رواية رغبة في الإنتقام الفصل الثامن 8 بقلم نوسة حمد

رواية رغبة في الإنتقام الفصل الثامن 8 بقلم نوسة حمد

 

 

البارت الثامن

 

#رغبة_في_الانتقام8
#نوسه حمد
المدير حاول يلمسني ويضايقني بالكلام وهو شكلو النوع البحب البنات وما عندو اي مشكلة مستعد مع اي بت يقول كلامو دا مسكت يدو وقلت ليهو معليش اوعك تمد يدك علي قال لي شنو قلت ليهو السمعتو قال لي انا ماف بت بتقول لي لا قلت ليهو انا بقول ليك لا وانت شنو زاتك عشان م اقولو ليك لا قال لي انا المدير الممكن ارفدك واخليك ترجعي شحاده وتبيعي في الشارع قلت ليهو عمري ما شحدتا ولا ح اشحد ومالو البيع في الشارع حرام ولا عيب انا م مريضه زيك ولا النوع البخاف علي رزقي طالما الرازق ربنا انت ووظيفتك في الف داهيه قال لي انتي الفي الف داهيه اعتبري نفسك مرفوده واخوانك مرفودين من المدرسه قلت ليهم شرف لينا يا استاذ وربنا اهديك ومنال م تستاهل منك بس الخاين ح يفضل طول عمرو خاين فتحت الباب وطلعت لاقتني استاذه بتكون ملصقه فيهو طوالي قالت لي كنتي جوه بتسوي فشنو ومالكم قافلين الباب قلت ليها انا م مريضه عشان اسوي شي واقفل الباب بس المريضين الله بعلم بيهم وربنا يشفيهم قالت لي تقصدي منو قلت ليها القاصداهو عارف نفسو دفرتها ومشيت عشان اجيب اخواني لقيتهم ف الحصص استاذنت من الاستاذه وسوقت اخواني وطلعت وهم كانو ببكو قالو لي الحصه بتفوتنا قلت ليهم لا تاني م ح تقرو هنا قعدو يبكو بكا قالو الا ارجعهم واول مره امد يدي عليهم لانهم حرقو روحي وانا م قادره افهمن ضربتهم قلت ليهم تاني م تجو بعند المدرسه دي والبفتح خشمو تاني بكسرو ليهو فجاه سكتو وبقو راقدين ويعاينو لي وانا قلبي داير انقطع م نفسي اضربهم بس هم عبيطين شديد وانا كنت غضبانه ضميت اختي علي ورقدت ف السرير وهي شغاله تقول لي ماما ماما وانا ما مستحمله صوت واحد فيهم انا م كنت حزينه عشان فقدت وظيفتي لا لا انا زعلانه من الموقف الاتختيت فيهو راجل م بخجل ومريض طمم بطني الله يطمم بطنو اليوم كلو حزينه وراقده اختي قامت عملت ليها اندومي وجابتا ختتا لينا قالت لينا ارح ناكل حننتني وقطعت قلبي قلت ليها ندي تاني م تهبشي البوتجاز انا بعمل ليكم قالت لي انتي تعبانه وزعلانه مننا نحنا اسفين قلت ليهم لا لا انا م زعلانه منكم بس انتو ما

 

 

عايزين تفهمو انا عايزاكم تفهمو اي شي وتكونو واعيين انا المدير عاقبني عشان اخدت اجازه ورفدني من الشغل وعشان كده انا م بخليكم ف المدرسه انا بمشي لمهند اكلمو بكره يسوقنا المدرسه الحكوميه اسجل ليكم وتقرو هناك انا غير قرايتكم ما ساعيه لي حاجه تمام قالو لي تمام بس نحنا عايزين نقرا اخواني راغبين القرايه شديد وذكيين شديد عشان كده م عايزين يغيبو يوم من القرايه قلت ليهم اكلو انتو انا الاندومي م بحبها بمشي ناس مهند اشوفو واجيكم انتو اكلو ونومو عشان تعبانين قالو لي كويس شيلتا اختي ومشيت بيت ناس مهند لقيت معاهم ضيوف سلمت عليهم وقعدت ام مهند قالت لي ديل قرايبنا عرفتني عليهم ورحبو بي قعدت معاها ساعدتها واكرمت الضيوف معاها وختيت اختي ف الكرسي واختي النوع اللو ختيتا في مكان نهاي م بتزح منو بالذات لمن نطلع بره البيت اي زول يشوف طبعها يشكرو قالو لي دي بتك قعدت اضحك قلت ليهم زي بتي دي اختي امي اتوفت وهي بتولد فيها اتاثرو شديد قالو لي ربنا يقدرك وتربيهم وتكوني ليهم سند سالوني من ابوي قلت ليهم متوفي مافي زول عارف ابوي حي غير ام مهند لاني حكيت ليها خجلانه اقول للناس ابوي حي وعايز يتاجر فيني بالقمار البلعب فيهو دا بعد كنت زهجانه بس الناس ظريفين نسوني اي هم قالو لي لازم تزورينا مع حفصه حفصه دي ام مهند قلت ليهم ان شالله استاذنت منهم وسالت من مهند امو قالت لي التقول جا قبيل وفي الديوان خلي زول ينادي ليك ولا امشي ليهو طلعت م لقيت زول ينادي لي مشين الديوان بقيت اكورك ليهو لقيت مهيد وطبعا مهيد دا خجول خجل م طبيعي م حصل لاقيتو في بيتهم شكلو م بحب النسوان والجوطه بس مهند بحب امو شديد كل مره القاهو راقد جنبها سلمت عليهو وسالتو من مهند قال لي مهند دا تقريباً سافر اجيب بضاعه بجي الصباح خير ان شاءالله مالك قلت ليهو خير بس كنت عايزاهو يمشي معاي بكره المدرسه اسجل لي اخواني قال لي موش انتي شغاله في المدرسه الخاصه واخوانك هناك قلت ليهو كنت ي مهيد بس المدير رفدني عشان مشيت اسال من اخوي وطوالي طلعت اخواني معاي قال لي تمام انا بكره بمش معاك نشوف عايزين شنو قلت ليهو م بتقصر ي مهيد جزاك الله الف خير قال لي العفو انتي اختي ومحتاجه قروش ولا اي حاجه قلت ليهو لا العفو مستوره انا بباقي قروشي ديل بشتري لي حاجات وبشتغل جنب المدرسه منها اكون جنب اخواني قال لي لا ي نوسه مستحيل انتي الناقصك قولي لينا نحنا م بنقصر منك قلت ليهو م بقدر ي مهيد انا عايزه اربي اخواني بالحلال قال لي عارفين ي نوسه بس م بنخليك تقعدي ف الشارع كدي اصبري انا بشوف ليك اي شغل وهاك ديل خليهن معاك قلت ليهو مستحيل ي مهيد انتو م قصرتو مني تاني جنيه م بشيلو منك قال لي نوسه ما تحرجيني وانا م اي زول انا اخوك هسي لو دا اخوك م بتشيلي منو قلت ليهو مهيد والله اخوي م ح اشيل منو قال لي معناها انتي كعبه قلت ليهو م كعبه بس م نفسي اعتمد علي زول قال لي المره دي بس مشي بيها امورك تمام لاحظت لي شيتات كتيره في السرير قلت ليهو البقرا ليكم منو قال لي انا ☝🏼 قلت ليهو جد قال لي اي والله بدرس ف الجامعه ووقت فراغي بمش السوق مع مهند ادعي لي عندي امتحانات قلت ليهو م بنساك وربنا يوفقك ي مهيد بتدرس شنو قال لي هندسه قلت ليهو م شاء الله موش انتو تؤام قال لي لا مهند دا اخوي الصغير قلت ليهو شنو شنو قال لي والله انا الكبير بس مهند شقيان شديد قلت ليهو فعلا شقيان وتعبان بس شكلو بحب المغامره وبتكيف للشغل قال لي شديد هسي انا م زييو بحب القرايه اكتر م بحب المغامرات قلت ليهو ربنا يوفقك ودعتو ومشيت امو ادتني اكل لي اخواني قلت ليها حسيتي بي اني م عملت شي الليله زهجانه قالت لي مالك حكيت ليها بالحقيقه وطلبت منها تسكت عليها قالت لي اصلو الراجل دا ما ارتحت ليهو ويازوله بركه الاحرجتي هو مفتكر كل البنات تافهات زيو وماتزعلي بكره تلقي شغل احسن عليهو قلت ليها ان شاء الله شيلت الاكل ومشيت لقيت اخواني مقفلين البيت عليهم وما شالله يقرو قرايه قلت ليهم انتو تعبانين قالو لي لا لا م تعبانين عايزين نقرا انا كنت تعبانه ومهلكه نومتا اختي

 

 

وصليت العشاء ونومتا خليتهم يقرو كل ما ارفع راسي القاهم يقرو شاكلتهم قلت ليهم كده م ح تفهمو نومو حبه قفلو الكتب وندي جات نامت جنبنا وناجي نام ف السرير التاني الصباح صحيت عملت ليهم الشاي وسمعت الباب بدق فتحتو لقيتو مهيد قال لي ماجهزتو قلت ليهو دقايق بس بجيك غلبني افضلو قلت ليهو معليش م بقدر اقول ليك اتفضل عشان انا براي قال لي اكيد ي نوسه اخدو راحتكم وانا بنتظركم ما تتأخرو عشان انا عندي شغل ف الجامعه قلت ليهو طيب لمن رجعت لقيت اخواني لابسين وشايلين شنطهم دخلت لبست عبايتي وطلعت مشينا المدرسه طوالي قبلهم ومجان عشان ايتام شكرتهم ودخلت اخواني الفصول ورجعت مهيد قال لي امشي علي امي م تقعدي براك قلت ليهو ان شالله رجعت البيت فطرت اختي وحسيت نفسي نعسانه نومتا نومه م صحيت الا بصوت اخواني جو وفرحانين قالو لي المدرسه حلوه قلت ليهم الحمدلله انتو شدو حيلكم وان شاءالله تكونو من المتفوقين فتحت تلفوني لقيت رسايل من المدير كتير احترت لقيتهن عباره عن رسايل حب وغرام قلت ليهو انت م بتفهم ماترسل لي هنا لو سمحتا انا اتسترت عليك بس المره الجايه بفضحك وحظرتو وهو شغال اتصل بجيني اشعار انو في زول حاول يتصل بيك بس م ركزت معاهو وطبعا مرتو نهاي لا رسلت لي لا سالتي قالت لي انتي مالك لغايه م يوم لاقيتا عند ناس مهند وكانها م بتعرفني وتطاعن فيني بالكلام والناس القاعدين كلهم فهمو انها قاصداني انا نهاي م اتأثرت لاني عارفه نفسي شنو شكلو وصلها كلام غلط بس نهاي م فكرت اعرف القصه شنو استاذنت ومشيت منهم المهم تمر يا الايام وامر يا الزمن مهند جانا ف البيت لاول مره طلعت السرير في الحوش وفضلتو فيهو وعملت ليهو قهوه قال لي عايزك في موضوع ضروري بقيت محتاره موضوع شنو ي مهند قال لي جاك عريس قلت ليهو عريس ان شاء الله خير دا منو قال لي راجل مره وقال م عندو مشكله بخليك مع اخوانك قلت ليهو منو قال لي عمار طبعا عمار دا المدير راجل صحبتي قلت ليهو شنو شنو …….. يتبع
م كنت عايزه انزل الحلقه لانو الحاصل في الفاشر يقطع القلب💔 دعواتنا ليهم ربنا ينصرهم ويحفظهم

 

 

• لقراءة باقي فصول الرواية أضغط على (رواية رغبة في الإنتقام)