رواية زواج لدقائق معدودة الجزء الثاني الفصل الرابع عشر 14 بقلم زهرة الربيع

رواية زواج لدقائق معدودة الجزء الثاني الفصل الرابع عشر 14 بقلم زهرة الربيع

البارت الرابع عشر

عايزه اعرف حالا انتي ناويه ترجعي لطليقك ولا لا…لو جاوبتيني بصراحه دلوقتي انا هتفهم وهحترم قرارك ولو كانت اجابتك ايوه هاخد شنطتي وامشي حالا وبهدوء
شروق اتوترت جدا من سؤاله وقالت …احم… انت بتقول ايه يا نبيل ..انا لو كنت ناويه ارجعله كنت اتطلقت ليه من الاساس
نبيل اتنهد وقال…دكتوره شروق…احنا اطباء..وفاهمين يعني ايه اضطربات نفسيه وعارفين العقل بيأثر ازاي على القلب لما يكون غضبان ..وانا واخد بالي جدا لمشاعر ابن عمك ومتاكد انو بيحبك ولو شكي في محله وانتي بتبادليه نفس المشاعر يبقى انا مليش دور وسطكم ولو صارحتيني هنسحب بكل هدوء لكن مش هقبل افضل بينكم واتحداه واحاول علشانك وانتي تكوني…
شروق قاطعته وقالت بسرعه…انا معرفاش مشاعره ايه..ولا عايزه اعرف…انا كل اللي اعرفه ان نوح صفحه طويتها من حياتي ومعيزاش افتحها تاني…ومش هرجعله حتى لو انت مكملتش معايا يا نبيل
نبيل اتنهد وقال ….متاكده يا شروق
شروق ابتسمت بتردد وهزت راسها بالموافقه وقالت….. اكيد انا..انا عمري ما هستغنى عن الثقه و الاحترام و التقدير اللي

لقيتهم معاك هو ده بس اللي انا محتجاه ونفسي اعيشه
نبيل ابتسم بسعاده ومسك ايديها وقال….ولو انك مقولتيش الحب بس انا بأكدلك ان محدش هيحبك قدي
شروق ابتسمت وهيه بتحاول تقنع نفسها ان ده الصح ونبيل قال بحماس…كده خلاص انا هكلم بابا وماما واخليهم يجو هنا ونطلبك من والدك رسمي … والباقي هيبقى على حسب مايتفقو اذا والدك وافق الخطوبه تبقى عندنا في القاهره هنسافر كلنا سوا ..واذا اصر تبقى هنا مش مشكله المهم تبقي مرتاحه
شروق قالت..مش مسالة راحه والله بس دي عوايدنا البت خطوبتها تبقى عند ابوها
نبيل ابتسم وقال…عارف وبحترم جدا عوايدكم بس انتي عارفه انا بابا وماما اتحدو العوايد دي واتجوزو في القاهره رغم ان والدتي كانت من الصعيد ..انا وانتي كمان هنتحداها بصي انتي سيبي المسائل دي عليا هخلصها مع عمي هكلمه دلوقت
شروق ابتسمت بتوتر وقالت …انا ما عنديش مانع في كل ده بس ليه عندك طلب بلاش استعجال خلينا نعرف هيحصل ايه مع غنوه الاول انا حابه تحضر معايا هي وجنه..انت سمعت بنفسك اللي حصل معاهم وعايزاهم يفرحوا معانا ونوقف جنبهم في ازمتهم..و..احم يعني كمان انت عارف ان هو يعني لسه ما كلمناهوش و
نبيل قاطعها وقال بسرعه …خلاص انا هجيب اهلي ونطلبك رسمي ومش هعمل الخطوبه غير لما نطمن على غنوه هنستنى ونعرف هتعمل ايه بالظبط ..اما حضرة العمده ده ولا يشغل بالك انا اتكلم معاه بالحسنى ولو منفعش هو ما لوش دخل بينا
شروق ابتسمت بالعافيه وقالت…. معاك حق ملوش دخل
و كملت بهمس وقالت… ربنا يستر
نبيل قال بابتسامه… بتقولي حاجه
شروق ابتسمت وقالت…. ابدا سلامتك
عند حليمه كانت قاعده مع سماح وقالت بغضب…. كنتي لازم توقفي جنبيه وتتاكدي انه شربها حتى تسيبيه…نعمل ايه دلوك حطينا كل الحبوب اللي معانا ولسه هستنى لما الغبي اللي بجيب منه يعرف يتصرف لي في علبه كمان
سماح قالت بضيق… وانا ذنبي ايه كنت هشربهاله في بقه يعني…انا لما وديتها لقي يدي بترتعش…. قال لي روحي نامي مشيت…مشوفتهاش لما جات اخذتها
حليمه قالت بغضب شديد….. انا ما عارفاش البنت دي طلعت لي من وين وكله كوم وسند كوم عامله زي ما تكون سحراله…..بس ملحوقه هي يعني هتخلد هنه مسيرها هتتكشح سواء تموت او تغور في داهيه ….وانا وراه والزمن طويل ولد صابحه وكيف ما خلصت من امه هخلص منه عمره ما هيكون اصعب منها
عند نوح تحت كان بيتكلم في التليفون مع حسنين وبيقول…يا حسنين انا مش بكلمك علشان تحكي لي قصة حياتك…. انا بكلمك علشان اقول لك ان فيه مواضيع كتيره جديده حصلت وجدت وانا قلت لك لما اعرف ولدك اتقتل ليه هكلمك واقول لك…انت لازم تاجي ونقعدو ونتحدتو في الموضوع لاني عرفت كل حاجه …لو جيت بالحسنى كان بها ميمعتش الكلام هعتبر ان ملكش اي حق عندنا وساعتها لو قربت لاي حد من البيت وبذات أرملة ولدك هتبقى مشكلتك معايا انا
وسمعوا شويه وقال …كده زين بديت تتكلم بعقل وانا احب الناس اللي بتتكلم بعقل هستناك بكره نقعدو ونتحدتو وكل اللي ليه حق ياخده
قال كده وقفل ولسه هيطلع لقى نبيل في وشه قال بضيق…. خير الهم اجعلو خير
نبيل قال بحزم…. عايز اتكلم معاك يا عمده راجل لراجل
نوح ابتسم بسخريه وقال….. راجل لراجل …ولو ان مفيش مساواه خالص في الجمله كلها بس ماشي سامعك اتفضل يا راجل
نبيل قال بسرعه……اللعبه اللي بنلعبها سوا دي مش هتنفع خالص…. انا وشروق بنحب بعض و عايزين نتجوز و…
بس قاطعوا نوح لما قال… لاه كده في غلط في الكلام.. انت بتحب شروق وده طبيعي وعاذرك فيه شروق لو اتكت على الحيط اللي وراك ده هيحبها انما هيه تحبك دي بعيده عليك قوي اما تكلمني اتكلم كلام يدخل عقلي مش يدخل عقلك انت
نبيل قال بغضب ….بتحبني او لا دي حاجه تخصنا احنا..المهم انها عايزه تكمل معايا انا واللي انت بتعمله ده مش هيفيدك بحاجه وهيقلل من قيمتك لان في النهايه بعد كل اللي بتعمله ده هتجوزها
نوح ابتسم بسخريه وقال ….لا انت كده بقى جاي تتحدى مش تتحدت
بقلم…زهرة الربيع

نبيل قال بثقه… اعتبر كلامنا زي ما تعتبره انا قعدت مع شروق وقولتلها اني هكلمك …عايزك تشيل مناخيرك من موضوعنا خالص ممكن تعتبر ان ملكش بنت عم اصلا لان شروق بقت تخصني
نوح قرب منه خطوات وقال بتحدي….تمام…. يبقى اسمع الكلام اللي تمشي عليه الجمال… شروق من يوم ما اتولدت وهي تخصني انا وبس والدنيا كلها مشت على الاساس ده…حتى ربك اللي خلقني وخلقك بجلالة قدره بعد كل الحواجز اللي بينا وكانت فيه حواجز اصعب منك مليون مره وبردك شالها من بينا علشان سبحانه يفهمك انت وغيرك انها من نصيبي انا وبس..فلو عايز تحفظ كرامتك خد بعضك وعاود بلدك بدل ما تعاود من غيرها وانا مش مسؤل
نبيل قال… يبقى انت اللي ابتديت انا مكنتش عايزه اتخطاك بس انت اللي عايز كده….بكره اهلي هيجوا وهيطلبوا شروق رسمي من ابوها وهنحدد الخطوبه سواء هنا اوهناك على مزاجه
نوح قال بيخريه..على راحتك شكلك معايزش تتبهدل لحالك وعايز تجيب اهلك معاك يونسوك يا اهلا ومية مرحب تنور
نبيل قال بسخريه…بكره نشوف…و خليك فاكر اني جيت لك بالذوق وانت اللي رفضت ومش عايز تشيلني من دماغك
نوح ضحك بخفه وقال….. اشيلك من دماغي…لهو انا لو هاحطك في دماغي احط في رجلي ايه
هنا نبيل اتعصب جدا ولسه هيقرب عليه شروق كانت سامعه كل حوارهم وجريت عليه بسرعه وقفت مابينهم وقالت…. نبيل اطلع ريح انت وان شاء الله ما هيحصلش غير كل خير
نبيل قال بغضب….. هو فعلا مهيحصلش غير كل خير…. انا هتصل على اهلي وبكره باذن الله هيكونوا هنا هنطلبك رسمي واللي عندو حاجه يعملها
قال كده ومشي ونوح بس لطيفه بغضب شديد و بص لها بحده وقال…و انتي مش رجلك لسه وجعاكي قاعده تتنططي عليها ليه ….اطلعي ريحي في اوضتك
شروق قالت بضيق….. ارتاح كيف بعد اللي بتعملوه ده يا نوح كفاياك بقى انا مش صغيره وبقول لك عايزه اتجوزوا هو وراضيه بيه
نوح قال بغضب …اه من لسه من شويه خدت بالي انك ريداه هو و راضيه بيه
شروق اتوترت جدا واتكسفت لانها فهمت انه قاصد لما كانوا فوق قالت بغضب…. انت قليل حيا وانا غلطانه اللي بتكلم وياك
ولسه هتمشي وقف قدامها وقرب منها قوي وقال…. طبعا انتي سمعتي اللي دار ببنا…ولاخر مره هقولك انهي اللعبه دي وخليه يغور من هنه انتي عمرك ما هتكوني لحد غيري وده وعد من نوح
شروق قالت بغضب…..و انا عمري ما هكون لعبه ليك يا نوح هملني في حالي واطلع من حياتي انا هتجوز نبيل وهقول لابويا ولو ما وافقش همشي انا ونبيل ونتجوز هناك عند اهله
وسابته ومشيت وهي متعصبه جدا
نوح ابتسم بسخريه وقال بصوت عالي…نجاتي
نجاتي جيه وقال بسرعه…. امر جنابك
نوح قال بثقه….. عدي على صلاح الخياط وصيته على فستان واديته المقاسات جيبه منيه وعدي على ابو خالد الصايغ وصيته على دبله حريمي قوله عايز الدبله اللي وصاك عليها نوح بيه وهاتهم الاثنين وتعال بس بالراحه عليهم دي حاجات غاليه قوي ….ماشي يا نجاتي عشان انا عارفك
نجاتي قال بفرحه…..دا انا هحطهم في عنيا جنابك
نوح اتنهد وقال….طب ربنا يستر
نجاتي مشي ونوح ابتسم وقال ماشي يا بنت حكم انا عارف كيف ارجعك لعقلك
اما غنو فضلت مع جنه لحد ما نامت هيه وابنها
ورجعت على اوضتها ولسه هتقفل الباب سند حط رجله عند الباب وقفها وقال…. عايز اتكلم وياكي ضروري
غنوه قالت بتوتر….. انا قولت كل حاجه تحت يا سند وعايزه انام
سند دخل وقفل الباب وقال…. لا مقلتيش كل حاجه الجزء اللي يهمني مقلتهلوش
غنوه بصتلو باستغراب وقالت….. قصدك ايه مفهماش
سند قرب منها قوي وقال….. انا الحلم اللي كان كبير عليكي ومش طيلاه …وعشان كده قبل ما تعملي مسرحية موتك في اليوم اللي اتصبتي فيه قولتيلي عشقاك في النور مش كده
بقلم…زهرة الربيع
غنوه اتوترت وحاولت تضحك بسخريه وقالت….واه…انت لسه فاكر اليوم اللي اتصبت فيه ده انت حالتك واعره قوي…يلا بطل كلام ملوش عازه واطلع لاحسن شروق تاجي يلا
بس شهقت لما شدها ليه بقوه وبص لعيونها بعشق وقال…الكدب باين في عنيكي…العيون دول اللي كل ما يبصولي احس نفسي سلطان زماني ومحدش يملا مكاني
غنوه ابتسمت بيعاده من جواها وقالت ….امم طب انت عايز ايه دلوك
سند قربها ليه وقال بهمس…اللي عايزه كتييير والصبر مر
ولسه هيلمس شفايفها دفعتو وقالت …وبعدين بقى في قلة الحيا وعدم الربايه اطلع يلا ومتتعبش نفسك النحنحه دي مبتجيبش معاي واصل
سند اتنهد وقال بغيظ…قلة حيا وعدم ربايه كمان ماشي على العموم بقاش فاضي الا القليل وهكلم نوح وهتجوزك وساعتها هوريكي ان حليمه مربتنيش ساعه على بعضها
غنوه قالت بدهشه….طب ما انا عارفه انها مربتكش ولا دقيقه حتى ..بس جواز ايه…انا مش قولتلك مينفعش نتجوز لاني مش عارفه موضوعي هيرسي على ايه و
سند قال بسرعه ….هتجوزك يا غنوه غصب عن عنين حسنين وكل قبيلته والدنيا باللي فيها
غنوه كتفت ايديها وقالت ….و عايز تتجوزني ليه بقى… ايه السبب…. شوف يا سند انا مش هبله اذا انا عاجباك وليك مزاج تاخد لك كام ليله معايا ولقيتني مصدرالك الوش الخشب فقولت تاخدهم بالحلال وبعد كده تطلقني…انسي انا الكلام ده مينفعش وياي واصل يعني شيلني من دماغك
سند اندهش من كلامها و قال ….انتي فاكراني هتجوزك علشان اقضي كام ليله …ليه من قله الحريم اياك
غنوه ابتسمت بثقه وقالت….الحريم كتيره بس هي غنوه واحده
سند داس على شفته باعجاب و قرب منها وقال….في دي معاكي حق….وعلشان هيه غنوه واحده داخله مزاجي….بس اسمعي يا بت الناس انا صوح عايزك وقوي كمان …بس عايزك للعمر كله لاني متأكد انك الوحيده اللي تسدي معاي عمر بحاله وتغنيني عن الدنيا بكل حريمها
غنوه كانت من جواها طايره بالسعاده وقالت..طيب..احم..طيب امشي دلوك ربنا يهديك احسن حد ياجي
سند بصلها جامد وقال طيب..ماشي بس عايزه اقولك حاجه اخيره .بمناسبة حلمك البعيد اللي مكنتيش طايلاه …جيت اقولك ان حلمك اتحقق يا صبيه ..واللي كان في يوم حلمك بقيتي دلوك كل احلامه
غنوه اتفاجأت بكلامه و لمعت عيونها بالدموع وقلبها بيرقص جوه ضلوعها ولسه هترد الباب خبط وسمعو صوت شروق بتقول ….غنوه قافله الباب من جوه ليه… افتحي اخوكي حميد معاي عايز يسلم عليكي قبل ما يمشي
غنوه اتسعت عنيها بذهول وسند اتوتر وقال…. واخوكي جدع عاقل ورزين وهيستنى يفهم ولا مقفل كيف نوح كده
غنوه قالت بخوف وطريقه اشبه بالبكاء….. لا يا اخويا كيف نوح …وشكلهم هينوحو علينا النهارده منك لله يا بعيد وووووو

• لقراءة باقي فصول الرواية أضغط على (رواية زواج لدقائق معدودة الجزء الثاني)