيه
قاسم قام وقف واتكلم بنرفزه : لا تقصدي، ومش قاسم العزيزي، اللي يتعامل بالشكل ده ولا يضحك عليه، انا عندي اهون انهم يقولوا نقعد مع بعض، ولا اني اتعامل بالشكل ده، انا بس لولا ظروف رنا، كان ليا تصرف تاني، فبلاش تعامليني اني عيل صغير وهتضحكي عليه، اظن كلامي مفهوم
عشق بخنقه : مفهوم ياقاسم بيه
قاسم خرج وكانت رنا لسه قاعده مع حسام
قاسم بخنقه: ايه يا رنا، مش بقيتي احسن ولا حابه نسيبك شويه كمان
رنا بلخبطه: تسيبني، لا، لا يا ابيه انا بقيت احسن
قاسم؛ خلاص يبقى تتفضلي تطلعي ترتاحي شويه فوق
رنا بلخبطه : حاضر، بعد اذنكوا، وفعلا مشيت
قاسم بص لحسام اللي مغمض عنيه وساكت خالص
قاسم بغيظ: والله،،،، انت هتفضل كده كتير،
حسام ببرود: لا ياقاسم،، انا قايم ماشي، لاني حاسس اني تعبان شويه
قاسم: حساااام، انا عايز افهم ايه اللي بيحصل بالظبط
حسام ببرود: وهو ايه اللي حصل ياقاسم، انا اللي عايز افهم مالك
قاسم : بلاش برودك ده يا حسام،،، ، انت فيه حاجه بينك وبين رنا؟
حسام بخنقه : اه يا قاسم فيه،
قاسم اتصدم من جرأته : والله،!!!! ولما هو فيه مكلمتنيش ليه
حسام بهدوء: بص ياقاسم، انت واثق فيا ولا لأ
قاسم : بقولك ايه، انا… .
حسام قاطعه: ياقاسم جاوبني على طول من غير لف ولا دوران
قاسم بهدوء: ايوه طبعا واثق فيك
حسام: واكيد واثق في انسه رنا كمان؟
قاسم: طبعا، اكيد
حسام: يبقى خلاص، صدقني ياقاسم، يوم متأكد من مشاعري بجد، اكيد انت اول واحد هقولك، اولا لأنك اخو رنا وصاحبي اللي مقدرش ازعله مني، وثانيا لأنك انا، يعني انت كل حاجه ليا، اظن بقه كده متقلقش،
قاسم بهدوء: ماشي يا حسام، بس ياريت بلاش تعمل حاجه انت واثق انها ممكن تدايقني في يوم من الايام، ولا تستقل بذكائي وتوصي عشق انها تشغلني،،،،، هاه، اظن فاهمني ياحسام
حسام؛ هههههههه، والله ابدا، انا موصتش عشق ولا حاجه، بس هي اللي حست،،،، والله البنت دي بجد غريبه، بتخطف قلب وعقل اي حد يقرب منها من اول ثانيه، حتى الحيوانات، ريكس نفسه اتعود عليها، بجد بنت ممتازه، ربنا يسعدها
قاسم سرح في كلام حسام عن عشق، وافتكر انه سابها عند ريكس ومشي
حسام: ايه ياعم سرحت في ايه،
قاسم؛ لا ابدا، مفيش،
حسام : تمام انا همشي انا بقه، عشان الحق انام واروح شغلي الصبح. سلام يا صاحبي
قاسم : سلام يا حسام
قاسم رجع لمكان ريكس يشوف عشق مشيت ولا لا، سمع عشق بتكلم ريكس وهو قاعد جنبها وبيسمع كأنه فاهمها
عشق بتمشي ايدها على جسمه : عارف ياريكس ، على رغم من ان قاسم بيه يبان عليه القسوه، بس اللي يعرفه يتأكد ان قلبه طيب قوي، لكن ليه بيبين انه قاسي مش عارفه، بس انا ميهمنيش، ربنا يصلح حاله، ويسعده، (في اللحظه دي تليفونها رن وكان طارق)
عشق بلهفه: الو،، ايوه يا طارق ، ايه امي جرالها حاجه
طارق؛ لا ياعشق متقلقيش، انا اطمنت عليها ودخلتها انا وامي تنام، المهم انتي عامله ايه، وليه مقولتليش على الشغلانه دي
عشق: والله جت فجأه، بعد مخالد بيه الله يسامحه نبه على كل أصحاب الأراضي محدش يشغلني، يلا خير، اهم حاجه ان انا مرتاحه هنا،
طارق: طب هما ناس كويسين، بيعاملوكي كويس،
عشق: اه الحمد لله يا طارق ناس محترمين،،،،، صحيح، انت فاكر قاسم بيه وحسام بيه ظابط قسم المدينه
طارق: ايوه طبعا فاكره، بس ليه
عشق: اهو قاسم بيه، هو اللي انا اشتغلت عنده
طارق بصدمه؛ نعم، طب ازاي
عشق: والله صدفه يا طارق، نصيب، يلا الحمد لله، بقولك انا هقفل معاك عشان الحق اصلي العشا، واشوف ورايا ايه، وأن شاء الله هحاول اروح اطمن على ماما بكره، سلام بقه
وقفلت معاه، وطارق محتار، هل فعلا عم سيد، اللي شغلها ولا هي اللي كلمت قاسم بيه،،، ، وقرر يسأل عم سيد بكره
—————— بقلم شيمو الخطيب
قاسم مشي بسرعه من قدام أوضة ريكس
وعشق خرجت تجري، عشان تلحق الصلاه
قاسم متابعها من بعيد، وبص بطرف عينه لقى جيجي ووالدها وولدتها داخلين بسرعه
هدى قابلتهم : اهلا وسهلا والله نورتوني
فريده بقلق: طمنينا يا هدى، رنا عامله ايه، والله من ساعة مقولتيلي، وانا قلقانه وجيجي صممت لازم تيجي تطمن على رنا
هدي: طب اتفضلوا تعالو نقعد الأول ، يازهره،، يا زهره
زهره: نعمين ياست هانم،
هدي: بلغي حازم بيه ان محسن بيه موجود، وقولي لرنا هانم تنزل،
زهره: من عنيا ياست هانم
زهره طلعت بلغتهم، وحازم نزل
حازم : يا اهلا وسهلا، والله نورتونا،
محسن : ده نورك ياحازم بيه، معلش بقه جينا متأخر، بس بصراحه جيجي مقدرتش تنام من غير متتطمن على رنا
حازم:ده انتو تنورونا في اي وقت، ايه يا هدى، عايزين فنجانين قهوه من بتوع عشق، ده انا سمعت انها بتعمل قهوه حلوه قوي
هدي: من عنيا يا حازم، ده قاسم من الصبح، كل شويه عايز قهوه، عايز قهوه، لما نجرب القهوه اللي هتهبله دي
جيجي بغيظ: وهي مين عشق دي يا اونكل
حازم: دي الشغاله الجديده، يا حبيبة اونكل، بس شاطره قوي، اول مره سيد يجيب واحده كويسه
قاسم داخل: اهلا، ازي حضرتك يا محسن بيه، نورتنا والله
وسلم على فريده وعلى جيجي،
محسن: اخبار حسام ايه يا قاسم، سمعت انه تعبان شويه
قاسم؛ الحمد لله بقه احسن كتير يامحسن بيه، هو بس كان دور برد خفيف، وانا صممت انه يخرج عشان التعب ميزدش
جيجي: اممممم، وهو بقه احسن دلوقتي؟
قاسم بدون ميبص ليها، : اه الحمد لله احسن،، (وقام وقف)، بعد اذنكوا انا هطلع ارتاح شويه
جيجي وقفت: ممكن اطلع معاك لاوضة رنا ياقاسم؟
قاسم باستغراب: هو انتي متعرفيش أوضة رنا فين؟ ، عموما اتفضلي،
فريده عوجت بقها واتخنقت منه، ومن رده،
جيجي طالعه معاه،: وانت عامل ايه يا قاسم، لسه زعلان مني،
قاسم ببرود؛ لا مش زعلان يا جيجي. مفيش حاجه حصلت تخليني ازعل، اهم حاجه، انك متكرريش الهايفات دي تاني
جيجي بزعل: يعني انا هايفه يا قاسم، الله يسامحك
قاسم قدام أوضة رنا : دي أوضة رنا، اظن انك عارفاها، خبطي بقه وادخلي اطمني عليها، وسلام انا
وسابها ومشي وهي في قمة غيظها
جيجي خبطت على رنا ورنا سمحتلها بالدخول،
جيجي داخله مندفعه: اووووف، بجد انسان مستفز
رنا : بسم الله الرحمن الرحيم، مالك يابنتي، داخله زي القطر كده ليه
جيجي: اخوكي ده ايه يا بنتي، عنده كمية برود لا تطاق، بجد مستحملينه ازاي،؟
رنا: زي ما انتي مستحملاه بالظبط، هههههههه
جيجي بنرفزه: بس مبقتش قادره،بجد تعبت
رنا : اهدي بس، وخلي نفسك طويل، والا مش هتعمري مع ابيه قاسم
جيجي سمعت قاسم بينادي على عشق
خرجت بسرعه
عشق كانت رايحه لقاسم : افندم يا قاسم بيه، تؤمرني بحاجه
جيجي مشيت ناحيتهم : هو انتي بقه عشق الخدامه الجديده هنا
ونكمل بكره يابنات
دمتم سالمين
بقلم شيمو الخطيب
❤❤❤❤❤❤❤
الحلقه ١٠
من (غمرتني عشق)
اللهم صل وسلم وبارك على سيدنا محمد وعلى آله وصحبه أجمعين وسلم تسليما كثيرا إلى يوم الدين❤️💕
بسم الله نبدأ
جيجي خرجت من أوضة رنا، اول ما سمعت قاسم بينادي على عشق
عشق : تؤمرني بحاجه ياقاسم بيه
جيجي: قربت منهم وبتبصلها من فوق لتحت : انتي بقه عشق الخدامه الجديده
عشق بصت لجيجي : ايوه ياست هانم ، انا عشق الخدامه الجديده (ورجعت بصت لقاسم)، خير ياقاسم بيه، كنت محتاج مني حاجه قبل منزل
قاسم: انتي كنتي فين ياعشق، انا سامع ماما بتنادي عليكي من شويه،
عشق: اسفه ياقاسم بيه، بس كنت بصلي في الاوضه الفاضية اللي هنا، ونازله على طول،
جيجي: وهو انتي بتدخلي اي اوضه في البيت كده بمزاجك ولا ايه!!!! ؟
عشق لسه هترد قاسم اتكلم
قاسم ببرود: عشق ياريت تنزلي تعملي قهوه من اديكي الحلوين، بصراحه مستمتعتش بطعم الفنجان اللي فات، وياريت تطلعيه على هنا بسرعه
عشق: من عنيا ياقاسم بيه،(وبصت لجيجي) ولسه هتنزل
جيحي بقرف: استنى هنا يابت انتي، هو انا مش بكلمك ولا ايه، اقفى ردي عليا الأول،
قاسم : عشق انزلي اعملي القهوه وطلعيها بسرعه، يلا انزلي واقفه كده
عشق واقفه مذهوله من اللامبالاة، والبرود اللي قاسم فيهم، ابتسمت ونزلت بسرعه
جيجي واقفه هتطلع نار: انت ازاي تعاملها بالاسلوب ده ياقاسم، ازاي تنصرها عليا وانا واقفه، وكأني ماليش لازمه
قاسم بنفس البرود: وهو انا عملت ايه، انا بس قولتلها، تنزل تعمل القهوه، وبعدين انتي اللي ازاي تكلميها بالتكبر ده، على فكره عشق بنت غلبانه اه، لكن ذكيه ومتعلمه، وعندها عزة نفس يعني مش قليله يا جيجي هانم
جيجي بغيظ: انت كمان بتدافع عن حتة خدامه، وعلى كده بقه حضرتك عرفت بسرعه كده ان عندها عزة نفس كمان
قاسم بابتسامة : ايوه طبعا، اصلي بفهم طيبعة الناس بسرعه، زي ما انا فاهم طيبعتك كويس قوي
جيجي بغيظ:ماشي ياقاسم، انا بجد مش هنسالك موقفك ده ابدا،
رنا خرجت: ايه مالكو، صوتكو عالي ليه،،، ايه ياجيجي، انتي هتفضلي متعصبه كده على طول،
جيحي بنرفزه: الاستاذ بينصر حتة خدامه عليا، شوفتي اخوكي يا رنا
قاسم ببرود اكبر: اسمي قاسم يا جيجي، قاسم العزيزي، مش استاذ، هاه، وغمزلها ودخل اوضته وقفل الباب
جيجي بغيظ: آآآآآآه، هموت هتفرس بجد، اخوكي هيجبلي جلطه ببروده يا رنا
رنا : ههههههههه، بجد هموت من الضحك، ابيه قاسم ده عسل، بس الله يكون في عونك يا جيجي، تعالي تعالي هدى أعصابك شويه، هههههه
جيحي: بتضحكي؟!!! انتي هتموتيني انتي كمان يا رنا، هو مين ده اللي عسل، ياشيخه ده كرهني في اليوم اللي حبيته فيه
رنا: هههههه، اهدي بس، وحاولي تتعلمي البرود عشان تعرفي تتعاملي معاه. تعالي بس ننزل نسلم على اونكل وطنط ونقعد في الجنينه شويه
جيجي، نزلت معاها بنرفزه
ورنا نزلت سلمت على فريده ومحسن، وخدت جيجي وخرجت الجنينه
عشق قدمت القهوه لحازم ومحسن وفريده وهدى،
هدي: عشق، انتي واخده الفنجان ده ورايحه فين كده
عشق: ده لقاسم بيه، يا ست هانم، طلب مني اطلعله القهوه
هدي: ماشي ياعشق، طلعيها وشوفي رنا هانم وجيجي هيشربوا ايه
عشق: من عنيا ياست هانم
فريده : استنى انتي يا عشق، اظن لو زينب او البنت التانيه طلعتها لقاسم بيه، يكون أفضل، ولا ايه ياهدي (وبصت لهدي)
هدى باستغراب: ليه يا فريده، ايه سبب الاعتراض على عشق يعني،
فريده : لا مفيش اعتراض ولا حاجه، انا بس بقول يستحسن
هدى فهمت فريده: خلاص ياعشق، قولي لزينب تطلع القهوه لقاسم بيه
عشق بكسره: من عنيا ياست هانم
عشق دخلت لزينب وحكتلها اللي حصل وزينب طلعت بالقهوه
زينب خبطت
قاسم : ادخلي ياعشق تعالي
زينب دخلت : ده انا ياقاسم بيه،
قاسم: تعالي يا زينب، هو انتي اللي عملتي القهوه؟
زينب :لا،، عشق يا قاسم بيه اللي عملتها
قاسم :طب ليه مطلعتهاش هيا؟
زينب: اصل الست فريده رفضت انها تطلع لحضرتك وقالت يا انا يا زهره
قاسم بغيظ: طب وهي مالها، تتدخل في شيئ ميخصهاش ليه
زينب: والله ياقاسم بيه، عشق تحت بتعيط، ومتدايقه من اللي حصل، البت دي اغلب من الغلب، لكن يلا، ملهاش حظ في الدنيا،
قاسم بغيظ اكبر : ماشي يازينب، تقدري تنزلي انتي،
زينب : عن اذنك ياقاسم بيه، ونزلت
قاسم رايح جاي في الاوضه بغيظ وبص من البلكونه لقى رنا وجيجي قاعدين
خرج قاسم من اوضته ووقف على السلم ونده على عشق : عشق،،،، ياعشق،
هدي ردت عليه وواثقه من رد فعله :خير ياقاسم، عايز حاجه
قاسم بنرفزه:عشق فين ياماما،
هدي: في المطبخ ياحبيبي، عايز ايه وانا ابعتلك زينب ولا زهره
قاسم بضيق وصوت عالي: انا بقولك عشق ياماما، مش زينب ولا زهره.(وبصوت عالي) ياعشق،،، ياعشق
عشق طلعت جري: ، تحت امرك ياقاسم بيه
قاسم : اطلعي يا عشق انا عايزك
هدي: سيب عشق ياقاسم، لأنها مشغوله في المطبخ وانا هطلع زينب
قاسم بنرفزه: عشق، اطلعي انا عايزك، (وأكد على كلامه)، اطلعي انتي ياعشق، انتي فاهمه،،، وسابهم ودخل اوضته
عشق بصت لهدي،
هدى بقلة حيله : اطلعي ياعشق، انا عارفاه لو طلعت زينب، هيتجنن علينا
فريده قاعده هتطق منه ومن تصرفاته ومستغربه اشمعني عشق اللي عايزها،
فريده لعشق : بصي يابت انتي، طبعا مينفعش تفضلي فوق كتير، شوفي عايز ايه بسرعه وتنزلي على طول، لكن شغل الدلع، والحركات بتاعة الخدامين دي، متتعملش، انتي فاهمه ولا لا
عشق بغيظ : انا مبدلعش ولا بعمل حركات ياست هانم، عشان تقوليلي كده،
فريده بضيق: انتي بتردي عليا يابت انتي، انتي اتجننتي ولا ايه
هدي: عشق فريده هانم متقصدش، ومينفعش انك تردي بالشكل ده
عشق لسه هتتكلم قاسم نده عليها
هدي: اطلعي بسرعه ياعشق، قبل ميكسر البيت علينا
عشق طلعت بسرعه
خير ياقاسم بيه، محتاج مني حاجه،
قاسم قرب منها ووشه بيطلع نار : انتي ازاي تسمحي لحد يتحكم فيكي، انا قولتلك طلعي القهوه يبقى انتي اللي تطلعيها، مش فريده اللي هتتحكم مين يطلعلي ومين لا،
عشق بحكمه : اهدي ياقاسم بيه، اهم حاجه ان القهوه طلعت، مش مهم مين طلعها، وانا اتعودت اني اكبر عقلي، يعني لو الموضوع سهل وممكن اعديه، بعديه، عشان الأمور تمشي ياقاسم بيه، وبعدين ده اول يوم ليا في الشغل، ليه اعمل مشاكل
قاسم بزعيق: بس انا مبحبش حد يتحكم فيا ويمشيني على مزاجه، ومش على اخر الزمن تيجي فريده ولا جيجي يفرضوا عليا رايهم
عشق بجديه: قاسم بيه،،،، ، هو حضرتك بتحب جيجي هانم (سألت السؤال وقلبها دق بسرعه وخايفه من الاجابه، لكن ليه متعرفش)
قاسم اتفاحئ من السؤال : هاه،،، ليه سألتي السؤال ده؟
عشق: اصلي بصراحه شايفاها بتحبك.،و اخده عليك قوي، فقولت اكيد انت كمان بتحبها او هتتخطبوا قريب ولا حاجه
قاسم بعد تفكير: بصي ياعشق، انا معرفش يعني ايه حب، فعشان كده مقدرش اقول اني بحبها، ومقدرش اقول اني بفكر اخطبها
عشق غمضت عنيها وضربات قلبها هديت
قاسم: مالك ياعشق، حاسه بحاجه
عشق: لا، لا يا قاسم بيه انا تمام، المهم حضرتك كنت محتاج حاجه
قاسم: لا يا عشق مش محتاج حاجه، بس انا حبيت اثبت لفريده هانم، انها متحاولش تمشي حياتي على مزاجها، فقصدت اني اطلعك مش اكتر
عشق بخنقه: امممممم، يعني انا بقيت اداه بتحركوها انتو الاتنين بمزاجكو، مش كده ياقاسم بيه
قاسم ابتسم: اداه مره واحده، لا ياستي،هههه ولا اداه ولا حاجه، بس فعلا اتدايقت من تصرفها، واتدايقت من احراجها ليكي، فحبيت اقولها بطريق غير مباشر، انها متحاولش تعمل كده تاني ،
عشق سمعت هدى بتنادي، : طيب انا هنزل انا، قبل فريده هانم، متعلن الحرب عليا، وسابت قاسم ونزلت تجري
قاسم فضل واقف مبتسم مكانه، وبيعيد كل كلامها في دماغه تاني، واخيرا راح قعد في البلكونه
عشق نزلت ودخلت المطبخ بسرعه وعملت عصير وطلعت زهره تقدمه لجيجي ورنا، والكل قضى السهره وبعدها مشيو
رنا قاعده في اوضتها وماسكه الموبايل بتاعها ونفسها تتصل على حسام
اما حسام فقاعد في اوضته وبرده ماسك موبايله، ومش عارف يتصل برنا ولا لأ، طب لو اتصل هيقول ايه
لكن قرر في الاخر انه يكلمها
رنا في اوضتها ماسكه الفون وسرحانه وفجأه الفون رن، وهي اتخضت جدا ورمت التليفون من اديها
قلب رنا بيدق بسرعه وفرحانه انها شايفه رقم حسام
فتحت بسرعه قبل مايقفل وبصوت مبحوح: الو،،، ايوه يا حسام
حسام: قلبه بيدق بسرعه جدا ومش عارف يسيطر على نفسه سكت ومردش
رنا: الو، حسام،، انت معايا؟
حسام: اتنهد،، ايوه يا رنا انا معاكي، عامله ايه دلوقتي
رنا بدلع: ايه قلقان عليا؛؟
حسام لسه هيرد بس فجأه صورتها قدامه ظهرت وادايق انها حطت نفسها في موقف مش كويس، ولولا هو كان زمانها مدمره
حسام: انا مش قلقان يارنا، انا بس مش عايز ابقى انا السبب في تعبك، سواء انتي او غيرك
رنا بدموع وخنقه: غيري!!!! ، هو في غيري يا حسام؟
حسام ببرود: حاليا مفيش، بس يمكن بعد كده يبقى فيه يا رنا،
رنا بدموع: انت لسه مش قادر تسامح؟ ، هتفضل كده لحد امتى يا حسام؟ ، صدقني هتندم، هتندم على كل تصرفاتك دي معايا
حسام بزعيق: انا اللي هندم يارنا، وانتي ايه.؟ مندمتيش؟ ، عايزانى ازاي اعرف انك كنتي موجوده مع بنات مسجلين آداب، واسكت، واتعامل عادي، انتي عارفه انك لو مكنتيش كلمتيني، كان زمانك فين؟ كان اكيد هيتعملك ملف و قضية آداب، سمحتي لنفسك ازاي تروحي وتقعدي في بيت كله شباب وبنات لوحدهم، مخوفتيش؟ ،، وازاي اتجرأتي وكلمتيني انا؟ ، نفسي بجد اعرف ايه اللي خلاكي تروحي من الاول اصلا، انتي ازاي سلبيه ومستهتره بالشكل ده
رنا بعياط : حسام، انا كلمتك عشان بحبك، عشان انت الأمان بالنسبالي، وكنت عارفه انك هتطلعني منها، لكن انا والله والله مكنتش اعرف انه مكان مشبوه، انا بجد…..
حسام قاطعها وبصوت جهوري : انتي ايييه؟ ،،، انتي طلعتي أحقر مما كنت أتصور، انا لما بفتكر منظرك وانتي وسط شويه المشبوهين دول بتجنن، كل لما افتكر منظري انا وانا بحاول اثبت برائتك واعدي الموضوع من غير تدخل قاسم او حازم بيه، بتجنن،، ليه تعملي في نفسك كده، ليه تعملي فيا انا كده، ليه تخسري حبي ليكي يا رنا، ليه تضيعي حلمي في لحظة طيش، مليون مره قولتلك فكري قبل أي خطوه بتعمليها يارنا، مليون مره قولتلك اتصرفي بعقل، لكن الدلع اللي انتي فيه ده مينفعش، وانا بصراحه مقدرش اجيب لأولادي ام متعرفش تربيهم، انا اسف يارنا لكلامي، بس انتي اللي اضطرتني اقول كده، بسلبيتك ودلعك الزياده وعدم تحملك للمسؤوليه، انتي متنفعنيش يارنا،
وقفل السكه في وشها،
رنا كانت بتسمع ومصدومه ومنهاره ، ومش قادره تصدق اللي سمعته، فضلت مكانها تعيط، واخيرا قررت انها تنسى حسام وتخرجه بره حساباتها تماما، لأن مبقاش ينفع رجوع،
اما حسام قفل السكه ورمى الموبايل على السرير وقعد حط راسه بين اديه وبيحاول يهدي، ومش عارف، هل يدي لرنا فرصه تانيه ولا لا، واللي عمله ده صح ولا غلط، بس هو مش قادر ينسى منظرها، مش قادر ينسى نظرة الظباط والعساكر ليها وهو بياخدها من القسم
لكن تفكيره وقف علي ان كل اللي عمله ده صح، لأنه بكده بيحاول يفوق رنا، ويخليها تفكر الف مره قبل متخطو اي خطوه
————-بقلم شيمو الخطيب
عند عشق
عشق لزينب: اااااه، انا تعبت قوي يا زينب انهارده، نفسي انام
زينب، هيا الست هدى قالتلك على اوضتك ولا لا ياعشق،
عشق بقلق: هو انا هيبقى ليا اوضه لوحدي،،، ده لا يمكن ابدا، انا بخاف انام لوحدي
زينب: هههههه انتي بتخافي؟ ، واللي يشوفك يقول انك تخوفي بلد
عشق بضحك: والله انا مفيش اغلب منى، غيرش بس كرامتي هي اللي وجعاني شويه ههههه، واللي يمسها ببقى عايزه اكله بسناني،
زينب: هههههه، ربنا يسعدك ياعشق، انتي بت غلبانه وطيبه، وتتحبي من اول مره
عشق: اول مره، ههههههه، ماشي يازينب، تُشكري يا زوزو،، بس صحيح، هي البت زهره فين
زينب: زهره؛؛؛ زهره نايمه من بدري، ههههه دي مفيش منها مصلحه
عشق: معلش بت غلبانه ولازم نستحملها، ربنا يعينها على حالها
دخلت هدي: عشق، انتي هتنامي مع زهره في اوضتها، ادخلي ظبطي السرير ونامي لان عندنا شغل كتير بكره ان شاء الله
عشق؛ تحت امرك ياست هانم.،
هدى؛ تمام يلا تصبحوا على خير
عشق وزينب : وانتي من اهل الخير ياست هانم
دخلت عشق اوضتها، وحاولت تنام، لكن تفكيرها في احداث اليوم، وتفكيرها في والدتها طير النوم من عينها،
قامت عشق واتوضت وصلت القيام، واخدت مصحف وطلعت الجنينه تقرأ شويه لأنها مش عارفه تنام
قاسم قاعد بيقرأ في كتاب في البلكونه
بص لقى عشق قاعده في وسط الخضره، وبتقرا، بس في ايه ميعرفش
قفل الكتاب وقعد يتابعها لكن هي مندمجه وفضلت فتره كبيره على الوضع ده
نزل قاسم وطلع الجنينه وقرب من عشق براحه
عشق اتخضت: قاسم بيه،حطت اديها على قلبها (صدق الله العظيم وقفلت المصحف)، خير ياقاسم بيه، فيه حاجه ولا ايه
قاسم بتعجب: انتي بتعملي ايه في الجنينه دلوقتي ياعشق!!!؟
عشق: انا دخلت انام لكن معرفتش خالص، فقومت اصلي القيام، وقريت الورد بتاعي، بس حضرتك جيت قبل مكمله
قاسم: وبتقري في الجنينه ليه !!!؟
عشق: انا طول عمري عايشه وسط الأراضي والخضره وبصراحه حنيت ليهم، فقولت اقرا هنا وبعدين ادخل انام
قاسم: هو انتي متعوده تقري قرأن يا عشق؟
عشق: طبعا ياقاسم بيه، انا بعمل لنفسي ورد كل يوم، لو مقرتوش معرفش انام، وانا واثقه ان ده اللي مطير النوم من عيني، فقومت اقراه وهنام ان شاء الله
قاسم باعجاب : بس انا اعرف بنات بتصلي، اه مش منتظمه لكن بتصلي، انما بنت بتقرأ قرأن كل يوم، مقابلتش بصراحه!!!
عشق: لا حضرتك اكيد اللي بتدور في مكان غلط، لكن البنات المتدينه كتير ياقاسم بيه، اكيد انا مش مختلفه يعني، لأن في زيي واحسن مني بكتير كمان، وفي برده اللي انا احسن منهم، بس ده متوقف بقه على المكان والبيئه اللي حضرتك بتكون فيها
قاسم: عندك حق، اكيد يعني مش هروح كباريه، وادور على بنت متدينه
عشق: كباريه!!! ربنا يعافينا يارب،بس اكيد طبعا، ياقاسم بيه
قاسم بضحك: ربنا يعافينا، هههههه هو انا بدعي عليكي يابنتي
عشق: ههههه لا طبعا مش قصدي، بس انا اللي بدعي ان ربنا يعافينا من موت القلوب يا قاسم بيه، اني اعمل المعصيه وانا مبسوطه، استغفر الله العظيم من كل ذنب عظيم
قاسم واقف بيبص لعشق وسرحااان فيها
عشق باحراج : احم،،، ياقاسم بيه،
قاسم : هاه، نعم
عشق باحراج : ، لا مفيش، انا هدخل اكمل الورد بتاعي، وانام، محتاج مني حاجه،
قاسم :لا شكرا ياعشق، تصبحي على خير
عشق، وانت من اهل الخير ياقاسم بيه
ودخلت عشق كملت وردها،، ونامت على طول
اما قاسم فقعد كتير يفكر في كلام عشق، لحد مطلع وغلبه النوم ونام
—————- بقلم شيمو الخطيب
تاني يوم عند فاديه
صحيت فاديه من النوم، اتوضت وصلت الصبح، وقعدت تسبح وتقول اذكار
الباب خبط وكانت سحر
فاديه فتحت: اهلا. تعالي ياسحر يابنتي، اتفضلي،
سحر: صباح الخير يا خالتي،
فاديه؛ صباح الفل على عيونك ياحبيبتي، عامله ايه
سحر: انا الحمد لله بخير، المهم انتي عامله ايه من غير عشق
فاديه بدموع : قاطعه بيا قوي يا سحر، حاسه اني يتيمه من غيرها، ربنا يسترها معاها ويوقفلها ولاد الحلال في طريقها يارب
سحر: ربنا معاها يارب يا خالتي، طيب انتي خدتي الادويه بتاعتك ولا لا،
فاديه : لسه والله يابنتي، انا حتى مفطرتش،
سحر : خلاص ياخالتي، انا هقوم اعملك فطار، واجيبلك الدوا، وياريت متقوليش لا
فاديه: ربنا يصلح حالك ياسحر يابنتي ويرزقك بابن الحلال اللي يسعدك
سحر بضحك : يااااارب يا خالتي، اكدي بقه في دعوتك على ابن الحلال دي، ههههه
فاديه : يوه،، جتك ايه ياسحر، هههههه، ربنا يرزقك بابن الحلال اللي يسعدك يا حبيبتي، هههه، كده كويس
سحر : كويس جدا، خليكي على الدعوه دي يا خالتي، ههههه
سحر حضرت الفطار، وفاديه فطرت وسحر معاها، وفاديه اخدت الدوا،
سحر: ها يا خالتي، محتاجه منى حاجه
انا مضطره امشي، عشان الحق شغلي
فاديه: تسلمي من كل شر يا حبيبتي، ربنا معاكي،
سحر؛ سلام عليكم يا خالتي،
فاديه وعليكم السلام، ياحبيبتي،
ومشيت سحر، وقعدت فاديه قدام باب البيت. تسلي نفسها، ولسانها مبيسكتش عن الدعا لعشق، والأذكار اللي تحصنها
وتحميها
اتفاجئت فاديه بوجود عشق قدامها
فاديه بلهفه : عشق،!!!!! بنتي حبيبتي، وحشتيني يابنتي، وضمتها ليها
عشق: حبيبتي، يافاديه وحشتيني قوي، عامله ايه يا أمي،
فاديه : بخير يا قلبي طول ما انتي بخير
عشق: طيب انتي ايه اللي مقعدك كده، وياتري فطرتي وخدتي الدوا ولا لسه؟
فاديه؛ لا والله يا حبيبتي فطرت واخدت الدوا، الله يباركلها سحر مسابتنيش غير لما فطرتني، واداتني الدوا، وبالليل طارق ووالدته قاموا بالواجب، ربنا كبير يا عشق، ورحيم بعباده، وولاد الحلال كتير، اطمني يا حبيبتي
عشق:الحمد لله ياأمي، ده عشان انتي طيبه وبتحبي كل الناس،
فاديه :المهم يا حبيبتي، احكيلي عامله ايه،؟
عشق: انا كويسه جدا ياماما، وبدأت تحكيلها على كل حاجه وطبعا قالتلها على أنها اشتغلت عند قاسم بيه
فاديه بفرحه: الحمد لله يا بنتي، بس باين عليهم ناس طيبين وولاد حلال، وانا قلبي ارتاح لقاسم بيه وحسام بيه من اول مشوفتهم
عشق : ، الحمدلله على كل شيء، ها ياست الكل معلش انا هقوم يادوب اعدي على سحر اسلم عليها، وامشي، وأن شاء الله هقضي معاكي الخميس والجمعه من كل أسبوع
فاديه بدموع: بسرعه كده يا عشق
عشق: معلش يا ماما.،بس انا وعدت هدى هانم اني مش هتأخر، ومش عايزه اخلف وعدي معاها
فاديه : ماشي يابنتي في امان الله يا حبيبتي، ربنا يبعد عنك كل شر، ويحفظك لقلبي يا عشق
عشق: باست اديها وحضنتها،، يارب ياست الحبايب
ومشيت، وراحت لسحر الأرض
خالد لمح عشق،
خالد : ايه ياعشق، جايه تعتذري، وتطلبي السماح ولا ايه
عشق: ههههه، مش عشق الالفي اللي تطلب منك انت السماح ياخالد بيه،حتي لو هموت، انا جايه اسلم على صاحبتي،
سحر شافتها وجريت عليها حضنتها وعشق شكرتها على اللي عملته مع والدتها
خالد: ايه ياسحر، هتفضلي تسلمي كتير، يلا يا ختي عندنا شغل كتير
سحر :حاضر يا خالد بيه؛ (بصت لعشق)، ابقى طمنيني عليكي ياعشق، وكلميني على طول
عشق : من عنيا يا سحر،، مع السلامه
عشق لسه هتمشي
خالد: عشق، مش ناويه ترجعي ولا ايه
عشق: ههههه، لا مش ناويه، وشكلك قريب انت اللي هتطلب السماح يا خالد بيه، بس ساعتها، اعمل حسابك اني مش هسامح، سلام، يا،، يا خالد بيه، هههههه
خالد لنفسه : ماشي ياعشق، انا هعرفك من هو خالد الرافعي
—————-بقلم شيمو الخطيب
في فيلا العزيزي
عشق رجعت بسرعه
هدي: ايه ياعشق انتي لحقتي،
عشق: الحمد لله ياست هانم، المواصلات كانت متوفره،، وبعدين انا وعدت حضرتك مش هتأخر، وانا دايما عند وعدي لحضرتك
هدي: والله انتي كل ساعه بيزداد إعجابي بيكي ياعشق، عموما يلا شوفي شغلك، وشوفي قاسم ورنا صحيو ولا لأ، لأن قاسم منزلش في معاده ودي غريبه جدا
عشق : من عنيا ياست هانم
طلعت عشق، وخبطت على رنا، وفعلا رنا كانت بتلبس، وبلغتها ان الفطار جاهز
راحت عشق لاوضة قاسم، خبطت كتير مردش، فتحت الباب براحه. وبصت، لقته نايم على الكنبه
عشق قربت منه بقلق وخوف : قاسم بيه قااااااسم بييييه
ونكمل بكره يابنات

 

• لقراءة باقي فصول الرواية أضغط على (رواية غمرتني عشق)