رواية خلف الابواب المغلقه الفصل الرابع 4 بقلم مشاعر مبعثرة

رواية خلف الابواب المغلقه الفصل الرابع 4 بقلم مشاعر مبعثرة

 

 

البارت الرابع

 

 

# خلف- الابواب- المغلقة4#
بقلمي: مشاعر – مبعثرة
اليوم داك نمنا شبعانين واجسادنا مرتاحه لا باعوض قرصنا ولا اتعرقنا من السخانه، حتى مهيلم الكان بصحى يكدكد الليل كلو ما صحى ولا بكاء، رامي أطرافو في السراير وماخد مساحه اكبر منو، وانا ما بكيت اليوم داك والغريبه ما حسيت بالعجز لاني قبلت صدقه ومساعدات!!
تاني يوم من الصباح عملت الشاي ومشيت دقيت باب جيرانا جاء فتح لي هو عين مغمضه وعين مفتحه وخاتي الفرشه في خشمو.
ابتسمت وقلت له : صباح الخير يا جاري.
هو من الخلعه قرب يرمي الفرشه وخجلان من شكلو🙊.
قال لي بتمتمه : ص صباح النور يا جارتي.
: جبت لكم شاي الصباح.
: يسلمو لينا يديك.
قلت له بمزاح كدا م حاتقول لي شنو التعب دا؟
: والله تاري بتعرفي تهظري!😅
ابتسمت بخجل قال لي لالا ما بقول كدا بالعكس ريحتينا، ولو عملتي لينا الفطور تكوني ما قصرتي😁
: بس كدا؟ ما عندك مشكله جيبو.
طبعا كنت جاده قعد يضحك وقال لي كتر خير يا جارتنا.
بعد من الباب شويه وقال لي اتفضلي.
: شكرا لك بس خليت اولادي براهم.
مشيت عملت شغل الصباح وطبخت الاكل كتير وعيطت على ليان بالحيطه جاتني صبحت عليها وقلت لها : يا بنتي الليله ما تطبخي حاجه وتعالو عازمنكم فطور.
: بس نحن….
: مافي بس جيبي اخوانك وتعالي.
: طيب اتصل ب بابا اكلمو.
طبعا هو شكلو موصيهم ما يكسروني ولا يرفضو مني حاجه عشان كدا جو على طول.
هم بتين بس ليان الكبيره والصغيره لين عمر 10 سنين تقريبا. قعدنا اكلنا واتونسنا سألتهم عن اسرتهم.
ليان قالت لي : امي اتوفت زمان وقاعدين مع ابوي حبوبتي من امي برضو متوفيه بجو بس مرات يطلو علينا اما والدة ابوي بعيدة متواصله معانا بالتلفون بس برضو مرات بتجي وعندنا عم ساكن هنا قريب قلت لها متزوج؟ قالت لي لالا قاعد في بيت عزابه
: ايوااا ربنا يقسم له.
: يا خالتو انا عاوزه اسألك من حاجه ما بقدر اقولا لابوي.
: اتفضلي حبيبتي.
قامت من محلها وجات قعدت جنبي وشوشتني في اضاني.
طبعا هي في سن البلوغ وفي تغيرات في جسما شرحت لها الحاصل وقلت لها لو حصل معاك اي شي احكي لي انبسطت شديد.
قعدو معانا لمن ابوهم جاء مشو له وهو اطمن علينا بالحيطه ورفع لينا اكياس كل مره بخجلني طبعا وما بقدر غير اقول له جزاك الله خير.
وقفنا مسافه بالحيطه سألني : انتي اهلك من وين؟ يعني امك واسرتك قاعده تتواصلي معاهم كيف؟؟
: ما بتكلم معاهم.
: ب بس هم ما بسألو يعني؟ انا ما قصدي شي بس يعني ما عارفين بوضعك؟ او ما فكرو يجو ياخدوك محل قاعدين؟
ما تفهمي كلامي غلط بس عشان انتي مرا وحدانيه سألتك سكتت منو تاني ما كتر معاي
بليل جاء دق بابنا وهو متردد انا زاتي خفت قبل افتح الا قال لي انا ابو ليان فتحت له
كان متوتر وخايف شديد وفي نفس الوقت محرج قال لي : انا اسف على الازعاج بس ليان بنتي تعبانه شديد والله وشكلا عندها مغص رفضت تمشي معاي المستشفى ولا تخليني افحصا ما على لسانا غير نادي لي سمر
بنتي تعبانه شديد وشكلا عندها مغص، رفضت تمشي معاي المستشفى ولا تخليني افحصا ما على لسانا غير نادي لي سمر
: بسم الله الرحمن الرحيم مايكون عندها تسمم؟
: دا الخايف منو بس منكمشه على نفسا ومتغطيه ب البطانيه.
طوالي طلعت قدامو وقلت له : ماشه عليها بس عليك الله خليك مع اولادي شويه عشان الدنيا ليل.
تمام ما تنسي تطمنيني عليك الله.
: حاضر ما تخاف ربنا يحفظا.
مشيت لقيتا ممغوصه شديد وورتني بالحاصل معاها خلاص وصلت مرحلة الكمال.
قفلت لها المكيف وهديت اختا الكانت قلقانه بعداك مشيت المطبخ غليت لها زنجبيل واديتا شربت منو ناديت على ابوها بالحيطه جاني ملهوف.
قلت له اطمن هي كويسه وما فيها شي شوية مغص قال لي مغعص من شنو لكن
سكت وبعد مسافه قلت له : ممكن تجيب لي الشنطه الصغيره بتاعة البيبي؟ قاعده في سرير مهيلم
ذاد استغرابو وقال لي
: ليه في شنو؟
: مافي شي جيبا بس🙈
مشى شالا طبعا فاتحه من استعجالو وقعا وانزلق منها كيس الفوط شكلو يداب فهم القصه ختاه في كيس اسود وناولني له هو براه
قعدت اعاين له باستغراب.
نزل راسو وقال لي البنت كبرت صح؟؟
هزيت راسي وهو اتنهد حتى قال : بنتي وما قدرت افهما ولا حتى قادر اقدم لها حاجه.
قلت له : البنت في العمر دا بتحتاح التوجيه، وكمان زول يكون قريب منها ويفهما ابعاد المرحله دي والمنتظرا لقدام وحتى كيف تتصرف في المواقف المفاجئة وغيرا، بس ما تخاف انا معاها.💚
: جزاك الله خير يا جارتي.
مشيت وديتو لها وفهمتا الطريقه فضلت معاها الليل كلو مرات تبكي ومرات تنوم وتتقوقع كل دقيقة تجري الحمام الا وقفتا وقلت لها تصبر وتتحمل الشعور المزعج دا وريتا كمان وضعية تريحا بقت خاته راسا في رجولي ورجولا على الحيطه لمن نامت انا زاتي غفيت صحيت مخلوعه شديد صلحتا في السرير وغطيتا بعداك قمت على حيلي، ما مصدقه اني نمت في بيت الناس، قمت طالعه لقيت الباب بنفتح قربت اصرخ جاء داخل هو و قال لي دا انا جارك ما تخافي
ابو ليان؟؟؟
: ايوا ما تخافي.
: جبت لك ولدك صحى وقعد يبكي.
: لالا خلاص انا بمشي على بيتي.
: لو سمحتي خليك وانا البمشي انوم بهناك. : بس البنت وضعا تمام اسي ونامت.
: عارف اني بتعبك معاي وبعتزر بس اعتبريه طلب لو سمحتي خليك مع البنات الليله ليان حساسه وامكن تحتاج حاجه ما تقدر تقولا لي.
: لالا مافي تعب خلاص تمام.
: خلو بالكم من نفسكم واقفلي الباب كويس انا راقد برا في الحوش لو حصل اي شي نادي علي.
حاضر، تصبح على خير
:وانتي من اهلو
مشيت رقدت في غرفة بناتو وهو رقد في بيتي بس انا للصباح ما نمت ما صدقت الاذان اذن صليت و قمت جاريه على بيتي صادفني في الشارع، فكاها ضحكه.😅
قال لي : كل واحد بالو في بيتو واولادو.
: صح والله اول مره انوم بعيده عنهم.
: ربنا يخليك لهم ليان كيف؟
: كويسه بس في حاجات…..
: ما تخافي بجيب لها كل البتحتاجو من الصيدليه.
مشيت شفت اولادي لقيتهم نايمين لسه نضفت بيتي وعملت الشاي عاوزه امشي اودي للجيران الباب دق فتحت لقيتو…….يتبع♥️

 

 

• لقراءة باقي فصول الرواية أضغط على (رواية خلف الأبواب المغلقة)