رواية رغبة في الإنتقام الفصل الرابع 4 بقلم نوسة حمد

رواية رغبة في الإنتقام الفصل الرابع 4 بقلم نوسة حمد

 

 

البارت الرابع

 

 

#رغبة_في_الانتقام4
#نوسه حمد
مرت الايام والشهور لغايه ما ابوي جاني بمصيبه قال لي انا مطالب ديون بسبب خسارتو في لعب القمار قلت ليهو ابوي انا الفارغه دي ما بشاركك فيها نهاي وهو انت عندك قروش لمن تلعب قمار ابوي انت هسي م بتخجل تشيل مني قروش قاعده ليهن في الشمس عشان ااكل اخواني انت تستكتر علينا اللقمه عشان المرض الاسمو القمار والخمره دا انت عايش في توب م توبك الحاجات ديل بعملوهن الناس العندهم قروش مابفرق معاهم لو خسرو بس انت شغل السمسره دا خلاك تباري ناس وضعهم اعلي منك وانت ربع العندهم تحلم بيهو حلم قال لي كلامك دا هسي مفتكراهو ح يغيرني قلت ليهو وليه م يغيرك ي ابوي انت عايز شنو من الدنيا دي وريني انا مستعده افتح ليك دكان اقعد فيهو واكسب لقمه حلال ربي بيهن اخواني وعرس منهن انا رضيانه زاتو تجيب لي مره تونسني وتشيل معاي الهم حبه قال لي عرس شنو انا م صدقت العندي ماتت قلت ليهو من الاول انت م كنت مجبور انت شيلت ذنب امي الماتتت قدام عينك وانت ولا هاميك وشلت ذنب اخوي الما عارفه

 

 

مكانو وين وذنبي انا القاعده ليل نهار ف الشارع وكنت ببكي بكا شديد كالعاده مدا يدو علي قال لي بت نكد زي امك واسمعيني هنا انا البقولو يتنفز انا مطالب ديون والراجل الطالبني مخيرني بين تلاته يا يسجني يا ابيع املاكي وانا م بملك غير البيت دا قلت ليهو شنو شنو شنو ابوي انت جنيت انا م صدقت اني لميت اخواني وبقينا عندنا حق كيف تفكر في كده وانا عارفه امورك دي ما كنت عايزه اسجلو بي اسمك قال لي عايزاني انسجن يعني قلت ليهو انت من اساسو خاتي نفسك في المكان دا ليه قال لي البقا بقا ومافي حل غير الخيار التالت قلت ليهو شنو ان شاء الله اكون ساهل ونرجع للراجل دا قروشو كل مره انا بطلع ليك يومي حاجه بس م تلعب بيهن تاني تديهن ليهو لغايه ما نحل الدين العليك قال لي لا هو طالب المبلغ كامل دفعه واحده قلت ليهو طيب الخيار التالت هو شنو قال لي انو يعرسك قعدت اضحك وجواي غل ما يعلم بيهو الا ربنا قلت ليهو بتهظر صاح قال لي اهظر شنو وانا وافقت علي الخيار التالت تعرسيهو من غير م يدفع فيك مليم قلت ليهو شنو يعني بايعني ليهو قال لي لا دا زواج علي سنه الله ورسوله قلت ليهو الزواج شفتو عندك طمم بطني انسان م مسؤول وكمان عايز تضيعني انا اخواني محتاجين لي هسي لو جاني ولد مامون البرير ما عايزاهو انا الله قسم لي اني أكافح واربي اخواني مستحيل انا اتزوج واجدعهم عشان كده شوف ليك حل غير دا قال لي حل شنو ي بت ماف اي حلول ولا كتر خيرك تعرسي قلت ليهو ابوي اعرس شنو واخواني قال لي اخوانك الداير يجيهم شنو اختك تشتغل مكانك وتمسك اختها واخوك احرسن وانا قاعد ما بتجيهم عوجه قلت ليهو حرام عليك يا ابوي اختي قاصر مافاهمه شي وبعدين انا اخواني شاطرين عايزاهم يتفوقو انا مستحيل اقبل بي حاجه زي دي احسن ليك السجن والسجن احتمال يغيرك بدل نحنا غلبنا نغيرك وامي غلبها تغيرك قال لي انا سجن ما بتسجن وح تعرسي كسر رقبه نومتا دمعتي في عيني اعرس شنو مستحيل انا اقبل بالحاجه دي لو قامت الساعه ولازم اتصرف قدر م حاولت انوم النوم غلبني اريتني بقيت علي الهم العلي كمان دي مصيبه تانيه ابوي بحالو دي ح يدمرنا انا لازم اتصرف اكلم خيلاني والبحصل يحصل الصباح الواطه م صبحت سمح سمعت صوت الباب بضرب قومتا لفيت فيني توبي وفتحت الباب لقيتو راجل كبير عمر ال٨٠كده قال لي دا بيت ناس عمر قلت ليهو اي اتفضل عايز منو قال لي عايز ابوك وكان بعاين لي من فوق لتحت قلت الراجل الما بخجل دا قال لي انتي نسيبه قلت ليهو اي وانت منو قال لي انا بدر التمام

 

 

قلت ليهو تمام دخلت صحيت ابوي جاهو وفضلو وانا عملت ليهم شاي ابوي قال لي اعملي فطور وكان خالف كراعو ومولع سجارتو والبسمع اعملي الفطور اقول جايب خدارو مشيت دبرت لي اكل وفطرتهم وختيت ليهم القهوه وعايزه اشيل صينتي وطالعه الشارع ابوي ناداني مشيت ليهو قال لي بدرالتمام دا طالب يدك وهسي جا يشوفك قلت ليهو لا م عايزه انا م ح اتزوج لاني مسؤوله وامي مخليه لي اطفال صغار طوالي الراجل قال لي ابوي انت ما وريتني ليه قلت لي البت موافقه ابوي قال ليهو موافقه اي وبقا يغمز لي قلت ليهو لا م موافقه انا وربنا اديك بت الحلال وطلعت ابكي دي حال ما بتسكت عليها ابوي بقا يبيع فينا بسبب المصيبه البلعبها دي طلعت واتصلت لي خالي قلت ليهو انا عايزه اتكلم من زمن امي بقيت اقول ليهو امي كانت بتصرف علي البيت وابوي بشيل القروش بلعب بيهن وبسكر بيهن خالي قال لي كيف الكلام دا قلت ليهو دي الحقيقه وانا هسي حاليا في الشارع ابيع وتعبت من ابوي ووريتو انو ح يعرسني لي راجل اكبر منو خالي قال لي م يقدر وقال لي الليله بجي اسوقكم فرحت شديد وقفلت الخط وبيعتا حاجاتي ورجعت البيت لقيت خيلاني اتناقشو مع ابوي والقيامه قايمه ابوي لسانو كعب والفاظو كعبه شديد الفاظ تخجل وخيلاني ناس دغريين الكلام دا نهاي م بنفع معاهم مسكو ابوي خنقوهو قالو ليهو تلحق اختنا بس لغايه ما فكيتهم منو
والناس اتلمو فيهم وابوي كسبها فرصه قال للناس ديل اخوان المرحومه دايرن يقلعو اولادي مني واتهجمو علي وضربوني وفعلا الناس لمن جو داخلين لقو خيلاني خانقين ابوي الرجال بقو اتناقشو مع خيلاني وقالو ليهم ديل اولادو كيف تقلعوهم منو وخيلاني غالبهم يقولو الحقيقه انو ابوي سكرجي وبلعب قمارر وعايز يبيعني لراجل اكبر منو والوضع اتعقد اكتر من اول وابوي اقدر عليهو ربنا مشا رفع قضيه في خيلاني انهم اتعدو عليهو في بيتو وعايزين يقلعونا منو وساق رجال من الحضرو الشكله شهدو ليهو والنيابه حزرت خيلاني من انهم يلمسونا بعد فرحت انو خيلاني ح يسوقونا بس الموضوع اتعقد اكتر لغايه ما ابوي جا قال لي انا عقدت ليك علي بدر التمام وقال بجي يسوقك قلت ليهو ستين يمين انا م بجدع اخواني لو قامت الساعه والراجل دا م بمش معاهو ولو غصبتني بكتلك انت زاتك قال لي انتي عايزه تتقواي وتتلامضي علي قلت ليهو ابوي خلاص اديهو البيت دا انا م عايزاهو ونرجع محل كنا قال لي لا حسيت انو ابوي دا عايز يعرس لي بس
الدنيا ضلمت في وشي ابوي عايز يدفني بالحياه بعد اعاني مع اخواتي اعاني لي مع راجل كبير سكرجي وبتاع قمار زيو بقيت افكر ليل نهار وهو في الدخله والطلعه اقول لي الراجل دا متي مايجي يسوقك انا بديك ليهو وانا ابكي اقول ليهو ابوي واخواني اجدعهم قال لي تجدعي ليهم شنو اختك بتمسكهم وانا قاعد ما تعقدي المواضيع قلت ليهو سمح ي ابوي انا موافقه عليهو لكن علي شرط قال لي اها قلت ليهو اسوق اخواني معاي والله لو وافق انا موافقه عليهو وما عندي مشكله قال لي لا م ح يوافق انا بعرفو جوطه الشفع م بحبها هو داير يعرس في مرتو عشان بقت مشغوله بي اولاد بناتا وما شغاله بيهو قلت ليهو كمان معرس دي مصيبه شنو الانا فيها دي وبقيت اندب في حظي مشيت اتصلت لي خالي وكنت ببكي بكا شديد قال لي موش دا ابوك ان شاء الله اقطعك حتت حتت والغلط غلط اختنا السكتت علي الزله والاهانه وما كلمتنا قلت ليهو امي كايسه الستره قال لي فعايل الراجل دا معاها ستره دي ح يضيعكم واحد ورا التاني جملتو دي صنت اضاني وبقت تتتردد جواي وفعلا كلام خالي صاح وانا لازم افكر ولازم اشوف لي طريقه قنعت من خيلاني انهم يشوفو لي فهم لازم اشوف صرفه اتزكرت امام الجامع البخت عندو قروشي مشيت ليهو وحكيت ليهو بي ابوي من زمن امي لمن اتعوذ منو قلت ليهو عرس لي

 

 

راجل كبير وعايزني اجدع اخواني قال لي ابوك م عندو رحمه كيف تجدعي الشفع ديل وعشان ما يبقا عليك البقا علي امك لازم تهربي قلت ليهو كيف قال لي تمشي اي مكان وخلي ليهو البيت والله كريم عليك بحفظك بدل تدمري مستقبلك ومستقبل اخوانك ولو فكرتي ف الموضوع دا تعالي لي انا بركبك المواصلات بس يكون بليل عشان زول يشوفنا ماف مجرد فكرة اني اهرب مخيفه بس ما مخيفه اكتر من الوضع الاتختيت فيهو ولقيت كلام الامام صاح عشان انا اعيش واخواني يكملو تعليم وما اجدعهم لازم اهرب بقيت افكر في الموضوع شديد وشويه شويه بجهز في اوراق اخواني وعندنا ملايه كبيره ربطتا فيها ملابس اخواني لانو م عندنا شنطه وانتظرت ابوي لمن بليل اكون عندو لعب قمار لانو دا اليوم الوحيد البجي فيهو الصبح خليتو لمن فات وعدا ساعه سوقت اخواني وكانو نايمين عديل بس صحيتهم ومشيت لي امام الجامع وطلعنا اتسحبنا زول شافنا ماف وانا زاتي كنت ملفلفه بس الناس ح يعرفوني من اخواتي وربك ستر زول شافنا ماف بقينا واقفين ف الظلط وماف عربيه راضيه تقيف لينا وموصلات مافي لغايه ما جا بتاع دفار كبير شاحن ليهو بضاعه وقفناهو وقدام كانو معاهو نفرين قال ماف طريقه الا ورا بس وقف اشوفنا مالنا امام الجامع قال ليهو خير اكثب ثواب والبت دي ختها مكان ماشي قال ليهو شاحن حلفا انا قال ليهو بس ختها معاك في حلفا اكسب اجر قال لي انا م عندي مشكله بس برضو يقعدو ورا لانو المعاي ديل اصحاب البضاعه ما بوافقو يرجعو ليها ورا قلت ليهو م عندي مشكله بقعد قال لي تمام وفتح لينا الباب وكانت البضاعه شوالات سكر ركبت ودسيت اخواني ورا شوالات السكر من البرد وودعنا امام الجامع قال لي قبل تمشي خليك شجاعه وطول ما انتي متوكله علي ربنا وما بتعملي في حاجه غلط ما بتجيك عوجه ربي اخوانك وانتي زوله مرزقه ان شاءالله ربنا برزقك بالاحسن وفي رعايه الله وما ترجعي ورا انا لو لقيت اخوك بجيبو ليك في حلفا قلت ليهو عليك الله لو جا ماتخلي. يمش انا زاتي كل فتره بجيك بليل اعرف اخبارو قال لي تمام ودعتو وفات وبتاع الدفار اتحرك وكان ماشي بسرعه غريبه واخواني ماتو بالخوف ضميتهم علي وانا لي روحي محتاجه البضمني من الخوف الجواي بس كانت عندي عزيمه وكلام الامام شجعني وتوكلت علي الله الحلقه الجايه اشوف البحصل مع نوسه شنو …..يتبع

 

• لقراءة باقي فصول الرواية أضغط على (رواية رغبة في الإنتقام)