رواية رغبة في الإنتقام الفصل الثالث 3 بقلم نوسة حمد

رواية رغبة في الإنتقام الفصل الثالث 3 بقلم نوسة حمد

 

 

البارت الثالث

 

 

#رغبة_في_الانتقام3
#نوسه حمد
بقيت افتش لي نادر اخوي سماء ارض م لقيتو واسال زول زول اقولو ما شافوهو واي زول يقول لي ليه خليتي طلع الولد دا زمان امك من جنبها ما كانت بتخلي ازح كلام الناس ورده فعلهم كانت بتكتلني وانا علي العلي ميته وروحي طالعه واختي م مستحمله اللف اللفيتو بيها وهي لسه صغيره عمرها ايام القدرها امها راقده بيها ولسه م ربعنت بس اختي ربنا كتب ليها الشقاوه من عمرها يوم وطبعا للان ما سميتا اسم انا كنت بقول ليها اميمه علي امي وابوي لا قال النسمي ليها ولا خيلاني قالو يسمو ليها ابوي اصلا حق السجاير بشيلو مننا وخيلاني بكرهو ابوي ما بحبو يعملو لينا اي حاجه بقولو لي امي م ح نعلمو نديهو عشان م يشتغل وينتكل عليناوامي كان غالبها تقول ليهم كده كده هو متنكل علي امي ما كتلتها الولاده امي ماتت بسبب الهم البياكل في لحمها كل يوم 💔💔💔 وكان بتقدر ابوي بس ابوي عمرو م قدرها حتي لمن ماتت ما سترها امي م شالت الهم براها انا شيلتني ليهو معاها والحمد لله م زعلانه علي قسمتي بس ربنا يقدرني رجعت البيت وانا كلي هم لقيت اخواني في الشارع يبكو قلت ليهم مالكم والدنيا كانت ليل قالو لي خايفين قلت ليهم ابوي وين قالو لي طلع عرفتو خلاص مشا اشرب ولا يلعب قمار ولو خسر البعملو لي امي بجي يعملو لي انا شيلت هم ودخلت اخواني وجنيه م

 

 

عندي عشان اجيب ليهم لبن ودايره ابكي عديل حالتي تصعب علي الكفار وما بقدر امد يدي امي عودتنا م عندنا ننوم وما نمد يدنا قلت ليهم نومو قالو لي جيعانين قلت ليهم ماف اكل نومو ناجي اخوي عبيط وندي اعبط منو امي كانت مدلعاهم وكانت حافظه ابوي بتدس القروش في شرابها وبتخلي ليهو حبه ف المطبقه لانو هو لو م شال القروش كلهن م برتاح بس انا دقستا وقررت اني اخلي قروش بسيطه ليهو والباقي امسكو لي زول اخواني من الجوع م نامو والبيت م فيهو عيشه ناشفه واخير هم فطرو انا فطور م فاطره والبت الصغيره حليبا كمل وانا م بي يدي شي بكو لمن فترو ونامو انا بعد نامو قومتا جهزتا حاجاتي وغلبني انوم ابكي الليل كلو اتزكرت نادر اخوي مابعرف حاجه ح يكون وين ياربي قلبي وجعني عليهو ضيعت الامانه والسبب ابوي حق اخوي في رقبتو لمن يموت قلت الواطه بعد تصبح ح اتصل علي خيلاني يشوفوهو لي انا غلبني خلاص التصرف سرحانه كده سمعت صوت ابوي وانا كنت راقده في سريرو ومرقده اختي الصغيره جا من بعيد اكورك الراقد في سريري دا منو قلت ليهو انا يابا قلت مسافه تجي قال لي قومي سريع وشيلي الشافعه دي عشان ما اجدعها بي زهجتي دي الحقها امك واخوك طبعا بعملا لانو قاسي وسكران ما واعيدقلت ليهو ابوي صحصح معاي دي مسؤوليه مفترض انت تشيلا ما انا ضيعت اخوي وعايز كمان تضيع ديل انت مدام م قادر علي العرس معرس لشنو طبعا اول يوم اعلي صوتي عليهو وامي ليها حق تتناقش معاهو ابوي زول م واعي ممكن يعمل اي شي قال لي ي بت هوي اوعك تحاسبيني انا لو ما عرست امك كان انتي جيتي في الدنيا دي قلت ليهو جيت لشنو جيت للهم وجيت للغم القدري عايشات في فتره مراهقه انا شايله لي هم اطفال ابوهم عايش لا عيان لا مشلول لا اعمي ورافض الشغل عشان شنو انا بس عايزه اعرف وامي ليه زاتا تسكت وتخليك تطلع لينا في راسنا قال لي انتي عايزه تربيه من جديد وطلع قاش بنطلونو وبقا يضرب فيني المنظر دا زكرني امي ابوي م عندو رحمه كان ح يضرب البت الصغيره بس بقيت ضاماها علي شديد واخواني بعد نامو بتعب قامو يبكو يوم عدا علي صعب شديد صحيت الصبح طلعت بي صينتي بره وسوقتا معاي اخواني والدنيا كانت برد ملابس سمحه م عندهم متكرفسين فيني كانو وبقيت ابكي منتظراها تصبح سمح عشان اتصل لي خيلاني امام الجامع جا طالع لقاني قاعده قال لي ي بتي الدنيا برد قومي ادخلي ودخلي اخوانك ديل قلت ليهو الظروف يابا جابراني قال لي الرزق الحلال زيو ماف وهاك ي بتي دي حاجه بسيطه قلت ليهو لا انا م بشيل حاجه من زول ممكن بس تشتري مني قال لي ي بتي دي رحمه جاتك من الله قلت ليهو امي بتقول الصدقه تميت القلب وانا م عايزاها عشان م عايزه قلبي يموت واعتمد عليها انا عايزه بعرق جبيني ااكل اخواتي زي م امي الله يرحمها كانت بتعمل قال لي خلاص انا بشتري منك ودنقر شال ليهو كيسين فول وتسالي وفات وانا شغاله اقول ليهو الباقي يابا وهو م اشتغل بي فات حمدتا الله وسوقت اخواتي ورجعت البيت اشتريت لبن وحاجات كامله للبيت وبسكويت لي اخواني وعارفه ابوي في ثانيه بياكلو بس ادسو وين في الغرفه الواحده دي معانيا من كل النواحي سقيتهم الشاي وطلعت قبل ابوي م يصحا اتصلت علي خالي ردا علي قلت ليهو خالي نادر راح قال لي كيف الكلام دا وانتي كنتي وين قلت ليهو انا كنت ف الشارع ببيع قال لي تبيعي شنو ي بت اتزكرت انو زمان امي ما مكلماهم انها هي البتصرف علي البيت عشان خجلانه منهم بقيت اتمتم ليهو قال لي ابوك ابكرشه دا وين فتش ليهو ولا لا قلت ليهو ماخلينا مكان اتعمدت اطنش اي كلمه علي ابوي عشان م ازيد الطين بله هم اصلا بكرهو التقول حاسين بيهو قال لي انا مافي في الابيض بوصي ناس يسالو ليكم منو وقفل الخط ما استفدتا اي شي من اتصالي واتصلت علي خالاتي بقو يتحسرو عليهو ويندمو فيني اني اهملت فيهو قفلت الخط في وشهن واتعلمت درس انو حاجتك الخاصه بيك ماف زول بقضاها ليك لو كسرت رقبتك بقيت ادعي في سري ربنا يحفظ نادر واتزكرت امي كان عندها اوراد كده بتقولن بقيت اقول فيهن ومن دون الايام بعتا حاجاتي كلها وقروشي كانت كتيره الحمد لله امام الجامع القبيل اداني القروش مشيت ليهو ف البيت قال لي ي بتي الجاتك من الله

 

 

شيليها من سكات قلت ليهو شيلتها بس م عايزه اتعود عليها وانا جيتك في خدمه يابا عايزاك كل يوم تمسك لي القروش دي قال لي جداا انا اصلا عندي خزنه ونعمل ليك ورقه وقلم وكل يوم نسجل البتجيبي قلت ليهو تمام وطلعت منو شيلت لي قروش حبه وصينتي فاضيه ورجعت ابوي قال لي الليله بعتي الحاجات كلها قلت ليهو بعتها بس سددت بيها دين امي الله يرحمها قال لي دين شنو الحي ابغا من الميت قلت ليهو المثل دا ما بستخدمو هنا قال لي هوي ما تعملي لي فيها بتعرفي تاني اوعك تسددي دين خلي الناس بعفو ليها قلت ليهو البعفا ليها منو اقصاد التلاجه لسه شغالين فيها وبقا يكورك ما اشتغلت بيهو اديتو قروش حبه والباقي قلت ليهو حق اكل اخواني وعايزه اشتري حاجات
بقيت عايشه في الحال دا شهور وما بمر علي يوم وابوي بخليني في حالي لازم يضربني ومستحملاهو عشان هو ابوي والحمد لله ربنا موفقني شديد وكل يوم بشتغل اكتر من القبلو وادي حاج احمد القروش كان زول طيب شديد قال لي ي بتي قروشك دي بقت كويسه رايك شنو تشتري بيهن قطعه ارض قلت ليهو قطعه ارض شنو يابا القروش دي بسيطه قال لي لا انا عندي ليك فهم ناس الحله مطلعين اراضي سكينه بمبلغ رمزي لناس الحله خطط سكنيه وانتي ليك الاولويه رايك شنو انا بخلصها ليك فرحت شديد وشكرتو قال لي خلي الموضوع دا علي بس جيبي لي ورق ابوك اسجل ليكم الارض قلت ليهو لا لا يابا م ممكن تسجلا بي اسمي قال لي لا ممكن الا بأسم ابوك قلت ليهو طيب مشيت جبتا الرقم الوطني بتاع ابوي واديتو لي حاج احمد ومشيت بعد شهر جاب لي ورق الارض وكنت مبسوطه شديد وقررت اني ان شالله ابني لي غرفه واحده وبقيت اسعي شديد اني ابني وربنا موفقني من فوق الحمد لله بس الحاجه القاطعه قلبي نادر اخوي الله اعينو كل م اجيب سيرتو ابوي بقول لي الله ريحك منو كان جننك هسي لمن اقول لي كده بقطع قلبي زياده
مرت الايام والشهور والسنيت واختي كبرت شويه بقت تمشي وانا قدرت ابني لي غرفه ومطبخ وحمامات وكلمت ابوي م صدق ورحلنا فيهن اخيرا واخواني كانو في المدارس وكنت براجع ليهم والاتنين كانو الاوائل وانا طبعا خليت القرايه نسبه لظروفي قلت الانحرمت منو يصلو ليهو اخواني والحمد لله م قصرت منهم حتي اختي دخلتها روضه وطبعا سميتها اميمه علي امي وطلعت ليها الشهاده
مرت الايام والشهور لغايه ما ابوي جاني بمصيبه …….يتبع تتوقعو المصيبه دي شنو

 

 

• لقراءة باقي فصول الرواية أضغط على (رواية رغبة في الإنتقام)