رواية سر في قلوبنا الفصل الثالث 3 بقلم همس كاتبة

رواية سر في قلوبنا الفصل الثالث 3 بقلم همس كاتبة

 

البارت الثالث

 

 

3
مروة بدموع : انا خايفة ما يقبلش بيا
منى بخبث : لا … هنجبره يقبل بيكي …. لازم نفكر كويس و نخليه يقع في شباكك …انا عندي فكرة حلوة
مروة : يا منى افهميني … انا مش عايزة اعمل خطط و ادبسه بيا … انا نفسي يحبني زي ما بحبه … نفسي هو الي يجري ورايا و يقولي بحبك … مش عايزة اكسر نفسي ليه … و اعيش حياتي مع راجل انا اجبرته يتجوزني
منى : يا عبيطة …. هو مش شايفك كويس … انتي لو اتقربتي منه هيعرف قد ايه بتحبيه و يشوف انك بنت حلوة و الف مين يتمناكي .. اكيد وقتها هيحبك بجد … بس اسمعي مني
مروة بانفعال : يعني عايزاني اعمل ايه ؟؟؟ اعمل زيك كدة … بعد ما ضغطتي على بابا و عمي و اتجوزتي عمرو اهو مش طايق يبص بخلقتك … انا مش هبني سعادتي على تعاسة حد … حتى لو كنت بحبه …. مش مستعدة استحمل يعاملني زي ما عمرو بيعاملك
منى : تصدقي انك بجحة و قليلة الادب … انا بفكر عشان مصلحتك و عايزاكي مبسوطة .. تقومي تعايريني … على فكرة عمرو بيحبني و مبسوط معايا على الاقل ما يقدرش يبص لوحدة غيري و عارفة اسيطر عليه كويس اوي
مروة بابتسامة صفراء: اممم واضح
منى : يا بنتي اسمعي مني بس … نديم مش زي عمرو … نديم لو اهتميتي بيه و حسستيه انه محور حياتك هيعشقك …. هو هادي و عقله كبير و عمره ما حب قبل كدة … دي فرصتك قبل ما تيجي وحدة تاخده منك
مروة بشهقة : معقولة نديم يحب وحدة غيري ؟
منى : طبعا … نديم اي بنت تتمنى ترتبط بيه .. عشان كدة فتحي دماغك معايا و الحقي علقيه قبل ما يطير
مروة : يعني اعمل ايه طيب ؟
منى : يا بت اهتمي بيه زيادة عن اللزوم … حاولي تقضي معاه اكتر وقت ممكن … اتلككي عشان يفضل معاكي …و على طول البسي احلى لبس لما تقابليه و حطي بيرفيوم و ميكاب و ادلعي عليه … كدة هيدوب بيكي …. و اهتمي بالحاجات الي بيحبها و حاولي تشاركيه بكل حاجة
مروة بنفاذ صبر : و الله ؟ و اسيب دنيتي و اجري وراه زي الهبلة … انا مش هقدر اعمل كل ده .. و لا عندي طاقة افضل متزوقة 24 ساعة عشان ارضيه .. و بالاخر يقولي باي باي … و كل الهبل ده يروح ع الفاضي … انا عايزة يحبني زي ما انا
منى : طيب خليكي كدة لحد ما وحدة تخطفه منك و ساعتها هتموتي بغيظك و تتمني لو عملتي كل ده و اكتر كمان .. بجد عقلك زي الجزمة القديمة .. مش قادرة تقتنعي الا بكلامك
مروة بضيق : خلاص يا مني …سيبيني افكر شوية مع نفسي … انا ما طلبتش مساعدتك
******************
نزار : و انتي عايزة ايه بالاسهم يا غزل ؟ انتي اصلا لسا ما كملتيش الجامعة
غزل : بص … الشركة دي لعيلة جوزي و نديم بيملك نسبة كويسة فيها … بس بنفس الشركة الوقت باباه بيملك النسبة الاكبر و ممكن جدا لما يعرف بموضوع جوازنا انا و نديم يدمر مستقبله المهني … بس لما انت تبيعلي الاسهم و اكون شريكة كدة هنضغط عليه و هيضطر يقبل بجوازنا من غير نقاش … نزار الموضوع ده مهم جدا بالنسبالي … ارجوك انا محتاجة وقفتك معايا
نزار بتفكير : بس يا غزل عمي هيزعل اوي
غزل : انت ما تقولوش حاجة الا بعد ما كل حاجة تتم ، انت عارف عمي لو اديته الاسهم هيدخل نفسه في كل صغيرة و كبيرة و هيضغط على نديم و هيتسبب بطلاقي … انت ترضى يتخرب بيتي على ايده
نزار : بعد الشر عليكي يا حببتي
غزل : و ليك عليا يا سيدي ادفعلك سعر اعلى من السوق عشان تسدد ديونك و ترتاح شوية
نزار : و هتجيبي الفلوس منين ؟
غزل : بصراحة هبيع شبكتي و هستلف من نديم شوية و لو ما كفتش هكلم خالتي و اكسر الوديعة
نزار بنرفزة : يعني هتضحي بالفلوس الي ماما شالتهالك عشان تأمن مستقبلك بس عشان تنقذي عيلة جوزك من عمي ؟ غزل مش عليا الحركات دي
غزل : لا مش كدة خالص … انا عايزة اشغل فلوسي و بعدين انا قولتلك لو الفلوس ما كفتش هسحب من ورثي بس ع الاغلب ده مش هيحصل
نزار: طالما كده انا موافق … بس بشرط … الاسهم دي تفضل باسمك ما تفكريش تديها لنديم ابدا
غزل بابتسامة : حاضر يا روح قلبي … هات بوسة بقى
قربت منه و قبلته و هو احتضنها و قال : انتي طول عمرك شقية و ما بتتنازليش ابدا
غزل بضحكة ماكرة : تربيتك
*******************
عمرو : بص يا نديم … انا حاسس لو انت دخلت و معاك غزل و قولت انها مراتك ..هيحصل كارثة .. هتقوم القيامة في البيت …خصوصا انه بابا مش راضي عنك … و لما يعرف انها بنت اخو رجب .. يلهويييي … هيكرها قبل ما يعرفها حتى … و كل البيت هيخطط لاذيتها و انت عارف اهلك
نديم : ما تقفلهاش بوشي يا عمرو انا مش طايق نفسي … قلقان جدا على غزل … خايف ما تستحملش الحياة معاهم … و اكون انا الي بوظت حياتها و ظلمتها معايا … غزل طيبة جدا و مش حمل بهدلة
عمرو : منتا لازم تحسب حساب الكلام ده كويس … فكر مليون مرة قبل الخطوة دي … لازم تخليهم يتعرفو على غزل الاول و يطمنولها … و بعدين نبلغهم بجوازكم … عشان نخفف حدة الموقف …لانه بصراحة يعني … لما بابا هيعرف ان غزل امتلكت 20‎%‎ من اسهم الشركة مش هيفكر الا بحاجة وحدة و هي انه يستغلها لحد ما يخسرها كل حاجة
نديم بتعب من التفكير : و على اي اساس هقدم غزل ليهم ؟؟ ازاي هتتعرف عليهم و يعاشروها و يحبوها كمان من غير ما اقول انها مراتي … الكلام ده مش منطقي
عمرو برفعة حاجب : انا عندي فكرة … بس يمكن ما تعجبكش
نديم : انطق خلصني
عمرو : ادهم مش لاقي حد يهتم ببنته … لو جبنا غزل على انها بيبي ستر بدوام كامل الكل هيتعرف عليها و يا سلام بقا لو جوري حبيتها اكيد الكل هيحترمها و يحبها و بنفس الوقت هتكون قدامك 24 ساعة
نديم : ايه الهبل ده … مش هقدر امرمط غزل كدة … و بعدين المشكلة هتكبر اكتر بكتير … دول هيحسبوها اني اتجوزت شغالة
عمرو : طب فكر فيها شوية ده انسب حل
نديم : مبدئيا غزل مش مستعدة للمواجهة … فحاليا الوضع تمام و محدش ملاحظ حاجة …خلينا نصبر الايام دي … و انا هفضل في شقتي و بعدين نبقى نشوف هيحصل ايه و نفكر بالموضوع ده
عمرو : براحتك … بس انا كنت عايز اساعد
رن هاتف عمرو و هو قام بالرد
عمرو بضيق : الو … عايزة ايه ؟
منى : ***********
عمرو بصدمة : ايه ؟؟ انا جاي حالا ……..يتبع
سِر في قلوبنا
همس كاتبة

 

 

• لقراءة باقي فصول الرواية أضغط على (رواية سر في قلوبنا)