روايات

رواية جبروت جد الصعيد الفصل العاشر 10 بقلم ياسمين علاء الدين

لو عاوز تقرأ الفصول الجديدة من الرواية دي بشكل حصري قبل صدورها

أنضم لقناتنا على تليجرام (من هنا)

البارت العاشر

جبروت حكم جد الصعيد

ال١٠

اللهم صل وسلم على سيدنا محمد

وقفت شهد مع شهاب : انت كنت بتعمل ايه مع حنين

شهاب : في ايه يا شهد . اختي وبكلمها

شهد : اختك ..دلوقتي بقت اختك ..مش دي اللي مكنتش عايزنا هنا

شهاب : ممكن تكون اتفجئت بس هي طلعت طيبه . انتي لو قربتي منها هتحبيها

شهد : مش عايزه اقرب من حد .

شهاب : خلاص براحتك . بس مش هتمنعيني عنها.

شهد : غبي معندكش كرامه

شهاب : كرامه ايه . دي اختي

شهد : غبي

……

علي رجع البيت بعد ما كان قاعد مع مني وحكتله أنها كانت بتقابل زهره وبيخرجو مع بعض وأن الحاله رجعت لها تاني وهلوست بكلام غريب

أنها مراته و مش أخته بس مني طبعا مصدتقتش

فتح باب الاوضه والغضب مسيطر عليه لاول مره زهره تشوفه بالشكل ده

زهره : علي . حوصل ايه

علي : قولتلك مني خط احمر. وانتي مسمعتيش كلامي

زهره رجعت للخلف وهي خايفه منه : ءء انا

مسك شعرها جامد : انتي ايه . مش كفايه جدك ابتلاني بيكي . كمان جايه تدمري مستقبلي . انا من غير جدك كنت عمري ما ابص لوحده زيك . انتي اللي زيك تعيش وتموت في الزريبه مع الجواميس .

مش تعيش مع البني ادمين .. يا غبيه

كلام علي كان بيوجع اكتر من الضرب . كلامه بيقطع فيها مش مصدقه أن في انسان قلبه اسود بالشكل ده .

زهره : انا لاول مره اكره انسان . انا بكرهك يا علي. ولو راجل وخايف علي حياتك أنها تبوظ طلقني

علي: هطلقك بمزاجي

زهره: هتضحك عليا وله هتضحك علي نفسك، خايف قوي علي حياتك .. انت معتحبش مني . انت عتحب نفسك . عايز تكسب كل حاجه . تكسب مني عشان مكانتها العلميه .. تكسب جدك عشان خايف يحرمك من الميراث لو طلقتني . فاكر نفسك احسن من اي حد . بس الحقيقه انت مريض بحب نفسك

علي ضربها بالقلم جامد وقعت واتخبطت في السرير رأسها اتفتحت. بس وقفت تاني قدامه وقالتله بعند : طلقني لو راجل

علي : مش هطلقك

زهره : هطلقني غصب عنك

علي بسخريه : ومين بقي اللي هيغصب عليا . انتي وله اخوكي اللي ماشي ورا جدك زي ضله وله ابوكي اللي ملوش كلمه. وله يمكن جدك اللي اما صدق اتخلص منك … محدش عايزك يا زهره . انتي متسويش حاجه. زباله …

. خرج من الأوضه وهي انهارت في العياط .. زواجها محكوم عليه بالفشل من اول يوم وهي عارفه بس مش هتقدر تتحمل اكتر من كده .. ..

سمعت صوت الباب وعرفت أنه خرج . مكنش قدمها غير حل واحد انها تخرج من بيته بعد ما بهدلها

لبست هدوم خروج وخرجت وهي دايخه من الدم اللي مغرق وشها

مشيت في الشارع بتعيط و بتحاول تقاوم الدوخه اللي حاسه فيها وقعت قدام عربيه واغمي عليها

اتجمع الناس وبيحاولو يفوقوها بس مفيش فايده .

………

تاني يوم في البلد الصبح بدري ..

شهاب وقف : سلام عليكم انا همشي

الجد : علي فين

شهاب : رايح الجامعه يا جدي

الجد : ماشي ..

خرج شهاب وحنين خرجت وراه ونادت عليه عشان يقف وقف وبصلها وهو واقف في جنينه البيت : نعم يا حنين . في حاجه

حنين : اه . استني

خرجت من جيبها مبلغ وقدمته الي شهاب . بص لايدها باستفهام : بتوع ايه دول

حنين : خبر ايه عاد يا واد . خدهم واسمع كلامي مش اختك الكبيره انا وله ايه

شهاب بصلها : شكرا يا حنين . بي انا مش محتاج فلوس. . معايا

حنين كشرت : خدهم ياض بقولك بدل ما اضروبك بالشبشب

ضحك شهاب وهي حطتهم في جيبه وهي بتقوله : هاتلك عصير وسندوتشين

شهاب ضحك : ومصاصه ولبان

ضربته علي كتفه : بتكلم بجد . عشان لو احتجت حاجه هاتها وكمان لو جعت

شهاب حضنها : شكرا يا حنين . ربنا يخليكي ليا

حنين بعدت بسرعه : ‘ يا خربيت عقلك لو شافني هيعلقني علي باب الدوار

شهاب : هو مين

حنين : حامد. سبع الرجال

شهاب ضحك : واضح فعلا انك مسيطره

حنين : انت اللي عبيط . باين جوي اني كنت بكذب

( كح .كح ) سمعت حنين كحت حامد : باين جاي. اهروب بسرعه

شهاب وقف : حنين جبتي الفلوس منين

حنين : وده وقت سؤال . ده مصروفي وانا مش بخرج . وملكش صالح. انا الكبيره أهنأ

شهاب : ماشي يا كبيره سلام

وقفت تلوح له وهو ماشي بخروج حامد من البيت

: وقفه أكده ليه . وبتشاوري لمين يا بجره قلبي

ضحكت حنين وقربت منه ..حضنها هو.

حنين : لشهاب اصله رايح الجامعه وكنت بطمن عليه

حامد قبل جبينها : حبيبي ابو قلب ابيض ، عقبال ولادنا

حنين ابتسمت. : أن شاء الله .

حامد : عايزه حاجه مني قبل ما امشي

حنين : خلي بالك من نفسك . في رعايه الله

*****

في مصر

قد يعجبك ايضا
منذ عام
رواية قلوب حائرة الفصل السادس 6 بقلم روز آمين
منذ عام
رواية قلوب حائرة الفصل السابع 7 بقلم روز آمين
منذ عام
رواية قلوب حائرة الفصل الثامن 8 بقلم روز آمين

رجع علي البيت الصبح . مش عايز يشوف زهره

البيت كان هادي. دخل نام وهو ميعرفش أنها سابت البيت ومهنش عليه يفتح الباب حتي يطمن عليها بعد اللي عمله ..

في الوقت ده كان زهره في المستشفي

فتحت عينها وغمضتها بسرعه بانزعاج من النور القوي .. كان في شاب واقف قدامها

الشاب : حمد لله علي السلامه .. اخيرا فتحتي عينك

زهره كشرت من وجع رأسها وبصتله ومن هدومه عرفت انه دكتور.( لابس بلطو ابيض وحاطط سماعه علي رقبته )

زهره بهمس : احم . انا فين

الدكتور : انتي في المستشفي .. امبارح وقعتي قدام عربيتي . حاسه باي وجع

زهره : اه راسي هتنفجر من الصداع

قرب منها و فتح الكشاف في عينها وقاس الضغط : الضغط واطي . كمان من تأثير الخبطه اللي في راسك انا خيطتها ..

زهره افتكرت اللي حصل وعيطت ..

الدكتور : بتعيطي ليه .. اهدي بس واحكيلي مالك ..

زهره بصتله وهي بتعيط : انا عايزه امشي من اهنا

الدكتور : مش قبل ما اطمن عليكي .. وتحكيلي عن نفسك ..

زهره : انت ملكش صالح بيا

ابتسم الدكتور علي لهجتها : صعيديه .. انا خابر زين عرق الصعايده اما بينط بيكون واعر

مسحت دموعها و بصتله ببرائه .. شد الكرسي و قعد قدامها :. هبدا انا واعرفك علي نفسي .. انا مصطفي المهدي .. دكتور اطفال عندي ٢٧ سنه . انتي بقي اسمك ايه

زهره بصتله وهو ابتسم عشان يشجعها تتكلم عنده فضول يعرف عنها اكتر

: انا اسمي زهره ممدوح القاضي عندي ٢٠ سنه

مصطفي : لسه صغنونه خالص

زهره كشرت : لع مش صغنونه انا كبيره

ضحك وهو بيرفع أيده باستسلام : اسف

زهره : هي الساعه كام انا عايزه امشي

مصطفي بص في ساعته : الساعه يا زهره ٧ صباحا

زهره شهقت: ها .. انا نمت بره البيت . محدش يال عليا

مصطفي بصلها بحزن : اكيد محدش يعرف مكانك .. قوليلي انتي ساكنه فين وانا هاجي معاكي .. مش انتي تقريبا كنتي ساكته في المنطقه اللي أغمي عليكي فيها

زهره : لع . مش هعاود هناك انا عايزه ارجع البلد .

وافتكرت كلام علي اما قالها أنها ملهاش لازمه وأنها زباله .. حاسه باختناق وعيطت جامد هي لو رجعت هيرجعوها لعلي وهي مش عايزه تشوفه

مصطفي حاسس بشعور غريب ومش عارف ليه زعلان عشانها يمكن شفقه بحالها

: متزعليش نفسك يا زهره . قوليلي اقدر اساعدك بايه وانا مش هتاخر. اعتبريني اخوكي .

عيطت اكتر ..

مصطفي بتلقائي : مش هينفع اكون اخوكي . طيب اعتبريني اختك

ثواني وضحكت زهره … مصطفي : ايوه كده اضحكي .. هي في زهره بتعيط .

زهره مسحت دموعها : لع

مصطفي: طيب بدل ما هو لع . يبق تضحكي . ده انتي حتي ضحكتك جميله. اسمعي من اختك

ضحكت تاني : شكرا يا دكتور

مصطفي : دكتور ايه بقي . قوليلي يا ام فاروق

قهقهت بصوت عالي علي كلام مصطفي ..

اللي ضحك علي صوت ضحكتها البريئه

********

شهد قاعده وهي ماسكه الموبيل بس في نفس الوقت بتراقب حنين وحركاتها وهزارها الدائم مع الكل ..

دخلت ورد بعد ما جابها والدها من المدرسه

حنين : انتي يا اوزعه تعالي اهنا

ورد ضحكت : انا اوزعه وانتي ايه

حنين : اخرسي يا كلبه . لعلمك انا طويله بس مش عايزه ابين عشان الحسد واكده

ضحكت ورد : هعمل نفسي مصدقاكي ..

حنين : اخبار المدرسه ايه يابت . اوعي حد يكون بيضايقك . اللي يكلمك بس قوليله انك قربيتي

ورد بصتلها بسخط : اه يا ختي . فضلتي تقولي انا كنت في المدرسه دي .. انا اعرف ميس انشراح . واول ما قولتلها أنك قريبتي . صوتت في وشي وطردني بره الفصل وقالتلي معيزاش اسمع اسم البت دي .

حنين ضحكت : يااااه علي ميس انشراح . كنت بعقدها من حياتها . دي عليها واحده. قياااااام

كانت اللوح بتقع من علي المسامير

ضحكت ورد عليها : بقت تكرهني بسببك

حنين : يا بت استمتعي وعيشي حياتك انتي دلوقتي في ٣ اعدادي . معاكي ٣ سنين ثانوي وجدي يقعدك في البيت زي قرد قطع

ورد : متفكرنيش بقي وتحرقي دمي .

حنين : يا بت متزعليش مش يمكن ربنا ياخده قبل أكده وتكملي تعليمك

ورد ضحكت : بس بس . وطي صوتك ليقطع لسانك

حنين : ميقدرش انا دلوقيت في عصمه راجل ..

دخل شهاب : سلام عليكوووووو

حنين : ياض انت لحقت تيجي من الجامعه

شهاب : احم . هيبتي هتروح . متقوليش ياض .

حنين : امال اقولك ايه يا معفن..

ضحكت ورد .. وبصلها شهاب : لعلمك بقي انا دكتور

حنين كملت : دكتور بهايم

ضحكت ورد اكتر . بص شهاب علي حنين : والله عيب اللي بتقوليه ..ده انا اخوكي احترميني قدام الورد . مش كده

ورده وشها احمر : عن اذنكم

طلعت بسرعه وشهاب بصصلها وبيضحك

*******

يتبع

لقراءة باقي فصول الرواية أضغط على (رواية جبروت جد الصعيد)

لو عاوز تقرأ الفصول الجديدة من الرواية دي بشكل حصري قبل صدورها

أنضم لقناتنا على تليجرام (من هنا)

البارت العاشر

اترك تعليقاً إلغاء الرد